សហរដ្ឋអាមេរិក ៖ អង្គការចំណីអាហារ និងឱសថ (FDA) របស់អាមេរិកបានប្រកាសអនុញ្ញាតឱ្យចិននាំចូលថ្នាំសម្រាប់ព្យាបាលជំងឺមហារីកមកក្នុងប្រទេសរបស់ខ្លួន ដើម្បីដោះស្រាយបញ្ហាខ្វះខាតថ្នាំប្រភេទនេះនៅអាមេរិក ។ កន្លងមក ប្រទេសចិនធ្លាប់បានស្នើសុំនាំចូលថ្នាំប្រភេទព្យាបាយជំងឺមហារីកមកអាមេរិក ប៉ុន្តែអាមេរិកមិនអនុញ្ញាត ។

ស្ថានីយទូរទស្សន៍ CNBC បានចុះផ្សាយដោយយោងតាមគេហទំព័ររបស់អង្គការចំណីអាហារ និងឱសថ (FDA) អាមេរិកថា ក្រុមហ៊ុន Shi Lu Pharmaceutical គឺជាក្រុមហ៊ុនផលិត និងចែកចាយថ្នាំឈ្មោះ Cisplatin របស់ចិន បានទទួលការអនុញ្ញាតឱ្យនាំចូលថ្នាំព្យាបាលជំងឺមហារីកពីអង្គការចំណីអាហារ និងឱសថអាមេរិករួចហើយ ។ ក្រុមហ៊ុន Shi Lu Pharmaceutical អាចនាំចេញថ្នាំរបស់ខ្លួនមកកាន់ទឹកដីអាមេរិក កាលពីខែឧសភា ឆ្នាំ២០២៣ កន្លងមក ។

លើសពីនេះ ក្រុមហ៊ុន Shi Lu Pharmaceutical បានសហការជាមួយក្រុមហ៊ុន Epotech នៅទីក្រុង Toronto ប្រទេសកាណាដាផងដែរ ដែលជាក្រុមហ៊ុនចែកចាយថ្នាំប្រភេទ Cisplatin មានចំណុះ៥០មីលីក្រាមក្នុង១ដប ហើយគេនឹងចាប់ផ្តើមដំណើរការនាំចេញ ចាប់ពីថ្ងៃទី៦ ខែមិថុនា ឆ្នាំ២០២៣ តទៅ ។ ក្រុមហ៊ុន Shi Lu Pharmaceutical គឺជាក្រុមហ៊ុនផលិតឱសថដ៏ធំមួយក្នុងចំណោមក្រុមហ៊ុនឱសថធំៗនៅប្រទេសចិន និងមានស្នាក់ការធំនៅទីក្រុងជីណាន ខេត្ត Shandong ។

ក្រុមហ៊ុន Shi Lu Pharmaceutical ធ្លាប់បានស្នើសុំនាំចូលថ្នាំឈ្មោះ Cisplatin សម្រាប់ព្យាបាលជំងឺមហារីកទៅកាន់អាមេរិកម្តងហើយ ប៉ុន្តែមិនទទួលបានការអនុញ្ញាត ។ គួរបញ្ជាក់ថា ថ្នាំ Cisplatin គឺជាថ្នាំចាក់សម្រាប់ព្យាបាលជំងឺមហារីកពងស្វាស សួត ប្លោកនោម មាត់ស្បូន និងអូវែរ ។ កាលពីពេលកន្លងមក អង្គការចំណីអាហារ និងឱសថអាមេរិកលើកឡើងថា កំពុងពិចារណាឱ្យគេនាំចូលថ្នាំប្រភេទនេះ ដើម្បីដោះស្រាយបញ្ហាខ្វះខាតថ្នាំនៅអាមេរិក ៕ ប្រភព ៖ Bangkok biznews

