ប្រទេសថៃ ៖ មន្ត្រីនាំពាក្យទីស្តីការនាយករដ្ឋមន្ត្រី លោក ខារុម ផុនផមក្លាង ឱ្យដឹងថា រដ្ឋាភិបាលថៃនឹងអនុញ្ញាតឱ្យពលរដ្ឋស្រឡាញ់ភេ.ទ ដូចគ្នាអាចចុះសំបុត្រអាពាហ៍ពិពាហ៍នៅទូទាំងប្រទេស ចាប់ពីថ្ងៃទី២៣ ខែមករា ឆ្នាំ២០២៥ នៅតាមសាលាស្រុក ខេត្ត ព្រមទាំងចុះនៅស្ថានទូត-ស្ថានកុងស៊ុលថៃនៅ៩៤ប្រទេស ក្រោមគំនិត «Embracing Equality : Love Wins in 878 Districts» ក្រោយពីច្បាប់អាពាហ៍ពិពាហ៍អ្នកស្រឡាញ់ភេទដូចគ្នាចូលជាធរមាន ។

ការអនុញ្ញាតឱ្យពលរដ្ឋស្រឡាញ់ភេទដូចគ្នាចុះសំបុត្រអាពាហ៍ពិពាហ៍នេះ គឺក្នុងគោលបំណងឱ្យពួកគេបានរៀបអាពាហ៍ពិពាហ៍រស់នៅជាក្រុមគ្រួសារ ។ នៅថ្ងៃទី២៣ ខែមករា គឺជាថ្ងៃដែលច្បាប់អាពាហ៍ពិពាហ៍អ្នកស្រឡាញ់ភេទដូចគ្នាចូលជាធរមាន ហើយរដ្ឋាភិបាល និងស្ថាប័នពាក់ព័ន្ធនឹងផ្តល់ភាពងាយស្រួលឱ្យអ្នកស្រឡាញ់ភេទដូចគ្នាអាចចុះសំបុត្រអាពាហ៍ពិពាហ៍បាន ដើម្បីលើកកម្ពស់ភាពស្មើគ្នា យេនឌ័រ និងពុំរើសអើង ។

លើសពីនេះ វាជាការលើកកម្ពស់មុខមាត់ប្រទេសថៃនៅលើឆាកអន្តរជាតិផងដែរ ដែលថៃជាប្រទេសមួយទទួលស្គាល់, គោរពសិទ្ធិមនុស្ស និងគាំទ្រភាពចម្រុះផ្លូវភេទ ។ ហេតុនេះ សូមអញ្ជើញគូស្នេហ៍ស្រឡាញ់ភេទដូចគ្នាទាំងអស់មកចុះសំបុត្រអាពាហ៍ពិពាហ៍នៅសាលាស្រុក និងខេត្តទូទាំងប្រទេស ។ នេះបើតាមការលើកឡើងរបស់មន្ត្រីនាំពាក្យទីស្តីការនាយករដ្ឋមន្ត្រី ។

ច្បាប់អាពាហ៍ពិពាហ៍អ្នកស្រឡាញ់ភេទដូចគ្នាចូលជាធរមានបញ្ជាក់ថា ប្រទេសថៃបានបើកទំព័រប្រវត្តិសាស្ត្រថ្មីសម្រាប់ការគោរពសិទ្ធិមនុស្ស និងភាពស្មើគ្នាខាងផ្លូវភេទ ។ លើសពីនេះ វាជាការបោះជំហានមួយដ៏សំខាន់ ដែលបង្ហាញពីការផ្លាស់ប្តូរក្នុងសង្គមថៃ និងការព្រមទទួលស្គាល់ស្នេហាពុំប្រកាន់ភេទ ។ ច្បាប់នេះពុំបានកើតឡើងដោយសារការព្យាយាមរយៈពេលខ្លីទេ ប៉ុន្តែវាជាលទ្ធផលនៃការបំពេញការងាររយៈពេលយូរ ដើម្បីផ្លាស់ប្តូរទស្សនៈពលរដ្ឋថៃ ដែលតែងតែរើសអើសសេ្នហាបែបនេះ ។

