ប្រទេសអូស្ត្រាលី ៖ រដ្ឋាភិបាលអូស្ត្រាលីបានប្រកាសបដិសេធការអំពាវនាវរបស់ចិន ដែលសូមឱ្យប្រទេសនានាលើពិភពលោក រួបរួមគ្នាប្រឆាំងនឹងការដំឡើងពន្ធទំនិញរបស់អាមេរិក ដោយរដ្ឋាភិបាលអូស្ត្រាលីបញ្ជាក់ថា ប្រទេសអូស្ត្រាលីនឹងកាត់បន្ថយការពឹងផ្អែកចិនរឿងពាណិជ្ជកម្ម ទោះជាចិនជាដៃគូពាណិជ្ជកម្មដ៏ធំបំផុតរបស់អូស្ត្រាលីក្តី ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១០ ខែមេសា ឆ្នាំ២០២៥ ។

ឧបនាយករដ្ឋមន្ត្រីអូស្ត្រាលី លោក Richard Marles បានផ្តល់បទសម្ភាសន៍ជាមួយសារព័ត៌មាន Sky News ក្រោយពីឯកអគ្គរដ្ឋទូតចិនអំពាវនាវឱ្យអូស្ត្រាលីសហការតស៊ូសង្គ្រាមពាណិជ្ជកម្មជាមួយអាមេរិក ដោយលោកនិយាយថា ៖ «យើងនឹងពុំចាប់ដៃចិនក្នុងការប្រកួតប្រជែងអ្វីទាំងអស់ ដែលកំពុងកើតឡើងពេលនេះ ។ យើងពុំធ្វើបែបនេះឡើយ អ្វីដែលយើងធ្វើ គឺការពារផលប្រយោជន៍របស់អូស្ត្រាលី និងប្រឈមមុខជាមួយហានិភ័យជាមួយប្រទេសនានា ។ អូស្ត្រាលីនឹងពង្រឹងទំនាក់ទំនងពាណិជ្ជកម្មជាមួយសហភាពអឺរ៉ុប ឥណ្ឌូណេស៊ី ឥណ្ឌា អង់គ្លេស និងមជ្ឈិមបូព៌ា» ។

ឯកអគ្គរដ្ឋទូតចិននៅទីក្រុង Canberra ប្រទេសអូស្ត្រាលី លោក Xiao Qian បានផ្សព្វផ្សាយខ្លឹមសារមួយក្នុងកាសែត The Age ដោយអំពាវនាវឱ្យរដ្ឋាភិបាលអូស្ត្រាលីសហការជាមួយចិន ដើម្បីការពារប្រព័ន្ធពាណិជ្ជកម្មពហុភាគី ។ លោក Xiao Qian បញ្ជាក់ថា ៖ «នៅក្រោមស្ថានការណ៍ថ្មី ចិននឹងចាប់ដៃជាមួយអូស្ត្រាលី និងប្រទេសនានា ដើម្បីទប់ទល់នឹងការផ្លាស់ប្តូរលើពិភពលោក» ។

កាលពីថ្ងៃទី៩ ខែមេសា កន្លងមក ប្រធានាធិបតីអាមេរិក លោក Donald Trump បានធ្វើឱ្យពិភពលោក ភ្ញាក់ផ្អើលម្តងទៀត ដោយលោកប្រកាសពន្យារពេលអនុវត្តពន្ធទំនិញនាំចូលពីប្រទេសជាច្រើន រយៈពេល៩០ថ្ងៃ លើកលែងតែចិន គឺលោកដំឡើងពន្ធទំនិញចិនភ្លាមៗ ចាប់ពី១០៤% រហូតដល់១២៥% ។ ប៉ុន្តែកាលៈទេសៈនេះជាបញ្ហាប្រឈមសម្រាប់អូស្ត្រាលី ដែលបាននាំចេញទំនិញ១ ក្នុងចំណោម៣ ទៅកាន់ចិន ខណៈទំនិញអូស្ត្រាលីនាំចេញទៅអាមេរិក ស្មើមិនដល់៥% នៃតម្លៃនាំចេញសរុប ។

ភាពមិនប្រាកដប្រជាពាក់ព័ន្ធនឹងពន្ធទំនិញ និងការរឹតបន្តឹងពាណិជ្ជកម្មផ្សេងៗរវាងអាមេរិកជាមួយប្រទេសដៃគូពាណិជ្ជកម្មធំៗ គឺអាចប៉ះពាល់ដល់ការវិនិយោគ និងការចំណាយប្រាក់របស់ពលរដ្ឋអូស្ត្រាលី ខណៈលោក Trump បានកំណត់ពន្ធទាបស្មើ១០% សម្រាប់ទំនិញអូស្ត្រាលី ។ នេះបើតាមមន្ត្រីធនាគារកណ្តាលអូស្ត្រាលី ។

