ប្រទេសឥណ្ឌា ៖ សីតុណ្ហភាពនៅប្រទេសឥណ្ឌាបានកើនឡើងខ្ពស់ជិតស្មើ៤៥អង្សារសេ រដ្ឋាភិបាលបានដាស់តឿនថា ឥណ្ឌានឹងជួបអាកាសធាតុក្តៅបែបនេះជាច្រើនថ្ងៃទៀត ហើយឥទ្ធិពលរលកកំដៅនឹងនៅតែបន្ត ដែលធ្វើឱ្យសីតុណ្ហភាពកើនឡើងខ្ពស់ជាងធម្មតា រហូតដល់ចុងខែឧសភា ឆ្នាំ២០២៣ ។

កាលពីថ្ងៃទី១៨ ខែមេសា ឧតុនិយមជាតិឥណ្ឌារាយការណ៍ថា សីតុណ្ហភាពបានកើនឡើងខ្ពស់បំផុតដល់៤៤,៦អង្សារសេនៅទីក្រុង Prayagraj រដ្ឋ Uttar Pradesh បន្ទាប់មក ក្រុងបារីប៉ាដា រដ្ឋអូរីសា ដែលសីតុណ្ហភាពស្មើ៤៤,២អង្សារសេ និងក្រុង Jhazi រដ្ឋ Uttar Pradesh មានសីតុណ្ហភាពស្មើ៤៣,៦អង្សារសេ ។ អាកាសធាតុក្តៅខ្លាំងបានគ្របដណ្តប់ឥណ្ឌាអស់រយៈពេលជិត១អាទិត្យហើយ ហើយកាលពីថ្ងៃទី១៨ ខែមេសា ទីក្រុងជាច្រើនមានសីតុណ្ហភាព៤២អង្សារសេ ។

ចំណែកនៅក្រុងញូវដេលីបានទទួលអាកាសធាតុក្តៅខ្លាំង និងមានសីតុណ្ហភាពស្មើ៤០អង្សារសេអស់រយៈពេល៣ថ្ងៃជាប់គ្នា ហើយកាលពីថ្ងៃទី១៨ ខែមេសា សីតុណ្ហភាពក្នុងក្រុងនេះស្មើ៤០,៦អង្សារសេ គឺខ្ពស់ជាងសីតុណ្ហភាពធម្មតាប្រមាណ៤អង្សារសេ ។

ឧតុនិយមជាតិឥណ្ឌាដាស់តឿនថា អាកាសធាតុក្តៅខ្លាំងនឹងគ្របដណ្តប់ភាគខាងកើតប្រទេសឥណ្ឌាបន្តទៀត ។ ដូច្នេះ ធ្វើឱ្យការិយាល័យធ្វើការរបស់រដ្ឋ និងសាលារៀននានាត្រូវបិទទ្វារចាប់ពីថ្ងៃទី១៨ ខែមេសា រហូតដល់ថ្ងៃទី២៣ ខែមេសា ។ រីឯរដ្ឋមហារ៉ាស្ត្រា ដែលទើបមានអ្នកស្លាប់១៣នាក់ដោយសារអាកាសធាតុក្តៅ គេគិតថា សីតុណ្ហភាពនឹងកើនឡើងខ្ពស់ចាប់ពី២-៣អង្សារសេទៀត ។

ឧតុនិយមជាតិឥណ្ឌាថា ភ្លៀងធ្លាក់នៅថ្ងៃទី១៩ ខែមេសា អាចជួយកាត់បន្ថយអាកាសធាតុក្តៅខ្លះដែរ ប៉ុន្តែតំបន់ជាច្រើនរបស់ឥណ្ឌានឹងមានសីតុណ្ហភាពកើនឡើង និងក្តៅ រហូតដល់ថ្ងៃទី៣១ ខែឧសភា ៕ ប្រភព ៖ TNN World

