បឹង Hillier ដែលត្រូវបានស្គាល់ថាជាបឹងពណ៌ផ្កាឈូក គឺមានទីតាំងស្ថិតនៅចំកណ្តាលកោះ Recherche Archipelago នៃភាគខាងលិចប្រទេសអូស្ត្រាលី។ បឹងនេះត្រូវបានគេរកឃើញដំបូងក្នុងឆ្នាំ ១៨០២ ដោយអ្នករុករកជនជាតិអង់គ្លេស Matthew Flinders ដែលបឹងនេះគឺជាបឹងទឹកប្រៃមួយក្នុងចំណោមបឹងពណ៌ផ្កាឈូកទាំងប្រាំផ្សេងទៀតនៅរដ្ឋ Victoria របស់ប្រទេសអូស្ត្រាលី។

តាមពិតទៅបឹងពណ៌ផ្កាឈូកមិនមែនជាបឹងចម្លែកអ្វីនោះទេ ដោយសារវាមាននៅជុំវិញសកលលោកតែម្តង សូម្បីតែប្រទេសម៉ិចស៊ិក និងប្រទេសសេណេហ្កាល់ ក៏មានបឹងពណ៌ផ្កាឈូកផងដែរ។ ខណៈប្រទេសអូស្ត្រាលីមានបឹងនេះរហូតដល់ ៥ កន្លែងឯណោះរួមមាន៖ បឹង Crosbie, Becking, Hardy, Kenyon និងបឹង Hillier ដែលរំលេចនូវទស្សនីយភាពដ៏គួរឱ្យចាប់អារម្មណ៍បំផុត ប្រៀបបានដូចជាឋានសួគ៌ក្រៅភពអ៉ីចឹង។

ទោះជាយ៉ាងណាក្នុងចំណោមបឹងទឹកប្រៃពណ៌ផ្កាឈូកទាំងនោះ បឹង Hillier ហាក់លេចធ្លោជាងគេ ដោយសារវាមានភាពស្រស់ស្អាត និងទាក់ទាញ ជាពិសេសវាក៏ស្ថិតនៅជាប់មហាសមុទ្រប៉ាស៊ីហ្វិកទៀតផង។ ប្រសិនបើអ្នកទេសចរទស្សនាបឹងនេះពីលើអាកាស អ្នកនឹងឃើញពណ៌ផ្កាឈូកស្រាលនៃបឹង Hillier និងពណ៌ខៀវស្រទន់នៃមហាសមុទ្រ គឺមើលទៅពិតជាអស្ចារ្យខ្លាំងណាស់។

ជាមួយបណ្តោយប្រវែង ៦០០ ម៉ែត្រ និងទទឹងមិនលើសពី ២៥០ ម៉ែត្រ បឹង Hillier មានត្រីចម្រុះជាច្រើនប្រភេទ និងរុក្ខជាតិបៃតងអមជុំវិញយ៉ាងល្អឥតខ្ចោះ ប្រៀបដូចជាបឹងកែច្នៃ ឬកាត់តអ៉ីចឹង ប៉ុន្តែតាមពិតទៅវាជាបឹងកើតឡើងដោយធម្មជាតិនោះទេ។ ចំពោះមូលហេតុដែលបឹងនេះមានពណ៌ផ្កាឈូកគឺដោយសារវត្តមានសារ៉ាយម្យ៉ាងឈ្មោះថា Dunaliella salina ដែលសារ៉ាយនេះជាអ្នកផលិតពណ៌យ៉ាងច្រើននៅបាតទន្លេ ធ្វើឱ្យពណ៌ទឹកខុសប្រក្រតីខ្លាំង នេះបើយោងតាមការចុះផ្សាយរបស់គេហទំព័របរទេស Daily Mail៕

ប្រទេសចិន៖ នេះជាលើកទី ៣ ហើយដែលក្រុមហ៊ុនផលិតរថយន្តអគ្គិសនីចិន BYD បានឈ្នះពានរង្វាន់ដ៏កំពូលនៅប្រទេសជប៉ុនសម្រាប់ឆ្នាំ ២ ឆ្នាំជាប់ៗគ្នា។ មានន័យថាលើកទី ១ ផលិតផលរបស់ម៉ាកយីហោនេះ គឺមិនបានជាប់ចំណាត់ថ្នាក់ទេ ប៉ុន្តែនៅលើកទី ២ និងលើកទី ៣ វិញរថយន្តអគ្គិសនីរបស់ក្រុមហ៊ុន BYD បានឈ្នះពានរង្វាន់ប្រចាំឆ្នាំ ២០២៣ និង ២០២៤ នៅក្នុងប្រទេសជប៉ុន។

