សហរដ្ឋអាមេរិក ៖ ក្រុមហ៊ុន Apple Inc. បានបង្ហាញថា ខ្លួនត្រៀមកាត់បន្ថយបុគ្គលិកមួយចំនួនក្នុងផ្នែកលក់រាយនៅការិយាល័យកណ្តាលក្នុងរដ្ឋកាលីហ្វ័រញ៉ា សហរដ្ឋអាមេរិក ។ វាជាការកាត់បន្ថយបុគ្គលិកពេញម៉ោងក្នុងក្រុមហ៊ុនជាលើកដំបូង ចាប់តាំងពីក្រុមហ៊ុននេះចាប់ផ្តើមប្រើវិធានការកាត់បន្ថយការចំណាយដើមទុន និងគ្រប់គ្រងការចំណាយទាំងអស់ក្នុងក្រុមហ៊ុន នៅចុងឆ្នាំ២០២២ កន្លងមក ។

បុគ្គលិកពេញម៉ោងក្នុងផ្នែកលក់រាយដែលក្រុមហ៊ុនគ្រោងកាត់បន្ថយនេះ នឹងរួមទាំងបុគ្គលិកក្នុងផ្នែកអភិវឌ្ឍន៍រចនាសម្ព័ន្ធ ការរចនាបណ្តាញលក់រាយ និងបុគ្គលិកលក់ទូរស័ព្ទស្មាតហ្វូនក្នុងហាងផងដែរ ។ ចំពោះមូលហេតុឈានដល់ការកាត់បន្ថយបុគ្គលិកនេះ គឺដោយសារសេដ្ឋកិច្ចរបស់អាមេរិក និងពិភពលោកបានបន្ថយល្បឿនជាបន្តបន្ទាប់ ដែលធ្វើឱ្យអតិថិជនកាត់បន្ថយការចំណាយរបស់ពួកគេតាំងពីឆ្នាំ២០២២ មកម្ល៉េះ។

មុននេះ Apple Inc. បានព្យាយាមយ៉ាងខ្លាំងដើម្បីប្រើប្រាស់វិធានការ និងគ្រប់គ្រងការចំណាយនានា ដោយផ្តោតលើការបង្កើនប្រសិទ្ធភាពការងារ ជាជាងត្រូវកាត់បន្ថយបុគ្គលិករបស់ខ្លួនដូចក្រុមហ៊ុនបច្ចេកវិទ្យានាំមុខនានាលើពិភពលោក ដែលបានប្រកាសកាត់បន្ថយបុគ្គលិកជាច្រើននាក់ ។ ការជួលបុគ្គលិករបស់ក្រុមហ៊ុន Apple Inc. បានកើនឡើងជាបន្តបន្ទាប់ចាប់តាំងពីឆ្នាំ២០១៤ ដែលក្រុមហ៊ុននេះមានបុគ្គលិកនៅទូទាំងពិភពលោកចំនួន១០ម៉ឺននាក់ មកស្មើជាង១៦ម៉ឺននាក់នៅឆ្នាំ២០២២ ។

កាលពីខែកញ្ញា ឆ្នាំ២០២២ ក្រុមហ៊ុន Apple Inc. មានបុគ្គលិកទាំងអស់ចំនួន១៦ម៉ឺន៤ពាន់នាក់ ហើយគេសង្កេតឃើញថា Apple Inc. គឺជាក្រុមហ៊ុនតែមួយប៉ុណ្ណោះក្នុងចំណោមក្រុមហ៊ុនបច្ចេកវិទ្យានានា ដែលមិនបានជួលបុគ្គលិកបន្ថែមទៀតក្នុងអំឡុងពេលជំងឺកូវីដរាតត្បាត ខណៈក្រុមហ៊ុនដូចជា Google និង Meta (ជាក្រុមហ៊ុនមេរបស់ហ្វេសប៊ុក) បានជួលបុគ្គលិកជាច្រើននាក់ក្នុងអំឡុងពេលនោះ ៕ ប្រភព ៖ BTimes

ប្រទេសកូរ៉េខាងត្បូង ៖ រដ្ឋាភិបាលកូរ៉េខាងត្បូងបានអនុម័តផ្តល់ជំនួយមនុស្សធម៌ពីវិស័យឯកជន ក្នុងទឹកប្រាក់ចំនួន២៤ម៉ឺនលានវ៉ុនដល់កូរ៉េខាងជើង ។ គេចាត់ទុកថា វាជាការផ្តល់ជំនួយលើកដំបូងនៅឆ្នាំ២០២៣នេះ របស់រដ្ឋាភិបាលកូរ៉េខាងត្បូងទៅឱ្យរដ្ឋាភិបាលកូរ៉េខាងជើង ។

