ក្រុមហ៊ុន Apple នឹងចេញ iOS 17 នាពេលដ៏ខ្លីខាងមុខនេះ ដោយត្រកូល iPhone ចំនួន២ម៉ូឌែល នឹងមិនអាចធ្វើការអាប់ដេតបាននោះទេ។

កំណែទម្រង់ថ្មី Version iOS 17 គឺជាអ្វីដែលអតិថិជននិយមប្រើទ iPhone កំពុងទទឹងរងចាំមើលថា តើ version ថ្មីមួយនេះមានអ្វីប្លែកខុសពី iOS 16 ខ្លះ។

បើតាមពាក្យចចាមអារ៉ាម បានឱ្យដឹងថា iOS 17 នឹងកែប្រែទៅលើមុខងារមួយចំនួនដូចជា Control Center ផ្ទាំងបង្ហាញលើកម្មវិធី និង Dynamic Island ជាដើម។

តែអ្វីដែលគួរឱ្យសោកស្តាយនោះ គឺថាត្រកូលiPhone ចំនួន២ម៉ូឌែល គឺ 8,8plus និង iPhone X មិនអាចធ្វើការអាប់ដេតឡើង Version iOS 17 បាននោះទេ៕

ប្រទេសចិន ៖ បើគេធ្វើដំណើរទៅកាន់ទីក្រុងក្វាងចូវ ប្រទេសចិន គេនឹងបានឃើញសត្វស្លាបជាច្រើនក្បាល និងឮសំឡេងសត្វស្លាបយំទៀតផង ។ នេះឆ្លុះបញ្ចាំងឱ្យឃើញថា ទីក្រុងក្វាងចូវបានយកចិត្តទុកដាក់លើបរិយាកាស កន្លែងរស់នៅរបស់សត្វស្លាប និងមានប្រភពទឹកគ្រប់គ្រាន់ ។ ជាច្រើនឆ្នាំកន្លងមក ទីក្រុងក្វាងចូវបានកែលម្អបរិយាកាស និងទឹកឱ្យមានគុណភាពល្អប្រសើរជាងមុន ហើយទីក្រុងនេះស្ថិតក្នុងលំដាប់ទី១ ជាទីក្រុងមានគុណភាពបរិយាកាសល្អក្នុងចំណោមទីក្រុងធំៗរបស់ចិន ។

បុគ្គលិករបស់វិទ្យាស្ថានអភិរក្សសត្វលើកឡើងថា សត្វស្លាបចូលចិត្តមករស់នៅកន្លែងណាដែលមានសម្បុក អាហារគ្រប់គ្រាន់ និងមានសុវត្ថិភាពផងដែរ ហើយទីក្រុងក្វាងចូវបានរៀបចំនូវបរិស្ថានអំណោយផលដល់ការរស់នៅរបស់ពពួកសត្វស្លាបទាំងនោះ ។

ប្រទេសចិនបានព្យាយាមអភិវឌ្ឍន៍ក្វាងចូវឱ្យក្លាយជាទីក្រុងមួយទាក់ទាញសត្វស្លាប ។ ក្រៅពីទីក្រុងក្វាងចូវបានបង្កលក្ខណៈងាយស្រួលផ្នែកបរិយាកាស កន្លែងរស់នៅ និងមានទឹកគ្រប់គ្រាន់សម្រាប់សត្វស្លាបហើយ ទីក្រុងនេះក៏បានបង្កើតតំបន់អភិរក្សធម្មជាតិចំនួន១១ម៉ឺនហិកតាទៀតផង ក្នុងនោះរួមមាន ឧទ្យាន និងតំបន់មានប្រភពទឹកជាដើម ។ ដូច្នេះ សត្វស្លាបងាយស្រួលរកចំណីអាហារនៅតាមឧទ្យានទាំងនេះ ។

