ប្រទេសឥណ្ឌូណេស៊ី ៖ តុលាការឥណ្ឌូណេស៊ីបានដាក់ទោ.ស យុវជន២រូបដែលស្រឡាញ់ភេ.ទ ដូចគ្នា ដោយការវាយនឹងរំពាត់ចំនួន៨៥រំពាត់ នៅចំពោះមុខមនុស្សម្នាជាច្រើន ដោយសារពួកគេប្រព្រឹត្តទង្វើផ្ទុយនឹងការប្រៀនប្រដៅក្នុងសាសនាអ៊ីស្លាម ។ ការដាក់ទោសជាសាធារណៈនេះ ក្រោយពីអាជ្ញាធររកឃើញថា យុវជនទាំង២រូបមានទំនាក់ទំនងស៊ីជម្រៅជាមួយគ្នា ។

សារព័ត៌មាន AP រាយការណ៍ថា កាលពីថ្ងៃទី២៧ ខែកុម្ភៈ ឆ្នាំ២០២៥ យុវជនឥណ្ឌូណេស៊ីចំនួន២រូប ដែលម្នាក់អាយុ១៨ឆ្នាំ និងម្នាក់ទៀតអាយុ២៤ឆ្នាំ ត្រូវបានតុលាការនៅទីក្រុងបាន់ដាអាចិ កាត់ទោសឱ្យមានកំហុសធ្ងន់ធ្ងរ ដោយសារពួកគេមានទំនាក់ទំនងស៊ីជម្រៅជាមួយគ្នា ។ ហេតុនេះ ពួកគេនឹងទទួលទោសដោយការវាយនឹងរំពាត់ ចាប់ពី៨០រំពាត់ ទៅ៨៥រំពាត់ នៅចំពោះមុខមនុស្សម្នាជាច្រើន ។

ពេលអាជ្ញាធរយករំពាត់វាយយុវជនទាំង២រូបបាន២០រំពាត់ ពួកគេក៏បានឱ្យយុវជនទាំង២រូប សម្រាកផឹកទឹក ហើយក៏វាយបន្តទៀត ។ ប៉ុន្តែពេលអាជ្ញាធរវាយបាន៨៥រំពាត់ យុវវជនម្នាក់បានងងឹតមុខដួល រហូតដល់អាជ្ញាធរជួយគ្នានាំយុវជនរូបនេះចេញពីកន្លែងដាក់ទោស ដោយសារឃើញរាងកាយទ្រុឌទ្រោមខ្លាំងពេក ក្រោយពីអាជ្ញាធរវាយអស់ជាច្រើនរំពាត់ ។

ក្រោយពីបញ្ចប់ការដាក់ទោស យុវជនទាំង២រូប ក៏ត្រូវបានបញ្ជូនទៅព្យាបាលដំបៅនៅលើខ្នង ។ នេះជាលើកទី៤ហើយ ដែលទីក្រុងបាន់ដាអាចិ របស់ឥណ្ឌូណេស៊ី អនុវត្តច្បាប់ដាក់ទោសអ្នកស្រឡាញ់ភេទដូចគ្នា ដោយសារផ្ទុយនឹងការប្រៀនប្រដៅក្នុងសាសនាអ៊ីស្លាម ។ កន្លងមក ទីក្រុងនេះធ្លាប់ដាក់ទោសពលរដ្ឋស្រឡាញ់ភេទដូចគ្នា ដោយឱ្យមហាជនគប់ដុំថ្មដាក់ រហូតដល់បាត់បង់ជីវិត ៕

ការផ្លាស់ទីលំនៅទៅប្រទេសថ្មី គឺជាការសម្រេចចិត្តដ៏សំខាន់ដែលមនុស្សជាច្រើនពិចារណានៅដំណាក់កាលផ្សេងៗនៃជីវិតរបស់ពួកគេ។ ហេតុផលសម្រាប់ការផ្លាស់ទីលំនៅអាចមានភាពខុសប្លែកគ្នាសម្រាប់មនុស្សម្នាក់ៗ ចាប់ពីការស្វែងរកឱកាសការងារឲ្យប្រសើរជាងមុន និងការបន្តការសិក្សា រហូតដល់ការស្វែងរកកន្លែងរស់នៅប្រកបដោយផាសុខភាព និងបទពិសោធន៍វប្បធម៌ថ្មីៗ។ គិតត្រឹមឆ្នាំ ២០២៥នេះ មានប្រទេសមួយចំនួនដែលលេចធ្លោ ដែលជាទិសដៅពេញនិយមសម្រាប់ការផ្លាស់ទីលំនៅ រួមមាន

