បរទេស៖ ក្រុមអ្នកជំនាញនៅសាកលវិទ្យាល័យ Stanford បានបង្កើតស្បែកអេឡិកត្រូនិកសំយោគពហុស្រទាប់សម្រាប់មនុស្សយន្ត ដែលស្បែកនោះអាចជាសះស្បើយដោយខ្លួនឯងក្នុងរយៈពេល ២៤ ម៉ោង។
យោងតាមប្រភពព័ត៌មាន New Atlas កាលពីថ្ងៃទី ៤ ខែមិថុនា បានរាយការណ៍ថា ស្បែកថ្មីធ្វើត្រាប់តាមស្បែកពិត ដែលអនុញ្ញាតឱ្យមនុស្សយន្តមានអារម្មណ៍ដូចមនុស្ស។ មានន័យថា នៅពេលដែលស្បែករបស់មនុស្សយន្តមានរបួស វានឹងជាសះស្បើយខ្លួនឯង ដោយមិនបាច់ត្រូវការជួសជុលនោះទេ។

លោក Christopher B.Cooper បណ្ឌិតនៅសាកលវិទ្យាល័យ Stanford និងជាសហអ្នកនិពន្ធនៃការសិក្សា បាននិយាយថា ការបង្កើតស្បែកអេឡិកត្រូនិកសំយោគពហុស្រទាប់សម្រាប់មនុស្សយន្ត គឺជាជំហានដ៏សំខាន់ក្នុងការធ្វើត្រាប់តាមស្បែកមនុស្ស ដែលមានផ្នែកជាច្រើនស្រទាប់។ គោលបំណងរបស់យើនោះគឺចង់ឱ្យមនុស្សយន្តមានអារម្មណ៍ និងមានការឈឺចាប់ដូចជាមនុស្សផងដែរ។

ស្បែករបស់មនុស្សយន្តគឺដូចជាស្បែករបស់មនុស្សដែល ដោយវាមានសភាពទន់ និងលាតសន្ធឹង។ ស្បែកអេឡិចត្រូនិចនេះអាចជាសះស្បើយដោយខ្លួនឯងក្នុងរយៈពេលត្រឹមតែ ២៤ ម៉ោងនៅពេលដែលកំដៅដល់ ៧០ អង្សាសេឬប្រហែលមួយសប្តាហ៍នៅសីតុណ្ហភាពបន្ទប់។ លោក Renee Zhao ដែលជាសហអ្នកនិពន្ធការសិក្សា បាននិយាយថា “ភាពរួមបញ្ចូលគ្នាជាមួយនឹងការរុករកម៉ាញេទិកនឹងកំដៅអាំងឌុចស្យុងយើងអាចបង្កើតមនុស្សយន្តទន់ៗ ដែលមានសមត្ថភាពផ្លាស់ប្តូររូបរាងនិងដឹងពីការខូចទ្រង់ទ្រាយរបស់ពួកគេតាមតម្រូវការ”៕ ប្រភព៖vnexpress

ប្រទេសថៃ ៖ លោក ប្រាយុទ្ធ ចាន់អូចា នាយករដ្ឋមន្ត្រីប្រទេសថៃ និងជារដ្ឋមន្ត្រីក្រសួងការពារជាតិ បានថ្លែងក្នុងឱកាសទិវាជាតិស្រូវអង្ករប្រចាំឆ្នាំ២០២៣ ដែលប្រទេសថៃបានប្រារព្ធធ្វើនៅរៀងរាល់ថ្ងៃទី៥ ខែមិថុនា តាមរយៈទូរទស្សន៍ដើម្បីផ្តល់កម្លាំងចិត្តឱ្យកសិករនៅទូទាំងប្រទេសថា ក្នុងឱកាសនេះ លោកសូមផ្ញើនូវក្តីស្រឡាញ់ ការនឹករលឹក និងបំណងល្អទៅកាន់បងប្អូនកសិករគ្រប់រូបត្រូវរួមគ្នាថែរក្សាអត្តសញ្ញាណស្រូវអង្កររបស់ថៃ ។

