តៃវ៉ាន់ ៖ ប្រធានាធិបតីតៃវ៉ាន់ លោក Lai Ching-te បានថ្លែងកាលពីថ្ងៃទី៣ ខែកុម្ភៈ ឆ្នាំ២០២៥ ថា តៃវ៉ាន់ និងចិន ចាំបាច់ត្រូវតែជជែកគ្នាដើម្បីរកសន្តិភាព ក្រោយពីនយោបាយពិភពលោកផ្លាស់ប្តូរ និងស្មុគស្មាញ ។ នេះជាសញ្ញាបញ្ជាក់ថា តៃវ៉ាន់បបួលរដ្ឋាភិបាលក្រុងប៉េកាំងចរចាដោយសន្តិវិធី ចៀសវាងការប្រឈមមុខគ្នាបន្តទៀត ។

លោក Lai ត្រូវបានរដ្ឋាភិបាលចិនដាក់ឈ្មោះថា «ជនបែងចែកទឹកដី» ព្យាយាមសុំចរចាជាមួយរដ្ឋាភិបាលក្រុងប៉េកាំង ខណៈប៉ុន្មានឆ្នាំចុងក្រោយនេះ ចិនបានដាក់សម្ពាធតៃវ៉ាន់ទាំងផ្នែកនយោបាយ និងកងទ័ព ដើម្បីបង្ខំឱ្យរដ្ឋាភិបាលទីក្រុងតៃប៉ិ ព្រមទទួលយកអំណាចរបស់ចិន ។ បច្ចុប្បន្ន តៃវ៉ាន់ និងចិន បានប្រឈមនឹងសម្ពាធពីរដ្ឋាភិបាលថ្មីរបស់អាមេរិកក្រោមការដឹកនាំរបស់លោក Trump ។ ក្រៅពីការដំឡើងពន្ធទំនិញចិន លោក Trump ប្រកាសថា នឹងដំឡើងពន្ធ Semiconductor នាំចូលផងដែរ ដែលជាឧស្សាហកម្មសំខាន់របស់តៃវ៉ាន់ ។

ពេលថ្លែងសុន្ទរកថាទៅកាន់អ្នកតំណាងអាជីវកម្មតៃវ៉ាន់វិនិយោគនៅចិន លោក Lai បញ្ជាក់ថា តៃវ៉ាន់ និងចិន មានបញ្ហាប្រឈមដូចគ្នារឿងគ្រោះធម្មជាតិ ហើយយើងមានគោលដៅរួមគ្នា គឺពលរដ្ឋទាំងសងខាងច្រកសមុទ្រអាចរស់នៅដោយស្ងប់សុខ ។ ពេលស្ថានការណ៍នយោបាយពិភពលោកផ្លាស់ប្តូរគួរឱ្យស្មុគស្មាញ យើងគួរជជែកគ្នាដោយសន្តិវិធីដើម្បីបង្កើតសន្តិភាព ។

ប្រធានាធិបតីតៃវ៉ាន់បន្តថា រដ្ឋាភិបាលរបស់លោករីករាយចរចាជាមួយចិនផ្អែកលើសមភាពដោយគ្មានលក្ខខណ្ឌ ហើយលោកចង់ឱ្យភាគីទាំងពីរងាកមកជជែកគ្នាច្រើនជាងការប្រឈមមុខ ។ ប៉ុន្តែអនាគតតៃវ៉ាន់ គឺមានតែពលរដ្ឋតៃវ៉ាន់ប៉ុណ្ណោះជាអ្នកសម្រេចចិត្ត ។

រីឯការិយាល័យកិច្ចការតៃវ៉ាន់របស់ចិនពុំទាន់និយាយអ្វីទេ ពាក់ព័ន្ធនឹងការលើកឡើងរបស់លោក Lai ខណៈកន្លងមក ចិនបានអំពាវនាវឱ្យតៃវ៉ាន់ទទួលស្គាល់ថា ទឹកដីទាំងសងខាងច្រកសមុទ្រ គឺជាផ្នែកមួយរបស់ចិន (One China) ។ ប៉ុន្តែលោក Lai និងរដ្ឋាភិបាលគណបក្សប្រជាធិបតេយ្យឈានមុខ (DPP) របស់តៃវ៉ាន់ ពុំយល់ស្របនឹងគំនិតនេះ ។