1. ប្រទេសកាណាដា (Canada) នាំមុខគេជាប្រទេសដែលត្រូវបានគេស្វែងរកច្រើនបំផុតសម្រាប់ការចង់ផ្លាស់ប្ដូរទីលំនៅ។ ជាមួយនឹងសម្រស់ធម្មជាតិដ៏ធំទូលាយ ការថែទាំសុខភាពដោយឥតគិតថ្លៃ និងឱកាសការងារច្រើន។ ប្រទេសកាណាដាគឺជាជម្រើសដ៏ល្អសម្រាប់អ្នកដែលកំពុងស្វែងរកបរិយាកាសស្ថិរភាព និងភាពងាយចុះសម្រុង។
2. ប្រទេសអូស្ត្រាលី(Australia) ប្រទេសនេះត្រូវបានគេស្គាល់ដោយសារសកម្មភាពខាងក្រៅយ៉ាងសម្បូរបែប ប្រព័ន្ធអប់រំដ៏ល្អឥតខ្ចោះ និងផ្លូវជាច្រើនសម្រាប់ប្រជាពលរដ្ធ ដែលធ្វើឱ្យវាកាន់តែងាយស្រួលដល់ជនអន្តោប្រវេសន៍ក្នុងការមកតាំងទីលំនៅ។
3. ប្រទេសនូវែលសេឡង់(New Zealand) ដោយទេសភាពដ៏អស្ចារ្យ នូវែលសេឡង់ផ្តល់នូវរបៀបរស់នៅប្រកបដោយសន្តិភាព។ ការថែទាំសុខភាព ការអប់រំ និងការសង្កត់ធ្ងន់ខ្លាំងលើតុល្យភាពការងារ និងជីវិតដ៏ល្អឥតខ្ចោះរបស់ប្រទេសនេះ ធ្វើឱ្យវាក្លាយជាគោលដៅ សម្រាប់អ្នកដែលចង់បានការរស់នៅប្រកបដោយផាសុខភាព។
4. ប្រទេសអេស្បាញ(Spain) អាកាសធាតុដែលគួរឲ្យចង់រស់នៅ ការរស់នៅបែបស្ងប់ស្ងាត់ និងតម្លៃរស់នៅសមរម្យ ធ្វើឱ្យវាក្លាយជាមេដែកសម្រាប់ទាក់ទាញទេសចរណ៍បរទេស។ អាហារដ៏ឈ្ងុយឆ្ងាញ់របស់អេស្ប៉ាញ ពិធីបុណ្យវប្បធម៌ និងជម្រើសទិដ្ឋាការផ្សេងៗ បានក្លាយជាការពេញនិយមបំផុតក្នុងចំណោមអ្នកដែលចង់ផ្លាស់ប្តូរទីលំនៅ។
5. ចក្រភពអង់គ្លេស(UK) ជាមួយនឹងការលាយឡំនៃទីក្រុងទំនើប និងភាពទាក់ទាញប្រវត្តិសាស្ត្រ នៅតែជាជម្រើសកំពូលសម្រាប់មនុស្សជាច្រើន។ ឱកាសការងារជាច្រើន ប្រព័ន្ធអប់រំល្បីឈ្មោះ វប្បធម៌ដ៏រស់រវើក និងភាពងាយស្រួលនៃការចុះសម្រុងគ្នារវាង សហគមន៍ចំណាកស្រុកចម្រុះ ធ្វើឱ្យវាមានការផ្លាស់ប្តូរប្រកបដោយសន្តិភាពសម្រាប់អ្នកចំណូលថ្មី។
6. ប្រទេសព័រទុយហ្គាល់(Portugal) អាកាសធាតុមេឌីទែរ៉ាណេរបស់ប្រទេសព័រទុយហ្គាល់ ធ្វើឲ្យប្រទេសនេះមានថ្ងៃរះល្អ 300 ថ្ងៃក្នុងមួយឆ្នាំ។ ព័រទុយហ្កាល់ត្រូវបានគេស្គាល់ថាមានអត្រាឧក្រិដ្ឋកម្មទាប និងស្វាគមន៍យ៉ាងកក់ក្ដៅរបស់អ្នកស្រុក។
7. ប្រទេសជប៉ុន(Japan) មានប្រជាប្រិយភាពក្នុងចំណោមអ្នកដែលមានចំណាប់អារម្មណ៍លើបច្ចេកវិទ្យា និងការបង្រៀនភាសាអង់គ្លេស។ វាអាចមានតម្លៃនៃការរស់នៅខ្ពស់ ប៉ុន្តែវាក៏មានភាពងាយស្រួលដូចជា ការថែទាំសុខភាព ការអប់រំ និងសុវត្ថិភាពកម្រិតកំពូល។
8. ប្រទេសអាល្លឺម៉ង់(Germany) ផ្តល់នូវសេដ្ឋកិច្ចដ៏រឹងមាំ អត្រាឧក្រិដ្ឋកម្មទាប និងប្រព័ន្ធសុខុមាលភាពសង្គមដែលបានបង្កើតឡើងយ៉ាងល្អ។ ប្រាក់ខែខ្ពស់ និងការរស់នៅសមរម្យ ធ្វើឱ្យវាក្លាយជាជម្រើសដ៏ទាក់ទាញសម្រាប់ជនបរទេស។
9. ប្រទេសបារាំង(France) ទាក់ទាញមនុស្សដោយបេតិកភណ្ឌវប្បធម៌ដ៏សម្បូរបែប ហេដ្ឋារចនាសម្ព័ន្ធគួរឱ្យចាប់អារម្មណ៍ និងរបៀបរស់នៅដែលសង្កត់ធ្ងន់លើភាពរីករាយនឹងអ្វីដែលល្អនៅក្នុងជីវិត។ ថ្វីត្បិតតែប្រាក់ខែប្រហែលជាមិនខ្ពស់បំផុតក៏ដោយ ប៉ុន្តែគុណភាពជីវិតទាំងមូលធ្វើឱ្យប្រទេសបារាំងទាក់ទាញមនុស្សជាច្រើន។
10. ប្រទេសស្វីស(Switzerland) លេចធ្លោដោយសារគុណភាពនៃជីវិតរស់នៅខ្ពស់ និងទេសភាពធម្មជាតិដ៏អស្ចារ្យ។ ប្រទេសនេះមានភាពល្បីល្បាញដោយសារបរិស្ថានស្អាត សេវាថែទាំសុខភាពល្អ និងតុល្យភាពការងារ។ ទោះបីជាការចំណាយខ្ពស់ក៏ដោយ ប៉ុន្តែប្រទេសនេះក៏មានប្រាក់ខែខ្ពស់ផងដែរ ហើយភាពរឹងមាំនៃសុវត្ថិភាពផ្ទាល់ខ្លួន និងធម្មជាតិដ៏ស្រស់បំព្រងធ្វើឱ្យវាក្លាយជាជម្រើសដ៏ល្អបំផុតមួយ៕

