នៅក្នុងកម្មវិធីបើកព្រឹត្តិការណ៍ស៊ីហ្គេមជាផ្លូវការកាលពីថ្ងៃទី៥ ខែឧសភា គេសង្កេតឃើញថាមានវត្តមានសិល្បករ សិល្បការិនី ជាច្រើននាក់ចូលរួម ប៉ុន្តែប្លែកអីតែមិនឃើញវត្តមានតារាចម្រៀងដ៏ល្បី សុខ ពិសី ចូលរួមដែលធ្វើឱ្យអ្នកគាំទ្ររបស់តារាចម្រៀងរូបនេះបង្ហាញការសោកស្តាយផងដែរ ព្រោះមានបណ្តាផលិតកម្មផ្សេងៗចូលរួម តែអវត្តមានតារាចម្រៀងផលិតកម្មសាន់ដេ។

យ៉ាងណាមិញ នៅយប់ថ្ងៃទី១៥ ខែឧសភា តារាចម្រៀងជួរមុខរបស់ផលិតកម្មសាន់ដេ កញ្ញា សុខ ពិសី បានបង្ហាញពីរូបភាពហាត់សមសម្រាប់ថ្ងៃបិទព្រឹត្តិការណ៍ស៊ីហ្គេម ដោយក្នុងរូបភាពនោះក៏បង្ហាញពីតារាចម្រៀង ឆាយ វីរៈយុទ្ធ ដូចគ្នា ដែរមានន័យថាអ្នកទាំងពីរអាចនឹងសម្តែងពិសេសនៅក្នុងកម្មវិធីខាងលើ។

មិនត្រឹមតែបង្ហាញពីរូបភាពដែលមានឱកាសសម្តែងចូលរួមក្នុងកម្មវិធីបិទជាផ្លូវការព្រឹត្តិការណ៍ស៊ីហ្គេម សុខ ពិសី ក៏បានបង្ហាញចំណាប់របស់ខ្លួនដែរថា «ពិតជាមានមោទនភាពដែលបានកើតជាកូនខ្មែរ មកហាត់សមសម្រាប់ថ្ងៃបិទស៊ីហ្គេមថ្ងៃទី ១៧»។ យ៉ាងណាមិញតារាចម្រៀងរូបនេះមិនបានបញ្ជាក់ទេថា នាងនឹងជ្រើសរើសបទណាមកចូលរួមសម្តែងឡើយនៅក្នុងព្រឹត្តិការណ៍ដ៏ពិសេសនេះ។

គួរបញ្ជាក់ថា មិនត្រឹមជាតារាចម្រៀងជួរមុខរបស់ផលិតកម្មសាន់ដេ តែប៉ុណ្ណោះទេ តែ សុខ ពិសី ក៏ជាម្ចាស់ជំនួញម្នាក់ផងដែរ ខណៈថ្មីៗនេះ សុខ ពិសី បានផ្លាស់ប្តូរស្ទាយចម្រៀងចេញបទមនុស្សស្រីស្រលាញ់មនុស្សស្រីផងដែរជាមួយតារាចម្រៀងចំណូលថ្មីរបស់ផលិតកម្មសាន់ដេ គឺកញ្ញា ពុទ្ធិកា៕

អាស៊ានប៉ារ៉ាហ្គេម(ASEAN Para Games) គឺជាព្រឹត្តិការណ៍ពហុកីឡាដែលធ្វើឡើងបន្ទាប់ពីរាល់ការប្រកួតកីឡាអាស៊ីអាគ្នេយ៍ ដែលមានអត្តពលិកពិការ មកពីប្រទេសជាសមាជិកអាស៊ាន ។ អត្តពលិកដែលចូលរួមមានពិការភាពច្រើនប្រភេទ រាប់ចាប់ពីស្ពឹក ពិការខួរក្បាល ពិការភាពចល័ត ពិការភ្នែក រហូត ដល់ពិការបញ្ញា។

