Jack Ma ដែលជាស្ថាបនិកក្រុមហ៊ុន Alibaba Group Holding បានត្រលប់ទៅប្រទេសចិនដីគោកវិញកាលពីពេលថ្មីៗនេះ បន្ទាប់ពីធ្វើដំណើរទៅក្រៅប្រទេសអស់រយៈពេលជាងមួយឆ្នាំ។ ក្នុងដំណើរការវិលត្រលប់នេះមហាសេដ្ឋីរូបនេះ បានទៅទស្សនៈកិច្ចនៅសាលា Yungu ក្នុងទីក្រុង Hangzhou ដែលជាស្រុកកំណើតរបស់លោកផ្ទាល់ផងដែរ។ នេះបើយោងតាមការចុះផ្សាយរបស់សារព័ត៌មាន scmp( South China Morning Post) ចុះផ្សាយនៅថ្ងៃទី២៧ ខែមីនា ឆ្នាំ២០២៣។

កាលពីថ្ងៃច័ន្ទ លោក Ma បានជួបជាមួយលោកគ្រូ អ្នកគ្រូ និងសិស្សានុសិស្សនៅសាលា Yungu ដែលជាសាលាឯកជនដែលសិក្សាពីថ្នាក់មត្តេយ្យដល់វិទ្យាល័យ បានផ្តល់មូលនិធិដោយស្ថាបនិក Alibaba ក្នុងឆ្នាំ ២០១៧។ មហាសេដ្ឋីរូបនេះបានពិភាក្សាអំពីបញ្ហាអប់រំ និងបច្ចេកវិទ្យា ChatGPT ជាមួយសាលាផងដែរ។

គួរបញ្ជាក់ថា លោក Jack Ma បានចូលនិវត្តន៍ក្នុងនាមជាប្រធាន Alibaba ក្នុងថ្ងៃខួបកំណើតអាយុ៥៥ឆ្នាំរបស់លោកក្នុងឆ្នាំ២០១៩ ដោយបានធ្វើដំណើរទៅកាន់ប្រទេសផ្សេងៗគ្នាដើម្បីស្វែងយល់អំពីបច្ចេកវិទ្យាកសិកម្ម។ ការធ្វើដំណើររបស់លោកត្រូវបានតាមដានយ៉ាងជិតស្និទ្ធដោយអ្នកឃ្លាំមើលប្រទេសចិន។

ទោះបីជាលោក Ma បានបាត់ខ្លួនពីទិដ្ឋភាពសាធារណៈក្នុងរយៈពេលប៉ុន្មានឆ្នាំចុងក្រោយនេះក៏ដោយ ប៉ុន្តែកន្លែងរស់នៅរបស់លោកត្រូវបានឃ្លាំមើលយ៉ាងដិតដល់ ជាពិសេសបន្ទាប់ពីក្រុមហ៊ុនដែលលោកបានបង្កើត – រួមទាំង Alibaba និងក្រុមហ៊ុន Ant Group ដែលជាសាខារបស់ក្រុមហ៊ុន Fintech ស្ថិតនៅក្រោមការត្រួតពិនិត្យបទប្បញ្ញត្តិចំពេលមានការបង្ក្រាបកាន់តែខ្លាំងរបស់ទីក្រុងប៉េកាំងលើវិស័យបច្ចេកវិទ្យា។

បន្ទាប់ពីបានលាឈប់ពីតំណែងជាប្រធានប្រតិបត្តិរបស់ Alibaba អតីតគ្រូបង្រៀនភាសាអង់គ្លេស រូបនេះបាននិយាយថា លោកចង់លះបង់ថ្ងៃក្រោយចូលនិវត្តន៍របស់លោក ដើម្បីសប្បុរសធម៌ ការអប់រំជនបទ និងបន្តចំណាប់អារម្មណ៍របស់ខ្លួនក្នុងការធ្វើឱ្យវិស័យជនបទរបស់ប្រទេសចិនរស់ឡើងវិញ៕

