ប្រទេសចិន៖ យន្តហោះប្រភេទ supersonic ដែលមានល្បឿនរហូតដល់ ៥០០០ គីឡូម៉ែត្រក្នុងមួយម៉ោងនឹងធ្វើការហោះហើរសាកល្បងជាលើកដំបូងនៅឆ្នាំ ២០២៦។
យន្តហោះប្រភេទ supersonic ដែលមានឈ្មោះថា Cuantianhou ឬ Flying Monkey គឺជាយន្តហោះទំនើបដែលផលិតនៅក្នុងប្រទេសចិន ដោយក្រុមហ៊ុនអាកាសចរណ៍ Lingkong Tianxing Technology ត្រូវបានគេចាត់ទុកថាជាយន្តហោះល្បឿនលឿនបំផុតមួយរបស់ពិភពលោក។

យន្តហោះនេះមានប្រវែង ៧ ម៉ែត្រ ជាមួយទម្ងន់ ១.៥ តោន ដែលបច្ចុប្បន្នកំពុងស្ថិតក្នុងដំណាក់កាលស្រាវជ្រាវ និងអភិវឌ្ឍន៍នៅឡើយទេ ប៉ុន្តែត្រូវបានគេរំពឹងថាយន្តហោះបច្ចេកវិទ្យា Cuantianhou ទំនងនឹងធ្វើការហោះហើរសាកល្បងលើកដំបូងក្នុងឆ្នាំ ២០២៦។ នេះបើយោងតាម Lingkong Tianxing Technology ដែលជាក្រុមហ៊ុនអាកាសចរណ៍ មានទីស្នាក់ការកណ្តាលនៅទីក្រុងប៉េកាំងបានប្រកាសកាលពីថ្ងៃទី ២០ ខែមករា នៅក្នុងសន្និសីទសារព័ត៌មានមួយនៃទីក្រុង Chengdu ខេត្ត Sichuan ប្រទេសចិន។

យោងតាមលោក Deng Fan ដែលជាប្រធានវិស្វកររបស់ក្រុមហ៊ុនបានឱ្យដឹងថា យន្តហោះគំរូ Cuantianhou ឬ Flying Monkey បានប្រើប្រាស់ការរចនាបែបលំហអាកាសដ៏ស្ដើង ដើម្បីកាត់បន្ថយភាពធន់នឹងខ្យល់ និងធ្វើឱ្យការហោះហើរកាន់តែប្រសើរឡើង។ យន្តហោះនេះមានភាពជឿនលឿនដោយសារម៉ាស៊ីន ram-rotor ទំនើបរបស់វា ដែលរួមបញ្ចូលម៉ាស៊ីនរ៉ូតារីស ម៉ាស៊ីនបង្ហាប់ រ៉ូទ័រ និងបច្ចេកវិជ្ជា ramjet ។

ដូច្នេះម៉ាស៊ីននេះនឹងអនុញ្ញាតឱ្យ Cuantianhou ហោះហើរក្នុងល្បឿនអតិបរមា Mach ៤.២ ស្មើនឹងប្រហែល ៥,០០០ គីឡូម៉ែត្រក្នុងមួយម៉ោង ដែលលឿនជាងយន្តហោះធម្មតាជិត ៥ ដង។ ប្រធានវិស្វកររូបនេះបានបន្តទៀតថា ទោះបីជាយន្តហោះមានល្បឿនលឿនបំផុតក៏ដោយ ក៏អ្នកដំណើរនៅលើជើងហោះហើរនៅតែមានសុវត្ថិភាពផងដែរ ដោយសារក្រុមហ៊ុនបានយកចិត្តទុកដាក់ជាមួយការអភិវឌ្ឍន៍ប្រកបដោយគុណភាពខ្ពស់បំផុត ដូច្នេះអ្នកដំណើរមិនចាំបាច់បារម្ភឡើយ៕

ប្រទេសថៃ ៖ កាលពីថ្ងៃទី២១ ខែមករា ឆ្នាំ២០២៥ លោក អេកការ៉ាន់ញូ អាប់រ៉ាក់បាន មន្ត្រីនាំពាក្យសាលាក្រុងបាងកកនិយាយថា សាលាក្រុងបានប្រកាសឱ្យបិទសាលារៀន២១កន្លែង និងពន្យារពេលធ្វើការពីផ្ទះ (Work from Home) ចាប់ពីថ្ងៃទី២២ ដល់ថ្ងៃទី២៤ ខែមករា ដើម្បីកាត់បន្ថយបរិមាណរថយន្តបើកបរនៅតាមផ្លូវ ដែលធ្វើឱ្យធូលីកខ្វក់កើនឡើងខ្លាំងក្នុង៥០តំបន់របស់ទីក្រុង ។

