បរទេស៖ URB Dubai Design District ដែលជាអ្នកអភិវឌ្ឍន៍ទីក្រុងប្រកបដោយនិរន្តរភាពបានប្រកាសផែនការសម្រាប់ “គម្រោងស្តារមហាសមុទ្រដ៏ធំបំផុតរបស់ពិភពលោក” នៅទីក្រុងឌូបៃឆ្នេរសមុទ្រដែលហៅថា ឌូបៃ ថ្មប៉ប្រះទឹក។
បច្ចុប្បន្ននេះ URB កំពុងផ្តោតលើតំបន់ឆ្នេរនៃទីក្រុងឌូបៃ ជាមួយនឹងគម្រោង Dubai Reefs។ Dubai Reefs គឺជាសហគមន៍អណ្តែតទឹកប្រកបដោយនិរន្តរភាព ដែលផ្តល់ជូននូវកន្លែងស្នាក់នៅ មន្ទីរពេទ្យ កន្លែងលក់រាយ ការអប់រំ និងការស្រាវជ្រាវជាច្រើន។ យោងតាមប្រភពព័ត៌មាន New Atlas ដែលបានរាយការណ៍នៅថ្ងៃទី ៩ ខែឧសភា ថា Reefs URB មានគោលបំណងប្រែក្លាយទីក្រុងឌូបៃទៅជាមជ្ឈមណ្ឌលទូទាំងពិភពលោកសម្រាប់ការស្រាវជ្រាវសមុទ្រ ការបង្កើតជីវសាស្រ្ត និងទេសចរណ៍អេកូឡូស៊ី ។

ក្នុងអំឡុងពេលនៃការអភិវឌ្ឍន៍តំបន់ថ្មប៉ប្រះទឹកឌូបៃ នាយកប្រតិបត្តិ URB លោក Baharash Bagherian បានផ្តោតលើសារៈសំខាន់នៃមហាសមុទ្រក្នុងការរក្សាបរិស្ថានដែលមានសុខភាពល្អ។ ចំណុចសំខាន់នៃគម្រោងនេះគឺជាវិទ្យាស្ថានមហាសមុទ្រមានគោលបំណងការពារបរិស្ថានសមុទ្រ និងឆ្នេរសមុទ្រនៃទីក្រុងឌូបៃ។ ថ្មប៉ប្រះទឹកសិប្បនិម្មិតទំហំ ១៩៩ គីឡូម៉ែត្រការ៉េនឹងបង្កើតបរិយាកាសធម្មជាតិសម្រាប់ដើមឈើផ្កាថ្មជាងមួយពាន់លាន និងព្រៃកោងកាង ១០០ លាន។ ប្រព័ន្ធអេកូឡូស៊ីតាមឆ្នេរសមុទ្រនេះនឹងបម្រើការប្រមូល និងស្តុកកាបូន ជួសជុលការខូចខាតដែលបណ្ដាលមកពីការទាញយកប្រេងនៅតំបន់ឆ្នេរឌូបៃ ក្នុងរយៈពេលមួយទសវត្សរ៍កន្លងទៅ។វិទ្យាស្ថានមហាសមុទ្ររបស់ឌូបៃនឹងផ្តោតលើការអប់រំ និងការអភិរក្ស ហើយដឹកនាំគំនិតផ្តួចផ្តើមមួយដើម្បីសម្អាតកាកសំណល់ប្លាស្ទិកក្នុងមហាសមុទ្រ ដោយធានាថាប្រព័ន្ធអេកូឡូស៊ីតាមឆ្នេរសមុទ្ររបស់ទីក្រុងឌូបៃបម្រើជាការលិចកាបូនយូរអង្វែង។ កសិដ្ឋានដែលអាចកកើតឡើងវិញនឹងផ្តល់សន្តិសុខស្បៀង និងធ្វើឱ្យសេដ្ឋកិច្ចកាន់តែបៃតង។ បន្ថែមពីលើការប្រែក្លាយទីក្រុងឌូបៃទៅជាគោលដៅដែលមិនប៉ះពាល់ដល់បរិស្ថាន ទីក្រុងឌូបៃនឹងបង្កើតការងារប្រហែល ៣០,០០០ កន្លែងបន្ថែមទៀតសម្រាប់ប្រជាជនរបស់ខ្លួន៕ ប្រភព៖vnexpress

ប្រទេសចិន ៖ សារព័ត៌មានក្រៅប្រទេសបានចុះផ្សាយពីហេតុការណ៍គួរឱ្យភ្ញាក់ផ្អើលមួយកើតឡើងនៅប្រទេសចិន គឺមានក្រុមគ្រួសារមួយមានកូនស្រីគួរឱ្យស្រឡាញ់ម្នាក់ ដែលមានអាយុត្រឹមតែ៤ឆ្នាំប៉ុណ្ណោះ និងរៀននៅថ្នាក់មត្តេយ្យ ។ ក្មេងតូចបម្រុងនឹងត្រូវបានគេជួញដូរ ប៉ុន្តែសំណាងល្អដែលម្តាយរបស់នាងយកចិត្តទុកដាក់នឹងពាក្យសម្តីរបស់កូន ។

