លោកជំទាវ យឹម ឆៃលីន បានធ្វើឱ្យអ្នកលេងបណ្តាញសង្គមផ្ទុះការចាប់អារម្មណ៍ជាថ្មីនៅពេលលោកជំទាវផ្តល់កិត្តិយសចូលរួមពិធីមង្គលការនាយព្រែកនិង ឈិន មុន្នីនាថ។ អ្វីដែលធ្វើឱ្យមហាជនរំភើបនោះគឺបានឃើញលោកជំទាវ យឹម ឆៃលីន បានបង្ហាញកាយវិការសមសួនប្រកបដោយក្តីគោរពជ្រាលជ្រៅចំពោះ សម្តេចតេជោ ហ៊ុន សែន។
នាយព្រែក កូនប្រុសពៅរបស់តារាកំប្លែងយាយយ៉យ បានចូលរោងជ័យជាមួយនឹងតារាសម្តែង ឈិន មុន្នីនាថ យ៉ាងអធិកអធមកាលពីថ្ងៃទី៧ ខែធ្នូ នេះដោយមានការអញ្ជើញចូលរួមពីថ្នាក់ដឹកនាំកំពូលៗ សិល្បករសិល្បការិនីល្បីៗប្រចាំប្រទេស។ ក្នុងចំណោមភ្ញៀវកិត្តិយសជាច្រើនលោកជំទាវ យឹម ឆៃលីន ក៏បានអញ្ជើញចូលខណៈវត្តមានរបស់លោកជំទាវនិងសម្តេចតេជោ បានធ្វើឱ្យមហាជនចាប់អារម្មណ៍ជាពិសេស។
ក្នុងវីដេអូដែលបានចែករំលែកដោយគណនីហ្វេកប៊ុក Ti Meng លោកជំទាវ យឹម ឆៃលីន បានស្លៀកឈុតប្រពៃណីយ៉ាងស្រស់ស្អាតជាមួយនឹងពណ៌បៃតង អមដោយគ្រឿងពេជ្រយ៉ាងភ្លឺចិញ្ចែងចិញ្ចាច។ មិនត្រឹមតែសម្រស់ដែលជាផ្នែកមួយនៃការទាក់ទាញអារម្មណ៍ទស្សនិកជនប៉ុណ្ណោះទេប៉ុន្តែលើកនេះទស្សនិកជនក៏មានការចាប់អារម្មណ៍នៅពេលលោកជំទាវ យឹម ឆៃលីន បង្ហាញកាយវិការយ៉ាងសមសួនជាមួយនឹងសម្តេចតេជោ ហ៊ុន សែន។ ចំណែកឯសម្តេចតេជោ បានបង្ហាញទឹកមុខញញឹមពញ្រាយ មកកាន់លោកជំទាវ យឹម ឆៃលីន វិញប្រកបដោយក្តីស្រលាញ់ទៅវិញទៅមក។
ឃើញសកម្មភាពបែបនេះហើយអ្នកលេងបណ្តាញសង្គមបានបញ្ចេញមតិយ៉ាងច្រើន។
គួរបញ្ជាក់ផងដែរថាកន្លងមកថ្មីៗនេះលោកជំទាវ យឹម ឆៃលីន បានធ្វើឱ្យអ្នកនិយមលេងអ៊ីនធឺណិតមានការចាប់អារម្មណ៍ជាពិសេសនៅពេលគ្រងឈុតពេជ្រដ៏ស្រស់ស្អាតហើយមានការលើកឡើងថាមានតែបីប៉ុណ្ណោះនៅលើពិភពលោក។ ជារឿយៗលោកជំទាវ យឹម ឆៃលីន បានបង្ហាញមានភាពទាក់ទាញជាមួយនឹងគ្រឿងអលង្ការប្រណីតៗជាច្រើន ក្នុងនោះសំម៉ូតលៀកបំពាក់របស់លោកជំទាវក៏មានការចាប់អារម្មណ៍ខ្ពស់ផងដែរ៕
