Cecilia Cheung រួចផុតពីគ្រោះថ្នាក់ហេតុការណ៍ផ្ទុះកង់ឡាន

ថ្មីៗនេះតារាសម្តែងស្រី Cecilia Cheung បានចែករំលែកអំពីបទពិសោធន៍ដ៏គ្រោះថ្នាក់មួយ នៅពេលដែលរថយន្តរបស់នាងស្រាប់តែផ្ទុះកង់នៅលើផ្លូវហាយវេ។ Cecilia បាននិយាយថានាងបានបើកបរចេញទៅមើលកុននៅយប់មុន។ នៅតាមផ្លូវនាងបានកត់សម្គាល់ឃើញមានអ្វីមិនធម្មតាអំពីឡានប៉ុន្តែដោយសារតែវានៅតែអាចគ្រប់គ្រងបាននៅពេលនោះ នាងគិតថានឹងឱ្យគេពិនិត្យឡាននៅពេលក្រោយ។

បន្ទាប់ពីមើលកុនរួច Cecilia បានបន្តបើកបរត្រឡប់ទៅផ្ទះវិញ។ ពេលកំពុងបើកបរលើផ្លូវហាយវេ នាងបានកត់សម្គាល់ឃើញថាឡានកាន់តែមិនប្រក្រតី ហើយមានអ្វីមួយខុសធម្មតា។ ពេលដឹងពីស្ថានភាពអាសន្ន Cecilia បានបន្ថយល្បឿនភ្លាមៗ ដើម្បីជៀសវាងការបង្កគ្រោះថ្នាក់ដល់ឡានផ្សេងទៀតដែលនៅពីក្រោយនាង នាងបានបើករថយន្តរបស់នាងដោយស្ងប់ស្ងាត់ពីគន្លងផ្លូវលឿនទៅគន្លងផ្លូវបន្ទាន់ រួចក៏ឈប់នៅកន្លែងសុវត្ថិភាពមួយនៅម្ខាងផ្លូវ ហើយបានហៅជំនួយតាមដងផ្លូវ។

ក្រោយហេតុការណ៍នេះ Cecilia នៅតែមានការតក់ស្លុត។ នាងបានចែករំលែកថា «រថយន្តសង្គ្រោះបន្ទាន់បានមកដល់យ៉ាងលឿន។ ជាធម្មតា ខ្ញុំតែងតែពិនិត្យកង់ឡានមុនពេលបើកបរ ប៉ុន្តែលើកនេះខ្ញុំប្រញាប់ទៅផ្ទះមើលកូនៗរបស់ខ្ញុំ ទើបខ្ញុំភ្លេចពិនិត្យ។ ជាសំណាងល្អ គ្រប់គ្នាមានសុវត្ថិភាពនៅទីបំផុត»។

បន្ទាប់ពីបានស្តាប់រឿងនេះ អ្នកគាំទ្រជាច្រើនបាននិយាយថា ពួកគេក៏មានអារម្មណ៍ព្រឺសម្បុរ ដោយបន្សល់ទុកមតិយោបល់ឱ្យតារាសម្តែងរូបនេះយកចិត្តទុកដាក់ចំពោះសុវត្ថិភាពពេលបើកបរ។ អ្នកផ្សេងទៀតបានសម្តែងការអាណិតអាសូរ ដោយអះអាងថា Cecilia Cheung ក្នុងនាមជាម្តាយដែលចង់ត្រឡប់ទៅរកកូនៗរបស់នាងវិញ បានមើលរំលងដោយអចេតនាក្នុងការពិនិត្យមើលឡានមុនពេលចេញដំណើរ។ ជាសំណាងល្អ ហេតុការណ៍នេះមិនបានបង្កផលវិបាកធ្ងន់ធ្ងរនោះទេ។

បច្ចុប្បន្ន Cecilia Cheung គឺជាម្តាយទោល ដោយចិញ្ចឹមកូនប្រុសបីនាក់តែម្នាក់ឯង។ ថ្មីៗនេះ នាងបានចែករំលែករូបភាពជីវិតប្រចាំថ្ងៃរបស់នាងជាញឹកញាប់នៅលើបណ្តាញសង្គម។យោងតាមតារាសម្តែងរូបនេះ នាង និងកូនៗរបស់នាងតែងតែទុកចិត្តគ្នាទៅវិញទៅមកដូចជាមិត្តភក្តិ។ រាល់យប់មុនពេលចូលគេង កូនៗប្រាប់ម្តាយរបស់ពួកគេអំពីផែនការរបស់ពួកគេសម្រាប់ថ្ងៃបន្ទាប់ ដូចជាការទៅហ្វឹកហាត់បាល់ទាត់ ឬទៅកន្លែងហាត់ប្រាណជាដើម៕