រដ្ឋមន្ត្រីពាណិជ្ជកម្មថៃរត់រកផ្លូវធម៌ ក្រោយកើតជំងឺបាក់ទឹកចិត្តដោយសារដោះស្រាយវិបត្តិសេដ្ឋកិច្ចមិនចេញ

វិបត្តិពាណិជ្ជកម្មជុំទិសពេក! រដ្ឋមន្ត្រីក្រសួងពាណិជ្ជកម្មថៃបានទម្លាយពីអារម្មណ៍ខូចចិត្តរបស់ខ្លួនដោយត្រង់ៗថា សព្វថ្ងៃនេះ លោកស្រីកំពុងកើតជំងឺបាក់ទឹកចិត្ត និងលែងហ៊ានបើកទូរស័ព្ទមើលបណ្តាញសង្គមទៀតហើយ ព្រោះតែទាល់ច្រកក្នុងការដោះស្រាយបញ្ហាសេដ្ឋកិច្ច និងរងការកាត់តរូបភាពមើលងាយជាហូរហែ រហូតបង្ខំចិត្តរត់រកផ្លូវព្រះធម៌ដើម្បីជួយឱ្យចិត្តស្ងប់។

ថ្លែងនៅក្នុងកិច្ចសម្ភាសន៍ផ្តាច់មុខជាមួយសារព័ត៌មានរដ្ឋថៃ Thai News Agency កាលពីថ្ងៃសុក្រ ទី១០ ខែកក្កដា ឆ្នាំ២០២៦ លោកស្រី Supajee Suthamphan បានទទួលស្គាល់ថា លោកស្រីកំពុងចំណាយពេលទាំងស្រុងដោះស្រាយវិបត្តិធំៗក្នុងពេលតែមួយ មានទាំងការចរចាពាណិជ្ជកម្មអន្តរជាតិ, រឿងពន្ធគយ, បញ្ហាកសិផល, វិបត្តិតម្លៃដូងក្រអូបធ្លាក់ថ្លៃ និងបញ្ហាម៉ាឡេស៊ីផ្អាកនាំចូលបង្គាថៃ ដែលវាបានជះឥទ្ធិពលបំផ្លិចបំផ្លាញដល់ផ្លូវចិត្តរបស់លោកស្រីយ៉ាងធ្ងន់ធ្ងរ។

ភាពតានតឹងនៃវិបត្តិពាណិជ្ជកម្មរបស់ប្រទេសថៃនាពេលនេះ គឺពាក់ព័ន្ធផ្ទាល់ទៅនឹងការធ្លាក់ចុះនៃតម្រូវការទីផ្សារអន្តរជាតិ និងវិធានការរឹតត្បិតពន្ធគយពីបណ្តាប្រទេសដៃគូ ដែលធ្វើឱ្យទំនិញកសិកម្ម និងជលផលថៃជួបការកកស្ទះ។ ជាងនេះទៅទៀត ការបាត់បង់តុល្យភាពតម្លៃពាណិជ្ជកម្មតាមព្រំដែនគោកជាមួយប្រទេសជិតខាង និងការប្រកួតប្រជែងយ៉ាងស្វិតស្វាញក្នុងតំបន់ បាននិងកំពុងបង្កើតជាសម្ពាធសេដ្ឋកិច្ចជុំទិស ធ្វើឱ្យខ្សែច្រវាក់ផលិតកម្មក្នុងស្រុកត្រូវគាំងស្ទះ និងបង្កជាក្តីបារម្ភយ៉ាងខ្លាំងដល់ជីវភាពរបស់ប្រជាកសិករថៃទូទាំងប្រទេស។

អ្វីដែលធ្វើឱ្យលោកស្រីបាក់ទឹកចិត្តខ្លាំងបំផុត គឺការរងការវាយប្រហារពីអ្នកលេងអ៊ីនធឺណិតដែលយករូបថតលោកស្រីទៅកាត់តជារូបភាពកំប្លែង (Meme) មើលងាយសមត្ថភាព។ ទោះជាយ៉ាងណា បច្ចុប្បន្នលោកស្រីកំពុងព្យាយាមអប់រំចិត្តស្ងប់អារម្មណ៍នៅក្នុងផ្លូវព្រះធម៌ ដើម្បីស្តារសុខភាពផ្លូវចិត្តឡើងវិញ និងត្រៀមខ្លួនបន្តដោះស្រាយវិបត្តិសេដ្ឋកិច្ចជូនជាតិមាតុភូមិ។

កត្តានេះឆ្លុះបញ្ចាំងថា សម្ពាធការងារជុំទិស រួមផ្សំនឹងការលេងសើចឌឺដងនៅលើបណ្តាញសង្គម បានរុញច្រានឱ្យថ្នាក់ដឹកនាំរូបនេះធ្លាក់ចូលក្នុងវិបត្តិផ្លូវចិត្តយ៉ាងធ្ងន់ធ្ងរ។ ទោះជាយ៉ាងណាក៏ដោយ ការងាកមកពឹងផ្អែកលើការអប់រំចិត្តតាមគន្លងព្រះធម៌ ត្រូវបានលោកស្រីចាត់ទុកជាឱសថដ៏សំខាន់ ក្នុងការជួយឱ្យចិត្តស្ងប់ដើម្បីមានកម្លាំងបន្តដោះស្រាយវិបត្តិសេដ្ឋកិច្ចជូនជាតិមាតុភវត្តទៅទៀត៕