ប្រទេសចិន ៖ រដ្ឋាភិបាលចិន និងប្រទេសហុងឌូរ៉ាស (Honduras ជាប្រទេសនៅអាមេរិកកណ្តាល) បានបង្កើតទំនាក់ទំនងការទូតជាផ្លូវការ ខណៈតៃវ៉ាន់ចោទប្រកាន់ចិនថា បានប្រើប្រាស់វិធីគំរាម និងដាក់សម្ពាធឱ្យប្រទេសហុងឌូរ៉ាសផ្តាច់ទំនាក់ទំនងជាមួយតៃវ៉ាន់ ហើយងាកទៅធ្វើមិត្តជាមួយចិន ។

ប្រទេសចិន និងហុងឌូរ៉ាស បានបង្កើតទំនាក់ទំនងការទូតជាផ្លូវការ ក្រោយពីប្រទេសហុងឌូរ៉ាសប្រកាសផ្តាច់ចំណងការទូតជាមួយតៃវ៉ាន់ និងប្រកាសថា ទទួលស្គាល់រដ្ឋាភិបាលចិនតែមួយប៉ុណ្ណោះ កាលពីថ្ងៃទី២៥ ខែ មីនា កន្លងមក ។

លោក Enrique Reina រដ្ឋមន្ត្រីការបរទេសហុងឌូរ៉ាស និងលោក Qin Kang រដ្ឋមន្ត្រីការបរទេសចិន បានចូលរួមក្នុងពិធីចុះហត្ថលេខាបង្កើតទំនាក់ទំនងការទូតជាផ្លូវការជាមួយគ្នានៅទីក្រុងប៉េកាំង ប្រទេសចិន ។ ក្រសួងការបរទេសចិនបានបញ្ជាក់ក្នុងសេចក្តីថ្លែងការណ៍ថា រដ្ឋាភិបាលប្រទេសទាំងពីរបានប្រកាសទទួលស្គាល់គ្នាទៅវិញទៅមកដោយបង្កើតទំនាក់ទំនងការទូត និងអនុវត្តចាប់ពីពេលនេះតទៅ ។

លោក Qin Kang រដ្ឋមន្ត្រីការបរទេសចិនថ្លែងថា រដ្ឋាភិបាលចិននឹងទទួលស្វាគមន៍ជានិច្ចនូវដំណើរទស្សនកិច្ចរបស់ប្រធានាធិបតីហុងឌូរ៉ាស លោកស្រី Iris Ciomara Castro Sarmiento មកកាន់ប្រទេសចិន ។

កាលពីថ្ងៃទី២៥ ខែមីនា ក្រសួងការបរទេសហុងឌូរ៉ាសបានចេញសេចក្តីថ្លែងការណ៍មួយថា លោកស្រីប្រធានាធិបតី Castro Sarmiento បានជូនដំណឹងទៅកាន់រដ្ឋាភិបាលតៃវ៉ាន់អំពីការសម្រេចចិត្តផ្តាច់ទំនាក់ទំនងការទូតជាមួយគ្នា ហើយប្រទេសហុងឌូរ៉ាសទទួលស្គាល់នយោបាយចិនតែមួយ ។ សេចក្តីថ្លែងការណ៍បញ្ជាក់ទៀតថា រដ្ឋាភិបាលចិនជារដ្ឋាភិបាលសុចរិត និងតំណាងឱ្យប្រទេសចិនទាំងមូល ហើយហុងឌូរ៉ាសនឹងគ្មានការសន្យាណាមួយក្នុងសម្ព័ន្ធភាព ឬទំនាក់ទំនងជាផ្លូវការជាមួយតៃវ៉ាន់ទៀតឡើយ ។

