បរទេស៖ អ្នកស្រាវជ្រាវរបស់អង្គការឧតុនិយមពិភពលោកបានកំណត់ថាប្រទេសអាហ្វហ្គានីស្ថាន(Afghanistan) ប៉ាពួញូហ្គីណេ(Papua New Guinea) និងអាមេរិកកណ្តាល(Central America) រួមទាំងហ្គាតេម៉ាឡា(Guatemala) ហុងឌូរ៉ាស(Honduras) និងនីការ៉ាហ្គា(Nicaragua) គឺជាកន្លែងដែលមានហានិភ័យនៃកម្តៅខ្ពស់បំផុត។
យោងតាមទស្សនាវដ្តី Nature Communications ដែលចុះនៅថ្ងៃទី២៥ ខែមេសា បានឱ្យដឹងថា ប្រទេសទាំងនេះគឺជាតំបន់ដែលងាយនឹងរងគ្រោះនៃកម្តៅខ្លាំងបំផុតលើលោក ដោយសារតែកំណើនប្រជាជន ការកាប់បំផ្លាញព្រៃឈើ និងជាតំបន់ដែលគ្មានទឹកផងដែរ។ ប្រទេសនេះមិនត្រឹមតែមានសក្តានុពលខ្ពស់ក្នុងការស៊ូទ្រាំនឹងកំដៅកំណត់ត្រាប៉ុណ្ណោះទេ ប៉ុន្តែផលវិបាកនឹងកាន់តែធ្ងន់ធ្ងរដោយសារតែការលំបាកដែលមានស្រាប់ ជាពិសេសចំពោះផលប៉ះពាល់នៃចំនួនប្រជាជនដែលកំពុងកើនឡើងយ៉ាងឆាប់រហ័ស និងខ្វះលទ្ធភាពក្នុងការទទួលបានការថែទាំវេជ្ជសាស្រ្ត និងការផ្គត់ផ្គង់ថាមពលនៅមានកម្រិត ដែលបណ្តាលឱ្យកាត់បន្ថយការអត់ធ្មត់ចំពោះសីតុណ្ហភាពខ្ពស់។

កំដៅខ្លាំងគឺជាគ្រោះធម្មជាតិដ៏កាចសាហាវបំផុតមួយ អាកាសធាតុក្តៅបង្កផលប៉ះពាល់អវិជ្ជមានលើទ្រង់ទ្រាយធំ វាកាត់បន្ថយគុណភាពខ្យល់ បង្កើនគ្រោះរាំងស្ងួត និងបង្កើនហានិភ័យនៃភ្លើងឆេះព្រៃ ។ អាកាសធាតុក្តៅក៏ប៉ះពាល់ដល់សុខភាពមនុស្សផងដែរដូចជា អស់កម្លាំង ឈឺក្បាល វិលមុខ ក្អួត បាត់បង់ស្មារតី និងបណ្តាលឱ្យមានជំងឺដាច់សរសៃឈាមខួរក្បាល ជំងឺដែលទាក់ទងនឹងបេះដូងធ្ងន់ធ្ងរ ឬអាចនាំឱ្យពិការ និងធ្វើឱ្យបាត់បង់ជីវិតផងដែរ។

កំដៅ និងព្រឹត្តិការណ៍អាកាសធាតុធ្ងន់ធ្ងរផ្សេងទៀតនឹងកាន់តែអាក្រក់ទៅៗ នៅពេលដែលពិភពលោកនៅតែបន្តប្រើប្រាស់ឥន្ធនៈហ្វូស៊ីល។ របាយការណ៍នេះជំរុញឱ្យរដ្ឋាភិបាលជុំវិញពិភពលោករៀបចំខ្លួនសម្រាប់កំដៅដោយបង្កើតមជ្ឈមណ្ឌលត្រជាក់ និងកាត់បន្ថយម៉ោងធ្វើការរបស់កម្មករនៅខាងក្រៅ។ ក្រុមស្រាវជ្រាវបានសង្កត់ធ្ងន់ថា រដ្ឋាភិបាលត្រូវរៀបចំផែនការគ្រប់គ្រងកំដៅ និងជូនដំណឹងដល់សហគមន៍ និងការពារប្រជាជនដែលងាយនឹងរងគ្រោះ៕
ប្រភព៖vnexpress

