ប្រទេសថៃ ៖ ប្រទេសថៃបានសម្រេចជ្រើសរើសយកទីក្រុងបាងកក, ខេត្តឈុនបុរី និងខេត្តសុងខ្លា ជាម្ចាស់ផ្ទះការប្រកួតកីឡាស៊ីហ្គេមលើកទី៣៣ ចាប់ពីថ្ងៃទី៩-២០ ខែធ្នូ ឆ្នាំ២០២៥ ហើយខេត្តនគរាជសីមា នឹងក្លាយជាម្ចាស់ផ្ទះកីឡាអាស៊ានប៉ារ៉ាហ្គេម (Asean Para Games) លើកទី១៣ ចាប់ពីថ្ងៃទី២០-២៦ ខែមករា ឆ្នាំ២០២៦ ។

អ្នកនាំពាក្យប្រចាំការិយាល័យនាយករដ្ឋមន្ត្រី អ្នកនាង Traisulee Traisoranakul បានថ្លែងថា ក្នុងកិច្ចប្រជុំគណៈរដ្ឋមន្ត្រីកាលពីថ្ងៃទី១៦ ខែឧសភា កន្លងមក យើងបានរៀបចំខេត្តរបស់ប្រទេសថៃសម្រាប់ធ្វើជាម្ចាស់ផ្ទះការប្រកួតកីឡាស៊ីហ្គេមលើកទី៣៣ និងកីឡាអាស៊ានប៉ារ៉ាហ្គេម លើកទី១៣ តាមការស្នើសុំរបស់ក្រសួងទេសចរណ៍ និងកីឡា ។
សម្រាប់ការធ្វើជាម្ចាស់ផ្ទះរៀបចំប្រកួតកីឡាទាំង២ប្រភេទនេះ គឺស្របតាមសេចក្តីសម្រេចរបស់គណៈរដ្ឋមន្ត្រី កាលពីថ្ងៃទី២៧ ខែកញ្ញា ឆ្នាំ២០២២ ដែលបានឯកភាពឱ្យប្រទេសថៃធ្វើជាម្ចាស់ផ្ទះការប្រកួតកីឡាទាំង២ប្រភេទ ។ អនុគណៈកម្មការបានពិចារណាលើខេត្តដែលនឹងធ្វើជាម្ចាស់ផ្ទះការប្រកួតកីឡា ក្រោមគំនិតការលើកកម្ពស់កិច្ចសហប្រតិបត្តិការរវាងរដ្ឋ ក្រុមហ៊ុនឯកជន និងសហគមន៍ ។ កិច្ចសហការនេះក្នុងគោលបំណងត្រៀមខ្លួនគ្រប់គ្រងការងារទូទៅ, ផែនការអភិវឌ្ឍតំបន់ជាបន្តបន្ទាប់ និងបង្កើនសមត្ថភាពគាំទ្រវិស័យទេសចរណ៍ ដែលកត្តាសំខាន់ផ្តោតលើទីលានប្រកួតកីឡា និងកន្លែងហ្វឹកហាត់ ។

លើសពីនេះ ប្រទេសថៃនឹងគិតគូរពីកន្លែងស្នាក់នៅរបស់កីឡាករ, ម្ហូបអាហារ, កន្លែងព្យាបាល, គមនាគមន៍, បុគ្គលិករៀបចំការប្រកួត, ក្រុមយុវជនស្ម័គ្រចិត្ត, សេវាសាធារណៈ, បច្ចេកវិទ្យាព័ត៌មាន, ថវិកា និងការមានចំណែករួមរបស់ពលរដ្ឋផងដែរ ៕ ប្រភព ៖ Bangkok biznews

កាលពីយប់មិញ ការប្រកួតបាល់ទាត់នៅក្នុងព្រឹត្តិការណ៍សុីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ បានបញ្ចប់ទៅហើយ ដោយឥណ្ឌូនេសុីបានគ្រងមេដាយមាស ក្រោយបំបាក់ថៃក្នុងលទ្ធផល៥-២។

