កាលពីចុងខែមករា ឆ្នាំ២០២៥ មន្ទីរសាធារណការ និងដឹកជញ្ជូនខេត្តកោះកុង បានបើកកិច្ចប្រជុំពិភាក្សា លេីគម្រោងសាងសង់ស្ពានកោះកុងថ្មី និងលើកគុណភាពផ្លូវជាតិលេខ៤៨ ពីក្រុងខេមរភូមិន្ទទៅច្រកព្រំដែនអន្តរជាតិចាំយាម ខេត្តកោះកុង។
បើតាមរូបគំរូប្លង់ស្ពានថ្មីនេះ មានប្រវែង១៧០០ម៉ែត្រ ទទឹង១០ម៉ែត្រ ទទួលការសិក្សាសាង់សង់ ដោយក្រុមហ៊ុន ទីប្រឹក្សា កូរ៉េ Donghae Engineering & Consultants Co.,Ltd។
បច្ចុប្បន្ន ក្រុមអ្នកជំនាញ កំពុងជីកខួងពិនិត្យសណ្ឋានដីនៅបាតក្រោមទឹកសមុទ្រ ដើម្បីវាយតម្លៃផ្នែកបច្ចេកទេស និងត្រូវការពេលសិក្សាប្រមាណ១ឆ្នាំ ដោយគ្រោងនឹងចាប់ផ្តើមសាងសង់ច្នុងឆ្នាំ២០២៦ ឬដើមឆ្នាំ២០២៧។
ក្រោយសាងសង់រួចស្ពានថ្មីនេះ នឹងសម្រួលការធ្វើដំណើរ និងដឹកជញ្ជូនទំនិញពាណិជ្ជកម្មបានលឿនឆាប់រហ័សប្រកបដោយសុវត្ថិភាព។
បន្ថែមពីនេះទៅទៀត ស្ពានកោះកុងថ្មី នឹងធ្វើឱ្យខេត្តកោះកុង ក្លាយជាខេត្តមាត់សមុទ្រ ដ៏មានសក្តានុពលស្ទើរគ្រប់វិស័យទាំងអស់ មិនចាញ់ខេត្តមាត់សមុទ្រផ្សេងទៀត។
គួររំលឹកថា បច្ចុប្បន្ន ខេត្តកោះកុង មានស្ពានមួយប្រវែង ១៩០០ម៉ែត្រ ឆ្លងកាត់ដៃសមុទ្រ ពីក្រុងខេមរៈភូមិន្ទ ឆ្ពោះទៅស្រុកមណ្ឌលសីម៉ា ជាប់ព្រំដែនប្រទេសថៃ៕
