អាមេរិក៖ Meta បានកត់ត្រាការកើនឡើង 3% នៃប្រាក់ចំណូលនៅក្នុងត្រីមាសទី 1 ដោយយកឈ្នះលើការព្យាករណ៍របស់ Wall Street និងបញ្ច្រាសនិន្នាការនៃការធ្លាក់ចុះ 3 ត្រីមាសជាប់ៗគ្នា។
នៅក្នុងរបាយការណ៍ហិរញ្ញវត្ថុត្រីមាសទី 1 របស់ខ្លួន Meta ក៏បាននិយាយថា កំណើនអ្នកប្រើប្រាស់គឺពិតជាខ្លាំងនៅក្នុងត្រីមាសថ្មីៗនេះ។ ចំនួនអ្នកប្រើប្រាស់សកម្មប្រចាំខែនៅលើកម្មវិធីបានកើនឡើង 5% ពីមួយឆ្នាំទៅមួយឆ្នាំដល់ជាង 3.8 ពាន់លាននាក់។ អ្នកប្រើប្រាស់ Facebook ប្រចាំថ្ងៃបានកើនឡើង 4% ដល់ជាង 2 ពាន់លាននាក់។

នាយកប្រតិបត្តលោក Mark Zuckerberg បាននិយាយនៅថ្ងៃទី 26 ខែមេសាថា “យើងមានត្រីមាសដ៏ល្អ សហគមន៍អ្នកប្រើប្រាស់នៅតែបន្តកើនឡើង” ” យើងកំពុងទទួលបានភាពប្រសើរឡើង និងកាន់តែប្រសើរជាងនេះទៅទៀត ធ្វើឱ្យផលិតផលកាន់តែលឿន និងពង្រឹងទីតាំងបច្ចុប្បន្នដើម្បីបំពេញចក្ខុវិស័យរយៈពេលវែង” ។ កាលពីដើមឆ្នាំនេះលោក Zuckerberg បានប្រកាសថា នៅឆ្នាំ 2023 នឹងក្លាយជា “ឆ្នាំដ៏មានប្រសិទ្ធភាព” របស់ក្រុមហ៊ុន។

បច្ចុប្បន្ន Meta កំពុងស្ថិតក្នុងដំណាក់កាលរៀបចំរចនាសម្ព័ន្ធឡើងវិញដើម្បីរស់ឡើងវិញបន្ទាប់ពីការប្រកួតប្រជែងជាបន្តបន្ទាប់ ពីការកើនឡើងនៃការប្រកួតប្រជែង ការថយចុះប្រាក់ចំណូលពីការផ្សាយពាណិជ្ជកម្មដោយសារតែការភ័យខ្លាចនៃការធ្លាក់ចុះសេដ្ឋកិច្ច រហូតដល់ការខាតបង់រាប់ពាន់លានដុល្លារដែលបានចាក់ចូលទៅក្នុងការកសាង metaverse ។ កាលពីខែវិច្ឆិកាឆ្នាំ2022 Meta បានប្រកាសថាខ្លួននឹងបញ្ឈប់បុគ្គលិកចំនួន 11,000 នាក់ និងកាលពីខែមុន Meta ក៏បាននិយាយថា ខ្លួននឹងកាត់បន្ថយមនុស្ស ១០.០០០ នាក់ទៀត សរុបមក បុគ្គលិករបស់ Meta នឹងត្រូវកាត់បន្ថយ 25%។

