ប្រទេសសិង្ហបុរី ៖ ភ្នាក់ងារវាយតម្លៃអាកាសចរណ៍ (Skytrax) បានចាត់ចំណាត់ថ្នាក់អាកាសយានដ្ឋាន Changi នៅប្រទេសសិង្ហបុរី គឺជាអាកាសយានដ្ឋានល្អបំផុតលើពិភពលោក នៅឆ្នាំ២០២៥ និងឈ្នះអាកាសយានដ្ឋាន Doha នៅប្រទេស Qatar ដែលបានជាប់ចំណាត់ថ្នាក់ទី១ កាលពីឆ្នាំ២០២៤ ។ រីឯអាកាសយានដ្ឋាននៅប្រទេសថៃ ជាប់ចំណាត់ថ្នាក់ទី៣៩ នៅឆ្នាំនេះ ឡើងពីចំណាត់ថ្នាក់ទី៦១ នៅឆ្នាំ២០២៤ ។

អាកាសយានដ្ឋាន Changi របស់សិង្ហបុរី បានជាប់ចំណាត់ថ្នាក់១ ជាអាកាសយានដ្ឋានល្ពបំផុតលើពិភពលោក លើកទី១៣ ពីភ្នាក់ងារវាយតម្លៃអាកាសចរណ៍ (Skytrax) ។ ក្រៅពីនេះ Skytrax បានចាត់ទុកអាកាសយានដ្ឋាន Changi គឺជាឋានសួគ៌ម្ហូបអាហារ ព្រមទាំងឈ្នះពានរង្វាន់ «អាកាសយានដ្ឋានមានអាហារឆ្ងាញ់បំផុតលើពិភពលោក», «អាកាសយានដ្ឋានមានបន្ទប់ទឹកស្អាតបំផុតលើពិភពលោក» និង «អាកាសយានដ្ឋានល្អបំផុតនៅអាស៊ី» ពីការប្រកួត World Airport Awards ដែលរៀបចំនៅទីក្រុង Madrid ប្រទេសអេស្ប៉ាញ កាលពីថ្ងៃទី៩ ខែមេសា ឆ្នាំ២០២៥ ។

តាមលទ្ធផលការស្ទង់មតិអ្នកដំណើរក្នុងអាកាសយានដ្ឋាន ចំនួន៥៦៥កន្លែង នៅទូទាំងពិភពលោក របស់ Skytrax បង្ហាញថា អាកាសយានដ្ឋានល្អបំផុតជាប់ចំណាត់ថ្នាក់ទី២ បានទៅអាកាសយានដ្ឋាន Hamad នៅប្រទេស Qatar ដោយសារអាកាសយានដ្ឋាននេះតុបតែងលម្អដោយរូបភាពសិល្បៈ និងស្ថាបត្យកម្មដ៏អស្ចារ្យនៅប្រទេស Qatar ។ ក្រៅពីនេះ អាកាសយានដ្ឋាន Hamad ទទួលបានពានរង្វាន់ «អាកាសយានដ្ឋានមានកន្លែងទិញទំនិញល្អបំផុត» និង «អាកាសយានដ្ឋានល្អបំផុតនៅមជ្ឈិមបូព៌ា» ។

អាកាសយានដ្ឋានជាច្រើននៅតំបន់អាស៊ី ក៏បានជាប់ចំណាត់ថ្នាក់ដែរ ដែលបង្ហាញឱ្យឃើញថា តំបន់នេះនៅតែនាំមុខអាមេរិកខាងជើង និងអឺរ៉ុប ទាក់ទងនឹងគុណភាពអាកាសយានដ្ឋាន ។ រីឯចំណាត់ថ្នាក់ទី៣ បានទៅអាកាសយានដ្ឋាន Tokyo Haneda របស់ជប៉ុន ហើយអាកាសយានដ្ឋាននេះទទួលបានពានរង្វាន់ «អាកាសយានដ្ឋានមានអនាម័យបំផុតលើពិភពលោក» ។ អាកាសយានដ្ឋាន Incheon នៅទីក្រុងសេអ៊ូល ប្រទេសកូរ៉េខាងត្បូង បានជាប់ចំណាត់ថ្នាក់ទី៤ និងទទួលបានពានរង្វាន់ «ភ្នាក់ងារក្នុងអាកាសយានដ្ឋានធ្វើការល្អបំផុត» ។