លោក ប្រាយុទ្ធ ចាន់អូចា បានថ្លែងថា ស្រូវអង្ករ គឺជាគ្រាប់ធញ្ញជាតិដ៏មានសារសំខាន់មួយ និងត្រូវបានចាត់ទុកថា ជាផ្នែកមួយនៃការរស់នៅរបស់ពលរដ្ឋថៃ ដែលបានបន្តមរតកនេះតាំងពីជំនាន់ចាស់បុរាណមកម៉្លេះ ។ កសិករគ្រប់រូបត្រូវមានជំនាញក្នុងការដាំដុះ និងថែទាំស្រូវរបស់ខ្លួន ដើម្បីទទួលបានទិន្នន័យខ្ពស់ និងគុណភាពល្អ ។ លោកបន្តថា គេបានចាត់ទុកកសិករថៃជាកម្លាំងដ៏សំខាន់ក្នុងការបង្កើតភាពសម្បូរបែប និងសន្តិសុខស្បៀង ហើយកសិករថៃបានបំពេញតួនាទីដាំដុះស្រូវដើម្បីចិញ្ចឹមពលរដ្ឋថៃនៅទូទាំងប្រទេស និងពលរដ្ឋនៅទូទាំងពិភពលោក រហូតមក ។ ដូច្នេះ កសិករគួរត្រូវបានលើកសរសើរ និងផ្តល់កិត្តិយស ព្រោះកសិករជាអ្នករួមចំណែកដល់សន្តិសុខស្បៀង និងថែរក្សាប្រពៃណីវប្បធម៌ជាតិ ។

លោក ប្រាយុទ្ធ ចាន់អូចា បន្ថែមថា បច្ចុប្បន្ននេះ ការបង្កបង្កើនផលស្រូវនៅប្រទេសថៃបានធ្វើតាមបច្ចេកវិទ្យា និងមានភាពច្នៃប្រឌិត ដើម្បីអភិវឌ្ឍន៍សក្តានុពលផលិតកម្មស្រូវឱ្យកាន់តែល្អប្រសើរឡើង ចាប់តាំងពីដំណាក់កាលដាំដុះ រហូតដល់ការកែច្នៃវេចខ្ចប់ ដើម្បីជំរុញឱ្យទិន្នផលស្រូវអង្ករមានគុណភាពខ្ពស់ ។ លើសពីនេះ ត្រូវប្រើប្រាស់ជីក្នុងស្រុកជំនួសការប្រើជីគីមីនាំចូលពីក្រៅប្រទេស ព្រោះការធ្វើកសិកម្មមានសុវត្ថិភាព គេត្រូវប្រើប្រាស់ជីក្នុងស្រុក ដែលជាមិត្តជាមួយបរិស្ថានផងដែរ ។

លោក ប្រាយុទ្ធ ចាន់អូចា សង្ឃឹមយ៉ាងមុតមាំថា បងប្អូនកសិករគ្រប់រូបនឹងអាចយកចំណេះដឹងសម័យថ្មីមកអនុវត្តក្នុងការធ្វើកសិកម្មរបស់ខ្លួន ដើម្បីរួមចំណែកបង្កើតភាពរឹងមាំផ្នែកស្បៀងដល់ប្រទេសជាតិបន្តទៀត ។ ក្នុងទិវាជាតិស្រូវអង្ករនេះ លោកក៏បានសូមឱ្យកសិករទាំងអស់រីកចម្រើនក្នុងការងារកសិកម្ម និងនាំគ្នាថែរក្សាអត្តសញ្ញាណអង្កររបស់ថៃ ៕ ប្រភព ៖ khaosod

ប្រទេសស៊ុយអែតបានក្លាយជាប្រទេសដំបូងគេ ដែលទទួលស្គាល់ការរួមភេទជាប្រភេទកីឡាផ្លូវការនៅក្នុងប្រទេសខ្លួន ហើយគ្រោងនឹងរៀបចំការប្រកួតផ្លូវការនៅក្នុងទ្វីបអឺរ៉ុបតែម្តង។