ប្រទេសវៀតណាម ៖ VinFast ជាក្រុមហ៊ុនផលិតរថយន្តអគ្គិសនីរបស់ប្រទេសវៀតណាម បានប្រកាសប្រមូលរថយន្តអគ្គិសនីដំបូងរបស់ខ្លួនទាំងអស់ដែលនាំចេញទៅអាមេរិក កាលពីឆ្នាំ២០២២ កន្លងមក ក្រោយពីអាមេរិកដាស់តឿនអំពីសុវត្ថិភាពរបស់រថយន្តអគ្គិសនីផលិតនៅវៀតណាម ។

ការប្រកាសប្រមូលរថយន្តអគ្គិសនីត្រឡប់មកវិញរបស់ក្រុមហ៊ុននេះ ក្រោយពីការិយាល័យសុវត្ថិភាពចរាចរណ៍ផ្លូវគោករបស់អាមេរិកបញ្ជាក់ថា រថយន្តអគ្គិសនីប្រភេទ F8 របស់ក្រុមហ៊ុន VinFast ចំនួន៩៩៩គ្រឿងជួបបញ្ហាពាក់ព័ន្ធនឹងកម្មវិធី software ក្នុងអេក្រង់សងេ្ខបព័ត៌មាន ។ កម្មវិធីនេះមិនបានបង្ហាញទិន្នន័យសុវត្ថិភាពក្នុងការបើកបរទេ ហើយវាអាចបង្កគ្រោះថ្នាក់ធ្វើឱ្យរថយន្តអគ្គិសនីនេះបុកគ្នាទៀតផង ។

ការិយាល័យសុវត្ថិភាពចរាចរណ៍ផ្លូវគោកអាមេរិកសង្ឃឹមថា រថយន្តអគ្គិសនីចំនួនជាង៧០០គ្រឿងក្នុងចំណោម៩៩៩គ្រឿងរបស់ក្រុមហ៊ុន VinFast មិនទាន់បានបញ្ជូនទៅឱ្យអតិថិជន ឬក្រុមហ៊ុនផ្តល់សេវាកម្មដឹកជញ្ជូនទេ ។ ចំណែកក្រុមហ៊ុន VinFast ប្រកាសថា ខ្លួនបានបញ្ជាឱ្យគេប្រមូលរថយន្តនេះត្រឡប់មកវិញហើយ ប៉ុន្តែក្រុមហ៊ុនមិនទាន់ទទួលបានព័ត៌មានថា រថយន្តទាំងនេះបង្កគ្រោះថ្នាក់ណាមួយទេ ។

ក្រុមហ៊ុន VinFast បានចេញសេចក្តីប្រកាសនេះក្នុងរយៈពេលតិចជាង២សប្តាហ៍ បន្ទាប់ពីក្រុមហ៊ុនប្រកាសថា នឹងចុះបញ្ជីផ្សារហ៊ុននៅអាមេរិក តាមរយៈការរួមបញ្ចូលគ្នាជាមួយក្រុមហ៊ុន Black Spade Acquisition ។ កាលពីខែកុម្ភៈ ឆ្នាំ២០២៣ ក្រុមហ៊ុន VinFast បានប្រកាសប្រមូលរថយន្តអគ្គិសនីប្រភេទ VF8 ចំនួន២.៧៨១គ្រឿងត្រឡប់មកវិញ ខណៈក្រុមហ៊ុនបានលក់រថយន្តអគ្គិសនីនៅក្នុងប្រទេសវៀតណាម ហើយគេរកឃើញថា រថយន្តអគ្គិសនីទាំងនេះមានបញ្ហាហ្វ្រាំងមុខ ៕ ប្រភព ៖ AEC Connect

