សហរដ្ឋអាមេរិក ៖ នៅថ្ងៃទី១៨ ខែកញ្ញា ឆ្នាំ២០២៣ សារព័ត៌មានប្រទេសទួរគីចុះផ្សាយថា ប្រធានាធិបតីប្រទេសទួរគី លោក Recep Tayyip Erdogan កំពុងស្ថិតនៅទឹកដីសហរដ្ឋអាមេរិក ដើម្បីចូលរួមកិច្ចប្រជុំមហាសន្និបាតអង្គការសហប្រជាជាតិ លើកទី៧៨ ។ កាលពីថ្ងៃទី១៧ ខែកញ្ញា កន្លងមក មានអ្នកប្រទះឃើញប្រធានាធិបតីប្រទេសទួរគី លោក Erdogan ជជែកជាមួយលោក Elon Musk ជា CEO របស់ក្រុមហ៊ុន Tesla នៅអគារ Turkish House ដែលអគារនេះនៅជិតការិយាល័យអង្គការសហប្រជាជាតិនៅទីក្រុងញូវយ៉ក ។

សារព័ត៌មានប្រទេសទួរគីបញ្ជាក់ថា ប្រធានាធិបតីប្រទេសទួរគី លោក Erdogan បានព្យាយាមអញ្ជើញឱ្យលោក Elon Musk សាងសង់រោងចក្រផលិតរថយន្ត Tesla នៅប្រទេសទួរគី ។ ប្រធានាធិបតីប្រទេសទួរគីអះអាងថា កាលពីខែឧសភា ឆ្នាំ២០២៣ លោក Elon Musk ធ្លាប់ប្រកាសថា ក្រុមហ៊ុន Tesla កំពុងស្វែងរកទីតាំងសាងសង់រោងចក្រថ្មីនៅចុងឆ្នាំ២០២៣ ។

បច្ចុប្បន្ន ក្រុមហ៊ុន Tesla មានរោងចក្រចំនួន៦កន្លែង ហើយក្រុមហ៊ុននេះនឹងសាងសង់រោងចក្រទី៧ នៅរដ្ឋ Nuevo León ដែលស្ថិតនៅភាគឦសានប្រទេសម៉ិកស៊ិក ។ កាលពីខែសីហា ឆ្នាំ២០២៣ លោក Elon Musk បានបង្ហាញការចាប់អារម្មណ៍សាងសង់រោងចក្រនៅប្រទេសឥណ្ឌា ដើម្បីផលិតរថយន្តអគ្គិសនីមានតម្លៃធូរថ្លៃ ។ ហេតុនេះ ការប្រកាសសាងសង់រោងចក្ររបស់លោក Elon Musk គឺជាផ្នែកមួយនៃការពង្រីកប្រតិបត្តិការនៅទូទាំងពិភពលោក របស់ក្រុមហ៊ុន Tesla ៕ ប្រភព ៖ beartaiBRIEF

បរទេស៖ រដ្ឋាភិបាលអ៊ុយក្រែនកាលពីថ្ងៃទី១៨ ខែកញ្ញា បានសម្រេចបណ្តេញអនុរដ្ឋមន្ត្រីក្រសួងការពារជាតិចំនួន ៦ រូបចេញពីតំណែង បន្ទាប់ពីបានតែងតាំងរដ្ឋមន្ត្រីថ្មីកាលពីដើមខែនេះ។

យោងតាមប្រភពព័ត៌មាន Reuters បានឱ្យដឹងថា ក្នុងចំណោមអ្នកដែលត្រូវបានបណ្តេញចេញនោះមានលោកស្រី Hanna Maliar ជាមន្ត្រីម្នាក់ដែលផ្តល់ព័ត៌មានថ្មីៗជាប្រចាំអំពីស្ថានភាពជម្លោះរុស្ស៊ីនិងអ៊ុយក្រែន និងលោក Oleksii Reznikov ដែលត្រូវបានជាប់ពាក់ព័ន្ធក្នុងរឿងអាស្រូវពុករលួយជាច្រើនក្នុងអំឡុងពេលលោកកាន់តំណែង រួមជាមួយអនុរដ្ឋមន្ត្រីការពារជាតិចំនួន ៤ រូបទៀត។

