ប្រទេសម៉ាឡេស៊ី ៖ កាលពីថ្ងៃទី២០ ខែមិថុនា ឆ្នាំ២០២៥ សារព័ត៌មានបរទេសរាយការណ៍ថា ក្រសួងមហាផ្ទៃរបស់ម៉ាឡេស៊ីមានគម្រោងសាងសង់របងប្រវែង៤៥គីឡូម៉ែត្រ និងដំឡើងកាមេរ៉ានៅតាមបណ្តោយព្រំដែនម៉ាឡេស៊ី-ថៃ ស្ថិតនៅខេត្ត Kelantan ដើម្បីគ្រប់គ្រងការលួ.ចដឹកជញ្ជូនថ្នាំញៀន ទប់ស្កាត់បទល្មើសផ្សេងៗ និងការឆ្លងដែនខុសច្បាប់ ។

អនុរដ្ឋមន្ត្រីក្រសួងមហាផ្ទៃម៉ាឡេស៊ី លោក Shamsul Anuar Nasarah និយាយថា សុវត្ថិភាពនៅតំបន់ព្រំដែនជាអ្វីដែលរដ្ឋាភិបាលម៉ាឡេស៊ីផ្តល់ភាពសំខាន់ជាចម្បង ដោយសារព្រំដែនម៉ាឡេស៊ី-ថៃ គឺជាកន្លែងលួចដឹកជញ្ជូនថ្នាំញៀន និងប្រើប្រាស់គ្រឿងញៀនដែលតែងតែគំរាមកំហែងសន្តិសុខ ។ ហេតុនេះ ម៉ាឡេស៊ីនឹងគ្រប់គ្រងតំបន់ព្រំដែនជាប់ថៃឱ្យកាន់តែតឹងរ៉ឹង ។

យើងផ្តល់ភាពសំខាន់ខ្លាំងបំផុតលើការគ្រប់គ្រងតំបន់ព្រំដែន បើពុំគ្រប់គ្រងទេ វាមិនត្រឹមតែមានការដឹកជញ្ជូនថ្នាំញៀនប៉ុណ្ណោះទេ ប៉ុន្តែអាចកើតហេតុការណ៍មិនល្អផ្សេងៗ ។ នេះបើតាមលោក Shamsul Anuar Nasarah អនុរដ្ឋមន្ត្រីក្រសួងមហាផ្ទៃម៉ាឡេស៊ី ។

លោកបន្តថា ក្រសួងមហាផ្ទៃ និងភ្នាក់ងារសន្តិសុខ ដូចជា ៖ សមត្ថកិច្ច និងភ្នាក់ងារអនុវត្តច្បាប់ព្រំដែនបានត្រួតពិនិត្យព័ត៌មានដើម្បីកំណត់ទីតាំងដែលត្រូវគ្រប់គ្រងយ៉ាងតឹងរ៉ឹង រួមទាំងដំឡើងកាមេរ៉ាត្រួតពិនិត្យ និងសាងសង់រចនាសម្ព័ន្ធសុវត្ថិភាព ។ យើងយកគម្រោងទាំងអស់មកពិចារណា ដូចជា ៖ គម្រោងសាងសង់របង និងដំឡើងកាមេរ៉ានៅតាមបណ្តោយព្រំដែនម៉ាឡេស៊ី-ថៃ រួមទាំងការណែនាំពីបច្ចេកវិទ្យា ។

ម៉ាឡេស៊ីនឹងអនុវត្តគម្រោងទាំងនេះតាមតម្រូវការក្នុងតំបន់ ពីព្រោះវាមិនត្រឹមតែទប់ស្កាត់ការគំរាមកំហែងសន្តិសុខនៅព្រំដែនប៉ុណ្ណោះទេ គឺវានឹងទប់ស្កាត់បទល្មើសនៅទូទាំងប្រទេសផងដែរ ។ ចំណុចសំខាន់ត្រូវតែប្រាកដចិត្តថា ព្រំដែនម៉ាឡេស៊ីមានសុវត្ថិភាព អាចគ្រប់គ្រងបាន និងគ្មានការឆ្លងដែនខុសច្បាប់ ។