ក្រសួងបង្រួបបង្រួមជាតិកូរ៉េខាងត្បូងបានចេញសេចក្តីថ្លែងការណ៍ អំពីការអនុម័តជំនួយមនុស្សធម៌ពីវិស័យឯកជន ក្នុងទឹកប្រាក់ចំនួន២៤ម៉ឺនលានវ៉ុនទៅឱ្យកូរ៉េខាងជើង ។ គេចាត់ទុកថា វាជាការផ្តល់ជំនួយពីរដ្ឋាភិបាលកូរ៉េខាងត្បូងដល់រដ្ឋាភិបាលកូរ៉េខាងជើងជាលើកដំបូងក្នុងឆ្នាំ២០២៣ និងជាលើកទី៦ ចាប់តាំងពីប្រធានាធិបតី លោក Yoon Seok Yeol បានក្លាយជាមេដឹកនាំប្រទេសកូរ៉េខាងត្បូង កាលពីឆ្នាំ២០២២ ។

ការផ្តល់ជំនួយមនុស្សធម៌ដល់កូរ៉េខាងជើង គឺក្រោយពីរដ្ឋាភិបាលកូរ៉េខាងត្បូងបានទទួលយកឯកសារស្នើសុំពីភ្នាក់ងារឯកជននៅកូរ៉េខាងត្បូង កាលពីខែមីនា ឆ្នាំ២០២៣ កន្លងមក ដែលឯកសារនេះនិយាយពាក់ព័ន្ធនឹងការផ្តល់ជំនួយអាហារូបត្ថម្ភដល់កូរ៉េខាងជើង ។ នៅក្នុងឯកសារបញ្ជាក់ថា រដ្ឋាភិបាលកូរ៉េខាងត្បូងនឹងពិចារណា ហើយបន្តអនុម័តឯកសារប្រភេទនេះ ដរាបណាវាស្របតាមលក្ខណៈវិនិច្ឆ័យ ។ ជំនួយមនុស្សធម៌នេះនឹងបញ្ជូនទៅឱ្យកូរ៉េខាងជើង តាមរយៈប្រទេសចិន ។

គួរបញ្ជាក់ថា កាលពីឆ្នាំ២០២២ កូរ៉េខាងត្បូងបានផ្តល់ជំនួយមនុស្សធម៌ដល់កូរ៉េខាងជើងចំនួន១២លើក ក្នុងទឹកប្រាក់ចំនួន៥.៥២០លានវ៉ុន ។ ទោះយ៉ាងណា មិនទាន់មានការបង្ហាញជាផ្លូវការពីភាគីណាមួយថា នៅពេលជំងឺកូវីដ-១៩ បានឆ្លងរាតត្បាតនៅចន្លោះពីឆ្នាំ២០២០ ដល់ឆ្នាំ២០២១ កូរ៉េខាងជើងទទួលបានជំនួយពីកូរ៉េខាងត្បូងក្នុងផ្នែកណាខ្លះទេ ៕ ប្រភព ៖ TNN World

នៅពិភពលោកយើងនេះពិតជាមានសត្វចម្លែកៗជាច្រើនប្រភេទ ដែលអ្នកវិទ្យាសាស្រ្តបានរកឃើញទាំងនៅក្នុងទឹក លើដី និងនៅក្នុងព្រៃជាដើម។ ដូច្នេះហើយថ្ងៃនេះយើងខ្ញុំសូមលើកយកសត្វចម្លែកទាំង៥ដែលមានពិតនៅលើផែនដី៖

១.ត្រីប្រចៀវមាត់ក្រហម(Red-lipped batfish)៖ គឺជាប្រភេទត្រីដែលត្រូវបានគេរកឃើញនូវកោះGalapagos ក្នុងប្រទេសប៉េរូ។ ត្រីនេះមានមាត់ក្រហមនិងមានរាងសំប៉ែត អ្វីដែលចម្លែកនោះគឺត្រីនេះមិនចេះហែទឹកនោះទេ ពោលគឺវាប្រើព្រុយរបស់វាដើម្បីដើរលើផ្ទៃបាតសមុទ្រតែប៉ុណ្ណោះ។

២.ក្តាមពីងពាងជប៉ុន(Japan spider crab)៖ គឺជាសត្វដែលមានគ្រោងឆ្អឹងនិងអវយវៈនៅក្រៅខ្លួន ដែលជើងរបស់វាមានប្រវែង១០០ទៅ១២០ស.ម និងមានទម្ងន់៤៥ផោន ។