លទ្ធផលការស្ទង់មតិបង្ហាញថា ពលរដ្ឋថៃបច្ចុប្បន្នយល់ឃើញថា សេចក្តីស្រឡាញ់ គឺពាក់ព័ន្ធនឹងផ្លូវអារម្មណ៍ និងជាទំនាក់ទំនងរបស់មនុស្ស២នាក់ មិនថាពួកគេមានភេទផ្ទុយគ្នា ឬដូចគ្នា ។ ហេតុនេះ សេចក្តីស្រឡាញ់មិនប្រកាន់ភេទ នឹងពុំត្រូវបានបំបិទសិទ្ធិផ្នែកសង្គមដូចកាលពីសម័យមុនទេ ។ ថ្ងៃទី២៣ ខែមករា មិនត្រឹមតែជាថ្ងៃដែលច្បាប់ទទួលស្គាល់ប៉ុណ្ណោះទេ ប៉ុន្តែវាជាថ្ងៃអបអរសេចក្តីស្រឡាញ់ ក្តីសង្ឃឹម និងការផ្លាស់ប្តូរក្នុងសង្គម ៕

សហរដ្ឋអាមេរិក ៖ ក្នុងពេលសុន្ទរកថាកាលពីថ្ងៃទី១៩ ខែមករា ឆ្នាំ២០២៥ នៅពហុកីឡដ្ឋាន Capital One Arena ទីក្រុងវ៉ាស៊ីនតោន ប្រធានាធិបតីអាមេរិកថ្មី លោក Donald Trump ថ្លែងថា លោកនឹងដាក់កំហឹតយ៉ាងតឹងរ៉ឹងលើជនអន្តោប្រវេសន៍ខុសច្បាប់ចាប់ពីថ្ងៃឡើងកាន់តំណែងដំបូង ហើយលោកសន្យាថា នឹងធ្វើតាមការសន្យាក្នុងពេលរកសំឡេងឆ្នោត ។

ការថ្លែងសន្ទរកថាក្រោមឈ្មោះ «Make America Great Again Victory Rally» លោក Trump ថ្លែងថា ពេលព្រះអាទិត្យលិចនៅថ្ងៃស្អែក (ថ្ងៃទី២០ ខែមករា) ការឈ្លានពេលប្រទេសយើងនឹងបញ្ឈប់ ហើយយើងនឹងចាប់ផ្តើមបណ្តេញជនអន្តោប្រវេសន៍រាប់ពាន់នាក់ចេញពីអាមេរិក ។ ទោះយ៉ាងណា យើងនឹងចំណាយពេលច្រើនឆ្នាំ និងចំណាយប្រាក់យ៉ាងច្រើនមហាសាល ។ វាជាការផ្លាស់ប្តូរនយោបាយដ៏ធំបំផុតក្នុងប្រវត្តិសាស្ត្រអាមេរិក ហើយកាលពី៧៥ថ្ងៃមុន យើងសម្រេចបាននូវជ័យជម្នះនយោបាយដ៏អស្ចារ្យបំផុត ។ ចាប់ថ្ងៃស្អែកតទៅ (ថ្ងៃទី២០ ខែមករា) ខ្ញុំនឹងរឹតបន្តឹងយ៉ាងឆាប់រហ័ស និងដោះស្រាយវិបត្តិផ្សេងៗដែលប្រទេសយើងប្រឈម ។

នេះជាការថ្លែងសុន្ទរកថាលើកដំបូងរបស់លោក Trump នៅទីក្រុងវ៉ាស៊ីនតោន តាំងពីលោកថ្លែងលើកចុងក្រោយកាលពីថ្ងៃទី៦ ខែមករា ឆ្នាំ២០២១ មុនពេលក្រុមអ្នកគាំទ្រលោក វាយលុកអគាររដ្ឋសភាអាមេរិក ។ លោកថ្លែងថា លោកនឹងលើកលែងទោសឱ្យមនុស្សជាង១,៥០០នាក់ ដែលត្រូវបានតុលាការកាត់ទោស និងចោទប្រកាន់ពីការវាយលុកអគាររដ្ឋសភាពេលនោះ ។

ផែនការរបស់លោក Trump នឹងធ្វើឱ្យជនអន្តោប្រវេសន៍ជាច្រើននាក់ត្រូវបានបណ្តេញចេញពីទឹកដីអាមេរិក ព្រមទាំងបណ្តេញជនអន្តោប្រវេសន៍ដែលគោរពច្បាប់ និងរស់នៅអាមេរិករយៈពេលយូរឆ្នាំ ជាមួយស្វាមី ឬភរិយា និងកូនដែលទទួលបានសញ្ជាតិអាមេរិក ។