ការផ្លាស់ប្តូរនេះបានធ្វើឡើងពីរសប្តាហ៍បន្ទាប់ពីលោក Rustem Umerov ត្រូវបានតែងតាំងជារដ្ឋមន្ត្រីក្រសួងការពារជាតិ ដើម្បីជំនួសលោក Oleksii Reznikov។ លោក Umerov បាននិយាយនៅក្នុងសារបង្ហោះហ្វេសប៊ុកថា ក្រសួងការពារជាតិនឹងបន្តដំណើរការជាធម្មតា។ ទោះជាយ៉ាងណាក៏ដោយ រដ្ឋាភិបាលអ៊ុយក្រែនមិនបានបញ្ជាក់ពីមូលហេតុច្បាស់លាស់នៃការសម្រេចចិត្តបណ្ដេញអនុរដ្ឋមន្ត្រីការពារជាតិ ៦ រូបខាងលើនោះទេ។

យោងតាមប្រធានាធិបតី Volodymyr Zelensky បាននិយាយកាលពីដើមខែនេះថា បច្ចុប្បន្នក្រសួងការពារជាតិអ៊ុយក្រែនត្រូវការ “វិធីសាស្រ្តថ្មី” ហើយលោក Zelensky ក៏រំពឹងដែរថារដ្ឋមន្ត្រីថ្មី Umerov នឹងបន្តកំណែទម្រង់ក្នុងវិស័យការពារជាតិ ក្នុងបរិបទនៃយុទ្ធនាការវាយលុករបស់ទីក្រុងគៀវ ដែលកំពុងដំណើរការអស់រយៈពេល ៣ ខែកន្លងទៅនេះ។ រដ្ឋមន្ត្រី Umerov បាននិយាយថា គាត់នឹងធ្វើឱ្យក្រសួងក្លាយជាស្ថាប័នដ៏សំខាន់សម្រាប់ការសម្របសម្រួលកងកម្លាំងការពារ ការអភិវឌ្ឍឧស្សាហកម្មយោធារបស់អ៊ុយក្រែន និងការប្រយុទ្ធប្រឆាំងនឹងអំពើពុករលួយ៕
ប្រភព៖cafef.com

ប្រទេសថៃ ៖ ស្ថានការណ៍ទឹកជំនន់នៅខេត្តជាច្រើនក្នុងភាគឦសានប្រទេសថៃចាប់ផ្តើមបង្កផលប៉ះពាល់ជាច្រើនដូចជា ផ្លូវជាច្រើនកន្លែងត្រូវកាត់ផ្តាច់ ហើយតំបន់កសិកម្មជាច្រើនត្រូវទឹកលិច ជាពិសេស នៅខេត្តអ៊ូប៊ុន រាជថានី ។ គេសង្កេតឃើញថា ពលរដ្ឋដែលគេចពីទឹកជំនន់មករស់នៅក្នុងជម្រកបណ្តោះអាសន្នចាប់ផ្តើមខ្វះខាតស្បៀងអាហារ និងទឹកស្អាត ។

ពលរដ្ឋគេចពីទឹកជំនន់មករស់នៅក្នុងជម្រកបណ្តោះអាសន្ននៅសួនសាធារណៈហួយមួង ខេត្តអ៊ូប៊ុន រាជថានី បានយកអាហារស្រស់មកធ្វើម្ហូបដើម្បីបរិភោគក្នុងគ្រួសារ ក្រោយពីអាជ្ញាធរបានយកស្បៀងអាហារមកចែកជូន ។ ពលរដ្ឋភាគច្រើនដែលបានមករស់នៅក្នុងជម្រកបណ្តោះអាសន្ននេះ ប្រកបមុខរបរដើរស៊ីឈ្នួលគេ និងក្រងកម្រងផ្កាលក់ ។ ពលរដ្ឋខ្លះនិយាយថា ពួកគេបាត់បង់ប្រាក់ចំណូលប្រចាំថ្ងៃដោយសារទឹកជំនន់ ហើយពេលនេះ អាហារក្រៀម និងទឹកស្អាតមិនគ្រប់គ្រាន់ទេ ។

ស្ថានការណ៍ទឹកជំនន់នៅខេត្តអ៊ូប៊ុន រាជថានី មានទីប្រជុំជនចំនួន៤ បានជួបគ្រោះទឹកជំនន់ គឺទីប្រជុំជនវ៉ាំងឌែង, វាំងវ៉ាត់បូរ៉ាផា, កិកែវ និងថាបុងមាំង ក្នុងនោះមានពលរដ្ឋចំនួន៣៥គ្រួសារបានជម្លៀសទៅរស់នៅក្នុងជម្រកបណ្តោះអាសន្ន ។ បុរសម្នាក់បានគេចពីទឹកជំនន់នៅខេត្តអ៊ូប៊ុន រាជថានី ហើយមករស់នៅក្នុងជម្រកបណ្តោះអាសន្ននិយាយថា ៖ «ពួកយើងត្រូវការអាហារក្រៀម ទឹកស្អាត និងកម្រាលសម្រាប់សម្រាកផងដែរ» ។