អាស៊ានប៉ារ៉ាហ្គេមលើកទី១២ ឆ្នាំ២០២៣ នឹងរៀបចំឡើងនៅប្រទេសកម្ពុជា ចាប់ពីថ្ងៃទី ០៣ ដល់ថ្ងៃទី០៩ ខែមិថុនា ឆ្នាំ២០២៣ ដោយក្នុងកិច្ចប្រជុំក្រុមប្រឹក្សាភិបាលសហព័ន្ធកីឡាជនពិការអាស៊ីអាគ្នេយ៍បានសម្រេចអនុម័តដាក់កីឡា១២ប្រភេទប្រកួត។ កីឡាទាំង១២ រួមមាន៖ កីឡាប៊ូស្យា បាល់ទាត់ម្ខាង៥នាក់ (ចលករខួរក្បាល) បាល់បោះពិការភ្នែក បាល់ទះអង្គុយ បាល់ទាត់ម្ខាង៧នាក់(ចលករខួរក្បាល) បាល់ទះលើរទេះ វាយសី វាយកូនឃ្លីលើតុ អុក អត្តពលកម្ម ហែលទឹក និងលើកទម្ងន់។

មុននឹងអាស៊ានប៉ារ៉ាហ្គេមលើកទី១២ ចាប់ផ្តើមប្រកួតលើទឹកដីកម្ពុជា យើងមកដឹងលទ្ធផលការប្រកួតខ្លះៗពីអាស៊ានប៉ារ៉ាហ្គេមលើកទី១១ទាំងអស់គ្នា តើកម្ពុជាទទួលបានមេដាយប៉ុន្មាន និងប្រទេសណាដែលទទួលបានមេដាយច្រើនជាងគេ។

អាស៊ានប៉ារ៉ាហ្គេមលើកទី១១ បានធ្វើការប្រកួតនៅថ្ងៃទី ៣០ ខែកក្កដា ដល់ថ្ងៃទី ០៦ ខែសីហា ឆ្នាំ ២០២២ នៅទីក្រុងសូឡូ ប្រទេសឥណ្ឌូណេស៊ី។ ប្រទេសកម្ពុជាបានបញ្ជូនកីឡាករ កីឡាការិនីជនពិការ ចំនួន ១១៥ នាក់លើ ១១ ប្រភេទកីឡាចូលរួម។ ជាលទ្ធផលលើសពីការរំពឹងទុក កម្ពុជាទទួលបានមេដាយសរុបចំនួន២៨គ្រឿង មាស៧គ្រឿង ក្នុងវិញ្ញាសារ បូស៊ីយ៉ា បាល់ទះអង្គុយបុរស បាល់បោះរទេះរុញនារី វាយកូនឃ្លីលើតុ អុក អត្តពលកម្ម និងហែលទឹក និងមានមេដាយប្រាក់១០គ្រឿង និងសំរឹទ្ធ១១គ្រឿង ខណៈតាមការគ្រោងទុកកម្ពុជាកំណត់យកមេដាយមាសចំនួន៣គ្រឿង និងមេដាយផ្សេងទៀតត្រូវរកឱ្យបានច្រើនគ្រឿងតែប៉ុណ្ណោះពីអាស៊ានប៉ារ៉ាហ្គេម លើកទី១១។ លទ្ធផលនេះកម្ពុជាឈរនៅលេខរៀងទី៧ក្នុងចំណោម១១ប្រទេស។

គួរបញ្ជាក់ថា ក្នុងការប្រកួតកីឡាប៉ារ៉ាហ្គេមលើកទី១១ ម្ចាស់ផ្ទះឥណ្ឌូណេស៊ី ទទួលបានមេដាយច្រើនជាងគេដែលមានមេដាយសរុបចំនួន៤២៦គ្រឿង មាន មាស ១៧៥គ្រឿង ប្រាក់១៤៤គ្រឿង និងសំរឹទ្ធ១០៧គ្រឿង។ ចំណាត់ថ្នាក់លេខ២បានទៅលើប្រទេសថៃ ដោយទទួលបានមេដាយសរុបចំនួន៣១៨គ្រឿង មានមាស១១៧គ្រឿង ប្រាក់ ១១៣គ្រឿង និងសំរឹទ្ធ៨៨គ្រឿង និងចំណាត់បន្ទាប់គឺប្រទេសវៀតណាម ទទួលបានមេដាយសរុបចំនួន១៨២គ្រឿង មានមាស៦៥គ្រឿង ប្រាក់៦២គ្រឿង និងសំរឹទ្ធ៥៥គ្រឿង៕

