កាលពីពេលថ្មីៗនេះ ព្រះមហាក្សត្រថៃ Maha Vajiralongkorn​ បានចេញព្រះរាជក្រឹត្យ ប្រកាសរំលាយសភារបស់ប្រទេសថៃចោល។

តាមច្បាប់របស់ប្រទេសថៃ ដំណើរការបោះឆ្នោតអាចប្រព្រឹត្តិទៅបាន ក្នុងចន្លោះពេល៤៥ថ្ងៃទៅ៦០ថ្ងៃ ក្រោយពេលរំលាយសភា។

ថៃនឹងធ្វើការបោះឆ្នោតនៅថ្ងៃទី១៤ ខែឧសភា ខាងមុខនេះ ដោយអ្នកវិភាគនយោបាយបានលើកឡើងថា វាជាការប្រកួតប្រជែងដ៏ខ្លាំងក្លាបំផុតមួយនៅក្នុងរបបនយោបាយប្រទេសថៃ​ ដោយលោកប្រាយុទ្ធ ចាន់អូចា មកពីសម្ព័ន្ធគណបក្ស ត្រូវប្រឈមមុខជាមួយកូនស្រីលោកថៃសុីន គឺលោកស្រី Paetongtarn Shinawatra​។

តាមការស្ទង់មតិក្រៅផ្លូវការមួយបានបង្ហាញថា លោកលោកស្រី Paetongtarn Shinawatra មានភាគរយខ្ពស់ជាងគេបង្អស់ ដែលនឹងអាចជានាយករដ្ឋមន្រ្តីថៃបន្ទាប់៕

ប្រភព៖ BBC

មិនមែនជាលើកទី១មួយទេដែលរឿងភាគថៃមួយចំនួនបានយករូបប្រាសាទអង្គរវត្តរបស់កម្ពុជាទៅដាក់ក្នុងផ្ទាំង Poster រឿងថៃក្រោមរូបភាពច្រលំម្តងហើយម្តងទៀតដោយមិនចេះអៀនខ្មាស។ ជាក់ស្តែង ថ្មីៗនេះមហាជនផ្ទុះប្រតិកម្មយ៉ាងខ្លាំងទៅលើទូរទស្សន៍ថៃប៉ុស្តិ៍លេខ៧ ដែលបានយកប្រាសាទអង្គរវត្តទៅដាក់នៅក្នុងផ្ទាំងរូបភាពរឿងបុរាណថ្មីមួយ។

មិនដឹងថាជាចេតនា ឬមានការភាន់ច្រឡំនោះទេព្រោះមិនមែនរឿងដំបូងឡើយដែលផលិតករថៃមានចិត្តយករូបប្រាសាទអង្គរវត្តសម្បត្តិបេតិកភណ្ឌរបស់ប្រទេសកម្ពុជាយកទៅដាក់នៅផ្ទាំង Poster រឿងថៃម្តងហើយម្តងទៀត ពេលប្រជាជនកម្ពុជាផ្ទុះប្រតិកម្មខាងភាគីថៃបានត្រឹមចេញមុខសុំទោសដោយលើកហេតុផលថាគ្រាន់តែជាការយល់ច្រឡំ និងបានដករូបប្រាសាទអង្គរវត្តវិញ។

យ៉ាងណាមិញ កាលពីពេលថ្មីៗនេះស្រាប់តែទូរទស្សន៍ថៃប៉ុស្តិ៍លេខ៧ បានបង្ហោះរូបភាពប្រម៉ូតរឿងថ្មីរបស់ខ្លួនដែលមានចំណងជើងថា «ភេត្រានិរមិត (เภตรานิรมิต)»ដែលជាខ្សែរឿងបែបឆ្លងភព មានតួស្រីឆ្លងទៅកាន់រជ្ជកាលទី៣នៃក្រុងរតនកោសិន្ទ្រដែលសម្តែងដោយតួឯកស្រីល្បីឈ្មោះ Mookda Narinrak និងតួឯកប្រុស Mike Pattaradet ។ អ្វីដែលធ្វើឱ្យមហាជនផ្ទុះប្រតិកម្ម និងមានចង្ងល់យ៉ាងខ្លាំងនោះ ហេតុអ្វីបានជារឿងថ្មីនេះ បានយកប្រាសាទអង្គរវត្តរបស់ខ្មែរមកធ្វើ background poster ទៅវិញ។

