ប្រទេសវៀតណាម ៖ សារព័ត៌មាន BBC បានចុះផ្សាយកាលពីថ្ងៃទី៧ ខែឧសភា ថា ប្រទេសវៀតណាមកំពុងប្រឈមនឹងអាកាសធាតុក្តៅខ្លាំង និងមានសីតុណ្ហភាពកើនឡើងខ្ពស់បំផុតស្មើនឹង៤៤,១អង្សារសេ ។ ក្រុមអ្នកជំនាញលើកឡើងថា សីតុណ្ហភាពកើនឡើងខ្ពស់បែបនេះ ដោយសារការផ្លាស់ប្តូរអាកាសធាតុ ។

ខេត្ត Than Hua ស្ថិតនៅភាគខាងជើងប្រទេសវៀតណាមប្រឈមនឹងសីតុណ្ហភាព៤៤,១អង្សារសេ ។ មន្ត្រីថ្នាក់ខេត្តបានដាស់តឿនឱ្យពលរដ្ឋស្ថិតនៅតែក្នុងផ្ទះពេលអាកាសធាតុក្តៅខ្លាំង ។ ក្រៅពីប្រទេសវៀតណាមហើយ ប្រទេសផ្សេងៗក្នុងតំបន់អាស៊ីអាគ្នេយ៍ ក៏ប្រឈមនឹងអាកាសធាតុក្តៅខ្លាំងដូចគ្នាដែរ ។ ជាក់ស្តែង ខេត្តតាក ស្ថិតនៅភាគខាងលិចប្រទេសថៃ ក៏ប្រឈមនឹងសីតុណ្ហភាពកើនឡើងខ្ពស់ដល់៤៤,៦អង្សារសេផងដែរ ។

ចំណែកសារព័ត៌មាននៅប្រទេសមីយ៉ាន់ម៉ារាយការណ៍ថា ទីក្រុងមួយស្ថិតនៅភាគខាងកើតប្រទេសនេះបានប្រឈមនឹងសីតុណ្ហភាពកើនឡើងដល់៤៣,៨អង្សារសេ ដែលខ្ពស់បំផុតក្នុងរយៈពេល១ទសវត្សរ៍ ។ ជាទូទៅ ប្រទេសថៃ និងមីយ៉ាន់ម៉ាបានប្រឈមនឹងអាកាសធាតុក្តៅខ្លាំងក្នុងរយៈពេលមួយមុននឹងឈានចូលរដូវមូសុង ប៉ុន្តែអាកាសធាតុនៅឆ្នាំ២០២៣នេះ គឺក្តៅខ្លាំងជាងស្ថិតិកន្លងមក ។

លោក Nguyen Ngoc Huy អ្នកជំនាញផ្នែកផ្លាស់ប្តូរអាកាសធាតុនៃទីក្រុងហាណូយបានផ្តល់បទសម្ភាសន៍ជាមួយសារព័ត៌មាន AFP ថា ស្ថិតិថ្មីរបស់វៀតណាមចាត់ទុកជារឿងមួយគួរឱ្យបារម្ភ បើពិចារណាពីការផ្លាស់ប្តូរអាកាសធាតុ និងការឡើងកំដៅផែនដី ។ លោកថា ៖ «ខ្ញុំគិតថា អាកាសធាតុនឹងក្តៅជាបន្តបន្ទាប់ និងបញ្ជាក់ថា វាកាន់តែក្តៅខ្លាំងផងដែរ» ។

បច្ចុប្បន្ន អាកាសធាតុក្តៅនៅលើពិភពលោកបានកើនឡើងប្រមាណ១,១អង្សារសេចាប់តាំងពីចូលក្នុងយុគឧស្សាហកម្ម ហើយសីតុណ្ហភាពនឹងកើនឡើងជាបន្តបន្ទាប់ ខណៈប្រទេសនានាមិនចាត់វិធានការរឹតបន្តឹង ដើម្បីកាត់បន្ថយការបំភាយកាបូនឌីអុកស៊ីតទេនោះ ៕ ប្រភព ៖ bangkokbiznews

