យោងតាមអ្នកជំនាញផ្នែកសុខភាពបាននិយាយថា បើប្រៀបធៀបនឹងសណ្តែកបៃតង សមាសធាតុអាហារូបត្ថម្ភរបស់សណ្តែកបណ្តុះមានការកើនឡើងខ្លាំង។ ការទទួលទានសណ្តែកបណ្តុះ មានប្រសិទ្ធភាពពន្យារអាយុជីវិត ល្អខ្លាំងក្នុងករណី hypogonadism ហើយក៏មានប្រសិទ្ធភាពសម្រាប់ស្ត្រីពិបាកសម្រាលកូន ល្អសម្រាប់ស្ត្រីមានផ្ទៃពោះ និងការពារការរលូតកូន។
សណ្តែកបណ្តុះក៏ល្អជាពិសេសសម្រាប់ការគ្រប់គ្រងសម្ពាធឈាម។ សារធាតុប្រឆាំងអុកស៊ីតកម្ម វីតាមីន E វីតាមីន C ដែលមាននៅក្នុងសណ្តែកបណ្តុះ មានប្រសិទ្ធភាពស្រូបយកកាំរស្មីអ៊ុលត្រាវីយូឡេ បំបាត់ស្នាមអុចខ្មៅនៅលើផ្ទៃមុខ កាត់បន្ថយភាពជ្រីវជ្រួញ និងភាពខ្មៅនៃស្បែក ជួយអោយស្បែកមុខមិនស្ងួត រលោង និងមានពណ៌សភ្លឺថ្លា។
ទោះជាយ៉ាងណាក៏ដោយ មិនមែនមនុស្សគ្រប់គ្នាទាំងអស់សុទ្ធតែស័ក្តិសមក្នុងការញ៉ាំសណ្តែកបណ្តុះនោះទេ ។ យ៉ាងណាមិញមនុស្សទាំង៤ក្រុមនេះមិនត្រូវណែនាំឱ្យបរិភោគសណ្ដែកបណ្ដុះឡើយ ដែលមានដូចជា៖

១.អ្នកដែលមានជំងឺក្រពះ៖ ការទទួលទានសណ្តែកបណ្តុះធ្វើឱ្យរោគសញ្ញានៃជំងឺកាន់តែធ្ងន់ធ្ងរ អាចបណ្តាលឱ្យឈឺពោះ រាគ នាំឱ្យខ្សោះជាតិទឹក ក្រពះក៏ខ្សោយ ហើយស្ថានភាពអាចទៅជារ៉ាំរ៉ៃ។

២.អ្នកមានរាងកាយទន់ខ្សោយ៖ អ្នកដែលឧស្សាហ៍មានរាងកាយទន់ខ្សោយ ឆាប់អស់កម្លាំង វិលមុខ ឈឺក្បាល ឬមានលាមកចេញឈាមជាដើម បើទទួលទានសណ្តែកច្រើនអាចធ្វើឱ្យស្ថានភាពនេះកាន់តែធ្ងន់ធ្ងរឡើង។

៣.ស្ត្រីមានផ្ទៃពោះនិងបំបៅដោះកូន៖ ស្ត្រីដែលមានផ្ទៃពោះ ឬបំបៅដោះកូនមិនគួរទទួលទានសណ្តែកបណ្តុះឆៅឡើយ។ ដោយសារតែសណ្តែកបណ្តុះត្រូវបានបង្កើតនៅសីតុណ្ហភាព ៣៥ អង្សារសេ វាជាបរិយាកាសអំណោយផលសម្រាប់បាក់តេរីក្នុងការលូតលាស់ បើអ្នកចង់ញ៉ាំសណ្តែកបណ្តុះ អ្នកគួរយកវាទៅស្ងោរ ឬចម្អិន។

៤.មនុស្សឧស្សាហ៍ឃ្លាន៖ សណ្តែកបណ្តុះត្រូវបានគេលក់នៅតាមផ្លូវឬតាមផ្សារនានា ដូច្នេះការញ៉ាំនៅពេលឃ្លាននឹងប៉ះពាល់ដល់ក្រពះ។ ដើម្បីលើកកម្ពស់ប្រសិទ្ធភាពនៃគ្រាប់សណ្តែកអ្នកគួរញ៉ាំសណ្ដែកបណ្ដុះជាមួយនឹងអាហារផ្សេងៗទៀតទើបល្អដល់សុខភាព៕ ប្រភព៖phuntoday.com