ក្រៅពីនេះ លោក Trump បញ្ជាក់ថា លោកនឹងបង្ហាញឯកសារសម្ងាត់ពាក់ព័ន្ធនឹងការសម្លាប់ប្រធានាធិបតីអាមេរិក លោក John F. Kennedy កាលពីឆ្នាំ១៩៦៣ និងបងប្រុសឈ្មោះ Robert F. Kennedy ព្រមទាំងការសម្លាប់មេដឹកនាំសិទ្ធិមនុស្ស លោក Martin Luther King Jr. កាលពីឆ្នាំ១៩៦៨ ៕

សហរដ្ឋអាមេរិក៖ ក្នុងរយៈពេល ៥ ឆ្នាំកន្លងមកនេះ នាយកប្រតិបត្តិ Meta លោក Mark Zuckerberg បានចំណាយប្រាក់ជាង ៦០ ពាន់លានដុល្លារលើបច្ចេកវិទ្យា VR/AR ដែលជាបច្ចេកវិទ្យាការពិតនិម្មិត ដោយបច្ចុប្បន្នមិនទាន់សម្រេចបានជោគជ័យនោះទេ។

VR/AR គឺជាបច្ចេកវិទ្យាការពិតនិម្មិត ត្រូវបានគេផលិតជាវ៉ែនតា 3D ខណៈវ៉ែនតារបស់ Mark Zuckerberg ដែលមានឈ្មោះថា Meta Quest 3 គឺមិនទទួលបានផលចំណេញឡើយ។

បច្ចេកវិទ្យាមួយនេះក៏ធ្វើឱ្យក្រុមហ៊ុនធំៗមួយចំនួនដូចជា Apple, Microsoft, Google និង Sony ដែលបានវិនិយោគប្រាក់យ៉ាងច្រើនក្នុងរយៈពេលប៉ុន្មានឆ្នាំកន្លងមកនេះ ក៏ទទួលបានការខាតបង់ប្រាក់ផងដែរ។ ដូច្នេះមកទល់ពេលនេះមិនទាន់មានក្រុមហ៊ុនណាទទួលបានភាពជោគជ័យលើបច្ចេកវិទ្យាមួយនេះទេ។

ជាក់ស្តែងដូចវ៉ែនតា Apple Vision Pro និង Snap’s Spectacles អ៊ីចឹងឧបករណ៍ទាំងពីរនេះលក់បានតិចតួចណាស់ ហើយក៏ត្រូវបានគេបំភ្លេចចោលយ៉ាងឆាប់រហ័សទៀតផង។ យោងតាមកំណត់ត្រាហិរញ្ញវត្ថុរបស់ក្រុមហ៊ុន Meta ក្រុមហ៊ុនបានខាតបង់ច្រើនជាង ៦០ ពាន់លានដុល្លារដោយសារតែបច្ចេកវិទ្យាការពិតនិម្មិតក្នុងរយៈពេល ៥ ឆ្នាំចុងក្រោយនេះ។

នេះបញ្ជាក់ថា បច្ចេកវិទ្យាមួយនេះគឺនៅឆ្ងាយពីការរំពឹងទុករបស់លោក Zuckerberg ខ្លាំងណាស់។ ទោះជាយ៉ាងណានៅក្នុងសេចក្តីថ្លែងការណ៍ជាសាធារណៈម្ចាស់ Facebook និង Instagram រូបនេះបានជូនដំណឹងដល់អ្នកវិនិយោគថា ទោះបីមិនទាន់ទទួលបានភាពជោគជ័យក៏ដោយ ក៏លោកនៅតែបន្តអនុវត្តបច្ចេកវិទ្យា VR និង AR ដោយសង្ឃឹមថានឹងទទួលបានភាពជោគជ័យនាពេលអនាគត៕