ក្រុមហ៊ុនបាននិយាយថាខ្លួនរំពឹងថាប្រាក់ចំណូលនៅត្រីមាសនេះនឹងបន្តកើនឡើងពីមួយឆ្នាំទៅមួយឆ្នាំ។ ការចំណាយក្នុងឆ្នាំនេះក៏អាចនឹងត្រូវបានកាត់បន្ថយបន្តិចដែរ។ លោក Debra Aho Williamson អ្នកវិភាគនៅក្រុមហ៊ុន Insider Intelligence បាននិយាយថា “Meta មានការចាប់ផ្តើមខ្លាំងជាងការរំពឹងទុកចំពោះឆ្នាំផលិតភាព” ។ ទោះជាយ៉ាងណាក៏ដោយក្រុមហ៊ុន “មិនអាចនៅស្ងៀមក្នុងស្ថានភាពបច្ចុប្បន្នទេ” ។ដូចក្រុមហ៊ុនបច្ចេកវិជ្ជាផ្សេងទៀតដែរ ពេលនេះ Meta កំពុងផ្តោតការយកចិត្តទុកដាក់បន្ថែមទៀតលើ បញ្ញាសិប្បនិម្មិត (AI) ជាងក្រុមហ៊ុន metaverse ។ នៅក្នុងសុន្ទរកថារបស់គាត់កាលពីម្សិលមិញលោកនាយក Zuckerberg បាននិយាយថា “សកម្មភាព AI កំពុងជំរុញលទ្ធផលល្អសម្រាប់អាជីវកម្មរបស់យើង” ពួកគេកំពុងបញ្ចូល AI ទៅក្នុងបទពិសោធន៍ជជែកនៅលើ Messenger និង WhatsApp ក៏ដូចជាការបន្ថែមបែបផែនទៅ Facebook ការបង្ហោះ Instagram និងការផ្សាយពាណិជ្ជកម្មជាដើម។ ប្រភព៖vnexpress

ប្រទេសចិន ៖ ក្រុមសិក្ខាកាមមកពីប្រទេសឡាវបានចូលរួមក្នុងវគ្គអប់រំជំនាញខាងបច្ចេកវិទ្យារថភ្លើង ដោយពួកគេបានរៀនសូត្រពីមូលដ្ឋានគ្រឹះនៃបច្ចេកវិទ្យារថភ្លើងក្នុងគម្រោងអប់រំវិជ្ជាជីវៈ ។ គម្រោងនេះមានគោលបំណងបង្កើតបុគ្គលិកមានជំនាញផ្លូវដែកនៅតំបន់អាស៊ីអាគ្នេយ៍ ដែលរៀបចំឡើងនៅទីក្រុង Kunming ខេត្ត Yunnan ប្រទេសចិន នៅស្ថានីយចុងក្រោយរបស់រថភ្លើងប្រទេសចិន និងឡាវ ។

តាំងពីគម្រោងរថភ្លើងប្រទេសចិន-ឡាវបានចាប់ផ្តើមដំណើរការនៅចុងឆ្នាំ២០២១មក ប្រទេសឡាវបានមើលឃើញពីសារសំខាន់របស់បុគ្គលិកបម្រើការផ្នែកនេះ ។ ដូច្នេះ ចាប់ពីខែមីនា ឆ្នាំ២០២២ ប្រទេសឡាវក៏បានបញ្ជូនបុគ្គលិកមកចូលរួមក្នុងវគ្គបណ្តុះបណ្តាលជំនាញរថភ្លើងជាបន្តបន្ទាប់ ។

សិក្ខាកាមចូលរួមវគ្គអប់រំនេះមានចំនួន៤០នាក់ និងមានគោលបំណងក្លាយជាអ្នកជំនាញរថភ្លើងដំបូងគេរបស់ប្រទេសឡាវ ។ ពួកគេបានផ្តោតជាខ្លាំងលើការរៀនសូត្រនូវមេរៀនផ្សេងៗដូចជា ការប្រើប្រាស់ឧបករណ៍សុវត្ថិភាព និងការដោះស្រាយបញ្ហាក្បាលរថភ្លើង ព្រមទាំងបានហ្វឹតហាត់នៅលើទីលានជាមួយផ្លូវដែកគុនមីងផងដែរ ។

សិក្ខាកាមម្នាក់និយាយថា ខ្លួនបានរៀនសូត្រនូវមេរៀនជាច្រើនទាំងទ្រឹស្តី និងការអនុវត្តជាក់ស្តែង ដូចជា គ្រឿងម៉ាស៊ីន និងវិធីបើកបររថភ្លើង ។ រីឯសិក្ខាកាមម្នាក់ទៀតនិយាយថា នឹងយកចំណេះដឹងនេះទៅបង្រៀនអ្នកផ្សេងដើម្បីបង្កើតអ្នកជំនាញរថភ្លើងសម្រាប់ប្រទេសឡាវ និងចង់មានចំណែករួមក្នុងការអភិវឌ្ឍរថភ្លើងឆ្លងកាត់ព្រំដែនចិន-ឡាវផងដែរ ។

