ប្រទេសន័រវេស ៖ ការនាំចេញត្រីសាម៉ុនពីប្រទេសន័រវេសទៅកាន់ប្រទេសចិន បានកើនឡើងជាបន្តបន្ទាប់នៅខែមេសា ឆ្នាំ២០២៣ ក្រោយពីស្ថានការណ៍ការឆ្លងរាតត្បាតនៃជំងឺកូវីដ-១៩ បានធូរស្រាល ។ នៅខែមេសា ឆ្នាំ២០២៣ គេបាននាំចេញត្រីសាម៉ុន និងអាហារសមុទ្រផ្សេងទៀតជាង៤ម៉ឺនតោនទៅកាន់ប្រទេសចិន ។ ចំនួនការនាំចេញបានកើនឡើងខ្ពស់ជាងឆ្នាំ២០២២ ស្មើ១៨% ហើយធ្វើឱ្យប្រទេសចិនក្លាយជាទីផ្សារធំលំដាប់ទី៣ សម្រាប់ការនាំចេញត្រីរបស់ប្រទេសន័រវេស ។

សម្រាប់ពលរដ្ឋន័រវេស ការនេសាទត្រី មិនមែនគ្រាន់តែជាមុខរបររកប្រាក់ចំណូលប៉ុណ្ណោះទេ ប៉ុន្តែការនេសាទត្រីក៏ជាចំណែកមួយក្នុងការរស់នៅរបស់ពលរដ្ឋផងដែរ ។ នាយកគ្រប់គ្រងមជ្ឈមណ្ឌលទេសចរណ៍លើកឡើងថា ត្រីសាម៉ុនធ្វើឱ្យពលរដ្ឋន័រវេសមានការងារធ្វើ និងក្លាយជាឧស្សាហកម្មចម្បងនៅតំបន់កោះ ។

ទីក្រុងអូស្លូរបស់ប្រទេសន័រវេសបានត្រៀមទទួលភ្ញៀវទេសចរមកពីជុំវិញពិភពលោក ដើម្បីសិក្សាឈ្វេងយល់ពីប្រទេសន័រវេស និងបរិភោគត្រីសាម៉ុន ។ ពលរដ្ឋម្នាក់រស់នៅទីក្រុងនេះប្រាប់ថា ត្រីសាម៉ុនអាចយកមកធ្វើម្ហូបបាន១០០មុខឯណោះ ។ រីឯភ្ញៀវទេសចរចិនប្រាប់ថា ការញ៉ាំត្រីសាម៉ុននៅប្រទេសន័រវេស គឺជារឿងដែលភ្ញៀវទេសចរបរទេសមិនគួរមើលរំលង ។

នាយកផ្នែកទីផ្សាររបស់ Norwegian Seafood Council លើកឡើងថា ប្រទេសចិន គឺជាទីផ្សារមួយលូតលាស់យ៉ាងខ្លាំងសម្រាប់ការនាំចេញគ្រឿងសមុទ្ររបស់ន័រវេស ។ បច្ចុប្បន្ន ភ្នាក់ងារសុវត្ថិភាពចំណីអាហារបានបង្កើនវិធានការពិនិត្យសុវត្ថិភាពអាហារសមុទ្រគ្រប់ប្រភេទសម្រាប់នាំចេញទៅប្រទេសចិន ដើម្បីឱ្យអតិថិជនចិនមានទំនុកចិត្តលើអាហាររបស់ន័រវេស ។

ចំណែកប្រធាននាយកដ្ឋានសុខភាពត្រី ដែលស្ថិតក្រោមការគ្រប់គ្រងរបស់អាជ្ញាធរសុវត្ថិភាពចំណីអាហារន័រវេសនិយាយថា ភ្នាក់ងារសុវត្ថិភាពចំណីអាហារន័រវេសបានគ្រប់គ្រងលើដំណើរការផលិតត្រីសាម៉ុន រហូតដល់ដំណាក់កាលនាំចេញទៅចិន ៕ ប្រភព ៖ China Face

កាលពីយប់មិញនេះ(១៦ ឧសភា ) ក្រុមជម្រើសជាតិបាល់ទាត់អាយុក្រោម២២ឆ្នាំរបស់ឥណ្ឌូនេស៊ី បានយកឈ្នះថៃក្នុងវគ្គផ្តាច់ព្រ័ត្រក្នុងលទ្ធផល៥ទល់២ ដណ្តើមមេដាយមាសក្នុងព្រឹត្តិការណ៍ស៊ីហ្គេមលើកទី៣២ ឆ្នាំ២០២៣។ ការដណ្តើមមេដាយមាសលើកនេះ ឥណ្ឌូនេស៊ីបានបង្កើតប្រវត្តិសាស្ត្ររបស់ខ្លួនជាថ្មីម្តងទៀតក្រោយពីខកខានអស់រយៈពេល៣២ឆ្នាំ ដោយការទទួលជ័យជម្នះគ្រាប់បាល់៥គ្រាប់បំប៉ោងសំណាញ់ថៃធ្វើឡើងដោយកីឡាករ៤រូប។

