ប្រទេសថៃ ៖ បើទោះជាប្រទេសថៃបានចូលដល់រដូវវស្សាក្តី ប៉ុន្តែពលរដ្ឋរស់នៅស្រុកដូយតាវ ខេត្តឈៀងម៉ៃ កំពុងតែប្រឈមនឹងគ្រោះរាំងស្ងួតជាខ្លាំង ។ ទឹកនៅក្នុងទន្លេ និងបឹងផ្សេងៗបានរីងស្ងួតស្ទើរគ្រប់កន្លែង ក្នុងនោះកម្រិតទឹកក្នុងបឹងដូយតាវ ក៏បានស្រកចុះជាបន្តបន្ទាប់ផងដែរ ដោយសារតែគ្មានភ្លៀងធ្លាក់ ខណៈបឹងនេះជាតំបន់ទេសចរណ៍ដ៏ល្បីឈ្មោះមួយនៅខេត្តឈៀងម៉ៃ ។

លើសពីនេះ គេបានបង្ហូរទឹកចេញទំនប់ដើម្បីដោះស្រាយបញ្ហាខ្វះខាតទឹករបស់កសិករក្នុងការធ្វើកសិកម្ម ជាហេតុធ្វើឱ្យកម្រិតទឹកក្នុងបឹងដូយតាវកាន់តែស្រកចុះខ្លាំង ។ លើសពីនេះ កម្រិតទឹកក្នុងបឹងដូយតាវធ្លាក់ចុះខ្លាំងបានធ្វើឱ្យប៉ះពាល់ធ្ងន់ធ្ងរដល់អ្នកនេសាទក្នុងតំបន់ ហើយទូកនេសាទខ្លះបានជាប់នៅច្រាំង និងមិនអាចផ្លាស់ទីបានទេ ។ អ្នកនេសាទក្នុងតំបន់នេះនិយាយថា បច្ចុប្បន្ន ពួកគេពិបាកនេសាទត្រីជាងមុន ជាពិសេស ត្រីតូចៗ ។

ទោះយ៉ាងណា អ្នកនេសាទទាំងនេះលើកឡើងថា ពួកគេមិនអាចធ្វើអ្វីបានទេ ក្រៅពីរង់ចាំឱ្យទឹកភ្លៀងធ្លាក់មកបំពេញក្នុងបឹងដូយតាវប៉ុណ្ណោះ ។ ម្យ៉ាងទៀត ទន្លេពីង ដែលជាទន្លេធំមួយក្នុងតំបន់នេះក៏ជួបបញ្ហាផងដែរ ដោយសារមានកម្រិតទឹកតិចជាងមុន ។ ទឹកក្នុងទន្លេនេះបានជ្រាបចូលក្នុងដីយ៉ាងឆាប់រហ័ស ហើយគេត្រូវរង់ចាំឱ្យទឹកភ្លៀងធ្លាក់មកបំពេញក្នុងទន្លេក្នុងបរិមាណច្រើន ទើបមានទឹកហូរមកកាន់បឹងដូយតាវ ៕ ប្រភព ៖ TNN Earth

បរទេស៖ ប្រេងឆៅ WTI របស់អាមេរិកនៅព្រឹកនេះបានកើនឡើង ៥% បន្ទាប់ពីមានព័ត៌មានថា អារ៉ាប៊ីសាអូឌីត ស្ម័គ្រចិត្តកាត់បន្ថយប្រេង ១ លានបារ៉ែលក្នុងមួយថ្ងៃ។

បន្ទាប់ពីកិច្ចប្រជុំដ៏តានតឹងនៃអង្គការនាំចេញប្រេង និងសម្ព័ន្ធមិត្ត (OPEC+)
កាលពីថ្ងៃទី ៤ ខែមិថុនា បានឱ្យដឹងថា អារ៉ាប៊ីសាអូឌីត បានប្រកាសកាត់បន្ថយការប្រើប្រាស់ប្រេងដោយស្ម័គ្រចិត្តចំនួន ១ លានបារ៉ែលក្នុងមួយថ្ងៃ ដើម្បីធ្វើឱ្យទីផ្សារប្រេងមានស្ថេរភាព។

