Dua Lipa និងតារាសម្តែង Callum Turner រៀបការដោយសម្ងាត់

តារាចម្រៀងអង់គ្លេស Dua Lipa អាយុ ៣១ ឆ្នាំ និងតារាសម្តែង Callum Turner អាយុ ៣៦ ឆ្នាំ បានរៀបការជាមួយគ្នាហើយបន្ទាប់ពីទាក់ទងគ្នាបានប្រហែលពីរឆ្នាំ។ គូស្នេហ៍នេះបានប្រារព្ធពិធីមង្គលការដ៏សាមញ្ញ និងឯកជនមួយនៅសាលាក្រុង Old Marylebone ដែលជាទីតាំងចុះបញ្ជីអាពាហ៍ពិពាហ៍ដ៏ពេញនិយមបំផុតមួយរបស់ទីក្រុងឡុងដ៍នៅថ្ងៃទី ៣១ ខែឧសភា។

អ្នកទាំងពីរបានអញ្ជើញក្រុមគ្រួសារ និងមិត្តភក្តិជិតស្និទ្ធមួយចំនួន។ បុគ្គលិកម្នាក់នៅអគារនេះបាននិយាយថា «ម្តាយ និងជីដូនរបស់តារាចម្រៀងរូបនេះបាននៅទីនោះ។ ពួកគេមិនបានអញ្ជើញភ្ញៀវច្រើនទេ ប្រហែលជាប្រាំពីរឬប្រាំបីនាក់»។ បុគ្គលិករូបនេះបានបន្ថែមថា Dua Lipa និងស្វាមីរបស់នាងបានស្លៀកពាក់យ៉ាងស្រស់ស្អាត ហើយពិធីនេះក៏រហ័សរហួនផងដែរ។ របាយការណ៍ព័ត៌មានបង្ហាញថា Dua Lipa និង Callum Turner នឹងរៀបចំពិធីមង្គលការដ៏ប្រណីតមួយនៅ Sicily ប្រទេសអ៊ីតាលី ចាប់ពីថ្ងៃទី ៤ ដល់ថ្ងៃទី ៦ ខែមិថុនា។

យោងតាម People អ្នកទាំងពីរត្រូវបានលេចឮថាកំពុងណាត់ជួបគ្នានៅពេលដែលពួកគេបានចូលរួមពិធីជប់លៀងបន្ទាប់ពីការចាក់បញ្ចាំងលើកដំបូងនៃខ្សែភាពយន្ត Masters of the Air របស់ Callum Turner ក្នុងខែមករា ឆ្នាំ២០២៤។ ៦ខែក្រោយមក Dua Lipa បានបញ្ជាក់ជាសាធារណៈអំពីទំនាក់ទំនងរបស់ពួកគេនៅលើ Instagram ។ ចាប់តាំងពីពេលនោះមក គូស្នេហ៍នេះតែងតែបង្ហោះរូបថតរបស់ពួកគេចូលរួមព្រឹត្តិការណ៍ និងធ្វើដំណើរជាមួយគ្នា។
នៅក្នុង ទស្សនាវដ្ដី Vogue ខែមិថុនា ឆ្នាំ២០២៥ Dua Lipa បានបញ្ជាក់ពីការភ្ជាប់ពាក្យរបស់នាង។ នៅពេលនោះ តារាចម្រៀងរូបនេះបាននិយាយថា នាងសង្ឃឹមថានឹងរៀបចំពិធីមង្គលការបន្ទាប់ពីនាងបានបញ្ចប់ដំណើរទេសចរណ៍ពិភពលោករបស់នាង ហើយ Turner បានបញ្ចប់គម្រោងភាពយន្តរបស់ខ្លួន។

ម្ចាស់បទ «New Rules»បាននិយាយថា «ខ្ញុំមិនដែលយល់ពីសារៈសំខាន់នៃអាពាហ៍ពិពាហ៍ទេ។ ខ្ញុំមិនដឹងទៀតទេ ប៉ុន្តែការសម្រេចចិត្តចាស់ទៅជាមួយគ្នា មើលពិភពលោកជាមួយគ្នា និងធ្វើជាមិត្តល្អបំផុតជារៀងរហូត គឺពិតជាអារម្មណ៍ដ៏អស្ចារ្យមួយ»។ នាងក៏បានបង្ហាញពីបំណងប្រាថ្នាចង់មានកូនផងដែរ ប៉ុន្តែស្ទាក់ស្ទើរអំពីពេលវេលាដើម្បីឱ្យសមនឹងកាលវិភាគការងារ និងដំណើរកម្សាន្តរបស់នាង៕