តៃវ៉ាន់ ៖ សារព័ត៌មាន Reuters រាយការណ៍ថា កាលពីពាក់កណ្តាលអធ្រាត្រថ្ងៃទី២០ ខែមករា ឆ្នាំ២០២៥ មានគ្រោះរញ្ជួយដីកម្រិត៦.៤រិចទ័រ ស្មើជម្រៅជាង៩គីឡូម៉ែត្រ ដែលមានចំណុចកណ្តាលនៅទីក្រុងតាពូ តំបន់ចៀអ៊ី ស្ថិតនៅភាគខាងត្បូងតៃវ៉ាន់ ។ ជំហ៊ានដំបូង អាជ្ញាធរបានរកឃើញពលរដ្ឋរងរបួសយ៉ាងហោចណាស់ ២៧នាក់ ។

កម្លាំងរំញ័រដោយសារគ្រោះរញ្ជួយដីបានធ្វើឱ្យផ្ទះសម្បែងពលរដ្ឋជាច្រើនខ្នងខូចខាត ខណៈអគារខ្ពស់ៗជាច្រើនកន្លែងនៅទីក្រុងតៃប៉ិ ដែលស្ថិតនៅចម្ងាយជាង៣០០គីឡូម៉ែត្រពីទីតាំងរញ្ជួយដី បានរង្គើ ។ ភ្នាក់ងារសង្គ្រោះបន្ទាន់ប្រចាំនៅតំបន់ណាស៊ី ស្ថិតនៅក្បែរទីតាំងរញ្ជួយដី ឱ្យដឹងថា គ្មានការជូនដំណឹងពីការខូចខាតធ្ងន់ធ្ងរទេ ប៉ុន្តែមនុស្ស៣នាក់ ជាប់នៅក្រោមអគារបាក់បែកមួយកន្លែងក្នុងទីក្រុងថៃណាន ។

TSMC គឺជាក្រុមហ៊ុនផលិតបន្ទះឈីបកុំព្យូទ័រដ៏ល្បីល្បាញបញ្ជាក់ថា ក្រុមហ៊ុនបានបញ្ជាឱ្យជម្លៀសបុគ្គលិកចេញពីរោងចក្រនៅតំបន់កណ្តាល និងភាគខាងត្បូងតៃវ៉ាន់រួចរាល់ហើយ ។

តៃវ៉ាន់បានកើតគ្រោះរញ្ជួយដីជាញឹកញាប់ ហើយគ្រោះរញ្ជួយដីដ៏ខ្លាំងក្លាលើកចុងក្រោយរបស់តៃវ៉ាន់ គឺកើតឡើងកាលពីខែមេសា ឆ្នាំ២០២៤ ក្នុងកម្រិត៧.២រិចទ័រ នៅទីក្រុងឆ្នេរសមុទ្រភាគខាងកើតឈ្មោះ វ៉ាលៀន ដែលបណ្តាលឱ្យមនុស្សស្លាប់ចំនួន១៣នាក់ ។ រីឯគ្រោះរញ្ជួយដីនៅភាគខាងត្បូងតៃវ៉ាន់ កាលពីឆ្នាំ២០១៦ មានមនុស្សស្លាប់ជាង១០០នាក់ ។

លើសពីនេះ កាលពីឆ្នាំ១៩៩៩ តៃវ៉ាន់បានកើតគ្រោះរញ្ជួយដីយ៉ាងធ្ងន់ធ្ងរ ស្មើនឹងកម្រិត៧.៣រិចទ័រ ដែលបណ្តាលឱ្យមនុស្សស្លាប់ជាង២,០០០នាក់ ។ ចាប់ពីពេលនោះមក តៃវ៉ាន់បានកែសម្រួលច្បាប់សាងសង់ឡើងវិញដើម្បីឱ្យផ្ទះសម្បែង និងអគារសាងសង់ថ្មីរឹងមាំអាចទប់ស្កាត់គ្រោះរញ្ជួយដីយ៉ាងមានប្រសិទ្ធភាព ៕

ប្រទេសថៃ ៖ សារព័ត៌មានថៃរាយការណ៍ថា លោក ថាក់ស៊ីន ស៊ីណាវ៉ាត់ត្រា អតីតនាយករដ្ឋមន្ត្រីថៃ និងឪពុករបស់នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានលើកឡើងពីវិធានការបង្ក្រា.ប ក្រុមបោកប្រាស់តាមអនឡាញនៅឆ្នាំ២០២៥ ក្រោយពីនាយករដ្ឋមន្ត្រីថៃត្រូវបានជនខិលខូចប្រើប្រាស់បច្ចេកវិទ្យា AI បន្លំជាសំឡេងប្រធានាធិបតីអាមេរិក លោក Donald Trump ។

