រដ្ឋវ៉ាស៊ីនតោន ៖ ការធ្វើបច្ចុប្បន្នភាពចុងក្រោយរបស់ខាងសេតវិមានបានបញ្ជាក់ថា លោក Trump បានកំណត់យកពន្ធគយពីចិនជាមធ្យមក្នុងអត្រា 125% ទៅលើមុខទំនិញសម្ភារៈប្រើប្រាស់ទូទៅ។ ប៉ុន្តែចំពោះការនាំចូលទំនិញមួយចំនួនដែលមានសារធាតុ Fentanyl ដូចជា ឪសថ, គីមីសាស្ត្រ និងផលិតផលមួយចំនួនទៀត នឹងត្រូវកើនឡើងរហូតដល់ 145%។

តាមប្រភព CNBC បានឲ្យដឹងថា ៖ លោកប្រធានាធិបតី Donald Trump បានគិតលើដៃគូពាណិជ្ជកម្មកំពូលៗជាច្រើនរបស់អាមេរិក ប៉ុន្តែពន្ធដែលដាក់លើប្រទេសចិននឹងមិនមានការអនុគ្រោះឡើយ ពោលគឺនឹងកើនឡើងដល់ 145% លើការនាំចូលមួយចំនួន។

កាលពីថ្ងៃពុធ ទី9 ខែមេសា (ម៉ោងនៅសហរដ្ឋអាមេរិក) លោក Trump បានប្រកាសថា គម្រោងពន្ធបដិការរបស់លោកនឹងត្រូវបានដាក់ឲ្យផ្អាករយៈពេល 90 ថ្ងៃសិន បន្ទាប់ពីប្រទេសជាច្រើន បានចេញមុខមកសុំធ្វើកិច្ចព្រមព្រៀង និងចរចា ដោយទម្លាក់អត្រាពន្ធគយមកត្រឹម 10% ជាបណ្ដោះអាសន្នក្នុងពេលនេះ។

ការបន្ធូរបន្ថយ ឲ្យបណ្ដារប្រទេសជាច្រើនដែលរួមមានទាំងកម្ពុជាផងដែរ ប៉ុន្តែមិនបានអនុវត្តចំពោះ ប្រទេសចិននេះ គឺជាការទះកំផ្លៀងចិនដោយកំណត់យកពន្ធ 125% លើអ្វីដែលលោក Trump ហៅថា “ការខ្វះការគោរព” ពីទីក្រុងប៉េកាំង។ ក្រៅពីនោះ ក៏បន្ថែមអត្រាចំនួន 20% ទៀត ទៅលើ “ពន្ធ fentanyl” ដូចនេះវាមានន័យថាការនាំចូលមួយចំនួនរបស់ចិន នឹងត្រូវទទួលពន្ធសរុបចំនួន 145% ។

គួរំលឹកថា កាលពីពេលដែលអាមេរិកតម្លើងពន្ធដល់ 104% នៅថ្ងៃព្រហស្បតិ៍ ទី10 មេសា ប្រទេសចិនបានសងសឹកវិញដោយការដាក់អត្រាពន្ធនៅក្នុងប្រទេសខ្លួន លើទំនិញរបស់សហរដ្ឋអាមេរិក ដែលបានចូលជាធរមានក្នុងអត្រា 84%ផងដែរ៕

រាជធានីភ្នំពេញ ៖ ទោះស្ថិតនៅក្នុងស្ថានភាពតានតឹងផ្នែកពាណិជ្ជកម្មជាមួយសហរដ្ឋអាមេរិក ប៉ុន្តែប្រធានាធិបតីចិនលោក ស៊ី ជីនពីង នឹងឆ្លៀតអញ្ជើញមកធ្វើទស្សនៈកិច្ចនៅកម្ពុជា ដើម្បីបើកកិច្ចពិភាក្សាសំខាន់ៗមួយចំនួនជាមួយប្រមុខរាជរដ្ឋាភិបាលកម្ពុជាក្នុងពេលឆាប់ៗនេះ។

