អូទ្រីស ជាប្រទេសដែលល្បីល្បាញដោយសារភ្នំអាល់ដ៏អស្ចារ្យ មិនត្រឹមតែមានភ្នំអាល់នោះទេ ប្រទេសនេះក៏មានកន្លែងជិះស្គី ថែមទាំងមានទឹកធ្លាក់ដ៏ស្រស់ស្អាតទៀតផង។ យោងតាមគេហទំព័រទេសចរណ៍បរទេស Lonely Planet បានបង្ហាញពីតំបន់ទឹកធ្លាក់ប្លែកៗចំនួន ៥ នៅក្នុងប្រទេសអូទ្រីស ដែលនីមួយៗមានភាពស្រស់ស្អាតរៀងៗខ្លួន និងជាគោលដៅដែលលោកអ្នកត្រូវទៅទស្សនាកម្សាន្តសម្រាប់អ្នកស្រឡាញ់ធម្មជាតិ។

១.ទឹកធ្លាក់ Krimml៖ ទឹកធ្លាក់នេះមានកម្ពស់ ៣៨០ ម៉ែត្រគឺជាទឹកជ្រោះខ្ពស់បំផុតនៅក្នុងប្រទេសអូទ្រីស និងជាទឹកជ្រោះខ្ពស់បំផុតនៅអឺរ៉ុបផងដែរ។ ទឹកធ្លាក់ Krimml មានទីតាំងស្ថិតនៅក្នុងឧទ្យានជាតិ Hohe Tauern, Krimml ដែលផ្តល់នូវទិដ្ឋភាពដ៏អស្ចារ្យនៃទឹកហូរខ្លាំង និងទេសភាពភ្នំដ៏ស្រស់ស្អាតនៅជុំវិញ បង្កើតបានជាទេសភាពដ៏អស្ចារ្យ និងគួរឱ្យចាប់អារម្មណ៍បំផុត ដែលទាក់ទាញអ្នកទស្សនារាប់ពាន់នាក់ក្នុងមួយឆ្នាំៗ។

២.ទឹកធ្លាក់ Liechtensteinklamm៖ គឺជាជ្រោះជ្រៅមួយដែលមានទីតាំងនៅចំកណ្តាលនៃភ្នំអាល់។ ជ្រលងភ្នំនេះត្រូវបានគេស្គាល់ដោយសារច្រាំងថ្មចោត និងទឹកពណ៌ខៀវថ្លាឈ្វង់ហូរកាត់បង្កើតបានជាទិដ្ឋភាពដូចវេទមន្ត។ ផ្លូវនេះត្រូវបានបំពាក់ដោយស្ពានព្យួរ និងផ្លូវដែលមានសុវត្ថិភាព ដែលអនុញ្ញាតឱ្យអ្នកទស្សនាចូលទៅជិតសម្រស់ធម្មជាតិព្រៃ និងរុករកទឹកដីដ៏អស្ចារ្យដែលមិនធ្លាប់មានពីមុនមក។

៣.ទឹកធ្លាក់ Stuibenfall៖ គឺជាទិសដៅដ៏លេចធ្លោបំផុតមួយសម្រាប់អ្នកចូលចិត្តធម្មជាតិ និងផ្សងព្រេងនៅប្រទេសអូទ្រីស។ ទឹកធ្លាក់នេះបង្កើតជាអ័ព្ទក្រាស់ ផ្តល់បរិយាកាសអាថ៌កំបាំងដល់តំបន់ជុំវិញ។ ផ្លូវឡើងទៅកាន់ទឹកធ្លាក់រួមមានជណ្តើរ និងវេទិកាសង្កេត ដែលផ្តល់នូវទិដ្ឋភាពប្លែកៗគួរជាទីចាប់អារម្មណ៍។