ថៃជាប្រទេសដែលមានការរីកចម្រើនស្ទើរគ្រប់វិស័យ ហើយវិស័យដែលពិភពលោកទទួលស្គាល់ និងចាត់ជាគោលដៅទេសចរណ៍នោះ គឺសេវាកម្មពិសេស ដែលពិសេសលើសគេនៅក្នុងតំបន់បណ្តាប្រទេសជិតខាងយើង ។ យោងតាមការសិក្សាស្រាវជ្រាវវាយតម្លៃលើប្រធានបទ តើប្រទេសដែលមានអត្រាផិ.តក្ប.ត់ ច្រើនជាងគេលើពិភពលោកបានទៅលើប្រទេសណា? មនុស្សភាគច្រើននឹងគិតថា ជប៉ុន បារាំង និងអ៊ីតាលី សម្បូរការផិ.តក្ប.ត់ ច្រើនជាងគេ ។

ប៉ុន្តែតាមការស្ទង់មតិរបស់គេហទំព័រអាមេរិក Insider Monkey បង្ហាញថា ប្រទេសដែលសម្បូរពលរដ្ឋផិ.តក្ប.ត់ច្រើនបំផុតលើពិភពលោក មិនមែនប្រទេសដែលមនុស្សភាគច្រើនគិតទេ គឺជាប្រទេសថៃ ដែលស្ថិតនៅតំបន់អាស៊ីយើងទៅវិញ ។

គេហទំព័រអាមេរិក Insider Monkey បានចុះផ្សាយពីការស្ទង់មតិរបស់ Pew Research បង្ហាញថា ប្រទេសដែលមានពលរដ្ឋក្បត់ចិត្តប្តីប្រពន្ធច្រើនបំផុតលើពិភពលោក គឺថៃ ជាប់ចំណាត់ថ្នាក់ទី១ ដែលមានអត្រាការក្បត់ចិត្ត រហូតដល់៥១% ។ មូលហេតុដែលពលរដ្ឋថៃក្បត់ចិត្តច្រើនបំផុត គឺបណ្តាលមកពីបុរសថៃជាច្រើនចូលចិត្តមានប្រពន្ធចុង និងសេវាកម្មផ្លូវភេ.ទ ទើបពួកគេមានឱកាសក្បត់ចិត្តប្រពន្ធ ។