ចំណែកអាកាសយានដ្ឋាននៅអឺរ៉ុបដែលបានជាប់ចំណាត់ថ្នាក់ក្នុងបញ្ជីអាកាសយានដ្ឋានចំនួន២០ រួមមាន ៖ អាកាសយានដ្ឋាន Paris Charles de Gaulle ជាប់ចំណាត់ថ្នាក់ទី៧ និងទទួលបានពានរង្វាន់ «អាកាសយានដ្ឋានល្អបំផុតនៅអឺរ៉ុប» អស់រយៈពេល៣ឆ្នាំជាប់ៗគ្នា ខណៈអាកាសយានដ្ឋាន Rome Fiumicino ជាប់ចំណាត់ថ្នាក់ទី៨ ។

នេះជាចំណាត់ថ្នាក់អាកាសយានដ្ឋានល្អបំផុតលើពិភពលោក នៅឆ្នាំ២០២៥ ចំនួន២០ ៖
1. Singapore Changi Airport
2. Hamad International Airport
3. Tokyo Haneda Airport
4. Incheon International Airport
5. Narita International Airport

6. Hong Kong International Airport
7. Paris Charles de Gaulle Airport
8. Rome Fiumicino Airport
9. Munich Airport
10. Zurich Airport

11. Dubai International Airport
12. Helsinki-Vantaa Airport
13. Vancouver International Airport
14. Istanbul Airport
15. Vienna International Airport

16. Melbourne Airport
17. Chubu Centrair International Airport
18. Copenhagen Airport
19. Amsterdam Schiphol Airport និង
20. Bahrain International Airport ៕

ប្រទេសចិន ៖ កាលពីថ្ងៃទី១០ ខែមេសា ឆ្នាំ២០២៥ សារព័ត៌មានបរទេសរាយការណ៍ថា ប្រទេសចិនបានដាស់តឿនពលរដ្ឋ និងនិស្សិតរបស់ខ្លួនឱ្យប្រុងប្រយ័ត្នសុវត្ថិភាពក្នុងការធ្វើដំណើរទៅអាមេរិក ក្រោយពីទំនាក់ទំនងរវាងប្រទេសទាំងពីរធ្លាក់ចុះយ៉ាងខ្លាំង ដោយសារការដំឡើងពន្ធទំនិញទៅវិញទៅមកក្នុងរយៈពេលដ៏ខ្លី ។ ក្រៅពីនេះ ពលរដ្ឋចិនអាចគ្មានសុវត្ថិភាព ពីព្រោះនៅអាមេរិកមានបញ្ហាអសន្តិសុខកើតឡើង ។

ក្រសួងវប្បធម៌ និងទេសចរណ៍ចិនបានចេញសេចក្តីថ្លែងការណ៍ដាស់តឿនពលរដ្ឋចិនដែលធ្វើដំណើរទៅអាមេរិក សូមប្រុងប្រយ័ត្នក្នុងការធ្វើដំណើរ ដោយសារទំនាក់ទំនងផ្នែកសេដ្ឋកិច្ច និងពាណិជ្ជកម្មរវាងចិន និងអាមេរិកបានធ្លាក់ចុះយ៉ាងខ្លាំង ព្រមទាំងស្ថានការណ៍អសន្តិសុខនៅអាមេរិកផងដែរ ។