ចំណែកភ្នាក់ងារគ្រប់គ្រងប្រចាំស្រុកឌូធុង ស្រុកយ៉ាក់សូថន បានដាក់ស្លាកសញ្ញាប្រកាសហាមចូល និងបិទផ្លូវបណ្តោះអាសន្ន ដើម្បីហាមយានជំនិះគ្រប់ប្រភេទបើកឆ្លងកាត់ផ្លូវ ដែលតភ្ជាប់រវាងស្រុកយ៉ាក់សូថន ទៅកាន់ស្រុកសេរ៉ាភូមិ ខេត្តរ៉យអេត ។ ការបិទផ្លូវនេះ ដោយសារទឹកជំនន់បានលិចផ្លូវក្នុងកម្ពស់ជាង៥០សង់ទីម៉ែត្រ និងមានប្រវែង១គីឡូម៉ែត្រ ។ ទឹកជំនន់បានលិចផ្លូវអស់រយៈពេល១សប្តាហ៍ ហើយធ្វើឱ្យផ្លូវក្នុងតំបន់មួយចំនួនខូចខាត ។ នៅថ្ងៃទី១៨ ខែកញ្ញា ឆ្នាំ២០២៣ ទឹកនៅតែហូរខ្លាំង ហើយអាជ្ញាធរបារម្ភខ្លាចកើតគ្រោះថ្នាក់ដោយសារការប្រើប្រាស់ផ្លូវ ។

ដូចគ្នានេះដែរ ផ្លូវនៅតាមមាត់ទន្លេឈី នៅស្រុកមឿងមហាសារ៉ាខាម បានខូចខាតប្រវែង៥០ម៉ែត្រ ហើយអាជ្ញាធរបានដាក់ស្លាកសញ្ញាដាស់តឿនដល់អ្នកបើកបរទាំងអស់ និងមានដាក់ភ្លើងបំភ្លឺផ្លូវផងដែរ ដើម្បីផ្តល់ភាពងាយស្រួលដល់អ្នកធ្វើដំណើរ ។ អាជ្ញាធររំពឹងថា នឹងអាចជួសជុលផ្លូវនេះឱ្យដូចដើមវិញ ក្នុងរយៈពេលពី២ថ្ងៃ ទៅ៣ថ្ងៃ ៕ ប្រភព ៖ Thai PBS

បរទេស៖ ប្រទេសចិនគ្រោងនឹងបាញ់បង្ហោះផ្កាយរណបរុករកព្រះអាទិត្យទៅកាន់គន្លងដែលមិនធ្លាប់មានពីមុនមក ដើម្បីស៊ើបអង្កេតផ្កាយ និងតាមដានអាកាសធាតុក្នុងលំហ។

យោងតាមប្រភពព័ត៌មាន CGTN ដែលបានរាយការណ៍កាលពីថ្ងៃទី១៧ ខែកញ្ញាថា យានអវកាសនេះនឹងហោះហើរទៅកាន់គន្លងតារាវិថីនៅឆ្នាំ ២០២៦ ក្នុងគោលបំណងស្វែងយល់ពីប្រភពដើម និងការវិវត្តនៃដែនម៉ាញេទិកនៅក្នុងតំបន់សកម្មខ្ពស់របស់ព្រះអាទិត្យ ដោយបង្ហាញពីរចនាសម្ព័ន្ធបីវិមាត្រ និងយន្តការរូបវិទ្យានៃអណ្តាតភ្លើងព្រះអាទិត្យ។