យោងតាមសារព័ត៌មានបរទេស CNC ដែលបានចុះផ្សាយកាលពីថ្ងទី៥ ខែមិនា ឆ្នាំ២០២៥ ថា BYD Seal បានឈរនៅចំណាត់ថ្នាក់លេខ ១ ជារថយន្តអគ្គិសនីល្អបំផុតនៅប្រទេសជប៉ុនក្នុងឆ្នាំ២០២៤ បន្ទាប់ពីម៉ូដែល Dolphin របស់ក្រុមហ៊ុនដែលបានផ្តល់កិត្តិយសក្នុងឆ្នាំ ២០២៣។ ជាមួយពិន្ទុ ១៩៥ ដែលបានយកឈ្នះម៉ូដែល Honda N-Van e: និង Hyundai loniq5N។

ដូច្នេះបច្ចុប្បន្នរថយន្ត BYD Seal ត្រូវបានគេចាត់ទុកថាជាម៉ូដែលល្អបំផុតទាំង ១០ របស់ប្រទេសជប៉ុន សម្រាប់ឆ្នាំ ២០២៤ និង ២០២៥។ យោងតាមលោក Liu Xueliang អ្នកគ្រប់គ្រងទូទៅនៃផ្នែកលក់ BYD អាស៊ីប៉ាស៊ីហ្វិក និងជាប្រធានក្រុមហ៊ុន BYD Japan បានឱ្យដឹងថា BYD Seal បាននាំចូលទៅក្នុងប្រទេសជប៉ុននៅឆ្នាំ ២០២៤ ដោយមានប្រព័ន្ធបើកបរ កង់ក្រោយ និងប្រភេទកង់បួន។ អ្នករៀបចំពានរង្វាន់ EVsmart និងសារធារណជនជាច្រើនបានសរសើររថយន្តនេះថា “ជាឧស្សាហកម្មសម្រាប់រចនាបថ ការរចនាដ៏ស្រស់ស្អាត និងដំណើរការដ៏ទូលំទូលាយ។

លើសពីនេះពួកគេក៏សរសើរថា BYD Seal មិនត្រឹមតែបង្ហាញពីដំណើរការល្អឥតខ្ចោះនៃរថយន្តអគ្គិសនីសុទ្ធប៉ុណ្ណោះទេ ប៉ុន្តែវាថែមទាំងកំណត់ស្តង់ដារឧស្សាហកម្មជាមួយនឹងបទពិសោធន៍បើកបរដែលមានគុណភាពខ្ពស់របស់វាទៀតផង”។ BYD Seal មានប្រវែង ៤,៨០០ mm, ទទឹង ១,៨៧៥ mm, កម្ពស់ ១,៤៦០ mm និងមាន wheelbase ២,៩២០ mm គឺជារថយន្តទ្វារបួន។ ការរចនាគឺផ្អែកលើប្រធានបទ “រូបរាងរលោងនៃសត្វសមុទ្រហែលទឹកដោយសេរី”។

ម៉ូដែលនេះត្រូវបានបំពាក់ដោយកញ្ចប់ថ្ម ៨២.៥៦ kWh BYD Blade ហើយកំណែដ្រាយកង់ ៤ អាចបង្កើនល្បឿនពី ០-១០០ គីឡូម៉ែត្រក្នុងមួយម៉ោងត្រឹមតែ ៣.៨ វិនាទី និង ៥.៩ វិនាទីសម្រាប់កំណែដ្រាយកង់ក្រោយ។ នៅឆ្នាំនេះក្រុមហ៊ុនក៏គ្រោងនឹងដាក់លក់រថយន្ត Plug-in Hybrid ដំបូងរបស់ខ្លួននៅក្នុងប្រទេសជប៉ុន ក៏ដូចជាម៉ូដែលថ្មីៗជាច្រើនទៀតរៀងរាល់ឆ្នាំនៅក្នុងប្រទេសជប៉ុនផងដែរ៕

