Big Hit និង SM ឆ្លើយតបនឹងពាក្យចចាមអារ៉ាមស្នេហារបស់ Jungkook និង Winter

ថ្មីៗនេះសហគមន៍អនឡាញជាច្រើនបានសង្ស័យពីទំនាក់ទំនងស្នេហារវាង Jungkook សមាជិក BTS និង Winter សមាជិក aespa ។ ការសង្ស័យពីសហគមន៍អនឡាញដោយសារតែពួកគេបានឃើញតារាទាំងពីរសាក់រូបនៅលើដៃទាំងពីរដែលមើលទៅស្រដៀងគ្នា ប្រើកាសប្រភេទដូចគ្នាប៉ុន្តែពណ៌ផ្សេងគ្នា ពណ៌ក្រចកដូចគ្នានៅលើម្រាមដៃចិញ្ចៀនខាងឆ្វេង ខ្សែដៃដែលមានការរចនាដូចគ្នា អាវយឺតម៉ាកដូចគ្នា…ជាដើម។

មិនត្រឹមតែប៉ុណ្ណោះសូម្បីតែគណនី Instagram របស់ Jungkook ក៏អ្នកមួយចំនួនសង្ស័យថាដូចជាឈ្មោះពិតរបស់ Winter គឺ Minjung ។ Jungkook ធ្លាប់បានចូលរួមការប្រគំតន្ត្រីរបស់ aespa ពេលឈប់សម្រាកពីការងារយោធា។ រូបថតពីអ្នកគាំទ្រអន្តរជាតិ បានបង្ហាញឱ្យឃើញតារាចម្រៀងរូបនេះពាក់ម៉ាស់ និងមួករោមក្រាស់ ដើម្បីកុំឱ្យគេទទួលស្គាល់។
ទាក់ទិននឹងរឿងនេះ អ្នកនិយមលេងអ៊ីនធឺណេតបានបញ្ចេញមតិថា «នៅពេលដែលយើងដឹងថា Jungkook បានទៅមើលការប្រគំតន្ត្រីរបស់ aespa ពេលឈប់សម្រាកយោធា គ្រប់គ្នាភ្ញាក់ផ្អើល ព្រោះ Jungkook មិនដែលទៅការប្រគំតន្ត្រី របស់ NewJeans, LE SSERAFIM, ILLIT ទេ ដែលសុទ្ធសឹងជាក្រុមក្រោម HYBE។ ប៉ុន្តែលោកបានបង្ហាញខ្លួននៅក្នុងការប្រគំតន្ត្រី aespa ដូច្នេះគ្រប់គ្នាភ្ញាក់ផ្អើល»។

នៅឆ្នាំ២០២៣ Jungkook មាន ពាក្យចចាមអារ៉ាមថា បានអញ្ជើញមិត្តស្រីរបស់លោកទៅផ្ទះ ប៉ុន្តែសមាជិកក្មេងជាងគេរបស់ BTS បានបដិសេធនៅលើការផ្សាយផ្ទាល់ថា `ខ្ញុំមិនមានមិត្តស្រីទេ ប្រសិនបើខ្ញុំនិយាយដូច្នេះ ខ្ញុំមិនឃើញចាំបាច់ត្រូវលាក់ការពិតថាខ្ញុំមានមិត្តស្រីទេ»។
ទាក់ទិននឹងពាក្យចចាមអារ៉ាមរវាង Jungkook និង Winter នៅថ្ងៃទី៥ ខែធ្នូ ក្រុមហ៊ុន HYBE Group បានប្រាប់ My Daily ថា «យើងកំពុងផ្ទៀងផ្ទាត់»។ ប៉ុន្តែបន្ទាប់មក ទាំងក្រុមហ៊ុនគ្រប់គ្រងរបស់ Jungkook គឺ Big Hit Music ស្ថិតនៅក្រោម HYBE និងក្រុមហ៊ុនគ្រប់គ្រង Winter គឺ SM Entertainment បានឆ្លើយតបទៅប្រព័ន្ធផ្សព្វផ្សាយកូរ៉េថា «យើងមិនមានអ្វីត្រូវបកស្រាយទេ»។

ទស្សនិកជនគិតថាការឆ្លើយតបមិនច្បាស់លាស់នេះគឺជាការបញ្ជាក់ដោយប្រយោលនៃការណាត់ជួបរបស់ Jungkook និង Winter ។ ដោយសារតែស្ទីលឆ្លើយតបមិនច្បាស់លាស់នេះជារឿយៗត្រូវបានក្រុមហ៊ុនកម្សាន្តអនុវត្តក្នុងករណីស្រដៀងគ្នានេះ ក្រុមហ៊ុនមិនបដិសេធទេ ប៉ុន្តែនឹងនិយាយថា «យើងគ្មានអ្វីត្រូវបកស្រាយទេ» «យើងមិនអាចបញ្ជាក់បានទេព្រោះនេះជាជីវិតឯកជនរបស់សិល្បករ…»៕