ការស្ទង់មតិនេះបញ្ជាក់ទៀតថា ការក្បត់ចិត្តប្តីប្រពន្ធ មិនមែនកើតឡើងតែនៅប្រទេសដែលមានការអភិវឌ្ឍសេដ្ឋកិច្ចទាបប៉ុណ្ណោះទេ ប៉ុន្តែវាបានកើតឡើងនៅប្រទេសរីកចម្រើនផងដែរ គឺដាណឺម៉ាក បានជាប់ចំណាត់ថ្នាក់ទី២ លើពិភពលោក ដែលមានអត្រាក្បត់ចិត្តស្មើ៤៦% ។ រីឯអ៊ីតាលី អាល្លឺម៉ង់ បារាំង និងប្រទេសនៅអឺរ៉ុបខាងលិច ក៏មានអត្រាក្បត់ចិត្តច្រើនដែរ ។

ខាងក្រោមនេះ គឺជាចំណាត់ថ្នាក់ប្រទេសមានអត្រាក្បត់ចិត្តច្រើនបំផុត ៖
១-ថៃ ៥១%
២-ដាណឺម៉ាក ៤៦%
៣-អាល្លឺម៉ង់ ៤៥%
៤-អ៊ីតាលី ៤៥%
៥-បារាំង ៤៣%
៦-ន័រវេស ៤១%
៧-បែលហ្ស៊ិក ៤០%
៨-អេស្ប៉ាញ ៣៩%
៩-ហ្វាំងឡង់ ៣៦%
១០-អង់គ្លេស ៣៦%
១១-កាណាដា ៣៦%
១២-ក្រិក ៣៦%
១៣-លុចសំបួរ ៣៦%
១៤-អូទ្រីស ៣៥%
១៥-ប្រេស៊ីល ៣៥% ។

ចំណែកសហរដ្ឋអាមេរិក ជាប់ចំណាត់ថ្នាក់ទី២០ ដែលមានអត្រាក្បត់ចិត្ត ស្មើនឹង៣៥% ។ លទ្ធផលការស្ទង់មតិបង្ហាញថា ពលរដ្ឋអាមេរិកដែលរៀបការរួចប្រមាណ៣៥% តែងតែក្បត់ចិត្តប្តីប្រពន្ធ ដែលនេះបង្ហាញថា សូម្បីតែប្រទេសមានសេដ្ឋកិច្ចរីកចម្រើន ក៏មានបញ្ហាក្បត់ចិត្តដែរ ។

ក្រៅពីកត្តាប្រពៃណី និងវប្បធម៌ ដែលជំរុញឱ្យប្តីប្រពន្ធ ឬគូស្នេហ៍ក្បត់ចិត្តគ្នា គឺអត្រាក្បត់ចិត្តភាគច្រើនបណ្តាលមកពីបញ្ហាផ្លូវចិត្ត សេដ្ឋកិច្ច និងកត្តាផ្សេងៗ ។ ក្រៅពីនេះ គឺដោយសារបញ្ហាអារម្មណ៍ ដូចជា ៖ ការខឹងសម្បារដៃគូ ខ្វះការស្រឡាញ់ ឬយកចិត្តទុកដាក់ និងចង់បានដៃគូថ្មី សុទ្ធតែជាមូលហេតុជំរុញឱ្យមនុស្សពុំស្មោះត្រង់ ៕

ប្រទេសកូរ៉េខាងជើង ៖ កាលពីថ្ងៃទី៦ ខែមីនា ឆ្នាំ២០២៥ សារព័ត៌មានបរទេសរាយការណ៍ថា កូរ៉េខាងជើងបានបិទប្រទេសឈប់ទទួលភ្ញៀវទេសចរបរទេស ក្រោយពីកូរ៉េខាងជើងទើបអនុញ្ញាតឱ្យភ្ញៀវទេសចរអឺរ៉ុបមកកម្សាន្តប្រទេសរបស់ខ្លួនរយៈពេលខ្លី កាលពីថ្ងៃទី២០ ខែកុម្ភៈ ដើម្បីទទួលបានចំណូលជួយជំរុញសេដ្ឋកិច្ចជាតិ ។

ក្រុមហ៊ុនទេសចរណ៍នានាបានផ្អាកកម្មវិធីដំណើរកម្សាន្តទៅកូរ៉េខាងជើង ហើយក្រុមហ៊ុននឹងនាំភ្ញៀវទេសចរទៅលេងកូរ៉េខាងជើងឡើងវិញ លុះត្រាតែមានសេចក្តីប្រកាសពីមេដឹកនាំកូរ៉េខាងជើង ។

