ស្របពេលដែលបណ្តាប្រទេសមួយចំនួននៅក្នុងតំបន់អាស៊ានកំពុងជួបបញ្ហាព្រំដែន និងសង្គ្រាមសុីវិល វៀតណាមឯណោះ បានកំពុងស្ងប់ស្ងាត់អភិវឌ្ឍន៍វិស័យយោធារបស់ខ្លួន។

ថ្មីៗនេះ វៀតណាម បានបញ្ចេញមីសុីល 4K44 Redut ឬគេស្គាល់ថា P-35 ដែលមានរូបរាងស្រដៀងទៅនឹងគ្រាប់នុយក្លេរអ៊ែរ។

4K44 Redut មានប្រវែងប្រមាណ១០ម៉ែត្រ ត្រូវបានប្រទេសវៀតណាម នាំចូលមកពីប្រទេសរុស្សុី ក្នុងឆ្នាំ១៩៨០។

មីសុីលនេះ ត្រូវបានវៀតណាមធ្វើទំនើបកម្មដោយជោគជ័យ ដោយបំពាក់ក្បាលកាំជ្រួច P-35 ផលិតក្នុងស្រុកដែលអនុញ្ញាតឱ្យវាបាញ់បានចម្ងាយពី៣០០គីឡូម៉ែត្រ ដល់៤៥០គីឡូម៉ែត្រ។

គោលដៅចម្បងរបស់មីសុីល P-35 គឺសម្រាប់កម្ទេចនាវាចម្បាំង ដែលវៀតណាមបានកំពុងដាក់ពង្រាយនៅតាមប្រជុំឆ្នេរសមុទ្រ ក្នុងជម្លោះសមុទ្រចិនខាងត្បូង៕

ប្រទេសថៃ ៖ កាលពីថ្ងៃទី២៩ ខែសីហា ឆ្នាំ២០២៥ តុលាការធម្មនុញ្ញថៃបានសម្រេចដកតំណែងលោកស្រី ផេថងថាន ស៊ីណាវ៉ាត់ ជាផ្លូវការ ដោយសារតុលាការរកឃើញថា លោកស្រីមានពិរុទ្ធពីបទល្មើសរដ្ឋធម្មនុញ្ញអំឡុងពេលកិច្ចសន្ទនារវាងលោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ដែលបង្ហាញពីភាពទន់ខ្សោយនយោបាយក្នុងប្រទេសថៃរបស់លោកស្រី ។ នៅថ្ងៃដដែល គណបក្សប្រជាជន ជាគណបក្សប្រឆាំងបានបង្ហាញគោលជំហរពុំចូលរួមជាមួយរដ្ឋាភិបាល និងស្នើនូវលក្ខខណ្ឌ៣ចំណុច ។

លោក ណាថាផុង រឿងបញ្ញាវុធ ប្រធានគណបក្សប្រជាជនបានប្រកាសគោលជំហររបស់ខ្លួន ក្រោយពីតុលាការធម្មនុញ្ញសម្រេចដកលោកស្រី ផេថងថាន ចេញពីតំណែងនាយករដ្ឋមន្ត្រី ដោយលោកបញ្ជាក់ថា ទោះជាគណបក្សប្រជាជនធ្លាប់អំពាវនាវឱ្យលោកស្រី ផេថងថាន រំលាយសភាដើម្បីប្រគល់អំណាចឱ្យពលរដ្ឋកន្លងមក ប៉ុន្តែពេលការកាត់ក្តីរបស់តុលាការបញ្ចប់ និងមានចន្លោះប្រហោងនយោបាយ គណបក្សប្រជាជនសូមផ្តល់ដំណោះស្រាយឱ្យជ្រើសរើសនាយករដ្ឋមន្ត្រីថ្មី រំលាយ និងរៀបចំការបោះឆ្នោតជាថ្មីយ៉ាងឆាប់រហ័ស ពីព្រោះសមាសភាពសភាតំណាងរាស្ត្របច្ចុប្បន្នពុំអាចបង្កើតរដ្ឋាភិបាលមានស្ថិរភាព និងស្របច្បាប់ ។

លោក ណាថាផុង បន្តថា សមាជិកសភាគណបក្សប្រឆាំងបានត្រៀមខ្លួនបោះឆ្នោតជ្រើសរើសនាយករដ្ឋមន្ត្រីថ្មីតាមលក្ខខណ្ឌ៣ចំណុច រួមមាន ៖