ក្រោយពីក្រុមបាល់បោះបុរស របស់កម្ពុជា ៥ទល់៥ បានយកឈ្នះថៃ ដោយលទ្ធផល ៧៦ទល់៦៦ វគ្គពាក់កណ្តាលផ្តាច់ព្រ័ត្រ នៅពហុ​កីឡដ្ឋានជាតិ​មរតតេជោ ឡើង​ទៅ​វគ្គ​ផ្ដាច់ព្រ័ត្រ ជាលើកដំបូងក្នុងប្រវត្តិសាស្រ្ត នៃព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ដោយត្រូវប៉ះក្រុមខ្លាំងហ្វីលីពីន។

មុននឹងឡើងមក​វគ្គ​ផ្ដាច់ព្រ័ត្រ ហ្វីលីពីន បានយកឈ្នះក្រុមម្ចាស់​ជើង​ឯក​ឆ្នាំ​ចាស់ឥណ្ឌូនេស៊ី ក្នុងលទ្ធផល ៧៦ទល់៨៤។ មិនតែប៉ុណ្ណោះហ្វីលីពីន គឺជាម្ចាស់មេដាយមាសសុីហ្គេម១៨សម័យកាលលើវិញ្ញាសាបាល់បោះនេះ។

បាល់បោះបុរស (5×5) ១៦ ឧសភា ២០២៣ | ពហុ​កីឡដ្ឋានជាតិ​មរតតេជោ៖
-មេដាយ​សំរឹទ្ធ ថៃ vs ឥណ្ឌូណេស៊ី (ម៉ោង១:០០រសៀល)
-មេដាយមាស កម្ពុជា vs ហ្វីលីពីន (ម៉ោង​៣:០០រសៀល)៕

ក្រសួងធនធានទឹក និងឧតុនិយម បានជូនដំណឹងនៅព្រឹកថ្ងៃទី១៦ ខែឧសភា នេះថារយៈពេល១សប្តាហ៍ចាប់ពីថ្ងៃទី១៧ ដល់ថ្ងៃទី២៣ ខែឧសភា ឆ្នាំ២០២៣ នឹងទទួលនូវឥទ្ធិពលពីជ្រលងសម្ពាធទាបឥណ្ឌូ និង ខ្យល់មូសុងនិរតី ក្នុងកម្រិតពីខ្សោយទៅមធ្យម។

ស្ថានភាពខាងលើនេះនឹងធ្វើឱ្យ តំបន់ទំនាបកណ្តាល មានសីតុណ្ហភាពអប្បបរមាពី ២៦-២៨ °C និង សីតុណ្ហភាពអតិបរមាមានពី ៣៦-៣៨°C អាចមានភ្លៀងធ្លាក់ក្នុងកម្រិតពីខ្សោយទៅមធ្យម និងអាចច្រើនដោយផ្នែកខ្លះ លាយឡំដោយផ្គរ រន្ទះ និង ខ្យល់កន្ត្រាក់។

ចំណែកឯ តំបន់ខ្ពង់រាប សីតុណ្ហភាពអប្បបរមា មានពី ២៤-២៦ °C និងសីតុណ្ហភាពអតិបរមា មានពី ៣៥- ៣៧ °C អាចមានភ្លៀងធ្លាក់ក្នុងកម្រិតពីខ្សោយទៅមធ្យម និងអាចបង្គួរដោយផ្នែកខ្លះ លាយឡំដោយផ្គរ រន្ទះ និងខ្យល់កន្ត្រាក់ ។

សម្រាប់ តំបន់មាត់សមុទ្រ វិញសីតុណ្ហភាពអប្បបរមា មានពី ២៥-២៧ °C សីតុណ្ហភាពអតិបរមា មានពី ៣៣-៣៥ °C អាចមានភ្លៀងធ្លាក់ក្នុងកម្រិតពីតិចទៅមធ្យម។ បន្តពីថ្ងៃទី២០-២៣ ខែឧសភា បរិមាណភ្លៀងអាចកើន ក្នុងកម្រិតពីតិចទៅបង្គួរ លាយឡំដោយផ្គរ រន្ទះ និងខ្យល់កន្ត្រាក់៕