នៅក្នុងការប្រកួតដ៏ចម្រូងចម្រាស់នេះ មានការប៉ះទង្គិចគ្នាជាខ្លាំង រវាងកីឡាករនិងគ្រូបង្វឹករបស់ក្រុមទាំងពីរ ដែលបានបង្កជាអំពើហិង្សានៅក្នុងទីលាន។ ក្នុងនោះកីឡាករថៃ២នាក់បានទទួលកាតក្រហម ខណៈឥណ្ឌូនេសុីទទួលបានកាតតែក្រហមតែប៉ុណ្ណោះ ដែលជាហេតុធ្វើឱ្យឥណ្ឌូនេសុី អាចយកឈ្នះថៃបានយ៉ាងងាយស្រួល និងក្តោបបានមេដាយមាស។

ក្រោយពីបញ្ចប់ការប្រកួត នៅក្នុងពិធីបំពាក់មេដាយ កីឡាករថៃម្នាក់បានគប់មេដាយប្រាក់ចោល ទៅកាន់អ្នកគាំទ្រ ដោយទឹកមុខខឹងសម្បារជាខ្លាំង។ លើសពីនេះទៅទៀតកីឡាករថៃរូបនេះ ក៏បានគប់ចោលតុក្កតា(Mascot)  ដែលជារូបតំណាងឱ្យព្រឹត្តិការណ៍សុីហ្គេមនៅកម្ពុជា ដែលវាហាក់បង្ហាញអំពើមិនគោរពដល់ម្ចាស់ផ្ទះ។

ទន្ទឹមគ្នានេះដែរ អ្នកគាំទ្រកម្ពុជាបានបញ្ចេញមតិជាច្រើនទៅលើទង្វើកីឡាកររូបនេះ ដោយអ្នកខ្លះបានលើកឡើងថា៖”ទង្វើរបស់អ្នកបញ្ចាក់ពីចរិករបស់អ្នក រួមទាំងប្រទេសរបស់អ្នកផងដែរ #thailand #U22Thailand

អ្នកខ្លះទៀតលើកឡើងថា “ប្រទេសអសីលធម៌ ទើបសម្បូរមនុស្ស អសីលធម៌ ប្រទេសនេះរីកចម្រើនបានដោយ​ ការឈ្នានីស​ ចង់បានតែលទ្ធភាពទៅមិនដល់ #thailand

តែយ៉ាងណាមិញ ទាក់ទងនឹងរឿងនេះ គេមិនទាន់ដឹងនៅឡើយនោះទេថា តើកីឡាថៃនោះ មានគោលបំណងអ្វីបានជាគប់ទាំងមេដាយប្រា់ក់ និងរូបតុក្កតា(Mascot) ចោលយ៉ាងនេះ៕

ប្រទេសចិន ៖ ប្រទេសចិនបានសួរទៅកាន់អាមេរិកថា តើប្រទេសណាឱ្យប្រាកដដែលបានគំរាមកំហែងសេដ្ឋកិច្ចប្រទេសផ្សេងៗ ? ខណៈកាលពីពេលថ្មីៗនេះ លោកស្រី Janet Yellen រដ្ឋមន្ត្រីក្រសួងហិរញ្ញវត្ថុអាមេរិកបានចូលរួមកិច្ចប្រជុំថ្នាក់រដ្ឋមន្ត្រីក្រសួងហិរញ្ញវត្ថុ ព្រមទាំងនាយកធនាគារកណ្តាលមកពីក្រុមប្រទេស G7 ។ លោកស្រី Janet Yellen បានអំពាវនាវឱ្យប្រទេសផ្សេងៗសហការគ្នា ដើម្បីទប់ទល់នឹងការគំរាមកំហែងសេដ្ឋកិច្ចរបស់ប្រទេសចិន ។

