ប្រទេសថៃ ៖ ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃ លោក Phumtham Wechayachai បាននិយាយទៅកាន់ប្រព័ន្ធផ្សព្វផ្សាយថា ស្ថានការណ៍នៅព្រំដែនកម្ពុជា-ថៃ នាពេលបច្ចុប្បន្ន មានភាពប្រក្រតី សូមពលរដ្ឋកុំបារម្ភ និងមានទំនុកចិត្តលើកងទ័ពថៃអាចការពារអធិបតេយ្យភាពប្រទេស ។ កុំស្តាប់អ្វីធ្វើឱ្យប្រទេសបាត់បង់ទំនុកចិត្ត ពេលខ្លះ គំនិតរបស់មនុស្សមួយចំនួននាំមកនូវបញ្ហា ។ នេះបើតាមការចុះផ្សាយរបស់សារព័ត៌មានថៃ Matichon កាលពីថ្ងៃទី២១ ខែមីនា ឆ្នាំ២០២៥ ។

កាលពីថ្ងៃទី២១ ខែមីនា កន្លងមក ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិថៃ លោក Phumtham Wechayachai បាននិយាយពីការពន្យារពេលកិច្ចប្រជុំគណៈកម្មាធិការព្រំដែនទូទៅ (General Border Committee : GBC) រវាងប្រទេសកម្ពុជា និងថៃ ថា រឿងនេះគ្មានអ្វីទេ ខាងកម្ពុជាបានស្នើពន្យារពេលកិច្ចប្រជុំ មកថ្ងៃទី២៣ ដល់ថ្ងៃទី២៥ ខែមីនា ឆ្នាំ២០២៥ ប៉ុន្តែដោយសារលោកជាប់រវល់ ទើបលោកស្នើពន្យារពេលកិច្ចប្រជុំ ហើយសង្ឃឹមថា កិច្ចប្រជុំនឹងធ្វើឡើងនៅដើមខែមេសា ។

ចំណែកស្ថានការណ៍ព្រំដែនរវាងកម្ពុជា និងថៃ នាពេលបច្ចុប្បន្ន លោក Phumtham និយាយថា លោកបានជជែកជាមួយមេបញ្ជាការកងទ័ព ហើយព្រំដែនគ្មានភាពតានតឹងទេ ។ រីឯការចល័តកងកម្លាំង អាចនិយាយថា វាធម្មតា ដូចជា ៖ កងទ័ពភូមិភាគទី២ របស់ប្រទេសថៃ ក៏មានការហ្វឹកហាត់នៅតំបន់ចាស់ដែលធ្លាប់ហ្វឹកហាត់ ។ បច្ចុប្បន្ន គ្មានការចល័តទ័ពពិសេសអ្វីទេ គឺចល័តដូចពីមុន ។ រីឯខាងកម្ពុជាបញ្ជាក់ថា គ្មានអ្វីគួរឱ្យបារម្ភ ប៉ុន្តែទោះយ៉ាងណា កងទ័ពធ្វើតាមភារកិច្ចតួនាទី មិនបាច់បារម្ភទេ ពីព្រោះកងទ័ពតាំងចិត្តយ៉ាងមោះមុតក្នុងការការពារប្រទេស ។ ហេតុនេះ ពេលមានអ្វីកើតឡើង សូមឱ្យសប្បាយចិត្តចុះថា កងទ័ពថៃអាចការពារអធិបតេយ្យភាពរបស់ប្រទេសបានភ្លាមៗ ។

ពេលសារព័ត៌មានសួរថា តើអាចផ្តល់ទំនុកចិត្តបានដែរឬអត់ ពីព្រោះមានពាក្យចចាមអារ៉ាមក្នុងតំបន់ថា រដ្ឋាភិបាលថៃមិនច្បាស់លាស់? លោករដ្ឋមន្ត្រីក្រសួងការពារជាតិថៃបញ្ជាក់ថា កុំស្តាប់អ្វីធ្វើឱ្យប្រទេសបាត់បង់ទំនុកចិត្ត ពេលខ្លះ គំនិតរបស់មនុស្សមួយចំនួននាំមកនូវបញ្ហា ។ សូមមើលការពិត កងទ័ពថៃគ្រប់រូបស្រឡាញ់ប្រទេស និងត្រៀមខ្លួនការពារជាតិ ។ ហេតុនេះ ពុំបាច់បារម្ភពីបញ្ហានយោបាយ មិនថាការកាត់បន្ថយកងកម្លាំង ប៉ុន្តែយ៉ាងហោចណាស់ វានៅតែរក្សាអធិបតេយ្យភាពប្រទេស ។