ព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ បានបង្កើតប្រវត្តិសាស្ត្រដល់ប្រទេសឥណ្ឌូនេស៊ីដណ្តើមបានមេដាយមាសលើកដំបូងបន្ទាប់ពីខកខានអស់រយៈពេល៣២ឆ្នាំមកហើយ ពោលគឺចាប់តាំងពីឆ្នាំ១៩៩១ ប្រទេសនេះមិនទទួលបានមេដាយមាសឡើយ។ លទ្ធផល៥ទល់២ លំថៃយ៉ាងដំណំនេះ បានធ្វើឱ្យក្រុមកីឡាករថៃមិនអស់ចិត្តមិនអាចទទួលយកលទ្ធផលនេះព្រោះកន្លងមកក្រុមជម្រើសជាតិថៃបានគ្រងដំណែងជើងឯកជាច្រើនសម័យកាលក្នុងព្រឹត្តិការណ៍ស៊ីហ្គេមនេះ ខណៈការប្រកួតបញ្ចប់ដោយភាពចម្រូងចម្រាស់មានការប៉ះទង្គិចគ្នាបង្កហិង្សានៅលើទីលានប្រកួត។

លទ្ធផលដែលក្រុមជម្រើសជាតិឥណ្ឌូនេស៊ីយកឈ្នះទទួលបាន៥គ្រាប់នេះកើតឡើងដោយកីឡាករ៤រូបផងដែរ។ ក្នុងតង់ទី១ ក្រុមជម្រើសជាតិឥណ្ឌូនេស៊ីបាននាំមុខថៃក្នុងលទ្ធផល២ទល់០ ហើយការរកគ្រាប់បាល់ចំនួន២នេះធ្វើឡើងដោយកីឡាករតែម្នាក់គឺកីឡាករ រ៉ាម៉ាដាន សាណាន់តា (Ramadhan Sananta) នៅនាទី២១ និងនាទី៤៥។ ក្នុងតង់ទី២កីឡាកររូបនេះបានផ្លាស់ប្តូរចេញពីទីលានដោយសារតែមានបញ្ហា។ យ៉ាងណាមិញ ទោះជាសមាជិកក្រុមអាចរកគ្រាប់បាល់ផ្លាស់ចេញក្តី ក៏មិនធ្វើឱ្យស្មារតីក្រុមកីឡាករឥណ្ឌូនេស៊ីបាក់ទឹកចិត្តឡើង ទោះបីជាក្នុងតង់ទី២ ថៃបានរកគ្រាប់បាល់ទាត់ស្មើក៏ដោយ។ កីឡាករឥណ្ឌូនេស៊ី Irfan បានរកគ្រាប់បាល់ទី៣ នៅនាទី៩២ គ្រាប់បាល់ទី៤ រកបានដោយកីឡាករ Fajar នៅនាទី១០៦ និងគ្រាប់បាល់ទី៥ចុងក្រោយរកបានដោយកីឡាករ Beckham នៅនាទី១២០។

ការរកគ្រាប់បាល់របស់កីឡាករទាំង៤រូបនេះបានធ្វើឱ្យអ្នកគាំទ្រឥណ្ឌូនេស៊ី សម្តែងក្តីសប្បាយចិត្តជាខ្លាំង ព្រោះពួកគេជំរុញឱ្យប្រទេសខ្លួនគ្រងជើងឯកជាថ្មីម្តងទៀតក្នុងព្រឹត្តិការណ៍ស៊ីហ្គេមដែលប្រព្រឹត្តឡើងនៅប្រទេសកម្ពុជា៕

ប្រទេសថៃ ៖ ប៉ុន្មានថ្ងៃនេះ សារព័ត៌មានថៃមួយចំនួនបានចុះផ្សាយពីហ្វេសប៊ុកមួយបានបង្ហោះរូបភាពរបស់មេដឹកនាំគណបក្សកាវក្លៃ និងអះអាងថា មានឈាមជ័រជាខ្មែរនៅក្នុងទំព័រហ្វេសប៊ុកឈ្មោះ ASEAN All Post ។ សារព័ត៌មានថៃ និងអ្នកលេងបណ្តាញសង្គមថៃនិយាយថា អ្នកដែលបង្ហោះព័ត៌មាននេះ គឺជាជនជាតិខ្មែរដែលចង់ដណ្តើមអ្វីៗទាំងអស់ពីប្រទេសថៃ ហើយសូម្បីតែមេដឹកនាំគណបក្សកាវក្លៃ ក៏ខ្មែរអះអាងថា មានឈាមជ័រជាខ្មែរដែរ ។