នាយករដ្ឋមន្ត្រីអូស្ត្រាលី លោក Anthony Albanese ថ្លែងថា ទោះជាលោក Trump ដាក់ពន្ធពុំសមហេតុផល ស្មើ១០% សម្រាប់ទំនិញអូស្ត្រាលី ដែលជាប្រទេសសម្ព័ន្ធមិត្តជាមួយអាមេរិកក្នុងតំបន់ឥណ្ឌូប៉ាស៊ីហ្វិកក្តី ប៉ុន្តែរដ្ឋាភិបាលអូស្ត្រាលីគ្មានគម្រោងសងសឹកអាមេរិកទេ ។

រដ្ឋាភិបាលចិនបានអំពាវនាវឱ្យប្រទេសនានារួបរួមគ្នាប្រឆាំងនឹងការដំឡើងពន្ធទំនិញរបស់លោក Trump ហើយចិនជឿជាក់ថា ការសហការគ្នាលើពិភពលោក នឹងអាចយកឈ្នះលើអំណាចពាណិជ្ជកម្មរបស់អាមេរិក ។ បច្ចុប្បន្ន ចិនបានសហការជាមួយជប៉ុន កូរ៉េខាងត្បូង និងប្រទេសផ្សេងៗនៅតំបន់អាស៊ី ព្រមទាំងអំពាវនាវឱ្យសហភាពអឺរ៉ុបសហការជាមួយចិនផងដែរ ដើម្បីរក្សាពាណិជ្ជកម្មសេរី និងពហុភាគីនិយម ៕

ប្រទេសចិន ៖ កាលពីថ្ងៃទី៩ ខែមេសា ឆ្នាំ២០២៥ សារព័ត៌មាន China Xinhua រាយការណ៍ថា ក្រសួងពាណិជ្ជកម្មចិននឹងប្តឹងអាមេរិកទៅកាន់អង្គការពាណិជ្ជកម្មពិភពលោក (WTO) ករណីអាមេរិកដំឡើងពន្ធទំនិញចិនខ្ពស់ ។ លើសពីនេះ គណៈកម្មការពន្ធចិននឹងដំឡើងពន្ធទំនិញនាំចូលពីអាមេរិក ស្មើ៨៤% អនុវត្តចាប់ពីថ្ងៃទី១០ ខែមេសា ក្រោយពីអាមេរិកដំឡើងពន្ធទំនិញចិនខ្ពស់ជាបន្តបន្ទាប់ ដែលចិនចាត់ទុកថា អាមេរិកបានប្រព្រឹត្តទង្វើខុសឆ្គងយ៉ាងខ្លាំង ព្រមទាំងល្មើសសិទ្ធិ និងផលប្រយោជន៍ស្របច្បាប់របស់ចិនយ៉ាងធ្ងន់ធ្ងរ ។

បើតាមមន្ត្រីនាំពាក្យក្រសួងពាណិជ្ជកម្មចិន គឺការដំឡើងពន្ធទំនិញខ្ពស់របស់អាមេរិក ជាការល្មើសច្បាប់អង្គការពាណិជ្ជកម្មពិភពលោកយ៉ាងខ្លាំង ហើយជាកំហុសឆ្គងដ៏ធំមួយរួមផ្សំទាំងកំហុសពីមុន ។ ហេតុនេះ ទង្វើរបស់អាមេរិកបង្ហាញពីការគំរាមកំហែងមកលើចិនតែម្ខាង ហើយចិនប្តេជ្ញាចិត្តយ៉ាងមុតមាំការពារសិទ្ធិ និងផលប្រយោជន៍ដោយស្របច្បាប់តាមច្បាប់អង្គការពាណិជ្ជកម្មពិភពលោក, គាំទ្រប្រព័ន្ធពាណិជ្ជកម្មពហុភាគី, គាំទ្រសេដ្ឋកិច្ច និងពាណិជ្ជកម្មអន្តរជាតិ ។

