ប្រទេសចិន៖ យោងតាមរបាយការណ៍របស់ក្រុមហ៊ុនទិន្នន័យ Altrata (UK) និងគេហទំព័របរទេស Forbes បានបង្ហាញថា ចំនួនមហាសេដ្ឋីនៅប្រទេសចិន គឺបានកើនឡើងយ៉ាងខ្លាំង ដោយជាប់ចំណាត់ថ្នាក់លេខ ២ បន្ទាប់សហរដ្ឋអាមេរិក។ ដូច្នេះបច្ចុប្បន្នចំនួនមហាេសដ្ឋីនៅប្រទេសចិន រួមទាំងទីក្រុងហុងកុង និងម៉ាកាវមានរហូតដល់ ៤៥៩ នាក់ ប្រមាណ ២៨% នៃមហាសេដ្ឋីរបស់ពិភពលោក។

នេះបើយោងតាម Altrata បានឱ្យដឹងទៀតថា សហរដ្ឋអាមេរិកជាប់ចំណាត់ថ្នាក់លេខ ១ នៅលើពិភពលោក ដោយមានមហាសេដ្ឋីសរុបចំនួន ៧៣៥ នាក់។ ក្នុងនោះញូវយ៉កគឺជាទីក្រុងដែលមានមហាសេដ្ឋីច្រើនជាងគេចំនួន ១៤៤ នាក់កើនឡើង ៩ នាក់បើធៀបនឹងឆ្នាំមុន។ រីឯចំនួនមហាសេដ្ឋីរស់នៅក្នុងទីក្រុងហុងកុងវិញគឺមានចំនួន ១០៧ នាក់ធ្លាក់ចុះ ៥ នាក់បើធៀបនឹងឆ្នាំមុន។

មូលហេតុដែលចំនួនមហាសេដ្ឋីធ្លាក់ចុះគឺដោយសារសេដ្ឋកិច្ចរបស់ប្រទេសចិន កំពុងប្រឈមនឹងបញ្ហាលំបាកៗជាច្រើន ជាពិសេសគឺការដំឡើងពន្ធពីប្រទេសលោកខាងលិចតែម្តង។ ទោះជាយ៉ាងណា ទីក្រុងហុងកុង និងម៉ាកាវ នៅតែជាស្ពានហិរញ្ញវត្ថុដ៏សំខាន់ ដោយភ្ជាប់ប្រទេសចិន និងទីផ្សារអន្តរជាតិ ធ្វើឱ្យវាក្លាយជាមជ្ឈមណ្ឌលដែលមិនអាចជំនួសបាននៅក្នុងប្រព័ន្ធហិរញ្ញវត្ថុពិភពលោក។

ហេតុនេះទោះបីជាមហាសេដ្ឋីរបស់ប្រទេសចិនមានការធ្លាក់ចុះបន្តិចក៏ដោយ ក៏ប្រទេសនេះនៅតែរក្សាតំណែងលេខពីរ ជាប្រទេសដែលមានមហាសេដ្ឋីច្រើនជាងគេលើពិភពលោកផងដែរ។ ក្រៅពីប្រទេសចិន ឥណ្ឌាក៏ជាប្រទេសដែលមានមហាសេដ្ឋីច្រើនជាងគេលើពិភពលោក ដោយឈរនៅចំណាត់ថ្នាក់លេខ ៣ មានមហាសេដ្ឋីចំនួន ១៦៦ នាក់៕