ការដាស់តឿនរបស់ក្រសួងវប្បធម៌ និងទេសចរណ៍ចិន គឺមិនយូរប៉ុន្មានក្រោយពីចិនប្រកាសវិធានការសងសឹក ដោយដំឡើងពន្ធទំនិញអាមេរិកគ្រប់ប្រភេទបន្ថែមទៀត ៥០% ដែលធ្វើឱ្យពន្ធសរុបកើនឡើងដល់៨៤% កាលពីថ្ងៃទី៩ ខែមេសា ។ វិធានការសងសឹកនេះបានគំរាមកំហែងដល់ទំនាក់ទំនងសេដ្ឋកិច្ចរវាងប្រទេសមហាអំណាចសេដ្ឋកិច្ចទាំង២ ដែលកំពុងធ្លាក់ចុះខ្លាំងបំផុតក្នុងរយៈពេលជាច្រើនឆ្នាំ ។

ចំណែកក្រសួងអប់រំចិន ក៏បានចេញសេចក្តីថ្លែងការណ៍១ច្បាប់ទៀតដាស់តឿននិស្សិតឱ្យប្រុងប្រយ័ត្នការធ្វើដំណើរទៅអាមេរិកដែរ ដោយអះអាងថា ខ្លឹមសារសេចក្តីព្រាងច្បាប់អាមេរិកដែលទើបអនុម័តក្នុងសភានៅរដ្ឋអូហៃហូ កាលពីខែមីនា ឆ្នាំ២០២៥ មានទស្សនៈអវិជ្ជមានចំពោះចិន និងរឹតបន្តឹងការផ្លាស់ប្តូរវិស័យអប់រំ ក៏ដូចជាកិច្ចសហការរវាងសាកលវិទ្យាល័យចិន និងអាមេរិក ។ ហេតុនេះ សូមនិស្សិតចិនទាំងអស់នៅអាមេរិក វាយតម្លៃហានិភ័យពេលជ្រើសរើសរៀនក្នុងសាលាមានទីតាំងនៅរដ្ឋដែលមានទស្សនៈអវិជ្ជមាន ។

ការដាស់តឿនពលរដ្ឋ និងនិស្សិតរបស់ចិនបានធ្វើឱ្យប៉ះពាល់ដល់ការព្យាយាមរបស់ក្រុមការងារអតីតប្រធានាធិបតីអាមេរិក លោក Joe Biden និងប្រធានាធិបតីចិន លោក ស៊ី ជិនពីង ដែលបានបង្កើនការផ្លាស់ប្តូរវិស័យអប់រំកាលពីឆ្នាំ២០២៣ ខណៈរយៈពេលប៉ុន្មានឆ្នាំនេះ សភាអាមេរិកបានព្យាយាមកម្ចាត់ឥទ្ធិពលចិនក្នុងវិស័យអប់រំ ។

គណៈកម្មការសភាអាមេរិកបានផ្ញើលិខិតទៅសាកលវិទ្យាអាមេរិក ចំនួន៦ រួមទាំងសាកលវិទ្យាល័យ Stanford និង Carnegie Mellon ដោយអំពាវនាវឱ្យសាកលវិទ្យាល័យបង្ហាញគោលនយោបាយពាក់ព័ន្ធនឹងនិស្សិតចិន ដូចជា ៖ ឈ្មោះនិស្សិតចិន, រៀននៅសាកលវិទ្យាល័យណា, ឈ្មោះសាលារៀនចាស់, ប្រាក់បង់ថ្លៃសាលានៅអាមេរិកបានមកពីណា ព្រមទាំងប្រភេទការស្រាវជ្រាវ និងគម្រោងរបស់សាកលវិទ្យាល័យអាមេរិក ដែលអនុញ្ញាតឱ្យនិស្សិតចិនចូលរួម ។

គួរបញ្ជាក់ថា តាំងពីឆ្នាំ២០០៩ និស្សិតចិនបានទៅសិក្សានៅអាមេរិកច្រើនបំផុត និងធ្លាក់ចុះចាប់ពីឆ្នាំ២០១៩ ដល់ឆ្នាំ២០២០ ដោយសារជំងឺកូវីដ-១៩ ឆ្លងរាតត្បាត ។ ចាប់ពីឆ្នាំ២០២៣ ដល់ឆ្នាំ២០២៤ មាននិស្សិតចិនសិក្សានៅអាមេរិក ចំនួន២៧៧,៣៩៨នាក់ ៕