កាលពីថ្ងៃទី៩ ខែមេសា កន្លងមក លោក លីន ជៀន មន្ត្រីនាំពាក្យក្រសួងការបរទេសចិន បានអំពាវនាវឱ្យអាមេរិកបញ្ឈប់អាកប្បកិរិយាក្រអឺតក្រទម និងគំរាមកំហែង ដោយលោកបញ្ជាក់ថា បើចង់ដោះស្រាយបញ្ហាតាមរយៈការចរចាគ្នា អាមេរិកគួរតែបង្ហាញអាកប្បកិរិយាគោរពគ្នាទៅវិញទៅមកដោយស្មើភាព ព្រមទាំងមើលពីផលប្រយោជន៍រួមគ្នា ។ ប៉ុន្តែបើអាមេរិកមិនអើពើនឹងផលប្រយោជន៍ជាមួយចិន រួមទាំងផលប្រយោជន៍ពិភពលោក ហើយអាមេរិកនៅតែបន្តធ្វើសង្គ្រាមពាណិជ្ជកម្ម ចិននឹងចាត់វិធានការវិញ ។

មុនពេលចិនដំឡើងពន្ធទំនិញអាមេរិក ស្មើ៨៤% រដ្ឋាភិបាលចិនបញ្ជាក់ថា ពុំចង់ប្រឈមនឹងសង្គ្រាមពាណិជ្ជកម្មទេ ប៉ុន្តែចិនមិនអាចនៅស្ងៀមបណ្តោយឱ្យសិទ្ធិ និងផលប្រយោជន៍ស្របច្បាប់របស់ខ្លួនត្រូវខូចខាតឡើយ ។

ដោយឡែក ប្រធានាធិបតីអាមេរិក លោក Donald Trump ថ្លែងថា អាមេរិកនឹងទទួលបានចំណូលពន្ធ ចំនួន២,០០០លានដុល្លារក្នុង១ថ្ងៃ កន្លងមក មានប្រទេសជាង៧០ប្រទេស បានសុំចរចាពាណិជ្ជកម្មជាមួយអាមេរិក ។ មេដឹកនាំអាមេរិកជឿជាក់ថា គោលនយោបាយដំឡើងពន្ធរបស់ខ្លួននឹងជួយស្តារឧស្សាហកម្មអាមេរិក ហើយលោកបានបង្ខំឱ្យក្រុមហ៊ុននានាផ្លាស់ប្តូរទីតាំងផលិតទំនិញមកអាមេរិក ។

ចិនដំឡើងពន្ធទំនិញអាមេរិកវិញ ស្មើ៨៤% បានធ្វើឱ្យប្រទេសនានាលើពិភពលោក បារម្ភពីការផ្ទុះសង្គ្រាមពាណិជ្ជកម្មរវាងចិន និងអាមេរិកកាន់តែខ្លាំងឡើង ។ ការដំឡើងពន្ធទំនិញអាមេរិក គឺចិនបានធ្វើឡើងមិនប៉ុន្មានម៉ោង ក្រោយពីលោក Trump ដំឡើងពន្ធទំនិញចិនខ្ពស់ ស្មើ១០៤% រីឯការដំឡើងពន្ធទំនិញចិនលើកចុងក្រោយបង្អស់ ស្មើ១២៥% ចិនពុំទាន់មានវិធានការឆ្លើយតបវិញទេ ។

នៅថ្ងៃទី១០ ខែមេសា នេះ សារព័ត៌មានបរទេសរាយការណ៍ថា លោក Trump បានដំឡើងពន្ធទំនិញចិនបន្ថែមទៀត រហូតដល់១២៥% និងអនុវត្តភ្លាមៗ ប៉ុន្តែលោកនឹងផ្អាកការប្រមូលពន្ធខ្ពស់ (Reciprocal Tariff) ពីប្រទេសផ្សេងៗ រយៈពេល៩០ថ្ងៃ ដោយលោកប្រមូលតែពន្ធទំនិញអប្បបរមា ស្មើ១០% ប៉ុណ្ណោះ ។ លោក Trump បានសរសេរក្នុងបណ្តាញសង្គម Truth Social ថា ៖ «ដោយសារចិនមិនគោរពទីផ្សារពិភពលោក ទើបខ្ញុំដំឡើងពន្ធទំនិញចិន ស្មើ១២៥%» ៕