កាលពីថ្ងៃទី១១ ខែមិថុនា កន្លងមក មេបញ្ជាការប៉ូលិសនៅខេត្ត Kelantan រាយការណ៍ថា ការសាងសង់របងនៅខេត្ត Kelantan ដែលមានព្រំដែនជាប់ថៃ គឺជាវិធីដោះស្រាយបញ្ហាដ៏មានប្រសិទ្ធភាពបំផុតដើម្បីប្រឆាំងនឹងការលួចដឹកទំនិញខុសច្បាប់ ។ ព្រំដែនមានប្រវែង៤៥គីឡូម៉ែត្រ គឺធំទូលាយពេក ពិបាកគ្រប់គ្រងបទល្មើស ៕

តាមការផ្សព្វផ្សាយរបស់សារព័ត៌មានបរទេស កាលពីថ្ងៃទី២០ ខែមិថុនា ឆ្នាំ២០២៥ ឱ្យដឹងថា ប្រធានាធិបតីចិន លោក ស៊ី ជិនពីង និងប្រធានាធិបតីរុស្ស៊ី លោក វ៉្លាឌីមៀ ពូទីន បានបង្ហាញពីគោលជំហររួមគ្នាអំពាវនាវឱ្យភាគីទាំងអស់ ជាពិសេស អ៊ីស្រាអែលបញ្ឈប់ប្រតិបត្តិការកងទ័ពមកលើអ៊ីរ៉ង់ ពីព្រោះវាពុំអាចរកដំណោះស្រាយលើគម្រោងនុយក្លេអ៊ែរអ៊ីរ៉ង់ដោយការប្រើប្រាស់កម្លាំងកងទ័ពបានទេ ។

ការបង្ហាញគោលជំហររួមគ្នានេះកើតឡើងក្រោយពីការពិភាក្សាតាមទូរស័ព្ទរវាងមេដឹកនាំទាំង២រូប កាលពីថ្ងៃទី១៩ ខែមិថុនា ស្របពេលស្ថានការណ៍កាន់តែតានតឹងខ្លាំងបន្ទាប់ពីអ៊ីស្រាអែលបើកការវាយប្រហារលើគម្រោងនុយក្លែអ៊ែររបស់អ៊ីរ៉ង់ ហើយអ៊ីរ៉ង់ឆ្លើយតបវិញដោយបាញ់មីស៊ីលវាយប្រហារលើទីតាំងរបស់ពលរដ្ឋអ៊ីស្រាអែល ។

លោក ពូទីន និងលោក ស៊ី បានថ្កោលទោសយ៉ាងខ្លាំងចំពោះទង្វើរបស់អ៊ីស្រាអែល ដោយមេដឹកនាំទាំងពីររូបមើលឃើញថា នេះជាការល្មើសច្បាប់អង្គការសហប្រជាជាតិ និងច្បាប់អន្តរជាតិ ហើយដំណោះស្រាយវិបត្តិនេះត្រូវតែធ្វើតាមរយៈនយោបាយ និងការទូតប៉ុណ្ណោះ ។ មេដឹកនាំរុស្ស៊ីក៏បានសុំសម្រុះសម្រួលជម្លោះពាក់ព័ន្ធនឹងគម្រោងនុយក្លេអ៊ែររបស់អ៊ីរ៉ង់ដែលទទួលបានការគាំទ្រពីចិន ដោយមេដឹកនាំរុស្ស៊ីបញ្ជាក់ថា វិធីនេះអាចជួយកាត់បន្ថយភាពតានតឹងបាន ។ នេះបើតាមការលើកឡើងលោក Yuri Ushakov ទីប្រឹក្សាប្រធានាធិបតីរុស្ស៊ី ។