ការ​រៀបចំ​ការ​ប្រកួត​ជើងឯក​ក្នុងការរួមភេទ​អឺរ៉ុប​លើក​ដំបូងនេះ នឹងប្រព្រឹត្តនៅ​ក្នុង​ទីក្រុង Gothenburg នៅ​ថ្ងៃ​ទី ៨ ខែ​មិថុនា ដោយគេរំពឹងថានឹងមិនអត្តពលិកចូលរួមច្រើនជាង១០គូរ។

ចំពោះការដាក់ពិន្ទុវិញ ប្រទេសស៊ុយអែត បានបង្កើតសហព័ន្ធការរួមភេទមួយរបស់ខ្លួន ដោយការដាក់ពិន្ទុនេះត្រូវពឹងផ្អែកទៅលើ២ចំណុច គឺ៖

• ចំណេះដឹងនៃការរួមភេទ
• សកម្មភាពនៃការរួមភេទរួមភេទជាក់ស្តែង

ប្រភព៖hindustantimes

ប្រទេសកម្ពុជា ៖ ក្រោយពីបញ្ចប់ការធ្វើជាម្ចាស់ផ្ទះការប្រកួតកីឡាស៊ីហ្គេម លើកទី៣២ កម្ពុជាក៏បានបន្តធ្វើជាម្ចាស់ផ្ទះការប្រកួតអាស៊ានប៉ារ៉ាហ្គេម លើកទី១២ ដែលប្រព្រឹត្តទៅចាប់ពីថ្ងៃទី៣-៩ ខែមិថុនា ឆ្នាំ២០២៣ នៅពហុកីឡដ្ឋានជាតិមរតកតេជោ រាជធានីភ្នំពេញ ។ ប៉ុន្តែប្រទេសថៃលើកឡើងថា ការដាក់ពិន្ទុរបស់គណៈកម្មការកម្ពុជាអាចមិនយុត្តិធម៌ និងលម្អៀងចំពោះប្រទេសផ្សេងៗ ដោយសារកម្ពុជាគ្មានគណៈកម្មការប៉ារ៉ាឡាំពិកអន្តរជាតិមកពិនិត្យកម្រិតពិការភាពកីឡាករ ។

កាលពីថ្ងៃទី៤ ខែមិថុនា កន្លងមក មន្ត្រីអាជ្ញាធរកីឡាប្រទេសថៃបានលើកឡើងថា គណៈកម្មការប៉ារ៉ាឡាំពិកអន្តរជាតិ (IPC) មិនបានបញ្ជូនមន្ត្រីរបស់ខ្លួនមកពិនិត្យកម្រិតពិការភាពរបស់កីឡាករចូលរួមប្រកួតនៅកម្ពុជាទេ ហើយធ្វើឱ្យកម្ពុជាដែលជាម្ចាស់ផ្ទះយកគណៈកម្មការរបស់ខ្លួនមកដាក់ពិន្ទុ ។ មន្ត្រីអាជ្ញាធរកីឡាថៃរូបនេះបន្តថា ការសម្រេចចិត្តដាក់ពិន្ទុរបស់គណៈកម្មការកម្ពុជា គឺអាចមិនប្រកាន់ជំហរកណ្តាលជាមួយកីឡាករមកពីប្រទេសផ្សេងៗ ។

លោក ប្រាឈុម ប៊ុនធៀម មន្ត្រីអាជ្ញាធរកីឡាប្រទេសថៃលើកឡើងថា លោកទទួលបានព័ត៌មានថា ម្ចាស់ផ្ទះកម្ពុជាបានយកគណៈកម្មការរបស់ខ្លួន ហើយគ្មានមន្ត្រីមកពីគណៈកម្មការប៉ារ៉ាឡាំពិកអន្តរជាតិ (IPC) មកពិនិត្យកម្រិតពិការភាពទេ ។ ដូច្នេះ អាជ្ញាធរកីឡាប្រទេសថៃបានដឹងពីបញ្ហានេះ និងត្រៀមផែនការដើម្បីទប់ទល់នឹងបញ្ហាដែលអាចកើតឡើងរួចហើយ ។ លោកបន្តថា លោកបានត្រៀមក្រុមគ្រូពេទ្យមកជួយវិនិច្ឆ័យក្នុងការពិនិត្យកម្រិតពិការភាព ហើយបើមានចំណុចអ្វីសង្ស័យ ពួកគេនឹងអាចតវ៉ាភ្លាមៗ ។