ប្រទេសអ៊ីតាលី ៖ កាលពីថ្ងៃទី២១ ខែមីនា ឆ្នាំ២០២៥ សារព័ត៌មាន AP រាយការណ៍ថា ពលរដ្ឋអ៊ីតាលីរស់នៅតំបន់ Tuscany ពុំហ៊ានចាកចេញពីផ្ទះរបស់ខ្លួនទេ ដោយសារមានហ្វូងសត្វល្អិតរាប់លានក្បាលហើរតម្រង់មកកញ្ចក់រថយន្ត រហូតដល់ងងឹតមើលផ្លូវពុំឃើញ ហើយពលរដ្ឋពិបាកធ្វើដំណើរយ៉ាងខ្លាំង ។ លើសពីនេះ ពួកវាបានប្រមូលផ្តុំគ្នានៅតាមរបងអគារផ្សេងៗបណ្តាលឱ្យងងឹតមេឃ ងងឹតដី និងរំខានដល់អាជីវកម្មជាច្រើនកន្លែងក្នុងតំបន់ទេសចរណ៍ ។

ហ្វូងសត្វល្អិតរាប់លានក្បាលបានហើរចេញពីបឹង Orbetello Lagoon ស្ថិតក្នុងតំបន់ Tuscany ដែលបណ្តាលឱ្យប៉ះពាល់ដល់ការធ្វើដំណើរ និងការប្រកបអាជីវកម្មជាច្រើនកន្លែងរបស់ពលរដ្ឋអ៊ីតាលីរស់នៅតំបន់ទេសចរណ៍ ។ បឹង Orbetello Lagoon គឺជាតំបន់ទេសចរណ៍ដ៏ល្បីល្បាញ និងចាប់ផ្តើមទទួលស្វាគមន៍ភ្ញៀវទេសចរមកកម្សាន្ត ប៉ុន្តែដោយសារមានសត្វល្អិតរាប់លានក្បាលបង្ហាញខ្លួន ធ្វើឱ្យភ្ញៀវទេសចរផ្អាកដំណើរកម្សាន្ត ។

កាលពីឆ្នាំមុន ក៏មានហ្វូងសត្វល្អិតច្រើនដែរ ប៉ុន្តែឆ្នាំ២០២៥នេះ ពួកវាបង្ហាញខ្លួននៅតំបន់ទេសចរណ៍មុនពេលកំណត់២០ថ្ងៃមុន ដោយពួកវាបានប្រមូលផ្តុំជាហ្វូងធំៗ ដែលធ្វើឱ្យពលរដ្ឋពិបាកចាកចេញពីផ្ទះ ។ នៅពេលព្រឹក និងព្រលប់ ពួកវានឹងហើរតម្រង់មកកាន់កញ្ចក់រថយន្ត រហូតដល់ងងឹតមើលផ្លូវពុំឃើញ និងហើរទៅទំលើរបងអគារផ្សេងៗក្លាយជាពណ៌ខ្មៅ ។

លោកអភិបាលក្រុងបានប្រកាសតាមហ្វេសប៊ុកថា នឹងផ្តល់ថវិកាចំនួន៣សែនអឺរ៉ូ (ឬជាង៣សែនដុល្លារ) ដើម្បីកម្ចាត់ហ្វូងសត្វល្អិតទាំងនេះ ។ ប៉ុន្តែរហូតមកដល់ថ្ងៃទី២១ ខែមីនា ពលរដ្ឋពុំដឹងច្បាស់ថា តើវិធានការកម្ចាត់ហ្វូងសត្វល្អិតរាប់លានក្បាល នឹងធ្វើឡើងបែបណាទេ?

ដោយឡែក ប្រធានផ្នែកនេសាទរបស់បឹង Orbetello Lagoon បាននិយាយមកកាន់សារព័ត៌មាន AP ថា ការបង្ហាញខ្លួនរបស់ហ្វូងសត្វល្អិត គឺអាចពាក់ព័ន្ធនឹងហេតុការណ៍ត្រីជាច្រើនក្បាលងាប់ កាលពីឆ្នាំ២០២៤ ។