ប្រទេសចិន ៖ រដ្ឋាភិបាលចិននឹងឆ្លើយតប និងចាត់វិធានការជាច្រើនដើម្បីការពារផលប្រយោជន៍ ក្រោយពីប្រធានាធិបតីអាមេរិក លោក Donald Trump ចាប់ផ្តើមដំឡើងពន្ធខ្ពស់លើទំនិញនាំចូលពីចិនជាបន្តបន្ទាប់ ព្រមទាំងអំពាវនាវឱ្យប្រទេសនានាលើពិភពលោក សហការជាមួយចិន រួបរួមគ្នាប្រឆាំងនឹងរបបផ្តា.ច់ការពាណិជ្ជកម្មរបស់​លោក Trump ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៩ ខែមេសា ឆ្នាំ២០២៥ ។

មន្ត្រីនាំពាក្យក្រសួងការបរទេសចិនបាននិយាយកាលពីថ្ងៃទី៩ ខែមេសា កន្លងមកថា អាមេរិកនៅតែដំឡើងពន្ធទំនិញចិនខ្ពស់តាមអំពើចិត្តរបស់ខ្លួន និងដាក់សម្ពាធចិនខ្លាំងបំផុតមិនឈប់ឈរ ។ ហេតុនេះ ចិននឹងប្រឆាំងដាច់ខាត ហើយចិនគ្មានថ្ងៃទទួលយកអំណាច ឬការគំរាមកំហែងណាមួយឡើយ ។ បើអាមេរិកពុំគិតពីផលប្រយោជន៍របស់ប្រទេសទាំង២ និងផលប្រយោជន៍ពិភពលោក ហើយនៅតែប្រកាន់យកសង្គ្រាមពាណិជ្ជកម្ម ចិននឹងតស៊ូជាមួយអាមេរិក រហូតដល់ទីបំផុត ។

ប្រទេសចិនបានបង្ហាញគោលជំហរប្រឆាំងនឹងអាមេរិក ក្រោយពីលោក Trump ដំឡើងពន្ធទំនិញចិនខ្ពស់ជាបន្តបន្ទាប់ ចាប់ពី២០% រហូតដល់១០៤% និងកើនឡើងដល់១២៥% ដោយសារចិនពុំព្រមលុបចោលការដំឡើងពន្ធទំនិញអាមេរិក ។

ដូចគ្នានេះ មន្ត្រីក្រសួងពាណិជ្ជកម្មចិននិយាយថា ចិននឹងចាត់វិធានការជាច្រើនដើម្បីឆ្លើយតបជាមួយអាមេរិក ហើយចិននឹងតស៊ូរហូតដល់ទីបំផុត បើអាមេរិកនៅតែរឹតបន្តឹងពាណិជ្ជកម្ម និងសេដ្ឋកិច្ច ពីព្រោះគ្មានប្រទេសណាមួយឈ្នះក្នុងសង្គ្រាមពាណិជ្ជកម្មទេ ។ ទោះយ៉ាងណា ចិនចង់ចរចាជាមួយអាមេរិកអំពីបញ្ហាសេដ្ឋកិច្ច និងពាណិជ្ជកម្មទ្វេភាគីដោយស្មើភាព ដើម្បីកាត់បន្ថយក្តីបារម្ភរបស់ភាគីនីមួយៗ ។

ក្រៅពីចិន នៅមានប្រទេសជាង៦០ទៀត បានប្រឈមនឹងអត្រាពន្ធទំនិញខ្ពស់របស់លោក Trump ដូចជា ៖ ពន្ធទំនិញកម្ពុជា ស្មើ៤៩%, វៀតណាម ៤៦%, ថៃ ៣៦%, កូរ៉េខាងត្បូង ២៥%, ជប៉ុន ២៤% និងបណ្តាប្រទេសនៅសហភាពអឺរ៉ុប ២០% ។

តាមការចុះផ្សាយរបស់កាសែតចិន China Daily គឺរដ្ឋាភិបាលចិនបានអំពាវនាវឱ្យប្រទេសនានាលើពិភពលោក រួបរួមគ្នាប្រឆាំងនឹងការដំឡើងពន្ធទំនិញរបស់លោក Trump ហើយចិនជឿជាក់ថា ការរួបរួមគ្នារបស់ប្រទេសនានា នឹងអាចយកឈ្នះលើអំណាចពាណិជ្ជកម្ម ។ បច្ចុប្បន្ន ចិនបានសហការជាមួយជប៉ុន កូរ៉េខាងត្បូង និងប្រទេសផ្សេងៗនៅតំបន់អាស៊ី ព្រមទាំងអំពាវនាវឱ្យសហភាពអឺរ៉ុបសហការជាមួយចិន ដើម្បីរក្សាពាណិជ្ជកម្មសេរី និងពហុភាគីនិយម ។