ដោយឡែក នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានថ្លែងកាលពីថ្ងៃទី២១ ខែមីនា ថា ស្ថានការណ៍តានតឹងនៅព្រំដែន គឺជាទំនួលខុសត្រូវរបស់កងទ័ពទាំង២ប្រទេស រីឯកិច្ចសហការបង្ក្រាបក្រុមឆបោកអនឡាញ គឺកម្ពុជាសហការ១០០% ។ បច្ចុប្បន្ន បញ្ហាក្រុមឆបោកអនឡាញបានធ្លាក់ចុះហើយ ប៉ុន្តែរដ្ឋាភិបាលថៃនឹងបង្ក្រាបក្រុមឆបោកអនឡាញឱ្យអស់ ។

លោកស្រីថ្លែងថា លោកស្រីមកកាន់ទីបញ្ជាការកងទ័ពជើងគោក គឺពុំមែនមកជជែករឿងព្រំដែនទេ ។ លោកស្រីជជែករឿងការបង្ក្រាបក្រុមឆបោកអនឡាញ និងថ្នាំញៀន រីឯបញ្ហាព្រំដែន កងទ័ពជាអ្នកទទួលខុសត្រូវ ។ លោកស្រីពុំទាន់បានជជែកបញ្ហាព្រំដែនជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាទេ គឺទុកតួនាទីនេះឱ្យកងទ័ពទាំង២ប្រទេស ។

លោកស្រីបានជជែកជាមួយនាយករដ្ឋមន្ត្រីកម្ពុជាពីបញ្ហាបង្ក្រាបក្រុមឆបោកអនឡាញ ហើយមេដឹកនាំទាំង២ប្រទេស នឹងសហការគ្នាបង្ក្រាបក្រុមឆបោកអនឡាញ ដោយរដ្ឋាភិបាលកម្ពុជាសហការ១០០% ។ បច្ចុប្បន្ន បានបង្ក្រាបក្រុមឆបោកអនឡាញច្រើនហើយ ប៉ុន្តែរដ្ឋាភិបាលថៃចង់បង្ក្រាបឱ្យអស់ ៕

ប្រទេសថៃ ៖ សារព័ត៌មានថៃរាយការណ៍ថា កាលពីថ្ងៃទី១៧ ខែមីនា ឆ្នាំ២០២៥ អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា បាននិយាយលើវេទិកានៅខេត្តពិស្នុលោក ហើយប្រសាសន៍របស់លោកដែលធ្វើឱ្យមហាជនចាប់អារម្មណ៍ខ្លាំងនោះ គឺលោកមានគម្រោងទិញបំណុលពលរដ្ឋទាំងអស់ពីប្រព័ន្ធធនាគារ ដើម្បីដោះស្រាយបញ្ហាការជំពាក់បំណុលធនាគាររបស់ពលរដ្ឋកើនឡើងខ្លាំង ។

លោក ថាក់ស៊ីន នឹងប្រកាសពីគោលនយោបាយសេដ្ឋកិច្ចថ្មី ហើយលោកបានពិភាក្សាជាមួយកូនស្រី គឺលោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ ថា តើគួរធ្វើដូចម្តេចដើម្បីឱ្យពលរដ្ឋថៃសងបំណុលធនាគារអស់? ពីព្រោះបច្ចុប្បន្ន ពលរដ្ឋជំពាក់បំណុលធនាគារច្រើនណាស់ ។ ដូច្នេះ លោក និងនាយករដ្ឋមន្ត្រីថៃគិតថា នឹងទិញបំណុលពលរដ្ឋទាំងអស់ពីប្រព័ន្ធធនាគារ តើល្អដែរឬទេ? បន្ទាប់មក ឱ្យពលរដ្ឋសងបំណុលធនាគារបន្តិចម្តងៗ ដោយពុំចាំបាច់បង់ប្រាក់គ្រប់ចំនួន ។