លោក Lai បានថ្លែងនាពេលកន្លងមកថា តៃវ៉ាន់ពុំគួរមានរូបភាពបំភាន់ភ្នែកពាក់ព័ន្ធនឹងសន្តិភាព ប៉ុន្តែតៃវ៉ាន់ត្រូវស្វែងរកសន្តិភាពដោយការពង្រឹងកម្លាំងខ្លួនឯង ព្រមទាំងដើរតាមបណ្តាប្រទេសប្រជាធិបតេយ្យ ។ ប្រទេសមួយអាចរស់នៅបានលុះត្រាតែមានអធិបតេយ្យភាព ហើយដោយសារមានតៃវ៉ាន់ ទើបមានសាធារណរដ្ឋចិន ៕

សហរដ្ឋអាមេរិក ៖ ច្បាប់ហាមឃាត់ការប្រើប្រាស់ TikTok នៅអាមេរិកបានអនុវត្តតាំងពីថ្ងៃទី១៩ ខែមករា ឆ្នាំ២០២៥ ហើយធ្វើឱ្យពលរដ្ឋអាមេរិកត្រូវផ្អាកការប្រើប្រាស់បណ្តាញសង្គមនេះរយៈពេលខ្លី ។ ប៉ុន្តែប្រធានាធិបតីអាមេរិក លោក Donald Trump បានចុះហត្ថលេខាលើបទបញ្ជាប្រតិបត្តិអនុញ្ញាតឱ្យពលរដ្ឋអាមេរិកអាចប្រើប្រាស់ TikTok រយៈពេល៧៥ថ្ងៃទៀត ។

ការចុះហត្ថលេខារបស់លោក Trump នេះ គឺពុំបានលុបចោលច្បាប់ហាមឃាត់ការប្រើប្រាស់ TikTok ទេ មានន័យថា កម្មវិធី TikTok នៅលើ App Store និង Play Store នៅអាមេរិក ពុំទាន់អនុញ្ញាតឱ្យអ្នកប្រើប្រាស់អាចដោនឡូត TikTok ដោយសារផ្ទុយនឹងច្បាប់អាមេរិក ។ រីឯពលរដ្ឋអាមេរិកដែលអាចប្រើប្រាស់ TikTok ក្រោយពេលលោក Trump ឡើងកាន់តំណែងនោះ ដោយសារពួកគេបានដោនឡូតវាក្នុងទូរស័ព្ទរួចហើយ ។

ការហាមឃាត់ TikTok ធ្វើឱ្យក្រុមឈ្មួញលក់ទូរស័ព្ទតាមអនឡាញនៅអាមេរិកសម្លឹងឃើញឱកាសល្អ ដោយពួកគេបានយកទូរស័ព្ទដៃ និងថេបប្លេតដែលបានដោនឡូត TikTok មុនពេលអាមេរិកហាមឃាត់ មកលក់ឱ្យអតិថិជនក្នុងតម្លៃខ្ពស់ ។ អ្នកលក់អនឡាញម្នាក់និយាយថា ទូរស័ព្ទដៃស៊េរីចាស់មានតម្លៃធម្មតាត្រឹមតែ២៥០ដុល្លារអាមេរិក ប៉ុន្តែបើទូរស័ព្ទនេះបានដោតឡូត TikTok គឺអាចលក់បានថ្លៃរហូតដល់៥ម៉ឺនដុល្លារអាមេរិកឯណោះ ។