បរទេស៖ ទន្ទឹមនឹងមហិច្ឆិតាក្នុងការជ្រៀតចូលយ៉ាងជ្រៅទៅក្នុងទ្វីបអឺរ៉ុប ប្រទេសចិនទំនងជានឹងវ៉ាដាច់ប្រទេសជប៉ុនក្នុងនាមជាប្រទេសនាំចេញរថយន្តធំជាងគេបំផុតរបស់ពិភពលោកនៅឆ្នាំនេះ។
នៅក្នុងកម្មវិធី Shanghai Auto Show 2023 ម៉ាករថយន្តចិនដែលកំពុងលេចធ្លោដូចជា ZEEKR, NETA និង HiPhi បានប្រកាសពីផែនការទៅកាន់ទ្វីបអឺរ៉ុបដែលគ្របដណ្តប់ដោយក្រុមហ៊ុនរថយន្តយក្សពិភពលោកដែលមានអាយុកាលយូរឆ្នាំមកហើយ។

ប្រសិនបើការព្យាករណ៍ត្រឹមត្រូវ ប្រទេសចិននឹងវ៉ាដាច់ប្រទេសជប៉ុន ដែលជាប្រទេសនាំចេញរថយន្តកំពូលរបស់ពិភពលោកទាក់ទងនឹងទិន្នផល។ នៅឆ្នាំ 2022 ការនាំចេញរបស់ប្រទេសជប៉ុនបានធ្លាក់ចុះជិត 8% ពីមួយឆ្នាំទៅមួយឆ្នាំមកត្រឹម 3.5 លានគ្រឿង។ ខណៈការនាំចេញរថយន្តរបស់ប្រទេសចិនបានកើនឡើងជាង 3 លានគ្រឿងក្នុងរយៈពេលពីរឆ្នាំចុងក្រោយនេះ ដោយសារភាពប្រសើរឡើងនៃការប្រកួតប្រជែងខ្សែសង្វាក់ផ្គត់ផ្គង់ គុណភាព បច្ចេកវិទ្យា និងម៉ាកយីហោរបស់ប្រទេសនេះ ។

នៅឆ្នាំនេះ សមាគមរថយន្តដឹកអ្នកដំណើរចិន (CPCA) បានព្យាករណ៍ថា ការនាំចេញរថយន្តអាចឈានដល់ 4.5 លានគ្រឿងជាលើកដំបូង កើនឡើងជិត 30% ធៀបនឹង 3.11 លានគ្រឿងកាលពីឆ្នាំមុន។ ក្រុមហ៊ុនដំឡើងរថយន្តផ្សេងទៀតក៏យល់ស្របនឹងទស្សនៈនេះផងដែរ ដោយនិយាយថា ពួកគេត្រូវបានទាក់ទងដោយអ្នកចែកបៀបរទេសក្នុងអំឡុងពេលថ្ងៃនៃកម្មវិធី Shanghai Auto Show ឆ្នាំ 2023 ដែលចាប់អារម្មណ៍យ៉ាងខ្លាំងក្នុងការលក់រថយន្តអគ្គិសនីដែលផលិតដោយប្រទេសចិន។ ការលក់សរុបនៃរថយន្តសាំង និងរថយន្តអគ្គិសនីនៅក្នុងប្រទេសចិនបានកើនឡើង 0.3 ភាគរយពីមួយឆ្នាំទៅមួយឆ្នាំដល់ 1.59 លានគ្រឿងក្នុងខែមីនា នេះបើយោងតាមសមាគមរថយន្តដឹកអ្នកដំណើរចិន CPCA ។
លោក Jack Chen នាយកផ្នែកអភិវឌ្ឍន៍យុទ្ធសាស្ត្រនៅ Jetour ដែលជាក្រុមហ៊ុនបុត្រសម្ព័ន្ធរថយន្តអគ្គិសនីរបស់ Chery Automobile បាននិយាយថា ទស្សនវិស័យនៃការនាំចេញរថយន្តចិនគឺ “ភ្លឺខ្លាំង” ដោយផ្អែកលើការបញ្ជាទិញដែលខ្លួនបានទទួល។ លោកបានបញ្ជាក់ថា៖ «តួលេខនាំចេញពិតប្រាកដនឹងលើសពីការរំពឹងទុករបស់ទីផ្សារ ដោយមើលឃើញពីហេតុផល។ លោកបាននិយាយទៀតថា រថយន្តចិនត្រូវបានចាត់ទុកថាជាតម្លៃសមរម្យនៅក្នុងទីផ្សារមួយចំនួន ហើយរថយន្តចិនគឺមានប្រជាប្រិយភាពខ្លាំងណាស់ទាំងនៅអាស៊ីអាគ្នេយ៍ អាមេរិកខាងត្បូង និងអាហ្វ្រិក។ ប្រភព៖vnexpress

