ប្រទេសហ្វីលីពីន ៖ កាលពីថ្ងៃទី១០ ខែធ្នូ ឆ្នាំ២០២៤ សារព័ត៌មាន PNA របស់ហ្វីលីពីនរាយការណ៍ថា ភ្នំភ្លើងឈ្មោះ Kanlaon ស្ថិតនៅលើកោះ Negros និងនៅចំណុចកណ្តាលប្រទេសហ្វីលីពីន បានបាញ់ផ្សែងលាយផេះឡើងទៅលើមេឃ រហូតដល់ជាង៤គីឡូម៉ែត្រ តាំងពីថ្ងៃទី៩ ខែធ្នូ កន្លងមក ។

ប្រធានាធិបតីហ្វីលីពីន លោក Ferdinand Marcos Jr. បានថ្លែងថា រដ្ឋាភិបាលបានត្រៀមជួយសង្គ្រោះពលរដ្ឋរងផលប៉ះពាល់ដោយសារបន្ទុះភ្នំភ្លើង ស្មើប្រមាណ៨៧,០០០នាក់ ។ លោកបានបញ្ជាឱ្យលោក Rex Gatchalian រដ្ឋមន្ត្រីក្រសួងអភិវឌ្ឍន៍សង្គម ធ្វើដំណើរទៅកាន់កោះ Negros ដើម្បីជួយសង្គ្រោះពលរដ្ឋចេញពីតំបន់គ្រោះថ្នាក់ ។

លោក Ferdinand បន្តថា រដ្ឋាភិបាលបានត្រៀមថវិកាមួយចំនួនដើម្បីជួយឧបត្ថម្ភពលរដ្ឋរងគ្រោះលើកនេះ និងជម្លៀសពលរដ្ឋដែលរស់នៅជុំវិញភ្នំភ្លើង Kanlaon ក្នុងចម្ងាយ៦គីឡូម៉ែត្រ ។ ភ្នាក់ងារបរិស្ថាន និងធនធានធម្មជាតិ បានសហការជាមួយភ្នាក់ងារវិទ្យាសាស្ត្រ និងបច្ចេកវិទ្យា តាមដានអាកាសធាតុនៅតំបន់ជុំវិញភ្នំភ្លើងយ៉ាងដិតដល់ ដើម្បីវាយតម្លៃថា តើភ្នំភ្លើងនឹងផ្ទុះឡើងក្នុងកម្រិតណា ហើយអាជ្ញាធរត្រូវជម្លៀសពលរដ្ឋបន្ថែមទៀតដែរឬទេ?

ចំណែកអាជ្ញាធរក្នុងតំបន់និយាយថា ពួកគេបានជួយជម្លៀសពលរដ្ឋរស់នៅភូមិចំនួន៤ ក្នុងទីក្រុងកាឡាសតេលឡាណា ដែលស្ថិតនៅលើភាគពាយ័ព្យភ្នំភ្លើង Kanlaon ទៅកាន់កន្លែងមានសុវត្ថិភាព ក្រោយពីភ្នំភ្លើងបាញ់ផេះពណ៌ក្រហមឡើងលើមេឃ និងមានវត្ថុផ្សេងៗធ្លាក់មកក្រោម ។

កាលពីខែកញ្ញា ឆ្នាំ២០២៤ ពលរដ្ឋហ្វីលីពីនរាប់រយនាក់បានជម្លៀសចេញពីលំនៅឋានទៅកាន់កន្លែងមានសុវត្ថិភាព ក្រោយពីភ្នំភ្លើងនេះបញ្ចេញឧស្ម័នគ្រោះថ្នាក់យ៉ាងច្រើនត្រឹមតែ១ថ្ងៃ ។

យោងតាមទិន្នន័យរបស់ការិយាល័យរញ្ជួយដីបញ្ជាក់ថា ភ្នំភ្លើង Kanlaon បានផ្ទុះរហូតដល់ជាង៤០លើក តាំងពីឆ្នាំ១៨៦៦ ហើយការផ្ទុះភ្នំភ្លើងនៅឆ្នាំ១៩៩៦ ធ្វើឱ្យអ្នកឡើងភ្នំស្លាប់អស់៣នាក់ ៕

ប្រទេសចិន ៖ កាលពីថ្ងៃទី៥ ខែធ្នូ ឆ្នាំ២០២៤ សារព័ត៌មានស៊ិនហួររាយការណ៍ថា ក្រសួងអប់រំចិនមានគម្រោងឱ្យសាលានានាបង្រៀនកូនសិស្សប្រើប្រាស់បច្ចេកវិទ្យា AI ចាប់ពីកម្រិតបឋមសិក្សា រហូតដល់មធ្យមសិក្សា ដើម្បីឱ្យយុវជនជំនាន់ក្រោយឈ្វេងយល់ និងមានជំនាញពាក់ព័ន្ធនឹងបច្ចេកវិទ្យាទំនើប ។