សារព័ត៌មានថៃឈ្មោះ chiangmai news ផ្សាយថា អ្នកលេងបណ្តាញសង្គមថៃបានឃើញទំព័រហ្វេសប៊ុកមួយឈ្មោះ ASEAN All Post បានបង្ហោះរូបភាពរបស់មេដឹកនាំគណបក្សកាវក្លៃ លោក Pita Limjaroenrat ហើយសរសេរថា លោកជាចៅរបស់ កថាថនឈុំ ជាអតីតអភិបាលខេត្តបាត់ដំបង កាលពីប្រមាណ១០០ឆ្នាំមុន ។ ការបង្ហោះនេះធ្វើឱ្យអ្នកលេងបណ្តាញសង្គមថៃសើចគ្រប់គ្នា នៅពេលពួកគេឃើញអ្នកលេងហ្វេសប៊ុកម្នាក់ដែលគិតថា ជាជនជាតិខ្មែរបានបង្ហោះរូបភាពអនាគតនាយករដ្ឋមន្ត្រីប្រទេសថៃ ។ អ្នកលេងបណ្តាញសង្គមថៃថា រូបភាពនេះ គឺជារូបតាំងពីឆ្នាំ២០១៥ នៅពេលលោក Pita Limjaroenrat ទៅលេងកម្ពុជា ។

សារព័ត៌មានថៃ chiangmai news សរសេរបន្តថា អ្នកប្រើហ្វេសប៊ុករូបនេះបានអះអាងក្នុងទំព័រហ្វេសប៊ុកឈ្មោះ ASEAN All Post ថា លោក Pita Limjaroenrat ការពិត មានឈាមជ័រខ្មែរ ហើយថា «បើពិតជាចៅរបស់ កថាថនឈុំ ចឹងម្នាក់នេះ គឺពូជក្បត់ជាតិ» ។ អ្នកលេងបណ្តាញសង្គមថៃនិយាយថា កាលពីមុន ពលរដ្ឋខ្មែរក៏ធ្លាប់បានលើកឡើងថា កីឡាករប្រដាល់ថៃ បួ ខាវ និងតារាចម្រៀងថៃ Lisa Blackpink មានដើមកំណើតខ្មែរ ហើយពេលនេះ ពលរដ្ឋខ្មែរបែរជានិយាយថា មេដឹកនាំគណបក្សកាវក្លៃមានឈាមជ័រខ្មែរដែរ ហើយហេតុអ្វីខ្មែរមិននិយាយថា លោក ប្រាយុទ្ធ ចាន់អូចា ជាខ្មែរដែរទៅ?

បើតាមទំព័រហ្វេសប៊ុករបស់ថៃឈ្មោះ Isuzu D-Max MagicEyes និយាយថា សូមផ្តាំផ្ញើទៅពលរដ្ឋខ្មែរផងដែលប្រាប់ថា មេដឹកនាំគណបក្សកាវក្លៃ លោក Pita Limjaroenrat មានដើមកំណើតជាខ្មែរ គឺគាត់គ្មានឈាមជ័រខ្មែរទេ ហើយអ្វីដែលខ្មែរបញ្ជាក់ថា មានភស្តុតាងនោះ ការពិត លោក Pita Limjaroenrat គ្រាន់តែមកលេងប្រទេសកម្ពុជាប៉ុណ្ណោះ ។ ហ្វេសប៊ុក Isuzu D-Max MagicEyes បន្តថា នៅពេលខ្មែរចង់ទាមទារអ្វីមួយពីថៃ គឺត្រូវតែប្រើខួរក្បាលគិតផង ហើយមិនមែនចង់យកអ្វីគ្រប់យ៉ាងនៅលើទូទាំងពិភពលោក មកធ្វើជារបស់ខ្មែរទេ ហើយសូមផ្តាំឱ្យខ្មែរគិតផង អាខ្មែរកែងជើង អាសញ្ជាតិឆ្កែ… ។

ទោះយ៉ាងណា ការលើកឡើងខាងលើនេះ គឺជាមតិយោបល់របស់សារព័ត៌មានថៃ និងអ្នកលេងបណ្តាញសង្គមថៃមួយចំនួនប៉ុណ្ណោះ ដោយសារពួកគេបានឃើញការបង្ហោះរូបរបស់មេដឹកនាំគណបក្សកាវក្លៃក្នុងទំព័រហ្វេសប៊ុកឈ្មោះ ASEAN All Post ។ គួរបញ្ជាក់ថា មេដឹកនាំគណបក្សកាវក្លៃ លោក Pita Limjaroenrat បានទទួលសំឡេងឆ្នោតគាំទ្រយ៉ាងច្រើនលើសលប់ពីពលរដ្ឋថៃ ហើយគេសង្ឃឹមថា លោកនឹងធ្វើជានាយករដ្ឋមន្ត្រីទី៣០ របស់ប្រទេសថៃ ៕ ប្រភព ៖ chiangmai news

បរទេស៖ នៅថ្ងៃទី ១៦ ខែឧសភា ទីភ្នាក់ងារថាមពលអន្តរជាតិ International Energy Agency (IEA) បាននិយាយថា ការនាំចេញប្រេងរបស់រុស្ស៊ីក្នុងខែមេសា ឆ្នាំ ២០២៣ នេះបានកើនឡើងដល់កម្រិតខ្ពស់បំផុតចាប់តាំងពីមានជម្លោះជាមួយអ៊ុយក្រែនដែលបានផ្ទុះឡើងនៅចុងខែកុម្ភៈ ឆ្នាំ ២០២២ ជាមួយនឹងប្រាក់ចំណូលកើនឡើង ១.៧ ពាន់លានដុល្លារ បើទោះបីជាមានការដាក់ទណ្ឌកម្មពីលោកខាងលិចជាបន្តបន្ទាប់ក៏ដោយ។