ប្រទេសថៃ ៖ កាលពីថ្ងៃទី២៦ ខែមីនា កន្លងមក វែបសាយឈ្មោះ IQAir បានផ្សព្វផ្សាយពីការចាត់ចំណាត់ថ្នាក់ទៅលើទីក្រុងនានា ដែលមានការបំពុលបរិយាកាសនៅលើពិភពលោកឃើញថា ខេត្តឈៀងម៉ៃ ប្រទេសថៃ បានជាប់ចំណាត់ថ្នាក់ទី១ ផ្ទួនៗគ្នា គឺជាខេត្តមានអាកាសធាតុអាក្រក់បំផុតនៅលើពិភពលោក ។

វែបសាយ IQAir បានសរសេរថា ខេត្តឈៀងម៉ៃមានការបំពុលបរិយាកាសនៅទូទាំងខេត្តទាំងអស់ ហើយខ្យល់អាក្រក់ធ្វើឱ្យប៉ះពាល់ដល់សុខភាពរបស់ពលរដ្ឋរស់នៅក្នុងខេត្តនេះយ៉ាងធ្ងន់ធ្ងរ ។ ចំណែកទីក្រុងបាងកកវិញ បានជាប់ចំណាត់ថ្នាក់ទី៣៥ នៅលើពិភពលោក គឺជាទីក្រុងដែលមានខ្យល់អាកាសមិនបរិសុទ្ធ ។

មជ្ឈមណ្ឌលដោះស្រាយការបំពុលបរិយាកាសបានរាយការណ៍ពីការតាមដានអាកាសធាតុថា មិនត្រឹមតែនៅខេត្តឈៀងម៉ៃ និងទីក្រុងបាងកកប៉ុណ្ណោះទេ ដែលមានអាកាសធាតុអាក្រក់ ប៉ុន្តែនៅខេត្តជាច្រើនទៀតរបស់ប្រទេសថៃ ក៏មានអាកាសធាតុអាក្រក់ដូចគ្នាដែរដូចជា ខេត្តឈៀងរ៉ាយ, ខេត្តណាន, ខេត្តម៉ែហុងសុន, ខេត្តផាយ៉ាវ, ខេត្តឡាំពូន, ខេត្តប្រា, ខេត្តឧត្តរឌីត, ខេត្តសុខោទ័យ, ខេត្តពិស្ណុលោក, ខេត្តតាក, ខេត្តកំផែងពេជ្រ, ខេត្តភីឈិត, ខេត្តពេជ្របូរណ៍, ខេត្តបឹងកាប, ខេត្តណងខាយ, ខេត្តឡឺយ, ខេត្តណាខនផានុម, ខេត្តមុកដាហាន និងខេត្តអុប៊ុនរ៉ាជថានី ។

រដ្ឋាភិបាលប្រទេសថៃបានស្នើទៅកាន់ពលរដ្ឋទាំងអស់ឱ្យថែទាំសុខភាពរបស់ខ្លួន ដោយកាត់បន្ថយការធ្វើសកម្មភាពនៅក្រោមកំដៅថ្ងៃ ឬប្រើប្រាស់ឧបករណ៍ការងារខ្លួន បើមានការចាំបាច់ត្រូវធ្វើសកម្មភាពក្រោមកំដៅថ្ងៃ ហើយគួរតែកាត់បន្ថយរយៈពេលធ្វើសកម្មភាពក្រោមកំដៅថ្ងៃផងដែរ ។ លើសពីនេះ បើពលរដ្ឋមានបញ្ហាសុខភាព គួរទៅប្រឹក្សាជាមួយគ្រូពេទ្យ ។

ចំណែកពលរដ្ឋដែលរស់នៅខេត្តមានអាកាសធាតុអាក្រក់ខ្លាំង (តំបន់ក្រហម) រដ្ឋាភិបាលថៃបានណែនាំថា គួរតែចៀសវាងធ្វើសកម្មភាពក្រោមកំដៅថ្ងៃ ឬប្រើប្រាស់ឧបករណ៍ការពារខ្លួនបើមានការចាំបាច់ និងថែទាំសុខភាពរបស់ខ្លួន ក៏ដូចជាក្រុមគ្រួសារផងដែរ ៕ ប្រភព ៖ Tnn earth