គេសង្កេតឃើញថា មានសត្វស្លាបជាង១៨០ពូជដែលបានមករស់នៅ និងបង្កាត់ពូជនៅទីនេះ ខណៈកាលពី៨ឆ្នាំមុន មានសត្វស្លាបត្រឹមតែ៧០ពូជប៉ុណ្ណោះ ។ បច្ចុប្បន្ន នៅទីក្រុងក្វាងចូវបានគ្របដណ្តប់ទៅដោយព្រៃឈើខៀវស្រងាត់ និងជាទីក្រុងអភិរក្សបរិស្ថាននាំមុខគេ បើធៀបនឹងទីក្រុងធំផ្សេងទៀតនៅប្រទេសចិន ។

ក្នុងទីក្រុងនេះ មានឧទ្យានជាង១.២០០កន្លែង ហើយទីក្រុងក្វាងចូវ ក៏មានគម្រោងបង្កើនផ្ទៃដីព្រៃបៃតងចំនួន៦,៧ហិកតាថែមទៀតនៅឆ្នាំ២០២៧ ខាងមុខ ។ ហេតុនេះ វាមិនត្រឹមតែធ្វើឱ្យពលរដ្ឋរស់នៅក្នុងទីក្រុងបានរស់នៅជាមួយធម្មជាតិប៉ុណ្ណោះទេ ប៉ុន្តែពួកគេក៏អាចទទួលអារម្មណ៍ស្រស់ស្រាយជាមួយសត្វស្លាបនៅជុំវិញខ្លួនផងដែរ ដោយសារទីក្រុងបានបង្កើតកន្លែងថ្មីៗសម្រាប់សត្វស្លាបរស់នៅ ៕ ប្រភព ៖ China Face

បរទេស៖ ក្លិបបាល់ទាត់ PSG របស់បារាំងបានបាត់បង់អ្នកគាំទ្រជាងមួយលាននាក់ ខណៈដែលកំពូលតារាបាល់ទាត់ពិភពលោក Lionel Messi មិនបានបន្តកិច្ចសន្យាជាមួយក្លិបនេះតទៅទៀត។
យោងតាមគេហទំព័រ The Sun កាលពីថ្ងៃទី ៣ ខែមិថុនា បានឱ្យដឹងថា បន្ទាប់ពីចប់ការប្រកួតចុងក្រោយរវាង PSG ទល់នឹង Clermont ខ្សែប្រយុទ្ធអាហ្សង់ទីនបានបង្ហោះវីដេអូសុំទោសក្រុម និងអ្នកគាំទ្រ ដោយបានពន្យល់ថា គាត់បានផ្អាកសកម្មភាព និងអវត្តមាននៅក្នុងក្លិបនេះច្រើនដងហើយ ដូច្នេះគាត់មិនអាចត្រឡប់មកវិញបានទេ។

នៅថ្ងៃដដែលនោះក្លិប Paris Saint-Germain (PSG) ក៏ បានបញ្ជាក់ពីការលាឈប់របស់ ខ្សែប្រយុទ្ធវ័យ ៣៥ ឆ្នាំរូបនេះផងដែរ ដោយសេចក្តីថ្លែងការណ៍បានសរសេរថា “បន្ទាប់ពីពីររដូវកាលនៅក្នុងរដ្ឋធានីរបស់ប្រទេសបារាំង ការផ្សងព្រេងរបស់ Leo Messi ជាមួយ PSG នឹងឈានដល់ទីបញ្ចប់” ។ “ក្លឹបសូមថ្លែងអំណរគុណយ៉ាងកក់ក្តៅបំផុតចំពោះបុរសដែលបានឈ្នះពានរង្វាន់ Ballon d’Or ប្រាំពីរ និង French Super Cup រួមជាមួយពានរង្វាន់ Ligue ១ ជាមួយក្លឹបផងដែរ”។

គួរបញ្ជាក់ដែរថា លោក Messi មិនបានប្រកាសអំពីទិសដៅបន្ទាប់របស់ខ្លួននោះទេ។ យោងតាមប្រព័ន្ធផ្សព្វផ្សាយរបស់អឺរ៉ុប បានសន្និដ្ឋានថា ខ្សែប្រយុទ្ធវ័យ ៣៥ ឆ្នាំរូបនេះ អាចនឹងត្រលប់ទៅក្លិបចាស់ FC Barcelona (Barca) របស់លោកវិញ ៕ ប្រភព៖vnexpress