មិនមែនជាសត្វចម្លែក ប៉ុន្តែមានរូបរាងខុសប្លែកពីសត្វដទៃបន្តិច! មានលក្ខណៈពិសេសជាច្រើនដែលអ្នកវិទ្យាសាស្រ្តចង់ដឹងនិងសិក្សាពីវា។

មានឈ្មោះថា ផ្លេទីផឹស (Platypus) ជាសត្វដែលរស់នៅលើគោកនិងប្រមាញ់ចំណីក្នុងទឹក សព្វថ្ងៃនៅសល់មិនច្រើននោះទេ ហើយសម្បូរជាងគេនៅភាគខាងកើតប្រទេសអូស្រ្តាលី។

ថ្វីត្បិតថាវាមានរូបរាងចម្លែកបន្តិច ប៉ុន្តែមនុស្សមួយចំនួនយល់ថាវាក៏គួរអោយស្រលាញដែរ។ ដងខ្លួនរបស់វាមានរោម មានជំពូសដូចជាសត្វទា គ្មានធ្មេញ មានជើងដូចសត្វភេរ និងកន្ទុយមូលប៉ោងទំហំប្រហែលក្បាលរបស់វា ហើយមានទម្ងន់ត្រឹម ១-២គីឡូក្រាមប៉ុណ្ណោះ។ វាជាសត្វស្ថិតប្រភេទថនិកសត្វចិញ្ចឹមកូនដោយទឹកដោះ ប៉ុន្តែក្រាបពង ហើយរោមរបស់វានឹងភ្លឺចាំងនៅពេលត្រូវពន្លឺUV។ វារស់នៅនិងដេកលើគោក ប៉ុន្តែមុជទឹកដើម្បីចាប់ចំណី ហើយចំណីរបស់ពួកវាគឺប្រភេទសត្វល្អិតដូចជាជន្លេន ដង្កូវ ត្រី ខ្យង និងខ្ចៅជាដើម។

ដោយលែកចំណុចដែលគួរអោយចាប់អារម្មណ៍របស់វាមួយទៀតនោះ គឺវាជាសត្វដែលមានពិស។ បើទោះបីជាវាគ្មានធ្មេញសម្រាប់ខាំ ប៉ុន្តែប្រសិនបើយើងមុតក្រចករបស់វានោះពិសរបស់វានឹងធ្វើអោយយើងឈឺចុកចាប់យ៉ាងខ្លាំង។

សព្វថ្ងៃសត្វមួយប្រភេទនេះកំពុងត្រូវបានគេចាត់ទុកជាសត្វកម្រដែលជិតផុតពូជ និងទទួលបានការភិរក្សពីខាងអ្នកការពារសត្វព្រៃ៕

សហរដ្ឋអាមេរិក ៖ វាពិតជាធ្វើឱ្យមហាជនចាប់អារម្មណ៍យ៉ាងខ្លាំងលើនារីម្នាក់ដែលសម្រេចចិត្តលាឈប់ពីការងារ មកប្រកបមុខរបររើសអេតចាយរយៈពេល២ឆ្នាំ ហើយនាងអាចសន្សំប្រាក់បានរាប់ម៉ឺនដុល្លារ ។ នាងប្រាប់ថា មុខរបរនេះធ្វើឱ្យនាងសប្បាយរីករាយក្នុងជីវិត ថែមទាំងរកប្រាក់បានច្រើន អាចដើរលេងជុំវិញពិភពលោក នាងនឹងពុំបោះបង់របរនេះចោលទេ ។

នារីរូបនេះឈ្មោះ មេឡានី ឌីអេស អាយុ២២ឆ្នាំ រស់នៅទីក្រុងថេមប៉ា រដ្ឋផ្លរីដា សហរដ្ឋអាមេរិក បានលាឈប់ពីការងារពេញម៉ោងរបស់ខ្លួន ហើយងាកមកប្រកបមុខរបររើសអេតចាយរៀងរាល់ថ្ងៃ ។ ក្រោយពីនាងប្រកបមុខរបរនេះបាន២ឆ្នាំ នាងក៏អាចសន្សំប្រាក់បានរាប់ម៉ឺនដុល្លារ ហើយធ្វើឱ្យជីវិតនាងរីករាយយ៉ាងខ្លាំង ដែលបានដើរលេងជុំវិញពិភពលោក ។