លោក ប្រាឈុម ប៊ុនធៀម មន្ត្រីអាជ្ញាធរកីឡាប្រទេសថៃ បន្តថា ៖ «ការពិនិត្យកម្រិតពិការភាពនាពេលកន្លងមកនៅកម្ពុជា មិនមែនមានតែប្រទេសថៃមួយទេដែលរងផលប៉ះពាល់ ប្រទេសឥណ្ឌូណេស៊ី ដែលជាម្ចាស់មេដាយមាសក្នុងការប្រកួតកីឡាស៊ីហ្គេមកន្លងមក ហើយមានកីឡាករឆ្នើមធ្លាប់ទទួលបានពានរង្វាន់ជាច្រើន និងជាកម្លាំងដ៏សំខាន់របស់ឥណ្ឌូណេស៊ីនោះ ក៏ត្រួតពិនិត្យកម្រិតពិការភាពមិនជាប់ដែរ ហើយធ្វើឱ្យពួកគេមិនបានចូលរួមការប្រកួត ។ នេះចាត់ទុកថា គួរឱ្យសោកស្តាយ ចំណែកប្រទេសថៃវិញគ្មានបញ្ហារឿងកីឡាករមិនបានចូលរួមប្រកួតទេ» ។

លោក ប្រាឈុម ប៊ុនធៀម បន្ថែមថា ៖ «ទោះយ៉ាងណា ការពិនិត្យកម្រិតពិការភាពត្រូវតែមានគណៈកម្មការមកពីគណៈកម្មការប៉ារ៉ាឡាំពិកអន្តរជាតិ (IPC) ដើម្បីធ្វើជាអាជ្ញាកណ្តាលត្រួតពិនិត្យ ។ ដូច្នេះ នៅពេលប្រទេសថៃធ្វើជាម្ចាស់ផ្ទះការប្រកួតអាស៊ានប៉ារ៉ាហ្គេម គឺថៃនឹងមិនធ្វើបែបនេះទេ ហើយការរៀបចំការប្រកួតគ្រប់យ៉ាង ប្រទេសថៃនឹងធ្វើតាមលក្ខណៈស្តង់ដារអន្តរជាតិប៉ុណ្ណោះ» ។

កាលពីពេលកន្លងមក ឯកឧត្តម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា បានឲ្យដឹងថា កម្ពុជាបានចុះហត្ថលេខាលើអនុស្សរណៈយោគយល់គ្នាជាមួយសហព័ន្ធកីឡាជនពិការអាស៊ីអាគ្នេយ៍ (APSF) ដើម្បីសហប្រតិបត្តិការរៀបចំព្រឹត្តិការណ៍កីឡាដ៏ធំនេះឲ្យបានល្អ ព្រោះថា APSF មានបទពិសោធន៍រយៈពេល២០ឆ្នាំមកហើយលើការងារនេះ ។ មិនតែប៉ុណ្ណោះ កាលពីថ្ងៃទី១៦ ខែធ្នូ ឆ្នាំ២០២២ មានពិធីចុះហត្ថលេខាលើអនុស្សរណៈយោគយល់គ្នារវាងគណៈកម្មាធិការជាតិរៀបចំកីឡាជនពិការអាស៊ីអាគ្នេយ៍ លើកទី១២ ជាមួយសហព័ន្ធកីឡាជនពិការអាស៊ីអាគ្នេយ៍ ដែលមានលោកណ្ឌិត Osoth Bhavilai ប្រធាន APSF ជាភាគីហត្ថលេខី ៕ ប្រភព ៖ khaosod