ពលរដ្ឋនឹងអាចចាប់ផ្តើមជីវិតថ្មី ដោយការដកចេញបំណុលទាំងអស់ ហើយពលរដ្ឋនឹងក្លាយជាមនុស្សបរិសុទ្ធប្រកបរបររកស៊ីជាថ្មី ។ ការទិញបំណុលនេះ ពុំចំណាយថវិការបស់រដ្ឋសូម្បីតែ១បាត ពីព្រោះលោកនឹងឱ្យក្រុមហ៊ុនឯកជនវិនិយោគ ។ បច្ចុប្បន្ន រដ្ឋមានបំណុលច្រើន យើងធ្វើអ្វីក៏ដោយ ក៏ជំពាក់បំណុលទាំងអស់ ប៉ុន្តែយើងត្រូវជំពាក់បំណុលឱ្យតិចបំផុត និងផ្តល់ឱកាសឱ្យពលរដ្ឋច្រើនបំផុត ។ យើងងាយស្រួលនិយាយ ពិបាកធ្វើ ប៉ុន្តែត្រូវតែធ្វើ ។ នេះបើតាមការលើកឡើងរបស់លោក ថាក់ស៊ីន ។

បើតាមលោកស្រី ផេថងថាន នាយករដ្ឋមន្ត្រីថៃ គឺនៅឆ្នាំ២០២៥ ត្រូវតែផ្តល់ឱកាសឱ្យពលរដ្ឋ និងដោះស្រាយបញ្ហាកើតមានយូរមកហើយ ទើបលោក ថាក់ស៊ីន ណែនាំទៅនាយករដ្ឋមន្ត្រីពីបញ្ហាជាច្រើន ។ រីឯការផ្តល់ប្រាក់ឱ្យពលរដ្ឋតាមគម្រោង Digital Wallet មានបញ្ហា ដោយសារធនាគារ Bank of Thailand ផ្អាកដំណើរការ ប៉ុន្តែរដ្ឋាភិបាលបានព្យាយាមដោះស្រាយបញ្ហា ។ ទៅថ្ងៃមុខ បច្ចេកវិទ្យា Digital Wallet នឹងចងចាំដូចគម្រោងចំណាយប្រាក់ចំនួន៣០បាត អាចព្យាបាលជំងឺគ្រប់មុខ ។ ពលរដ្ឋនឹងដឹងថា នេះជាបំណងល្អរបស់គណបក្សភឿថៃ ។

គួរបញ្ជាក់ថា លោក ថាក់ស៊ីន បាននិយាយពីគម្រោងទិញបំណុលពលរដ្ឋទាំងអស់ពីប្រព័ន្ធធនាគារ គឺលោកនិយាយនៅសាកលវិទ្យាល័យពិស្នុលោក ស្ថិតក្នុងឃុំសាម៉ឃែ ស្រុកមឿង ខេត្តពិស្នុលោក ទៅកាន់ក្រុមពលរដ្ឋអាវក្រហមជាង១,៥០០នាក់ មកពីខេត្តពិស្នុលោក, ពិជិត, អ៊ុតាឌីត, កំផែងពេជ្រ, តាក, ឧទ័យថានី, ណាខនសុវណ្ណ និងសុខោទ័យ ។ ពួកគេធ្វើដំណើរមកជួបជុំគ្នានៅសាកលវិទ្យាល័យពិស្នុលោក ដើម្បីទទួលស្វាគមន៍លោក ថាក់ស៊ីន យ៉ាងកក់ក្តៅ ។

យោងតាមទិន្នន័យរបស់ TTB Analytics ដែលបានវិភាគទិន្នន័យគណនីបំណុលមិនអាចកំណត់អត្តសញ្ញាណ (Anonymous Account) គឺមានរហូតដល់ជាង៨៤លានគណនីនៅក្នុងប្រព័ន្ធធនាគារ ស្មើនឹងទឹកប្រាក់រាប់លានដុល្លារអាមេរិក ៕