មេឡានី រៀបរាប់ថា នាងបានមើលវីដេអូក្នុងបណ្តាញសង្គមនិយាយពីភាពជោគជ័យក្នុងការរកចំណូលពីមុខរបររើសអេតចាយ ក្រោយមក នៅឆ្នាំ២០២៣ នាងក៏ចាប់ផ្តើមរើសអេតចាយ ចាប់ពី៤ម៉ោង ទៅ៥ម៉ោងក្នុង១ថ្ងៃ នៅពេលទំនេរពីការងារ ។ ជារៀងរាល់ថ្ងៃ នាងបានឃើញសម្ភារៈប្រើប្រាស់ជាច្រើន ដូចជា ៖ សៀវភៅ សម្ភារៈក្មេងលេង សម្ភារៈអាចប្រើប្រាស់ឡើងវិញ សម្លៀកបំពាក់ គ្រឿងតុបតែងផ្ទះ និងអាហារសត្វចិញ្ចឹម ។

សម្ភារៈអេតចាយដែលប្រមូលបាន ជួយឱ្យនាងអាចសន្សំប្រាក់លើការទិញសម្លៀកបំពាក់ និងសម្ភារៈប្រើប្រាស់ចាំបាច់ផ្សេងៗមិនគួរឱ្យជឿ ។ ហេតុនេះ ក្រោយពេលទទួលបានចំណូលច្រើនពីការលក់អេតចាយ នាងក៏សម្រេចចិត្តឈប់ធ្វើការ និងមករើសអេតចាយពេញមួយថ្ងៃ ។ រយៈពេល២ឆ្នាំមកនេះ នាងសន្សំប្រាក់បានរហូតដល់៥ម៉ឺនដុល្លារអាមេរិក ហើយតាំងពីរើសអេតចាយមក នាងអាចសន្សំប្រាក់បានច្រើន និងដើរលេងជុំវិញពិភពលោកទៀតផង ។

កន្លែងដែលនាងតែងតែទៅប្រមូលសម្ភារៈអេតចាយ គឺហាង TJ Maxx Homesense និង HomeGoods ដែលនៅទីនេះ មានសម្ភារៈជាច្រើនប្រភេទនៅថ្មីៗ មានគុណភាពល្អ និងមានបិទស្លាកបញ្ជាក់តម្លៃ ប៉ុន្តែត្រូវគេបោះបង់ចោល ។ នាងពុំគិតថា នឹងអាចឃើញសម្ភារៈថ្មីៗទាំងនេះក្នុងធុងសំរាមទេ ។ នាងប្រាប់ថា ៖ «ខ្ញុំចូលចិត្តមុខរបររើសអេតចាយណាស់ អ្នកគ្មានថ្ងៃយល់ទេថា អ្នកនឹងបានឃើញសម្ភារៈអ្វីខ្លះរាល់ថ្ងៃ សម្ភារៈដែលគេបោះបង់ចោលធ្វើឱ្យខ្ញុំរីករាយនឹងប្រមូលយកជានិច្ច» ។

ដោយឡែក នារីម្នាក់ទៀតរស់នៅរដ្ឋតិចសាស់ ប្រាប់ថា នាងអាចរកចំណូលបានរហូតដល់ ៧ម៉ឺន៦ពាន់ដុល្លារក្នុង១ឆ្នាំ ដោយសារការលក់សម្ភារៈអេតចាយដែលប្រមូលបានពីហាងនានា ។ ក្រៅពីនេះ លោក ដេស សេសហ្វីវ អាយុ៣៥ឆ្នាំ បានរៀននៅសាកលវិទ្យាល័យបណ្តើរ រើសអេតចាយលក់បណ្តើរ ហើយលោកបានជួបភរិយាលើកដំបូង ពេលនាងកំពុងរើសអេតចាយលក់ដើម្បីយកប្រាក់បង់សាលា ៕

អេមីរ៉ាតអារ៉ាប់រួម ៖ ទីក្រុងឌូបៃ ប្រទេសអេមីរ៉ាតអារ៉ាប់រួម បានប្រកាសពីគម្រោងសាងសង់អគាររីសតសម្រាប់អ្នកស្រឡាញ់សុខភាព ឈ្មោះ «Therme Dubai» មានកម្ពស់ខ្ពស់បំផុតលើពិភពលោក ។ អគាររីសតនេះនឹងក្លាយជាកន្លែងកម្សាន្តដ៏ទំនើប ស៊ីវិល័យ ដែលមានទឹកជ្រោះ៣កន្លែង អាងហែលទឹក សួនច្បារធំបំផុតលើពិភពលោក ព្រមទាំងមានកញ្ចក់ហ៊ុព័ទ្ធអគារទាំងមូល ដើម្បីបង្ហាញពីការអភិវឌ្ឍជីវចម្រុះ និងការថែរក្សាបរិស្ថានប្រកបដោយនិរន្តរភាព ។