យោងតាមការប៉ាន់ស្មានរបស់ IEA បានឱ្យដឹងថា ប្រាក់ចំណូលនៃការនាំចេញប្រេងរបស់ប្រទេសរុស្ស៊ីបានកើនឡើងពី ១.៧ ពាន់លានដុល្លារដល់ ១៥ ពាន់លានដុល្លារក្នុងខែមេសា។ ទោះជាយ៉ាងណាក៏ដោយ នេះគឺទាបជាង ២៧% ធៀបនឹងរយៈពេលដូចគ្នាក្នុងឆ្នាំ ២០២២។ ប្រាក់ចំណូលពន្ធរបស់រុស្ស៊ីពីវិស័យប្រេង និងឧស្ម័នក៏បានថយចុះ ៦៤% ពីមួយឆ្នាំទៅមួយឆ្នាំផងដែរ។

ក្រុមប្រទេសឧស្សាហកម្មឈានមុខគេចំនួនប្រាំពីរ (G៧) អូស្ត្រាលី និងសហភាពអឺរ៉ុប (EU) បានដាក់ពិដានតម្លៃលើផលិតផលប្រេង និងប្រេងឆៅរបស់រុស្ស៊ី ក្នុងកិច្ចប្រឹងប្រែងមួយដើម្បីកាត់បន្ថយការផ្តល់មូលនិធិពីប្រទេសរុស្ស៊ីសម្រាប់ជម្លោះនៅអ៊ុយក្រែន។ សហភាពអឺរ៉ុបក៏បានដាក់ទណ្ឌកម្មដាច់ដោយឡែកពីគ្នាលើការនាំចេញប្រេងសំខាន់ៗជាច្រើនរបស់រុស្ស៊ីផងដែរ។

ជាការឆ្លើយតប ទីក្រុងមូស្គូនៃប្រទេសរុស្ស៊ីបានគំរាមកាត់ផ្តាច់ការផ្គត់ផ្គង់ប្រេងដល់ប្រទេសមួយចំនួន និងក្រុមហ៊ុនដែលប្រកាន់ខ្ជាប់នូវគោលនយោបាយកំណត់តម្លៃដែលផ្តួចផ្តើមដោយ G៧ ។ ប្រទេសរុស្ស៊ីក៏បានប្រកាសកាត់បន្ថយទិន្នផលចំនួន ៥០០,០០០ bpd ក្នុងមួយម៉ោងផងដែរ ខណៈដែលអង្គការនៃប្រទេសនាំចេញប្រេង (OPEC) រួមទាំងអារ៉ាប៊ីសាអូឌីតក៏បានយល់ព្រមកាត់បន្ថយបរិមាណផងដែរ។
IEA បាននិយាយថាប្រទេសរុស្ស៊ីហាក់ដូចជាមានបញ្ហាតិចតួចក្នុងការស្វែងរកអតិថិជនដែលមានឆន្ទៈក្នុងការទិញប្រេងឆៅ និងផលិតផលប្រេងរបស់ខ្លួន ។ ទីភ្នាក់ងារនេះបាននិយាយថា ប្រទេសចិន និងឥណ្ឌាមានចំនួនជិត ៨០% នៃទីផ្សារនាំចេញប្រេងឆៅរបស់រុស្ស៊ី៕ ប្រភព៖cafef.vn

ក្រោយតែមានការប៉ះទង្គិចគ្នានៅក្នុងវគ្គផ្តាច់ព្រ័ត្រសុីហ្គេមលើកទី៣២ រវាងឥណ្ឌូនេសុី និងថៃ ដែលបានបង្កជាអំពើហិង្សា របួសកីឡាករ និងគណៈប្រតិភូជាច្រើននាក់មក ពេលនេះសហព័ន្ធបាល់ទាត់ថៃបានចេញមុខសុំទោសជាសាធារណៈ និងប្រកាសបើកការស៊ើបអង្កេតលើកីឡាករ និងគណៈប្រតិភូរបស់ខ្លួនទាំង។