តាមធម្មតា ត្រីនឹងស៊ីកូនរបស់សត្វល្អិតទាំងនេះ និងជួយកាត់បន្ថយចំនួនសត្វល្អិតឱ្យធ្លាក់ចុះយ៉ាងច្រើន ។ រីឯមូលហេតុត្រីងាប់ គឺអាចមកពីបរិមាណអុកស៊ីសែនក្នុងបឹងធ្លាក់ចុះ ដោយសារប្រឡាយសម្រាប់តភ្ជាប់ទឹកបឹងជាមួយសមុទ្រ ពុំបានថែទាំត្រឹមត្រូវ ។ កន្លងមក ខាងនេសាទធ្លាប់បានអំពាវនាវឱ្យកែលម្អប្រព័ន្ធអេកូឡូស៊ីបឹង Orbetello Lagoon ជាបន្ទាន់ ។

គួរបញ្ជាក់ថា សត្វល្អិតទាំងនេះមានខ្លួនតូចបំផុត និងមានមាត់ដូចសត្វមូសសម្រាប់ខាំមនុស្ស ។ វាមានដងខ្លួនពណ៌ខ្មៅ ឬពណ៌ប្រផេះចាស់ ហើយតែងតែប្រមូលផ្តុំនៅឆ្នេរសមុទ្រ និងតំបន់ព្រៃ ។ បន្ទាប់ពីវាខាំរួច មនុស្សមួយចំនួននឹងកើតកន្ទួលក្រហមនៅលើស្បែក និងរមាស់ដូចមូសខាំ ៕

ប្រទេសកូរ៉េខាងត្បូង ៖ កងទ័ពអាមេរិក និងកូរ៉េខាងត្បូងបានធ្វើសមយុទ្ធរួមគ្នាឆ្លងទន្លេនៅទីក្រុងយ៉នស៊ន ខេត្តខាយ៉ងគី ប្រទេសកូរ៉េខាងត្បូង កាលពីថ្ងៃទី២០ ខែមីនា ឆ្នាំ២០២៥ ដែលទីតាំងធ្វើសមយុទ្ធនេះនៅជិតព្រំដែនកូរ៉េខាងជើង ឬនៅមិនឆ្ងាយពីតំបន់គ្មានកងទ័ពរវាងប្រទេសកូរ៉េទាំងពីរ ។ ហេតុ​នេះ ធ្វើឱ្យកូរ៉េខាងជើងមិនពេញចិត្តយ៉ាងខ្លាំង ហើយកូរ៉េខាងជើងបានថ្កោលទោ.ស និងស្នើឱ្យបញ្ឈប់ការធ្វើសមយុទ្ធជាបន្ទាន់ ពីព្រោះវាជាការញុះញ៉ង់ឈានទៅរកការឈ្លានពា.ន ។

ការធ្វើសមយុទ្ធឆ្លងទន្លេ គឺកងទ័ពអាមេរិក និងកូរ៉េខាងត្បូងបានយករថពាសដែកឆ្លងទន្លេអ៊ីនជីន ព្រមទាំងឧបករណ៍កងទ័ពជាង១០០ប្រភេទទៀត ។ ក្រៅពីនេះ ក៏មានយន្តហោះចម្បាំង និងឧទ្ធម្ភាគចក្រ ព្រមទាំងកងទ័ពជាង៦០០នាក់មកពីអាមេរិក និងកូរ៉េខាងត្បូងចូលរួមការធ្វើសមយុទ្ធ រយៈពេល៦ថ្ងៃ ។

វាជាផ្នែកមួយនៃការធ្វើសមយុទ្ធកងទ័ពប្រចាំឆ្នាំរវាងអាមេរិក និងកូរ៉េខាងត្បូង ឈ្មោះថា «សមយុទ្ធ Freedom Shield» ដែលបានចាប់ផ្តើមតាំងពីដើមខែមីនា ឆ្នាំ២០២៥ មកម៉្លេះ ។ ប៉ុន្តែការធ្វើសមយុទ្ធបានផ្អាកមួយរយៈ ដោយសារយន្តហោះចម្បាំងកូរ៉េខាងត្បូងទម្លាក់គ្រាប់បែកភ្លាត់ស្នៀតបណ្តាលឱ្យខូចខាតលំនៅឋានពលរដ្ឋ និងពលរដ្ឋរងរបួសចំនួន២៩នាក់ ។

