នៅក្នុងពិភពលោកយើងនេះ មានសត្វស្លាបជាច្រើនប្រភេទ ដែលមានលក្ខណៈខុសៗគ្នាពីមួយទៅមួយ។ សត្វស្លាបប្រភេទខ្លះតូច ខ្លះធំ ខ្លះអត់ចេះហើរជាដើម តែបើនិយាយពីទំហំស៊ុតវិញ សត្វស្លាបដែលផ្ដល់ស៊ុតធំជាងគេបំផុតនោះគឺ សត្វអូទ្រីស។ សត្វអូទ្រីសគឺជាសត្វដែលមានស៊ុតធំបំផុតក្នុងប្រវត្តិសាស្ត្រ ជាមួយប្រវែងរហូតដល់ ៣៣ សង់ទីម៉ែត្រដែលនៅតែមានដល់សព្វថ្ងៃនេះ។

ប្រភេទសត្វស្លាបនេះ មានអម្បូរជាមួយនឹងសត្វគីវី (Kiwi) ហើយវាត្រូវបានរកឃើញនៅទូទាំងពិភពលោកតែម្តង ប៉ុន្តែភាគច្រើនវាសម្បូរមាននៅទ្វីបអាហ្វ្រិក ដូចជាអាហ្វ្រិកខាងជើង អាហ្វ្រិកខាងត្បូង និងអាហ្វ្រិកខាងកើតជាដើម។ ស៊ុតអូទ្រីសធំបំផុតក្នុងប្រវត្តិសាស្ត្រមានទម្ងន់ ៤៥០ គីឡូក្រាម ស្មើនឹងខ្លាឃ្មុំផេនដា ៣ ក្បាល ជាមួយប្រវែងរហូតដល់ ៣៣ សង់ទីម៉ែត្រដែលអាចផ្ទុកសារធាតុរាវបាន ៨.៥ លីត្រ នេះបើយោងតាមសៀវភៅកំណត់ត្រាពិភពលោកហ្គីណេស។

ទោះជាយ៉ាងណាបច្ចុប្បន្ននេះស៊ុតអូទ្រីស មានទម្ងន់ជាមធ្យមត្រឹមតែ ១.៤ គីឡូក្រាមប៉ុណ្ណោះ ដែលមានទទឹងជាមធ្យម ១៣ សង់ទីម៉ែត្រ និងបណ្ដោយប្រមាណ ១៥ សង់ទីម៉ែត្រ។ ទោះបីជាវាមានទំហំតូចជាងមុនបន្តិចក៏ដោយ ក៏ស៊ុតអូទ្រីសនៅតែជាប់ឈ្មោះជាស៊ុតធំជាងគេបំផុតក្នុងលោកផងដែរ។ ស៊ុតអូទ្រីសត្រូវការរយៈពេលប្រមាណ ៣៥ ទៅ ៤៥ ថ្ងៃដើម្បីញាស់ចេញជាកូនអូទ្រីស។

ស៊ុតអូទ្រីសត្រូវបានគេនិយាយតៗគ្នាថា ផ្តល់អត្ថប្រយោជន៍ជាច្រើនចំពោះសុខភាពរាងកាយរបស់មនុស្ស ដោយសារវាសម្បូរទៅដោយជាតិប្រូតេអ៊ីនដែលចាំបាច់ត្រូវការចិញ្ចឹមសរីរាង្គ។ ដោយនៅពេលខ្លះគេយកស៊ុតសត្វស្លាបធំជាងគេនេះ ទៅធ្វើជាម្ហូប ចំណែកឯស្បែក និងស្លាបរបស់អូទ្រីសវិញ ត្រូវបានគេកែច្នៃជាសម្ភារៈមានតម្លៃផ្សេងៗ។

ក្រៅពីអូទ្រីសសត្វគីវីក៏ជាសត្វបក្សីដែលមានស៊ុតធំជាងគេទីពីរក្នុងលោកផងដែរ ជាមួយទម្ងន់ធ្ងន់មិនធម្មតារបស់វា បានធ្វើឱ្យវាកើតមកមានសុខភាពល្អ មានរោមពេញ និងឯករាជ្យ។ ពងគីវីត្រូវចំណាយពេលប្រហែល ៧៥-៨៥ ថ្ងៃដើម្បីញាស់ ដែលជារយៈពេលដ៏យូរបំផុត៕