ប្រទេសចិន៖ កសិដ្ឋានក្នុងខេត្តជាច្រើននូវប្រទេសចិនកំពុងរងការខូចខាតយ៉ាងធ្ងន់ធ្ងរ ខណៈជ្រូក ទន្សាយ និងត្រីរាប់រយក្បាលត្រូវបានស្លាប់ដោយសារកម្ដៅថ្ងៃ។
បច្ចុប្បន្នប្រទេសចិនកំពុងជួបប្រទះនឹងរលកកំដៅ និងគ្រោះរាំងស្ងួតដ៏អាក្រក់បំផុតរបស់ខ្លួនក្នុងរយៈពេលជាច្រើនទសវត្សរ៍ ដែលបណ្តាលឱ្យដាច់ចរន្តអគ្គិសនីរីករាលដាល និងរំខានដល់បណ្តាញផ្គត់ផ្គង់អាហារ និងឧស្សាហកម្ម។

នៅលើទីតាំងមួយក្នុងខេត្ត Jiangsu ភាគខាងកើតប្រទេសចិន សត្វជ្រូករាប់រយក្បាលបានងាប់ក្នុងសប្តាហ៍នេះ បន្ទាប់ពីដាច់ចរន្តអគ្គិសនីភ្លាមៗ បណ្តាលឱ្យសត្វជ្រូកថប់ដង្ហើមក្នុងកំដៅខ្លាំង និងចរន្តខ្យល់មិនល្អ។ កំដៅក៏បានសម្លាប់ត្រីអស់ជាច្រើនក្បាល ដែលចិញ្ចឹមនៅក្នុងតំបន់វាលស្រែ Guangxi ភាគនិរតីផងដែរ។ ថ្មីៗនេះ ដោយសារសីតុណ្ហភាពខ្ពស់បានបណ្តាលឱ្យសត្វទន្សាយងាប់យ៉ាងច្រើនសន្ធឹកសន្ធាប់នៅក្នុងកសិដ្ឋាន ដែលនាំឱ្យការផ្គត់ផ្គង់មានកម្រិត។ អាជ្ញាធរក៏បារម្ភថា គ្រោះរាំងស្ងួតអាចប៉ះពាល់ដល់អាងទន្លេ Yangtze ដែលជាជង្រុកស្រូវដ៏ធំបំផុតរបស់ប្រទេសចិនក្នុងប៉ុន្មានខែខាងមុខនេះ។

យោងតាមលោក Sheng Xia អ្នកវិភាគផ្នែកកសិកម្មនៅក្រុមហ៊ុន Citic Securities បាននិយាយថា កំដៅ និងកង្វះទឹកភ្លៀងនៅតំបន់ភាគខាងលិចដូចជា Xinjiang កំពុងប៉ះពាល់ដល់ដំណាំពោត និងស្រូវសាលីផងដែរ។ ក្នុងរយៈពេលប៉ុន្មានខែខាងមុខនេះ ទឹកភ្លៀងនៅដៃទន្លេកណ្តាល Yangtze អាចនឹងថយចុះខ្លាំង ដែលនាំឱ្យមានគ្រោះរាំងស្ងួត ប៉ះពាល់ដល់ដំណាំស្រូវក្នុងតំបន់។ អាងទន្លេ Yangtze ផ្តល់ទិន្នផលស្រូវច្រើនជាង ២/៣ នៃផលិតកម្មស្រូវរបស់ប្រទេសចិន។អ្នកជំនាញបានព្យាករថាព្រឹត្តិការណ៍អាកាសធាតុធ្ងន់ធ្ងរនឹងកើតមានបន្តបន្ទាប់ទៀត ចាប់ពីខែឧសភា ដល់ ខែកញ្ញា គ្រោះរាំងស្ងួត និងទឹកជំនន់អាចកើតឡើងក្នុងពេលដំណាលគ្នា នេះបើយោងតាមការប៉ាន់ស្មានថ្មីៗរបស់មជ្ឈមណ្ឌលអាកាសធាតុជាតិ និង រដ្ឋបាលឧតុនិយមរបស់ប្រទេសចិន៕

ប្រភព៖vnexpress