ប្រទេសអង់គ្លេស ៖ ទីក្រុងឡុងដ៍ ប្រទេសអង់គ្លេស បានព្យាយាមកាត់បន្ថយកាកសំណល់អេឡិចត្រូនិក ដោយការលើកទឹកចិត្តឱ្យពលរដ្ឋទាំងអស់ផ្តោតលើការពន្យារសុពលភាពប្រើប្រាស់របស់សម្ភារៈអគ្គិសនីផ្សេងៗ រួមទាំងកាត់បន្ថយការទិញសម្ភារៈអគ្គិសនីដោយការជួលជំនួសវិញ ។

អង្គការសហប្រជាជាតិលើកឡើងថា បញ្ហាកាកសំណល់អេឡិចត្រូនិក គឺជាបញ្ហាមួយក្នុងចំណោមបញ្ហាសំខាន់ ព្រោះវាជាកាកសំណល់កើនឡើងយ៉ាងឆាប់រហ័សបំផុតនៅលើពិភពលោក ហើយអង់គ្លេសស្ថិតក្នុងចំណោមប្រទេសដែលបោះចោលកាកសំណល់អេឡិចត្រូនិកច្រើនបំផុត ។

នៅទីប្រជុំជនមួយកន្លែងស្ថិតនៅភាគខាងជើងទីក្រុងឡុងដ៍ បានស្វែងរកវិធីដោះស្រាយបញ្ហាកាកសំណល់ទាំងនេះ ដោយការបង្កើតគម្រោងទទួលជួសជុលសម្ភារៈអគ្គិសនី (Fixing Factory) ដើម្បីលើកទឹកចិត្តឱ្យពលរដ្ឋរស់នៅទីនេះផ្តល់ភាពសំខាន់លើការជួសជុលសម្ភារៈអគ្គិសនី ជំនួសឱ្យការបោះចោល និងទិញសម្ភារៈអគ្គិសនីថ្មី ។

នាយកគម្រោងទទួលជួសជុលសម្ភារៈអគ្គិសនី (Fixing Factory) លោក មុតចូន លើកឡើងថា ៖ «ខ្ញុំមានក្រុមការងារស្ម័គ្រចិត្តជាច្រើននាក់រង់ចាំផ្តល់សេវាកម្មដល់អតិថិជន ដែលពួកគេចង់ជួសជុលសម្ភារៈអគ្គិសនីប្រើការលែងកើត ។ ពួកយើងណែនាំទៅអតិថិជនថា សម្ភារៈទាំងនេះខូចត្រង់ចំណុចណា និងអាចជួសជុលបានត្រង់ណាខ្លះ ។ លើសពីនេះ យើងបានបង្រៀនអតិថិជនពីវិធីជួសជុលសម្ភារៈអគ្គិសនីងាយៗដោយខ្លួនផងដែរ សម្រាប់ថ្ងៃក្រោយ ពេលវាខូចទៀត អតិថិជនអាចយល់ថា ត្រូវធ្វើដូចម្តេច» ។

លោក មុតចូន បន្តថា ៖ «មនុស្សទូទៅគិតថា ពេលសម្ភារៈអគ្គិសនីខូចប្រើការលែងកើត ពួកគេនឹងបោះបង់វាចោលរួចទិញថ្មីទៀត ។ ដូច្នេះ គម្រោងទទួលជួសជុលសម្ភារៈអគ្គិសនីមានគោលដៅផ្លាស់ប្តូផ្នត់គំនិតនេះ ។ ការបង្រៀនអតិថិជនបែបនេះ បើទោះជាមិនអាចធ្វើឱ្យពួកគេមានជំនាញជួសជុលសម្ភារៈអគ្គិសនីក្តី ប៉ុន្តែយ៉ាងហោចណាស់ ក៏បានបណ្តុះគំនិតពួកគេឱ្យជួសជុលសម្ភារៈខូចខាត មុនពេលសម្រេចចិត្តបោះចោល» ។