ដូច្នេះហើយ បច្ចុប្បន្នការវាយតម្លៃនៃបេសកកម្មរុករកព្រះអាទិត្យ Xihe-២ នៅចំណុច Lagrange L៥ រវាងផែនដី និងព្រះអាទិត្យជិតរួចរាល់ហើយ នេះបើយោងតាម សាស្រ្តាចារ្យ Fang Cheng មកពីសាកលវិទ្យាល័យ Nanning ដែលជាអ្នករចនាផ្កាយរណបម្នាក់បានចែករំលែកនៅក្នុងសន្និសីទបច្ចេកវិទ្យាអវកាសកម្រិតខ្ពស់លើកទី ១០ នៅទីក្រុងសៀងហៃ។Xihe-២ គឺជាយានស៊ើបអង្កេតបង្កើតដោយមនុស្សដំបូងគេរបស់ពិភពលោកដែលហោះដល់ចំណុច Lagrange L៥។ Lagrange L៥ មានចំងាយប្រហែល ១៥០ លានគីឡូម៉ែត្រពីផែនដី គឺជាទីតាំងដែលមានអត្ថប្រយោជន៍ពិសេសសម្រាប់ការសិក្សា និងតាមដានអាកាសធាតុក្នុងលំហ ព្រោះវាអនុញ្ញាតឱ្យមានរូបភាពសកម្មភាពព្រះអាទិត្យយ៉ាងហោចណាស់ ៣ ថ្ងៃ មុនពេលវាអាចអង្កេតបានពីផែនដី និងវាស់ស្ទង់ព្រះអាទិត្យ ស្ថានភាពខ្យល់ប្រហែល ៣-៤ ថ្ងៃមុនពេលបក់មកផែនដី។

ក្រៅពីការស៊ើបអង្កេតលើព្រះអាទិត្យ គម្រោងរុករកព្រះច័ន្ទរបស់ចិនក៏កំពុងដំណើរការជាលំដាប់ដែរ។ យោងតាមអ្នកជំនាញក្នុងសន្និសីទបានចែករំលែកនៃដំណើរការសាងសង់ស្ថានីយស្រាវជ្រាវព្រះច័ន្ទក្រោមដីរយៈពេលវែង បើប្រៀបធៀបទៅនឹងផែនដី ព្រះច័ន្ទគ្មានបរិយាកាស ដែលនាំឱ្យមានភាពខុសប្លែកគ្នាខ្លាំងរវាងសីតុណ្ហភាពពេលថ្ងៃ និងពេលយប់។ លោក Zhang Chongfeng នាយករងផ្នែករចនាស្ថានីយរុករកតាមព្រះច័ន្ទរបស់ប្រទេសចិន បាននិយាយថា ការរចនាស្ថានីយ៍ដើម្បីស្រាវជ្រាវភពព្រះច័ន្ទគឺមានការលំបាកជាងទៅគន្លងព្រះអាទិត្យ ដែលវាត្រូវការមជ្ឈមណ្ឌលជំនួយថាមពល និងឧបករណ៍ជាច្រើន រួមទាំងទំនាក់ទំនងនៅច្រកចូល ផ្លូវចូល និងចេញសម្រាប់បុគ្គល៕
ប្រភព៖vnexpress

រដ្ឋធានីតេអ៊ីរ៉ង់៖ អ៊ីរ៉ង់ បានសម្រេចដោះលែងអ្នកទោសអាមេរិកាំង ចំនួន៥នាក់ ជាមួយនឹងកិច្ចព្រមព្រៀងមួយ រវាងរដ្ឋាភិបាលក្រុងវ៉ាស៊ីនតោន និង ក្រុងតេអ៊ីរ៉ង់ ហើយសហរដ្ឋអាមេរិក បានយល់ព្រមដោះលែងជនជាតិអ៊ីរ៉ង់ និង លុយបង្កកចំនួន៦ពាន់លានដុល្លារអាមេរិក។

សារព័ត៌មាន BBC បានចេញផ្សាយ កាលពីថ្ងៃចន្ទ ទី១៨ ខែកញ្ញា ថា ការិយាល័យប្រេសិតពិសេសរបស់សហរដ្ឋអាមេរិក ប្រចាំនៅប្រទេសអ៊ីរ៉ង៉ បានកោតសរសើរ ចំពោះការដោះលែងអ្នកទោស ចំនួន៥នាក់ ពីប្រទេសមជ្ឈិមបូព៌ាមួយនេះ ដោយបេសកជនរងពិសេស លោក អាប្រាម ផាឡេ (Abram Paley) កំពុងតែស្វាគមន៍ ដល់ពួកគេ នៅក្នុងប្រទេសកាតារ។

ប្រជាជនអាមេរិកាំង ចំនួនប្រាំនាក់ ត្រូវបានកាត់ទោសដាក់ពន្ធនាគារ នៅក្នុងប្រទេសអ៊ីរ៉ង់ អស់រយៈពេលជាច្រើនឆ្នាំ ហើយពួកគេត្រូវបានចាត់ទុក ជាចំណាប់ខ្មាំង។ ប៉ុន្ដែឥឡូវ ពលរដ្ឋអាមេរិកាំងទាំងនោះ កំពុងតែធ្វើដំណើរ ឆ្ពោះទៅកាន់ប្រទេសកំណើតរបស់ពួកគេវិញ នៅសហរដ្ឋអាមេរិក។