៤.ទឹកធ្លាក់ Gollinger Wasserfall៖ ទឹកធ្លាក់នេះមានភាពល្បីល្បាញមិនត្រឹមតែសម្រាប់ភាពស្រស់ស្អាតដ៏អស្ចារ្យរបស់វាប៉ុណ្ណោះទេ ថែមទាំងមានខ្យល់អាកាសត្រជាក់ និងស្រស់ល្អនៃព្រៃជុំវិញផងដែរ។ ទឹកជ្រោះមានបឹងតូចមួយនៅជើងរបស់វា ដែលជាកន្លែងដ៏ល្អសម្រាប់ថតរូបធម្មជាតិ ហើយអ្នកក៏អាចជ្រមុជខ្លួននៅក្នុងលំហដ៏ស្ងប់ស្ងាត់ និងដាច់ដោយឡែកពីភាពអ៊ូអរក្នុងជីវិតប្រចាំថ្ងៃទៀតផង។

៥.ទឹកជ្រោះ Grawa៖ គឺជាទឹកជ្រោះដែលមានទីតាំងនៅជ្រលង Stubai ដ៏ស្ងប់ស្ងាត់ ត្រូវបានគេចាត់ទុកថា ជាទឹកធ្លាក់ដ៏ធំបំផុតមួយនៅក្នុងប្រទេសអូទ្រីស។ ជាមួយនឹងលំហូរដ៏ទន់ភ្លន់ និងទិដ្ឋភាពភ្នំដ៏ស្រស់បំព្រង ទឹកជ្រោះនេះគឺល្អសម្រាប់អ្នកដែលស្វែងរកការសម្រាកលំហែកាយ ដោយតំបន់ជុំវិញទឹកធ្លាក់ក៏មានតុពិកនិក និងផ្លូវងាយស្រួល ដែលធ្វើឱ្យវាក្លាយជាកន្លែងកម្សាន្តដ៏ល្អឥតខ្ចោះសម្រាប់ក្រុមគ្រួសារ និងអ្នកដែលស្វែងរកកន្លែងស្ងប់ស្ងាត់ដើម្បីរីករាយនឹងទិដ្ឋភាពមនោរម្យ៕

ប្រទេសចិន៖ យោងតាមរបាយការណ៍របស់ក្រុមហ៊ុនទិន្នន័យ Altrata (UK) និងគេហទំព័របរទេស Forbes បានបង្ហាញថា ចំនួនមហាសេដ្ឋីនៅប្រទេសចិន គឺបានកើនឡើងយ៉ាងខ្លាំង ដោយជាប់ចំណាត់ថ្នាក់លេខ ២ បន្ទាប់សហរដ្ឋអាមេរិក។ ដូច្នេះបច្ចុប្បន្នចំនួនមហាេសដ្ឋីនៅប្រទេសចិន រួមទាំងទីក្រុងហុងកុង និងម៉ាកាវមានរហូតដល់ ៤៥៩ នាក់ ប្រមាណ ២៨% នៃមហាសេដ្ឋីរបស់ពិភពលោក។

នេះបើយោងតាម Altrata បានឱ្យដឹងទៀតថា សហរដ្ឋអាមេរិកជាប់ចំណាត់ថ្នាក់លេខ ១ នៅលើពិភពលោក ដោយមានមហាសេដ្ឋីសរុបចំនួន ៧៣៥ នាក់។ ក្នុងនោះញូវយ៉កគឺជាទីក្រុងដែលមានមហាសេដ្ឋីច្រើនជាងគេចំនួន ១៤៤ នាក់កើនឡើង ៩ នាក់បើធៀបនឹងឆ្នាំមុន។ រីឯចំនួនមហាសេដ្ឋីរស់នៅក្នុងទីក្រុងហុងកុងវិញគឺមានចំនួន ១០៧ នាក់ធ្លាក់ចុះ ៥ នាក់បើធៀបនឹងឆ្នាំមុន។