ប្រទេសឡាវ ៖ សមាគមកាត់ដេរសម្លៀកបំពាក់ប្រទេសឡាវបានស្នើទៅកាន់រដ្ឋាភិបាលកាត់បន្ថយបពន្ធនាំចូលវត្ថុធាតុដើម ដើម្បីកាត់បន្ថយដើមទុនសម្រាប់ការផលិត និងបង្កើនសមត្ថភាពប្រកួតប្រជែងក្នុងផ្នែកឧស្សាហកម្មកាត់ដេរសម្លៀកបំពាក់របស់ឡាវនៅលើពិភពលោក ។

តាមទិន្នន័យរបស់ធនាគារពិភពលោកប្រចាំឆ្នាំ២០១៦ បង្ហាញថា ការកាត់ដេរសម្លៀកបំពាក់ គឺជាឧស្សាហកម្មសំខាន់មួយរបស់សេដ្ឋកិច្ចឡាវ គឺស្មើនឹង១០% នៃការនាំចេញទំនិញសរុប ។ ឧស្សាហកម្មកាត់ដេរបានបង្កើតការងារក្នុងស្រុកជាង១% នៃកម្លាំងពលកម្មសរុប ខណៈផ្នែកកសិកម្មមានកម្លាំងពលកម្មស្មើនឹង៨០% ។

បច្ចុប្បន្ន ឧស្សាហកម្មកាត់ដេរសម្លៀកបំពាក់នេះបានទទួលរងផលប៉ះពាល់ដោយសារខ្វះខាតកម្លាំងពលកម្ម ខណៈពលរដ្ឋឡាវបានទៅក្រៅប្រទេសដើម្បីស្វែងរកឱកាសការងារល្អជាង ។ លើសពីនេះ ប្រទេសឡាវក៏ជួបនឹងបញ្ហាអតិផរណាខ្លាំងក្លាផងដែរ ដោយសារអត្រាប្រាក់គីបធ្លាក់ចុះ រហូតដល់តម្លៃប្រេងឥន្ធនៈកើនឡើងដោយសារសង្គ្រាមរុស្ស៊ី និងអ៊ុយក្រែន គឺជាហេតុធ្វើឱ្យតម្លៃវត្ថុធាតុដើមកើនឡើងខ្ពស់ ។

បើតាមម្ចាស់ក្រុមហ៊ុននៅប្រទេសឡាវនិយាយថា ក្រុមហ៊ុនផ្សេងៗដែលទាមទារឱ្យរដ្ឋាភិបាលលើកលែងពន្ធនាំចូលវត្ថុធាតុដើមនោះ ពួកគេអាចស្នើសុំទៅកាន់ក្រុមប្រឹក្សាវិនិយោគដើម្បីកាត់បន្ថយពន្ធនាំចូល ។

តាមទិន្នន័យរបស់រដ្ឋាភិបាលឡាវបង្ហាញថា បច្ចុប្បន្ននេះ មានក្រុមហ៊ុនកាត់ដេរសម្លៀកបំពាក់ចំនួន៧៧ក្រុមហ៊ុន ក្នុងនោះ៥១ក្រុមហ៊ុន ជាក្រុមហ៊ុនធំដែលកាត់ដេរសម្លៀកបំពាក់សម្រាប់នាំចេញ ខណៈ២៦ក្រុមហ៊ុនទៀត គឺជាក្រុមហ៊ុនខ្នាតកណ្តាល និងតូច ដែលផលិតទំនិញសម្រាប់លក់ក្នុងប្រទេសឡាវ ។ ក្រុមហ៊ុនកាត់ដេរសម្លៀកបំពាក់ចំនួន៥៣ គឺជាសមាជិករបស់សមាគមកាត់ដេរសម្លៀកបំពាក់ ក្នុងនោះ៧ក្រុមហ៊ុនមានម្ចាស់ជាជនជាតិឡាវ, ៦ក្រុមហ៊ុនជាការវិនិយោគរួមគ្នារវាងឡាវ និងជនបរទេស ហើយ៤០ក្រុមហ៊ុនទៀតមានម្ចាស់ជាជនបរទេស ។

ទោះយ៉ាងណា ឧស្សាហកម្មកាត់ដេរសម្លៀកបំពាក់ឡាវបានបង្កើតប្រាក់ចំណូលពីការនាំចេញចំនួន១៩០លានដុល្លារអាមេរិកនៅឆ្នាំ២០២១ ហើយទីផ្សារនៅក្រៅប្រទេសមានដូចជា សហភាពអឺរ៉ុប សហរដ្ឋអាមេរិក ជប៉ុន និងចិន ៕ ប្រភព ៖ AECconnect