យកតាមការបង្ហោះនៅលើបណ្តាញសង្គមហ្វេកប៊ុករបស់សហព័ន្ធបាល់ទាត់ថៃ បានលើកឡើងថា៖”សមាគមបាល់ទាត់ថៃយើងខ្ញុំ សូមទោស ចំពោះឧបទ្ទវហេតុដែលបានកើតឡើងក្នុងការប្រកួតកីឡាបាល់ទាត់ស៊ីហ្គេម ​រវាង​ក្រុម​ជម្រើស​ជាតិ​ថៃ ជួប​ក្រុម​ជម្រើស​ជាតិ​ឥណ្ឌូណេស៊ី នៅ​ថ្ងៃ​ទី​១៦ ខែ​ឧសភា ឆ្នាំ​២០២៣។ យើងសូមទោសទៅកាន់ទស្សនិកជន ទាំងក្នុងទីលាន និងអ្នកគាំទ្របាល់ទាត់ជុំវិញពិភពលោក ឧបទ្ទវហេតុណេះបានបង្កឱ្យការខូចខាតយ៉ាងខ្លាំង ដល់ក្រុមបាល់ទាត់ជម្រើសជាតិថៃ។ សមាគម​បាល់ទាត់យើងក៏សូម​ជម្រាប​ជូនថា យើងនឹងបង្កើត គណៈកម្មាធិការ​មួយ​ ​ដើម្បី​ស៊ើបអង្កេត​អ្នក​ពាក់ព័ន្ធ​ទាំងអស់​ដើម្បី​ស្វែងរក​ការពិត​ជា​បន្ទាន់។ ហើយយើងក៏នឹងមានការដាក់ទណ្ឌកម្មយ៉ាងធ្ងន់ធ្ងរ ​ចំពោះ​បុគ្គលិក​ដែល​បាន​បង្ក​ឱ្យ​មាន​ការ​ខូចខាត​ក្នុង​ឧបទ្ទវហេតុ​នេះ​”។

ទន្ទឹមគ្នានេះផងដែរ ខាងគ្រូបង្វឹកឥណ្ឌូនេសុី ក៏បានសូមទោសទៅកាន់មហាជនដែលចូលរួមទស្សនាការប្រកួតនេះ ចំពោះទង្វើទាំងអស់ដែលបានបង្កឡើងដោយកីឡាកររបស់ឥណ្ឌូនេសុីដូចគ្នា។

សូមជម្រាបដែរថាការបរកួតនេះបញ្ចប់ទៅក្នុងលទ្ធផល ៥-២ ដោយឥណ្ឌូនេសុី ក្លាយជាម្ចាស់មេដាយមាស ក្រោយខកខានអស់រយៈពេល៣២ឆ្នាំ៕

រដ្ឋធានីកៀវ៖ នៅក្នុងការវាយប្រហារទៅលើរដ្ឋធានីកៀវ កាលពីយប់ថ្ងៃចន្ទ ឈានចូល ថ្ងៃអង្គារនោះ ក្រុងមូស្គូ បានអួតអាង អំពីការវាយប្រហារ កម្ទេចខែលការពារដ៏ទំនើបផលិតដោយអាមេរិករបស់អ៊ុយក្រែន ខណៈក្រុងកៀវ បានអះអាង អំពីការបាញ់ទម្លាក់មីស៊ីលរបស់រុស្ស៊ី ចំនួន១៨គ្រឿង ហើយក្នុងនោះមានទាំងមីស៊ីល មានល្បឿនលឿនជាងសំឡេង ចំនួន៦គ្រឿងផងដែរ។

សារព័ត៌មាន Alarabiya News បានចេញផ្សាយ កាលពីព្រឹក ថ្ងៃពុធ ទី១៧ ខែឧសភា ថា មន្រ្ដីសហរដ្ឋអាមេរិក ចំនួន២រូប បានអះអាង ថា ខែលការពារមីស៊ីលផាទ្រីយ៉ូត ផលិតដោយសហរដ្ឋអាមេរិក ហើយត្រូវបានប្រើប្រាស់ ដោយកងទ័ពអ៊ុយក្រែន ទំនងជារងការខូចខាត ពីការវាយប្រហាររបស់រុស្ស៊ី។ ប៉ុន្ដែប្រព័ន្ធការពារនោះ មិនបានបង្ហាញ ថា វាត្រូវបានកម្ទេចនោះឡើយ។

ប្រព័ន្ធការពារ Patriot ផលិតដោយអាមេរិក ក្លាយជាអង្គភាពការពារដែនអាកាសដ៏ទំនើបមួយ ផ្គត់ផ្គង់ដោយលោកខាងលិច សម្រាប់ជួយដល់ប្រទេសអ៊ុយក្រែន ទប់ទល់នឹងយុទ្ធនាការវាយប្រហារតាមផ្លូវអាកាស ពីកម្លាំងទាហានរុស្ស៊ី ដោយបានកំណត់គោលដៅ លើហេដ្ឋារចនាសម្ព័ន្ធសំខាន់ៗ កន្លែងថាមពល និង ទីតាំងផ្សេងៗទៀត។

មន្ត្រីអាមេរិកមួយរូប បាននិយាយ ដោយសុំលក្ខខណ្ឌមិនបញ្ចេញឈ្មោះ និង ដកស្រង់ព័ត៌មានបឋម អះអាង ថា រដ្ឋាភិបាលក្រុងវ៉ាស៊ីនតោន និង ក្រុងកៀវ កំពុងតែនិយាយអំពីវិធីល្អបំផុត នៅក្នុងការជួសជុលប្រព័ន្ធការពារនោះ ហើយត្រង់ចំណុច មិនបានបង្ហាញ ថា ខែលការពារនោះ នឹងត្រូវដកចេញពីអ៊ុយក្រែន នោះទេ។