មូលហេតុដែលចំនួនមហាសេដ្ឋីធ្លាក់ចុះគឺដោយសារសេដ្ឋកិច្ចរបស់ប្រទេសចិន កំពុងប្រឈមនឹងបញ្ហាលំបាកៗជាច្រើន ជាពិសេសគឺការដំឡើងពន្ធពីប្រទេសលោកខាងលិចតែម្តង។ ទោះជាយ៉ាងណា ទីក្រុងហុងកុង និងម៉ាកាវ នៅតែជាស្ពានហិរញ្ញវត្ថុដ៏សំខាន់ ដោយភ្ជាប់ប្រទេសចិន និងទីផ្សារអន្តរជាតិ ធ្វើឱ្យវាក្លាយជាមជ្ឈមណ្ឌលដែលមិនអាចជំនួសបាននៅក្នុងប្រព័ន្ធហិរញ្ញវត្ថុពិភពលោក។

ហេតុនេះទោះបីជាមហាសេដ្ឋីរបស់ប្រទេសចិនមានការធ្លាក់ចុះបន្តិចក៏ដោយ ក៏ប្រទេសនេះនៅតែរក្សាតំណែងលេខពីរ ជាប្រទេសដែលមានមហាសេដ្ឋីច្រើនជាងគេលើពិភពលោកផងដែរ។ ក្រៅពីប្រទេសចិន ឥណ្ឌាក៏ជាប្រទេសដែលមានមហាសេដ្ឋីច្រើនជាងគេលើពិភពលោក ដោយឈរនៅចំណាត់ថ្នាក់លេខ ៣ មានមហាសេដ្ឋីចំនួន ១៦៦ នាក់៕

ប្រទេសអ៊ីតាលី ៖ កាលពីថ្ងៃទី២១ ខែមីនា ឆ្នាំ២០២៥ សារព័ត៌មាន AP រាយការណ៍ថា ពលរដ្ឋអ៊ីតាលីរស់នៅតំបន់ Tuscany ពុំហ៊ានចាកចេញពីផ្ទះរបស់ខ្លួនទេ ដោយសារមានហ្វូងសត្វល្អិតរាប់លានក្បាលហើរតម្រង់មកកញ្ចក់រថយន្ត រហូតដល់ងងឹតមើលផ្លូវពុំឃើញ ហើយពលរដ្ឋពិបាកធ្វើដំណើរយ៉ាងខ្លាំង ។ លើសពីនេះ ពួកវាបានប្រមូលផ្តុំគ្នានៅតាមរបងអគារផ្សេងៗបណ្តាលឱ្យងងឹតមេឃ ងងឹតដី និងរំខានដល់អាជីវកម្មជាច្រើនកន្លែងក្នុងតំបន់ទេសចរណ៍ ។

ហ្វូងសត្វល្អិតរាប់លានក្បាលបានហើរចេញពីបឹង Orbetello Lagoon ស្ថិតក្នុងតំបន់ Tuscany ដែលបណ្តាលឱ្យប៉ះពាល់ដល់ការធ្វើដំណើរ និងការប្រកបអាជីវកម្មជាច្រើនកន្លែងរបស់ពលរដ្ឋអ៊ីតាលីរស់នៅតំបន់ទេសចរណ៍ ។ បឹង Orbetello Lagoon គឺជាតំបន់ទេសចរណ៍ដ៏ល្បីល្បាញ និងចាប់ផ្តើមទទួលស្វាគមន៍ភ្ញៀវទេសចរមកកម្សាន្ត ប៉ុន្តែដោយសារមានសត្វល្អិតរាប់លានក្បាលបង្ហាញខ្លួន ធ្វើឱ្យភ្ញៀវទេសចរផ្អាកដំណើរកម្សាន្ត ។

កាលពីឆ្នាំមុន ក៏មានហ្វូងសត្វល្អិតច្រើនដែរ ប៉ុន្តែឆ្នាំ២០២៥នេះ ពួកវាបង្ហាញខ្លួននៅតំបន់ទេសចរណ៍មុនពេលកំណត់២០ថ្ងៃមុន ដោយពួកវាបានប្រមូលផ្តុំជាហ្វូងធំៗ ដែលធ្វើឱ្យពលរដ្ឋពិបាកចាកចេញពីផ្ទះ ។ នៅពេលព្រឹក និងព្រលប់ ពួកវានឹងហើរតម្រង់មកកាន់កញ្ចក់រថយន្ត រហូតដល់ងងឹតមើលផ្លូវពុំឃើញ និងហើរទៅទំលើរបងអគារផ្សេងៗក្លាយជាពណ៌ខ្មៅ ។