ប្រទេសចិន ៖ ខេត្ត Guizhou ស្ថិតនៅភាគនិរតីនៃប្រទេសចិនបានលើកកម្ពស់វិស័យទេសចរណ៍ក្នុងឱកាសបុណ្យថ្ងៃការងារប្រចាំឆ្នាំ ចាប់ពីថ្ងៃទី២៩ ខែមេសា រហូតដល់ថ្ងៃទី៣ ខែឧសភា ឆ្នាំ២០២៣ ។ ភ្ញៀវទេសចរចិនជាច្រើននាក់បានកក់សំបុត្រតាមក្រុមហ៊ុនទេសចរណ៍នានាក្នុងរយៈពេល២សប្តាហ៍ មុនថ្ងៃឈប់សម្រាកយូរថ្ងៃមកដល់ ។ គេសង្កេតឃើញថា ភ្ញៀវទេសចរបាននាំគ្នាកក់បន្ទប់ស្នាក់នៅរហូតដល់៨០% ។

ចាប់ពីដើមខែមេសា ឆ្នាំ២០២៣ មក ភ្ញៀវទេសចរចិនបានទៅកម្សាន្តនៅតំបន់ទឹកជ្រោះមួយកន្លែងឈ្មោះ Huangguoshu Waterfall ស្ថិតនៅទីក្រុង Anshun ។ ទឹកជ្រោះនៅទីនេះ ស្ថិតក្នុងចំណោមទឹកជ្រោះដ៏ធំបំផុតនៅតំបន់អាស៊ី ហើយមានភ្ញៀវទេសចរមកកម្សាន្តនៅទីនេះជាង១៦.០០០នាក់ក្នុង១ថ្ងៃ ។ គេរំពឹងថា ក្នុងថ្ងៃឈប់សម្រាកយូរថ្ងៃ ភ្ញៀវទេសចរនឹងមកកម្សាន្តនៅទីនេះជាង៣ម៉ឺននាក់ក្នុង១ថ្ងៃ ។

លើសពីនេះ ក្នុងភូមិបុរាណមួយឈ្មោះ Xijiang Qianhu Miao មានភ្ញៀវទេសចរមកដើរទស្សនាភាពស្រស់ស្អាតក្នុងភូមិ និងទស្សនានូវរបាំប្លែកៗដែលបង្ហាញពីវប្បធម៌ដ៏ល្បីល្បាញរបស់ក្រុមជនជាតិភាគតិច Miao ។

ធនធានទេសចរណ៍ដ៏សម្បូរបែប រួមទាំងមានទេសភាពធម្មជាតិប្លែកៗ ក៏ដូចជាវប្បធម៌របស់ជនជាតិភាគតិចបានធ្វើខេត្ត Guizhou បង្ហាញនូវមុខមាត់របស់ខ្លួន ជាមួយផលិតផលផ្នែកទេសចរណ៍ ព្រមទាំងបង្ហាញនូវព្រឹត្តិការណ៍ពិសេសដើម្បីផ្តល់បទពិសោធន៍ថ្មីដល់ភ្ញៀវទេសចរជាតិ និងអន្តរជាតិ ។

ចំណែកនៅទីក្រុង Taijiang មន្ត្រីក្នុងទីក្រុងនេះកំពុងតែជំរុញផ្នែកទេសចរណ៍នៅជនបទ ដែលពោរពេញទៅដោយធម្មជាតិដ៏ស្រស់ស្អាត ហើយអ្នកភូមិរស់នៅតាមបែបសាមញ្ញ ។ គេបានជំរុញឱ្យមានការផ្សព្វផ្សាយទេសចរណ៍បែបផ្ទះសំណាក់ និងបោះជំរំផងដែរ ដើម្បីឱ្យពលរដ្ឋទទួលបានប្រាក់ចំណូលពីវិស័យទេសចរណ៍ ៕

ប្រភព ៖ China Face