ប្រព័ន្ធការពារ Patriot ត្រូវបានគេចាត់ទុក ថា ជាខែលការពារដែនអាកាសដ៏ទំនើបបំផុតមួយរបស់សហរដ្ឋអាមេរិក ដោយវាយអាចទប់ទល់នឹងយន្តហោះ កាំជ្រួចគ្រូស និង មីស៊ីលផ្លោងបាល្លីស្ទិក ផងដែរ។ បើតាមធម្មតា ខែលការពារនេះ នឹងរាប់បញ្ចូលទាំងឧបករណ៍បាញ់បង្ហោះ រួមជាមួយនឹងរ៉ាដា ហើយរថយន្តជំនួយផ្សេងៗទៀត។

ក្រសួងការពារជាតិរុស្ស៊ី កាលពីថ្ងៃអង្គារ បានបញ្ជាក់ ថា កម្លាំងទាហានរុស្ស៊ី បានប្រើប្រាស់មីស៊ីលមានល្បឿនលឿនជាងសំឡេង ប្រភេទឃិនហ្សាល់ (Kinzhal)វាយប្រហារទៅលើអ៊ុយក្រែន កាលពីរំលងអធ្រាត្រ ឈានចូលថ្ងៃអង្គារ ដោយបានកម្ទេចប្រព័ន្ធការពារ Patriot ផលិតដោយសហរដ្ឋអាមេរិក បាញ់ពីដីទៅលើអាកាស។

ដោយឡែក អ៊ុយក្រែន ក៏បានបញ្ជាក់ កាលពីព្រឹក ថ្ងៃអង្គារ ថា ប្រព័ន្ធការពារដែនអាកាសរបស់ក្រុងកៀវ បានបាញ់ទម្លាក់មីស៊ីលរបស់រុស្ស៊ី ចំនួន១៨គ្រឿង ហើយក្នុងនោះមានបញ្ចូលទាំងមីស៊ីល មានល្បឿនលឿនជាងសំឡេង ប្រភេទឃិនហ្សាល់ (Kinzhal) ចំនួន៦គ្រឿង កាលពីរំលងអធ្រាត្រ ឈានចូលថ្ងៃអង្គារ ផងដែរ។ ប៉ុន្ដែលោក ស៊ើរហ្គេ សយហ្គូ (Sergei Shoigu) រដ្ឋមន្រ្ដី ក្រសួងការពារជាតិរុស្ស៊ី បានបដិសេធនូវការអះអាងរបស់ក្រុងកៀវ។

ថ្វីបើមានការអះអាងបែបនេះក្ដី ក៏មន្ទីរបញ្ចកោណ នៃក្រសួងការពារជាតិសហរដ្ឋអាមេរិក មិនទាន់បានធ្វើអត្ថាធិប្បាយ ឆ្លើយតបវិញភ្លាមៗនោះឡើយ ហើយគេមិនទាន់ដឹងច្បាស់អាវុធរបស់លោកខាងលិចប្រភេទណា ត្រូវបានអ៊ុយក្រែន ប្រើប្រាស់នោះដែរ៕

ប្រទេសហូឡង់៖ រថយន្តអ៊ីដ្រូសែន Eco-Runner XIII ដែលបង្កើតដោយក្រុមនិស្សិតនៅសាកលវិទ្យាល័យ Delft University of Technology មានគោលបំណងចង់បង្កើតកំណត់ត្រាពិភពលោកសម្រាប់ការរត់ចម្ងាយឆ្ងាយបំផុតរបស់រថយន្តអ៊ីដ្រូសែនដោយមិនចាំបាច់ចាក់សាំងនៅក្នុងខែមិថុនា ឆ្នាំ ២០២៣។

ក្រុម Eco-Runner Team Delft បាននិយាយថា ពួកគេកំពុងព្យាយាមធ្វើឱ្យមានតុល្យភាពរវាងការអនុវត្ត ថាមពល និងភាពរឹងរបស់រថយន្តតាមពេលវេលាក្នុងចម្ងាយជាង ២,០៥៥ គីឡូម៉ែត្រដើម្បីបង្កើតកំណត់ត្រាពិភពលោក។ ដូចនេះហើយដើម្បីបង្កើតរថយន្តដែលមានកម្លាំងខ្លាំងដោយមិនចាំបាច់ចាក់សាំង ក្រុមអ្នករចនាបានប្រើប្រាស់កាបូនហ្វាយប័រនៅក្នុងផ្នែកជាច្រើននៃរថយន្ត ដែលជាធម្មតាត្រូវបានផលិតពីដែក ដូចជាកំណាត់ propeller នៅក្នុងប្រព័ន្ធចង្កូត ឬធ្នឹមព្យួរ។ ជាមួយនឹងសម្ភារៈនេះរថយន្តអ៊ីដ្រូសែន Eco-Runner XIII អាចលោតទៅមុខបានយ៉ាងងាយស្រួលជាមួយនឹងទម្ងន់តិច និងអូស។