តបតាមការអញ្ជើញរបស់ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ឯកឧត្តម ស៊ី ជីនពីង ប្រធានាធិបតី នៃសាធារណរដ្ឋប្រជាមានិតចិន នឹងអញ្ជើញមកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា ពីថ្ងៃទី១៧ ដល់១៨ ខែមេសា ឆ្នាំ២០២៥។

ក្នុងដំណើរទស្សនកិច្ចនេះ លោកស៊ី ជីនពីង នឹងចូលគាល់ព្រះមហាក្សត្រ នៅក្នុងព្រះបរមរាជវាំង ព្រមទាំងនឹងជួបពិភាក្សាជាមួយសម្ដេចអគ្គមហាសេនាបតីតេជោ ហ៊ុន សែន និង សម្ដេចមហាបវរធិបតី ហ៊ុន ម៉ាណែត ស្ដីពីពង្រឹងពង្រីកទំនាក់ទំនងទ្វេភាគី និងផ្លាស់ប្ដូរយោបល់ អំពីបញ្ហាតំបន់ និងអន្តរជាតិ ដែលមានការចាប់អារម្មណ៍ដូចគ្នា។

ដំណើរទស្សនកិច្ចផ្លូចរដ្ឋនេះគឺជាព្រឹត្តិការណ៍ដ៏សំខាន់ ដែលនឹងធ្វើឲ្យកាន់តែរឹងមាំថែមទៀតនូវចំណងមិត្តភាពជាប្រពៃណីដែលត្រូវបានកសាឡើងដោយថ្នាក់ដឹកនាំជាបន្តបន្ទាប់ នៃប្រទេសទាំងពីរ។ ទស្សនកិច្ចនេះ ក៏នឹងបង្កើនសារៈសំខាន់បន្ថែមទៀតដល់ចំណងមិត្តភាពដែកថែប និងភាពជាដៃគូយុទ្ធសាស្រ្តគ្រប់ជ្រុងជ្រោយ រវាងប្រជាជាតិទាំងពីរ។

គួរជម្រាបថា នៅក្នុងឳកាសដ៏ពិសេសនេះ មានឯកសារជាច្រើនដែលត្រូវបានគេរំពឹងថានឹងទទួលបានការចុះហត្ថលេខាពីសំណាក់ឯកឧត្តមប្រធានាធិបតីចិនលោក ស៊ី ជីនពីង ដើម្បីលើកម្ពស់កិច្ចសហប្រតិបត្តិការក្នុងវិស័យនានានៅកម្ពុជា តាមរយៈដំណើរនៃទស្សនកិច្ចមួយនេះ៕

ភាពចម្រូងចម្រាសដែលកំពុងកើតមានជុំវិញ Kim Soo Hyun និង Kim Sae Ron បានឈានដល់រឿងថ្មីជាមួយនឹងការចេញផ្សាយការវិភាគផ្នែកភាសាដែលបង្កឱ្យមានការសង្ស័យយ៉ាងធ្ងន់ធ្ងរអំពីភាពត្រឹមត្រូវនៃសារ KakaoTalk ឆ្នាំ២០១៦ មួយចំនួនដែលភ្ជាប់ទៅនឹងតារាសម្តែងរូបនេះ។

នៅថ្ងៃទី៩ ខែមេសា ក្រុមស្រាវជ្រាវមកពីវិទ្យាស្ថាន Truebaum បានចែករំលែកលទ្ធផលនៃការវិភាគភាសាកោសល្យវិច្ច័យដែលធ្វើឡើងដោយប្រើវិធីសាស្រ្តមួយហៅថា «ការកំណត់អត្តសញ្ញាណអ្នកនិពន្ធ» ដែលជាបច្ចេកទេសភាសាខុសពីការវិភាគស្តង់ដារនៃសុពលភាពសេចក្តីថ្លែងការណ៍ ឬហៅកាត់ថា SVA ។ មិនដូច SVA ដែលវាស់ស្ទង់ភាពជឿជាក់នៃសេចក្តីថ្លែងការណ៍ វិធីសាស្រ្តនេះវាយតម្លៃតាមស្ថិតិថាតើសារផ្សេងៗគ្នាក្នុងរយៈពេលជាច្រើនឆ្នាំទំនងជាត្រូវបានសរសេរដោយមនុស្សដូចគ្នាឬអត់។