ប្រទេសអេហ្ស៉ីប៖ ក្រុមអ្នកជំនាញមកពីវិទ្យាស្ថានសិក្សាពិភពលោកបុរាណនៃសាកលវិទ្យាល័យញូវយ៉ក បានរកឃើញគ្រោងក្បាលចៀមឈ្មោលចំនួន ២,០០០ ក្បាល នៅប្រាសាទរបស់ស្តេចផារ៉ោន Ramesses II ទីក្រុងបុរាណ Abydos ភាគខាងត្បូងនៃប្រទេសអេហ្ស៊ីប ដោយទីភ្នាក់ងារសារព័ត៌មាន Reuters ចេញនៅថ្ងៃទី ២៥ ខែមីនា ។ លើសពីនេះ ពួកគេបានរកឃើញសំណង់វិមានដ៏ចំណាស់មួយ ដែលមានអាយុកាលតាំងពី ៤,០០០ ឆ្នាំមុន។
Ramesses II ត្រូវបានគេស្គាល់ថាជា Ramesses the Great គឺជាស្តេចផារ៉ោនដ៏មានឥទ្ធិពល និងជោគជ័យបំផុតមួយនៃប្រទេសអេហ្ស៊ីបបុរាណ។ គាត់បានសោយរាជ្យពីឆ្នាំ ១២១៣ ដល់ ១២៧៩ មុនគ.ស ក្នុងកំឡុងព្រះរាជាណាចក្រថ្មីនៃប្រទេសអេហ្ស៊ីប ហើយក៏ជាស្តេចផារ៉ោនទីបីនៃរាជវង្សទី ១៩ ។ ស្តេច Ramesses II មានភាពល្បីល្បាញខ្លាំងដោយសារយុទ្ធនាការយោធារបស់គាត់ដែលបានជួយពង្រីកប្រទេសអេហ្ស៊ីប និងការពារព្រំដែន។
យោងតាមប្រធានក្រុមជីកកកាយ លោកវេជ្ជបណ្ឌិត Sameh Iskandar គ្រោងក្បាលចៀមដែលទើបនឹងរកឃើញមានអាយុកាលតាំងពីសម័យ Ptolemaic ដែលមានរយៈពេលតាំងពីឆ្នាំ ៣៣២ មុនគ.ស ។ លើសពីនេះ អ្នកជំនាញក៏បានរកឃើញសាកសពម៉ាំមីដូចជា សត្វស្វា សត្វឆ្កែ ពពែព្រៃ , គោ, gazelles និង mongooses ។ យោងតាមក្រសួងទេសចរណ៍ និងវត្ថុបុរាណរបស់ប្រទេសអេហ្ស៊ីបបានឱ្យដឹងថា ទាំងនេះត្រូវបានគេជឿថាជាការបូជា ដែលបង្ហាញថាមនុស្សបុរាណនៅតែគោរពបូជាដល់ ស្តេចRamesses II ប្រហែល ១,០០០ ឆ្នាំបន្ទាប់ពីការសោយទិវង្គតរបស់ព្រះអង្គ។ របកគំហើញថ្មីនេះក៏ជួយឱ្យអ្នកវិទ្យាសាស្ត្រយល់កាន់តែច្បាស់អំពីទីតាំងបុរាណវិទ្យាដ៏សំខាន់មួយរបស់ប្រទេសអេហ្ស៊ីប គឺទីក្រុងបុរាណ Abydos ។
នៅក្នុងប្រទេសអេហ្ស៊ីបបុរាណ បានចាត់ទុកចៀមឈ្មោលគឺជានិមិត្តសញ្ញាដ៏សំខាន់នៃអំណាច និងការមានកូន។ សត្វនេះក៏មានទំនាក់ទំនងជាមួយនឹងព្រះ ចៀមឈ្មោលជាសត្វពិសិដ្ឋ ហើយជារឿយៗត្រូវបានគេយកទៅសម្លាប់ ដើម្បីធ្វើជាដង្វាយដល់ព្រះ។ សារៈសំខាន់នៃសត្វចៀមនៅក្នុងវប្បធម៌អេហ្ស៊ីបបុរាណត្រូវបានឆ្លុះបញ្ចាំងនៅក្នុងសិល្បៈ សាសនា និងទេវកថា៕ ប្រភព៖ vnexpress