គណៈកម្មាធិការជាតិរៀបចំការបោះឆ្នោត (គ.ជ.ប) បានម្រេចបដិសការចុះបញ្ជីគណបក្ស និងបញ្ជីបេក្ខជនគណបក្សភ្លើងទៀន សម្រាប់ការចូលរួមប្រកួតប្រជែងការបោះឆ្នោតជ្រើសតាំងតំណាងរាស្រ្តនីតិកាលទី៧ ឆ្នាំ២០២៣នេះ។

ការសម្រេចនេះ ត្រូវបានបញ្ជាក់ក្នុងសេចក្ដីប្រកាសព័ត៌មានចេញផ្សាយនៅថ្ងៃទី១៥ ខែឧសភា ឆ្នាំ២០២៣នេះ បន្ទាប់ពីឯកឧត្តម ប្រាជ្ញ ច័ន្ទ ប្រធាន គ.ជ.ប បានដឹកនាំកិច្ចប្រជុំជាមួយថ្នាក់ដឹកនាំ និងមន្រ្តី គ.ជ.ប។

បើតាមសេចក្ដីសម្រេច ការបដិសេធនេះ គឺដោយសារតែគណបក្សភ្លើងទៀន មិនបានភ្ជាប់មកជាមួយនូវប្រកាសស្ដីពីការចុះឈ្មោះក្នុងបញ្ជីគណបក្សនយោបាយនៅក្រសួងមហាផ្ទៃ ដែលមានបញ្ជាក់នីត្យានុកូលកម្ម ដោយរដ្ឋបាលរាជធានី ខេត្ត ក្រុង ស្រុក ខណ្ឌ នៅការិយាល័យច្រកចេញចូលតែមួយ ឱ្យបានត្រឹមត្រូវស្របតាមកថាខណ្ឌទី២​ និងចំណុចទី១ ក្នុងមាត្រា២៧នៃច្បាប់ស្ដីពីការបោះឆ្នោតជ្រើសតាំងតំណាងរាស្រ្ត៕

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC) បានចេញសេចក្តីជូនដំណឹងដល់អ្នកត្រៀមចូលរួមក្នុងកម្មវិធីបិទកីឡាអាស៊ីអាគ្នេហ៍អនុវត្តវិធានខាងក្រោមនេះដើម្បីរៀបចំដំណើរការបានរលូន និង ទទួលបានលទ្ធផលល្អប្រសើរ។ ការជូនដំណឹងនេះធ្វើឡើងនៅថ្ងៃទី១៣ ខែឧសភា ឆ្នាំ២០២៣។

គណៈកម្មាធិការជាតិ CAMSOC ស្នើអ្នកត្រៀមចូលរួមព្រឹត្តិការណ៍ខាងលើនេះនូវវិធានមានដូចជា៖
– គោរពពេលវេលា វិន័យ សណ្តាប់ធ្នាប់ និងសេចក្តីថ្លៃថ្នូរក្នុងពិធី
– ត្រូវភ្ជាប់មកជាមួយបណ្ណចូលរួម និងតាមប្លង់អង្គុយដែលបានរៀបចំជូន
– ផ្តល់សមាសភាពអ្នកដឹកនាំក្រុមមកចូលរួមពិធីជាមុន ដើម្បីមានភាពងាយស្រួលក្នុងការទំនាក់ទំនងជាមួយ ក្រុមការងារលេខាធិការដ្ឋាន ពិធីការ និងប្រធានក្រុមអ្នកស្ម័គ្រចិត្តទទួលបន្ទុកតាមច្រកចេញ-ចូលនីមួយៗ
– អ្នកដឹកនាំក្រុម ឬជនបង្គោល នៃក្រសួង-ស្ថាប័ន រាជធានី-ខេត្ត និងដៃគូសហការពាក់ព័ន្ធ ត្រូវសហការជាមួយ ក្រុមការងារលេខាធិការដ្ឋាន ពិធីការ និងអ្នកស្ម័គ្រចិត្តដែលទទួលខុសត្រូវតាមទីកន្លែងនីមួយៗ អនុញ្ញាតឱ្យយកចូលនូវទឹកសុទ្ធចំណុះក្រោម៥០០មីលីលីត្រ អាហារសម្រន់តិចតួច និងថ្មសាកទូរស័ព្ទ ឬ គ្រឿងអេឡិចត្រូនិក (Power Bank) ដែលមានថាមពលចំណុះក្រោម១០,០០០mAh
– មិនអនុញ្ញាតឱ្យកុមារអាយុក្រោម១០ឆ្នាំ ចូលរួមក្នុងពិធី