សារព័ត៌មានចុះផ្សាយថា នៅថ្ងៃមួយ ម្តាយបានទៅទទួលកូនស្រីចេញពីសាលារៀនត្រឡប់មកផ្ទះវិញ ហើយឃើញខ្នងដៃរបស់កូនមានរូបសញ្ញាប្លែកៗស្រដៀងនឹងរូបផ្កា ហើយដោយសារការងឿយឆ្ងល់ ម្តាយបានសួរទៅកាន់កូនថា តើកូនបានសញ្ញានៅលើខ្នងដៃនេះតាមរបៀបណា ?

កូនស្រីក៏រៀបរាប់ថា ក្រោយពីចេញពីបន្ទប់រៀន និងរង់ចាំម្តាយមកទទួលទៅផ្ទះវិញ ស្រាប់តែមានអ្នកគ្រូម្នាក់ដើរមកជ្រើសរើសក្មេងៗយកទៅរៀនរាំអេរ៉ូបិក ។ បន្ទាប់មក អ្នកគ្រូបានគូរសញ្ញានេះនៅលើខ្នងដៃក្មេងៗ ព្រមទាំងណាត់ឱ្យក្មេងៗមករង់ចាំនៅទ្វារក្រោយសាលារៀននាថ្ងៃបន្ទាប់ ។ អ្នកគ្រូប្រាប់ថា នឹងឱ្យរង្វាន់ បើអ្នកណាអាចរាំបានស្អាត គឺនឹងនាំទៅញ៉ាំសាច់មាន់ចៀន ។ កូនស្រីបន្តថា នេះជាសញ្ញាសម្ងាត់របស់អ្នកគ្រូ ហើយអ្នកគ្រូប្រាប់ថា កុំប្រាប់ឪពុកម្តាយឱ្យសោះ ។

បន្ទាប់ពីម្តាយស្តាប់កូនរៀបរាប់រួច ក៏មានអារម្មណ៍ចម្លែកចិត្តជាខ្លាំង ។ ម្តាយសង្ស័យ និងយល់ថា វាមិនមែនជាហេតុការណ៍ធម្មតាទេ ហើយក៏បានទៅប្តឹងប៉ូលិស និងរៀបរាប់រឿងរ៉ាវទាំងអស់ឱ្យប៉ូលិសស្តាប់ ។ ប៉ូលិសក៏បានរៀបគម្រោងមួយទៅរង់ចាំជួបអ្នកគ្រូនោះនៅទ្វារខាងក្រោយសាលារៀន ហើយក៏អាចចាប់ខ្លួនអ្នកគ្រូបានតែម្តង ។ ប៉ូលិសនិយាយថា នារីម្នាក់នេះនិយាយថា ខ្លួនជាគ្រូបង្រៀន ប៉ុន្តែការពិត នាងជាក្រុមជួញដូរកុមារ ។

សំណាងល្អដែលស្ត្រីជាម្តាយរូបនេះយកចិត្តទុកដាក់ចំពោះរឿងដែលកើតឡើង និងសង្កេតពីភាពខុសប្រក្រតីបានទាន់ពេលវេលា ហើយនាងបានជួយជីវិតកូនស្រីរបស់ខ្លួន និងក្មេងដទៃទៀតមិនឱ្យធ្លាក់ក្នុងដៃជនខិលខូច ៕ ប្រភព ៖ chiangmai news

ប្រទេសចិន ៖ «ក្នុងជីវិតនេះកើតមកសម្រាប់តែឆ្មា កូនស្រីខ្ញុំអាយុ៣៨ឆ្នាំហើយ ប៉ុន្តែនាងមិនព្រមរកសង្សារ និងរកការងារទេ មួយថ្ងៃៗគិតតែពីចិញ្ចឹមឆ្មា ។ លើសពីនេះ នាងបានយកឆ្មាគ្មានម្ចាស់ចំនួន៦ក្បាលទៀតមកចិញ្ចឹមទៀតផង» ។ នេះបើតាមការរៀបរាប់របស់ស្ត្រីម្នាក់តាមទូរទស្សន៍ ដើម្បីឱ្យគេជួយកូនស្រីរបស់គាត់ ។