នៅពេលនិយាយអំពីការគំរាមកំហែងក្នុងទំនាក់ទំនងអន្តរជាតិ គឺអាមេរិកជាអ្នកចាប់ផ្តើមប្រើពាក្យនេះមុន ហើយអាមេរិកក៏បានប្រើពាក្យនេះរហូតមក ។ ខ្លឹមសារសំខាន់របស់ពាក្យគំរាមកំហែង គឺអាមេរិកប្រើប្រាស់សំដៅដល់ការគំរាមផ្នែកអាវុធ, ការបង្កើតភាពឯកោផ្នែកនយោបាយ, ការដាក់ទារុណកម្មសេដ្ឋកិច្ច និងការទប់ស្កាត់បច្ចេកវិទ្យា ដែលបង្ខំឱ្យប្រទេសផ្សេងៗផ្លាស់ប្តូរតាមតម្រូវការរបស់អាមេរិក ដើម្បីឱ្យអាមេរិកក្លាយជាប្រទេសមហាអំណាចលើពិភពលោកយ៉ាងពេញលេញ ។

កាលពីពេលថ្មីៗនេះ សារព័ត៌មានអាមេរិកបានចុះផ្សាយព័ត៌មានជាញឹកញាប់ថា នៅមុន និងក្រោយពេលកិច្ចប្រជុំកំពូលប្រទេស G7 អាមេរិកនឹងប្រកាសពីការរឹតបន្តឹងការវិនិយោគក្នុងប្រទេសចិន ដែលមិនធ្លាប់មានក្នុងប្រវត្តិសាស្ត្រ ហើយពាក់ព័ន្ធនឹងបច្ចេកវិទ្យាទំនើបផ្សេងៗដូចជា Semiconductor បញ្ញាសិប្បនិម្មិត និងកុំព្យូទ័រជាដើម ។ បើពិតមែននោះ វានឹងក្លាយជាហេតុការណ៍ថ្មីមួយដែលអាមេរិកបានគំរាមចិនផ្នែកសេដ្ឋកិច្ច និងរារាំងការអភិវឌ្ឍរបស់ចិន ។

ការទប់ស្កាត់បច្ចេកវិទ្យា គឺជាវិធីគំរាមផ្នែកសេដ្ឋកិច្ចដែលអាមេរិកប្រើប្រាស់ជាញឹកញាប់ ហើយក្រៅពីនេះ ការដាក់ទណ្ឌកម្មសេដ្ឋកិច្ច ក៏ជាការគំរាមផ្នែកសេដ្ឋកិច្ចផងដែរ ដែលអាមេរិកប្រើញឹកញាប់ដូចគ្នា ។ លើសពីនេះ ទោះជាប្រទេសជាសម្ព័ន្ធមិត្តជាមួយអាមេរិក ក៏មិនរួចខ្លួនដែរ ។ ជាក់ស្តែង តាំងពី១៩៨០ រហូតមក អាមេរិកបានដាក់ទណ្ឌកម្មសេដ្ឋកិច្ចជាច្រើនលើកលើប្រទេសជប៉ុន ដើម្បីបង្ក្រាបឧស្សាហកម្មផលិតកម្ម ដោយសារជប៉ុនមានភាពជឿនលឿនជាងអាមេរិក ដូចជា Semiconductor ។ ដូចគ្នានេះ អាមេរិកបានបង្ខំឱ្យជប៉ុនរៀបចំរចនាសម្ព័ន្ធសេដ្ឋកិច្ចខ្នាតធំឡើងវិញទៀតផង គឺចំណុចទាំងអស់នេះហើយគេហៅថា ជាការគំរាមសេដ្ឋកិច្ច ។

កិច្ចប្រជុំកំពូលក្រុមប្រទេស G7 នឹងចាប់ផ្តើមនាពេលឆាប់ៗនេះ ហើយក្នុងចំណោមនេះមានប្រទេសសមាជិកជាច្រើន ដែលធ្លាប់ត្រូវបានអាមេរិកគំរាម ។ បើអាមេរិកចង់ដាក់របៀបវារៈ «ដោះស្រាយការគំរាមកំហែងផ្នែកសេដ្ឋកិច្ច» ចូលក្នុងកិច្ចប្រជុំនេះ ពួកគេគួរពិនិត្យមើលបទពិសោធន៍កន្លងមក និងបញ្ជាក់ពីការថ្កោលទោសសកម្មភាពរបស់អាមេរិក ដែលចង់ប្រែពណ៌ពីសទៅខ្មៅ ៕ ប្រភព ៖ China Face