ប្រទេសវៀតណាម ៖ កាលពីថ្ងៃទី១៨ ខែមេសា គណៈកម្មការប្រជាជនប្រចាំក្រុងហាណូយបានចេញបញ្ជាមួយទៅកាន់អ្នកធ្វើដំណើរតាមមធ្យោបាយដឹកជញ្ជូនសាធារណៈ និងបុគ្គលិកបម្រើការនៅតាមផ្សារទំនើប រោងភាពយន្ត និងកន្លែងកម្សាន្តនានាត្រូវពាក់ម៉ាស់ការពារខ្លួន ក្រោយពីជំងឺកូវីដ-១៩ បានឆ្លងរាតត្បាតជាថ្មីនៅក្រុងហាណូយ ។

គណៈកម្មការនេះបញ្ជាក់ថា អ្នកធ្វើដំណើរតាមមធ្យោបាយសាធារណៈទាំងអស់ រួមមាន អ្នកបើកបរ បុគ្គលិកក្រុមហ៊ុន និងអ្នកមានទំនាក់ទំនងដោយផ្ទាល់ជាមួយអតិថិជននៅតាមផ្សារទំនើប ផ្សារលក់ដុំ និងហាងទំនិញ ត្រូវតែពាក់ម៉ាស់ទាំងអស់ ។

បុគ្គលិកផ្នែកសេវាកម្ម អ្នកគ្រប់គ្រង និងអ្នកធ្វើការនៅកន្លែងបិទជិត ដូចជា បារ បន្ទប់ខារ៉ាអូខេ ហាងម៉ាស្សា ហាងកែសម្ផស្ស fitness ភោជនីយដ្ឋាន និងរោងភាពយន្ត គឺត្រូវតែពាក់ម៉ាស់គ្រប់ពេលវេលា ។ លើសពីនេះ អ្នកចូលរួមនៅតាមទីកន្លែងវប្បធម៌ និងទេសចរណ៍ ក៏ដូចជាតាមទីប្រជុំជននានា ក៏ត្រូវពាក់ម៉ាស់ដូចគ្នាដែរ ។

មន្ត្រីផ្នែកគ្រប់គ្រងប្រចាំក្រុងហាណូយ ក៏បានបញ្ជាឱ្យកាន់ស្ថាប័នពាក់ព័ន្ធឱ្យប្រុងប្រយ័ត្ន និងតាមដានស្ថានការណ៍ការឆ្លងរាតត្បាតនៃជំងឺកូវីដដើម្បីដាក់ផែនការឱ្យទាន់ពេលវេលា រួមទាំងការចាក់វ៉ាក់សាំង ពង្រឹងការពិនិត្យវិធានការសុវត្ថិភាពតាមកន្លែងផ្សេងៗដូចជា ក្រុមហ៊ុនអាជីវកម្ម សាលារៀន ព្រំដែន និងមន្ទីរពេទ្យ ។

កាលពីពេលថ្មីៗនេះ ក្រុងហាណូយមានអ្នកឆ្លងជំងឺកូវីដច្រើនបំផុតក្នុងប្រទេសវៀតណាម គឺអ្នកឆ្លងជាមធ្យមស្មើ៩៦នាក់ក្នុង១ថ្ងៃ និងមានអ្នកទៅព្យាបាលនៅមន្ទីរពេទ្យទាំងអស់ចំនួន៥៦៦នាក់ ។

នាយករងមន្ទីរពេទ្យជាតិបញ្ជាក់ថា ក្នុងមន្ទីរពេទ្យរបស់លោកកំពុងព្យាបាលអ្នកជំងឺកូវីដចំនួន១៤៦នាក់ ហើយភាគច្រើនជាមនុស្សចាស់ អ្នកមានជំងឺប្រចាំកាយ រួមទាំងអ្នកជំងឺធ្ងន់ធ្ងរផងដែរ ។