ក្នុងកម្មវិធីលក់ទូរស័ព្ទតាមអនឡាញផ្សេងៗ គឺមានទូរស័ព្ទ iPhone, iPad និងទូរស័ព្ទ Android ក្នុងនោះត្រូវបានដាក់លក់ក្នុងតម្លៃខ្ពស់ ដោយសារទូរស័ព្ទទាំងនេះបានដោនឡូត TikTok ។ អ្នកស្រាវជ្រាវអ៊ីនធើរណេតមកពីសាកលវិទ្យាល័យ Massachusetts សហរដ្ឋអាមេរិក និយាយថា ទោះជាការលក់ទូរស័ព្ទទាំងនេះមានតម្លៃខ្ពស់គួរឱ្យអស់សំណើចក្តី ប៉ុន្តែវានឹងមានផលប៉ះពាល់ ។

ទោះយ៉ាងណា ការលក់ទូរស័ព្ទដែលមាន TikTok ក្នុងតម្លៃខ្ពស់នេះ ប្រហែលជាមិនយូរទេ ពីព្រោះប្រធានាធិបតីអាមេរិក លោក Donald Trump ថ្លែងថា ក្រុមហ៊ុន Microsoft និងក្រុមហ៊ុនធំៗផ្សេងទៀតបានចរចាទិញ TikTok ហើយវានឹងធ្វើឱ្យបណ្តាញសង្គមនេះអាចដំណើរការនៅអាមេរិកបន្តទៀត ៕

សហរដ្ឋអាមេរិក ៖ រូបភាពមួយដែលបង្ហោះក្នុងបណ្តាញសង្គម X កាលពីខែដើមខែកុម្ភៈ ឆ្នាំ២០២៥ បានធ្វើឱ្យមហាជនចាប់អារម្មណ៍យ៉ាងខ្លាំងពីស្លាកស្លាមលើផ្ទៃភពអង្គារដ៏អាថ៌កំបាំង ហើយពួកគេសន្និដ្ឋានថា វាជាអរិយធម៌របស់មនុស្សក្រៅភព ។ រូបភាពនេះក៏បានទាក់ទាញចំណាប់អារម្មណ៍លោក Elon Musk ផងដែរ ដែលជាមហាសេដ្ឋីមានទ្រព្យសម្បត្តិច្រើនបំផុតលើពិភពលោក និងជាម្ចាស់បណ្តាញសង្គម X ។

ក្រុមអវកាសយានិក Mars Global Surveyor របស់អង្គការ NASA បានបំពេញបេសកកម្មទៅកាន់ភពអង្គារ ចាប់ពីឆ្នាំ១៩៩៦ ដល់ឆ្នាំ២០០៦ ហើយពួកគេបានបញ្ជូនរូបភាពមកកាន់ផែនដី ស្មើនឹង២៤ម៉ឺនសន្លឹក ។ ក្នុងចំណោមរូបភាពទាំងអស់ គឺមានរូបភាព១សន្លឹកធ្វើឱ្យមហាជនចាប់អារម្មណ៍ និងជជែកគ្នាក្នុងបណ្តាញសង្គម ដោយសារគេបានឃើញដុំថ្មលាយខ្សាច់យ៉ាងធំមានរាងជាការ៉េ ។

រូបភាពនេះថតកាលពីថ្ងៃទី៤ ខែវិច្ឆិកា ឆ្នាំ២០០១ មានលក្ខណៈជារណ្តៅលើផ្ទៃភពអង្គារ ហើយនៅផ្នែកខាងលើរូបបានបង្ហាញជារូបការ៉េយ៉ាងច្បាស់ ។ គេអាចមើលឃើញរូបភាពដ៏ចម្លែកនេះក្នុងគេហទំព័ររបស់សាកលវិទ្យាល័យរដ្ឋអារីហ្សូណា សហរដ្ឋអាមេរិក ។ បើពិចារណាឃើញថា វាពុំមែនកើតឡើងតាមធម្មជាតិទេ គឺហាក់ដូចជាការរៀបចំឡើង ដែលជ្រុងនីមួយៗមានប្រវែងប្រមាណ ៣គីឡូម៉ែត្រ ។ មតិមួយចំនួនសង្ស័យថា វាអាចជាជញ្ជាំងរចនាសម្ព័ន្ធបុរាណ ឬអរិយធម៌ដែលមនុស្សក្រៅភពលាក់ទុកនៅក្រោមខ្សាច់ភពអង្គារ ។