ការដោះលែងអ្នកទោសអាមេរិកាំង ទាំង៥នាក់នេះ ក្លាយជាការផ្លាស់ប្ដូរដ៏ចម្រូងចម្រាសមួយ ក្រោមការសម្របសម្រួល ពីប្រទេសកាតារ ខណៈមូលនិធិរបស់អ៊ីរ៉ង់ ចំនួន៦ពាន់លានដុល្លារ ដែលបានបង្កក នៅក្នុងប្រទេសកូរ៉េខាងត្បូង បានបញ្ជូនទៅដល់ធនាគារ នៅក្នុងទីក្រុងដូហា (Doha) ប្រទេសកាតារ។

បុរស៤នាក់ និង ស្ត្រីម្នាក់ ជាពលរដ្ឋអ៊ីរ៉ង់ បានធ្វើដំណើរតាមជើងហោះហើររបស់យន្ដហោះជួល ចាកចេញពីរដ្ឋធានីតេអ៊ីរ៉ង់ ឆ្ពោះទៅកាន់ទីក្រុងដូហា ប្រទេសកាតារ។ ពួកគេបានជួបជាមួយនឹងមន្ត្រីជាន់ខ្ពស់អាមេរិក ហើយឥឡូវនេះកំពុងធ្វើដំណើរ ឆ្ពោះទៅកាន់ទីក្រុងវ៉ាស៊ីនតោន។

ជនជាតិអាមេរិកាំងទាំងនោះ រួមមាន លោក ស៊ាម៉ាក ណាម៉ាហ្ស៊ី (Siamak Namazi) ជាពាណិជ្ជករ វ័យ៥១ឆ្នាំ ដែលបានចំណាយពេលជិត៨ឆ្នាំ នៅក្នុងពន្ធនាគារអេវីន (Evin) ដ៏ល្បីល្បាញរបស់ក្រុងតេអ៊ីរ៉ង់ (Tehran) ក៏ដូចជា លោក អេម៉ាដ សាហ្គី (Emad Shargi) ជាពាណិជ្ជករ វ័យ៥៩ឆ្នាំ និង លោក ម៉ូរ៉ាដ តាសបាស ( Morad Tahbaz) សកម្មជនបរិស្ថាន វ័យ៦៧ឆ្នាំ ដែលមានសញ្ជាតិអង់គ្លេស ផងដែរ។

សហរដ្ឋអាមេរិក បានអះអាង ថា ពលរដ្ឋរបស់ខ្លួន ត្រូវបានអ៊ីរ៉ង ចាប់ដាក់ពន្ធនាគារ ដោយការចោទប្រកាន់គ្មានមូលដ្ឋានច្បាប់ច្បាស់លាស់ ក្រោមហេតុផលនយោបាយ។ រីឯការចង្អុលបង្ហាញជាលើកដំបូង បានឈានដល់កិច្ចព្រមព្រៀងមួយ រហូតនាំអ្នកទោសទាំងនេះ ចាកចេញពីពន្ធនាគារអេវីន នាំទៅដាក់នៅក្នុងផ្ទះដ៏មានសុវត្ថិភាព ស្ថិតក្នុងទីក្រុងតេអ៊ីរ៉ង់។

ជាមួយគ្នានេះ លោក ចូ បៃដិន ប្រធានាធិបតីសហរដ្ឋអាមេរិក បានថ្លែងអំណរគុណដល់ប្រទេសកាតារ អូម៉ង់ ស្វីស និង កូរ៉េខាងត្បូង សម្រាប់ការដើរតួនាទីដ៏សំខាន់របស់ពួកគេ នៅក្នុងការចរចា ដោះលែងអ្នកទោស នៅក្នុងប្រទេសអ៊ីរ៉ង់។លោកប្រធានាធិបតី បៃដិន បានបញ្ជាក់ នៅក្នុងសេចក្ដីថ្លែងការណ៍មួយ ថា «ខ្ញុំសូមថ្លែងអំណរគុណយ៉ាងជ្រាលជ្រៅ ចំពោះស្ដេចកាតារ សេក តាមីម ប៊ីន ហាម៉ាដ (Sheikh Tamim bin Hamad) និង ស្ដេចស៊ុលតង់អូម៉ង់ ហៃថាម ប៊ីន តារីគ (Haitham bin Tariq) ដែលបានជួយសម្រួលដល់កិច្ចព្រមព្រៀងនេះ ដោយចំណាយពេលជាច្រើនខែ សម្រាប់ការដោះស្រាយបញ្ហាការទូតដ៏លំបាក និង ជាគោលការណ៍របស់អាមេរិក»។