កាលពីពេលថ្មីៗនេះ មានស្ត្រីម្នាក់អាយុ៧០ឆ្នាំ បានបង្ហាញខ្លួនក្នុងស្ថានីយទូរទស្សន៍ Chongqing ប្រទេសចិន ហើយគាត់បានរៀបរាប់ទាំងទឹកភ្នែកថា កូនស្រីរបស់គាត់បានបញ្ចប់ការសិក្សាពីសាកលវិទ្យាល័យនាំមុខគេមួយ ហើយក៏ធ្លាប់ធ្វើការនៅទីក្រុងប៉េកាំង និងសៀងហៃ កាលពីប៉ុន្មានឆ្នាំមុន ។ ប៉ុន្តែកូនស្រីបានលាឈប់ពីការងារ និងត្រឡប់មករស់នៅផ្ទះឯស្រុកកំណើតវិញ គឺក្នុងគោលបំណងចិញ្ចឹមឆ្មា ។

ស្ត្រីជាម្តាយរៀបរាប់ថា កូនស្រីរបស់គាត់គ្មានការងារធ្វើអស់រយៈពេល៦ឆ្នាំហើយ ហើយប្រើពេលភាគច្រើនរបស់នាងដើម្បីបង្ហោះវីដេអូពីឆ្មាចិញ្ចឹមក្នុងបណ្តាញសង្គម ។ កូនស្រីប្រាប់ថា នៅថ្ងៃណាមួយ នាងនឹងអាចរកប្រាក់ចំណូលពីវីដេអូទាំងនេះ និងអាចចិញ្ចឹមខ្លួនឯងនៅថ្ងៃអនាគតបាន ។ កន្លងមក ឪពុកម្តាយឈឺក្បាលខ្លាំងណាស់ ព្រោះកូនស្រីគិតតែពីចិញ្ចឹមឆ្មាតែម្យ៉ាង ហើយមិនព្រមរកសង្សារ និងរៀបការបែកផ្ទះសោះ ។ លើសពីនេះ នាងមិនព្រមរកការងារធ្វើទេ បើទោះជាពួកគាត់ព្យាយាមបញ្ចុះបញ្ចូលឱ្យនាងរកការងារធ្វើ និងរកសង្សារក៏ដោយ ប៉ុន្តែនាងបដិសេធ ដែលធ្វើឱ្យពួកគាត់ជាឪពុកម្តាយបារម្ភថា នៅថ្ងៃអនាគត នាងមិនអាចចិញ្ចឹមខ្លួនឯងបាន ព្រោះគិតតែនៅជាមួយឆ្មាបែបនេះ ។

ស្ត្រីជាម្តាយប្រាប់ថា ៖ «ខ្ញុំ និងប្តីបារម្ភយ៉ាងខ្លាំងរឿងកូន ហើយពួកយើងមិនអាចហូបឆ្អែត ឬគេងលក់ស្រួលទេ ។ យើងសង្ឃឹមថា កូនស្រីនឹងស្វែងរកការងារធ្វើ និងរកបុរសណាម្នាក់មករៀបការជាមួយដូចអ្នកដទៃដែរ ។ បើកូនស្រីព្រមរៀបការ យើងនឹងបានគេងលក់ស្រួលហើយ» ។

ម្តាយរូបនេះបន្ថែមថា បើទោះជាគាត់នៅជិតកូនស្រីក្តី ប៉ុន្តែគាត់មានអារម្មណ៍ថានៅឆ្ងាយពីនាង ព្រោះគាត់មិនយល់ពីការរស់នៅរបស់នាង ។ កន្លងមក គាត់បានយំដោយសាររឿងនេះជាញឹកញាប់ ដោយសារនាងមិនស្តាប់គាត់ ។ គាត់ប្រាប់ថា ៖ «កូនស្រីគាត់បានយកឆ្មាគ្មានម្ចាស់មកចិញ្ចឹម ហើយគាត់ និងប្តីត្រូវលាក់ទុកការឈឺចាប់នេះមិនហ៊ានប្រាប់គេឯង ព្រោះខ្មាស់គេ» ។

ទោះយ៉ាងណា កូនស្រីរបស់គាត់និយាយថា ៖ «ខ្ញុំធ្វើវីដេអូទាក់ទងនឹងសត្វចិញ្ចឹម បើទោះជាមិនទាន់ទទួលប្រាក់នៅពេលនេះ ប៉ុន្តែខ្ញុំជឿថា នៅថ្ងៃអនាគត ខ្ញុំនឹងអាចរកចំណូលបាន ហើយខ្ញុំមិនខ្វល់នឹងការនៅលីវទេ ។ មនុស្សចាស់មានការគិតខុសពីក្មេងជំនាន់ក្រោយ ហើយពួកគាត់មិនយល់ថា ហេតុអ្វីខ្ញុំត្រូវចិញ្ចឹមឆ្មាទេ» ៕