មហាជនចាប់ផ្តើមចាប់អារម្មណ៍លើរូបភាព ក្រោយពីលោក Joe Rogan ជាមិត្តភក្តិរបស់ប្រធានាធិបតីអាមេរិក លោក Donald Trump យកមកបង្ហោះក្នុងបណ្តាញសង្គម X កាលពី១ ខែកុម្ភៈ ឆ្នាំ២០២៥ ។ ក្រោយមក លោក Elon Musk ម្ចាស់បណ្តាញសង្គម X បានបញ្ចេញមតិថា យើងគួរតែបញ្ជូនអវកាសយានិកទៅត្រួតពិនិត្យលើភពអង្គារ ។

ទោះយ៉ាងណា អវកាសយានិកត្រូវចំណាយពេលមួយរយៈ ទើបអាចធ្វើដំណើរទៅទីនោះបាន ។ ស្លាកស្នាមនៅលើរូបភាពដ៏អាថ៌កំបាំងនេះនៅតែគ្មានការបកស្រាយច្បាស់លាស់ថាជារូបអ្វី និងធ្វើឱ្យមហាជនសន្និដ្ឋានខុសៗគ្នាបន្តទៀត ៕

ប្រទេសនូវែលសេឡង់ ៖ រដ្ឋាភិបាលនូវែលសេឡង់បានប្រកាសបន្ធូរបន្ថយលក្ខខណ្ឌការស្នើសុំទិដ្ឋាការសម្រាប់ក្រុម Visitor Visa ដែលអនុញ្ញាតការស្នាក់នៅរហូតដល់៩០ថ្ងៃ ដើម្បីទាក់ទាញភ្ញៀវទេសចរបរទេសមានជំនាញផ្នែកបច្ចេកវិទ្យាមកពីតំបន់អាស៊ីអាគ្នេយ៍ និងអាមេរិក ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣១ ខែមករា ឆ្នាំ២០២៥ ។

នូវែលសេឡង់បានព្យាយាមទាក់ទាញភ្ញៀវទេសចរបរទេសមានជំនាញការងារចូលមកធ្វើការ និងការវិនិយោគពីក្រៅប្រទេស ដោយអនុញ្ញាតឱ្យជនបរទេសអាចធ្វើការពីចម្ងាយ (ឬហៅថា Digital Nomad) ។ ជនបរទេសអាចមកកម្សាន្តនៅនូវវែលសេឡង់ និងធ្វើការពីចម្ងាយរយៈពេលយូរជាងមុន ដោយសាររដ្ឋាភិបាលចង់ស្តារសេដ្ឋកិច្ចដែលរងផលប៉ះពាល់ដោយសារវិបត្តិសេដ្ឋកិច្ចអូសបន្លាយ ។

រដ្ឋមន្ត្រីក្រសួងសេដ្ឋកិច្ច លោកស្រី Nicola Willis បានថ្លែងនៅអាកាសយានដ្ឋាន Wellington ថា រដ្ឋាភិបាលនឹងផ្តោតលើអ្នកមានជំនាញខ្ពស់ ជាពិសេស បុគ្គលិកផ្នែកបច្ចេកវិទ្យាមកពីតំបន់អាស៊ីអាគ្នេយ៍ និងអាមេរិក ។ លក្ខខណ្ឌទិដ្ឋាការថ្មីនេះនឹងធ្វើឱ្យគេស្គាល់នូវែលសេឡង់ថា ជាប្រទេសទទួលយកជនបរទេសមានសមត្ថភាពមកធ្វើការ ទោះជាពួកគេមកពីប្រទេសណាក៏ដោយ រដ្ឋាភិបាលចង់បានបុគ្គលិកមានសមត្ថភាពមកពីគ្រប់ទិសទីធ្វើដំណើរមកនូវែលសេឡង់កាន់តែច្រើន ។