ក្រសួងសុខាភិបាលវៀតណាមឱ្យដឹងថា នាសប្តាហ៍កន្លងមក មានអ្នកឆ្លងជំងឺកូវីដថ្មីៗសរុបចំនួន២.៦៥៣នាក់នៅទូទាំងប្រទេសវៀតណាម ដោយអ្នកឆ្លងថ្មីជាមធ្យមស្មើ៣៨០នាក់ក្នុង១ថ្ងៃ និងមានអ្នកស្លាប់ដោយសារជំងឺកូវីដផងដែរនៅឆ្នាំ២០២៣ ៕ ប្រភព ៖ mgronline

រដ្ឋធានីមូស្គូ៖ ក្រោយពេលប្រធានាធិបតីកូរ៉េខាងត្បូង បានផ្លាស់ប្ដូរគោលនយោបាយការបរទេសជាលើកទី១របស់ខ្លួន ជុំវិញការផ្គត់ផ្គង់គ្រឿងសឹកចម្បាំង ជួយដល់ប្រទេសអ៊ុយក្រែន ភ្លាម អតីតប្រធានាធិបតីរុស្ស៊ី ហើយបច្ចុប្បន្ន កំពុងតែកាន់កាប់តំណែង ជាអនុប្រធានក្រុមប្រឹក្សាសន្ដិសុខ បានគំរាមសងសឹក ប្រឆាំងនឹងរដ្ឋាភិបាលក្រុងសេអ៊ូល។

បណ្ដាញទូរទស្សន៍អារ៉ាប់អន្ដរជាតិ Alarabiya News បានផ្សាយ កាលពីព្រឹក ថ្ងៃព្រហស្បតិ៍ ទី២០ ខែមេសា ថា រុស្ស៊ី កាលពីថ្ងៃពុធ បានព្រមានដល់ប្រទេសកូរ៉េខាងត្បូង ប្រឆាំងនឹងការបញ្ជូនគ្រឿងសព្វាវុធរបស់ខ្លួន ទៅជួយដល់ប្រទេសអ៊ុយក្រែន។ ការគំរាមកំហែងរបស់ក្រុងមូស្គូ បានកើតឡើង ក្រោយពេលក្រុងសេអ៊ូល បានបើកចំហ អំពីលទ្ធភា ពផ្ដល់ជំនួយយោធា ទៅដល់ក្រុងកៀវ នៅក្នុងករណី មានការវាយប្រហារទ្រង់ទ្រាយធំ ប្រឆាំងនឹងជនស៊ីវិល។

ក្រុងសេអ៊ូល ជាសម្ពន្ធមិត្ដដ៏ជិតស្និទ្ធបំផុតមួយរបស់ក្រុងវ៉ាស៊ីន នៅតំបន់អាស៊ីបូព៌ា តែងតែផ្ដល់ជំនួយមិនបង្កគ្រោះថ្នាក់ និង ជំនួយមនុស្សធម៌ ជួយដល់ប្រទេសអ៊ុយក្រែន ចាប់តាំងពីរុស្ស៊ី បានចូលលុកលុយ ទៅលើប្រទេសជិតខាងមួយនេះ កាលពីថ្ងៃទី២៤ ខែកុម្ភៈ ឆ្នាំ២០២២មក។ កូរ៉េខាងត្បូង តែងតែបដិសេធនូវការបញ្ជូនគ្រឿងសព្វាវុធ ផលិតនៅក្នុងប្រទេសរបស់ខ្លួន ទៅកាន់ប្រទេសណាមួយ កំពុងតែកើតមានជម្លោះ។ ប៉ុន្ដែរហូតមកដល់ពេលនេះ ក្រុងសេអ៊ូល បានផ្លាស់ប្ដូរឥរិយាបថរបស់ខ្លួន សម្រាប់ការបញ្ជូនគ្រឿងចម្បាំង បញ្ជូនទៅកាន់ប្រទេសអ៊ុយក្រែន ប្រសិនបើមានការវាយប្រហារទ្រង់ទ្រាយធំ ប្រឆាំងនឹងជនស៊ីវិល។