កន្លងមក សាលាក្រុងបានស្នើសុំការសហការពីមន្ត្រីរាជការ ក្រុមហ៊ុនឯកជន និងពលរដ្ឋ ធ្វើការពីផ្ទះចាប់ពីថ្ងៃទី២០ ដល់ថ្ងៃទី២១ ខែមករា ហើយសាលាក្រុងនឹងពន្យារពេលធ្វើការពីផ្ទះបន្តទៀត បើធូលីកខ្វក់នៅតែកើនឡើងខ្លាំង ។ រយៈពេល២ថ្ងៃ គឺចាប់ពីថ្ងៃទី២០ ដល់ថ្ងៃទី២១ ខែមករា បរិមាណធូលីកើនឡើងលើសស្តង់ដារក្នុង៥០តំបន់ ។

បើពលរដ្ឋណាពុំអាចធ្វើការពីផ្ទះ ឬចាំបាច់ត្រូវចេញពីផ្ទះ សូមឱ្យប្រុងប្រយ័ត្នថែទាំសុខភាព ជាពិសេស កុមារ ស្ត្រីមានផ្ទៃពោះ មនុស្សចាស់ និងអ្នកជំងឺសួត, អាឡែស៊ី, បេះដូង, តម្រងនោមរ៉ាំរ៉ៃ និងដាច់សរសៃឈាមខួរក្បាល គួរពាក់ម៉ាស់ការពារធូលីជានិច្ចពេលចេញពីផ្ទះ និងកំណត់ពេលវេលានៅក្រៅអគារ ។

ពលរដ្ឋគួរផ្អាកធ្វើការ ឬហាត់ប្រាណនៅកណ្តាលថ្ងៃយូរ និងពិនិត្យអាការៈខុសប្រក្រតី ដូចជា ៖ ក្អក ពិបាកដកដង្ហើម និងរមាស់ភ្នែក បើមានអាការៈខុសប្លែក ត្រូវប្រញាប់ទៅជួបគ្រូពេទ្យ និងអនុវត្តតាមការណែនាំរបស់គ្រូពេទ្យ ។ ក្រៅពីនេះ គួរសម្អាតផ្ទះដោយជូតធូលី, ផ្អាកដុតសំរាម និងដុតធូប, ដាំដើមឈើជួយស្រូបជាតិពុល និងកម្ចាត់ធូលី, ធ្វើដំណើរតាមមធ្យោបាយសាធារណៈ, ពន្លត់ម៉ាស៊ីនពេលចតរថយន្ត និងពិនិត្យម៉ាស៊ីនរថយន្តឱ្យដំណើរការល្អ កុំឱ្យបញ្ចេញផ្សែងលើសស្តង់ដារ ។

ដោយឡែក សាលារៀននានានៅទីក្រុងបាងកក ត្រូវអនុវត្តវិធានការការពារធូលី និងដោះស្រាយបញ្ហាធូលីកខ្វក់ក្នុងបរិវេណសាលា ដោយនាយកសាលាមានសិទ្ធិបិទសាលាពេលមានធូលីកខ្វក់ខ្លាំងដើម្បីសុវត្ថិភាព និងសុខភាពកូនសិស្ស ។ បច្ចុប្បន្ន សាលារៀន២១កន្លែងបានបិទទ្វារដោយសារធូលីប៉ះពាល់សុខភាព ៕

ប្រទេសថៃ ៖ មន្ត្រីនាំពាក្យទីស្តីការនាយករដ្ឋមន្ត្រី លោក ខារុម ផុនផមក្លាង ឱ្យដឹងថា រដ្ឋាភិបាលថៃនឹងអនុញ្ញាតឱ្យពលរដ្ឋស្រឡាញ់ភេ.ទ ដូចគ្នាអាចចុះសំបុត្រអាពាហ៍ពិពាហ៍នៅទូទាំងប្រទេស ចាប់ពីថ្ងៃទី២៣ ខែមករា ឆ្នាំ២០២៥ នៅតាមសាលាស្រុក ខេត្ត ព្រមទាំងចុះនៅស្ថានទូត-ស្ថានកុងស៊ុលថៃនៅ៩៤ប្រទេស ក្រោមគំនិត «Embracing Equality : Love Wins in 878 Districts» ក្រោយពីច្បាប់អាពាហ៍ពិពាហ៍អ្នកស្រឡាញ់ភេទដូចគ្នាចូលជាធរមាន ។

