នាពេលថ្មីៗនេះតារាចម្រៀង ហ្សូណូ បានបង្ហាញស្នាដៃថ្មីរបស់ខ្លួនជាមួយនឹងបទចម្រៀងមួយបទដែលរួមបញ្ចូលជាមួយនឹងឧបករណ៍ភ្លេងខ្មែរពីស្នាដៃរបស់តារាចម្រៀង វណ្ណថាន។ មិនត្រឹមតែប៉ុណ្ណោះ ហ្សូណូ បានផ្តិតយកទិដ្ឋភាពដ៏ស្រស់ត្រកាលនៅប្រាសាទអង្គរវត្តជាមួយនឹងការបង្ហាញពីវប្បធម៌ខ្មែរ។
កាលពីថ្ងៃទី ២៧ ខែសីហា តារាចម្រៀង ហ្សូណូ បានទម្លាក់បទថ្មីរបស់ខ្លួនមានចំណងជើងថា «នាងអើយ»។ MV មួយបទនេះគឺពេញជាធ្វើឱ្យអ្នកគាំទ្រពេញចិត្តយ៉ាងខ្លាំងព្រោះបានបង្ហាញរូបភាពដ៏ត្រជាក់ភ្នែកនៃប្រាសាទអង្គរវត្តដែលជាសម្បត្តិបេតិកភណ្ឌពិភពលោក។ ក្នុង MV ដ៏ពិសេសនេះក៏មានការបង្ហាញពីរបាំខ្មែរផងដែរ។ អ្វីដែលមហាជនចាប់អារម្មណ៍មួយទៀតស្នាដៃថ្មីរបស់តារាចម្រៀង ហ្សូណូ ទៅលើបទចម្រៀង «នាងអើយ»គឺមានការចូលរួមជាពិសេសពីតារាចម្រៀង វណ្ណថាន។
តាមការរៀបរាប់ពីតួនាទីក្នុងការផលិតបទនេះខាងឧបករណ៍ភ្លេងខ្មែរគឺបានបង្ហាញ វណ្ណថានដែលជាតារាចម្រៀងក្នុងទ្រនំបារមីដែលទស្សនិកជនបានដឹងយ៉ាងច្បាស់ថាលោកពូកែខាងឧបករណ៍ភ្លេងដល់ទៅជាង២០ឯណោះ។
ក្រោយពីស្នាដៃរបស់ខ្លួនបានបង្ហាញតារាចម្រៀង ហ្សូណូ បានបង្ហាញថាបទនេះជាបទដែលលោកពេញចិត្តខ្លាំងជាងគេ ខណៈលោកក៏ជំរុញឱ្យទស្សនិកជនទៅកម្សាន្តនៅខេត្តសៀមរាបផងដែរ។
លោក ហ្សូណូ បានរៀបរាប់នៅល្ងាចថ្ងៃទី២៩ សីហា ថា «មេឃភ្លៀងហើយសង្ឃឹមថា នាងអើយ នឹងបំពេអារម្មណ៍គ្រប់គ្នា ហើយកុំភ្លេចមកលេងសៀមរាប និងតំបន់ទេសចរណ៍ស្អាតៗក្នុងស្រុកផងណា! ។ បទចម្រៀង «នាងអើយ» ជាចម្រៀងដែលខ្ញុំពេញចិត្តជាខ្លាំង ព្រោះគ្រប់យ៉ាងសុទ្ធតែធ្វើឡើងដោយការពេញចិត្ត ទាំងទំនុកច្រៀង បទភ្លេង និងការបញ្ចូលឧបករណ៍ភ្លេងខ្មែរជាច្រើន»។
ជាមួយគ្នានេះតារាចម្រៀង ហ្សូណូ បានអរគុណទៅកាន់ក្រុមការងារផលិតដែលបានសម្រិតសម្រាំងក្នុងការផ្ដិតយករូបភាពដ៏ស្រស់ស្អាតពីប្រាសាទបុរាណខ្មែរជាច្រើននៅក្នុងខេត្តសៀមរាបរួមមាន ប្លង់ពេញនិយមនៅអង្គរវត្តជាច្រើនកន្លែង ប្រាសាទតាព្រហ្ម ប្រាសាទក្រវ៉ាន់ ប្រាសាទប្រែរូប និងខ្លោងទ្វារខ្មោចជាដើម រួមទាំងការបញ្ចូលរបាំខ្មែរទៀតផង៕