អាមេរិក៖ អ្នកវិទ្យាសាស្រ្តអាមេរិកមួយក្រុមនៅវិទ្យាស្ថានបច្ចេកវិទ្យាកាលីហ្វ័រញ៉ា (Caltech) បានធ្វើការពិសោធន៍បញ្ជូនថាមពលឥតខ្សែដែលមានមូលដ្ឋាននៅលើលំហដំបូងគេបង្អស់របស់ពិភពលោក។
យោងតាមប្រភពសារព័ត៌មាន New Atlas ដែលបានរាយការណ៍កាលពីថ្ងៃទី ៥ ខែមិថុនា ថា នេះជាលើកដំបូង ដែលក្រុមអ្នកវិទ្យាសាស្រ្តអាចរកឃើញអគ្គិសនីថាមពលព្រះអាទិត្យរបស់អវកាស។ មានន័យថា ពន្លឺអគ្គិសនីដែលតភ្ជាប់ពីផែនដីបានបញ្ជូនទៅកាន់លំហ ដោយមិនបាច់ប្រើខ្សែភ្លើងដោតដុយដូចនៅផែនដីនោះទេ (បើយើងនិយាយពាក្យសាមញ្ញគឺ តភ្លើងនៅលើលំហ)។
ថាមពលព្រះអាទិត្យអាចដោះស្រាយបញ្ហាជាច្រើននៅលើផែនដី ដូចជា បំភ្លឺផ្លូវ ផ្ទះ និងសំណង់អាគារធំៗជាច្រើនទៀត…។ ការផលិតថាមពលអគ្គិសនីនៅក្នុងគន្លងអាចប្រមូលពន្លឺព្រះអាទិត្យ ២៤/៧ ដោយមិនប៉ះពាល់បរិយាកាស ឬលក្ខខណ្ឌអាកាសធាតុឡើយ។ តាមទ្រឹស្ដី កោសិកាពន្លឺព្រះអាទិត្យក្នុងលំហអាចបង្កើតទិន្នផល ៨ ដងក្នុងមួយម៉ែត្រការ៉េ ច្រើនជាងកោសិកាពន្លឺព្រះអាទិត្យនៅលើផែនដី។

ជាលទ្ធផល ក្រុមស្រាវជ្រាវជាច្រើនកំពុងធ្វើការដើម្បីទាញយកថាមពលនេះ ទោះបីជាមានបញ្ហាប្រឈមធំៗមួយចំនួនក៏ដោយ។ ប្រព័ន្ធសាកល្បងថាមពលព្រះអាទិត្យអវកាស MAPLE ៥០ គីឡូក្រាមត្រូវបានដាក់នៅលើយានអវកាស Momentus Vigoride ហើយបានបាញ់បង្ហោះទៅកាន់គន្លងទាបដោយរ៉ុក្កែត SpaceX។
MAPLE គឺជាឧបករណ៍អគ្គិសនីថាមពលព្រះអាទិត្យអវកាស ដែលស្រូបថាមពលពន្លឺពីលំហត្រឡប់មកផែនដីវិញ ឆ្ពោះទៅរកមន្ទីរពិសោធន៍បច្ចេកទេសនៅ Caltech ក្នុងទីក្រុង Pasadena ការពិសោធន៍នេះទទួលបានជោគជ័យ។ ធ្នឹមថាមពលត្រូវបានរកឃើញដោយស្ថានីយដី តាមពេលវេលា និងប្រេកង់ដែលរំពឹងទុក។ នេះបង្ហាញឱ្យឃើញពីសមត្ថភាពរបស់ក្រុមក្នុងការកំណត់គោលដៅធ្នឹមថាមពលយ៉ាងជាក់លាក់នៅចម្ងាយឆ្ងាយ ហើយបញ្ជាក់ថាឧបករណ៍ដែលពាក់ព័ន្ធគឺដំណើរការល្អបន្ទាប់ពីការធ្វើដំណើរទៅកាន់គន្លង៕ ប្រភព៖vnexpress