ប្រព័ន្ធផ្សព្វផ្សាយផ្លូវការរបស់ចិនរាយការណ៍ថា លោកប្រធានាធិបតី ស៊ី អំពាវនាវឱ្យប្រទេសមហាអំណាច (សហរដ្ឋអាមេរិក) ជួយកាត់បន្ថយស្ថានការណ៍តានតឹង និងដាស់តឿនថា ពិភពលោកពុំគួរបណ្តោយឱ្យសង្គ្រាមរាលដាលឈានទៅពិបាកគ្រប់គ្រង ។ គ្រប់ភាគី ជាពិសេស អ៊ីស្រាអែលគួរបញ្ឈប់ប្រតិបត្តិការកងទ័ពយ៉ាងឆាប់រហ័សបំផុតដើម្បីចៀសវាងការប៉ះទង្គិចដដែលៗ និងការពារមិនឱ្យមានផលប៉ះពាល់ឆ្លងព្រំដែន ។

ការអំពាវនាវឱ្យអ៊ីស្រាអែលកាត់បន្ថយអំពើហិង្សាលើអ៊ីរ៉ង់នេះ ស្របពេលទំនាក់ទំនងរវាងបណ្តាប្រទេសលោកខាងលិចមានភាពប្រេះស្រាំ ដោយលោក Yuri Ushakov ទីប្រឹក្សាប្រធានាធិបតីរុស្ស៊ីនិយាយថា មេដឹកនាំចិន និងរុស្ស៊ីបាននិយាយពីសង្គ្រាមក្នុងក្រុមប្រទេស G7 ដែលទើបរៀបចំនៅកាណាដា ។

បច្ចុប្បន្ន មានពលរដ្ឋរុស្ស៊ីជាង២០០នាក់ ធ្វើការក្នុងរោងចក្រថាមពលនុយក្លេអ៊ែរនៅអ៊ីរ៉ង់ ដែលរុស្ស៊ីជាអ្នកសាងសង់រោងចក្រនេះ ហើយមេដឹកនាំរុស្ស៊ីបានធ្វើកិច្ចព្រមព្រៀងជាមួយអ៊ីស្រាអែលដើម្បីផ្តល់សុវត្ថិភាពដល់ពលរដ្ឋរុស្ស៊ីធ្វើការក្នុងរោងចក្រ ។ មេដឹករុស្ស៊ីបានយល់ព្រមទំនាក់ទំនងយ៉ាងជិតស្និទ្ធជាមួយមេដឹកនាំចិនក្នុងស្ថានការណ៍តានតឹង និងត្រៀមជួបគ្នាម្តងទៀតក្នុងកិច្ចប្រជុំអង្គការសហប្រតិបត្តិការសៀងហៃ (SCO) នៅចិន នាខែសីហា ឆ្នាំ២០២៥ ៕

ប្រទេសថៃ ៖ កាលពីថ្ងៃទី២០ ខែមិថុនា ឆ្នាំ២០២៥ សារព័ត៌មានថៃរាយការណ៍ថា តាំងពីកម្ពុជាបិទច្រកព្រំដែនពុំអនុញ្ញាតឱ្យនាំចូលបន្លែ ផ្លែឈើថៃ បានធ្វើឱ្យប៉ះពាល់ដល់កសិករថៃយ៉ាងខ្លាំង ពេលនេះ តម្លៃផ្លៃមង្ឃុតថៃចុះថោកមកនៅត្រឹមតែ៥បាតក្នុង១គីឡូក្រាម (ឬ៥០០រៀល) ។ កសិករបានសំណូមពរទៅរដ្ឋាភិបាលជួយរកទីផ្សារផ្លែឈើថៃ ដោយសារការចំណាយដើមទុនកើនឡើងជារៀងរាល់ឆ្នាំ បើតម្លៃធ្លាក់ខ្លាំងបែបនេះ កសិករនឹងកាប់ដើមមង្ឃុតចោល ។

សហករណ៍កសិកម្មខេត្តចាន់បុរី បានតាមដានតម្លៃមង្ឃុតថៃ ក្រោយតម្លៃធ្លាក់ចុះខ្លាំងមកនៅត្រឹមតែ៥បាតក្នុង១គីឡូក្រាម ក្រោយពីកម្ពុជាពុំអនុញ្ញាតឱ្យនាំចូលបន្លែ ផ្លែឈើថៃគ្រប់ច្រកព្រំដែន ។ កន្លងមក កសិករថៃនៅខេត្តចាន់បុរី បាននាំចេញមង្ឃុតទៅកម្ពុជា និងលក់ក្នុងតម្លៃខ្ពស់ជាងនេះ ។