ប្រទេសចិន ៖ ចិនបានប្រកាសវិធានការរឹតបន្តឹងការនាំចូលភាពយន្តហូលីវូដអាមេរិក ដើម្បីឆ្លើយតបនឹងការដាក់ពន្ធទំនិញចិនខ្ពស់របស់ប្រធានាធិបតីអាមេរិក លោក Donald Trump ហើយចិនសង្ឃឹមថា ការរឹតបន្តឹងនេះនឹងប៉ះពាល់ដល់ការពេញនិយមភាពយន្តហូលីវូដរបស់អាមេរិក ស្របពេលការទស្សនាភាពយន្តហូលីវូដនៅចិនបានធ្លាក់ចុះអស់ជាច្រើនឆ្នាំ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី១០ ខែមេសា ឆ្នាំ២០២៥ ។

បើតាមការិយាល័យភាពយន្តជាតិប្រទេសចិន គឺចិននឹងអនុវត្តតាមច្បាប់ទីផ្សារ និងគោរពការសម្រេចចិត្តរបស់អ្នកទស្សនាភាពយន្ត ។ ចិននឹងកាត់បន្ថយចំនួនភាពយន្តអាមេរិក ដើម្បីឱ្យនាំចូលចិនក្នុងបរិមាណសមល្មម ក្រោយពីការទិញភាពយន្តហូលីវូដនៅចិនចាប់ផ្តើមធ្លាក់ចុះ ។

រយៈពេលជាង៣០ឆ្នាំកន្លងមក ចិនបាននាំចូលភាពយន្តហូលីវូដ ចំនួន១០រឿងក្នុង១ឆ្នាំ ហើយភាពយន្តដែលទទួលបានការពេញនិយមបំផុតនៅចិន រួមមាន ៖ រឿង Titanic និងភាពយន្ត Avatar ។ ភាពយន្តទាំងនេះបានកសាងកេរ្តិ៍ឈ្មោះដល់តារាសម្តែង និងអ្នកដឹកនាំរឿងហូលីវីដយ៉ាងច្រើន ។

ប៉ុន្មានឆ្នាំចុងក្រោយនេះ ពលរដ្ឋចិនចាប់ផ្តើមចាប់អារម្មណ៍ទស្សនាភាពយន្តចិនច្រើនជាងមុន ហើយកាលពីឆ្នាំ២០២០ ភាពយន្តចិនអាចរកចំណូលបានរហូតដល់៨០% នៃប្រាក់ចំណូលភាពយន្តសរុប ។ ចំណូលភាពយន្តចិនបច្ចុប្បន្ន បានកើនឡើងលើសចំណូលភាពយន្តចិនកាលពីមុន ដែលស្មើត្រឹមតែ៦០% ។

ភាពយន្តចិនបានរកចំណូលច្រើនបំផុតគ្រប់រដូវកាល ហើយមានភាពយន្តបរទេសតែ១រឿងប៉ុណ្ណោះ ដែលជាប់ក្នុងចំណាត់ថ្នាក់ភាពយន្តពេញនិយម ចំនួន២០ គឺរឿង «Avengers: Endgame» រកចំណូលបានជាង៥៧៩លានដុល្លារ ។ រីឯភាពយន្តផ្សេងៗក្នុងចំណាត់ថ្នាក់ចំនួន២០ គឺសុទ្ធតែភាពយន្តចិន ។

ការរឹតបន្តឹងភាពយន្តអាមេរិក គឺជាវិធីសងសឹកមានប្រសិទ្ធភាពរបស់ចិន ជាពិសេស ភាពយន្តហូលីវូដទទួលបានចំណូលត្រឹមតែ៥% ប៉ុណ្ណោះនៅចិន ហើយត្រូវបង់ពន្ធរហូតដល់៥០% មុនពេលបញ្ជូនចំណូលត្រឡប់ទៅអាមេរិក ។ ភាពយន្តហូលីវូដភាគច្រើននៅចិន បានទទួលចំណូលតែ២៥% ខណៈចំណូលហូលីវូដនៅប្រទេសផ្សេងៗ ស្មើរហូតដល់៥០% ។ នេះបើតាមលោក Chris Fenton អ្នកនិពន្ធសៀវភៅ «Feeding the Dragon» ។