ក្រសួងអប់រំមានគោលបំណងឱ្យយុវជនចាប់អារម្មណ៍លើផ្នែកវិទ្យាសាស្ត្រ, មានគំនិតច្នៃប្រឌិត និងជំនាញឌីជីថល ដោយស្នើឱ្យសាលារៀននានារៀបចំកម្មវិធីសិក្សាដែលពាក់ព័ន្ធ និងបញ្ចូលចំណេះដឹងពីបច្ចេកវិទ្យា AI ទៅក្នុងខ្លឹមសារមេរៀនបង្រៀនសិស្ស ។ បន្ទាប់មក សាលារៀនត្រូវវាយតម្លៃចំណេះដឹងសិស្សជាប្រចាំ ដើម្បីឱ្យសិស្សទទួលបានបទពិសោធន៍ពាក់ព័ន្ធនឹងបច្ចេកវិទ្យា AI ចាប់ពីកម្រិតបឋមសិក្សាឡើងទៅ ។

កូនសិស្សគួរតែផ្តោតលើការយល់ដឹង និងអនុវត្តបច្ចេកវិទ្យាទាំងនេះក្នុងពេលពួកគេកំពុងរៀននៅកម្រិតបឋមសិក្សា ដើម្បីចូលរួមចំណែកក្នុងការបង្កើតគម្រោងបច្ចេកវិទ្យា AI និងប្រើប្រាស់បច្ចេកវិទ្យាទំនើបពេលពួកគេរៀនដល់កម្រិតមធ្យមសិក្សា ។

គម្រោងនេះមានគោលបំណងបណ្តុះបណ្តាលធនធានមនុស្សប្រកបដោយគុណភាព និងបង្កើនសមត្ថភាពលើការប្រើប្រាស់កម្មវិធីសិក្សាឆ្លាតវៃថ្នាក់ជាតិ ។ ដូច្នេះ កូនសិស្សនឹងអាចឈ្វេងយល់ពីបច្ចេកវិទ្យា AI កាន់តែច្រើន នាថ្ងៃអនាគត ។

ក្រៅពីនេះ ក្រសួងអប់រំក៏បានជំរុញឱ្យវិទ្យាល័យ សាកលវិទ្យាល័យ វិទ្យាស្ថានស្រាវជ្រាវ និងក្រុមហ៊ុនបច្ចេកវិទ្យាធំៗបង្កើតបន្ទប់ពិសោធន៍ពីបច្ចេកវិទ្យា AI និងបន្ទប់តាំងពិព័រណ៍សម្រាប់កូនសិស្សកម្រិតបឋម និងមធ្យមផងដែរ ។ រដ្ឋមន្ត្រីក្រសួងអប់រំបានប្រៀបធៀបបច្ចេកវិទ្យាទៅនឹងកូនសោរមាសសម្រាប់ប្រព័ន្ធអប់រំ និងកំណត់ទិសដៅការអប់រំនៅប្រទេសចិន ក៏ដូចជាការចាប់យកឱកាស និងដោះស្រាយបញ្ហាប្រឈម ។

កាលពីខែកុម្ភៈ ឆ្នាំ២០២៤ កន្លងមក ប្រទេសចិនបានជ្រើសរើសសាលារៀន ចំនួន១៨៤កន្លែង ធ្វើជាទីតាំងសាកល្បងការស្រាវជ្រាវគំរូទស្សនវិជ្ជា និងគម្រោងសិក្សាពីបច្ចេកវិទ្យា AI ដើម្បីបង្កើនបទពិសោធន៍ ។ លើសពីនេះ ប្រទេសចិននឹងបង្កើនទីតាំងសាកល្បងឱ្យកាន់តែច្រើន នាថ្ងៃអនាគត ៕

យោងតាមការចុះផ្សាយរបស់ Vanguard ដែលជាគេហទំព័របរទេសដ៏ល្បីល្បាញមួយបានបញ្ជាក់ថា គ្រួសាររាជ្យវង្សទាំង ៥ ប្រទេសខាងក្រោមនេះ គឺមានទ្រព្យសម្បត្តិច្រើនជាងគេបំផុតនៅលើពិភពលោកក្នុងឆ្នាំ ២០២៤ ដែលភាគច្រើនបានមកពីការវិនិយោគទុនផ្សេងៗ។ រាជវង្សដែលមានឥទ្ធិពលទាំងនេះគឺជាកូនចៅនៃរាជវង្សបុរាណដែលធ្លាប់បានគ្រប់គ្រងទឹកដី និងសេដ្ឋកិច្ចដ៏ធំទូលាយក្នុងពិភពលោក ហើយនៅតែរក្សាឋានៈជាគ្រួសាររាជវង្សដែលមានជាងគេបំផុតរបស់ពិភពលោកក្នុងសម័យប្រជាធិបតេយ្យ និងប្រជាធិបតេយ្យនីយកម្មទ្រព្យសម្បត្តិ។ យោងតាមការរកឃើញ ទ្រព្យសម្បត្តិរបស់គ្រួសាររាជវង្សទាំងនេះ អាចត្រូវបានសន្មតថាជាទ្រព្យសម្បត្តិមានឥទ្ធិពលបំផុតក្នុងឆ្នាំ ២០២៤ នេះ៖