ការធ្វើសមយុទ្ធរវាងអាមេរិក និងកូរ៉េខាងត្បូងធ្វើឱ្យមេដឹកនាំកូរ៉េខាងជើងមិនពេញចិត្តយ៉ាងខ្លាំង ហើយកូរ៉េខាងជើងបានថ្កោលទោស និងស្នើឱ្យបញ្ឈប់ការធ្វើសមយុទ្ធនេះជាបន្ទាន់ ។ កូរ៉េខាងជើងអះអាងថា វាជាការញុះញ៉ង់ឈានទៅរកការឈ្លានពាន ។

ចំណែកកូរ៉េខាងត្បូងបញ្ជាក់យ៉ាងច្បាស់លាស់ថា ការធ្វើសមយុទ្ធជាមួយអាមេរិក គឺក្នុងគោលបំណងពង្រឹងកម្លាំងកងទ័ពកូរ៉េខាងត្បូងឱ្យរឹងមាំ និងត្រៀមខ្លួនការពារការគំរាមកំហែងពីប្រទេសជិតខាង គឺកូរ៉េខាងជើង ៕

ប្រទេសអូស្ត្រាលី ៖ កាលពីថ្ងៃទី២១ ខែមីនា ឆ្នាំ២០២៥ សារព័ត៌មាន Mirror រាយការណ៍ថា អាជ្ញាធរមូលដ្ឋានរបស់អូស្ត្រាលីបានបិទឆ្នេរសមុទ្រជាច្រើនកន្លែងនៅរដ្ឋ South Australia ព្រមទាំងបិទឆ្នេរសមុទ្រ ចំនួន២កន្លែងទៀត នៅទីក្រុង Adelaide ក្រោយពីមានពពុះទឹកសមុទ្រពណ៌លឿងបោកបក់មកលើឆ្នេរ ។ ហេតុការណ៍នេះធ្វើឱ្យត្រីងា.ប់ ជាច្រើនក្បាល ខណៈអ្នកជិះស្គីធ្លាក់ខ្លួនឈឺជាបន្តបន្ទាប់ ។

អាជ្ញាធរអូស្ត្រាលីបានបិទឆ្នេរសមុទ្រជាច្រើនកន្លែង តាំងពីថ្ងៃទី១៧ ខែមីនា មកម៉្លេះ ដោយសារពពុះទឹកសមុទ្រពណ៌លឿង គ្របដណ្តប់ពេញឆ្នេរទាំងអស់ធ្វើឱ្យត្រីងាប់ជាច្រើនក្បាល ។ លោក អេនថូនី រ៉ូឡែន រស់នៅទីក្រុង Adelaide និយាយថា អ្នកជិះស្គីបានធ្លាក់ខ្លួនឈឺជាបន្តបន្ទាប់ ដូចជា ៖ ឈឺភ្នែក ឈឺក និងក្អក ក្រោយពេលពួកគេប៉ះទឹកសមុទ្រ អ្នកខ្លះទៀតពុំបានលេងទឹកសមុទ្រទេ ប៉ុន្តែក្អកខ្លាំង ។

អ្នកជំនាញផ្នែកសមុទ្របានយកពពុះទឹកសមុទ្រពណ៌លឿងនេះទៅត្រួតពិនិត្យ ប៉ុន្តែត្រូវរង់ចាំរយៈពេល១សប្តាហ៍ ទើបដឹងលទ្ធផល ។ អ្នកជំនាញសន្និដ្ឋានថា វាអាចបណ្តាលមកពីសារ៉ាយពុលមួយប្រភេទរលាយក្នុងទឹកដែលមានសីតុណ្ហភាពខ្ពស់ រួមផ្សំជាមួយខ្យល់ស្ងួត និងទឹកសមុទ្រស្រក ។