ចិន គឺជាទីផ្សារភាពយន្តដ៏ធំលំដាប់ទី២ លើពិភពលោក បើទោះជាការនិយមភាពយន្តហូលីវូដបានធ្លាក់ចុះរយៈពេលប៉ុន្មានឆ្នាំចុងក្រោយក្តី ។ បច្ចុប្បន្ន នៅប្រទេសចិន ភាពយន្តចិនទទួលបានការចាប់អារម្មណ៍ខ្លាំងជាងភាពយន្តបរទេស ៕

សិង្ហបុរី ៖ សត្វកន្លាតយន្ត ឬ cyborg Cockroach ចំនួន10ក្បាល មកពីប្រទេសសិង្ហបុរី ត្រូវបាននាំយកមកដាក់ពង្រាយដើម្បីជួយដល់កិច្ចខិតខំប្រឹងប្រែងជួយសង្គ្រោះ ក្នុងការស្វែងរកមនុស្សដែលជាប់ក្រោមគំនរអគារក្នុងប្រទេសមីយ៉ាន់ម៉ា ដែលរងគ្រោះដោយរញ្ជួយដីកម្រិត ៧.៧រិកទ័រ កាលពីថ្មីៗនេះ។

នៅក្នុងការចុះផ្សាយរបស់ South China Morning Post បង្ហាញថា ៖ របកគំហើញនេះ ត្រូវបានធ្វើឡើងដោយក្រុម Home Team Science and Technology Agency (HTX) នៃសកលវិទ្យាល័យ Nanyang Technological University និង Klass Engineering ។ សត្វកន្លាតដែលគេយកមកប្រើប្រាស់នេះ គឺជាពូជសត្វកន្លាត Madagacar Hissing Cockroach ដែលមានទំហំខ្លួនធំៗជាងសត្វកន្លាតទូទៅ ហើយត្រូវបានគេយកមកបំពាក់ឧបករណ៍Sensor នៅលើខ្លួនរបស់ពួកវាដើម្បីដាក់ចូលតាមក្រោមអគារឲ្យចាប់សញ្ញានៃមនុស្សដែលជាប់នៅខាងក្រោមផ្ទាំងថ្ម។

ប្រតិបត្តិការនេះសហការជាមួយក្រុម Operation Lionheart របស់ប្រទេសសិង្ហបុរី និងសត្វឆ្កែស្វែងហិតក្លិនផងដែរ។ សត្វកន្លាតcyborgs បានចូលទៅកាន់តំបន់ដែលចង្អៀត និងពិបាកទៅដល់ រួមទាំងមន្ទីរពេទ្យដែលដួលរលំផងដែរ។ នេះជាលើកដំបូង ដែលសត្វល្អិកូនកាត់គ្រឿងយន្តបែបនេះត្រូវបានគេប្រើប្រាស់ក្នុងប្រតិបត្តិការសង្រ្គោះមនុស្សក្នុងគ្រោះមហន្តរាយពិភពលោក។

ពួកវាត្រូវបានអ្នកជំនាញគ្រប់គ្រងពីចម្ងាយតាមរយៈប្រព័ន្ធអេឡិចត្រូនិច និងដឹកនាំដោយ AI ។ សត្វល្អិតតូចៗដែលមានការកែច្នៃ ដោយបំពាក់នូវបច្ចេកវិទ្យាទាំងនេះ បានផ្តល់ទិន្នន័យជាក់ស្តែងនៃមនុស្សពីក្រោមគំនរថ្មមកខាងលើដើម្បីអាចឲ្យក្រុមសង្រ្គោះដឹងពីទីតាំងដែលត្រូវជីកកកាយច្បាស់លាស់។