ជនបរទេសអាចស្នើសុំទិដ្ឋាការថ្មីនេះ ចាប់ពីឆ្នាំ២០២៥ តទៅ ហើយពួកគេអាចធ្វើការពីចម្ងាយក្នុងពេលកំពុងស្នាក់នៅនូវែលសេឡង់រយៈពេល៩០ថ្ងៃ ប៉ុន្តែបើស្នាក់នៅយូរជាងនេះ ពួកគេត្រូវបង់ពន្ធស្នាក់នៅបន្ថែមទៀត ។ កន្លងមក នូវែលសេឡង់បានប្រឈមនឹងឧបសគ្គក្នុងការអភិវឌ្ឍសេដ្ឋកិច្ច ដោយសារអត្រាការប្រាក់ខ្ពស់បណ្តាលមកពីអតិផរណា ហើយធ្វើឱ្យពលរដ្ឋជាច្រើននាក់គ្មានការងារធ្វើ ។

វានឹងធ្វើឱ្យភ្ញៀវទេសចរបរទេសអាចស្នាក់នៅនូវែលសេឡង់រយៈពេលយូរ ហើយការចំណាយផ្សេងៗរបស់ភ្ញៀវទេសចរក៏កើនឡើងដែរ ។ ការអនុញ្ញាតស្នាក់នៅ គឺសម្រាប់អ្នកកាន់ទិដ្ឋាការ Visitor Visa, ទិដ្ឋាការទេសចរណ៍, ទិដ្ឋាការទៅលេងបងប្អូន និងប្តីប្រពន្ធ ប៉ុន្តែជនបរទេសអាចធ្វើការតែក្នុងក្រុមហ៊ុនបរទេសប៉ុណ្ណោះ បើចង់ធ្វើការជាមួយក្រុមហ៊ុនក្នុងស្រុក ពួកគេត្រូវស្នើសុំទិដ្ឋាការផ្សេង ។

គួរបញ្ជាក់ថា ប្រទេសជាច្រើន ដូចជា ៖ ជប៉ុន កូរ៉េខាងត្បូង ប្រេស៊ីល អេស្ប៉ាញ ព័រទុយហ្គាល់ និងថៃ បានអនុញ្ញាតឱ្យភ្ញៀវទេសចរស្នាក់នៅរយៈពេលយូរ ហើយវាបានទាក់ទាញចំណាប់អារម្មណ៍មនុស្សជាច្រើនដែលចង់ដើរលេងផង និងធ្វើការពីចម្ងាយផង ជាពិសេស ក្រុមយុវវ័យ ៕

ពិតជាមិនធម្មតានោះទេសម្រាប់ Rosé សមាជិកក្រុម BLACKPINK ដោយបទ «APT» របស់នាងដែលល្បីខ្ទរខ្ទារមិនថាក្មេងមិនថាចាស់ពេញចិត្តនឹងបទចម្រៀងនេះរហូតត្រឹមតែរយៈពេល១០៥ថ្ងៃបទនេះឈានដល់១ពាន់លានដងនៅលើយូធូបហើយក្លាយជាបទដែលមានការស្តាប់លឿនបំផុតទី៥នៅលើពិភពលោកបន្ទាប់ពីបទ « Hello, Despacito , Shape of You និង Mi Gente»។