ការវិភាគដែលត្រូវបានចាត់តាំងដោយភាគីរបស់ Kim Soo Hyun បានប្រៀបធៀបសារពីឆ្នាំ ២០១៦, ២០១៨, និង ២០២៥។ គួរកត់សម្គាល់ថាសារឆ្នាំ ២០២៥ ត្រូវបានបញ្ជាក់ថាជារបស់ Kim Soo Hyun ដោយផ្អែកលើការសន្ទនាពិតរបស់ KakaoTalk ជាមួយអ្នកស្គាល់គ្នា។

ក្នុងការវិភាគភាសាកោសល្យវិច្ច័យការរកឃើញសំខាន់ៗពីការវិភាគនេះបានបង្ហាញឃើញថា សារពីឆ្នាំ ២០១៨ និង ២០២៥ បានបង្ហាញពីភាពខុសប្លែកគ្នាជាស្ថិតិ ដែលបង្ហាញពីប្រូបាប៊ីលីតេខ្ពស់ដែលពួកគេត្រូវបានសរសេរដោយមនុស្សដូចគ្នាក្នុងករណីនេះ Kim Soo Hyun ។ ទោះជាយ៉ាងណាក៏ដោយ សារឆ្នាំ២០១៦ ដែលពីមុនត្រូវបានផ្សព្វផ្សាយដោយឆាណែលយូធូប Garo Sero បានបង្ហាញពីភាពខុសគ្នានៃរចនាប័ទ្ម និងភាសា។

ប្រូបាប៊ីលីតេដែលសារឆ្នាំ ២០១៦ និង ២០២៥ ត្រូវបានសរសេរដោយមនុស្សដូចគ្នាមានត្រឹមតែ ៨% ជាមួយនឹងកម្រិតទំនុកចិត្ត ៩៥%។ ការប្រៀបធៀបរវាងសារ ២០១៦ និង ២០១៨ក៏បានបង្ហាញពីអត្រាស្រដៀងគ្នាទាបជាមួយនឹងទំនុកចិត្ត ៩២% ។ លទ្ធផលទាំងនេះបង្ហាញពីលទ្ធភាពខ្ពស់ដែលសារឆ្នាំ ២០១៦ មិនត្រូវបានសរសេរដោយ Kim Soo Hyun ដែលបង្កើនលទ្ធភាពដែលថាពួកគេអាចត្រូវបានប្រឌិត ឬរៀបចំ។

ម៉្យាងវិញទៀត ភាគីរបស់ Kim Soo Hyun ធ្លាប់បាននិយាយថា ពួកគេមិនទទួលស្គាល់សារឆ្នាំ ២០១៦ និងបានស្នើសុំការវិភាគជាផ្លូវការដើម្បីផ្ទៀងផ្ទាត់ភាពត្រឹមត្រូវរបស់ពួកគេ។ ទន្ទឹមនឹងនេះ ខណៈពេលដែលវិធីសាស្ត្រ «ការកំណត់អត្តសញ្ញាណអ្នកនិពន្ធ» ខាងលើមានលក្ខណៈថ្មីនៅក្នុងប្រទេសកូរ៉េខាងត្បូង វាត្រូវបានបង្កើតឡើងយ៉ាងល្អនៅក្នុងបរិបទសិក្សា និងផ្លូវច្បាប់នៅបរទេស ជាពិសេសក្នុងការស៊ើបអង្កេតឧក្រិដ្ឋកម្ម និងការផ្ទៀងផ្ទាត់ឯកសារ។ ជាលទ្ធផល ការយកចិត្តទុកដាក់កំពុងត្រូវបានយកចិត្តទុកដាក់ចំពោះផលប៉ះពាល់នៃលទ្ធផលនៃការវិភាគនេះទៅលើទិសដៅអនាគតនៃសំណុំរឿង Kim Soo Hyun ៕