កូរ៉េខាងជើងបានបិទប្រទេសកាលពីពេលជំងឺកូវីដ-១៩ ឆ្លងរាតត្បាតនៅឆ្នាំ២០២០ ក្រោយមក ក៏អនុញ្ញាតឱ្យភ្ញៀវទេសចររុស្ស៊ីមកកម្សាន្តក្នុងប្រទេសខ្លួននៅឆ្នាំ២០២៤ ។ នៅខែមករា ឆ្នាំ២០២៥ កូរ៉េខាងជើងបានអនុញ្ញាតឱ្យភ្ញៀវទេសចរអឺរ៉ុបមកកម្សាន្តនៅទីក្រុងរ៉ាសន គឺជាតំបន់សេដ្ឋកិច្ចពិសេសភាគខាងកើតរបស់កូរ៉េខាងជើង ។ ប៉ុន្តែការបិទប្រទេសភ្លាមៗនេះ គឺរដ្ឋាភិបាលទីក្រុងព្យុងយ៉ាងពុំបានបញ្ជាក់ពីមូលហេតុទេ ។

ក្រុមហ៊ុនទេសចរណ៍ជាច្រើនឱ្យដឹងថា ទីក្រុងរ៉ាសន បានបិទលែងទទួលស្វាគមន៍ភ្ញៀវទេសចរបរទេស ហើយទីក្រុងនេះនឹងអនុញ្ញាតឱ្យភ្ញៀវទេសចរមកកម្សាន្តឡើងវិញ លុះត្រាតែមានសេចក្តីប្រកាសពីមេដឹកនាំកូរ៉េខាងជើង លោក គីម ជុងអ៊ុន ខណៈមន្ត្រីជាន់ខ្ពស់កូរ៉េខាងជើងពុំទាន់លើកឡើងពីករណីហាមភ្ញៀវទេសចរមកកម្សាន្តទេ ។

ក្រុមហ៊ុនទេសចរណ៍ KTG នៅចិន ដែលបង្កើតដំណើរកម្សាន្តទៅកូរ៉េខាងជើង បានបង្ហោះក្នុងហ្វេសប៊ុកថា ក្រុមហ៊ុនទើបតែដឹងរឿងនេះ គឺទីក្រុងរ៉ាសន លែងអនុញ្ញាតឱ្យភ្ញៀវទេសចរទៅកម្សាន្ត ។ រីឯក្រុមហ៊ុន Pioneer Tour និងក្រុមហ៊ុន Goryo Tour បានផ្អាកកម្មវិធីដំណើរកម្សាន្តទៅកូរ៉េខាងជើង ហើយក្រុមហ៊ុនទាំងនេះបញ្ជាក់ថា កម្មវិធីដំណើរកម្សាន្តនៅខែមេសា និងខែឧសភា ឆ្នាំ២០២៥ នឹងផ្អាកបណ្តោះអាសន្ន ។

កន្លងមក ក្រុមហ៊ុន Pioneer Tour បាននាំភ្ញៀវទេសចរទៅកម្សាន្តនៅកូរ៉េខាងជើង ប៉ុន្តែភ្ញៀវទេសចរត្រូវបានបំបិទសិទ្ធិខ្លាំងជាងពេលជំងឺកូវីដឆ្លងរាតត្បាតទៅទៀត គឺកូរ៉េខាងជើងពុំអនុញ្ញាតឱ្យភ្ញៀវទេសចរដើរលេងតាមផ្លូវ ឬជជែកជាមួយពលរដ្ឋកូរ៉េខាងជើងទេ រីឯសេវាទូរស័ព្ទ និងអ៊ីនធើរណេត ក៏គ្មានដែរ ។

ក្រុមហ៊ុន Goryo Tour ឱ្យដឹងថា កាលពីដើមខែមីនា ឆ្នាំ២០២៥ ក្រុមហ៊ុនទើបតែទទួលចុះឈ្មោះអ្នកចូលរួមរត់ម៉ារ៉ាតុងអន្តរជាតិនៅទីក្រុងព្យុងយ៉ាង ដែលគ្រោងរៀបចំនៅថ្ងៃទី៦ ខែមេសា ខាងមុខ ដែលជាការរត់ប្រណាំងនៅកូរ៉េខាងជើងលើកដំបូងក្នុងរយៈពេល៥ឆ្នាំ ។ ប៉ុន្តែរហូតមកដល់ថ្ងៃទី៦ ខែមីនា នេះ កូរ៉េខាងជើងពុំបញ្ជាក់ឱ្យច្បាស់លាស់ថា តើនឹងរៀបចំកម្មវិធីនេះឬអត់ ៕