ការអនុញ្ញាតឱ្យពលរដ្ឋស្រឡាញ់ភេទដូចគ្នាចុះសំបុត្រអាពាហ៍ពិពាហ៍នេះ គឺក្នុងគោលបំណងឱ្យពួកគេបានរៀបអាពាហ៍ពិពាហ៍រស់នៅជាក្រុមគ្រួសារ ។ នៅថ្ងៃទី២៣ ខែមករា គឺជាថ្ងៃដែលច្បាប់អាពាហ៍ពិពាហ៍អ្នកស្រឡាញ់ភេទដូចគ្នាចូលជាធរមាន ហើយរដ្ឋាភិបាល និងស្ថាប័នពាក់ព័ន្ធនឹងផ្តល់ភាពងាយស្រួលឱ្យអ្នកស្រឡាញ់ភេទដូចគ្នាអាចចុះសំបុត្រអាពាហ៍ពិពាហ៍បាន ដើម្បីលើកកម្ពស់ភាពស្មើគ្នា យេនឌ័រ និងពុំរើសអើង ។

លើសពីនេះ វាជាការលើកកម្ពស់មុខមាត់ប្រទេសថៃនៅលើឆាកអន្តរជាតិផងដែរ ដែលថៃជាប្រទេសមួយទទួលស្គាល់, គោរពសិទ្ធិមនុស្ស និងគាំទ្រភាពចម្រុះផ្លូវភេទ ។ ហេតុនេះ សូមអញ្ជើញគូស្នេហ៍ស្រឡាញ់ភេទដូចគ្នាទាំងអស់មកចុះសំបុត្រអាពាហ៍ពិពាហ៍នៅសាលាស្រុក និងខេត្តទូទាំងប្រទេស ។ នេះបើតាមការលើកឡើងរបស់មន្ត្រីនាំពាក្យទីស្តីការនាយករដ្ឋមន្ត្រី ។

ច្បាប់អាពាហ៍ពិពាហ៍អ្នកស្រឡាញ់ភេទដូចគ្នាចូលជាធរមានបញ្ជាក់ថា ប្រទេសថៃបានបើកទំព័រប្រវត្តិសាស្ត្រថ្មីសម្រាប់ការគោរពសិទ្ធិមនុស្ស និងភាពស្មើគ្នាខាងផ្លូវភេទ ។ លើសពីនេះ វាជាការបោះជំហានមួយដ៏សំខាន់ ដែលបង្ហាញពីការផ្លាស់ប្តូរក្នុងសង្គមថៃ និងការព្រមទទួលស្គាល់ស្នេហាពុំប្រកាន់ភេទ ។ ច្បាប់នេះពុំបានកើតឡើងដោយសារការព្យាយាមរយៈពេលខ្លីទេ ប៉ុន្តែវាជាលទ្ធផលនៃការបំពេញការងាររយៈពេលយូរ ដើម្បីផ្លាស់ប្តូរទស្សនៈពលរដ្ឋថៃ ដែលតែងតែរើសអើសសេ្នហាបែបនេះ ។

លទ្ធផលការស្ទង់មតិបង្ហាញថា ពលរដ្ឋថៃបច្ចុប្បន្នយល់ឃើញថា សេចក្តីស្រឡាញ់ គឺពាក់ព័ន្ធនឹងផ្លូវអារម្មណ៍ និងជាទំនាក់ទំនងរបស់មនុស្ស២នាក់ មិនថាពួកគេមានភេទផ្ទុយគ្នា ឬដូចគ្នា ។ ហេតុនេះ សេចក្តីស្រឡាញ់មិនប្រកាន់ភេទ នឹងពុំត្រូវបានបំបិទសិទ្ធិផ្នែកសង្គមដូចកាលពីសម័យមុនទេ ។ ថ្ងៃទី២៣ ខែមករា មិនត្រឹមតែជាថ្ងៃដែលច្បាប់ទទួលស្គាល់ប៉ុណ្ណោះទេ ប៉ុន្តែវាជាថ្ងៃអបអរសេចក្តីស្រឡាញ់ ក្តីសង្ឃឹម និងការផ្លាស់ប្តូរក្នុងសង្គម ៕