ការដ្ឋានសាងសង់ផ្លូវក្រោមដីមួយកន្លែងក្នុងទីក្រុង Gwangmyeong ខេត្ត Gyeonggi បានបាក់ស្រុត បណ្តាលឱ្យកម្មករពីរនាក់បាត់បង់ជីវិត។

ហេតុការណ៍នេះ កើតឡើងនៅវេលាម៉ោង៣និង១៧នាទីរសៀល ថ្ងៃទី១១ ខែមេសា ឆ្នាំ២០២៥ បណ្តាលឱ្យមនុស្ស២នាក់បានស្លាប់ និង៣នាក់បានបាត់ខ្លួន ក្នុងចំណោមកម្មករ១៧នាក់។

មន្ត្រីកូរ៉េខាងត្បូង បាននឹងកំពុងជម្លៀសពលរដ្ឋរស់នៅតំបន់នោះទៅកាន់ទីទួលសុវត្ថិភាព ខណៈបំពង់ខ្យល់នៅកន្លែងនោះប្រឈមនឹងហានិភ័យផ្ទុះបន្ថែមទៀត ក្រោយពីរលំផ្លូវក្រោមដី។

ផ្លូវរូវក្រោមដីនេះ មានជម្រៅ៣០ម៉ែត្រ និងប្រវែងជិត៣០គីឡូម៉ែត្រ តភ្ជាប់ទីក្រុងសេអ៊ូលជាមួយទីក្រុងរណប Gwangmyeong, Ansan និង Siheung ។

បច្ចុប្បន្នមន្ត្រីកូរ៉េខាងត្បូង កំពុងរឹតបន្តឹងចរាចរណ៍ និងបើកការស៊ើបអង្កេតពីមូលហេតុនៃការបាក់រលំនេះ រួមជាមួយនឹងការត្រួតពិនិត្យសុវត្ថិភាពនៃផ្លូវរូងក្រោមដី និងតំបន់ក្បែរនោះផងដែរ៕

ប្រទេសចិន ៖ កាលពីថ្ងៃទី៤ ខែមេសា ឆ្នាំ២០២៥ ការិយាល័យរដ្ឋបាលគយទូទៅរបស់ចិនបានប្រកាសផ្អាកការនាំចូលសាច់សត្វស្លាប និងស្រូវមីយេពីក្រុមហ៊ុនអាមេរិកមួយចំនួន ព្រមទាំងផ្អាកការកំណត់លក្ខណៈសម្បត្តិក្រុមហ៊ុនអាមេរិកមួយចំនួនទៀតក្នុងការនាំចេញទំនិញមកប្រទេសចិន ។ ការិយាល័យរដ្ឋបាលគយបញ្ជាក់ថា មន្ត្រីគយចិនបានរកឃើញសាច់មាន់ និងសាច់សត្វស្លាបអាមេរិកផ្ទុកសារធាតុហាមឃាត់ដែលប៉ះពាល់សុខភាពអ្នកបរិភោគ ។

សារព័ត៌មានស៊ីនហួររាយការណ៍ថា នៅថ្ងៃទី៤ ខែមេសា កន្លងមក ចិនបានផ្អាកការកំណត់លក្ខណៈសម្បត្តិក្រុមហ៊ុនអាមេរិកឈ្មោះ C&D USA Inc. ក្នុងការនាំចេញស្រូវមីយេ មកប្រទេសចិន ព្រមទាំងផ្អាកការកំណត់លក្ខណៈសម្បត្តិក្រុមហ៊ុនអាមេរិក ចំនួន៣ ទៀត រួមមាន ៖ ក្រុមហ៊ុន American Proteins, Inc., ក្រុមហ៊ុន Mountaire Farms of Delaware, Inc. និងក្រុមហ៊ុន Darling Ingredients Inc. ក្នុងការនាំចេញសាច់សត្វស្លាប និងឆ្អឹងសត្វមកចិន ផងដែរ ។