Rosé សមាជិកក្រុម BLACKPINK បានបង្កើតសមិទ្ធិផលដ៏គួរឱ្យចាប់អារម្មណ៍មួយទៀតដើម្បីបន្ថែមកេរ្តិ៍ដំណែលដែលរីកចម្រើនយ៉ាងឆាប់រហ័សរបស់នាងក្នុងនាមជាសិល្បករទោល។ អាល់ប៊ុមទោលដំបូងរបស់ Rosé មានចំណងជើងថា «rosie» បានដណ្ដើមពិភពលោកយ៉ាងឆាប់រហ័ស ដោយក្លាយជាអាល់ប៊ុមដំបូងដ៏ធំបំផុតនៅក្នុងការផ្សាយថ្ងៃដំបូងក្នុងចំណោមសិល្បករ K-Pop ក្នុងប្រវត្តិសាស្រ្តរបស់ Spotify ហើយថែមទាំងលើសពីកំណត់ត្រាផ្ទាល់ខ្លួនរបស់ BLACKPINK ដែលមានចំនួន ១៧០ លានដងជាមួយនឹងអាល់ប៊ុម «Born Pink» ។

លើសពីនេះ វីដេអូចម្រៀងរបស់ «APT» ដែលសហការជាមួយនឹង Bruno Mars បានបំបែកឯតទគ្គកម្មរបស់ «Gangnam Style» សម្រាប់វីដេអូចម្រៀងដែលមានការទស្សនាលឿនបំផុតរហូតដល់៨០០លានដង ត្រឹមតែ៨១ថ្ងៃនិង១០ ម៉ោងដើម្បីសម្រេចបាននូវស្នាដៃនេះ។ ឥឡូវនេះភាពជោគជ័យនៃ «APT» បានឈានដល់កម្រិតខ្ពស់ជាងនេះ។ វីដេអូនេះបានឈានដល់តួលេខមានអ្នកចូលមើលលើសពី១ពាន់លានដង ដែលនេះជាវីដេអូដំបូងរបស់ Rosé ដែលសម្រេចបាននូវស្នាដៃដ៏គួរអោយចាប់អារម្មណ៍នោះ។ មិនត្រឹមតែប៉ុណ្ណោះ «APT» បានកើនឡើងដល់ ១ ពាន់លានស្ទ្រីមក្នុងរយៈពេលត្រឹមតែ ៣ ខែចាប់តាំងពីការចេញផ្សាយរបស់វា។

វីដេអូចម្រៀងផ្លូវការផ្សេងទៀតរបស់ Rosé គឺមានចំនួនមើលដ៏គួរឱ្យចាប់អារម្មណ៍ ដោយបច្ចុប្បន្នមានអ្នកចូលមើលបទ «toxic till the end» លើសពីចំនួន៧១លានដង និងមានអ្នកចូលមើល ៧២ លានដងសម្រាប់បទ«number one girl»។ ជាមួយនឹងវីដេអូចម្រៀងនីមួយៗរបស់ Rosé ត្រូវបានចេញផ្សាយក្នុងរយៈពេលប៉ុន្មានខែចុងក្រោយនេះ ចំនួនអ្នកមើលខ្ពស់របស់ពួកគេកាន់តែគួរឱ្យចាប់អារម្មណ៍៕

 

សហរដ្ឋអាមេរិក ៖ កាលពីថ្ងៃទី៣១ ខែមករា ឆ្នាំ២០២៥ សារព័ត៌មានបរទេសរាយការណ៍ថា ប្រធានាធិបតីអាមេរិក លោក Donald Trump ប្រកាសដំឡើងពន្ធទំនិញពីបណ្តាប្រទេសសមាជិក BRICS រហូតដល់១០០% បើពួកគេឈប់ចាយប្រាក់ដុល្លារអាមេរិក ឬប្រើប្រាស់រូបិយប័ណ្ណថ្មីក្នុងការធ្វើពាណិជ្ជកម្មអន្តរជាតិ។