យោងតាមក្រុម Eco-Runner Team Delft បានឱ្យដឹងថា ដំណើរការនៃការបំប្លែងអ៊ីដ្រូសែនទៅជាឥន្ធនៈរថយន្តបង្ហាញពីសក្តានុពលក្នុងការក្លាយជាជម្រើសដ៏មានប្រសិទ្ធភាពចំពោះធាតុនៅក្នុងឧស្សាហកម្មដឹកជញ្ជូន។ នៅក្នុងរថយន្តអ៊ីដ្រូសែន Eco-Runner XIII អ៊ីដ្រូសែនត្រូវបានបំប្លែងទៅជាថាមពលអគ្គិសនី ដោយបង្កើតបានតែចំហាយទឹក និងកំដៅប៉ុណ្ណោះ។ និស្សិតកំពុងស្វែងរកការកែលម្អ Eco-Runner XIII នៅក្នុង Dream Hall ដែលជាកន្លែងពិសេសមួយនៅលើទីធ្លានៃសាកលវិទ្យាល័យ Delft University of Technology ។ ការរចនារថយន្តដែលទើបនឹងប្រកាសកាលពីថ្ងៃទី ២ ខែឧសភា ហើយគូរដោយស្ទូឌីយោ Enshape Design នឹងក្លាយជារូបរាងចុងក្រោយនៃរថយន្តដែលចូលរួមក្នុងកំណត់ត្រាដែលបានកំណត់ក្នុងខែមិថុនា៕

ប្រភព៖ vnexpress

នៅយប់ថ្ងៃទី១៦ ខែឧសភា ឆ្នាំ២០២៣ ការប្រកួតវគ្គផ្តាច់ព្រ័ត្របោះទាត់ជម្រើសជាតិអាយុក្រោម២២ឆ្នាំ នាព្រឹត្តិការណ៍ស៊ីហ្គេមបានរកឃើញម្ចាស់មេដាយមាសហើយគឺបានទៅលើក្រុមជម្រើសជាតិឥណ្ឌូនេស៊ី ដោយលទ្ធផល៥ទល់២លត់ជើងខ្លាំងក្រុមជម្រើសជាតិថៃយ៉ាងដំណំ ខណៈការប្រកួតនេះក្រុមទាំងពីរបានប្រទូសរ៉ាយគ្នាផ្អើលពេញទីលានពហុដ្ឋានជាតិអូឡាំពិក ជារូបភាពមួយដែលម្ចាស់ផ្ទះកម្ពុជា និងអ្នកស្នេហាកីឡាមិនចង់ឃើញបែបនេះ។

ក្នុងវគ្គផ្តាច់ព្រ័ត្រដណ្តើមមេដាយមាស ក្រុមជម្រើសជាតិឥណ្ឌូនេស៊ី ត្រូវ ប៉ះជាមួយក្រុមជម្រើសជាតិថៃ ក្នុងព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ខណៈក្រុមទាំងពីរនេះសុទ្ធតែជាជើងខ្លាំងអាចដណ្តើមមេដាយមាសក្នុងប្រវត្តិសាស្រ្តព្រឹត្តិការណ៍ស៊ីហ្គេម។ ជាលទ្ធផលនៃការប្រកួតក្នុងតង់ទី១ ឥណ្ឌូនេស៊ី បាននាំមុខ ថៃ ក្នុងលទ្ធផល២ទល់០ ខណៈក្នុងតង់ទី២ ក្រុមជម្រើសជាតិថៃ បានបំប៉ោងសំណាញ់នៅនាទី៦៥ បានចំនួន១គ្រាប់ និងនាទី៩០ បានចំនួន១គ្រាប់ទៀតដែលនាំឱ្យក្រុមទាំងពីរមានលទ្ធផលស្មើគ្នា រហូតត្រូវបន្ថែម ១៥ នាទីចំនួន២ដង។

អ្វីដែលកាន់តែភ្ញាក់ផ្អើល នៅនាទី៩២ ក្រុមជម្រើសជាតិអាយុក្រោម២២ឆ្នាំឥណ្ឌូនេស៊ី បានទាត់ចូលក្រុមថៃមួយ១គ្រាប់ទៀតដោយកីឡាករ Irfan នាំឱ្យលទ្ធផលមានការប្រែប្រួលយ៉ាងលឿន ៣ទល់២ ។ យ៉ាងណាការបាន១គ្រាប់នេះ បានធ្វើឱ្យក្រុមទាំងពីរមានការប្រទូសរ៉ាយពេញទីលាន រួមទាំងគ្រូបង្វឹករបស់ក្រុមទាំងពីរផងរហូតអជ្ញាធរសម្ថកិច្ចកម្ពុជាជួយសម្រួបសម្រួលស្ថានភាព ខណៈអជ្ញាកណ្តាលការប្រកួតបាល់ទាត់នេះផ្តល់កាតលឿង និងក្រហម ដល់គ្រូបង្វឹកថៃ និងកីឡាករជម្រើសជាតិទាំងពីរផងដែរ។ បន្ទាប់ពីស្រុះស្រួលគ្នាវិញ ឥណ្ឌូនេស៊ី បានបំប៉ោងសំណាញ់ថៃចំនួន២គ្រាប់ទៀតនៅនាទី១០៦និងនាទី១២០ ដោយបញ្ចប់ការប្រកួតក្រុមជម្រើសជាតិឥណ្ឌូនេស៊ីយកឈ្នះថៃក្នុងលទ្ធផល៥ទល់២ ដណ្តើមមេដាយមាសព្រឹត្តិការណ៍ស៊ីហ្គេមលើកទី៣២ ក្រោយពីខកខានគ្រងជើងឯកអស់រយៈពេល៣២ឆ្នាំមកហើយតាំងពីឆ្នាំ១៩៩១។