ការយកប្រាសាទអង្គរវត្តរបស់ខ្មែរយកទៅដាក់ក្នុងរឿងភាគថៃម្តងហើយម្តងទៀតនេះ មហាជនក៏បានលើកឡើងដែលថា នេះជាចេតនារបស់ផ លិតករថៃដែលចង់ឱ្យជនបរទេសគិតថាប្រាសាទអង្គរវត្តជារបស់ថៃ។
គួរបញ្ជាក់ផងដែរថា កន្លងមកផលិតករថៃក្នុងទូរទស្សន៍ថៃប៉ុស្តិ៍លេខ៥ និង ប៉ុស្តិ៍លេខ៣ សុទ្ធតែមានយកប្រាសាទអង្គរវត្តរបស់ខ្មែរយកទៅដាក់ក្នុង Poster រឿងរបស់ខ្លួន តែពេលមានប្រតិកម្មពីប្រជាជនកម្ពុជាពួកគេបានដករូបភាពប្រាសាទអង្គរវត្តចេញវិញ។
យ៉ាងណារឿងថ្មីនេះ មហាជនកំពុងរង់ចាំយ៉ាងអន្ទះសារថាភាគីទូរទស្សន៍ថៃប៉ុស្តិ៍លេខ៧ ដោះស្រាយយ៉ាងណា៕

សហរដ្ឋអាមេរិក ៖ លោក John Kirby អ្នកនាំពាក្យក្រុមប្រឹក្សាសន្តិសុខជាតិអាមេរិក (National Security Council) បានអំពាវនាវឱ្យប្រធានាធិបតីចិន លោក ស៊ី ជិនពីង ដែលកំពុងស្ថិតនៅទីក្រុងមូស្គូ ប្រទេសរុស្ស៊ី ដាក់សម្ពាធលើប្រធានាធិបតីរុស្ស៊ី លោក វ៉្លាឌីមៀរ ពូទីន ដើម្បីបញ្ឈប់ការទម្លាក់គ្រាប់បែកនៅប្រទេសអ៊ុយក្រែន តាមមន្ទីរពេទ្យ និងសាលារៀនផ្សេងៗ ព្រមទាំងបញ្ឈប់ការធ្វើឧក្រិដ្ឋកម្មសង្គ្រាម និងដកកងទ័ពចេញពីអ៊ុយក្រែន ។

លោក John Kirby ថ្លែងថា ៖ «យើងសង្ឃឹមថា លោកប្រធានាធិបតីចិននឹងដាក់សម្ពាធលោក ពូទីន ឱ្យបញ្ឈប់ការទម្លាក់គ្រាប់បែកនៅតាមទីក្រុង មន្ទីរពេទ្យ និងសាលារៀនរបស់អ៊ុយក្រែន ហើយបញ្ឈប់ការធ្វើឧក្រិដ្ឋកម្មសង្គ្រាម និងអំពើឃោរឃៅព្រៃផ្សៃ ព្រមទាំងដកទ័ពរុស្ស៊ីចេញពីអ៊ុយក្រែនផងដែរ ខណៈការស្នើសុំឱ្យបញ្ឈប់ការបាញ់គ្នានោះមិនគ្រប់គ្រាន់ទេ» ។