លោក Elon Musk នាយកក្រុមហ៊ុន Tesla, SpaceX និងជាម្ចាស់បណ្តាញសង្គម X (Twitter) ដែលមានឈ្មោះល្បីល្បាញជាបុគ្គលមានគំនិតច្នៃប្រឌិតបច្ចេកវិទ្យាថ្មីៗ បាននិយាយពីអត្រាកំណើតធ្លាក់ចុះនៅសិង្ហបុរីក្នុងបណ្តាញសង្គមថា ៖ «សិង្ហបុរី និងប្រទេសជាច្រើនទៀតកំពុងបាត់បង់ជាតិសាសន៍ពីពិភពលោកនេះ» ។

លោកបានបញ្ចេញមតិក្នុងបណ្តាញសង្គម X ទៅកាន់លោក Mario Nawfal ជាបុគ្គលល្បីមួយរូបពាក់ព័ន្ធនឹងអត្រាកំណើតធ្លាក់ចុះនៅសិង្ហបុរី និងតួនាទីមនុស្សយន្តធ្វើការជំនួសមនុស្ស ដើម្បីកាត់បន្ថយផលប៉ះពាល់ដោយសារខ្វះខាតកម្លាំងពលកម្ម ។ ការបញ្ចេញមតិរបស់លោកបានធ្វើឱ្យពិភពលោក ចាប់អារម្មណ៍ពីសង្គមប្រទេសអភិវឌ្ឍន៍ ដែលប្រឈមនឹងចំនួនពលរដ្ឋធ្លាក់ចុះ ។

រយៈពេល៣០ឆ្នាំមកនេះ អត្រាកំណើតនៅសិង្ហបុរីបានធ្លាក់ចុះយ៉ាងខ្លាំង ហើយនៅឆ្នាំ២០២៣ អត្រាកំណើតធ្លាក់ចុះខ្លាំងជាងគេ ដោយសារមានស្ត្រីសិង្ហបុរីតិចតួចផ្តល់កំណើតទារក ។ រីឯមូលហេតុសំខាន់ដែលបណ្តាលឱ្យអត្រាកំណើតធ្លាក់ចុះ គឺដោយសារសង្គមផ្លាស់ប្តូរ ។

ទិន្នន័យរបស់រដ្ឋាភិបាលសិង្ហបុរីបង្ហាញថា ស្ត្រីក្នុងវ័យរៀបការអាយុពី២៥ឆ្នាំ ទៅ៣៤ឆ្នាំ បានសម្រេចចិត្តនៅលីវ ។ រីឯចំនួនគូស្វាមី-ភរិយាមានអាយុ២០ឆ្នាំ ក៏បានធ្លាក់ចុះផងដែរ ដែលជំរុញឱ្យអត្រាកំណើតសរុបធ្លាក់ចុះ ប្រមាណ៣២% ។ ទោះជាអត្រាកំណើតរបស់សិង្ហបុរីធ្លាក់ចុះខ្លាំងគួរឱ្យបារម្ភក្តី ប៉ុន្តែការរីកចម្រើនផ្នែកបច្ចេកវិទ្យាអាចជួយកាត់បន្ថយផលប៉ះពាល់ដោយសារចំនួនពលរដ្ឋធ្លាក់ចុះ ។

ប្រទេសសិង្ហបុរីបានប្រើប្រាស់មនុស្សយន្តច្រើនបំផុតក្នុងផ្នែកឧស្សាហកម្ម និងជាប់លំដាប់ទី២ លើពិភពលោក ។ បច្ចេកវិទ្យារីកចម្រើនធ្វើឱ្យសិង្ហបុរីអាចដោះស្រាយបញ្ហាខ្វះខាតកម្លាំងពលកម្ម ខណៈការជួលមនុស្សធ្វើការត្រូវចំណាយប្រាក់ច្រើន ប៉ុន្តែទទួលបានលទ្ធផលការងារតិច ។