លោក Trump បានសរសេរក្នុងបណ្តាញសង្គម Truth Social កាលពីថ្ងៃទី៣០ ខែមករា កន្លងមកថា លោកចង់ឱ្យប្រទេសទាំងនេះសន្យាពុំប្រើប្រាស់រូបិយប័ណ្ណថ្មីជំនួសប្រាក់ដុល្លារអាមេរិក បើមិនដូច្នោះទេ ពួកគេនឹងត្រូវអាមេរិកដំឡើងពន្ធទំនិញ ១០០% ។ គ្មានផ្លូវទេ ដែលបណ្តាប្រទេសសមាជិក BRICS ប្រើប្រាស់រូបិយប័ណ្ណផ្សេងជំនួសប្រាក់ដុល្លារអាមេរិកក្នុងការធ្វើពាណិជ្ជកម្មអន្តរជាតិ ។ បើប្រទេសណាមួយព្យាយាមធ្វើបែបនេះ អាមេរិកនឹងដំឡើងពន្ធទំនិញប្រទេសនោះខ្ពស់ និងផ្តាច់ទំនាក់ទំនង ។

ប្រទេសជាសមាជិក BRICS រួមមាន ៖ ចិន, រុស្ស៊ី, ឥណ្ឌា, ប្រេស៊ីល, អាហ្វ្រិកខាងត្បូង, អ៊ីរ៉ង់, អេហ្ស៊ីប, អេមីរ៉ាតអារ៉ាប់រួម អេត្យូពី និងឥណ្ឌូណេស៊ី ហើយបច្ចុប្បន្ន មានប្រទេសមួយចំនួនបានសុំចូលជាសមាជិក រួមមាន ៖ ថៃ, ម៉ាឡេស៊ី និងតួកគី ។ ទោះជាប្រទេសទាំងនេះគ្មានរូបិយប័ណ្ណប្រើប្រាស់រួមគ្នា ប៉ុន្តែក្រោយពីប្រទេសលោកខាងលិចដាក់ទណ្ឌកម្មរុស្ស៊ី ដោយសារការធ្វើសង្គ្រាមជាមួយអ៊ុយក្រែន ពួកគេបានពិភាក្សាគ្នាពីការប្រើប្រាស់រូបិយប័ណ្ណថ្មីជំនួសប្រាក់ដុល្លារអាមេរិក សម្រាប់ការធ្វើពាណិជ្ជកម្មអន្តរជាតិ ។

កិច្ចប្រជុំកំពូលរបស់ថ្នាក់ដឹកនាំបណ្តាប្រទេស BRICS នៅប្រទេសរុស្ស៊ី កាលពីខែតុលា ឆ្នាំ២០២៤ លោក វ្ល៉ាឌីមៀរ ពូទីន ប្រធានាធិបតីរុស្ស៊ី ថ្លែងថា ការព្យាយាមរបស់អាមេរិកក្នុងការបង្ខំឱ្យប្រទេសផ្សេងៗចាយប្រាក់ដុល្លារសម្រាប់ការធ្វើពាណិជ្ជកម្មអន្តរជាតិ នឹងមានផលវិបាកដល់អាមេរិក នាពេលក្រោយ ។ អាមេរិកប្រើប្រាស់ប្រាក់ដុល្លារជាអាវុធ ហើយវាជាកំហុសឆ្គងដ៏ធំ ។ លោកថា ៖ «មិនមែនយើងបដិសេធចាយប្រាក់ដុល្លារទេ ប៉ុន្តែបើពួកគេមិនព្រមឱ្យយើងធ្វើការ តើយើងអាចធ្វើអ្វីបាន? យើងត្រូវបង្ខំឱ្យស្វែងរកជម្រើសផ្សេងជំនួស» ។

ទោះជាប្រាក់ដុល្លារអាមេរិកត្រូវបានប្រើប្រាស់ច្រើនបំផុតក្នុងជំនួញពិភពលោក និងជម្នះបញ្ហាប្រឈមកន្លងមកក្តី ប៉ុន្តែបណ្តាប្រទេសសមាជិក BRICS រួមទាំងប្រទេសកំពុងអភិវឌ្ឍន៍ផ្សេងៗបញ្ជាក់ថា ពួកគេធុញទ្រាន់នឹងឥទ្ធិពលរបស់អាមេរិកក្នុងប្រព័ន្ធហិរញ្ញវត្ថុពិភពលោក ៕