ប្រទេសថៃ ៖ ស្របពេលគណបក្សនយោបាយនានាកំពុងឃោសនាបោះឆ្នោតនៅប្រទេសថៃ មុននឹងឈានដល់ថ្ងៃបោះឆ្នោតឆ្នាំ២០២៣ គេសង្កេតឃើញថា គោលនយោបាយមួយក្នុងចំណោមគោលនយោបាយទាំងអស់ដែលបណ្តាគណបក្សផ្តល់ភាពសំខាន់នោះ គឺគោលនយោបាយការពារបរិស្ថាន និងខ្យល់បរិសុទ្ធ ជាពិសេស បញ្ហាធូលី PM2.5 ដែលបានកើនឡើងទ្វេដងម្តងទៀតនៅដើមឆ្នាំ២០២៣ និងបណ្តាលឱ្យប៉ះពាល់ដល់សុខភាពពលរដ្ឋ ។

តើគោលនយោបាយខ្យល់បរិសុទ្ធ បរិយាកាសល្អ និងកាត់បន្ថយជាតិពុលរបស់គណបក្សនយោបាយនីមួយៗដើម្បីដោះស្រាយបញ្ហាបរិស្ថាន និងធូលី PM2.5 នៅប្រទេសថៃពិតជាអាចធ្វើបាន ឬគ្រាន់តែជាការឃោសនាបោះឆ្នោត ?

*គណបក្សកាវកៃ ៖ មានគោលនយោបាយដូចជា ៖
១-នយោបាយកសិកម្ម ៖ ការពារការដុតបំផ្លាញព្រៃ និងផ្លាស់ប្តូរឧស្ម័នផ្ទះកញ្ចក់ទៅជាប្រាក់ចំណូល ។ គណបក្សនេះមានគោលនយោបាយប្រឆាំងនឹងការដុតបំផ្លាញព្រៃក្នុងរយៈពេល៣ឆ្នាំ និងផ្តល់ប្រាក់ចំនួន៣លានបាតសម្រាប់១.០០០ឃុំ, ផ្លាស់ប្តូរការដុតបំផ្លាញព្រៃឱ្យទៅជាប្រាក់ក្នុងហោប៉ៅកសិករ ព្រមទាំងផ្តល់ប្រាក់សម្រាប់ការបង្កបង្កើនផលស្រូវសើមជំនួសស្ងួត និងបង្កើតឧស្សាហកម្មកែច្នៃចំបើង និងស្នូលពោត ជំនួសឱ្យការដុត ។

២-នយោបាយការដឹកជញ្ជូន ៖ កែលម្អការដឹកជញ្ជូនស្អាតបំផុតសម្រាប់រថយន្តក្រុងអគ្គិសនីនៅគ្រប់ខេត្តត្រឹមរយៈពេល៧ឆ្នាំ និងកាត់បន្ថយការប្រើប្រាស់រថយន្តផ្ទាល់ខ្លួន ។ លើសពីនេះ នឹងបំលែងរថភ្លើងប្រើប្រេងម៉ាស៊ូតចាស់ទៅប្រើអគ្គិសនីវិញ, ពិនិត្យមើលរថយន្តមិនគិតថ្លៃ១ឆ្នាំម្តង និងគ្រប់គ្រងបរិមាណរថយន្តដឹកទំនិញនៅតាមទីក្រុង ។

*គណបក្សឆាតថៃផាត់តៈណា ៖ មានគោលនយោបាយគ្រប់គ្រងផ្សែងខ្មៅរថយន្ត, រឹតបន្តឹងការដ្ឋានសំណង់, ការសម្អាតរថយន្ត ហើយរយៈពេលយូរអង្វែង គណបក្សនេះនឹងលើកកម្ពស់ការប្រើរថយន្តអគ្គិសនី និងពង្រីកកន្លែងដឹកជញ្ជូនសាធារណៈ ។ ចំណែកផ្នែកកសិកម្មវិញ គណបក្សនឹងហាមឃាត់ការដុតចម្ការ និងធ្វើឱ្យដីមានគុណភាពល្អ ។