លោក Elon Musk បានចំណាយប្រាក់យ៉ាងច្រើនផលិតមនុស្សយន្តមានរូបរាងស្រដៀងមនុស្ស ធ្វើការជំនួសមនុស្ស និងគ្មានគ្រោះថ្នាក់ ដើម្បីដោះស្រាយបញ្ហាការខ្វះខាតកម្លាំងពលកម្ម ។ ប៉ុន្តែមហាជនបានរិះគន់ពាក្យសម្តីរបស់លោក ហើយពួកគេបញ្ជាក់ថា អត្រាកំណើតធ្លាក់ចុះនៅសិង្ហបុរី ដោយសារបញ្ហាសង្គម និងសេដ្ឋកិច្ច ។

មតិនានាថា ពលរដ្ឋសិង្ហបុរីប្រឈមនឹងបញ្ហាទំនិញឡើងថ្លៃគ្រប់មុខ ហើយនេះជាឧបសគ្គដល់ការរៀបការបង្កើតគ្រួសារ ពីព្រោះឪពុក-ម្តាយមានតួនាទីថែទាំ និងផ្តល់អនាគតល្អឱ្យកូនៗ ។ ក្រៅពីនេះ ផ្ទះនៅសិង្ហបុរីមានតម្លៃខ្ពស់ ពលរដ្ឋគ្មានលទ្ធភាពទិញ ទើបពួកគេសម្រេចចិត្តពុំរៀបការ ៕

ប្រទេសចិន៖ ឥឡូវនេះរោងចក្រក្នុងប្រទេសចិនជាច្រើនបានកាត់បន្ថយបុគ្គលិក ដោយនាំយកមនុស្សយន្តមកធ្វើការជំនួសវិញ បានកំពុងក្លាយជានិន្នាការថ្មីនាពេលបច្ចុប្បន្ននេះ។
មនុស្សយន្ត MagicBot របស់ក្រុមហ៊ុន MagicLab អាចអនុវត្តការងារជាច្រើនដូចជា ការត្រួតពិនិត្យផលិតកម្ម ការគ្រប់គ្រងសម្ភារៈ ការជ្រើសរើស និងតម្រៀបផ្នែក ការត្រួតពិនិត្យសារពើភ័ណ្ឌ និងការគ្រប់គ្រង។ យោងតាម Interesting Engineering មនុស្សយន្តរបស់ក្រុមហ៊ុននេះក៏បានបង្ហាញពីសមត្ថភាពក្នុងការធ្វើកិច្ចសហប្រតិបត្តិការក្នុងកម្រិតតូចមួយ ដោយបង្ហាញថាពួកគេអាចធ្វើការជាមួយគ្នាប្រកបដោយប្រសិទ្ធភាព។

កាលពីខែមករា ក្រុមហ៊ុន MagicLab បានណែនាំមនុស្សយន្តជំនាន់ទី ៣ ដែលមានឈ្មោះថា MagicBot ដែលត្រូវបានរចនាឡើងដើម្បីប្រកួតប្រជែងជាមួយនឹងមនុស្សយន្ត Atlas របស់ Boston Dynamics ។ ក្នុងខែកុម្ភៈ ពួកគេបានចែករំលែកវីដេអូអំពីមនុស្សយន្តធ្វើការជាមួយមនុស្សយន្តគ្នាឯង ដោយធ្វើការយ៉ាងរលូន និងរហ័សរហួនបំផុត។ ដោយសារមនុស្សយន្តមានអត្ថប្រយោជន៍ច្រើន និងឆ្លាតវៃ ទើបរោងចក្រជាច្រើនក្នុងប្រទេសចិនបាននាំយកមនុស្សយន្តមកធ្វើការ ដោយកាត់បន្ថយបុគ្គលិកមួយចំនួនចេញ។