ចំណែកលោកស្រីប្រធានាធិបតីតៃវ៉ាន់ Tsai Ing-wen ថ្លែងថា មូលហេតុដែលហុងឌូរ៉ាសងាកមកបង្កើតទំនាក់ទំនងការទូតជាមួយចិន ដោយសាររដ្ឋាភិបាលចិនប្រើប្រាស់វិធីគំរាមកំហែង និងដាក់សម្ពាធឱ្យផ្តាច់ទំនាក់ទំនងជាមួយតៃវ៉ាន់ ខណៈពេលមុននេះ រដ្ឋមន្ត្រីការបរទេសតៃវ៉ាន់ លោក Joseph Wu ថ្លែងថា មេដឹកនាំប្រទេសហុងឌូរ៉ាសត្រូវបានគេនាំទៅរកផ្លូវខុស ដោយសារចិនសន្យាថា នឹងផ្តល់ជំនួយហិរញ្ញវត្ថុដល់ហុងឌូរ៉ាស ហើយចិនថា តៃវ៉ាន់បានផ្តាច់ទំនាក់ទំនងការទូតជាមួយហុងឌូរ៉ាសដូចគ្នា ។

ក្រោយមក លោក Joseph Wu ថ្លែងទៀតថា រដ្ឋាភិបាលហុងឌូរ៉ាសបានអំពាវនាវឱ្យតៃវ៉ាន់ឧបត្ថម្ភប្រាក់រាប់លានដុល្លារអាមេរិកដើម្បីជួយផ្នែកសេដ្ឋកិច្ច ក្នុងនោះនៅឆ្នាំ២០២២ ហុងឌូរ៉ាសបានអំពាវនាវឱ្យតៃវ៉ាន់ជួយផ្តល់ប្រាក់ចំនួន៤៥លានដុល្លារអាមេរិកដើម្បីសាងសង់មន្ទីរពេទ្យ, សាងសង់ទំនប់វារីអគ្គិសនីចំនួន៣០០លានដុល្លារអាមេរិក និងស្នើឱ្យតៃវ៉ាន់យល់ព្រមលុបចោលបំណុលចំនួន២.០០០លានដុល្លារអាមេរិក ។ លើសពីនេះ នៅឆ្នាំ២០២៣ ហុងឌូរ៉ាសបានស្នើឱ្យតៃវ៉ាន់ជួយផ្តល់ប្រាក់បន្ថែមទៀតដល់ខ្លួន ដែលធ្វើឱ្យតៃវ៉ាន់ជឿថា ហុងឌូរ៉ាសមិនចង់បានមន្ទីរពេទ្យ ឬទំនប់វារីអគ្គិសនីទេ ប៉ុន្តែពួកគេត្រូវការប្រាក់ពីតៃវ៉ាន់ច្រើនជាង ។

មុនពេលហុងឌូរ៉ាសផ្តាច់ទំនាក់ទំនងការទូតជាមួយតៃវ៉ាន់ ធ្វើឱ្យបច្ចុប្បន្ននេះ នៅសល់តែប្រទេសចំនួន១៣ ប៉ុណ្ណោះដែលទទួលស្គាល់តៃវ៉ាន់ជាផ្លូវការ បន្ទាប់ពីប្រទេស Nicaragua, El Salvador, Panama, Dominican Republic និង Costa Rica បានប្រកាសផ្តាច់ទំនាក់ទំនងការទូតជាមួយតៃវ៉ាន់កាលពីប៉ុន្មានឆ្នាំមុន ។

ប្រទេសហុងឌូរ៉ាសបានប្រកាសផ្តាច់ទំនាក់ទំនងការទូតជាមួយតៃវ៉ាន់ ក្រោយពីប្រធានាធិបតីតៃវ៉ាន់ លោកស្រី Tsai Ing-wen មានគម្រោងធ្វើទស្សនកិច្ចទៅកាន់ប្រទេសហ្គាតេម៉ាឡា និងបេលីស (ជាប្រទេសមិត្តរបស់តៃវ៉ាន់នៅអាមេរិកកណ្តាល) នៅចុងខែមីនា ឆ្នាំ២០២៣នេះ ព្រមទាំងមានគម្រោងទៅកាន់អាមេរិករយៈពេលខ្លីផងដែរ ៕ ប្រភព ៖ TNN World