លោក យូន ស៊ូក យូល (Yoon Suk Yeol) ប្រធានាធិបតីកូរ៉េខាងត្បូង បានប្រាប់ដល់ទីភ្នាក់ងារសារព័ត៌មានរបស់ចក្រភពអង់គ្លេស Reuters កាលពីថ្ងៃពុធ នៅមុនដំណើរទស្សនកិច្ចផ្លូវរដ្ឋទៅកាន់សហរដ្ឋអាមេរិក នាសប្ដាហ៍ក្រោយ ថា «ប្រសិនបើកើតមានស្ថានការណ៍ណាមួយ ធ្វើឲ្យសហគមន៍អន្ដរជាតិ មិនអាចអត់ឱនឲ្យបាន មានដូចជា ការវាយប្រហារទ្រង់ទ្រាយធំណាមួយ ប្រឆាំងនឹងជនស៊ីវិល គឺវាពិតជាពិបាក ធ្វើឲ្យយើង បានត្រឹមតែឈរមើល ឬ បញ្ជូនត្រឹមតែជំនួយមនុស្សធម៌ និង ជំនួយហិរញ្ញវត្ថុ ទៅកាន់ប្រទេសអ៊ុយក្រែន»។

លោក ឌីមីទ្រី ប៉េស្កូវ (Dmitry Peskov) អ្នកនាំពាក្យ វិមានក្រឹមឡាំងរបស់ប្រធានាធិបតីរុស្ស៊ី លោក វ៉្លាឌីមៀ ពូទីន បានបញ្ជាក់ ថា «ការចាប់ផ្ដើមផ្គត់ផ្គង់គ្រឿងសព្វាវុធ នឹងមានន័យ ថា ជាការចូលរួម ដោយប្រយោល នៅក្នុងជម្លោះ នៅអ៊ុយក្រែន។ ដូច្នេះ វាពិតជាការគួរឲ្យសោកស្ដាយខ្លាំងណាស់ ដែលក្រុងសេអ៊ូល ក្លាយជាអមិត្ត»។

ជាមួយគ្នានេះដែរ លោក ឌីមីទ្រី មេដវេដេវ (Dmitry Medvedev) អតីតប្រធានាធិបតីរុស្ស៊ី ហើយបច្ចុប្បន្ន ជាអនុប្រធានក្រុមប្រឹក្សាសន្ដិសុខ និង ជាមនុស្សជំនិតមួយរូបរបស់លោក ពូទីន ក៏បានគំរាមកំហែង ដល់ប្រទេសកូរ៉េខាងត្បូង។ ការព្រមានប្រឆាំងនឹងក្រុងសេអ៊ូល បានកើតឡើង ក្រោយពេលលោកប្រធានាធិបតី យូន ស៊ូក យូល បានបញ្ជាក់ ថា កូរ៉េខាងត្បូង អាចនឹងផ្តល់គ្រឿងសព្វាវុធ ជួយដល់អ៊ុយក្រែន។

អតីតប្រធានាធិបតីរុស្ស៊ី រូបនេះ បានសង្កត់ធ្ងន់ ថា «ខ្ញុំឆ្ងល់ ថាតើប្រជាជនរបស់ប្រទេសមួយនេះ នឹងនិយាយយ៉ាងណាខ្លះ ខណៈពួកគេឃើញនូវការរចនាអាវុធចុងក្រោយបង្អស់របស់រុស្ស៊ី ផុសចេញពីប្រទេសជិតខាងបំផុតរបស់ពួកគេ ដែលជាដៃគូរបស់យើង គឺកូរ៉េខាងជើងនោះ? អ្វីដែលអនុប្រធានក្រុមប្រឹក្សាសន្ដិសុខរុស្ស៊ី និយាយនោះ ក៏ចង់សំដៅទៅលើការសងសឹក តាមរយៈការបញ្ជូនគ្រឿងសព្វាវុធរបស់ខ្លួន ទៅកាន់ប្រទេសកូរ៉េខាងជើង។