ស្របពេលប្រទេសនេះក៏មានបំណងផលិតមនុស្សយន្តដ៏ច្រើនសន្ធឹកសន្ធាប់នៅឆ្នាំ ២០២៥ និងគ្រប់គ្រងទីផ្សារនៅឆ្នាំ ២០២៧។ បច្ចុប្បន្នមនុស្សយន្ត MagicBot ដែលប្រើក្នុងរោងចក្រអាចបង្វិលបាន ៤២ ដឺក្រេដោយសេរី។ ដៃរបស់វាអាចលើកវត្ថុមានទម្ងន់រហូតដល់ ២០គីឡូក្រាម ខណៈដែលរាងកាយទាំងមូលរបស់វាអាចផ្ទុកទំនិញបាន ៤០គីឡូក្រាម។ លើសពីនេះ MagicBot ក៏មានថាមពលថ្មរហូតដល់ ៥ ម៉ោងនៅពេលធ្វើដំណើរ និងដំណើរការជាបន្តបន្ទាប់ អាចបង្កើនប្រសិទ្ធភាពការងារយ៉ាងរលូន។

ទន្ទឹមនឹងនេះមនុស្សយន្ត MagicBot ក៏មានសមត្ថភាពធ្វើម្ហូប បត់សំលៀកបំពាក់ ស្រោចទឹករុក្ខជាតិ និងរាំតាមតន្ត្រីដ៏រំភើបផងដែរ។ វាក៏មានសមត្ថភាពរៀបចំផែនការដោយសុវត្ថិភាព ជៀសវាងឧបសគ្គ និងឈានដល់ចំណុចប្រតិបត្តិការប្រកបដោយប្រសិទ្ធភាពដោយប្រើក្បួនដោះស្រាយរុករកដែលបានអភិវឌ្ឍដោយខ្លួនឯង។ ដូច្នេះជំនាញដ៏គួរឱ្យចាប់អារម្មណ៍ទាំងនេះ អាចបំពេញការងារចម្រុះដោយភាពរហ័សរហួន និងឆ្លាតវៃបំផុត។

យោងតាម Sango Automation មនុស្សយន្តទាំងនេះមិនត្រឹមតែធ្វើការបានតែក្នុងរោងចក្រប៉ុណ្ណោះទេ សូម្បីការងារផ្ទះ ការងារការរិយាល័យ ក៏វាអនុវត្តបានដូចមនុស្សយើងដែរ។ នៅក្នុងប្រទេសចិនមនុស្សយន្តនាពេលបច្ចុប្បន្ននេះគឺកំពុងពេញនិយម និងមានប្រជាប្រិយភាពខ្លាំងណាស់ ហើយបានកើនឡើងជាងបន្តបន្ទាប់ ដោយនាំមុខគេក្នុងការដំឡើងមនុស្សយន្តឧស្សាហកម្មជាមួយនឹង ៥១% នៃការដំឡើងទូទាំងពិភពលោក៕

បរទេស៖ រដ្ឋាភិបាលអ៊ីស្លង់បានផ្តល់អាជ្ញាប័ណ្ណរយៈពេលប្រាំឆ្នាំដល់ក្រុមហ៊ុន Hvalur hf ដែលជាក្រុមហ៊ុននេសាទត្រីបាឡែនពាណិជ្ជកម្មធំបំផុតរបស់ប្រទេស ដើម្បីបរបា.ញ់ត្រីបាឡែនរាប់រយក្បាលក្នុងទឹករបស់ខ្លួនជារៀងរាល់ឆ្នាំ។
នេះបើយោងតាមការចុះផ្សាយរបស់សារព័ត៌មានបរទេស IFL Science បានឱ្យដឹងថា ក្រសួងចំណីអាហារ និងកសិកម្មរបស់ប្រទេសអ៊ីស្លង់ បានចេញការអនុញ្ញាតឱ្យចាប់ត្រីបាឡែន Fin ចំនួន ២០៩ ក្បាល និងត្រីបាឡែន Minke ២១៧ ក្បាលជារៀងរាល់ឆ្នាំក្នុងអំឡុងរដូវបរបាញ់ពីខែមិថុនាដល់ខែកញ្ញា ។