វាបានចូលរួមជាផ្នែកសំខាន់មួយផងដែរក្នុងការរុករក និងជួយសង្រ្គោះនេះ ប៉ុន្តែទោះជាយ៉ាងណា ការដាក់ពង្រាយពួកវាប្រើប្រាស់ក្នុងគោលបំណងស្វែងរកមនុស្សត្រង់កន្លែងចង្អៀតៗបែបនេះអាចនឹងមានការប៉ះពាល់ដល់ក្រមសីលធម៌ជាមនុស្ស ព្រោះយ៉ាងហោចណាស់វាក៏ជាសត្វមានជីវិត ដូច្នេះមានមនុស្សមួយចំនួនមានការព្រួយបារម្ភពីអាយុជីវិតរបស់ពួកវា។

ជាថ្មីម្ដងទៀត សត្វកន្លាត Cyborg នេះ ក៏កំពុងស្ថិតនៅក្នុងដំណាក់ការពិសោធន៍បន្ថែមនៅឡើយ ប៉ុន្តែវាបានបង្ហាញនូវសក្ដនុពលនៃបេសកកម្មសង្រ្គោះមនុស្សក្នុងលក្ខខណ្ឌផ្សេងៗនៅពេលខាងមុខ៕

ពិតជាមិនធម្មតា! អ្នកវិទ្យសាស្រ្តបានអះអាងថា សត្វចចករោមសដែលដែលបានផុតពូជកាលពីជាង ១ម៉ឺនឆ្នាំមុន អាចនឹងមានវត្តមានសារជាថ្មីម្ដងទៀតនៅលើភពផែនដីក្នុងពេលឆាប់ៗ ក្រោយក្នុងមន្ទីរពិសោធន៍របស់ពួកគេបានបង្កើតសត្វចចកមួយប្រភេទឡើងមកដោយយកគម្រូរDNA របស់សត្វផុតពូជនោះបានមកបង្កាត់បានសម្រេច។

សត្វចចករោមស ឈ្មោះ Dire Wolf គឺជាពូជចចកដែលរស់នៅតំបន់ត្រជាក់ខ្លាំង និងរស់នៅតាំងពីសម័យ Pleistocene។ ដោយកត្តា អាកាសធាតុប្រែប្រួល, សត្វធំៗចាប់ធ្វើជាចំណី, ការវា..យប្រហារគ្នាទៅមកជាមួយក្រុមសត្វផ្សេង, មនុស្សធ្វើការបរបាញ់ និង ការហ្ស៊ែនរបស់វាថយចុះ ព្រោះការបន្ដពូជជាមួយសត្វចចកពូជផ្សេង សត្វចចកប្រភេទនេះត្រូវបានផុតពូជ កាលពីចន្លោះ ៩,០០០ ទៅ ១២,៥០០ឆ្នាំមុន។

យោងតាមប្រភព BBC បានឲ្យដឹងថា៖ កាលពីចុងឆ្នាំ២០២៤ អ្នកវិទ្យសាស្រ្តនៅមន្ទីរពិសោធន៍ Colossal Biosciences បានប្រកាសពីជោគជ័យ ដែលគេបានបង្កើតបានកូនចចកចំនួន២ក្បាល ដោយប្រើប្រាស់បច្ចេកទេសកាត់ និងតហ្ស៊ែន (CRISPR) ជាមួយនឹង DNA នៃពូជចចកស Dire Wolf។ បច្ចុប្បន្នពួកវាទាំង២មានអាយុជាង ៦ខែ និងមានសុខភាពល្អធម្មតា។