គួរបញ្ជាក់ដែរថា ដោយសារអឺរ៉ុបដាក់ទន្តកម្មលើរុស្សី ទើបបច្ចុប្បន្នប្រទេសខាងអឺរ៉ុបបាននាំចូលប្រេងពីចិន និង ឥណ្ឌា ដែលប្រទេសទាំងពីរនេះបានឆ្លៀតឱកាសលក់ប្រេងឱ្យអឺរុបក្នុងតម្លៃខ្ពស់បំផុត ធ្វើឱ្យសេដ្ឋកិច្ចអឺរ៉ុបធ្លាក់ចុះយ៉ាងខ្លាំង ទើបបណ្តាលឱ្យរដ្ឋមន្ត្រីថាមពលអារ៉ាប៊ីសាអូឌីត Abdulaziz bin Salman សម្រេចចិត្តកាត់បន្ថយការប្រើប្រាស់ប្រេង ដើម្បីធ្វើឱ្យទីផ្សារប្រេងរបស់អឺរ៉ុបមានស្ថេរភាពឡើងវិញ។ ក្នុងនោះក៏មានប្រទេសផ្សេងទៀតក៏បានសន្យាថានឹងរក្សាការកាត់បន្ថយប្រេងបច្ចុប្បន្នរហូតដល់ដំណាច់ឆ្នាំ ២០២៤។

អ្នកវិភាគនៅ ANZ Group បាននិយាយថា “ទីផ្សារប្រហែលជានឹងរឹតបន្តឹងបន្ថែមទៀតនៅក្នុងឆមាសទីពីរនៃឆ្នាំនេះ” ការផ្លាស់ប្តូរដោយអារ៉ាប៊ីសាអូឌីតបានធ្វើឱ្យទីផ្សារពិភពលោកភ្ញាក់ផ្អើលយ៉ាងខ្លាំង។
កាលពីខែមុន តម្លៃប្រេងឆៅរបស់អឺរ៉ុប WTI បានធ្លាក់ចុះ ១១% ដោយសារការព្រួយបារម្ភអំពីតម្រូវការ។ ទោះជាយ៉ាងណាក៏ដោយបច្ចុប្បន្ន តម្លៃប្រេងក្នុងមួយបារ៉ែលនៃ WTI បានកើនឡើង ៥% ដល់ ៧៥,០៦ ដុល្លារ ហើយតម្លៃប្រេងឆៅប្រភេទ Brent ក៏បានកើនឡើងលើសពី ៣% ដល់ ៧៨,៧៣ ដុល្លារក្នុងមួយបារ៉ែលផងដែរ៕ ប្រភព៖vnexpress

រដ្ឋធានីមូស្គូ៖ ក្រុមប្រដាប់អាវុធប្រឆាំងនឹងវិមានក្រឹមឡាំង បានបើកការប្រយុទ្ធគ្នាជាថ្មី នៅតំបន់ភាគខាងត្បូងរបស់ប្រទេសរុស្ស៊ី ខណៈក្រុងមូស្គូ បានកំណត់គោលដៅក្រុមចលនាទាំងនេះ ជា«ក្រុមភេរវករ» ហើយឥឡូវនេះ ពួកគេបានអំពាវនាវដល់អភិបាលក្រុងប៊ែលហ្គោរូដ (Belgorod) របស់រុស្ស៊ី ឲ្យជួបចរចាគ្នា ដោះស្រាយបញ្ហាឈ្លើយសឹករបស់រុស្ស៊ី ត្រូវបានចាប់ឃុំឃាំង។

