ប៊ុន ផាក យល់ពាក្យថា “សន្តិភាព” កាន់តែច្បាស់ ក្រោយត្រឡប់មកពីស្នងការនគរបាលរាជធានីភ្នំពេញវិញ

បុរសសង្ហា ពូកែទ្រឹស្ដីគឺលោក ប៊ុន ផាក បានចូលខ្លួនមកបំភ្លឺតាមការហោះហៅរបស់ស្នងការនគរបាលរាជធានីភ្នំពេញ ដើម្បីពន្យល់អំពីអត្ថន័យ នៃពាក្យ «សន្ដិភាព» នៅថ្ងៃទី២១ ខែមីនា ឆ្នាំ២០២៥ នេះ។

ក្នុងការចូលបំភ្លឺនោះ ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ ក៏បានពន្យល់អំពីអត្ថន័យនៃពាក្យ «សន្ដិភាព» ជូនទៅកាន់លោកប៊ុន ផាកបន្ថែម និងបានធ្វើកិច្ចសន្យាជាមួយលោកក្នុងការបញ្ឈប់សកម្មភាពបង្ហោះព័ត៌មានបំភ្លៃការពិត នៅលើបណ្ដាញទំនាក់ទំនងសង្គមតទៅទៀត។

ក្រោយបញ្ចប់ការសួរនាំជាមួយខាងសមត្ថកិច្ច នៅស្នងការនគរបាលរាជធានីភ្នំពេញ លោកប៊ុន ផាក បានបង្ហោះនូវសារថ្មីមួយនៅលើផេករបស់លោក ដោយជាការកោតសសើរ នូវការអនុវត្តនីតិវិធីប្រកបដោយវិជ្ជាជីវៈ របស់មន្ត្រីនគរបាលយុត្តិធម៌ ដែលបានផ្តល់ភាពកក់ក្តៅដល់ប្រជាពលរដ្ឋ និងឈរលើគោលការណ៍យុត្តិធម៌ តម្លាភាព និងគណនេយ្យភាព។

លោកបានបន្តទៀតថា «ខ្ញុំបាទបានយល់ដឹងកាន់តែទូលំទូលាយពីអត្ថន័យពាក្យថា «សន្តិភាព» គឺទទួលបានយ៉ាងលំបាក ដោយមានការលះបង់សាច់ស្រស់ឈាមស្រស់ពីសម្តេចតេជោ ហ៊ុន សែន និងឥស្សរជនជាច្រើនរូប និងការពលីរបស់ទាហាន និងប្រជាពលរដ្ឋជាច្រើន ទើបអាចទាមទារបានសន្តិភាពយ៉ាងលំបាក។ ខ្ញុំយល់ពីគុណតម្លៃពី «សន្តិភាព» មិនអាចកាត់ថ្លៃបានទេ និងសូមខ្ញុំអគុណសន្តិភាព នឹងចូលរួមថែរក្សាតម្លៃនៃសន្តិភាព ឱ្យខានតែបាន គ្រប់មធ្យោបាយទាំងអស់»។

លើសពីនេះ លោកបានកត់សម្គាល់ឃើញថា ខាងសមត្ថកិច្ចពិតជាបានអនុវត្តលើការបង្រ្កាបបទល្មើសផ្សេងៗយ៉ាងសកម្ម និងមានប្រសិទ្ទភាព ក្នុងការផ្ដល់ភាពកក់ក្ដៅជូនដល់ប្រជាជន ភ្ញៀវទេសចរបរទេស និងអ្នកវិនិយោគ ដើម្បីអោយពួកគេមានទំនុកចិត្តលើផ្នែកសន្តិសុខ និងសណ្ដាប់ធ្នាប់របស់ប្រទេសកម្ពុជាយើង ហើយនឹងធ្វើឱ្យប្រទេសកម្ពុជា កាន់តែមានមុខមាត់ល្អប្រសើរ លើឆាកអន្តជាតិ។

ជាចុងក្រោយលោកប៊ុន ផាកសង្ឃឹមថា អ្នកទាំងអស់គ្នាយល់ពីតម្លៃសន្តិភាព និងស្ថេរភាពនយោបាយ ក្រោមការដឹកនាំប្រកបដោយគតិបណ្ឌិតខ្ពស់ខ្ពស់របស់នាយករដ្ឋមន្ត្រី សម្តេចធិបតី ហ៊ុន ម៉ាណែត។ អរគុណសន្តិភាព៕