សង្គ្រាមពាណិជ្ជកម្មនឹងអូសបន្លាយយូរ និងផ្លាស់ប្តូរសេដ្ឋកិច្ចពិភពលោក ជារៀងរហូត ។ ទោះជាសង្គ្រាមពាណិជ្ជកម្មបញ្ចប់ដោយការចរចា, ការយល់ព្រមដកថយរបស់ប្រទេសណាមួយ ឬការប្រឈមមុខជាមួយគ្នាបន្តទៀត ប៉ុន្តែវានឹងមានផលប៉ះពាល់ដល់ពលរដ្ឋរបស់ប្រទេសទាំងអស់ ដូចជា ៖ តម្លៃទូរស័ព្ទស្មាតហ្វូនកើនឡើង, ការខ្វះខាតទំនិញមួយចំនួន និងសេដ្ឋកិច្ចពិភពលោក រង្គោះរង្គើ ។ នេះបើតាមការលើកឡើងរបស់អ្នកជំនាញសេដ្ឋកិច្ច ៕

ការធ្វើដំណើរទៅក្រៅប្រទេស មិនថាក្នុងលក្ខខណ្ឌទៅកម្សាន្ត បន្តការសិក្សា ឬធុរកិច្ចផ្សេងៗទេ គឺប្រៀបបានដូចជាការផ្សងព្រេងដ៏អស្ចារ្យអញ្ចឹងដែរ ដែលផ្តល់ឱកាសឲ្យអ្នកស្វែងយល់ពីវប្បធម៌ ជួបមនុស្សថ្មីៗ និងបង្កើតអនុស្សាវរីយ៍ដែលមិនអាចបំភ្លេចបាន។ ទោះជាយ៉ាងណាក៏ដោយ ការឈានជើងចូលក្នុងទឹកដីដែលអ្នកមិនធ្លាប់ស្គាល់ពីមុន ក៏អាចកើតមានជាមួយនឹងបញ្ហាប្រឈមផងដែរ បើទោះបីជាប្រទេសនានាភាគច្រើនផ្តល់សិទ្ធសេរីភាពឲ្យភ្ញៀវទេសចរណ៏ទៅលេងក៏ដោយ។

ដើម្បីធានាបាននូវបទពិសោធន៍ថ្មីៗដោយគ្មានការរំខាន វាជារឿងចាំបាច់ណាស់ដែលអ្នកត្រូវយល់ដឹងអំពីច្បាប់អន្តោប្រវេសន៍ បទដ្ឋានវប្បធម៌ និងហានិភ័យដែលអាចកើតមានជាយថាហេតុ។ ខាងក្រោមនេះ ជាមគ្គុទ្ទេសក៍សំខាន់ៗដែលអ្នកធ្វើដំណើរគ្រប់រូបគួរដឹងមុនពេលឆ្លងដែន៖