១-នាយករដ្ឋមន្ត្រីថ្មីត្រូវតែរំលាយសភាក្នុងរយៈពេល៤ខែ ក្រោយចេញសេចក្តីថ្លែងការណ៍គោលនយោបាយ
២-គណៈរដ្ឋមន្ត្រីត្រូវរៀបចំការធ្វើប្រជាមតិដើម្បីព្រាងរដ្ឋធម្មនុញ្ញថ្មីដោយសភាធម្មនុញ្ញជាប់ឆ្នោត
៣-គណបក្សប្រជាជននឹងមិនចូលរួមបង្កើតរដ្ឋាភិបាល និងមិនទទួលយកតំណែងរដ្ឋមន្ត្រីណាមួយឡើយ គឺគណបក្សនឹងធ្វើការក្នុងឋានៈជាគណបក្សប្រឆាំងដើម្បីត្រួតពិនិត្យការងាររបស់រដ្ឋាភិបាលថ្មីបន្តទៀត ។

គណបក្សប្រជាជនច្រានចោលព័ត៌មានដែលផ្សាយថា គណបក្សបានព្រមព្រៀងជាមួយគណបក្សភូមិចៃថៃដើម្បីផ្តល់តំណែងរដ្ឋមន្ត្រីចំនួន៨រូប ប៉ុន្តែគណបក្សប្រជាជនត្រៀមខ្លួនបំបែកភាពជាប់គាំងនយោបាយតាមរយៈដំណើរការសភាដើម្បីឱ្យមានការបោះឆ្នោតជាថ្មីឆាប់ៗ ។ គណបក្សប្រជាជននឹងពុំបញ្ជូនសមាជិកគណបក្ស ឬអ្នកតំណាងគណបក្សទៅចូលរួមជាមួយរដ្ឋាភិបាលទេ ។ ហេតុនេះ ព័ត៌មានដែលផ្សាយថា គណបក្សប្រជាជនព្រមព្រៀងជាមួយគណបក្សភូមិចៃថៃ គឺពុំពិតឡើយ ។

គួរបញ្ជាក់ថា ក្រោយពីលោកស្រី ផេងថងថាន ធ្លាក់ពីតំណែងនាយករដ្ឋមន្ត្រី ពេលនេះ ប្រទេសថៃបានត្រៀមបេក្ខជននាយករដ្ឋមន្ត្រីចំនួន៥រូប ដែលនឹងប្រកួតប្រជែងកាន់តំណែងជានាយករដ្ឋមន្ត្រី ទី៣២ រួមមាន ៖

១-លោក ឆ័យក្សេម និទិសិរិ គណបក្សភឿថៃ
២-លោក អនុថីន ឆាន់វីៈគូន គណបក្សភូមិចៃថៃ
៣-លោក ប្រាយុទ្ធ ចាន់អូចា គណបក្សរួមថៃសាងឆាត
៤-លោក ផីរៈផាន់ សាលីរ៉ាត់វិផាក ឧបនាយករដ្ឋមន្ត្រី និងរដ្ឋមន្ត្រីក្រសួងថាមពល និង
៥-លោក ជុរីន ឡាក់សាណៈវិស៊ីត សមាជិកសភា

គណបក្សកាន់អំណាចភឿថៃបច្ចុប្បន្ន ប្រកាសជំរុញលោក ឆ័យក្សេម និទិសិរិ ឱ្យកាន់តំណែងជានាយករដ្ឋមន្ត្រីថ្មីបន្តពីលោកស្រី ផេថងថាន ប៉ុន្តែគណបក្សនយោបាយនានាបានគាំទ្រឱ្យលោក អនុថីន ឆាន់វីៈគូន កាន់តំណែងជានាយកដ្ឋមន្ត្រីថៃ ទី៣២ ។

លោក អនុថីន និយាយថា លោកត្រៀមខ្លួនធ្វើជានាយករដ្ឋមន្ត្រីយូរហើយ ដោយលោកប្រកាសពីគោលជំហរភ្ជាប់ទំនាក់ទំនងជាមួយប្រទេសជិតខាង និងចរចាស្វែងរកសន្តិភាពនៅព្រំដែនកម្ពុជា-ថៃ ។ លោកនឹងពុំបណ្តោយឱ្យប្រទេសថៃបន្តមានជម្លោះជាមួយប្រទេសជិតខាងទៀតទេ មេដឹកនាំរដ្ឋាភិបាលមុនពុំអាចដោះស្រាយបញ្ហាបច្ចុប្បន្ន ប៉ុន្តែបើលោកកាន់តំណែងនាយករដ្ឋមន្ត្រី លោកនឹងដោះស្រាយជម្លោះព្រំដែនឱ្យបាន ។ លក្ខខណ្ឌការដោះស្រាយបញ្ហា គឺស្វែងរកសន្តិភាព ចរចាភ្ជាប់ទំនាក់ទំនងជាមួយប្រទេសជិតខាងដែលកំពុងមានជម្លោះ ៕