ហេតុការណ៍នេះគួរឱ្យបារម្ភណាស់ ពីព្រោះតាមធម្មតា ជារៀងរាល់ឆ្នាំ គឺមានសារ៉ាយពុលបែបនេះដែរ ប៉ុន្តែនៅឆ្នាំ២០២៥ សារ៉ាយពុលខ្លាំងជាងធម្មតា និងប៉ះពាល់ដល់ឆ្នេរសមុទ្រជាច្រើនកន្លែង ។ យើងពុំប្រាកដចិត្តថា តើវានឹងអូសបន្លាយពេលយូរប៉ុនណាទេ បើទឹករលកសមុទ្របោកបក់ខ្លាំង កាន់តែធ្វើឱ្យសារ៉ាយរាយប៉ាយ និងមានពពុះទឹកសមុទ្រពណ៌លឿង កាន់តែច្រើន ។ នេះបើតាមលោក សែម ហ្គេឡាត ប្រធានក្រុមអ្នកស្រាវជ្រាវផ្នែកសមុទ្រ នៃភ្នាក់ងារការពារបរិស្ថានរដ្ឋ South Australia ។

ត្រី និងសេះសមុទ្រដែលងាប់លើឆ្នេរខ្សាច់ គឺមានស្លាកស្នាមពណ៌ក្រហម ជាប់នៅលើខ្សាច់ ខណៈអ្នកជិះស្គីកើតអាការៈស្រដៀងគ្នា គឺ ៖ រមាស់ភ្នែក មើលពុំច្បាស់ ក្អក និងពិបាកដកដង្ហើម ។ បច្ចុប្បន្ន ភ្នាក់ងារស្រាវជ្រាវផ្នែកសមុទ្រ និងភ្នាក់ងារផ្សេងៗ ព្រមទាំងក្រសួងឧស្សាហកម្មនៅរដ្ឋ South Australia និងក្រសួងសុខាភិបាល បានយកពពុះទឹកសមុទ្រពណ៌លឿង ទៅត្រួតពិនិត្យ ។

ជំហ៊ានដំបូង អ្នកជំនាញសន្និដ្ឋានថា វាអាចបណ្តាលមកពីសារ៉ាយសមុទ្រតូចៗដែលកើតឡើងដោយសារសីតុណ្ហភាពទឹកខ្ពស់ និងទឹកស្ងប់ ស្របពេលរលកកំដៅគ្របដណ្តប់លើសមុទ្រ ដែលមានសីតុណ្ហភាពខ្ពស់ជាងធម្មតារហូតដល់២.៥អង្សាសេ ៕

ប្រទេសថៃ ៖ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ មានគម្រោងចំណាយប្រាក់ចំនួន១៥០លានបាត (ស្មើជាង៤លានដុល្លារ) ដើម្បីរៀបចំកម្មវិធីផ្សេងៗក្នុងថ្ងៃចូលឆ្នាំថ្មីនៅប្រទេសថៃយ៉ាងអធិកអធម ។ ក្រៅពីនេះ លោកស្រីបានស្នើឱ្យពលរដ្ឋនៅតាមបណ្តាខេត្តទាំង៧៧ ចូលរួមស្លៀកខោផ្កាចម្រុះពណ៌ ក្នុងថ្ងៃចូលឆ្នាំថ្មីខាងមុខ ដើម្បីបង្ហាញអត្តសញ្ញាណជាតិ និងផ្សព្វផ្សាយ Soft Power ថៃទៅកាន់ពិភពលោក ។

កាលពីថ្ងៃទី១៩ ខែមីនា ឆ្នាំ២០២៥ នៅវិមានរដ្ឋាភិបាល លោកស្រី ផេថងថាន បានធ្វើជាប្រធានកិច្ចប្រជុំគណៈកម្មការយុទ្ធសាស្ត្រ Soft Power ជាតិ ដោយមានការចូលរួមពីលោក Sorawong Thienthong រដ្ឋមន្ត្រីក្រសួងទេសចរណ៍ និងកីឡា ព្រមទាំងរដ្ឋមន្ត្រីមកពីក្រសួងផ្សេងៗ ។ ក្រោយបញ្ចប់កិច្ចប្រជុំ លោកស្រី ផេថងថាន និងរដ្ឋមន្ត្រីមកពីក្រសួងជាច្រើនបានស្លៀកខោផ្កាចម្រុះពណ៌តំណាងឱ្យខេត្តនីមួយៗថតរូបជុំគ្នា ក្នុងគោលបំណងផ្សព្វផ្សាយ Soft Power ថៃ ។