ប្រភព ៖ chiangmainews

ប្រទេសចិន ៖ ប៉ូលិសចិនបានចាប់ខ្លួនបុរសម្នាក់ពីបទចោទប្រកាន់ថា បុរសនេះប្រើប្រាស់កម្មវិធី ChatGPT ដើម្បីផ្សព្វផ្សាយព័ត៌មានក្លែងក្លាយក្នុងបណ្តាញសង្គម ។ ដូច្នេះ វាជាលើកដំបូងដែលប្រទេសចិនចាត់ការរឿងក្តីទាក់ទងនឹង AI Chatbot ដ៏ឆ្លាតវៃនេះ ។

ប៉ូលិសក្នុងតំបន់ Gansu រាយការណ៍ថា ជនសង្ស័យត្រូវបានចោទប្រកាន់ពីបទប្រើប្រាស់ ChatGPT ដើម្បីផ្សព្វផ្សាយព័ត៌មានក្លែងក្លាយពាក់ព័ន្ធនឹងរឿងរថភ្លើងបុកគ្នា ។ បុរសនេះបានបង្ហោះព័ត៌មានរថភ្លើងបុកគ្នាក្នុងបណ្តាញសង្គម ដើម្បីរកប្រាក់ចំណេញពីព័ត៌មាន ហើយអត្ថបទនេះមានអ្នកចូលមើលរហូតដល់១៥.០០០លើក ។ បើទោះជាចិនហាមឃាត់ការប្រើប្រាស់ ChatGPT ក្តី ប៉ុន្តែអ្នកប្រើប្រាស់អ៊ីនធើរណេតជាច្រើននៅចិនបានលួចប្រើប្រាស់កម្មវិធី VPN ដើម្បីចូលទៅលេង ChatGPT ។

សារព័ត៌មាន CNN រាយការណ៍ថា ហេតុការណ៍រថភ្លើងបុកគ្នា គឺជាប្រធានបទរសើបខ្លាំងនៅចិន ដោយសារនៅឆ្នាំ២០១១ ប្រទេសចិនធ្លាប់កើតហេតុការណ៍រថភ្លើងល្បឿនលឿនបុកគ្នានៅទីក្រុង Wenzhou ខេត្ត Zhejiang ដែលបណ្តាលឱ្យមនុស្សស្លាប់ចំនួន៤០នាក់ និងរងរបួសរាប់រយនាក់ទៀត ។ ដូច្នេះ ធ្វើឱ្យពលរដ្ឋចិនខឹងសម្បារជាខ្លាំង ហើយពួកគេត្រូវការចម្លើយថា ហេតុអ្វីបានជាសារព័ត៌មានរបស់រដ្ឋាភិបាលមិនចុះផ្សាយព័ត៌មាននេះឱ្យពលរដ្ឋបានដឹង ។

ប៉ូលិសនៅតំបន់ Gansu បន្ថែមថា បុរសនេះមាននាមត្រកូល ហុង ។ កាលពីថ្ងៃទី៥ ខែឧសភា កន្លងមក គេបានស៊ើបអង្កេតបុរសនេះនៅទីក្រុង Dongguan ស្ថិតនៅភាគខាងត្បូងខេត្តក្វាងទុង រកឃើញថា បុរសនេះបានប្រើបច្ចេកវិទ្យាខាងលើធ្វើព័ត៌មានក្លែងក្លាយ និងផ្សព្វផ្សាយលើអ៊ីនធើរណេត ហើយព័ត៌មានក្លែងក្លាយនេះបានផ្សព្វផ្សាយយ៉ាងទូលំទូលាយ ។ ឥរិយាបថរបស់ជនល្មើសចាត់ទុកថា មានទោសពីបទបះបោរ និងបង្កឱ្យកើតភាពរញ៉េរញ៉ៃក្នុងសង្គម ។

របាយការណ៍បញ្ជាក់ថា ការចាប់ខ្លួនបុរសហុង គឺជាករណីដំបូងនៅតំបន់ Gansu ក្រោយពីខែមករា ឆ្នាំ២០២៣ ការិយាល័យគ្រប់គ្រងអ៊ីនធើរណេតរបស់ចិនបានប្រកាសអនុវត្តច្បាប់ថ្មី ដើម្បីកុំឱ្យមានការប្រើប្រាស់ AI បន្លំព័ត៌មានតាមរយៈវីដេអូ, រូបភាព ឬសំឡេង ។ សារព័ត៌មាន CGTN របស់រដ្ឋាភិបាលចិនរាយការណ៍ថា វាជាលើកដំបូងដែលចិនបានចាប់ខ្លួនជនល្មើសប្រើប្រាស់ ChatGPT ដើម្បីផ្សព្វផ្សាយព័ត៌មានក្លែងក្លាយ ៕

ប្រភព ៖ Thestandard