រដ្ឋធានីជេរូហ្សាឡឹម៖ ក្រោយពេលមានការផ្ទុះបាតុកម្មពាសពេញប្រទេស ប្រឆាំងនឹងការបណ្ដេញរដ្ឋមន្រ្ដីក្រសួងការពារជាតិ និង ការកែប្រែប្រព័ន្ធតុលាការនោះមក ប្រធានាធិបតីអ៊ីស្រាអែល បានអំពាវនាវដល់លោកនាយករដ្ឋមន្រ្ដី ណេតាន់យ៉ាហ៊ូ បញ្ឈប់នូវផែនការរបស់គាត់។

សារព័ត៌មាន Republic World បានចេញផ្សាយ កាលពីព្រឹក ថ្ងៃចន្ទ ទី២៧ ខែមីនា ថា លោក អាសាអាក់ ហ៊ើរហ្សក (Isaac Herzog) ប្រធានាធិបតីអ៊ីស្រាអែល បានអំពាវនាវដល់លោក បែនចាមីន ណេតាន់យ៉ាហ៊ូ (Benjamin Netanyahu) នាយករដ្ឋមន្រ្ដី និង គណបក្សចម្រុះ ដែលកំពុងតែដឹកនាំប្រទេស ត្រូវតែបញ្ឈប់នូវផែនការកែប្រែប្រព័ន្ធតុលាការ ដែលនាំឲ្យបែកបាក់គ្នា។ ការអំពាវនាវរបស់លោកប្រធានាធិបតី មានគោលដៅ សម្រាប់ជាប្រយោជន៍ ដល់ការរួបរួមជាតិរបស់អ៊ីស្រាអែល និង ជាប្រយោជន៍ សម្រាប់ការទទួលខុសត្រូវ។

ផែនការរបស់លោកនាយករដ្ឋមន្ត្រី ណេតាន់យ៉ាហ៊ូ នៅក្នុងការកែប្រែប្រព័ន្ធតុលាការនេះ កំពុងតែប្រឈមមុខនឹងការប្រឆាំង កាន់តែច្រើនឡើង។ ស្ថិតក្នុងស្ថានការណ៍បែបនេះ ដែលធម្មតាប្រមុខរដ្ឋអ៊ីស្រាអែល មិនចូលរួម នៅក្នុងរឿងនយោបាយ ប៉ុន្ដែនៅថ្ងៃចន្ទ នេះ បានគូសបញ្ជាក់ អំពីការប្រកាសអាសន្ន ក្រោយការផ្ទុះបាតុកម្មពេញមួយយប់ នៅទូទាំងប្រទេសអ៊ីស្រាអែល។

ការិយាល័យរបស់នាយករដ្ឋមន្រ្ដីអ៊ីស្រាអែល បានបញ្ជាក់ ថា លោក បែនចាមីន ណេតាន់យ៉ាហ៊ូ (Benjamin Netanyahu) នាយករដ្ឋមន្រ្ដីអ៊ីស្រាអែល បានបណ្ដេញលោក យ៉ូអាវ ហ្កាលឡានត៍ (Yoav Gallant) រដ្ឋមន្រ្ដីក្រសួងការពារជាតិ ចេញពីតំណែង ក្រោយពេលគាត់និយាយ ប្រឆាំងនឹងផែនការកែប្រែប្រព័ន្ធតុលាការរបស់ប្រទេសអ៊ីស្រាអែល។ លោករដ្ឋមន្រ្ដីក្រសួងការពារជាតិ ជាសមាជិកជាន់ខ្ពស់មួយរូបរបស់គណបក្សលីឃូដ (Likud) ស្ដាំនិយមរបស់លោក ណេតាន់យ៉ាហ៊ូ ហើយបានក្លាយជាមន្រ្ដីដំបូងគេ កាលពីល្ងាចថ្ងៃសៅរ៍ អំពាវនាវឲ្យប្រឆាំងនឹងផែនការការកែប្រែប្រព័ន្ធតុលាការរបស់លោក ណេតាន់យ៉ាហ៊ូ ៕