ប្រទេសថៃ ៖ បើទោះជាប្រទេសថៃបានចូលដល់រដូវវស្សាក្តី ប៉ុន្តែពលរដ្ឋរស់នៅស្រុកដូយតាវ ខេត្តឈៀងម៉ៃ កំពុងតែប្រឈមនឹងគ្រោះរាំងស្ងួតជាខ្លាំង ។ ទឹកនៅក្នុងទន្លេ និងបឹងផ្សេងៗបានរីងស្ងួតស្ទើរគ្រប់កន្លែង ក្នុងនោះកម្រិតទឹកក្នុងបឹងដូយតាវ ក៏បានស្រកចុះជាបន្តបន្ទាប់ផងដែរ ដោយសារតែគ្មានភ្លៀងធ្លាក់ ខណៈបឹងនេះជាតំបន់ទេសចរណ៍ដ៏ល្បីឈ្មោះមួយនៅខេត្តឈៀងម៉ៃ ។

លើសពីនេះ គេបានបង្ហូរទឹកចេញទំនប់ដើម្បីដោះស្រាយបញ្ហាខ្វះខាតទឹករបស់កសិករក្នុងការធ្វើកសិកម្ម ជាហេតុធ្វើឱ្យកម្រិតទឹកក្នុងបឹងដូយតាវកាន់តែស្រកចុះខ្លាំង ។ លើសពីនេះ កម្រិតទឹកក្នុងបឹងដូយតាវធ្លាក់ចុះខ្លាំងបានធ្វើឱ្យប៉ះពាល់ធ្ងន់ធ្ងរដល់អ្នកនេសាទក្នុងតំបន់ ហើយទូកនេសាទខ្លះបានជាប់នៅច្រាំង និងមិនអាចផ្លាស់ទីបានទេ ។ អ្នកនេសាទក្នុងតំបន់នេះនិយាយថា បច្ចុប្បន្ន ពួកគេពិបាកនេសាទត្រីជាងមុន ជាពិសេស ត្រីតូចៗ ។

ទោះយ៉ាងណា អ្នកនេសាទទាំងនេះលើកឡើងថា ពួកគេមិនអាចធ្វើអ្វីបានទេ ក្រៅពីរង់ចាំឱ្យទឹកភ្លៀងធ្លាក់មកបំពេញក្នុងបឹងដូយតាវប៉ុណ្ណោះ ។ ម្យ៉ាងទៀត ទន្លេពីង ដែលជាទន្លេធំមួយក្នុងតំបន់នេះក៏ជួបបញ្ហាផងដែរ ដោយសារមានកម្រិតទឹកតិចជាងមុន ។ ទឹកក្នុងទន្លេនេះបានជ្រាបចូលក្នុងដីយ៉ាងឆាប់រហ័ស ហើយគេត្រូវរង់ចាំឱ្យទឹកភ្លៀងធ្លាក់មកបំពេញក្នុងទន្លេក្នុងបរិមាណច្រើន ទើបមានទឹកហូរមកកាន់បឹងដូយតាវ ៕ ប្រភព ៖ TNN Earth

បរទេស៖ ប្រេងឆៅ WTI របស់អាមេរិកនៅព្រឹកនេះបានកើនឡើង ៥% បន្ទាប់ពីមានព័ត៌មានថា អារ៉ាប៊ីសាអូឌីត ស្ម័គ្រចិត្តកាត់បន្ថយប្រេង ១ លានបារ៉ែលក្នុងមួយថ្ងៃ។