ទន្ទឹមនឹង CAMSOC បានស្នើឱ្យអ្នកចូលរួមមិនត្រូវអនុវត្តដូចខាងក្រោម៖
– ហាមយកកាបូបស្ពាយ ឬកាបូបយួរដៃ ចូលក្នុងពិធី
– ហាមយកអាវុធមុតស្រួច អាវុធជាតិផ្ទុះ ឬឧបករណ៍ដទៃទៀតដែលអាចបង្កហានិភ័យក្នុងពិធី
– ហាមបង្កសម្លេងរំខាន ឬដើរចេញពីកន្លែងអង្គុយក្នុងកំឡុងពេលថ្នាក់ដឹកនាំកំពុងថ្លែងសុន្ទរកថា
គួរបញ្ជាក់ផងដែរថា ពិធីបិទជាផ្លូវការព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣ ប្រព្រឹត្តឡើងក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី១៧ ខែឧសភា ឆ្នាំ២០២៣ នៅពហុកីឡដ្ឋានជាតិមរតកតេជោ។

បើតាមការបញ្ជាក់ពី ឯកឧត្តម វ៉ាត់ ចំរើន អគ្គលេខាធិការគណ:កម្មាធិការជាតិអូឡាំពិកកម្ពុជា និងជាអគ្គលេខាធិការ គណ:កម្មាធិការជាតិរៀបចំប្រកួតកីឡាអាស៊ីអាគ្នេយ៍លើកទី៣២ឆ្នាំ២០២៣ បានមានប្រសាសន៍ថា កម្មវិធីបិទព្រឹត្តិការណ៍កីឡាស៊ីហ្គេមលើកទី៣២នឹងមិនចាញ់ដូចពិធីបើកផ្លូវការឡើយ មិនត្រឹមតែប៉ុណ្ណោះនឹងរួមបញ្ជូលទស្សនីយភាពថ្មីៗ ដែលបង្ហាញពីវប្បធម៌ អរិយធម៌ ប្រពៃណីរបស់កម្ពុជា ដែលមានភាពប្រណិតនិងអស្ចារ្យដើម្បីឱ្យប្រជាជនចងចាំនូវព្រឹត្តិការណ៍នេះ៕

អាជីវករច្រើននាក់ស្នើសុំថ្នាក់ដឹកនាំជួយរកដំណោះស្រាយ ក្រោយទិញតូបផ្សារជីស៊ីអូឬស្សីអស់រាប់ម៉ឺនដុល្លារតែផ្សារមិនដំណើរការ 

គណនីហ្វេកប៊ុកមួយឈ្មោះថា «Sovannrithy Ouk» បានបង្ហោះសារនៅលើបណ្តាញសង្គមហ្វេកប៊ុ ដង្ហោយសុំជំនួយពីថ្នាក់ដឹកនាំ ក្រោយពីអាជីវករជាច្រើនរូបទិញតូបផ្សារជីស៊ីអូឬស្សីអស់រាប់ម៉ឺនដុល្លារដែលមានទីតាំងស្ថិតនៅតាមបណ្តោយផ្លូវសហព័ន្ធរុស្ស៊ី តែផ្សារមិនមានការសាងសង់រួមទាំងធ្វើតាមផ្លូវច្បាប់ឱ្យមេធាវីជូនដំណឹង៣ដងហើយនៅមិនមានការឆ្លើយតបពីក្រុមហ៊ុន។ ការបង្ហោះនេះខាងភាគីក្រុមហ៊ុន ជីស៊ីអូរឬស្សី ក៏បានចេញលិខិតបំភ្លឺដែលថាជាការចុះផ្សាយព័ត៌មានក្រុមហ៊ុន មិនមានទំនួលខុសត្រូវ  ក្រុមហ៊ុនសូមធ្វើការច្រានចោលទាំងស្រុង។