នាយករដ្ឋមន្ត្រីថៃថ្លែងថា ខោផ្កាចម្រុះពណ៌របស់ខេត្តនីមួយៗពុំដូចគ្នាទេ ពីព្រោះខេត្តមានអត្តសញ្ញាណរៀងៗខ្លួន ហើយលោកស្រីរីករាយដែលរដ្ឋមន្ត្រីគ្រប់រូបគាំទ្រខោតំណាងឱ្យខេត្ត ។ នៅថ្ងៃចូលឆ្នាំថ្មី លោកស្រីចង់ឱ្យពលរដ្ឋស្លៀកខោតំណាងឱ្យខេត្តរបស់ខ្លួន ជួយគ្នាផ្សព្វផ្សាយ និងគាំទ្រការរចនាម៉ូដខោ ។ លោកស្រីបានអរគុណដល់រដ្ឋមន្ត្រីគ្រប់រូបដែលជួយលើកកម្ពស់ Soft Power ជាច្រើនផ្នែក ដែលធ្វើឱ្យជនបរទេសចូលចិត្តប្រទេសថៃ ។ បើគ្មានកិច្ចសហការរវាងរដ្ឋ និងឯកជន ប្រហែលជាថៃមិនអាចផលិតខោតំណាងខេត្តទេ ហើយថៃនឹងសហការគ្នាបន្តទៀតដើម្បីឱ្យពិភពលោក ចាប់អារម្មណ៍ Soft Power ។

ដោយឡែក លោក Sorawong Thienthong រដ្ឋមន្ត្រីក្រសួងទេសចរណ៍ និងកីឡា និយាយថា ការរៀបចំពិធីបុណ្យចូលឆ្នាំថ្មីនៅទីក្រុងបាងកក គឺនឹងធ្វើនៅទីលានមុខព្រះរាជវាំង ចាប់ពីថ្ងៃទី១១ ដល់ថ្ងៃទី១៥ ខែមេសា ឆ្នាំ២០២៥ ។ នៅថ្ងៃទី១២ ខែមេសា នឹងមានក្បួនដង្ហែរយ៉ាងធំ ពីព្រោះក្រសួងទេសចរណ៍ចង់ឱ្យពិធីបុណ្យឆ្នាំថ្មីឆ្នាំនេះ ធ្វើឡើងយ៉ាងអធិកអធម ព្រមទាំងមានការបង្ហាញពីសិល្បៈ វប្បធម៌ និងការលក់ដូរទំនិញផ្សេងៗយកមកពីខេត្ត ។ លោកចង់ឱ្យពលរដ្ឋជួយជំរុញ Soft Power ខេត្តរបស់ខ្លួន ដូចជា ៖ សម្លៀកបំពាក់ ម្ហូបអាហារ សិល្បៈ និងវប្បធម៌ ។

ចំណែកខេត្តធំៗ ដូចជា ៖ ឈៀងម៉ៃ សុងក្លា ខនគែន នគរស្រីថាម៉ារ៉ាជ និងសមុទ្រប្រាកាន សូមពលរដ្ឋទាំងអស់ជួយគ្នាលើកកម្ពស់ប្រពៃណីថៃក្នុងថ្ងៃចូលឆ្នាំថ្មី ហើយក្រសួងទេសចរណ៍នឹងចំណាយប្រាក់ចំនួន១៥០លានបាត ដើម្បីរៀបចំកម្មវិធីផ្សេងៗក្នុងថ្ងៃចូលឆ្នាំថ្មីឱ្យបានអធិកអធម ៕