ការសាងសង់អគាររីសត Therme Dubai កម្ពស់១០០ម៉ែត្រ ស្ថិតនៅសួនច្បារ Zabeel គឺនឹងចំណាយថវិកាសាងសង់ជាង៥៤៥លានដុល្លារអាមេរិក និងគ្រោងបើកដំណើរការនៅឆ្នាំ២០២៨ ។ អគាររីសេតនេះនឹងមានសួនច្បារធំបំផុតលើពិភពលោក ហើយវានឹងទាក់ទាញភ្ញៀវទេសចរមកកម្សាន្ត រហូតដល់១លាន៧សែននាក់ក្នុង១ឆ្នាំ ។

ព្រះអង្គម្ចាស់ទីក្រុងឌូបៃ Rashid Al Maktoum ដែលបំពេញតួនាទីជាឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ ព្រមទាំងជាប្រធានក្រុមប្រឹក្សាប្រតិបត្តិឌូបៃ បានបង្ហាញពីគោលដៅរបស់គម្រោងសាងសង់អគាររីសតនេះថា ៖ «Therme Dubai គឺជាចំណែកមួយនៃការលើកកម្ពស់គុណភាពជីវិតពលរដ្ឋឌូបៃ វានឹងធ្វើឱ្យឌូបៃក្លាយជាទីក្រុងគួរឱ្យរស់នៅបំផុតលើពិភពលោក» ។

ទីក្រុងគួរឱ្យចង់រស់នៅនេះ គឺផ្តោតលើការលើកកម្ពស់គុណភាពជីវិតរបស់ពលរដ្ឋ ។ នាថ្ងៃអនាគត ពលរដ្ឋនៅទីក្រុងនេះនឹងធ្វើដំណើរដោយថ្មើរជើង ដោយកាត់បន្ថយផ្សែងពុលចេញពីយានជំនិះដែលធ្វើឱ្យប៉ះពាល់បរិស្ថាន ។ ក្រៅពីនេះ ទីក្រុងឌូបៃមានគម្រោងបង្កើតទីធ្លាសាធារណៈ ដូចជា ៖ សួនច្បារ២០០កន្លែង, ពង្រីកផ្លូវជិះកង់ និងពង្រីកឆ្នេរខ្សាច់នៅកន្លែងពលរដ្ឋហែលទឹក ។

Therme Dubai ត្រូវបានរចនាម៉ូដសាងសង់ដោយក្រុមហ៊ុនរចនាម៉ូដដ៏ល្បីល្បាញ ឈ្មោះ Diller Scofidio & Renfro ដែលក្រុមហ៊ុននេះមានស្នាក់ការធំនៅទីក្រុងញូវយ៉ក សហរដ្ឋអាមេរិក ។ អគាររីសតនេះមានទីតាំងនៅក្បែរអគារដ៏ខ្ពស់ឈ្មោះ One Za’abeel ហើយអ្នកឈរលើអគាររីសត នឹងអាចមើលឃើញអគារខ្ពស់បំផុតលើពិភពលោក គឺ Burj Khalifa ។

គម្រោងសាងសង់អគាររីសត គឺដើម្បីឱ្យវាក្លាយជាកន្លែងកម្សាន្តសម្រាប់អ្នកស្រឡាញ់សុខភាព ដោយសារមានទឹកជ្រោះ៣កន្លែង ហើយទឹកជ្រោះ១កន្លែងៗ មានកម្ពស់១៨ម៉ែត្រ ព្រមទាំងមានជណ្តើរយន្តឡើងទៅកំពូលទឹកជ្រោះផងដែរ ។ អគាររីសតនេះនឹងហ៊ុព័ទ្ធដោយកញ្ចក់ដើម្បីរក្សាសីតុណ្ហភាពកុំឱ្យក្តៅ ដែលធ្វើឱ្យវាមានរូបរាងប្លែកភ្នែកបំផុត ឬដូចគ្នានឹងអគារដែលសាងសង់នៅថ្ងៃអនាគតរាប់រយឆ្នាំទៅមុខ ៕