បន្ទាប់ពីកិច្ចប្រជុំដ៏តានតឹងនៃអង្គការនាំចេញប្រេង និងសម្ព័ន្ធមិត្ត (OPEC+)
កាលពីថ្ងៃទី ៤ ខែមិថុនា បានឱ្យដឹងថា អារ៉ាប៊ីសាអូឌីត បានប្រកាសកាត់បន្ថយការប្រើប្រាស់ប្រេងដោយស្ម័គ្រចិត្តចំនួន ១ លានបារ៉ែលក្នុងមួយថ្ងៃ ដើម្បីធ្វើឱ្យទីផ្សារប្រេងមានស្ថេរភាព។

គួរបញ្ជាក់ដែរថា ដោយសារអឺរ៉ុបដាក់ទន្តកម្មលើរុស្សី ទើបបច្ចុប្បន្នប្រទេសខាងអឺរ៉ុបបាននាំចូលប្រេងពីចិន និង ឥណ្ឌា ដែលប្រទេសទាំងពីរនេះបានឆ្លៀតឱកាសលក់ប្រេងឱ្យអឺរុបក្នុងតម្លៃខ្ពស់បំផុត ធ្វើឱ្យសេដ្ឋកិច្ចអឺរ៉ុបធ្លាក់ចុះយ៉ាងខ្លាំង ទើបបណ្តាលឱ្យរដ្ឋមន្ត្រីថាមពលអារ៉ាប៊ីសាអូឌីត Abdulaziz bin Salman សម្រេចចិត្តកាត់បន្ថយការប្រើប្រាស់ប្រេង ដើម្បីធ្វើឱ្យទីផ្សារប្រេងរបស់អឺរ៉ុបមានស្ថេរភាពឡើងវិញ។ ក្នុងនោះក៏មានប្រទេសផ្សេងទៀតក៏បានសន្យាថានឹងរក្សាការកាត់បន្ថយប្រេងបច្ចុប្បន្នរហូតដល់ដំណាច់ឆ្នាំ ២០២៤។

អ្នកវិភាគនៅ ANZ Group បាននិយាយថា “ទីផ្សារប្រហែលជានឹងរឹតបន្តឹងបន្ថែមទៀតនៅក្នុងឆមាសទីពីរនៃឆ្នាំនេះ” ការផ្លាស់ប្តូរដោយអារ៉ាប៊ីសាអូឌីតបានធ្វើឱ្យទីផ្សារពិភពលោកភ្ញាក់ផ្អើលយ៉ាងខ្លាំង។
កាលពីខែមុន តម្លៃប្រេងឆៅរបស់អឺរ៉ុប WTI បានធ្លាក់ចុះ ១១% ដោយសារការព្រួយបារម្ភអំពីតម្រូវការ។ ទោះជាយ៉ាងណាក៏ដោយបច្ចុប្បន្ន តម្លៃប្រេងក្នុងមួយបារ៉ែលនៃ WTI បានកើនឡើង ៥% ដល់ ៧៥,០៦ ដុល្លារ ហើយតម្លៃប្រេងឆៅប្រភេទ Brent ក៏បានកើនឡើងលើសពី ៣% ដល់ ៧៨,៧៣ ដុល្លារក្នុងមួយបារ៉ែលផងដែរ៕ ប្រភព៖vnexpress

រដ្ឋធានីមូស្គូ៖ ក្រុមប្រដាប់អាវុធប្រឆាំងនឹងវិមានក្រឹមឡាំង បានបើកការប្រយុទ្ធគ្នាជាថ្មី នៅតំបន់ភាគខាងត្បូងរបស់ប្រទេសរុស្ស៊ី ខណៈក្រុងមូស្គូ បានកំណត់គោលដៅក្រុមចលនាទាំងនេះ ជា«ក្រុមភេរវករ» ហើយឥឡូវនេះ ពួកគេបានអំពាវនាវដល់អភិបាលក្រុងប៊ែលហ្គោរូដ (Belgorod) របស់រុស្ស៊ី ឲ្យជួបចរចាគ្នា ដោះស្រាយបញ្ហាឈ្លើយសឹករបស់រុស្ស៊ី ត្រូវបានចាប់ឃុំឃាំង។