ប្រទេសអង់គ្លេស ៖ កាលពីថ្ងៃទី២១ ខែមីនា ឆ្នាំ២០២៥ សារព័ត៌មានបរទេសរាយការណ៍ថា Heathrow គឺជាអាកាសយានដ្ឋានមានទំហំធំបំផុត លំដាប់ទី៤ លើពិភពលោក ស្ថិតនៅទីក្រុងឡុងដ៍ ប្រទេសអង់គ្លេស បានបិទដណើរការជាបណ្តោះអាសន្នដោយសារដាច់ចរន្តអគ្គិសនី ក្រោយពីភ្លើងឆេះស្ថានីយបញ្ជូនចរន្តអគ្គិសនីមកអាកាសយានដ្ឋាន Heathrow ដែលស្ថិតនៅក្បែរគ្នា ។ វាធ្វើឱ្យយន្តហោះរាប់រយគ្រឿងកកស្ទះលើមេឃ គ្មានកន្លែងចុះចត ព្រមទាំងប៉ះពាល់ដល់ជើងហោះហើរជិត១,៤០០ជើង និងអ្នកដំណើរជិត៣សែននាក់ ។

អាកាសយានដ្ឋាន Heathrow ពុំបានបញ្ជាក់ថា នឹងតភ្ជាប់ចរន្តអគ្គិសនីឡើងវិញ ដើម្បីដំណើរការការងារហោះហើរក្នុងអាកាសយានដ្ឋាននៅពេលណាទេ ដែលធ្វើឱ្យក្រុមហ៊ុនអាកាសចរណ៍ជាច្រើនផ្លាស់ប្តូរគម្រោងហោះហើរបណ្តោះអាសន្ន និងត្រូវចុះចតយន្តហោះនៅអាកាសយានដ្ឋានក្បែរៗ ។ មូលហេតុធ្វើឱ្យដាច់ចរន្តអគ្គិសនីក្នុងអាកាសយានដ្ឋាន Heathrow គឺបណ្តាលមកពីភ្លើងឆេះនៅស្ថានីយបញ្ជូនចរន្តអគ្គិសនីមកអាកាសយានដ្ឋាន ដែលស្ថិតនៅក្បែរគ្នា ។

ភ្លើងបានឆាបឆេះស្ថានីយបញ្ជូនចរន្តអគ្គិសនីមកអាកាសយានដ្ឋាន Heathrow នៅទីក្រុងឡុងដ៍ តាំងពីថ្ងៃទី២០ ខែមីនា កន្លងមក ដែលស្ថានីយនេះនៅក្បែរអាកាសយានដ្ឋាន ។ វាធ្វើឱ្យអាកាសយានដ្ឋាន Heathrow និងលំនៅឋានពលរដ្ឋនៅក្បែរនោះរាប់ពាន់ខ្នងដាច់ចរន្តអគ្គិសនី ។ ដូច្នេះ ដើម្បីផ្តល់សុវត្ថិភាពដល់អ្នកដំណើរគ្រប់រូប អាកាសយានដ្ឋានបានបិទដំណើរការបណ្តោះអាសន្ន នៅថ្ងៃទី២១ ខែមីនា និងសូមអ្នកដំណើរផ្អាកធ្វើដំណើរមកអាកាសយានដ្ឋាន ដោយទំនាក់ទំនងទៅកាន់ក្រុមហ៊ុនអាកាសចរណ៍នានាដើម្បីសាកសួរព័ត៌មានធ្វើដំណើរ ។

យោងតាមគេហទំព័រតាមដានការហោះហើរលើពិភពលោក ឱ្យដឹងថា ការដាច់ចរន្តអគ្គិសនីនៅអាកាសយានដ្ឋាន Heathrow បណ្តាលឱ្យប៉ះពាល់ដល់ជើងហោះហើរចំនួន១,៣៥១ជើង និងប៉ះពាល់ដល់អ្នកដំណើរចំនួន២សែន៩ម៉ឺននាក់ ។ ក្រៅពីនេះ មានជើងហោះហើរជាច្រើនទៀតបានផ្អាកការហោះហើរ ហើយមានយន្តហោះយ៉ាងហោច ១០០គ្រឿង បានប្តូរគោលដៅចុះចតនៅអាកាសយានដ្ឋានផ្សេង ។