ការប្រកួតបាល់ទាត់នេះ បញ្ចប់ដោយភាពចម្រូងចម្រាស់ ក្នុងរូបភាពបែបនេះក្នុងនាមជាម្ចាស់ផ្ទះមិនចង់ឃើញឡើយ រួមទាំងអ្នកស្នេហាកីឡាផង ព្រោះការប្រកួតមានចាញ់មានឈ្នះជារឿងធម្មតា ត្រូវទទួលស្គាល់ការពិត និងព្រមទទួលយកលទ្ធផល ព្រោះការបញ្ចេញឥរិយាបថហិង្សាបង្ករឿងចម្រូងចម្រាស់ គ្មានអ្វីក្រៅពីអាប់ឱនកិត្តិយសខ្លួនឯងនិងប្រទេសជាតិខ្លួនឯងទេ ដែលសាងកេរ្តិ៍ឈ្មោះមិនល្អនៅលើទីលានប្រកួត។

គួរបញ្ជាក់ផងដែរថា ការប្រកួតបាល់ទាត់ជម្រើសជាតិអាយុក្រោម២២ឆ្នាំក្នុងព្រឹត្តិការណ៍ស៊ីហ្គេម ក្រុមជម្រើសជាតិ ឥណ្ឌូនេស៊ី ទទួលបានមេដាយមាស ក្រុមជម្រើសជាតិថៃទទួលបានមេដាយប្រាក់ និងក្រុមជម្រើសជាតិវៀតណាមទទួលបានមេដាយសំរឹទ្ធ៕

លោក Keisuke Honda បានបង្ហោះសារនៅលើបណ្តាញសង្គមរបស់ខ្លួនថា ខ្លួនមានចំណាប់អារម្មណ៍ក្នុងការដឹកនាំក្រុមជម្រើសជាតិ ជាពិសេសក្រុមណាដែលចង់ទៅលេងក្នុងជុំចុងក្រោយនៃព្រឹត្តិការណ៍ World Cup ឆ្នាំ 2026។

លោកហុងថា បានបង្ហោះសារថា៖” ក្នុងនាមជាគ្រូបង្វឹក ខ្ញុំចាប់អារម្មណ៍លើការគ្រប់គ្រងប្រទេសអូម៉ង់ នូវែលហ្សេឡង់ អារ៉ាប់រួម ថៃ និងប្រទេសមួយចំនួនដែលចង់លេងក្នុងការប្រកួតបាល់ទាត់ពិភពលោកឆ្នាំ 2026″។

អតីត​ខ្សែបម្រើ​ជម្រើសជាតិ​ជប៉ុន​ទើបតែ​លា​ឈប់​ពី​តំណែង​គ្រូបង្វឹក​ជម្រើសជាតិ​កម្ពុជា​ជា​ផ្លូវការ ក្រោយពីមិនអាចជួយឱ្យកម្ពុជាឡើងទៅកាន់វគ្គផ្តាច់ពាក់កណ្តាលផ្តាច់ព្រ័ត្របាន នៅក្នុងព្រឹត្តិការណ៍សុីហ្គេម ដែលកម្ពុជាធ្វើជាម្ចាស់ផ្ទះ។

ទន្ទឹមគ្នានេះដែរ ម៉ាដាម ប៉ាង ដែលគេគ្រប់គ្នាស្គាល់ថាជាអ្នកដែលនៅពីក្រោយភាពជោគជ័យនៃបាល់ទាត់ថៃនាពេលបច្ចុប្បន្ន ក៏បានបង្ហាញចំណាប់អារម្មណ៍ចង់នាំយកលោកហុងដា មកដឹកនាំក្រុមដំរីសឹកថៃផងដែរ។

ខណៈ​បច្ចុប្បន្ន​ក្រុម​ជម្រើស​ជាតិ​ថៃ​មាន​លោក Mano Polking ជា​គ្រូ​បង្វឹក ដែលទើបតែបន្តកុងត្រាថ្មីក្នុងរយៈពេលខ្លី ត្រឹម៣ខែប៉ុណ្ណោះ។

សូមជម្រាបផងដែរថា ម៉ាដាម ប៉ាង ធ្លាប់បានសរសើរពីការដឹកនាំរបស់លោកហុងដា ដោយគាត់ពេញចិត្តនៅបច្ចេកទេស និងយុត្តិសាស្ត្រសម្រាប់ ដឹកនាំជម្រើស ជាតិ ថៃ ដែលហៅថា Japan Way៕

ប្រភព៖ Thairath