ប្រទេសថៃ ៖ ក្រោយការបោះឆ្នោតជ្រើសរើសសភាតំណាងរាស្ត្រនៅប្រទេសថៃ អាជីវករលក់ម្ហូបអាហារនៅខេត្តឧប៊ុនថានីរំពឹងថា គណបក្សនយោបាយដែលនឹងបង្កើតរដ្ឋាភិបាលថ្មី នឹងផ្តោតជាសំខាន់លើការអភិវឌ្ឍសេដ្ឋកិច្ចជាតិ និងគិតគូរពីការប្រកបមុខរបររបស់ពលរដ្ឋផងដែរ ។ លើសពីនេះ រដ្ឋាភិបាលថ្មីនឹងធ្វើឱ្យប្រទេសថៃមានសុខសន្តិភាព ហើយបើគណបក្សនយោបាយធ្វើតាមអ្វីដូចដែលធ្លាប់បានសន្យាក្នុងយុទ្ធនាការឃោសនាបោះឆ្នោត ពលរដ្ឋនឹងជ្រើសរើសគណបក្សនេះឱ្យដឹកនាំប្រទេសបន្តទៀត ។

លោក Suwit Sitthitrai ជាម្ចាស់ហាងលក់ម្ហូបអាហារមួយកន្លែងនៅខេត្តឧប៊ុនថានី បាននិយាយកាលពីថ្ងៃទី១៥ ខែឧសភា ថា ពេលនេះ ការលក់ដូរផ្សេងៗនៅប្រទេសថៃបានងើបឡើងវិញហើយក្រោយពីការឆ្លងរាតត្បាតនៃជំងឺកូវីដ-១៩ ថយចុះ ហើយអាជីវករទាំងឡាយបានលក់ដូរដាច់ជាងពេលមុន ។ លោកបន្តថា លោកចង់ឱ្យរដ្ឋាភិបាលថ្មីផ្តោតខ្លាំងលើការរកស៊ីរបស់ពលរដ្ឋជាសំខាន់ និងធ្វើឱ្យប្រទេសជាតិស្ងប់សុខ ។

លោក Suwit Sitthitrai បន្តទៀតថា បើពលរដ្ឋមើលឃើញថា រដ្ឋាភិបាលថ្មីបានធ្វើតាមការសន្យារបស់ខ្លួនក្នុងអំឡុងមុនពេលបោះឆ្នោតនោះ ការបោះឆ្នោតនៅអាណត្តិក្រោយ ពលរដ្ឋនឹងជ្រើសរើសគណបក្សនេះឱ្យដឹកនាំប្រទេសរយៈពេល៤ឆ្នាំទៀត ។ ចំណែកបញ្ហានយោបាយផ្សេងៗ រដ្ឋាភិបាលថ្មីគួរគិតគូរនៅពេលក្រោយ ពីព្រោះពេលនេះ ពលរដ្ឋភាគច្រើនរំពឹងទៅលើរដ្ឋាភិបាលថ្មី ។

អាជីវករលក់ម្ហូបអាហាររូបនេះបន្ថែមថា ពលរដ្ឋត្រូវតែផ្តល់ឱកាសឱ្យគណបក្សនយោបាយឈ្នះឆ្នោតធ្វើការរបស់ពួកគេមួយរយៈសិន ចំណែកពលរដ្ឋនឹងរង់ចាំតាមដានមើលថា តើគណបក្សនេះនឹងរក្សាតាមពាក្យសន្យាឬអត់ ? ខណៈពួកគេបានសន្យាថា នឹងពន្លឿនការងើបឡើងវិញនៃសេដ្ឋកិច្ចថៃ ឱ្យដូចក្នុងអំឡុងពេលមិនទាន់មានជំងឺកូវីដ ៕ ប្រភព ៖ mgronline