លោក John Kirby បន្តថា ៖ «យើងបារម្ភថា ចិនគ្រាន់តែទាមទារឱ្យប្រទេសទាំងពីរឈប់បាញ់គ្នា ប៉ុន្តែបណ្តោយឱ្យកងទ័ពរុស្ស៊ីឈរជើងនៅទឹកដីអ៊ុយក្រែន ហើយចិនមិនបានទាមទារឱ្យរុស្ស៊ីដកទ័ពរបស់ខ្លួនចេញពីអ៊ុយក្រែនទេ និងបណ្តោយឱ្យរុស្ស៊ីគ្រប់គ្រងដែនដីរបស់អ៊ុយក្រែនដោយខុសច្បាប់» ។

សហរដ្ឋអាមេរិកលើកឡើងបែបនេះក្រោយពីលោក ស៊ី ជិនពីង និងលោក ពូទីន បានជជែកពិភាក្សាគ្នាមិនផ្លូវការអស់ជាង៤ម៉ោងកាលពីថ្ងៃទី២០ ខែមីនា កន្លងមក ហើយមេដឹកនាំប្រទេសទាំងពីរបានពិភាក្សាគ្នាជាផ្លូវការនៅថ្ងៃទី២១ ខែមីនា ។

លោក ពូទីន បានថ្លែងក្នុងអំឡុងពេលលោកជជែកគ្នាជាមួយលោក ស៊ី ជិនពីង ថា នឹងពិភាក្សាគ្នាអំពីផែនការសន្តិភាព១២ចំណុច ដែលមេដឹកនាំចិនបានស្នើសុំដើម្បីបញ្ឈប់វិបត្តិដ៏ស្រួចស្រាវនៅអ៊ុយក្រែន និងស្នើឱ្យរុស្ស៊ីព្រមចរចាបញ្ចប់សង្គ្រាម ។

ទោះយ៉ាងណា កន្លងមក អាមេរិកបានបង្ហាញការបារម្ភរឿងចិនជួយគាំទ្ររុស្ស៊ី តាមរយៈកត្តាចម្បងៗដូចជា ការគាំទ្រពាណិជ្ជកម្ម និងបច្ចេកវិទ្យា ហើយអាមេរិកបារម្ភថា ចិនអាចនឹងផ្តល់ជំនួយកងទ័ពទៅកាន់រុស្ស៊ី និងផ្តល់អាវុធនានាដូចជា កាំភ្លើងធំជាដើម ។

ចំណែកមេដឹកនាំប្រទេសអ៊ុយក្រែនកំពុងតាមដានពីការមកកាន់ប្រទេសរុស្ស៊ីរបស់មេដឹកនាំចិន ហើយមេដឹកនាំអ៊ុយក្រែនបានសង្កត់ធ្ងន់ពីជំហរដូចគ្នាជាមួយប្រទេសចិន គឺការគោរពអំណាចអធិបតេយ្យភាព និងបូរណភាពទឹកដីអ៊ុយក្រែន ។

តាមសេចក្តីរាយការណ៍ថា រដ្ឋាភិបាលទីក្រុងគៀវបានព្យាយាមបញ្ចុះបញ្ចូលឱ្យមានការប្រជុំ ឬនិយាយទូរស័ព្ទដោយផ្ទាល់រវាងលោក ស៊ី ជិនពីង, លោក ពូទីន និងប្រធានាធិបតីអ៊ុយក្រែន ។ រីឯអាមេរិកមានបំណងឱ្យលោក ស៊ី ជិនពីង ដើរតួនាទីដោះស្រាយជម្លោះនៅអ៊ុយក្រែន ដោយការជជែកគ្នាជាមួយមេដឹកនាំអ៊ុយក្រែនផងដែរ ៕ ប្រភព ៖ The standard