១៖ ស្វែងយល់ពីច្បាប់អន្តោប្រវេសន៍ ប្រទេសនីមួយៗមានតម្រូវការអន្តោប្រវេសន៍ជាក់លាក់ណាស់ រួមទាំងទិដ្ឋាការ ភស្តុតាងនៃការធ្វើដំណើរបន្ត និងកំណត់ត្រាចាក់វ៉ាក់សាំងជាដើម។ ស្រាវជ្រាវព័ត៌មានលម្អិតទាំងនេះសិនមុនពេលធ្វើដំណើរ ដើម្បីជៀសវាងការផាកពិន័យ ការនិរទេស ឬការហាមឃាត់ការចូលតែម្ដង។
២ ជៀសវាងការទទួលសំណើរជនចម្លែក ការដឹកជញ្ជូនទំនិញឲ្យអ្នកដទៃអាចពាក់ព័ន្ធនឹងអ្នកដោយអចេតនាប្រសិនបើវាស្ថិតក្នុងសកម្មភាពខុសច្បាប់។ គួរបដិសេធប្រសិនបើនរណាម្នាក់ឲ្យអ្នកកាន់ឬផ្ញើរបស់សបរនៅនឹងអ្នក ហើយក៏ប្រុងប្រយ័ត្នចំពោះឥវ៉ាន់របស់អ្នកផងដែរ។
៣ គោរពច្បាប់មូលដ្ឋាន និងគយ អ្វីដែលអ្នកតែងធ្វើនៅប្រទេសអ្នក អាចត្រូវបានហាមឃាត់យ៉ាងតឹងរ៉ឹងនៅប្រទេសផ្សេង មិនថាសកម្មភាព ការស្លៀកពាក់ ឬឥរិយាបទរបស់អ្នកជាដើម។ ដូចនេះត្រូវយល់ដឹងបទប្បញ្ញត្តិក្នុងប្រទេសដែលអ្នកទៅជាមុនសិនដើម្បីទប់ស្កាត់បញ្ហា។
៤ ការរត់ពន្ធគ្រឿងញៀនមិនមែនជារឿងកំប្លែងទេ ប្រទេសជាច្រើនអនុវត្តការផាកពិន័យយ៉ាងធ្ងន់ធ្ងរចំពោះបទល្មើសទាក់ទងនឹងគ្រឿងញៀន រួមទាំងការជាប់ពន្ធនាគារ ឬសូម្បីតែការប្រហារជីវិត។ ពិនិត្យឥវ៉ាន់របស់អ្នកឱ្យបានហ្មត់ចត់ ដើម្បីឱ្យប្រាកដថាអ្នកមិនបានដឹកជញ្ជូនវាដោយអចេតនា។
៥ ការរឹតត្បិតការឆ្លងដែន ប្រទេសមួយចំនួនអាចដាក់កម្រិតលើការចូល ដោយផ្អែកលើប្រវត្តិធ្វើដំណើរ ឬសញ្ជាតិរបស់អ្នក។ សូមពិនិត្យមើលច្បាប់ទាំងនេះឲ្យបានច្បាស់លាស់ ហើយរៀបចំផែនការទៅតាមនោះ ដើម្បីជៀសវាងការខកចិត្ត។
៦ ប្រកាន់ខ្ជាប់នូវបទប្បញ្ញត្តិរូបិយប័ណ្ណ ត្រូវដឹងពីដែនកំណត់លើរូបិយប័ណ្ណបរទេស និងមិនគួរមានសាច់ប្រាក់ច្រើនពេក ដើម្បីជៀសវាងការរឹបអូស ឬពិន័យ។ ពិនិត្យមើលអត្រាប្តូរប្រាក់ជានិច្ច ដើម្បីប្រើប្រាស់ថវិកាធ្វើដំណើររបស់អ្នកឱ្យបានសមគួរបំផុត។
៧ រក្សាសុវត្ថិភាព និងសុខភាពឲ្យល្អ ត្រូវពិនិត្យសុខភាពជាមុនសិនមុននឹងធ្វើដំនើតទៅក្រៅប្រទេស ជាពិសេសប្រទេសមួយចំនួនតម្រូវឲ្យចាក់វ៉ាក់សាំងការពារជាក់លាក់ ដូចជា ជំងឺគ្រុនលឿង ឬកូវីដ-១៩ ជាដើម លើសពីនេះគួរមានការធានារ៉ាប់រងសុខភាពក្នុងការធ្វើដំណើរ ដែលអាចជាជំនួយសង្គ្រោះជីវិតក្នុងពេលមានអាសន្ន។
៨ ប្រយ័ត្នឥរិយាបថនៅទីសាធារណៈ និងការថតរូបរបស់អ្នក សកម្មភាពដូចជាការថតរូបអគាររដ្ឋាភិបាល ឬចូលរួមក្នុងការរិះគន់ផ្នែកនយោបាយ អាចត្រូវបានចាត់ទុកថាមិនគោរព ឬខុសច្បាប់នៅកន្លែងខ្លះ។
៩ មានទំនាក់ទំនងជាមួយអ្នកសង្គ្រោះបន្ទាន់ រក្សាបញ្ជីទំនាក់ទំនងសំខាន់ៗទុក រួមទាំងស្ថានទូត និងអាជ្ញាធរមូលដ្ឋាន ដើម្បីរកដំនោះស្រាយក្នុងស្ថានភាពដែលមិនរំពឹងទុកប្រកបដោយប្រសិទ្ធភាព។
១០ ចុះឈ្មោះជាមួយស្ថានទូតរបស់អ្នក ការចុះឈ្មោះការធ្វើដំណើរអាចជួយអ្នកក្នុងការធ្វើបច្ចុប្បន្នភាពលើការជូនដំណឹងសុវត្ថិភាព និងអនុញ្ញាតឱ្យស្ថានទូតរបស់អ្នកទាក់ទងអ្នកក្នុងអំឡុងពេលមានអាសន្ន ដូចជាភាពចលាចលនយោបាយ ឬគ្រោះមហន្តរាយធម្មជាតិជាដើម៕