អាជ្ញាបណ្ណនេះមានសុពលភាពរយៈពេលប្រាំឆ្នាំ និងអាចបន្តបានជារៀងរាល់ឆ្នាំ ដោយមាន ២០% នៃកូតាដែលមិនទាន់បានប្រើប្រាស់រហូតដល់ឆ្នាំបន្ទាប់។ ទោះបីជាត្រីបាឡែន Fin និង Minke កំពុងស្ថិតក្នុងគ្រោះថ្នាក់នៃការផុតពូជក៏ដោយ ក៏អាជ្ញាធរនៅតែបន្តសកម្មភាព ដោយអនុញ្ញាតឱ្យក្រុមហ៊ុនធំៗបំផ្លាញត្រីបាឡែនទាំងនេះរាប់រយក្បាលជារៀងរាល់ឆ្នាំ។ ក្រៅពីអ៊ីស្លង់ មានប្រទេសពីរផ្សេងទៀត គឺន័រវែស និងជប៉ុន ក៏នូវតែបន្តការនេសាទត្រីបាឡែនឥតឈប់ឈរផងដែរ។

ត្រីបាឡែន Fin មានប្រវែងរហូតដល់ ២៥ ម៉ែត្រ គឺជាត្រីធំបំផុតទីពីរនៅលើពិភពលោកបន្ទាប់ពីត្រីបាឡែនខៀវ ត្រូវបានដាក់បញ្ចូលក្នុងបញ្ជីក្រហមនៃសហភាពអន្តរជាតិសម្រាប់ការអភិរក្សធម្មជាតិ (IUCN)។ រីឯត្រីបាឡែន Minke គឺជាប្រភេទត្រីបាឡែនតូចបំផុត ដែលមានប្រវែងប្រហែល ៧ ទៅ ៩ ម៉ែត្រ។ ទោះជាយ៉ាងណារដ្ឋាភិបាលអ៊ីស្លង់បានសង្កត់ធ្ងន់ថា ការបរបាញ់ត្រីបាឡែនគឺកំណត់ត្រឹមតែ ៤២៦ ក្បាលក្នុងមួយឆ្នាំប៉ុណ្ណោះ បើមានការបរបាញ់លើសពីនេះ ក្រុមហ៊ុននឹងត្រូវរងការផាកពិន័យយ៉ាងធ្ងន់ធ្ងរបំផុត។

ទោះបីជាយ៉ាងនេះក្តី អ្នកជំនាញបរិស្ថាន និងអង្គការសុខុមាលភាពសត្វបានពណ៌នាថា ការសម្រេចចិត្តរបស់រដ្ឋាភិបាលគឺគួរឱ្យភ្ញាក់ផ្អើលបំផុត វាគឺជាការចុះចេញពីកិច្ចខិតខំប្រឹងប្រែងអភិរក្សដែលកំពុងបន្តនៅក្នុងប្រទេសអ៊ីស្លង់។ Clare Perry ទីប្រឹក្សាមហាសមុទ្រនៅ EIA បាននិយាយថា “ការនេសាទត្រីបាឡែនពាណិជ្ជកម្មត្រូវបានហាមឃាត់ដោយគណៈកម្មការអន្តរជាតិ Whaling Commission (IWC) ចាប់តាំងពីឆ្នាំ ១៩៨២ មកម្លេះ ដោយមានប្រទេសជាង ៨០ បានចុះហត្ថលេខាលើកិច្ចព្រមព្រៀងដែលបានចូលជាធរមានក្នុងឆ្នាំ ១៩៨៦។

ទោះជាយ៉ាងណាក៏ដោយ ប្រទេសមួយចំនួនដូចជា ន័រវេស ដាណឺម៉ាក ហ្គ្រីនឡែន រុស្ស៊ី អ៊ីស្លង់ និងជប៉ុន នៅតែមិនអើពើនឹងការហាមឃាត់ ដោយនៅតែបន្តបរបាញ់ត្រីបាឡែនក្នុងនាមការស្រាវជ្រាវវិទ្យាសាស្ត្រ។ គួរបញ្ជាក់ដែរថា ត្រីបាឡែន Fin គឺជាអ្នកប្រមូលកាបូនដ៏សំខាន់មួយរបស់ពិភពលោក ហើយត្រូវការការពារពេញលេញ យ៉ាងហោចណាស់ ពួកវាអាចបន្តបំពេញតួនាទីសំខាន់របស់ពួកគេនៅក្នុងបរិស្ថានសមុទ្រ៕

