ខេត្តស្ទឹងត្រែង៖ ដើមឈើថ្មមួយដើម ដែលមានអាយុកាលចន្លោះពី១០ម៉ឺនឆ្នាំ ទៅ២លានឆ្នាំ ត្រូវបានកំណាយរកឃើញនៅភូមិកាតូត ឃុំភុន ស្រុកសេសាន ខេត្តស្ទឹងត្រែង។ នេះបើតាមការវាយតម្លៃរបស់ លោក លឹម វណ្ណច័ន្ទ មន្ត្រីជំនាញ និងជាប្រធានការិយល័យបេតិកភណ្ឌវប្បធម៌ នៃនាយកដ្ឋានតំបន់បេតិកភណ្ឌ អគ្គនាយកដ្ឋានសហគមន៍មូលដ្ឋាន ក្រសួងបរិស្ថាន។
បើតាមទំព័រផ្លូវការរបស់ក្រសួងបរិស្ថាន នារសៀលថ្ងៃចន្ទ ទី18 ខែសីហា ឆ្នាំ2025 នេះបានឲ្យដឹងថា តាមរយៈកិច្ចសហការចូលរួមពីរដ្ឋបាលស្រុកសេសាន មន្ទីរវប្បធម៌ខេត្តស្ទឹងត្រែង មន្ទីរបរិស្ថានខេត្តស្ទឹងត្រែង និងអ្នកជំនាញក្រសួងបរិស្ថាន បានធ្វើកំណាយស្រាវជ្រាវដើមឈើថ្មនេះ ដែលទទួលបានលទ្ធផលជាបឋម គឺធ្វើកំណាយបានប្រវែង១៧.៥ម៉ែត្រ។ 
អ្នកជំនាញដែលបានចូលរួមក្នុងកិច្ចការស្រាវជ្រាវនេះ បានគូសបញ្ជាក់ឱ្យដឹងទៀតថា សម្រាប់ដើមឈើថ្មមួយនេះ អាចមានប្រវែងប្រហែល៣០ម៉ែត្រ ឬ វែងជាងនេះ ដោយមិនទាន់អាចកំណត់បានជាក់លាក់នៅឡើយ ព្រោះការធ្វើកំណាយនៅមិនទាន់រួចរាល់ ដ្បិតដើមឈើនេះ នៅកប់ក្នុងស្រទាប់ដីឥដ្ឋ និងថ្មបាយក្រៀម។
បន្ថែមពីនេះ ក្រសួងបរិស្ថានបានបញ្ជាក់នៅក្នុងការបង្ហោះខាងលើនេះថា ទាក់ទឹងនឹងកិច្ចការងារកំណាយដើមឈើដែលកប់ដីអស់រយៈពេលរាប់មុឺនឆ្នាំនេះ នៅមិនទាន់ចប់នៅឡើយទេ ដែលដំណើរការបន្ទាប់នឹងបន្តធ្វើនៅឆ្នាំក្រោយទៀត។ មួយវិញទៀត ចំពោះទីតាំងនៃដើមឈើថ្មនេះ អាជ្ញាធរមូលដ្ឋាន និងមន្រ្តីជំនាញពាក់ព័ន្ធ នឹងរៀបចំទៅជាកន្លែងទេសចរណ៍របស់សហគមន៍ជនជាតិដើមព្រៅផងដែរ៕
