ក្នុងការប្រកួតកីឡាអាស៊ីអាគ្នេយ៍លើកទី៣២ (32 SEA GAME) ២០២៣ ខេត្តព្រះសីហនុ ត្រូវបានជ្រើសរើសសម្រាប់ការប្រកួតចំនួន៣ប្រភេទកីឡា ដែលមានដូចជា កីឡាទូកក្តោង កីឡាម៉ូតូទឹក កីឡាបាល់ទះលើឆ្នេរខ្សាច់ ខណៈការប្រកួតកីឡាទូកក្តោង បានចាប់ផ្តើមនៅថ្ងៃទី២ ខែឧសភា នេះហើយ។

តាមការបញ្ជាក់របស់រដ្ឋបាលខេត្តព្រះសីហនុ បានឱ្យដឹងថាកីឡាទូកក្តោង ចាប់ផ្តើមធ្វើការប្រកួតព្រឹកថ្ងៃទី២ ខែឧសភា ឆ្នាំ២០២៣ នៅវេលាម៉ោង ១០ និង៣០នាទីព្រឹក និងត្រូវបញ្ចប់នៅថ្ងៃទី៨ ខែឧសភា ឆ្នាំ២០២៣ខាងមុខ នៅទីលានប្រកួតនៅលើគោក និងនៅលើផ្ទៃទឹក។ សម្រាប់ការប្រកួតកីឡាទូកក្តោង រៀបចំនៅទីលានតេជោ ឆ្នេរកន្ទុយនាគ ដោយធ្វើការបែងចែកជា៣ទីលានប្រកួត៩ (3 Courses) ដោយ១ទីលាន មានទំហំ ១គីឡូម៉ែត្រការ៉េ មានវិញ្ញាសា ក២៣ឡាទូកក្តោងផ្នែកបុរស និងកីឡាទូកក្តោងផ្នែកនារី មានកីឡាមកពីប្រទេសចំនួន៦ ស្មើនឹង ១០១នាក់ និងមន្ត្រីបច្ចេកទេសរៀបចំការប្រកួតចំនួន ៥០នាក់ ក្នុងនោះ ៖ កម្ពុជា មានកីឡាករចូលរួមចំនួន ១៨រូប , ថៃ មានកីឡាករចូលរួមចំនួន ២៧រូប, សិង្ហបុរី មានកីឡាករចូលរួមចំនួន ១៦រូប, ម៉ាឡេស៊ី មានកីឡាករចូលរួមចំនួន ១៥រូប
ហ្វីលីពីន មានកីឡាករចូលរួមចំនួន ១៤រូប , វៀតណាម មានកីឡាករចូលរួមចំនួន ១១រូប។

គួរបញ្ជាក់ផងដែរថា ក្នុងកិច្ចប្រជុំមួយកាលពីរសៀលថ្ងៃទី១ក្រោមការដឹកនាំរបស់ឯកឧត្តម គួច ចំរើន អភិបាលខេត្តព្រះសីហនុ បានឱ្យដឹងថា ខេត្តព្រះសីហនុរៀបចំការប្រកួត៖
– ទូកក្តោងនៅឆ្នេរសុខា ចាប់ផ្តើមប្រកួតនៅថ្ងៃទី២ ខែឧសភា វេលាម៉ោង១០ និង ៣០នាទីព្រឹក និងបញ្ចប់នៅថ្ងៃទី៨ ខែឧសភា ឆ្នាំ២០២៣។
– កីឡាបាល់ទះលើឆ្នេរខ្សាច់ ប្រកួតនៅពយជំទាវម៉ៅ ចាប់ផ្ដើមចាប់ពីថ្ងៃទី១១ ខែឧសភា និងបញ្ចប់ថ្ងៃ១៦ ខែឧសភា ឆ្នាំ២០២៣។
– កីឡាម៉ូតូទឹកនៅឆ្នេរសុខា ចាប់ផ្ដើមប្រកួតថ្ងៃទី១៣ ខែឧសភា និងត្រូវបញ្ចប់ថ្ងៃទី១៦ ខែឧសភា ឆ្នាំ២០២៣។

ការរៀបចំខាងលើនេះ មានយុវជនស្ម័គ្រចិត្តរបស់ ស.ស.យ.ក ចំនួន ១១៧នាក់ ចូលរួមសហការជាមួយក្រុមការងារបច្ចេកទេស នៃគណៈកម្មការប្រកួតកីឡាស៊ីហ្គេម ក្នុងការជួយសម្របសម្រួល បដិសណ្ឋាកិច្ច ការរៀបចំសណ្តាប់ធ្នាប់ ពិធីការ សម្រាប់ក្រុមកីឡានិមួយ ដើម្បីឱ្យការប្រកួត និងការស្នាក់នៅរបស់ប្រតិភូកាន់តែមានភាពងាយស្រួល។ លើសពីនេះរដ្ឋបាលខេត្តក៏បានរៀបចំផ្ទាំងស្លាយ និងផ្ទាំង LCD សម្រាប់ធ្វើការផ្សព្វផ្សាយបន្តផ្ទាល់ នៃការប្រកួតកីឡាស៊ីហ្គេមលើកទី៣២ នៅតាមទីតាំងមួយចំនួនក្នុងក្រុងព្រះសីហនុ ដើម្បីឱ្យប្រជាពលរដ្ឋបានទស្សនាសប្បាយរីករាយគ្រប់ៗគ្នា៕