ប្រទេសហ្វាំងឡង់ ៖ ហ្វាំងឡង់បានជាប់ចំណាត់ថ្នាក់ទី១ អស់រយៈពេល៦ឆ្នាំជាប់ៗគ្នា ជាប្រទេសមានក្តីសុខបំផុតនៅលើពិភពលោក រីឯប្រទេសថៃវិញបានជាប់ចំណាត់ថ្នាក់ទី៦០ ។ ចំណែកប្រទេសមានក្តីសុខតិចបំផុតនៅលើពិភពលោក គឺបានទៅលើប្រទេសអាហ្វហ្គានីស្ថាន ។

ជារៀងរាល់ឆ្នាំ នៅថ្ងៃក្តីសុខអន្តរជាតិ (International Day of Happiness) ផ្នែកបណ្តាញដោះស្រាយការអភិវឌ្ឍប្រកបដោយចីរភាពរបស់អង្គការសហប្រជាជាតិ នឹងផ្សព្វផ្សាយពីការចាត់ចំណាត់ថ្នាក់ប្រទេសនានានៅទូទាំងពិភពលោកថា តើប្រទេសណាមានក្តីសុខ និងគួរចង់រស់នៅជាងគេ ។

គេបានប្រមូលផ្តុំនូវទិន្នន័យពីប្រភពជាច្រើន និងយោងតាមសូចនាករចំនួន៦ ដូចជា ការគាំទ្រផ្នែកសង្គម, ប្រាក់ចំណូលសម្រាប់មនុស្សម្នាក់, សុខភាព, សេរីភាព, ការជួយសង្គ្រោះផ្នែកសប្បុរសធម៌ និងគ្មានអំពើពុករលួយ ។ ការចាត់ចំណាត់នៅឆ្នាំ២០២៣នេះ គឺស្រដៀងគ្នានឹងឆ្នាំ២០២២ ដែរ ដោយមានប្រទេសជាច្រើនបានជាប់ចំណាត់ថ្នាក់កំពូល ។

ប្រទេសហ្វាំងឡង់បានជាប់ចំណាត់ថ្នាក់ទី១ អស់រយៈពេល៦ឆ្នាំជាប់ៗគ្នា បន្ទាប់មក គឺប្រទេសដាណឺម៉ាក និងអ៊ីស្លង់ ។ ចំណែកប្រទេសមានក្តីសុខតិចបំផុតចំនួន៥ រួមមាន ៖
១-សាធារណរដ្ឋប្រជាធិបតេយ្យកុងហ្គោ
២-ប្រទេសហ្ស៊ីមបាវ៉េ
៣-ប្រទេសសៀរ៉ាឡេអូន
៤-ប្រទេសលីបង់
៥-ប្រទេសអាហ្វហ្គានីស្ថានទោះយ៉ាងណា អ្វីដែលធ្វើឱ្យប្រទេសហ្វាំងឡង់បានជាប់ចំណាត់ថ្នាក់កំពូលជាប្រទេសមានក្តីសុខបំផុត បើតាមអ្នកជំនាញពីសាកលវិទ្យាល័យអាល់តូ ប្រទេសហ្វាំងឡង់ និយាយថា វាមកពីកត្តាជាច្រើនយ៉ាងដូចជា ប្រព័ន្ធសុខុមាលភាពដែលជួយពលរដ្ឋក្នុងប្រទេសនេះមានអារម្មណ៍ថា ពួកគេទទួលបានការយកចិត្តទុកដាក់ ។ ចំណែកប្រទេសថៃវិញជាប់ចំណាត់ថ្នាក់ទី៦០ ក្នុងចំណោម១៣៧ប្រទេស ហើយថៃទទួលបានពិន្ទុតិចបំផុត គឺត្រឹមតែ៥.៨៤៣ពិន្ទុ ។

ក្រៅពីនេះ អ្នកវិភាគលើកឡើងថា បើទោះជាពិភពលោកជួបនឹងវិបត្តិជាច្រើនលើកក្តី រួមទាំងការរាតត្បាតនៃជំងឺកូវីដ-១៩ និងសង្គ្រាមនៅប្រទេសអ៊ុយក្រែន ប៉ុន្តែមនុស្សនៅទូទាំងពិភពលោក ពេញចិត្តនឹងជីវិតរបស់ពួកគេចាប់ពីឆ្នាំ២០២០ ដល់ឆ្នាំ២០២២ ៕ ប្រភព ៖ khaosod