សេចក្តីប្រកាសរបស់ការិយាល័យរដ្ឋបាលគយទូទៅបញ្ជាក់ថា ការសម្រេចចិត្តនេះកើតឡើងក្រោយមន្ត្រីគយចិនពិនិត្យឃើញសារធាតុ Zeeralenone និងផ្សិតក្នុងស្រូវមីយេក្នុងបរិមាណខ្ពស់ ដែលក្រុមហ៊ុនអាមេរិកបាននាំចូលមកចិន ។ ក្រៅពីនេះ មន្ត្រីគយចិនក៏បានរកឃើញសារធាតុ Salmonella ក្នុងសាច់សត្វស្លាប និងឆ្អឹងសត្វនាំចូលពីអាមេរិកផងដែរ ទើបចិនផ្អាកការនាំចូលដើម្បីការពារសុខភាពពលរដ្ឋ និងសុវត្ថិភាពការចិញ្ចឹមសត្វនៅចិន ។

ការិយាល័យរដ្ឋបាលគយទូទៅ ក៏បានចេញសេចក្តីប្រកាស១ច្បាប់ទៀត ដោយផ្អាកការនាំចូលសាច់សត្វស្លាបពីក្រុមហ៊ុនអាមេរិក ចំនួន២ រួមមាន ៖ ក្រុមហ៊ុន Mountaire Farms of Delaware, Inc. និងក្រុមហ៊ុន Coastal Processing, LLC ។ ការិយាល័យរដ្ឋបាលគយបញ្ជាក់ថា ចិនសម្រេចចិត្តផ្អាកភ្លាមៗដោយសារមន្ត្រីគយចិនរកឃើញសាច់សត្វស្លាបអាមេរិកផ្ទុកសារធាតុហាមឃាត់ Furacillin ជាច្រើនលើក ហើយការហាមឃាត់នេះ គឺកុំឱ្យប៉ះពាល់សុខភាពអ្នកបរិភោគ ។

បើតាមមន្ត្រីការិយាល័យរដ្ឋបាលគយទូទៅ គឺវានឹងជួយការពារផលប៉ះពាល់សុខភាពដោយសារចំណីអាហារនាំចូលពីអាមេរិក ហើយការផ្អាកនេះស្របតាមបទប្បញ្ញត្តិពាក់ព័ន្ធរបស់ចិន និងស្តង់ដារអន្តរជាតិ ។

គួរបញ្ជាក់ថា ការផ្អាកនាំចូលសាច់សត្វស្លាប និងស្រូវមីយេពីអាមេរិក ក្រោមហេតុផលផ្ទុកសារធាតុហាមឃាត់កាលពីថ្ងៃទី៤ ខែមេសានេះ គឺក្រោយពីប្រធានាធិបតីអាមេរិក លោក Donald Trump ទើបតែដំឡើងពន្ធទំនិញចិន និងទំនិញប្រទេសផ្សេងៗលើពិភពលោក ៕

គិតមកត្រឹមថ្ងៃព្រហស្បត្តិ៍ ទី១០ ខែមេសានេះ ប្រធានាធិបតីអាមេរិកលោក Donald Trump បានធ្វើការសម្រេចចិត្តចុងក្រោយមួយ គឺជាការផ្អាកជាបណ្ដោះអាសន្ននូវពន្ធគយដែលបានបន្ថែមថ្មីទៅលើប្រទេសចំនួន ៦០ ដែលរួមមានទាំងកម្ពុជា ឲ្យស្ថិតក្នុងកម្រិតពន្ធ ១០% ក្នុងរយៈពេល៩០ថ្ងៃសិនដើម្បីរៀបចំការចរចា។

