បន្ទាប់ពីបានជួប Jackson Wang កាលពីមួយឆ្នាំមុន ពេលនេះតារាសម្តែងស្រីជួរមុខកម្ពុជាកញ្ញា ស៊ីន យូប៊ីន បានចូលរួមកម្មវិធីមួយនៅក្នុងប្រទេសថៃដោយមានតារាប្រុសរូបនេះចូលរួម។ អ្វីដែលកាន់តែពិសេសធ្វើឱ្យហ្វេនៗរំភើបចិត្តជំនួស យូប៊ីន រូបនាងបានជួបសមាជិក GOT7 រូបនេះដោយចៃដន្យនៅភោជនីដ្ឋានមួយនៅពេលអាហារពេលល្ងាចហើយទទួលបានការរាក់ទាក់និងបានឱបតារាចម្រៀងរូបនេះថែមទៀត។
គេចាំបានថាកាលពីខែមេសា ឆ្នាំ២០២៤ តារាសម្តែង ស៊ីន យូប៊ីន បានជួបតារាចម្រៀង Jackson Wang សមាជិកក្រុមចម្រៀងកូរ៉េ GOT7 ដោយបានកោតសរសើរពីអត្តចរិតតារាប្រុសរូបនេះជាទេវបុត្រ ក្នុងរឿងព្រេងនិទានមិនស្មើឡើយ។ ជាមួយនឹងឱកាសនេះ ស៊ីន យូប៊ីន ក៏មិនភ្លេចបង្ហើបពីប្រទេសកម្ពុជាដល់ Jackson Wang ដូចគ្នា។ រំលងបានមួយឆ្នាំ យូប៊ីន ក៏បានចូលរួមក្នុងកម្មវិធីមួយនៅឯប្រទេសថៃដោយមានតារាប្រុសរូបនេះចូលរួម។
រូបភាពពី LED នៅក្នុងព្រឹត្តិការណ៍អំពីតារាសម្តែង ស៊ីន យូប៊ីន និង Jackson Wang អង្គុយជិតគ្នាជាមួយនឹងជនពិការបានធ្វើឱ្យអ្នកគាំទ្រចាប់អារម្មណ៍យ៉ាងខ្លាំងនិងបានកោតសរសើរដល់តារាស្រីកម្ពុជារូបនេះជាតារាខ្មែរម្នាក់ដែលបានចូលរួមកម្មវិធីក្រៅស្រុកជាច្រើនដងជាមួយនឹងម៉ាកយីហោល្បីៗព្រមទាំងបានជួបតារាអន្តរជាតិល្បីៗជាច្រើនរូប។
លើសពីការរំពឹងទុកក្នុងនាមជាតារាដែលចូលរួមក្នុងកម្មវិធីជាមួយគ្នា តារាសម្តែង ស៊ីន យូប៊ីន ក៏បានចែករំលែកវីដេអូខ្លីបានជួប Jackson Wang ដោយចៃដន្យនៅហាងអាហារមួយកន្លែងដោយអ្នកទាំងពីរបានរាក់ទាក់ចំពោះគ្នាទៅវិញទៅមក។ អ្វីដែលធ្វើឱ្យហ្វេនៗញញឹមពព្រាយនោះតារាប្រុស Jackson Wang មានចរិតរួសរាយហើយបានឱប យូប៊ីន ដោយការរាប់អានគ្នាផងដែរ។
Jackson Wang មានអាយុ ៣១ ឆ្នាំបានចាប់ផ្តើមអាជីពរបស់ខ្លួននៅក្នុងឧស្សាហកម្មកម្សាន្តកូរ៉េជាសមាជិកក្រុមចម្រៀង GOT7 ក្នុងឆ្នាំ២០១៤ ដែលលោកមានដើមកំណើតហុងកុង។ បច្ចុប្បន្នលោកមានភាពសកម្មជាតារារ៉េប តារាចម្រៀង អ្នករាំ និងអ្នកច្នៃម៉ូតម្នាក់៕