១. Maha Vajiralongkorn៖ ព្រះមហាក្សត្រនៃប្រទេសថៃបានឡើងគ្រងរាជ្យនៅឆ្នាំ ២០១៦ បន្ទាប់ពីការសោយទីវង្គត់របស់ព្រះបិតាទ្រង់គឺព្រះបាទ Bhumibol Adulyadej។ ជាមួយនឹងទ្រព្យសម្បត្តិសុទ្ធប៉ាន់ស្មានចំនួន ៣៤ ពាន់លានដុល្លារ ព្រះអង្គត្រូវបានគេចាត់ទុកថាជាគ្រួសាររាជវង្សដែលមានជាងគេបំផុតនៅលើពិភពលោក។ ស្តេច Vajiralongkorn បានទទួលមរតកពីផលប័ត្រហិរញ្ញវត្ថុដ៏ធំ ការកាន់កាប់អចលនទ្រព្យដ៏ច្រើន និងផលប្រយោជន៍អាជីវកម្មផ្សេងទៀត។

២. Mohamed bin Zayed Al Nahyan៖ គឺជាស្តេចដែលមានជាងគេទីពីរក្នុងពិភពលោកនៃប្រទេសអារ៉ាប់រួម (UAE) និងជាអ្នកគ្រប់គ្រងទីក្រុង Abu Dhabi បន្ទាប់ពីបានស្នងរាជ្យបន្តពីបងប្រុសរបស់ទ្រង់គឺ Sheikh Khalifa bin Zayed Al Nahyan ដែលបានសោយទីវង្គត់នៅឆ្នាំ ២០២២។ ស្តេចរូបនេះមានទ្រព្យសម្បត្តិសរុបចំនួន ៣០ ពាន់លានដុល្លារអាមេរិក ដែលបានមកពីក្រុមហ៊ុនប្រេងជាតិ Abu Dhabi (ADNOC), Emirates Global Aluminum (EGA) និងក្រុមហ៊ុនអាកាសចរណ៍ជាតិ Etihad Airways របស់ UAE រួមទាំង Burj Khalifa ដែលជាអគារខ្ពស់ជាងគេលើពិភពលោក បូករួមនឹងធនាគារ Abu Dhabi ក៏ដូចជាភាគហ៊ុនសំខាន់ៗរបស់ព្រះអង្គនៅក្នុងក្រុមហ៊ុនអន្តរជាតិផ្សេងៗទៀត។
៣. Hassanal Bolkiah៖ គឺជាស្តេចស៊ុលតង់នៃប្រទេសប្រ៊ុយណេបានកាន់អំណាចតាំងពីឆ្នាំ ១៩៦៧ គឺជាស្តេចដែលមានជាងគេបំផុតទី ៣ នៅលើពិភពលោក ជាមួយទ្រព្យសម្បត្តិប៉ាន់ស្មានចំនួន ២៨ ពាន់លានដុល្លារ។

៤. Salman bin Abdulaziz Al Saud៖ គឺជាស្តេចនៃប្រទេសអារ៉ាប៊ីសាអូឌីតដែលបានឡើងគ្រងរាជ្យបន្ទាប់ពីការសោយទីវង្គត់របស់បងប្រុសបង្កើតទ្រង់គឺស្តេច Abdullah នៅក្នុងឆ្នាំ ២០១៥។ ជាមួយទ្រព្យសម្បត្តិសរុបប្រមាណ ១៨ ពាន់លានដុល្លារ ស្តេចមួយអង្គនេះគឺជាប្រមុខនៃសភាអារ៉ាប៊ីសាអូឌីត។ ផ្នែកដ៏សំខាន់នៃទ្រព្យសម្បត្តិរបស់ទ្រង់គឺមកពីឧស្សាហកម្មប្រេងដ៏ធំដែលគ្រប់គ្រងដោយរដ្ឋាភិបាលអារ៉ាប៊ីសាអូឌីត និងការវិនិយោគក្នុងវិស័យចម្រុះដូចជាអចលនទ្រព្យ ធនាគារ និងទូរគមនាគមន៍។

៥.Mohammed bin Rashid Al Maktoum៖ គឺជានាយករដ្ឋមន្ត្រីគ្រប់គ្រងទីក្រុងឌូបៃនៃប្រទេសអារ៉ាប់រួម ដែលមានទ្រព្យសម្បត្តិសរុបប្រមាណ ១៤ ពាន់លានដុល្លារ ដែលបានមកពីការវិនិយោគនៅក្នុងក្រុមហ៊ុនដូចជា Emirates Airlines ក្រុមហ៊ុន Dubai World និង Dubai Holding ដែលមានសណ្ឋាគារ ក្រុមហ៊ុនប្រព័ន្ធផ្សព្វផ្សាយ និងសួនអាជីវកម្ម។ ដូច្នេះ Mohammed bin Rashid Al Maktoum គឺជាអ្នកគ្រប់គ្រងដែលមានជាងគេទីប្រាំនៅលើពិភពលោក៕