ប្រទេសវៀតណាម ៖ តាមការព្យាកររបស់មជ្ឈមណ្ឌលជលសាស្ត្រ និងឧតុនិយមវៀតណាមឱ្យដឹងថា ភាគខាងជើង និងកណ្តាលប្រទេសវៀតណាមនឹងមានភ្លៀងធ្លាក់ខ្លាំងរហូតដល់ថ្ងៃទី៣១ ខែសីហា ឆ្នាំ២០២៥ ហើយតំបន់ខ្លះនឹងមានភ្លៀងធ្លាក់កាន់តែខ្លាំងដោយសារខ្យល់ព្យុះ Depression និងខ្យល់មូសុង ខណៈមុននេះ វៀតណាមបានរងផលប៉ះពាល់ដោយសារខ្យល់ព្យុះកាជិគិ (Kajiki) ។

ចាប់ពីថ្ងៃទី២៩ ដល់ថ្ងៃទី៣០ ខែសីហា ភ្លៀងបានធ្លាក់យ៉ាងខ្លាំងនៅតំបន់ដីសណ្តភាគខាងជើង និងកណ្តាលរបស់វៀតណាម រួមទាំងទីក្រុងដាណាងផងដែរ ខណៈតំបន់ខ្លះទៀតមានភ្លៀងធ្លាក់ខ្លាំងជាងនេះ ។ ខេត្តថែងវ៉ា និងទីក្រុងវ៉េ ដែលស្ថិតនៅភាគកណ្តាលប្រទេស រួមទាំងតំបន់មួយចំនួន ក៏មានភ្លៀងធ្លាក់ខ្លាំងដូចគ្នា ។

មជ្ឈមណ្ឌលជលសាស្ត្រ និងឧតុនិយមវៀតណាមសន្និដ្ឋានថា ភ្លៀងនឹងធ្លាក់ខ្លាំងរហូតដល់ថ្ងៃទី៣១ ខែសីហា ជាពិសេស នៅភាគខាងជើង កណ្តាល និងទីក្រុងដាណាង ។ មន្ត្រីអាកាសធាតុវៀតណាមបានជូនដំណឹងដល់ពលរដ្ឋពីទឹកជំនន់ភ្លាមៗ ការបាក់ដីនៅតំបន់ភ្នំ និងទឹកលិចតំបន់ទំនាប ។

ខ្យល់ព្យុះ Depression បានបម្លាស់ទីនៅសមុទ្រចិន វាមានកម្លាំងកាន់តែខ្លាំង និងវាយប្រហារមកលើឆ្នេរសមុទ្រខេត្តភាគកណ្តាលប្រទេសវៀតណាម នៅថ្ងៃទី៣០ ខែសីហា ។ ចាប់ពីថ្ងៃទី២៥ ដល់ថ្ងៃទី២៦ ខែសីហា កន្លងមក ខ្យល់ព្យុះកាជិគិបានបោកបក់មកលើសមុទ្រវៀតណាមផ្នែកខាងកើត ដែលបណ្តាលឱ្យមានភ្លៀងធ្លាក់ខ្លាំងក្នុងតំបន់ជាច្រើនរបស់ភាគខាងជើង និងកណ្តាលប្រទេស ។

រហូតមកដល់ថ្ងៃទី២៧ ខែសីហា ទឹកជំនន់នៅខេត្តថែងវ៉ា នៅតែពុំទាន់ស្រក ដែលបណ្តាលឱ្យលំនៅឋានពលរដ្ឋវៀតណាមរាប់រយខ្នងលិចទឹក ។ អាជ្ញាធរវៀតណាមបានតាមដានស្ថានការណ៍អាកាសធាតុយ៉ាងដិតដល់ និងសំណូមពរទៅកាន់ពលរដ្ឋដែលរស់នៅតំបន់រងផលប៉ះពាល់ត្រូវប្រុងប្រយ័ត្ន និងអនុវត្តតាមការណែនាំរបស់អាជ្ញាធរ ៕