លោកអភិបាលក្រុងបានប្រកាសតាមហ្វេសប៊ុកថា នឹងផ្តល់ថវិកាចំនួន៣សែនអឺរ៉ូ (ឬជាង៣សែនដុល្លារ) ដើម្បីកម្ចាត់ហ្វូងសត្វល្អិតទាំងនេះ ។ ប៉ុន្តែរហូតមកដល់ថ្ងៃទី២១ ខែមីនា ពលរដ្ឋពុំដឹងច្បាស់ថា តើវិធានការកម្ចាត់ហ្វូងសត្វល្អិតរាប់លានក្បាល នឹងធ្វើឡើងបែបណាទេ?

ដោយឡែក ប្រធានផ្នែកនេសាទរបស់បឹង Orbetello Lagoon បាននិយាយមកកាន់សារព័ត៌មាន AP ថា ការបង្ហាញខ្លួនរបស់ហ្វូងសត្វល្អិត គឺអាចពាក់ព័ន្ធនឹងហេតុការណ៍ត្រីជាច្រើនក្បាលងាប់ កាលពីឆ្នាំ២០២៤ ។

តាមធម្មតា ត្រីនឹងស៊ីកូនរបស់សត្វល្អិតទាំងនេះ និងជួយកាត់បន្ថយចំនួនសត្វល្អិតឱ្យធ្លាក់ចុះយ៉ាងច្រើន ។ រីឯមូលហេតុត្រីងាប់ គឺអាចមកពីបរិមាណអុកស៊ីសែនក្នុងបឹងធ្លាក់ចុះ ដោយសារប្រឡាយសម្រាប់តភ្ជាប់ទឹកបឹងជាមួយសមុទ្រ ពុំបានថែទាំត្រឹមត្រូវ ។ កន្លងមក ខាងនេសាទធ្លាប់បានអំពាវនាវឱ្យកែលម្អប្រព័ន្ធអេកូឡូស៊ីបឹង Orbetello Lagoon ជាបន្ទាន់ ។

គួរបញ្ជាក់ថា សត្វល្អិតទាំងនេះមានខ្លួនតូចបំផុត និងមានមាត់ដូចសត្វមូសសម្រាប់ខាំមនុស្ស ។ វាមានដងខ្លួនពណ៌ខ្មៅ ឬពណ៌ប្រផេះចាស់ ហើយតែងតែប្រមូលផ្តុំនៅឆ្នេរសមុទ្រ និងតំបន់ព្រៃ ។ បន្ទាប់ពីវាខាំរួច មនុស្សមួយចំនួននឹងកើតកន្ទួលក្រហមនៅលើស្បែក និងរមាស់ដូចមូសខាំ ៕

ប្រទេសកូរ៉េខាងត្បូង ៖ កងទ័ពអាមេរិក និងកូរ៉េខាងត្បូងបានធ្វើសមយុទ្ធរួមគ្នាឆ្លងទន្លេនៅទីក្រុងយ៉នស៊ន ខេត្តខាយ៉ងគី ប្រទេសកូរ៉េខាងត្បូង កាលពីថ្ងៃទី២០ ខែមីនា ឆ្នាំ២០២៥ ដែលទីតាំងធ្វើសមយុទ្ធនេះនៅជិតព្រំដែនកូរ៉េខាងជើង ឬនៅមិនឆ្ងាយពីតំបន់គ្មានកងទ័ពរវាងប្រទេសកូរ៉េទាំងពីរ ។ ហេតុ​នេះ ធ្វើឱ្យកូរ៉េខាងជើងមិនពេញចិត្តយ៉ាងខ្លាំង ហើយកូរ៉េខាងជើងបានថ្កោលទោ.ស និងស្នើឱ្យបញ្ឈប់ការធ្វើសមយុទ្ធជាបន្ទាន់ ពីព្រោះវាជាការញុះញ៉ង់ឈានទៅរកការឈ្លានពា.ន ។