សារព័ត៌មាន Al Jazeera បានចេញផ្សាយ កាលពីថ្ងៃអាទិត្យ ទី៤ ខែមិថុនា ថា លោក វីយ៉ាឆេស្លេវ ហ្គ្លេដកូវ ( Vyacheslav Gladkov) អភិបាលតំបន់ប៊ែលហ្គោរូដ បានបញ្ជាក់ កាលពីថ្ងៃអាទិត្យ ថា ការប៉ះទង្គិចគ្នាម្តងទៀត បានផ្ទុះឡើង នៅលើតំបន់របស់គាត់។ សកម្មភាពបែបនេះ ត្រូវបានទទួលស្គាល់ជាលើកដំបូង ដោយសារតែកងកម្លាំងចលនាប្រឆាំងនឹងក្រុងមូស្គូ គាំទ្រដោយអ៊ុយក្រែន ចាប់ខ្លួនឈ្លើយសឹករបស់រុស្ស៊ី នៅក្នុងអំឡុងប្រយុទ្ធគ្នានោះ។ គាត់បានត្រៀមខ្លួនរួចជាស្រេច សម្រាប់ការចរចា ដើម្បីនាំទាហានរបស់ពួកយើង ត្រឡប់មកវិញ។

លោកអភិបាលតំបន់ប៊ែលហ្គោរូដ បានបន្ដ ថា «ពួកបំផ្លិចបំផ្លាញមួយក្រុម បានឆ្លងកាត់ព្រំដែនចូលមកលើទឹកដីរបស់រុស្ស៊ី ហើយបានបើកការវាយប្រយុទ្ធ នៅក្នុងភូមិណូវ៉ាយ៉ា តាវ៉ូលហ្សានកា (Novaya Tavolzhanka)។ ខ្ញុំសង្ឃឹម ថា ពួកគេទាំងអស់ នឹងត្រូវកម្ទេចចោល នៅថ្ងៃខាងមុខ។ ប៉ុន្ដែរឿងតែមួយគត់ ដែលរារាំងខ្ញុំ អំពីការចរចាជាមួយពួកគេ គឺទាហានរបស់យើង ស្ថិតក្នុងដៃរបស់ពួកគេ ប្រហែលជាពួកគេបានស្លាប់រួចហើយ»។

កងកម្លាំងរក្សាស្ម័គ្ររបស់រុស្ស៊ី (RVC) និង កងកម្លាំងសេរីការរបស់រុស្ស៊ី (FRL) គាំទ្រដោយអ៊ុយក្រែន បានអំពាវនាវដល់លោកអភិបាលតំបន់ប៊ែលហ្គោរូដ ឲ្យជួបចរចា ដោះស្រាយទាហានរបស់រុស្ស៊ី ត្រូវបានចាប់ឃុំខ្លួន នាំត្រឡប់ទៅវិញ។

អ៊ុយក្រែន បានបាញ់ផ្លោងយ៉ាងខ្លាំង ទៅលើលំនៅឋាន ស្ថិតក្នុងប្រទេសរុស្ស៊ី នៅតាមព្រំដែន កាលពីពេលថ្មីៗនេះ ដោយបានបង្ខំឲ្យមនុស្ស រាប់ពាន់នាក់ ត្រូវភៀសខ្លួន ទៅកាន់តំបន់ កណ្ដាលទីក្រុងប៊ែលហ្គោរូដរបស់រុស្ស៊ី។

ដោយឡែក ក្រុមមន្រ្ដីយោធារុស្ស៊ី បានអះអាង ថា ទាហានរបស់ក្រុងមូស្គូ បានបើកការវាយលុក ប្រឆាំងនឹងក្រុមមបំផ្លិចបំផ្លាញ នៃក្រុមភេរវកររបស់អ៊ុយក្រែន ដែលបានឆ្លងព្រំដែន នៅជិតទីតាំងឈរជើងរបស់ពួកគេ។ កម្លាំងសត្រូវ បានរងការវាយប្រហារពីកាំភ្លើងធំ រហូតធ្វើឲ្យពួកគេដកថយវិញ»។