*គណបក្សភ្លាំងប្រះឆារ៉ាត់ ៖ ជំរុញគោលនយោបាយគ្រប់គ្រងទឹក, បំពេញទឹកនៅក្នុងទំនប់ធំៗ, បន្ថែមអាងស្តុកទឹក និងដោះស្រាយបញ្ហាការខ្វះខាតទឹក ទឹកជំនន់ និងធ្វើទំនប់សហគមន៍ ។

*គណបក្សភូមិចៃថៃ ៖ ជំរុញការប្រើប្រាស់រថយន្តក្រុងអគ្គិសនី/នាវាអគ្គិសនីឱ្យគ្របដណ្តប់នៅក្រុងបាងកក, បំពាក់ប្រព័ន្ធសូឡាដោយឥតគិតថ្លៃ និងកាត់បន្ថយអាកាសធាតុក្តៅនៅគ្រប់លំនៅឋាន ។ លើសពីនេះ គណបក្សមានគោលនយោបាយឱ្យអ្នកបើកបរម៉ូតូទាំងអស់ប្តូរមកប្រើប្រាស់ម៉ូតូអគ្គិសនីក្នុងតម្លៃសមរម្យ ។

*គណបក្សភឿថៃ ៖ ជំរុញគោលនយោបាយហាមដុតព្រៃ និងដុតចម្ការ, ចរចាជាមួយប្រទេសជិតខាង និងក្រុមហ៊ុនឯកជនថៃពីរឿងហាមដុតចម្ការ ។ លើសពីនេះ គណបក្សមានគោលនយោបាយផ្លាស់ប្តូររថយន្តក្រុងទាំងអស់នៅក្រុងបាងកក ឱ្យក្លាយជារថយន្តក្រុងអគ្គិសនីយ៉ាងឆាប់រហ័សបំផុត ព្រមទាំងរឹតបន្តឹងយានយន្តបញ្ចេញផ្សែង និងរោងចក្របញ្ចេញជាតិពុល ក៏ដូចជាការដ្ឋានសំណង់ ។

គណបក្សក៏មានគោលនយោបាយធ្វើឱ្យថៃក្លាយជាប្រទេសផលិតរថយន្តអគ្គិសនី, ជំរុញឱ្យតម្លៃរថយន្តធ្លាក់ចុះ, មានអ្នកប្រើរថយន្តអគ្គិសនីកាន់តែច្រើន និងជំរុញឱ្យមានច្បាប់ខ្យល់បរិសុទ្ធ ។

*គណបក្សប្រះឆាធិប៉ាត់ ៖ បានប្រកាសគោលនយោបាយស្តារបរិស្ថានសម្រាប់អ្នករស់នៅក្រុងបាងកក ទាំងរឿងទឹកប្រើប្រាស់ និងអាកាសធាតុ ។ គណបក្សនេះនឹងជំរុញឱ្យមានច្បាប់ខ្យល់បរិសុទ្ធ រួមទាំងកំណត់តំបន់គ្មានជាតិពុលចំនួន១៦តំបន់ ។ លើសពីនេះ គណបក្សនឹងកំណត់ស្តង់ដារសំណង់អគារ និងប្រមូលពន្ធពីរថយន្តដឹកទំនិញធំៗដែលបញ្ចេញផ្សែងខ្មៅផងដែរ ៕

ប្រភព ៖ Mono 29

ប្រទេសថៃ ៖ លោក Anucha Burapachaisri អគ្គលេខាធិការរងនាយករដ្ឋមន្ត្រី ទទួលបន្ទុកកិច្ចការនយោបាយ និងជាអ្នកនាំពាក្យការិយាល័យនាយករដ្ឋមន្ត្រី បានថ្លែងថា លោក ប្រាយុទ្ធ ចាន់អូចា នាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានទទួលជ្រាបពីការតាមដានទីផ្សារផលិតផលថៃក្នុងកម្មវិធី Taste of Thailand ដែលរៀបចំឡើងនៅហាងលក់រាយ MM Mega Market នាទីក្រុងហូជីមិញ ប្រទេសវៀតណាម ចាប់ពីថ្ងៃទី១៣-២៦ ខែមេសា ឆ្នាំ២០២៣ ។ គេសង្កេតឃើញថា មានផលិតផលថៃជាង២.៤០០មុខបានដាក់តាំងបង្ហាញក្នុងហាង ដែលមានការពេញនិយមយ៉ាងខ្លាំងពីអតិថិជនវៀតណាម ។