តាមរយៈសាររបស់គណនីខាងលើបានសរសេរយ៉ាងដូច្នេះថា «ខ្ញុំទាំងអស់គ្នាជាអាជីវករទិញតូបផ្សារជីស៊ីអូឬស្សីនៅក្បែរក្រសួងពាណិជ្ជកម្មផ្លូវសហព័ន្ធរុស្ស៊ី។សូមគោរពដ៏ខ្ពង់ខ្ពស់បំផុតជូនសម្ដេចអគ្គមហាសេនាបតីតេជោហ៊ុនសែននិងសម្ដេចគតិព្រឹទ្ធបណ្ឌិតប៊ុនរ៉ានីហ៊ុនសែនដែលជាសម្ដេចពុកនិងសម្ដេចម្ដាយ។និងលោកអភិបាលក្រុងរាជធានីភ្នំពេញឯកឧត្តមឃួងស្រេងសូមមេត្តាជួយរកដំណោះស្រាយឲ្យខ្ញុំទាំងអស់គ្នាផងព្រោះខ្ញុំទាំងអស់គ្នាបានយកប្រាក់ពីការងាររដ្ឋបានយកប្រាក់ពីធនាគារខ្ចីគេដើម្បីយកមកទិញតូបផ្សារជីស៊ីអូឬស្សីហើយអស់រាប់ម៉ឺនដុល្លារប៉ុន្តែរយៈពេលយូរឆ្នាំប្រហែលជិតពីរឆ្នាំហើយដែលផ្សារមិនមានការសាងសង់ហើយខ្ញុំទាំងអស់គ្នាធ្វើតាមផ្លូវច្បាប់តាមរយៈមេធាវីជូនដំណឹងទៅបីដងហើយគេមិនឆ្លើយតបទាល់តែសោះ។ក្រុមហ៊ុនផ្សារមិនឆ្លើយតបដូច្នេះហើយខ្ញុំសូមគោរពថ្នាក់ដឹកនាំជួយកូនចៅប្រជាពលរដ្ឋដែលបានយកប្រាក់កម្លាំងញើសឈាមទាំងអស់នេះយកមកបង់អោយផ្សារតែផ្សារមិនសាងសង់សូមសម្ដេចហ៊ុនសែននិងសម្ដេចគតិព្រឹទ្ធបណ្ឌិតប៊ុនរ៉ានីហ៊ុនសែននិងលោកអភិបាលក្រុងឯកឧត្តមឃួងស្រេងមេត្តាជួយដោះស្រាយជូនប្រជាពលរដ្ឋដែលជាជនរងគ្រោះនេះផង»។

ជាមួយគ្នានេះដែរ ក្រោយពីអាជីវករបានបង្ហោះនៅលើបណ្តាញសង្គមជាបន្តបន្ទាប់ ក្រុមហ៊ុនផ្សារជីស៊ីអូរឬស្សី លិខិតបំភ្លឺថា «សូមគោរពជូន ដល់អតិថិជន និងបងប្អូនអាជីវករ នៃ ផ្សារ ជីស៊ី អូរឬស្សី ឯ.ក ឱ្យបានជ្រាបថា ខាងក្រុមហ៊ុនសូមច្រានចោលទាំងស្រុងនូវព័ត៌មានមួយចំនួនដែលបានចុះផ្សាយ នៅថ្ងៃទី១៣ ខែឧសភា ឆ្នាំ២០២៣ ទៅលើការដែល ក្រុមហ៊ុនមិនមានទំនួលខុសត្រូវ និងធ្វើការសារសង់ទៅលើសំណង់ផ្សារជីស៊ី អូរឬស្សី ឯ.ក ដែលស្ថិតនៅតាមបណ្ដោយមហាវិថីសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ រាជាធានីភ្នំពេញ។ ក្នុងនាមខ្ញុំជានាយកប្រតិបត្តិ ក្រុមហ៊ុន ផ្សារជីស៊ី អូរឬស្សី ឯ.ក សូមជំរាបជូន ដល់អតិថិជន និងបងប្អូនអាជីវករថា ខាងក្រុមហ៊ុនយើងខ្ញុំ នឹងរៀបចំកម្មវិធីបុកគ្រឹះសម្ភោធការដ្ឋានសាងសង់នៃ ផ្សារជីស៊ី អូរឬស្សី ឯ.ក នៅថ្ងៃទី ៣០ ខែ មិថុនា ឆ្នាំ២០២៣។ ព័ត៌មានលំអិតសូម ធ្វើការទំនាក់ទំនង់មកការិយាលក់ រឺបុគ្គលិកផ្នែកលក់»។