ការប្រយុទ្ធគ្នា ជុំវិញទីក្រុង Novaya Tavolzhanka បានកើតឡើង ក្រោយពេលមានការវាយលុកយ៉ាងខ្លាំង កាលពីខែឧសភា ដោយឆ្លងចេញពីព្រំដែនរបស់អ៊ុយក្រែន រហូតបានបង្ខំឱ្យយោធារុស្ស៊ី ប្រើប្រាស់កាំភ្លើងធំ និង បានវាយប្រហារតាមផ្លូវអាកាស នៅលើទឹកដីរបស់ខ្លួន។ ការវាយប្រហារឆ្លងកាត់ព្រំដែននេះ ត្រូវបានអះអាង ដោយក្រុមអ្នកជាតិនិយមរបស់ជនជាតិរុស្ស៊ី ប្រឆាំងនឹងរបបគ្រប់គ្រងរបស់វិមានក្រឹមឡាំង។ ដោយឡែក ក្រុមមន្រ្ដីអ៊ុយក្រែន បានព្យាករ អំពីការកើនឡើង នៃអ្វីដែលពួកគេហៅកងកម្លាំង ប្រឆាំងនឹងប្រធានាធិបតីរុស្ស៊ី លោក វ៉្លាឌីមៀ ពូទីន (Vladimir Putin)។

កងម្លាំងរក្សាស្ម័គ្ររបស់រុស្ស៊ី ដែលជាក្រុមចលនាប្រឆាំងប្រដាប់អាវុធ បានអះអាង តាមឃ្លីបវីដេអូ ថា «បុរសជនជាតិរុស្ស៊ី ទាំងនេះ បានកាន់អាវុធប្រឆាំងនឹងការគ្រប់គ្រងរបស់មេដឹកនាំវិមានក្រឹមឡាំង។ មិនយូរប៉ុន្មាន ពួកគេ នឹងយល់ដឹងកាន់ច្រើនឡើង អំពីទង្វើដ៏សាហាវឃោរឃៅ និង អយុត្តិធម៌ សម្រាប់សង្រ្គាម បង្កឡើងដោយពូទីន»។

បើទោះជាយ៉ាងណាក៏ដោយ អ៊ុយក្រែន តែងតែបដិសេធជាដដែលៗ មិនទទួលខុសត្រូវចំពោះការវាយប្រហារណាមួយ នៅលើទឹកដីរបស់រុស្ស៊ី។ ប៉ុន្តែលោក មីខៃឡូ ប៉ូដូលយ៉ាក (Mykhailo Podolyak) ទីប្រឹក្សាប្រធានាធិបតីអ៊ុយក្រែន លោក ហ្សេឡែនស្គី បានអះអាង កាលពីថ្ងៃអាទិត្យ ថា ស្ថានភាពវាយប្រយុទ្ធគ្នា នៅតាមតំបន់ព្រំដែន គួរតែគេចាត់ទុក ជាអនាគតរបស់រុស្ស៊ី»។

ការវាយប្រយុទ្ធគ្នា នៅតំបន់ប៊ែលហ្គោរូដរបស់ប្រទេសរុស្ស៊ី បានកើតឡើង ស្របពេលរដ្ឋាភិបាលក្រុងកៀវ បានអះអាង ថា អ៊ុយក្រែន កំពុងតែរៀបចំវាយលុកទ្រង់ទ្រាយធំមួយ ប្រឆាំងនឹងទាហានរុស្ស៊ី។ ប៉ុន្ដែនៅក្នុងវីដេអូមួយ ត្រូវបានគេផ្សព្វផ្សាយ កាលពីថ្ងៃអាទិត្យ ថា កងទ័ពការពារទឹកដីរបស់អ៊ុយក្រែន បានអំពាវនាវឱ្យកងទ័ពរបស់ខ្លួន រក្សាភាពស្ងៀមស្ងាត់ អំពីផែនការនេះ ហើយអ៊ុយក្រែន ក៏នឹងមិនចេញសេចក្ដីប្រកាសណាមួយ អំពីការចាប់ផ្តើមវាយបក ខណៈកំពុងតែរង់ចាំ អស់រយៈពេលជាយូរមកហើយនោះដែរ៕