បរទេស៖ លោក Greg Jackson នាយកប្រតិបត្តិនៃក្រុមហ៊ុនថាមពល Octopus Energy នៅចក្រភពអង់គ្លេស បាននិយាយថា ចាប់តាំងពីខែធ្នូមក គាត់បានចាប់ផ្តើមសាកល្បង ChatGPT នៅក្នុងប្រព័ន្ធ។ ដែលបច្ចុប្បន្ន ChatGPT កំពុងជំនួសបុគ្គលិក ២៥០ នាក់ដែលអាចឆ្លើយតបនឹងអ៊ីមែលបានយ៉ាងឆាប់រហ័ស ហើយត្រូវបានវាយតម្លៃថាប្រសើរជាងអ្នកដែលបានទទួលការបណ្តុះបណ្តាលផ្នែកសេវាកម្មទៀត។
បន្ទាប់ពីរយៈពេលសាកល្បង ចាប់ពីដើមខែនេះ ក្រុមហ៊ុនបានសម្រេចឱ្យ AI ទំនើប ឆ្លើយតប ៣៤% នៃអ៊ីមែលរបស់អតិថិជនទាំងអស់។ បើគ្មាន ChaGPT ទេ ក្រុមហ៊ុន Octopus Energy នឹងត្រូវការមនុស្សចំនួន ២៥០ នាក់ ដើម្បីដោះស្រាយបន្ទុកការងារនេះ។

លោក Jackson បាននិយាយទៀតថា អរគុណចំពោះ AI សម្រាប់សេវាអតិថិជន ដែលត្រូវបានធ្វើឱ្យប្រសើរឡើង នឹងពេលវេលាឆ្លើយតបតាមទូរស័ព្ទត្រូវបានកាត់បន្ថយ កម្រិតពេញចិត្តក៏កាន់តែកើនឡើង។
ទោះជាណាក៏ដោយក្រោមឥទិ្ធពលរបស់ AI អ្នកជំនាញបាននិយាយថាល្បឿននៃការផ្លាស់ប្តូរបុគ្គលិកក៏កំពុងកើតឡើងលឿន និងខ្លាំងជាងមុន។ នេះគឺជាការគំរាមកំហែងយ៉ាងធ្ងន់ធ្ងរសម្រាប់ទីផ្សារការងារ ដែលអាចធ្វើឱ្យមនុស្សបាត់បង់ការងារជាបន្តបន្ទាប់។

កាលពីដើមខែឧសភា លោក Geoffrey Hinton ដែលជាអ្នកបង្កើតកម្មវិធីបច្ចេកវិទ្យា AI បានលាលែងពី Google ដើម្បីព្រមានជាសាធារណៈអំពីគ្រោះថ្នាក់នៃបច្ចេកវិទ្យានេះ។ លោក Geoffrey Hinton គិតថា AI នឹងក្លាយជា ការគំរាមកំហែង ដល់អរិយធម៌របស់មនុស្ស នៅពេលដែលវាអាចដំណើរការទិន្នន័យយ៉ាងច្រើន។ ទន្ទឹមនឹងនេះ មហាសេដ្ឋី Warren Buffett បានប្រៀបធៀបការកើនឡើងនៃ AI ទៅនឹងការបង្កើត គ្រាប់បែកបរមាណូ ។

អ្វីដែលអ្នកស្រាវជ្រាវព្រួយបារម្ភនោះគឺ AI អាចធ្លាក់ក្នុងដៃមនុស្សខុស ឬពួក Hacker ហើយនឹងក្លាយជាឧបករណ៍ដ៏គ្រោះថ្នាក់បំផុត។ ការព្រមានដំបូងមួយគឺការលេចចេញនូវ វីដេអូ ក្លែងបន្លំ ដែលធ្វើឱ្យអ្នកប្រើប្រាស់មិនអាចបែងចែកអំពីការពិត ឬក្លែងក្លាយបានទេ។ នៅពេលអនាគត បញ្ញាសិប្បនិមិត្តនឹងមិនត្រឹមតែដឹងពីសមតុល្យគណនីរបស់ម្ចាស់ប៉ុណ្ណោះទេ ថែមទាំងផ្លាស់ប្តូរឥរិយាបថទិញទំនិញ ថែមទាំងជំនួសមនុស្សឱ្យធ្វើអ្វីៗដែលត្រូវបានវិភាគថាមាន “អត្ថប្រយោជន៍បំផុត” ទៀតផង៕ ប្រភព៖vnexpress