ប្រទេសវៀតណាម ៖ សារព័ត៌មានរ៉យទ័ររាយការណ៍ថា មន្ត្រីវៀតណាមបានរឹបអូសយកភ្លុកដំរីចំនួន៧តោន ដែលពួកឈ្មួញបានលួចនាំចូលខុសច្បាប់មកប្រទេសវៀតណាមពីប្រទេសអង់ហ្គោឡា (ជាប្រទេសស្ថិតនៅតំបន់អាហ្វ្រិកកណ្តាល) ។ រដ្ឋាភិបាលវៀតណាមចាត់ទុកថា វាជាការចាប់យកផលិតផលធ្វើពីសត្វព្រៃដ៏ធំបំផុតក្នុងរយៈពេលជាច្រើនឆ្នាំមកនេះ ។

ការទិញ-លក់ភ្លុកដំរី គឺជាអំពើខុសច្បាប់នៅប្រទេសវៀតណាម ប៉ុន្តែការជួញដូរសត្វព្រៃខុសច្បាប់នៅតែបន្តកើតមានក្នុងប្រទេសនេះ ។ ក្រៅពីការជួញដូរភ្លុកដំរីហើយ គឺនៅមានផលិតផលធ្វើពីសត្វព្រៃផ្សេងទៀត ក៏ត្រូវបានគេលួចនាំចូលមកកាន់ប្រទេសវៀតណាមផងដែរ ។

កាលពីថ្ងៃទី២០ ខែមីនា កន្លងមក មន្ត្រីគយវៀតណាមនៅខេត្តហៃផុង បានពិនិត្យឃើញភ្លុកដំរីលាក់នៅក្នុងទូរកុងតឺន័រដឹកទំនិញ ហើយឈ្មួញនាំចូលទាំងនេះប្រាប់មន្ត្រីគយវៀតណាមថា គឺជាសណ្តែកដី ។ រដ្ឋាភិបាលវៀតណាមបានបញ្ជាក់ក្នុងសេចក្តីថ្លែងការណ៍ថា ទូរកុងតឺន័រដឹកទំនិញនេះមកពីប្រទេសសិង្ហបុរី ។

ហេតុការណ៍នេះកើតឡើងក្រោយពីវៀតណាមបានប្រទះឃើញភ្លុកដំរី ដែលលួចនាំចូលពីតំបន់អាហ្វ្រិកជាង៦០០គីឡូក្រាមនៅកំពង់ផែ Lach Huyen កាលពីខែកុម្ភៈ ឆ្នាំ២០២៣ ហើយនៅខែកុម្ភៈ នេះដែរ តុលាការវៀតណាមបានកាត់ទោសបុរសម្នាក់ឱ្យជាប់ពន្ធនាគាររយៈពេល១៣ឆ្នាំ ពីបទលួចលក់ដូរផ្នែកផ្សេងៗនៃសត្វជិតផុតពូជពីអាហ្វ្រិក ចំនួនប្រមាណ១០តោន ក្នុងនោះមានភ្លុកដំរី និងស្នែងរមាសផងដែរ ៕ ប្រភព ៖ mgronline

នៅបណ្តាប្រទេសនៃពិភពលោកយើងមានប្រទេសជាច្រើនដែលប្រទេសខ្លះជាប្រទេសអភិវឌ្ឍនិងខ្លះទៀតជាប្រទេសកំពុងអភិវឌ្ឍ។ ចំពោះប្រទេសអភិវឌ្ឍឬប្រទេសអ្នកមានប្រហែលជាប្រិយមិត្តបានដឹងនឹងស្គាល់ស្ទើតែទាំងអស់ទៅហើយ ប៉ុន្តែដោយឡែកថ្ងៃនេះយើងខ្ញុំសូមលើកយកប្រទេសដែលក្រីក្រជាងគេទាំង១០លើពិភពលោកដើម្បីអោយប្រិយមិត្តបានយល់ដឹងបន្ត ដែលប្រទេសទាំង១០នោះមានដូចជា៖