អ្នកនាំពាក្យអាកាសយានដ្ឋាន Heathrow ពុំដឹងថា តើអាកាសយានដ្ឋាននឹងមានអគ្គិសនីប្រើប្រាស់វិញនៅពេលណាទេ ហើយសន្និដ្ឋានថា អាកាសយានដ្ឋាននឹងដាច់ចរន្តអគ្គិសនីជាច្រើនថ្ងៃទៀត ។ អាកាសយានដ្ឋាន Heathrow កំពុងរកមូលហេតុបណ្តាលឱ្យភ្លើងឆេះនៅស្ថានីយបញ្ជូនចរន្តអគ្គិសនីមកកាន់អាកាសយានដ្ឋាន ។ ភ្នាក់ងារសង្គ្រោះបានជម្លៀសពលរដ្ឋប្រមាណ១៥០នាក់ ដែលរស់នៅក្បែរអាកាសយានដ្ឋានទៅកាន់កន្លែងមានសុវត្ថិភាព ។

Heathrow គឺជាអាកាសយានដ្ឋានមានទំហំធំបំផុត ស្ថិតក្នុងលំដាប់ទី៤ លើពិភពលោក និងជាមជ្ឈមណ្ឌលការធ្វើដំណើរលំដាប់ទី១ ដែលបានតភ្ជាប់ការហោះហើរច្រើនបំផុតលើពិភពលោក ។ ជារៀងរាល់ថ្ងៃ អាកាសយានដ្ឋាននេះបានទទួលឱ្យយន្តហោះចុះចតប្រមាណ១,៣០០ជើង ព្រមទាំងអ្នកដំណើរជាច្រើននាក់បានប្រើប្រាស់អាកាសយានដ្ឋាននេះដើម្បីធ្វើដំណើរទៅគោលដៅផ្សេងៗ ៕

ប្រទេសវៀតណាម ៖ ភាពជាម្ចាស់កម្មសិទ្ធិលើសមុទ្រចិនខាងត្បូង កំពុងតែក្លាយជាបញ្ហារសើប និងចម្រូងចម្រាសរវាងចិនជាមួយប្រទេសជិតខាងជាច្រើន ជាពិសេស វៀតណាម ។ ប្រទេសជាច្រើនចោទប្រកា.ន់ចិនថា ចិនព្យាយាមពង្រីកការគ្រប់គ្រងដែនទឹកលើសមុទ្រចិនខាងត្បូង ដោយប្រើប្រាស់ខ្សែបន្ទាត់ដែនទឹក ចំនួន៩ ហើយការប្រើប្រាស់ខ្សែបន្ទាត់ដែនទឹកនេះ ធ្វើឱ្យវៀតណាមមិនពេញចិត្តយ៉ាងខ្លាំង ។ ពលរដ្ឋវៀតណាមនាំគ្នាធ្វើពហិការឈប់គាំទ្រ ឬទិញផលិតផលក្រុមហ៊ុនចិនណាដែលគាំទ្ររដ្ឋាភិបាលចិនគ្រប់គ្រងលើសមុទ្រចិនខាងត្បូង ។

កាលពីឆ្នាំ២០១៨ វៀតណាមបានកាត់ឈុតឆាករបស់ភាពយន្តរឿង «Crazy Rich Asians» ដោយសារឈុតនេះបង្ហាញពីផែនទីប្រជុំកោះនៅសមុទ្រចិនខាងត្បូង ស្ថិតក្រោមការគ្រប់គ្រងរបស់ចិន ។ បន្ទាប់មក នៅឆ្នាំ២០២៣ ភាពយន្តហូលីវូដរឿង Barbie ត្រូវបានហាមចាក់បញ្ចាំងក្នុងរោងភាពយន្តវៀតណាម ដោយសារភាពយន្តនេះមានឈុតឆាកបញ្ជាក់ថា ចិនគ្រប់គ្រងលើសមុទ្រចិនខាងត្បូង ។