សហរដ្ឋអាមេរិក ៖ អង្គការចំណីអាហារ និងឱសថ (FDA) របស់អាមេរិកបានប្រកាសអនុញ្ញាតឱ្យចិននាំចូលថ្នាំសម្រាប់ព្យាបាលជំងឺមហារីកមកក្នុងប្រទេសរបស់ខ្លួន ដើម្បីដោះស្រាយបញ្ហាខ្វះខាតថ្នាំប្រភេទនេះនៅអាមេរិក ។ កន្លងមក ប្រទេសចិនធ្លាប់បានស្នើសុំនាំចូលថ្នាំប្រភេទព្យាបាយជំងឺមហារីកមកអាមេរិក ប៉ុន្តែអាមេរិកមិនអនុញ្ញាត ។

ស្ថានីយទូរទស្សន៍ CNBC បានចុះផ្សាយដោយយោងតាមគេហទំព័ររបស់អង្គការចំណីអាហារ និងឱសថ (FDA) អាមេរិកថា ក្រុមហ៊ុន Shi Lu Pharmaceutical គឺជាក្រុមហ៊ុនផលិត និងចែកចាយថ្នាំឈ្មោះ Cisplatin របស់ចិន បានទទួលការអនុញ្ញាតឱ្យនាំចូលថ្នាំព្យាបាលជំងឺមហារីកពីអង្គការចំណីអាហារ និងឱសថអាមេរិករួចហើយ ។ ក្រុមហ៊ុន Shi Lu Pharmaceutical អាចនាំចេញថ្នាំរបស់ខ្លួនមកកាន់ទឹកដីអាមេរិក កាលពីខែឧសភា ឆ្នាំ២០២៣ កន្លងមក ។

លើសពីនេះ ក្រុមហ៊ុន Shi Lu Pharmaceutical បានសហការជាមួយក្រុមហ៊ុន Epotech នៅទីក្រុង Toronto ប្រទេសកាណាដាផងដែរ ដែលជាក្រុមហ៊ុនចែកចាយថ្នាំប្រភេទ Cisplatin មានចំណុះ៥០មីលីក្រាមក្នុង១ដប ហើយគេនឹងចាប់ផ្តើមដំណើរការនាំចេញ ចាប់ពីថ្ងៃទី៦ ខែមិថុនា ឆ្នាំ២០២៣ តទៅ ។ ក្រុមហ៊ុន Shi Lu Pharmaceutical គឺជាក្រុមហ៊ុនផលិតឱសថដ៏ធំមួយក្នុងចំណោមក្រុមហ៊ុនឱសថធំៗនៅប្រទេសចិន និងមានស្នាក់ការធំនៅទីក្រុងជីណាន ខេត្ត Shandong ។

ក្រុមហ៊ុន Shi Lu Pharmaceutical ធ្លាប់បានស្នើសុំនាំចូលថ្នាំឈ្មោះ Cisplatin សម្រាប់ព្យាបាលជំងឺមហារីកទៅកាន់អាមេរិកម្តងហើយ ប៉ុន្តែមិនទទួលបានការអនុញ្ញាត ។ គួរបញ្ជាក់ថា ថ្នាំ Cisplatin គឺជាថ្នាំចាក់សម្រាប់ព្យាបាលជំងឺមហារីកពងស្វាស សួត ប្លោកនោម មាត់ស្បូន និងអូវែរ ។ កាលពីពេលកន្លងមក អង្គការចំណីអាហារ និងឱសថអាមេរិកលើកឡើងថា កំពុងពិចារណាឱ្យគេនាំចូលថ្នាំប្រភេទនេះ ដើម្បីដោះស្រាយបញ្ហាខ្វះខាតថ្នាំនៅអាមេរិក ៕ ប្រភព ៖ Bangkok biznews