កាលពីថ្ងៃទី១៨ ខែមករា ឆ្នាំ២០២៥ ក្នុងពេលជួយរដ្ឋបាលខេត្តនគរភ្នំមកពីគណបក្សភឿថៃ រកសំឡេងគាំទ្រពីពលរដ្ឋ លោក ថាក់ស៊ីន និយាយថា លោកស្រី ផេថងថាន នាយករដ្ឋមន្ត្រីថៃ ត្រូវបានជនខិលខូចប្រើប្រាស់ AI បន្លំជាសំឡេងលោក Trump ប្រធានាធិបតីអាមេរិក ដោយទូរស័ព្ទឱ្យលោកស្រីផ្ទេរប្រាក់ទៅទីក្រុងហុងកុង ។

កន្លងមក ក្រុមជនខិលខូចបានប្រើប្រាស់គ្រប់មធ្យោបាយដើម្បីឱ្យពលរដ្ឋថៃផ្ទេរប្រាក់ឱ្យ ដែលពួកគេបង្កើតទីតាំងនៅប្រទេសជិតខាងរបស់ថៃ ដូចជា ៖ មីយ៉ាន់ម៉ា និងកម្ពុជា ។ កម្ពុជាសហការបានយ៉ាងល្អជាមួយថៃក្នុងការបង្ក្រាបជនខិលខូច ហើយការបោកប្រាស់តាមអនឡាញកំពុងធ្លាក់ចុះនៅកម្ពុជា ។ រីឯមីយ៉ាន់ម៉ានឹងចាត់វិធានការបង្ក្រាបជនខិលខូចតាមអនឡាញ ខណៈថៃក៏ចាត់វិធានការបង្ក្រាបជនខិលខូចឱ្យអស់នៅត្រឹមឆ្នាំ២០២៥ ដើម្បីកុំឱ្យពលរដ្ឋចាញ់បោកបន្តទៀត ។

លោកស្រី ផេថងថាន ក៏បានផ្តល់សម្ភាសន៍ជាមួយប្រព័ន្ធផ្សព្វផ្សាយផងដែរថា ជនខិលខូចបានផ្ញើសារជាសំឡេងលោក Trump ដើម្បីឱ្យលោកស្រីជួយបរិច្ចាគប្រាក់មួយចំនួន ប៉ុន្តែដោយសារមានការសង្ស័យ ទើបលោកស្រីពុំបានផ្ទេរប្រាក់ឱ្យពួកគេ ។

សមត្ថកិច្ចស៊ើបអង្កេតផ្នែកឧក្រិដ្ឋកម្មបច្ចេកវិទ្យាបញ្ជាក់ថា ជនខិលខូចបានប្រើប្រាស់បច្ចេកវិទ្យា AI បន្លំជាសំឡេងរបស់បុគ្គលល្បីៗដូចបេះបិទ តាមរយៈការដោនឡូត App សម្ងាត់ ពីព្រោះសំឡេងបុគ្គលល្បីត្រូវបានថតទុកក្នុងពេលផ្តល់សម្ភាសន៍ជាមួយប្រព័ន្ធផ្សព្វផ្សាយ និង YouTube ។ បន្ទាប់មក ជនខិលខូលក៏វាយអក្សរដើម្បីឱ្យ AI និយាយតាមជាសំឡេងរបស់បុគ្គលនោះ ខណៈ App ទាំងនេះពុំអនុញ្ញាតឱ្យដោនឡូតជាសាធារណៈទេ ។

លើសពីនេះ ជនខិលខូចបានផ្ញើ Link ផ្សេងៗមកកាន់ជនរងគ្រោះដើម្បីដឹងព័ត៌មានផ្ទាល់ខ្លួន និងដឹងថា ជនរងគ្រោះជិតស្និទ្ធជាមួយអ្នកណាខ្លះ ។ បន្ទាប់មក ពួកគេក៏ទាក់ទងឱ្យមនុស្សជិតស្និទ្ធជាមួយជនរងគ្រោះផ្ញើប្រាក់ទៅឱ្យ ឬពួកគេងាយស្រួលផ្ទេរប្រាក់ចេញពីគណនីធនាគារក្រោយការចុច Link ៕