សហករណ៍កសិកម្មខេត្តចាន់បុរី មើលឃើញពីទុក្ខលំបាករបស់កសិករ និងឈ្មួញថៃ ដោយសារពុំអាចនាំចេញកសិផលទៅលក់នៅកម្ពុជា សហករណ៍ក៏បានជួយទិញមង្ឃុតពីកសិករទុកចែកចាយ ដោយសហការជាមួយនាយកដ្ឋានពាណិជ្ជកម្មផ្ទៃក្នុង និងការិយាល័យពាណិជ្ជកម្មខេត្ត ។ កសិករបានយកមង្ឃុតមកលក់ឱ្យសហករណ៍យ៉ាងច្រើន រហូតដល់ជាង២០០តោន ត្រឹមរយៈពេល៣ថ្ងៃ ។

លោក សេនី ថាំម៉ាជិត ប្រធានសហករណ៍កសិកម្មខេត្តចាន់បុរី ប្រាប់ថា តម្លៃមង្ឃុតថៃបានធ្លាក់ចុះខ្លាំងបំផុត គឺមានតម្លៃតែ៥បាតក្នុង១គីឡូក្រាម ដែលធ្វើឱ្យកសិករ និងឈ្មួញរងផលប៉ះពាល់ ។ ហេតុនេះ សហករណ៍ក៏បង្កើតទីតាំងទទួលទិញមង្ឃុតពីកសិករក្នុងសមរម្យ គឺ១គីឡូក្រាម១០បាត និងលក់បន្តក្នុងតម្លៃ១០បាតដូចគ្នា ពុំចំណេញទេ ។

ចំណែកលោក អនុវ៉ាត់ អ៊ីមសំប៊ូន គណៈកម្មការសហករណ៍កសិកម្មខេត្តចាន់បុរី ឱ្យដឹងថា សហករណ៍បានចាប់ផ្តើមជួយទិញមង្ឃុតកសិករបានចំនួន៣ថ្ងៃហើយ ដោយទិញរហូតដល់ជាង២០០តោន ។ មង្ឃុតដែលទិញមក គឺយកទៅបកសំបកក្លាសេ និងកែច្នៃមួយចំនួន ។

បើតាមលោក សុវីដ អាយុ៦១ឆ្នាំ កសិករដាំមង្ឃុតនៅឃុំផាលាប់ផ្លា គឺពេលនេះ មង្ឃុតថៃធ្លាក់ថ្លៃខ្លាំងមកនៅ១គីឡូក្រាម៥បាត លោកបានទុកវាឱ្យរលួយជាជីកសិកម្ម ព្រោះលក់ពុំចំណេញ ។ ក្រោយពីសហករណ៍ប្រកាសទិញ លោកក៏ជួលកម្មករបេះមង្ឃុត និងបេះខ្លួនឯងខ្លះយកមកលក់ឱ្យសហករណ៍ ។ លោកសំណូមពរទៅរដ្ឋាភិបាល និងស្ថាប័នពាក់ព័ន្ធជួយរកទីផ្សារផ្លែឈើថៃ ដោយសារការចំណាយដើមទុនកើនឡើងជារៀងរាល់ឆ្នាំ បើតម្លៃផ្លែឈើធ្លាក់ខ្លាំង កសិករនឹងកាប់ដើមមង្ឃុតចោល ៕

ប្រទេសថៃ ៖ កាលពីថ្ងៃទី២០ ខែមិថុនា ឆ្នាំ២០២៥ នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានចុះមកសួរសុខទុក្ខកងទ័ពថៃនៅខេត្តឧប៊ុនរ៉ាជធានី និងជួបមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ដើម្បីសូមទោសដោយផ្ទាល់ ក្រោយពីបែកធ្លាយការជជែកតាមទូរស័ព្ទរវាងលោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ហើយលោកស្រីថា រដ្ឋាភិបាលថៃមានគោលជំហរផ្ទុយពីកងទ័ព ។ ប៉ុន្តែពេលកំពុងផ្តល់សម្ភាសន៍ជាមួយក្រុមអ្នកសារព័ត៌មាន ស្រាប់តែលោកស្រីត្រូវក្បាល១មេក្រូរបស់អ្នកសារព័ត៌មាន ភ្លាមនោះអ្នកសារព័ត៌មានក៏ប្រញាប់សូមទោសដោយសារអចេតនា ។