៣.ក្តាន់ដុះចង្កូម(Tufted)៖ ក្តាន់នេះរស់នៅក្នុងប្រទេសចិននិងមីយ៉ាន់ម៉ា អ្វីដែលចម្លែកនោះគឺក្តាន់នេះមានដុះចង្កូមដ៏មុតស្រួច ហើយមនុស្សគ្រប់គ្នាតែងតែហៅវាថាជាក្តាន់Zombie ។

៤.Saiga Antelope៖ សត្វនេះមានរូបរាងស្រដៀងទៅនឹងសត្វឈ្លូសបន្តិច អូដបន្តិច និងដំរីបន្តិចផងដែរ។ បច្ចុប្បន្នសត្វនេះកំពុងរស់នៅក្នុងប្រទេសសហរដ្ឋអាមេរិក ហើយក៏ជាប្រភេទសត្វដែលជិតផុតពូជផងដែរ។

៥.សត្វ Gerenuk៖ មនុស្សមួយចំនួនហៅវាថាជាសត្វកវែង ដោយសារតែវាឈជើងពីរក្នុងការស៊ីអាហារ ហើយវាមិនសូវផឹកទឹកច្រើននោះទេ។ បច្ចុប្បន្នសត្វនេះមានវត្តមាននៅ តំបន់អាហ្រ្វិកខាងកើត ហើយជាទូទៅវាមានទម្ងន់៣៩គីឡូក្រាម និងមានកម្ពស់១ម៉ែត្រកន្លះ៕

ប្រទេសបារាំង ៖ បើទោះជាមន្ត្រីបារាំងព្យាយាមជំរុញឱ្យពលរដ្ឋរបស់ខ្លួនប្រើប្រាស់យានជំនិះដើម្បីកាត់បន្ថយការបំពុលបរិយាកាសដូចជា ម៉ូតូអគ្គិសនី (electric scooter) ប៉ុន្តែពលរដ្ឋបារាំងជាច្រើននាក់បានប្រឆាំងនឹងការប្រើប្រាស់ម៉ូតូអគ្គិសនីនេះ ព្រោះគិតថា ភាគច្រើនវារំខានដល់ការធ្វើដំណើរ និងបណ្តាលឱ្យកើតគ្រោះថ្នាក់ចរាចរណ៍នៅតាមផ្លូវ ។

គេសង្កេតឃើញថា មានការបោះឆ្នោតជាផ្លូវការពាក់ព័ន្ធនឹងការប្រើប្រាស់ម៉ូតូអគ្គិសនី និងមានសំឡេងគាំទ្រលើសលប់ជិត៩០% លើកឡើងថា ប្រទេសបារាំងត្រូវតែហាមឃាត់អាជីវកម្មជួលម៉ូតូអគ្គិសនីនៅទីក្រុងប៉ារីស ពីព្រោះមូលហេតុចម្បង គឺចំនួនអ្នករងរបួស និងស្លាប់ដោយសារការប្រើប្រាស់ម៉ូតូអគ្គិសនីបានកើនឡើងនៅទីក្រុងប៉ារីស ។

គេចាត់ទុកថា ប៉ារីស គឺជាទីក្រុងដំបូងគេនៅលើពិភពលោកដែលបាននាំចូល និងប្រើប្រាស់ម៉ូតូអគ្គិសនីតាំងពីឆ្នាំ២០១៨ ដោយសាររដ្ឋាភិបាលបារាំងចង់ជំរុញឱ្យពលរដ្ឋប្រើប្រាស់យានជំនិះជាមិត្តជាមួយបរិស្ថាន ។ ដូច្នេះ ក្រោយពីបារាំងបាននាំចូលម៉ូតូអគ្គិសនីមកប្រើប្រាស់ មានមតិមួយចំនួននិយាយថា ការជិះម៉ូតូអគ្គិសនីមានគុណវិបត្តិច្រើនជាងគុណសម្បត្តិ ព្រោះអ្នកជិះម៉ូតូអគ្គិសនីភាគច្រើនតែងរំលោភច្បាប់ចរាចរណ៍ និងមិនគោរពអ្នកថ្មើរជើងនៅតាមផ្លូវទេ ។

លើសពីនេះ អ្នកជិះម៉ូតូអគ្គិសនីបានប្រើប្រាស់ល្បឿនលឿនខ្លាំងប្រមាណ២៧គីឡូម៉ែត្រក្នុង១ម៉ោង ហើយអ្នកជិះភាគច្រើនមិនពាក់មួកសុវត្ថិភាព ដែលធ្វើឱ្យនៅឆ្នាំ២០២២ មានអ្នកស្លាប់ដោយសារការជិះម៉ូតូអគ្គិសនីទាំងអស់៣នាក់ និងរងរបួសរហូតដល់៤៥៩នាក់ ។