យ៉ាងណាមិញ កូនចចកថ្មីទាំង២នេះ មិនមែនជាពូជចចក Dire Wolf សុទ្ធនោះទេ ប៉ុន្តែវាទទួលបានរូបរាង លក្ខណៈ និងឥរិយាបថស្រដៀងនឹង Dire Wolf ស្ទើរទាំងស្រុង។ ពួកវាមានហ្សែនមួយចំនួនដែល គេសំយោគពី dire wolf ប៉ុន្តែមិនមែនជាកូនកំណើតផ្ទាល់នៃ dire wolf ពិតៗទេ ព្រោះពួកវាត្រូវបានគេផ្ស៊ាំនឹងចាក់បញ្ចូលទៅនឹងពូជចចកធម្មតា (Gray Wolf)។

ការបង្កាត់ពូជសត្វបានជោគជ័យដែលស្រដៀងគ្នាមួយទៀត គឺបានធ្វើទៅលើសត្វកណ្ដុរ ដែលត្រូវបានអ្នកវិទ្យាសាស្រ្តប្រើប្រាស់បច្ចេកទេស CRISPR Method ធ្វើការសំយោគលើហ្ស៊ែនរបស់សត្វដំរីរោមវែង Mammoth ហើយបានបង្កើតជាសត្វកណ្ដុរប្រភេទថ្មី ដែលមានរោមវែង និងត្រូវបានគេហៅថា Woolly Mice។

ថ្វីត្បិតថាគេនៅមិនទាន់អាចទាញយកពូជសត្វដើមឲ្យមានមានជីវិតវិញបាន១០០%ក្ដី ប៉ុន្តែនេះគឺជាឧទាហរណ៍ដ៏សំខាន់ក្នុងការបង្ហាញពីអនាគតនៃលទ្ធភាពរបស់បច្ចេកវិទ្យាក្នុងការទាញយកសត្វដែលផុតពូជទាំងឡាយ តាមរយៈការកាត់តហ្ស៊ែន រឺ DNA ដែលយកមកពីផូស៊ីលដែលគេបានរកឃើញ៕

ប្រទេសថៃ ៖ សារព័ត៌មានថៃរាយការណ៍ថា ភ្ញៀវទេសចរពុំហ៊ានលេងទឹកសមុទ្របាងសែន នៅខេត្តឈុនបុរី ប្រទេសថៃ និងបានប្តូរគម្រោងទៅលេងទីក្រុងផាត់តាយ៉ា ក្រោយពីទឹកសមុទ្រប្រែជាពណ៌បៃតងចាស់ ស្រដៀងតែបៃតង ថែមទាំងមានក្លិនស្អុយឆ្អាប ខណៈអាជីវករលក់ដូរចំណីអាហារនៅឆ្នេរសមុទ្របាងសែន បារម្ភពីចំនួនភ្ញៀវទេសចរធ្លាក់ចុះពេលចូលឆ្នាំថ្មី ។ បន្ទាប់ពីទទួលដំណឹងនេះ មន្ត្រីធនធានសមុទ្រក៏បានយកទឹកសមុទ្រនទៅពិនិត្យរកមូលហេតុ និងជឿថា មិនលើស១សប្តាហ៍ទេ ទឹកសមុទ្រនឹងមានពណ៌ធម្មតាវិញ ។

កាលពីថ្ងៃទី១០ ខែមេសា ឆ្នាំ២០២៥ ក្រុមសារព័ត៌មានថៃបានធ្វើដំណើរទៅពិនិត្យនៅឆ្នេរសមុទ្របាងសែន ខេត្តឈុនបុរី ក្រោយពីភ្ញៀវទេសចរដែលមកកម្សាន្តឆ្នេរសមុទ្រ ជូនដំណឹងមកថា ទឹកសមុទ្របាងសែន បានប្រែជាពណ៌បៃតងចាស់ម្តងទៀត ស្រដៀងតៃបតង រហូតធ្វើឱ្យបរិយាកាសនៅឆ្នេរសមុទ្រស្ងប់ស្ងាត់យ៉ាងខ្លាំង ។ កន្លងមក នៅពេលជិតចូលឆ្នាំ មានភ្ញៀវទេសចរជាច្រើននាំកូនចៅមកកម្សាន្តនៅសមុទ្របាងសែន ពីព្រោះជាពេលដែលកូនៗពួកគេសម្រាកពីការសិក្សាយូរថ្ងៃ ។