សម្តេចអគ្គមហាសេនាបតីតេជោ ហ៊ុន សែន នាយក​រដ្ឋ​មន្ត្រី​ នៃព្រះរាជាណាចក្រកម្ពុជា បានអញ្ជើញទទួលគោរមងារកិត្តិយស “ពុទ្ធមាមកាភិបាល” និង​សញ្ញា​​បត្របណ្ឌិតកិត្តិយសផ្នែក “មនុស្សសាស្ត្រ និងសាមគ្គីភាព” ដែលពិធីនេះ ក៏មានការអញ្ជើញចូលរួមពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ភរិយាដ៏ឧត្តុង្គឧត្តមរបស់សម្ដេចតេជោ និងជាប្រធានកាកបាទក្រហមកម្ពុជា រួមទាំងកូនៗរបស់សម្ដេចទាំងទ្វេរផងដែរ។ ពិធីនេះបានរៀប​ចំធ្វើឡើងនៅរមណីដ្ឋានវប្បធម៌ និងប្រវត្តិសាស្ត្រវត្តភ្នំ រាជធានីភ្នំពេញ។

សម្តេចតេជោ​ ហ៊ុន សែន បានមានប្រសាសន៍សូមថ្លែងអំណរគុណដល់គណៈកម្មាធិការ និងអាជ្ញាធរពាក់ព័ន្ធទាំងអស់ដែលបានរៀបចំពិធីដ៏មហោឡារិក និងសូមសម្តែងនូវ អំណរគុណជូនចំពោះ អង្គការពុទ្ធសាសនិកពិភពលោក និង សកលវិទ្យាល័យជាតិ ណេហ្គរី ប៉ាដាង នៃសាធារណរដ្ឋឥណ្ឌូនេស៊ី ដែលបានជ្រើសរើសថ្ងៃដ៏ពិសិដ្ឋនេះដើម្បីផ្តល់គោរមងារជា “ពុទ្ធមាមកាភិបាល នៃអង្គការពុទ្ធសាសនិកពិភពលោក” និងផ្ដល់សញ្ញាបត្រ «បណ្ឌិតកិត្តិយស ផ្នែកមនុស្សសាស្ត្រ” ជូនដល់សម្តេចនាពេលនេះ។

សម្តេចតេជោ ហ៊ុន សែន មានប្រសាសន៍ថា ការផ្តល់គោរមងារ និងសញ្ញាបត្រកិត្តិយសនាពេលនេះ គឺជាកិត្តិយសដ៏ឧត្តុង្គឧត្តមសម្រាប់សម្តេច និងប្រជាជនកម្ពុជាទាំងអស់ និងបានបង្ហាញអំពីទំនាក់ទំនងដែលមិនអាច កាត់ថ្លៃបានរវាងព្រះពុទ្ធសាសនា សន្តិភាព ការអភិវឌ្ឍ និង សន្តិសហវិជ្ជមាន ប្រកបដោយសុខដុមរមនានៃមនុស្សជាតិ ។

ការផ្តល់ជូននេះ គឺពិតជានិមិត្តរូបនៃពុទ្ធោវាទរបស់ព្រះសម្មាសម្ពុទ្ធដែលបានជ្រៀបចូលទៅក្នុងជីវិតរស់នៅរបស់មនុស្សលោក ទាំងទិដ្ឋភាពសង្គម វប្បធម៌ នយោបាយ និង សេដ្ឋកិច្ច។

សម្តេចតេជោបានគូសបញ្ជាក់ថា កម្ពុជាបានប្រកាន់យកព្រះពុទ្ធសាសនាជាសាសនារបស់រដ្ឋ នៅក្នុងរដ្ឋធម្មនុញ្ញឆ្នាំ១៩៩៣ ដែលការណ៍នេះតំណាងឱ្យស្មារតី និងទស្សនវិជ្ជាតែមួយរបស់កម្ពុជា ។ សម្តេចមានមោទនភាពក្នុងការនិយាយថា ព្រះពុទ្ធសាសនាគឺជាមូលដ្ឋាន សម្រាប់ការកសាងសន្តិភាព ការបង្រួបបង្រួមជាតិ ការកសាងជាតិឡើងវិញ ក្រោយជម្លោះក៏ដូចជាការចូលរួមស្ថាបនារបស់យើង៕

ក្រសួងប្រៃសណីយ៍ និងទូរគមនាគមន៍ បានឱ្យដឹងថា តំបន់សេវាអ៊ីនធឺណិតល្បឿនលឿន ចំនួន១៨៦ទីតាំង នឹងត្រូវដាក់ពង្រាយនៅក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ។