ដោយឡែក លោក អេប្រាហ៊ីម រ៉ៃស៊ី (brahim Raisi) ប្រធានាធិបតីអ៊ីរ៉ង់ បានហៅការដោះលែងពលរដ្ឋអាមេរិកាំងទាំង៥នាក់នេះ ជាសកម្មភាពមនុស្សធម៌ដ៏សុទ្ធសាធ។ ប៉ុន្ដែកាលពីសប្តាហ៍មុន លោកប្រធានាធិបតី Raisi បានប្រាប់បណ្តាញផ្សព្វផ្សាយអាមេរិក ថា បញ្ហាអាស្រ័យលើប្រទេសអ៊ីរ៉ង់ នៅក្នុងការសម្រេចចិត្ត ថាតើត្រូវធ្វើអ្វីជាមួយមូលនិធិ ចំនួន៦ពាន់លានដុល្លារ ដែលចេញជាផ្នែក នៃកិច្ចព្រមព្រៀងនេះ៕

ផ្កាមានច្រើនប្រភេទណាស់នៅលើផែនដី ហើយផ្កាដែលធំៗបំផុតនោះ ភាគច្រើនគឺស្ថិតនៅតំបន់អាស៊ីអាគ្នេយ៍ដែនកោះ ប៉ុន្តែតើអ្នកដឹងទេថា តើផ្កាប្រភេទណាដែលមានទំហំធំជាងគេបំផុតនៅលើពិភពលោក? ដូច្នេះហើយ ខាងក្រោមនេះគឺជាផ្កាពីរប្រភេទដែលធំជាងគេបំផុតលើផែនដី៖

១.ផ្ការ៉ាហ្វហ្វលឡេស៊ី-អារណុលឌី (Rafflesia Arnoldii)៖ គឺជាប្រភេទផ្កាដែលមានដើមកំណើតនៅក្នុងព្រៃទឹកភ្លៀងនៃប្រទេសម៉ាឡេស៊ី និងឥណ្ឌូណេស៊ី។ ផ្កាយក្សនេះ មានទំហំជាង ១០០ សង់ទីម៉ែត្រ និងមានទម្ងន់រហូតដល់ ៧ គីឡូក្រាម។ ជាប្រភេទរុក្ខជាតិប៉ារ៉ាសិតដែលវាតែងភ្ជាប់ខ្លួនទៅនឹងរុក្ខជាតិធំៗដទៃទៀត ដើម្បីបឺតយកទឹកមកចិញ្ចឹមសរីរាង្គរបស់វា។ ជាធម្មតាផ្កា Rafflesia Arnoldii ប្រើពេលប្រហែល ៩ ខែទើបអាចរីកលូតលាស់បាន ប៉ុន្តែវានឹងងាប់ទៅវិញក្នុងរយៈពេលត្រឹម ១ សប្តាហ៍ប៉ុណ្ណោះ។ នៅពេលរីក ផ្កានេះបញ្ចេញក្លិនស្អុយដូចសាកសពរលួយ ទើបគេឱ្យឈ្មោះវាម្យ៉ាងទៀតថា «ផ្កាសាកសព»។

២.ផ្កាអាម៉ូរហ្វូហ្វាលលូស-ទីតាញ៉ូម (Amorphophallus titanum)៖ គឺជាប្រភេទផ្កាដ៏ធំបំផុតទីពីរនៅលើពិភពលោក។ ផ្កាយក្សនេះ មានដើមកំណើតនៅកោះស៊ូម៉ាត្រា ប្រទេសឥណ្ឌូនេស៊ី ដែលវាអាចលូតដល់កម្ពស់ជាង ២ ម៉ែត្រទៅ ៣.៦ ម៉ែត្រ ហើយអាចមានទម្ងន់រហូតដល់ ៨០ គីឡូក្រាម។ ដោយសារតែក្លិនដ៏អាក្រក់របស់វា ផ្កាទីតាញ៉ូមក៏ជាប់រហស្សនាមថាជាផ្កាសាកសពផងដែរ៕