សារព័ត៌មាន Al Jazeera បានចេញផ្សាយ កាលពីថ្ងៃអាទិត្យ ទី៤ ខែមិថុនា ថា លោក វីយ៉ាឆេស្លេវ ហ្គ្លេដកូវ ( Vyacheslav Gladkov) អភិបាលតំបន់ប៊ែលហ្គោរូដ បានបញ្ជាក់ កាលពីថ្ងៃអាទិត្យ ថា ការប៉ះទង្គិចគ្នាម្តងទៀត បានផ្ទុះឡើង នៅលើតំបន់របស់គាត់។ សកម្មភាពបែបនេះ ត្រូវបានទទួលស្គាល់ជាលើកដំបូង ដោយសារតែកងកម្លាំងចលនាប្រឆាំងនឹងក្រុងមូស្គូ គាំទ្រដោយអ៊ុយក្រែន ចាប់ខ្លួនឈ្លើយសឹករបស់រុស្ស៊ី នៅក្នុងអំឡុងប្រយុទ្ធគ្នានោះ។ គាត់បានត្រៀមខ្លួនរួចជាស្រេច សម្រាប់ការចរចា ដើម្បីនាំទាហានរបស់ពួកយើង ត្រឡប់មកវិញ។

លោកអភិបាលតំបន់ប៊ែលហ្គោរូដ បានបន្ដ ថា «ពួកបំផ្លិចបំផ្លាញមួយក្រុម បានឆ្លងកាត់ព្រំដែនចូលមកលើទឹកដីរបស់រុស្ស៊ី ហើយបានបើកការវាយប្រយុទ្ធ នៅក្នុងភូមិណូវ៉ាយ៉ា តាវ៉ូលហ្សានកា (Novaya Tavolzhanka)។ ខ្ញុំសង្ឃឹម ថា ពួកគេទាំងអស់ នឹងត្រូវកម្ទេចចោល នៅថ្ងៃខាងមុខ។ ប៉ុន្ដែរឿងតែមួយគត់ ដែលរារាំងខ្ញុំ អំពីការចរចាជាមួយពួកគេ គឺទាហានរបស់យើង ស្ថិតក្នុងដៃរបស់ពួកគេ ប្រហែលជាពួកគេបានស្លាប់រួចហើយ»។

កងកម្លាំងរក្សាស្ម័គ្ររបស់រុស្ស៊ី (RVC) និង កងកម្លាំងសេរីការរបស់រុស្ស៊ី (FRL) គាំទ្រដោយអ៊ុយក្រែន បានអំពាវនាវដល់លោកអភិបាលតំបន់ប៊ែលហ្គោរូដ ឲ្យជួបចរចា ដោះស្រាយទាហានរបស់រុស្ស៊ី ត្រូវបានចាប់ឃុំខ្លួន នាំត្រឡប់ទៅវិញ។

អ៊ុយក្រែន បានបាញ់ផ្លោងយ៉ាងខ្លាំង ទៅលើលំនៅឋាន ស្ថិតក្នុងប្រទេសរុស្ស៊ី នៅតាមព្រំដែន កាលពីពេលថ្មីៗនេះ ដោយបានបង្ខំឲ្យមនុស្ស រាប់ពាន់នាក់ ត្រូវភៀសខ្លួន ទៅកាន់តំបន់ កណ្ដាលទីក្រុងប៊ែលហ្គោរូដរបស់រុស្ស៊ី។

ដោយឡែក ក្រុមមន្រ្ដីយោធារុស្ស៊ី បានអះអាង ថា ទាហានរបស់ក្រុងមូស្គូ បានបើកការវាយលុក ប្រឆាំងនឹងក្រុមមបំផ្លិចបំផ្លាញ នៃក្រុមភេរវកររបស់អ៊ុយក្រែន ដែលបានឆ្លងព្រំដែន នៅជិតទីតាំងឈរជើងរបស់ពួកគេ។ កម្លាំងសត្រូវ បានរងការវាយប្រហារពីកាំភ្លើងធំ រហូតធ្វើឲ្យពួកគេដកថយវិញ»។