ក្រសួងក៏បានបញ្ជាក់ទៀតថា ទីតាំងទាំង១៨៦ កន្លែងរួមមាន៖ នៅសាលក្នុងពហុកីឡដា្ឋន សាលទស្សនិកជន VIP សាលទស្សនិកជនខាងក្រៅ វិមានកីឡដ្ឋាន មណ្ឌលកីឡាហែលទឹក មណ្ឌលកីឡាហុកគី មណ្ឌលកីឡាក្នុងសាល មណ្ឌលកីឡាវាយសី និងវាយកូនឃ្លីលើតុ មណ្ឌលកីឡាវាយកូនបាល់ សាលហាត់កីឡាប្រយុទ្ធ និងតំបន់សាធារណៈខាងក្រៅ ពហុកីឡដ្ឋាន។

ក្រសួងក៏ បានណែនាំឱ្យប្រជាពលរដ្ឋស្កេន QR Code ដែលមាននៅក្នុងរូបភាព ឬផ្ទាំងបង្ហាញ នៅតាមទីតាំងជាក់ស្តែង ដែលបានកំណត់ ដើម្បីភ្ជាប់ WiFi ប្រើប្រាស់សេវាអ៊ីនធឺណិតល្បឿនលឿន ដោយឥតគិតថ្លៃ៕

កំប្លោក ដែលភាសាអង់គ្លេសហៅថា -Water Hyacinth និងមានឈ្មោះវិទ្យាសាស្ត Pontederia crassipes Mart ជារុក្ខជាតិ ដុះដោយឯកឯងនៅតាមទន្លេ ស្ទឹង ព្រែក បឹងបួរ ស្រះ ឬត្រពាំង។ រុក្ខជាតិនេះមានប្រភពដើមមកពី ប្រទេសក្តៅនៃទ្វីបអាមេរិកខាងត្បូង។ កំបោក ត្រូវបានប្រជាជនខ្មែរ និយមយកផ្កានៃរុក្ខជាតិនេះធ្វើជាបន្លែ និងអន្លក់ និងយកវាមកធ្វើជាជី ចំណីសត្វ និងសម្ភារៈប្រើប្រាស់ផ្សេងៗផងដែរ។

លក្ខណៈរូបសាស្ត្រ តិណជាតិ (herbaceous) ដុះអណ្តែតលើទឹក មានកម្ពស់៣០-៥០ស.ម មានតួដើមតូចៗ (stolons) វារចេញពីតួដើមមេ ហើយចាក់ឫសថ្មី។ ស្លឹក ងើបត្រង់ ចេញពីទឹក ឬអណ្ដែតលើទឹក។ ទងស្លឹកស្ពោតផុសៗ (spongy) មានរាងកំប៉ោង នៅផ្នែកក្រោម មាន កញ្ចុំផ្កាជាកួរ (spike) ដោយ ផ្កាមានត្របក៣ ស្រទាប់៣ ជាបរិបុប្ផា (perianth) ជាប់គ្នានៅផ្នែកក្រោម ពណ៌ស្វាយមានអុចៗពណ៌ខៀវ និងលឿង។ កេសរឈ្មោល៦ គឺ ៣វែង និង៣ខ្លី ទងកេសរឈ្មោលមានក្រពេញ។ កេសរញី ៣ជាប់ គា្នជាអូវែរ មាន ៣ក្លែប (ovary 3-loculed)។ ផ្លែជា capsule បែកជា ៣ផ្នែក គ្រាប់តូចៗ មានឆ្នូត។សម្រាប់លក្ខណៈជីវសាស្ត្រវិញ កំប្លោក មានដើមបែកតាមមែកផ្ដល់កូនយ៉ាងរហ័ស ដុះរាលដាល រាតត្បាតលើរុក្ខជាតិឯទៀត និងសត្វផងដែរ។ ចំណែកឯលក្ខណៈអេកូឡូស៊ី ជារុក្ខជាតិដុះអណ្តែតនៅលើផ្ទៃទឹក។

ចំពោះការប្រើប្រាស់ «កំប្លោក» សម្រាប់ជាបន្លែ គេយកផ្កាធ្វើជាបន្លែ និងអន្លក់។ រីឯ ស្លឹក និងដើមស្រស់ៗយកធ្វើជាជី និងចំណីសត្វ និង ដើមហាលឱ្យក្រៀម វេញធ្វើជារបស់ប្រើប្រាស់ ដូចជាកន្ត្រក់ អង្រឹង កន្ទេល ជាដើម។ មិនត្រឹមតែប៉ុណ្ណោះគេក៏ប្រើប្រាស់កំប្លោក ដើម្បីទាញ ឬស្រូបយកលោហៈធ្ងន់ (heavy metals) ពីភក់ ក្នុងការសម្អាតទឹកកខ្វក់ ឬសំណល់រាវ ក្នុងស្រះ ត្រពាំង ឬបឹងនានាផងដែរ៕