ក្រោយការពិនិត្យទឹកសមុទ្រឃើញថា បរិយាកាសនៅឆ្នេរសមុទ្រមានសភាពស្ងប់ស្ងាត់យ៉ាងខ្លាំង រីឯភ្ញៀវទេសចរមកកម្សាន្តនៅសមុទ្របាងសែន ពុំហ៊ានចុះលេងទឹកសមុទ្រ ដោយសារបារម្ភពីផលប៉ះពាល់សុខភាព និងស្បែក ។ រីឯអាជីវករលក់ដូរចំណីអាហារនៅឆ្នេរសមុទ្រ និយាយដូចៗគ្នាថា វានឹងប៉ះពាល់ដល់វិស័យទេសចរណ៍ពេលចូលឆ្នាំថ្មី បើទោះជាទឹកសមុទ្រប្រែពណ៌ គឺជាបាតុភូតធម្មជាតិក្តី ។

លោក យ៉ករីទ្ធខាចន អ៊ុនចៃ មន្ត្រីជំនាញមកពីនាយកដ្ឋានធនធានសមុទ្រ និងឈូងសមុទ្រថៃ បានយកទឹកសមុទ្របាងសែន ទៅត្រួតពិនិត្យ ក្រោយពីទទួលដំណឹងថា ទឹកសមុទ្រប្រែជាពណ៌បៃតងចាស់ ដោយសារបាតុភូតធម្មជាតិ ។ លោកជឿថា បាតុភូតនេះនឹងកើតឡើងមិនលើស១សប្តាហ៍ រួចហើយ វានឹងមានពណ៌ដូចធម្មតាវិញ ។

បាតុភូតធម្មជាតិកើតឡើងដោយសារទឹកភ្លៀង និងខ្យល់បក់សារធាតុអាហារក្នុងសមុទ្រទៅកាន់ច្រាំង ជំហ៊ានដំបូង ពុំទាន់ជ្រាបពីប្រភេទសារធាតុអាហារក្នុងសមុទ្រទេ ទើបពុំអាចសន្និដ្ឋានថា តើទឹកសមុទ្រធ្វើឱ្យប៉ះពាល់ស្បែកដែរឬអត់? ភ្ញៀវទេសចរពុំហ៊ានលេងទឹកសមុទ្រ ប៉ុន្តែវាជាបាតុភូតធម្មជាតិ ហើយសូមភ្ញៀវទេសចរកុំភ្ញាក់ផ្អើល ។ នេះបើតាមការលើកឡើងរបស់លោក យ៉ករីទ្ធខាចន អ៊ុនចៃ ។

តាមការសាកសួរលោក សុផាកន ស៊ិរីថាសាណាក់គុន ដែលបាននាំគ្រួសារធ្វើដំណើរពីខេត្តប៉ាថុមថានី ប្រាប់ថា លោកចង់មកលេងទឹកសមុទ្របាងសែន ប៉ុន្តែពេលមកដល់ឃើញវាមានពណ៌បៃតងចាស់ ទើបលោកពុំហ៊ានលេងទឹកសមុទ្រ ។ លោកពុំដឹងថា តើវាប្រែពណ៌កើតឡើងតាមធម្មជាតិឬក៏អត់ ហើយបារម្ភពីផលប៉ះពាល់សុខភាព ស្បែក បើលោកបណ្តោយយឱ្យគ្រួសារលេងទឹកសមុទ្រ ។

លោក សុផាកន ប្រាប់ថា ៖ «ពេលមកដល់ឆ្នេរសមុទ្របាងសែន ស្រាប់តែឃើញបែបនេះ ខ្ញុំក៏ធ្វើដំណើរទៅលេងនៅទីក្រុងប៉ាតាយ៉ា ជំនួសវិញ ពីព្រោះទឹកសមុទ្រចាប់ផ្តើមមានក្លិនស្អុយ និងឆ្អាបម្តងម្តាល» ៕