ក្រុមហ៊ុនផលិតឱសថនៅអាមេរិក Gilead Sciences បានប្រកាសអំពីការផលិតវ៉ាក់សាំងព្យាបាល និងការពារមេរោគអេដស៍តម្លៃថោកៗ ប្រភេទ lenacapavir សម្រាប់លក់ជូនទៅកាន់ប្រទេសដែលមានចំណូលទាប និងមធ្យមចំនួន ១២០ ប្រទេស នៅជុំវិញពិភពលោក។

កាលពីអំឡុងខែតុលានេះ យោងតាមការចេញផ្សាយរបស់កាសែត The Guardian បានឲ្យដឹងថា ក្រុមហ៊ុនឱសថអាមេរិកនេះ បានចុះហត្ថលេខាលើកិច្ចព្រមព្រៀងជាមួយរោងចក្រចំនួនប្រាំមួយផ្សេងទៀត ដើម្បីផលិតថ្នាំចាក់ lenacapavir ការពារនិងព្យាបាលជំងឺអេដស៏ក្នុងតម្លៃថោកទៅកាន់ ១២០ ប្រទេស ដោយផ្តោតសំខាន់លើប្រទេសដែលមានហានិភ័យឆ្លងខ្ពស់និងប្រាក់ចំណូលទាបប៉ុណ្ណោះ។

ចំពោះក្នុងគ្រាអាសន្ននិងបន្ទាន់ ក្រុមហ៊ុននឹងផ្តល់ថ្នាំនេះទៅកាន់ប្រទេសចំនួន ១៨ ជាមុនសិន ដែលមានអត្រាមេរោគអេដស៍ខ្ពស់ រួមទាំងប្រទេស Botswana អាហ្វ្រិកខាងត្បូង និងថៃផងដែរ។ ប្រភពព័ត៌មានបានឲ្យដឹងថា ថ្នាំ Lenacapavir គឺតម្រូវឱ្យចាក់តែ 2 ដងក្នុងមួយឆ្នាំ ជាមួយនឹងប្រសិទ្ធភាពខ្ពស់ក្នុងការបង្ការនិងការពារមេរោគអេដស៍។ ជាទូទៅ សម្រាប់ប្រទេសអ្នកមានដូចជានៅសហរដ្ឋអាមេរិក ថ្នាំនេះគឺមានតម្លៃប្រមាណជាង ៤០,០០០ ដុល្លារ សម្រាប់អ្នកជម្ងឺម្នាក់ចាក់២ដងក្នុងមួយឆ្នាំ។ ប៉ុន្តែសម្រាប់ការកំណត់តម្លៃថ្មីដែលគ្រោងលក់ឲ្យប្រទេសចំណូលទាបនោះ គឺអាចតែប្រមាណ ៤០ ដុល្លារប៉ុណ្ណោះក្នុងមួយឆ្នាំ។

កន្លងមកក្រុមហ៊ុនក៏បានធ្វើតេស្តសាកល្បងទៅលើអ្នកជម្ងឺនៅអាហ្វ្រិកខាងត្បូង អ៊ូហ្គង់ដា អាហ្សង់ទីន និងប្រេស៊ីល ហើយក៏ទទួលបានផលិតផលជាទីគាប់ប្រសើរផងដែរ។

ទោះជាយ៉ាងណា ជាមួយគ្នានេះ ក្រុមហ៊ុនផលិតក៏ទទួលរងនូវមតិរិះគន់ ដោយហេតុថាកិច្ចព្រមព្រៀងលក់ថ្នាំតម្លៃថោកគឺមិនបានធ្វើឡើងនៅក្នុងប្រទេសដែលមានប្រាក់ចំណូលមធ្យមកម្រិតខ្ពស់ ដែលមានហានិភ័យឆ្លងជំងឺអេដស៍ខ្ពស់នោះទេ ដូចជានៅអាមេរិកឡាទីនជាដើម៕