ការធ្វើសមយុទ្ធឆ្លងទន្លេ គឺកងទ័ពអាមេរិក និងកូរ៉េខាងត្បូងបានយករថពាសដែកឆ្លងទន្លេអ៊ីនជីន ព្រមទាំងឧបករណ៍កងទ័ពជាង១០០ប្រភេទទៀត ។ ក្រៅពីនេះ ក៏មានយន្តហោះចម្បាំង និងឧទ្ធម្ភាគចក្រ ព្រមទាំងកងទ័ពជាង៦០០នាក់មកពីអាមេរិក និងកូរ៉េខាងត្បូងចូលរួមការធ្វើសមយុទ្ធ រយៈពេល៦ថ្ងៃ ។

វាជាផ្នែកមួយនៃការធ្វើសមយុទ្ធកងទ័ពប្រចាំឆ្នាំរវាងអាមេរិក និងកូរ៉េខាងត្បូង ឈ្មោះថា «សមយុទ្ធ Freedom Shield» ដែលបានចាប់ផ្តើមតាំងពីដើមខែមីនា ឆ្នាំ២០២៥ មកម៉្លេះ ។ ប៉ុន្តែការធ្វើសមយុទ្ធបានផ្អាកមួយរយៈ ដោយសារយន្តហោះចម្បាំងកូរ៉េខាងត្បូងទម្លាក់គ្រាប់បែកភ្លាត់ស្នៀតបណ្តាលឱ្យខូចខាតលំនៅឋានពលរដ្ឋ និងពលរដ្ឋរងរបួសចំនួន២៩នាក់ ។

ការធ្វើសមយុទ្ធរវាងអាមេរិក និងកូរ៉េខាងត្បូងធ្វើឱ្យមេដឹកនាំកូរ៉េខាងជើងមិនពេញចិត្តយ៉ាងខ្លាំង ហើយកូរ៉េខាងជើងបានថ្កោលទោស និងស្នើឱ្យបញ្ឈប់ការធ្វើសមយុទ្ធនេះជាបន្ទាន់ ។ កូរ៉េខាងជើងអះអាងថា វាជាការញុះញ៉ង់ឈានទៅរកការឈ្លានពាន ។

ចំណែកកូរ៉េខាងត្បូងបញ្ជាក់យ៉ាងច្បាស់លាស់ថា ការធ្វើសមយុទ្ធជាមួយអាមេរិក គឺក្នុងគោលបំណងពង្រឹងកម្លាំងកងទ័ពកូរ៉េខាងត្បូងឱ្យរឹងមាំ និងត្រៀមខ្លួនការពារការគំរាមកំហែងពីប្រទេសជិតខាង គឺកូរ៉េខាងជើង ៕

ប្រទេសអូស្ត្រាលី ៖ កាលពីថ្ងៃទី២១ ខែមីនា ឆ្នាំ២០២៥ សារព័ត៌មាន Mirror រាយការណ៍ថា អាជ្ញាធរមូលដ្ឋានរបស់អូស្ត្រាលីបានបិទឆ្នេរសមុទ្រជាច្រើនកន្លែងនៅរដ្ឋ South Australia ព្រមទាំងបិទឆ្នេរសមុទ្រ ចំនួន២កន្លែងទៀត នៅទីក្រុង Adelaide ក្រោយពីមានពពុះទឹកសមុទ្រពណ៌លឿងបោកបក់មកលើឆ្នេរ ។ ហេតុការណ៍នេះធ្វើឱ្យត្រីងា.ប់ ជាច្រើនក្បាល ខណៈអ្នកជិះស្គីធ្លាក់ខ្លួនឈឺជាបន្តបន្ទាប់ ។