ប្រទេសវៀតណាម ៖ VinFast ជាក្រុមហ៊ុនផលិតរថយន្តអគ្គិសនីរបស់ប្រទេសវៀតណាម បានប្រកាសប្រមូលរថយន្តអគ្គិសនីដំបូងរបស់ខ្លួនទាំងអស់ដែលនាំចេញទៅអាមេរិក កាលពីឆ្នាំ២០២២ កន្លងមក ក្រោយពីអាមេរិកដាស់តឿនអំពីសុវត្ថិភាពរបស់រថយន្តអគ្គិសនីផលិតនៅវៀតណាម ។

ការប្រកាសប្រមូលរថយន្តអគ្គិសនីត្រឡប់មកវិញរបស់ក្រុមហ៊ុននេះ ក្រោយពីការិយាល័យសុវត្ថិភាពចរាចរណ៍ផ្លូវគោករបស់អាមេរិកបញ្ជាក់ថា រថយន្តអគ្គិសនីប្រភេទ F8 របស់ក្រុមហ៊ុន VinFast ចំនួន៩៩៩គ្រឿងជួបបញ្ហាពាក់ព័ន្ធនឹងកម្មវិធី software ក្នុងអេក្រង់សងេ្ខបព័ត៌មាន ។ កម្មវិធីនេះមិនបានបង្ហាញទិន្នន័យសុវត្ថិភាពក្នុងការបើកបរទេ ហើយវាអាចបង្កគ្រោះថ្នាក់ធ្វើឱ្យរថយន្តអគ្គិសនីនេះបុកគ្នាទៀតផង ។

ការិយាល័យសុវត្ថិភាពចរាចរណ៍ផ្លូវគោកអាមេរិកសង្ឃឹមថា រថយន្តអគ្គិសនីចំនួនជាង៧០០គ្រឿងក្នុងចំណោម៩៩៩គ្រឿងរបស់ក្រុមហ៊ុន VinFast មិនទាន់បានបញ្ជូនទៅឱ្យអតិថិជន ឬក្រុមហ៊ុនផ្តល់សេវាកម្មដឹកជញ្ជូនទេ ។ ចំណែកក្រុមហ៊ុន VinFast ប្រកាសថា ខ្លួនបានបញ្ជាឱ្យគេប្រមូលរថយន្តនេះត្រឡប់មកវិញហើយ ប៉ុន្តែក្រុមហ៊ុនមិនទាន់ទទួលបានព័ត៌មានថា រថយន្តទាំងនេះបង្កគ្រោះថ្នាក់ណាមួយទេ ។

ក្រុមហ៊ុន VinFast បានចេញសេចក្តីប្រកាសនេះក្នុងរយៈពេលតិចជាង២សប្តាហ៍ បន្ទាប់ពីក្រុមហ៊ុនប្រកាសថា នឹងចុះបញ្ជីផ្សារហ៊ុននៅអាមេរិក តាមរយៈការរួមបញ្ចូលគ្នាជាមួយក្រុមហ៊ុន Black Spade Acquisition ។ កាលពីខែកុម្ភៈ ឆ្នាំ២០២៣ ក្រុមហ៊ុន VinFast បានប្រកាសប្រមូលរថយន្តអគ្គិសនីប្រភេទ VF8 ចំនួន២.៧៨១គ្រឿងត្រឡប់មកវិញ ខណៈក្រុមហ៊ុនបានលក់រថយន្តអគ្គិសនីនៅក្នុងប្រទេសវៀតណាម ហើយគេរកឃើញថា រថយន្តអគ្គិសនីទាំងនេះមានបញ្ហាហ្វ្រាំងមុខ ៕ ប្រភព ៖ AEC Connect