ចំណែកនៅឆ្នាំ២០២៥ យុវជនវៀតណាមបានធ្វើពហិការឈប់ទិញតុក្កតា Baby Three របស់ចិន ដើម្បីបញ្ជាក់ពីគោលជំហរស្នេហាជាតិ ដោយសារនៅលើមុខតុក្កតាមានសញ្ញាស្រដៀងនឹងខ្សែបន្ទាត់ព្រំដែនទឹក ចំនួន៩ នៅសមុទ្រចិនខាងត្បូង បើទោះជាតុក្កតានេះធ្លាប់ពេញនិយមខ្លាំងនៅវៀតណាមក្តី ។

នៅឆ្នាំ២០២៥ដដែល សមុទ្រចិនខាងត្បូង នៅតែជាបញ្ហារសើបនៅវៀតណាម គឺពលរដ្ឋវៀតណាមបានរិះគន់ក្រុមហ៊ុនតែទឹកដោះគោចិន ម៉ាក Chagee ថា ក្រុមហ៊ុននេះគាំទ្ររដ្ឋាភិបាលចិនគ្រប់គ្រងលើសមុទ្រចិនខាងត្បូង ខណៈក្រុមហ៊ុននេះមានគម្រោងបើកសាខាធំនៅកណ្តាលទីក្រុងហូជីមិញ ។

សារព័ត៌មានវៀតណាមរាយការណ៍ថា Logo និងស្លាកសញ្ជាទាំងអស់របស់តែទឹកដោះគោចិន ម៉ាក Chagee ត្រូវបានទម្លាក់ចុះទាំងអស់ កាលពីថ្ងៃទី១៧ ខែមីនា កន្លងមក ដោយសារ Logo និងស្លាកសញ្ជានេះអះអាងថា ចិនជាម្ចាស់កម្មសិទ្ធិលើសមុទ្រចិនខាងត្បូង ។ កាលពីថ្ងៃទី២១ ខែមីនា ឆ្នាំ២០២៥ សមត្ថកិច្ចនៅទីក្រុងហូជីមិញ បានស៊ើបអង្កេតករណីនេះ ក្រោយពីពលរដ្ឋវៀតណាមប្រតិកម្មខ្លាំង ។

មន្ត្រីការិយាល័យវប្បធម៌ និងកីឡាទីក្រុងហូជីមិញ និងសមត្ថកិច្ចនៅទីក្រុងហូជីមិញ បានសហការជាមួយក្រុមហ៊ុន Chagee Vietnam ដើម្បីបំភ្លឺបញ្ហានេះក្នុងសេចក្តីថ្លែងការណ៍ជាផ្លូវការ ។ មន្ត្រីការិយាល័យវប្បធម៌វៀតណាមបានស្នើទៅបុគ្គល និងក្រុមហ៊ុនផ្សេងៗ សូមប្រើប្រាស់ផែនទីផ្លូវការនៅសមុទ្រចិនខាងត្បូង និងហាមសរសេរព័ត៌មានមិនពិត ពីព្រោះវានឹងប៉ះពាល់ដល់អធិបតេយ្យភាពវៀតណាម ។

គួរបញ្ជាក់ថា សមុទ្រចិនខាងត្បូង គឺជាប្រភពប្រេងឥន្ធនៈ និងឧស្ម័នធម្មជាតិ ព្រមទាំងជាផ្លូវទឹកសម្រាប់ដឹកជញ្ជូនយ៉ាងសំខាន់ ។ ប្រទេសជិតខាងចិនជាច្រើនបារម្ភថា រដ្ឋាភិបាលក្រុងប៉េកាំងព្យាយាមពង្រីកដែនទឹករបស់ខ្លួន ។ ចិនបានប្រើប្រាស់ខ្សែបន្ទាត់ចំនួន៩ ដើម្បីអះអាងភាពជាម្ចាស់កម្មសិទ្ធិលើសមុទ្រចិនខាងត្បូងដែលសម្បូរដោយធនធាន ធម្មជាតិ និងធ្វើឱ្យវៀតណាមពុំសប្បាយចិត្ត ខណៈវៀតណាមអះអាងថា ខ្លួនក៏ជាម្ចាស់កម្មសិទ្ធិមួយផ្នែកលើសមុទ្រចិនខាងត្បូង ៕