លោក Anucha Burapachaisri ថ្លែងថា ក្រសួងពាណិជ្ជកម្ម និងក្រុមប្រឹក្សាដឹកជញ្ជូនប្រទេសថៃ បានធ្វើដំណើរទៅទស្សនាការតាំងបង្ហាញផលិតផលថៃក្នុងកម្មវិធី Taste of Thailand កាលពីថ្ងៃទី២៦ ខែមេសា កន្លងមក ។ ការរៀបចំព្រឹត្តិការណ៍ Taste of Thailand លើកនេះបានផ្សព្វផ្សាយពីផលិតផល និងសកម្មភាពចម្អិនម្ហូប ដោយគេបានប្រើប្រាស់គ្រឿងផ្សំពីប្រទេសថៃ ។

ការិយាល័យផ្សព្វផ្សាយពាណិជ្ជកម្មក្រៅប្រទេសនៅក្រុងហូជីមិញ សហការជាមួយហាង MM Mega Market Vietnam បាននាំចូលផលិតផលថៃ ដូចជា គ្រឿងផ្សំអាហារថៃ ភេសជ្ជៈ នំកញ្ចប់ និងផ្លែឈើ ជាពិសេស អំពិលផ្អែម ត្រូវបានគេយកមកតាំងក្នុងកម្មវិធីនេះ ដើម្បីជំរុញផលិតផលថ្មីៗរបស់ថៃមកកាន់ទីផ្សារវៀតណាម និងជាជម្រើសសម្រាប់អតិថិជនវៀតណាមផងដែរ ។

ស្ថិតិរបស់នាយកដ្ឋានគយវៀតណាមបង្ហាញថា ប្រទេសវៀតណាមបាននាំចូលផលិតផលអាហារ និងនំកញ្ចប់ ស្មើនឹងទឹកប្រាក់១៦៧.៥៣លានដុល្លារអាមេរិកកាលពីឆ្នាំ២០២២ កើនឡើង១៩% ខណៈនៅឆ្នាំ២០២១ ការនាំចូលផលិតផលស្មើទឹកប្រាក់ត្រឹមតែ១៤១.៣១លានដុល្លារអាមេរិកប៉ុណ្ណោះ ។

លោក Anucha Burapachaisri បន្តថា ៖ «លោកនាយករដ្ឋមន្ត្រីបានសរសើរពីការពេញនិយមនៅទូទាំងពិភពលោកចំពោះផលិតផលថៃ និងអរគុណចំពោះការតាមដានផលិតផលថៃក្នុងកម្មវិធី Taste of Thailand ។ ដូច្នេះ ចាត់ទុកថា វាជាឱកាសពាណិជ្ជកម្មដ៏សំខាន់ ព្រមទាំងគាំទ្រផលិតផលថ្មីៗរបស់ថៃចូលទៅកាន់ទីផ្សារនាំចេញ ។ ផលិតផលថៃ គឺជាផលិតផលមានសក្តានុពលក្នុងតំបន់ និងទីផ្សារពិភពលោក ហើយលោកនាយករដ្ឋមន្ត្រីជឿថា ដោយសារផលិតផលថៃល្បីល្បាញខាងគុណភាព និងមានការពេញនិយមពីអតិថិជន វានឹងក្លាយជាគុណសម្បត្តិសំខាន់មួយដើម្បីពង្រីកទីផ្សារនាំចេញកាន់តែច្រើន» ៕

ប្រភព ៖ mgronline