ទោះយ៉ាងណា ក្រុមហ៊ុនផ្តល់សេវាកម្មជួលម៉ូតូអគ្គិសនីលើកឡើងថា វាគ្រាន់តែជាបញ្ហាតិចតួចប៉ុណ្ណោះរបស់គ្រោះថ្នាក់ចរាចរណ៍នៅទីក្រុងប៉ារីស ហើយនៅទីក្រុងប៉ារីសមានម៉ូតូអគ្គិសនីសម្រាប់ជួលប្រមាណ១៥.០០០គ្រឿង ៕ ប្រភព ៖ Tnn earth

រដ្ឋបាលរាជធានីភ្នំពេញបានចេញសេចក្តីជូនដំណឹងជាផ្លូវការ៤ចំណុចស្តីពីការរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈ ក្នុងរាជធានីភ្នំពេញ នាឱកាសបុណ្យចូលឆ្នាំថ្មីប្រពៃណីជាតិ។ ក្នុងនោះការលេងបាញ់ទឹក ជះទឹក គប់ស្បោងទឹក លាបធ្យូង ប៉ាតម្សៅ ក្នុងភូមិសាស្រ្តរាជធានីភ្នំពេញមិនត្រូវបានអនុញ្ញាតិឡើយ។

សេចក្តីណែនាំរបស់រដ្ឋបាលរាជធានីភ្នំពេញនៅថ្ងៃទី៥ ខែមេសា នេះមាន៤ចំណុចសំខាន់ៗដើម្បីរក្សាបាននូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយ សាធារណៈ ក្នុងរាជធានីភ្នំពេញ ក៏ដូចជារក្សាបាននូវប្រពៃណីជាតិ និងសេចក្ដីថ្លៃថ្នូរដ៏ផូរផង់របស់ជាតិ។
១- ត្រូវគោរពច្បាប់ចរាចរណ៍ផ្លូវគោក និងមិនត្រូវបើកបរក្នុងស្ថានភាពស្រវឹង ដើម្បីចៀសវាង គ្រោះថ្នាក់ផ្សេងៗ។
២- ចូលរួមទប់ស្កាត់គ្រោះអគ្គិភ័យ ដោយប្រុងប្រយ័ត្ន និងម្ចាស់ការខ្ពស់ចំពោះភ្លើងទៀន ធូប ភ្លើង ចង្ក្រាន ចរន្តអគ្គិសនី ដើម្បីរក្សាបាននូវទ្រព្យសម្បត្តិ អាយុជីវិតផ្ទាល់ខ្លួន និងអ្នកដទៃ។
៣- ចូលរួមលេងល្បែងប្រជាប្រិយគ្រប់ប្រភេទ និងចៀសវាងដាច់ខាតការលេងបាញ់ទឹក ជះទឹក គប់ស្បោងទឹក លាបធ្យូង ប៉ាតម្សៅ ទះគក់ដោយដៃ ឬវាយដោយរំពាត់ដល់អ្នកដំណើរ ឬជិះម៉ូតូ បង្ហោះប្រដេញគ្នាលេង់នៅតាមផ្លូវ ដែលអាចនាំឱ្យមានគ្រោះថ្នាក់ជាយថាហេតុប៉ះពាល់ដល់ អាយុជីវិតផ្ទាល់ខ្លួន និងអ្នកដំណើរ ព្រមទាំងហាមដាច់ខាតការលេងល្បែងស៊ីសង អុជផាវ និងគ្រឿងផ្ទុះគ្រប់ប្រភេទ ដើម្បីរក្សានូវភាពថ្លៃថ្នូរ ស័ក្តិសមជាកុលបុត្រកុលធីតាខ្មែរ។
៤- ត្រូវយកចិត្តទុកដាក់ក្នុងការថែរក្សាសុខភាព និងអនាម័យចៀសវាងការឆ្លងជំងឺរាតល្បាតផ្សេងៗ។ រដ្ឋបាលរាជធានីភ្នំពេញ សង្ឃឹមជឿជាក់ថា បងប្អូនប្រជាពលរដ្ឋ ក្មួយៗ ជាយុវជន យុវនារី សិស្ស និស្សិត និងកម្មករ កម្មការិនីទាំងអស់ចូលរួមអនុវត្តតាមខ្លឹមសារខាងលើ៕