១.ប្រទេសប៊ូរុនឌី(Burundi)៖ មានទីតាំងស្ថិតនៅតំបន់អាហ្រិ្វកខាងកើត ដែលមានប្រជាជនជាង១២លាននាក់ នាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ២៧០ដុល្លារ ដែលគិតក្នុងឆ្នាំ២០២២។
២.ប្រទេសសូម៉ាលី(Somali)៖ ប្រទេសនេះបច្ចុប្បន្នមានប្រជាជនប្រហែល១៦លាននាក់ ដែលមានប្រាក់ចំណូលក្នុងប្រទេសត្រឹមតែ៣១០ដុល្លារ គិតក្នុងឆ្នាំ២០២២។
៣.ប្រទេសម៉ូសំប៊ិក(Mozambique)៖ គឺជាប្រទេសដែលស្ថិតនៅតំបន់អាហ្រ្វិកខាងកើត ដែលមានប្រជាជនសរុប៣២លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៤៦០ដុល្លារ គិតក្នុងឆ្នាំ២០២២។
៤.ប្រទេសម៉ាដាហ្កាស្កា(Madagascar)៖ មានទីតាំងស្ថិតនៅតំបន់អាហ្រិ្វកខាងកើត ដែលមានប្រជាជន២៨លាននាក់ នាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៤៨០ដុល្លារ គិតក្នុងឆ្នាំ២០២២។៥.ប្រទេសស៊ីរ៉ាលេអុង(Sierra Leone)៖ ជាប្រទេសស្ថិតនៅតំបន់អាហ្រិ្វកខាងលិច ដែលមានប្រជាជនជាង៨លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៤៩០ដុល្លារ គិតក្នុងឆ្នាំ២០២២។
៦.ប្រទេសអាហ្កានីស្ថាន(Afghanistan)៖ ប្រទេសនេះមានប្រជាជនជាង៤០លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥០០ដុល្លារ គិតក្នុងឆ្នាំ២០២២។
៧.ប្រទេសអាព្រិកកណ្តាល(Central Africa)៖ សាធារណរដ្ឋអាព្រិកកណ្តាល មានប្រជាជនសរុបជាង៥លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥១០ដុល្លារ គិតក្នុងឆ្នាំ២០២២។
៨.ប្រទេសលីប៊ែរីយ៉ា(Beria)៖ មានទីតាំងស្ថិតនៅតំបន់អាហ្រិ្វកខាងលិច ដែលមានប្រជាជនសរុបជាង៥លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥៣០ដុល្លារ គិតក្នុងឆ្នាំ២០២២។
៩.ប្រទេសនីហ្គ័រ(Niger)៖ ប្រទេសនេះស្ថិតនៅតំបន់អាហ្រិ្វកខាងលិច ដែលមានប្រជាជនជាង២៥លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥៤០ដុល្លារ គិតក្នុងឆ្នាំ២០២២។
១០.ប្រទេសកុងហ្គោ(Congo)៖ សាធារណរដ្ឋប្រជាធិបតេយ្យកុងហ្គោជាប្រទេសមួយស្ថិតនៅអាមេរិកកណ្តាល ដែលមានផ្ទៃដីសរុប២,៣៤០០គីឡូម៉ែត្រក្រឡា មានប្រជាជនសរុបទាំងអស់ជាង៩២លាននាក់ ហើយប្រាក់ចំណូលក្នុងប្រទេសប្រចាំឆ្នាំមានត្រឹមតែ៥៥០ដុល្លារ គិតក្នុងឆ្នាំ២០២២៕