ការប្រយុទ្ធគ្នា ជុំវិញទីក្រុង Novaya Tavolzhanka បានកើតឡើង ក្រោយពេលមានការវាយលុកយ៉ាងខ្លាំង កាលពីខែឧសភា ដោយឆ្លងចេញពីព្រំដែនរបស់អ៊ុយក្រែន រហូតបានបង្ខំឱ្យយោធារុស្ស៊ី ប្រើប្រាស់កាំភ្លើងធំ និង បានវាយប្រហារតាមផ្លូវអាកាស នៅលើទឹកដីរបស់ខ្លួន។ ការវាយប្រហារឆ្លងកាត់ព្រំដែននេះ ត្រូវបានអះអាង ដោយក្រុមអ្នកជាតិនិយមរបស់ជនជាតិរុស្ស៊ី ប្រឆាំងនឹងរបបគ្រប់គ្រងរបស់វិមានក្រឹមឡាំង។ ដោយឡែក ក្រុមមន្រ្ដីអ៊ុយក្រែន បានព្យាករ អំពីការកើនឡើង នៃអ្វីដែលពួកគេហៅកងកម្លាំង ប្រឆាំងនឹងប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin)។

កងម្លាំងរក្សាស្ម័គ្ររបស់រុស្ស៊ី ដែលជាក្រុមចលនាប្រឆាំងប្រដាប់អាវុធ បានអះអាង តាមឃ្លីបវីដេអូ ថា «បុរសជនជាតិរុស្ស៊ី ទាំងនេះ បានកាន់អាវុធប្រឆាំងនឹងការគ្រប់គ្រងរបស់មេដឹកនាំវិមានក្រឹមឡាំង។ មិនយូរប៉ុន្មាន ពួកគេ នឹងយល់ដឹងកាន់ច្រើនឡើង អំពីទង្វើដ៏សាហាវឃោរឃៅ និង អយុត្តិធម៌ សម្រាប់សង្រ្គាម បង្កឡើងដោយពូទីន»។

បើទោះជាយ៉ាងណាក៏ដោយ អ៊ុយក្រែន តែងតែបដិសេធជាដដែលៗ មិនទទួលខុសត្រូវចំពោះការវាយប្រហារណាមួយ នៅលើទឹកដីរបស់រុស្ស៊ី។ ប៉ុន្តែលោក មីខៃឡូ ប៉ូដូលយ៉ាក (Mykhailo Podolyak) ទីប្រឹក្សាប្រធានាធិបតីអ៊ុយក្រែន លោក ហ្សេឡែនស្គី បានអះអាង កាលពីថ្ងៃអាទិត្យ ថា ស្ថានភាពវាយប្រយុទ្ធគ្នា នៅតាមតំបន់ព្រំដែន គួរតែគេចាត់ទុក ជាអនាគតរបស់រុស្ស៊ី»។

ការវាយប្រយុទ្ធគ្នា នៅតំបន់ប៊ែលហ្គោរូដរបស់ប្រទេសរុស្ស៊ី បានកើតឡើង ស្របពេលរដ្ឋាភិបាលក្រុងកៀវ បានអះអាង ថា អ៊ុយក្រែន កំពុងតែរៀបចំវាយលុកទ្រង់ទ្រាយធំមួយ ប្រឆាំងនឹងទាហានរុស្ស៊ី។ ប៉ុន្ដែនៅក្នុងវីដេអូមួយ ត្រូវបានគេផ្សព្វផ្សាយ កាលពីថ្ងៃអាទិត្យ ថា កងទ័ពការពារទឹកដីរបស់អ៊ុយក្រែន បានអំពាវនាវឱ្យកងទ័ពរបស់ខ្លួន រក្សាភាពស្ងៀមស្ងាត់ អំពីផែនការនេះ ហើយអ៊ុយក្រែន ក៏នឹងមិនចេញសេចក្ដីប្រកាសណាមួយ អំពីការចាប់ផ្តើមវាយបក ខណៈកំពុងតែរង់ចាំ អស់រយៈពេលជាយូរមកហើយនោះដែរ៕