សាស្ត្រាចារ្យមកពីវិទ្យាល័យបច្ចេកទេសវិជ្ជាជីវៈផ្លូវដែកគុនមីងនិយាយថា សិក្ខាកាមចូលរួមវគ្គអប់រំនេះបានប្តេជ្ញាចិត្តយ៉ាងមុតមាំ បើទោះជាពួកគេគ្មានបទពិសោធន៍ផ្នែកនេះពីមុនក្តី ប៉ុន្តែគ្រប់គ្នាបានព្យាយាម និងធ្វើការងារធ្ងន់ ។ ពួកគេនឹងក្លាយជាបុគ្គលិកសំខាន់ដើម្បីធ្វើឱ្យការងារផ្នែកនេះឱ្យរីកចម្រើន ។

កាលពីថ្ងៃទី១៣ ខែមេសា កន្លងមក ផ្លូវរថភ្លើងចិន-ឡាវបានបើកដំណើរការឆ្លងកាត់ព្រំដែនរវាងប្រទេសទាំងពីរ ហើយវានឹងផ្តល់ភាពងាយស្រួលក្នុងការធ្វើដំណើរ និងពាណិជ្ជកម្មរបស់ប្រទេសទាំងពីរយ៉ាងខ្លាំងផងដែរ ៕ ប្រភព ៖ China Face

នាយករដ្ឋមន្ត្រីថៃ លោក ប្រាយុទ្ធ ចាន់អូចា បានប្រាប់ទៅប្រជាពលរដ្ឋថៃ ដែលនឹងធ្វើដំណើរមកទស្សនាព្រឹ្តត្តិការណ៍ស៊ីហ្គេមឆ្នាំ២០២៣ នៅកម្ពុជា ឱ្យនៅឆ្ងាយពីនយោបាយ កុំយកកីឡាមកពាក់ព័ន្ធ និងហាមដាច់ខាតរិះគន់ម្ចាស់ផ្ទះ។

ការលើកឡើងនេះធ្វើឡើងនៅក្នុងអំឡុងពេល ការជួបប្រជុំរបស់លោកប្រាយុទ្ធ និងអត្តពលិកដែលត្រៀមខ្លួនមកប្រកួតសុីហ្គេមកម្ពុជា  ដែលគ្រោងនឹងធ្វើឡើងចាប់ពីថ្ងៃទី ៥ ដល់ថ្ងៃទី ១៧ ខែឧសភា។

លោកប្រាយុទ្ធបានលើកឡើងថា៖ “សុីហ្គេមលើកនេះ ស្ថិតនៅអំឡុងពេលដំណើរការបោះឆ្នោតសកលរបស់យើងនៅថ្ងៃ១៤ ខែឧសភា។ ដូច្នេះយើងកុំយកពេលទៅរិះគន់ម្ចាស់ផ្ទះ ព្រោះប្រសិនបើទទួលយើងមិនបានល្អជាងរបស់គេ គេជាអ្នកទទួលខុសត្រូវ។ យើងត្រូវគិតពីបញ្ហាចម្បងរបស់យើងគឺដំណើរការបោះឆ្នោត។ វា​ជា​បញ្ហា២​ផ្សេង​គ្នា ដុច្នេះយើង​មិន​ត្រូវ​យកវាមកលាយ​បញ្ចូល​គ្នា​ឡើយ។ បើ​មានរឿងនេះកើតឡើង វាងាវ​នឹង​មានភាព​​វឹកវរ”។

ទន្ទឹមគ្នានេះដែរ លោកប្រយុទ្ធ ក៏បានសង្កត់ធ្ងន់ ពាក់ព័ន្ទនឹងការដាក់ឈ្មោះគុនខ្មែរផងដែរ ដោយលោកបន្ថែមថា៖ “គេជាម្ចាស់ គេមានសិទ្ធ ហេតុដូច្នេះ យើងកុំខ្វល់។ ការដែលយើងបញ្ចូនអត្តពលិកទៅគឺដើម្បី ដើម្បីបង្កើតទំនាក់ទំនងល្អ ស្រឡាញ់ និងសន្តិភាព មិត្តក្នុងតំបន់”។

សូមជម្រាបផងដែរថា ទាក់ទងនឹងគុនខ្មែរ ថៃមិនបានបញ្ចូនអត្តពលិកគេមកចូលរួមនោះទេ ដោយសារតែខាងម្ចាស់ផ្ទះកម្ពុជាប្រកាន់ជំហរប្រើពាក្យ “គុនខ្មែ” មិនប្រើ Muay Thai៕

ប្រភព៖ Bangkok post