អាជ្ញាធរអូស្ត្រាលីបានបិទឆ្នេរសមុទ្រជាច្រើនកន្លែង តាំងពីថ្ងៃទី១៧ ខែមីនា មកម៉្លេះ ដោយសារពពុះទឹកសមុទ្រពណ៌លឿង គ្របដណ្តប់ពេញឆ្នេរទាំងអស់ធ្វើឱ្យត្រីងាប់ជាច្រើនក្បាល ។ លោក អេនថូនី រ៉ូឡែន រស់នៅទីក្រុង Adelaide និយាយថា អ្នកជិះស្គីបានធ្លាក់ខ្លួនឈឺជាបន្តបន្ទាប់ ដូចជា ៖ ឈឺភ្នែក ឈឺក និងក្អក ក្រោយពេលពួកគេប៉ះទឹកសមុទ្រ អ្នកខ្លះទៀតពុំបានលេងទឹកសមុទ្រទេ ប៉ុន្តែក្អកខ្លាំង ។

អ្នកជំនាញផ្នែកសមុទ្របានយកពពុះទឹកសមុទ្រពណ៌លឿងនេះទៅត្រួតពិនិត្យ ប៉ុន្តែត្រូវរង់ចាំរយៈពេល១សប្តាហ៍ ទើបដឹងលទ្ធផល ។ អ្នកជំនាញសន្និដ្ឋានថា វាអាចបណ្តាលមកពីសារ៉ាយពុលមួយប្រភេទរលាយក្នុងទឹកដែលមានសីតុណ្ហភាពខ្ពស់ រួមផ្សំជាមួយខ្យល់ស្ងួត និងទឹកសមុទ្រស្រក ។

ហេតុការណ៍នេះគួរឱ្យបារម្ភណាស់ ពីព្រោះតាមធម្មតា ជារៀងរាល់ឆ្នាំ គឺមានសារ៉ាយពុលបែបនេះដែរ ប៉ុន្តែនៅឆ្នាំ២០២៥ សារ៉ាយពុលខ្លាំងជាងធម្មតា និងប៉ះពាល់ដល់ឆ្នេរសមុទ្រជាច្រើនកន្លែង ។ យើងពុំប្រាកដចិត្តថា តើវានឹងអូសបន្លាយពេលយូរប៉ុនណាទេ បើទឹករលកសមុទ្របោកបក់ខ្លាំង កាន់តែធ្វើឱ្យសារ៉ាយរាយប៉ាយ និងមានពពុះទឹកសមុទ្រពណ៌លឿង កាន់តែច្រើន ។ នេះបើតាមលោក សែម ហ្គេឡាត ប្រធានក្រុមអ្នកស្រាវជ្រាវផ្នែកសមុទ្រ នៃភ្នាក់ងារការពារបរិស្ថានរដ្ឋ South Australia ។

ត្រី និងសេះសមុទ្រដែលងាប់លើឆ្នេរខ្សាច់ គឺមានស្លាកស្នាមពណ៌ក្រហម ជាប់នៅលើខ្សាច់ ខណៈអ្នកជិះស្គីកើតអាការៈស្រដៀងគ្នា គឺ ៖ រមាស់ភ្នែក មើលពុំច្បាស់ ក្អក និងពិបាកដកដង្ហើម ។ បច្ចុប្បន្ន ភ្នាក់ងារស្រាវជ្រាវផ្នែកសមុទ្រ និងភ្នាក់ងារផ្សេងៗ ព្រមទាំងក្រសួងឧស្សាហកម្មនៅរដ្ឋ South Australia និងក្រសួងសុខាភិបាល បានយកពពុះទឹកសមុទ្រពណ៌លឿង ទៅត្រួតពិនិត្យ ។

ជំហ៊ានដំបូង អ្នកជំនាញសន្និដ្ឋានថា វាអាចបណ្តាលមកពីសារ៉ាយសមុទ្រតូចៗដែលកើតឡើងដោយសារសីតុណ្ហភាពទឹកខ្ពស់ និងទឹកស្ងប់ ស្របពេលរលកកំដៅគ្របដណ្តប់លើសមុទ្រ ដែលមានសីតុណ្ហភាពខ្ពស់ជាងធម្មតារហូតដល់២.៥អង្សាសេ ៕