សារព័ត៌មាន Thairath រាយការណ៍ថា ពេលលោកស្រី ផេថងថាន ស៊ីណាវ៉ាត់ ចុះមកសួរសុខទុក្ខកងទ័ពនៅស្រុកណាមយឺន ខេត្តឧប៊ុនរ៉ាជថានី ក៏មានពលរដ្ឋថៃមួយចំនួនយកផ្កាមកប្រគល់ជូន ។ ពេលនោះ អ្នកសារព័ត៌មានជាច្រើនព្យាយាមចូលទៅសម្ភាសន៍ ទើបធ្វើឱ្យលោកស្រីត្រូវក្បាល១មេក្រូរបស់អ្នកសារព័ត៌មាន រហូតស្រែកថា «អូយ! វាយក្បាលខ្ញុំ» បន្ទាប់មក លោកស្រីក៏ងាកមកញញឹម និងលើកដៃទៅកាន់ក្រុមសារព័ត៌មាន ហើយនិយាយថា «មិនអីទេ» ។

បន្ទាប់ពីត្រូវក្បាល១មេក្រូរបស់អ្នកសារព័ត៌មាន លោកស្រី ផេថងថាន ក៏ដើរទៅជិះរថយន្តដើម្បីសួរសុខទុក្ខកងទ័ពថៃជាមួយមេបញ្ជាការកងទ័ពភូមិភាគទី២ លោក ប៊ុនស៊ីន ផាកក្លាង ។

គួរបញ្ជាក់ថា ពេលនាយករដ្ឋមន្ត្រីថៃ ព្រមទាំងមន្ត្រីរដ្ឋាភិបាលធ្វើដំណើរមកដល់ខេត្តឧប៊ុនរ៉ាជថានី គឺលោក ប៊ុនស៊ីន ផាកក្លាង និងអភិបាលខេត្តឧប៊ុនរ៉ាជថានី បានមករង់ចាំទទួលស្វាគមន៍ ។ លោកស្រីក៏បានប្រគល់សម្ភារៈទៅឱ្យកងកម្លាំងរក្សាសន្តិសុខភូមិ ខណៈអ្នកភូមិបានប្រគល់ផ្កាកុលាប និងក្រម៉ាដល់នាយករដ្ឋមន្ត្រីដើម្បីកម្លាំងចិត្ត ។

ក្រុមអ្នកសារព័ត៌មានសួរនាយករដ្ឋមន្ត្រីថា តើបានបកស្រាយជាមួយលោក ប៊ុនស៊ីន ផាកក្លាង ហើយឬនៅពីការបែកធ្លាយកិច្ចសន្ទនាតាមទូរស័ព្ទ? លោកស្រី ផេថងថាន ពុំឆ្លើយតបទេ ។ ពេលពលរដ្ឋប្រគល់ផ្កាឱ្យ លោកស្រីក៏ហៅលោក ប៊ុនស៊ីន ផាកក្លាង មកថតរួមគ្នាដើម្បីបង្ហាញពីរដ្ឋាភិបាលគាំទ្រកងទ័ព ។

ការចុះមកកាន់ខេត្តឧប៊ុនរ៉ាជធានី ក្រៅពីការចុះសួរសុខទុក្ខកងទ័ពនៅព្រំដែន គឺនាយករដ្ឋមន្ត្រីថៃមានគោលបំណងសូមទោសលោក ប៊ុនស៊ីន ផាកក្លាង ដោយផ្ទាល់ ក្រោយការបែកធ្លាយកិច្ចសន្ទនារបស់ស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ខណៈមុននេះ លោកស្រីបានសូមទោសលោក ប៊ុនស៊ីន ផាកក្លាង តាមទូរស័ព្ទម្តងហើយ ៕