ដោយឡែក ការផ្អាក និងបន្ធូបន្ថយជាបណ្ដោះអាសន្នខាងលើ មិនត្រូវបានអនុវត្តចំពោះប្រទេសចិនឡើយ ផ្ទុយទៅវិញអាមេរិកបែរជាតម្លើងពន្ធកាន់តែខ្ពស់ទៅអោយចិន ដែលនេះសបញ្ជាក់ឲ្យឃើញថា សហរដ្ឋអាមេរិកកំពុងតែព្យាយាមគាបសង្កត់ចិនកាន់តែខ្លាំងឡើង ដើម្បីចិនព្រមដកថយជាមួយខ្លួន។

តើចិនមានអ្វីជាសំអាងទើបបានជាហ៊ានកំដរអាមេរិកធ្វើសង្រ្គាមពាណិជ្ជកម្មរវាងប្រទេសទាំង២ដូចនេះ?

ជាការពិតណាស់ ថ្វីត្បិតថាសហរដ្ឋអាមេរិកជាមហាអំណាចមានទីផ្សារធំទូលាយដែលប្រទេសនានានៅលើពិភពលោកចង់ធ្វើពាណិជ្ជកម្មជាមួយមែន ប៉ុន្តែចិនក៏ជាប្រទេសដែលមានផលិតកម្មដ៏ធំមួយផងដែរនៅលើពិភពលោក។ ជាក់ស្ដែង ក្រុមហ៊ុនរបស់អាមេរិកជាច្រើន បានពឹងផ្អែកយ៉ាងមុតមាំលើការផលិតរបស់រោងចក្រចិន ដើម្បីយកឧបករណ៍ទាំងនោះមកតម្លើងបន្ថែមនៅក្នុងប្រទេសអាមេរិកដូចជា៖ គ្រឿងអេឡិចត្រូនិច, គ្រឿងសិង្ហារឹម, យានជំនិះ, ប្រដាប់ប្រដាក្មេងលេង និង ឧបករណ៍ប្រើប្រាស់ជ័រផ្សេងៗទៀតជាច្រើន ដែលសុទ្ធសឹងតែជាឧបករណ៍ប្រើប្រាស់ចាំបាច់ក្នុងជីវិតប្រចាំថ្ងៃ។

ក្រុមហ៊ុនធំៗរបស់អាមេរិកដែលពឹងផ្អែកលើចង្វាក់ផលិតកម្មពីចិនរួមមាន៖ Apple, Tesla, Microsoft, Dell, Nike, Costco និងក្រុមហ៊ុនច្រើនទៀត ដូចនេះប្រសិនបើអាមេរិកចង់ដាក់សម្ពាធដល់ចិន នោះប្រជាជនអាមេរិកនឹងប្រឈមមុខនឹងការចំណាយខ្ពស់ដោយសារទំនិញត្រូវឡើងថ្លៃផងដែរ។

ក្នុងន័យនេះ មិនមែនចិនមិនគិតពីការខាតបង់ និងលំឳនភាពនៃសេដ្ឋកិច្ចនៅពេលអាមេរិកតម្លើងពន្ធដូចនេះទេ ប៉ុន្តែគេមានការគិតគូរយ៉ាងហ្មត់ចត់ ដើម្បីធ្វើការប្រឆាំងបក និងធ្វើឲ្យសេដ្ឋកិច្ចអាមេរិករងផលប៉ះពាល់ដូចគ្នា។

គួររំលឹកថា គិតមកត្រឹមថ្ងៃទី១០ ខែមេសានេះ សហរដ្ឋអាមេរិកបានធ្វើការតម្លើងពន្ធលើចិនចំនួន៤លើកមកហើយ ដោយលើកទីមួយចំនួន ២៥% លើកទី២ ៣៤% លើកទី៣ ១០៤% និងចុងក្រោយបង្អស់នេះពន្ធគយរបស់ចិនបានកើនឡើងរហូតដល់ ១២៥% ៕