បើតាមសេចក្ដីរាយការណ៍នោះ បានបង្ហាញ ថា នៅក្នុងការកើនឡើងជម្លោះ និង ការវាយប្រហារទ្រង់ទ្រាយធំ ប្រឆាំងនឹងជនស៊ីវិល ប្រាកដណាស់ កូរ៉េខាងត្បូង អាចនឹងចូលរួមជាមួយនឹងបណ្ដាប្រទេសលោកខាងលិច ផ្ដល់ជំនួយយោធា ជួយដល់ប្រទេសអ៊ុយក្រែន ៕

សហរដ្ឋអាមេរិក ៖ កាលពីថ្ងៃទី១៥ ខែមេសា អ្នកថតរូបបានភ្ញាក់ផ្អើលជាខ្លាំង ព្រោះនៅសុខៗ ពួកគេបានប្រទះឃើញពន្លឺដ៏ចម្លែកមួយរាងជារង្វង់គូទខ្ចងលើមេឃនៅរដ្ឋអាឡាស្កា សហរដ្ឋអាមេរិក ហើយវាបានបាត់ទៅវិញ ក្រោយពីបង្ហាញនៅលើផ្ទៃមេឃមិនប៉ុន្មាននាទីប៉ុណ្ណោះ ។

រូបភាពនេះត្រូវបានគេចែកចាយជាច្រើនក្នុងបណ្តាញសង្គម ដែលអ្នកខ្លះជឿថា វាជាច្រកឆ្លងភពមួយដ៏អាថ៌កំបាំង និងមិនងាយកើតឡើងទេ ។ ប៉ុន្តែពន្លឺចម្លែកនេះមិនមែនជាទ្វារឆ្លងទៅកាន់ភពផ្សេងទេ ហើយក៏មិនមែនជាសញ្ញារបស់មនុស្សភពក្រៅឈ្លានពានពិភពលោកដែរ ។ ការពិត វាជាប្រេងឥន្ធនៈលើសលប់ចេញពីកាំជ្រួចរបស់ក្រុមហ៊ុន SpaceX ដែលទើបបញ្ចេញប្រមាណ៣ម៉ោង មុននឹងមានពន្លឺរាងគូទខ្ចងនេះ ។

សាស្ត្រាចារ្យមកពីសាកលវិទ្យាល័យ Alaska Fairbanks Geophysical Institute បង្ហាញថា ពេលខ្លះ កាំជ្រួចទាំងនេះក៏មានប្រេងឥន្ធនៈលើសចំនួន ហើយនៅពេលកាំជ្រួចបញ្ចេញប្រេងឥន្ធនៈនេះចេញពីទីខ្ពស់ ប្រេងឥន្ធនៈនឹងក្លាយជាទឹកកក ប៉ុន្តែបើវាបញ្ចេញនៅកន្លែងណាមានពន្លឺព្រះអាទិត្យ ហើយយើងសម្លឹងមើលនៅពេលយប់មេឃងងឹតនោះ យើងនឹងឃើញវាក្លាយជារូបពពកធំៗ ហើយពេលខ្លះ វាអាចវិលជារង្វង់បែបនេះ ។

កាំជ្រួចរបស់ក្រុមហ៊ុន SpaceX បានបញ្ចេញនៅលើផ្ទៃមេឃចេញពីមូលដ្ឋានទ័ពអាកាស Vandenberg Space Force Base នៅរដ្ឋកាលីហ្វ័រញ៉ា និងមានផ្កាយរណបប្រមាណ២៥គ្រឿងត្រូវបានគេបញ្ជូនទៅកាន់លំហរអាកាសផងដែរ ។ មុននេះ កាលពីថ្ងៃទី១៨ ខែមករា ឆ្នាំ២០២៣ ក៏ធ្លាប់មានពន្លឺបែបនេះដែរនៅហាវ៉ៃ គឺនៅលើភ្នំភ្លើង Maunakea ។ អ្នកស្រាវជ្រាវលើកឡើងថា ពន្លឺនេះអាចកើតឡើងដោយសារការបាញ់បង្ហោះផ្កាយរណបកងទ័ពរបស់ក្រុមហ៊ុន SpaceX ៕ ប្រភព ៖ environman