ចំណែកនៅតំបន់ភាគខាងលិចទីក្រុងឡុងដ៍ មជ្ឈមណ្ឌលលក់ទំនិញក្នុងតំបន់នេះបានបង្កើតគម្រោងឱ្យអតិថិជនជួលសម្ភារៈអគ្គិសនី និងសម្ភារៈផ្សេងៗ ដូចជា ឧបករណ៍សម្អាតកម្រាលព្រំ និងឧបករណ៍កាត់មែកឈើ ដោយពួកគេមិនចាំបាច់ទិញទេ ។

លោក អាឡិច ស៊ីឡាយមីង ជាបុគ្គលិកផ្នែកជួលសម្ភារៈរបស់ Library of Things ប្រាប់ថា ៖ «គោលដៅរបស់គម្រោងនេះ គឺធ្វើឱ្យការជួល ឬការខ្ចីសម្ភារៈអគ្គិសនី គឺជារឿងល្អជាងការទិញខ្លួនឯង ព្រោះសម្ភារៈខ្លះអាចមានតម្លៃថ្លៃ ។ ម្យ៉ាងទៀត ពួកគេត្រូវការប្រើប្រាស់វាយូរៗម្តង ដូច្នេះ ការជួលសម្ភារៈក្នុងតម្លៃថោក គឺជាជម្រើសល្អជាង ហើយអាចកាត់បន្ថយចំនួនសម្ភារៈអគ្គិសនីដែលគេទិញមក រួចបោះចោលក្លាយជាកាកសំណល់ ឬអាចជួយកាត់បន្ថយចំនួនសម្ភារៈអគ្គិសនីដែលបានផលិតទៀតផង ។ ចំណែកតម្លៃជួលសម្ភារៈអគ្គិសនី គឺខុសៗគ្នាតាមប្រភេទ និងគិតប្រាក់តាមថ្ងៃ ។ Library of Things គឺជាសាខាទី២ ចំណែកសាខាទី១ ស្ថិតនៅតំបន់ភាគខាងត្បូងទីក្រុងឡុងដ៍ ដែលបើកផ្តល់សេវាកម្មកាលពី១០ឆ្នាំមុន» ៕ ប្រភព ៖ WorldPulse

រដ្ឋធានីប៉េកាំង៖ បច្ចុប្បន្ន ប្រទេសមហាអំណាចជាច្រើននៅលើពិភពលោក បានបង្កើតបច្ចេកវិទ្យាជាន់ខ្ពស់ សម្រាប់វិស័យការពារជាតិ កាន់តែទំនើបខ្លាំងឡើងនោះ ប្រទេសចិន ក៏កំពុងតែប្រកួតប្រជែងយន្ដហោះយោធាគ្មានមនុស្សបើកវៃឆ្លាត ឬ ដ្រូនយោធាវៃឆ្លាត ប្រជែងជាមួយនឹងសហរដ្ឋអាមេរិក។

គេហទំព័រ Open Tools បានចេញផ្សាយ កាលពីថ្ងៃអាទិត្យ ទី២០ ខែសីហា ថា សហរដ្ឋអាមេរិក និង សម្ពន្ធមិត្ដ កំពុងតែមានការព្រួយបារម្ភយ៉ាងខ្លាំង ជុំវិញការអះអាងរបស់ចិន នៅតំបន់សមុទ្រអាស៊ីប៉ាស៊ីហ្វិក និង ការគំរាមកំហែងរបស់ក្រុងបេកាំង ទៅលើកោះតៃវ៉ាន់។ ជាមួយគ្នានេះ ការអភិវឌ្ឍន៍បច្ចេកវិទ្យាបញ្ញាសិប្បនិមិត្ត (AI) កំពុងតែក្លាយជាសមរភូមិដ៏សំខាន់ សម្រាប់ប្រទេសមហាអំណាចនានា នៅលើពិភពលោក រួមមាន ប្រទេសចិន និង សហរដ្ឋអាមេរិក។

បច្ចុប្បន្ន ប្រទេសមហាអំណាចសេដ្ឋកិច្ចសហរដ្ឋអាមរិក និង ចិន កំពុងតែរត់ប្រណាំងប្រជែងគ្នា ដណ្តើមអំណាច AI ខាងយោធា ហើយក៏កំពុងតែបង្កើននូវវិនិយោគដ៏ខ្លាំងក្លា ទាំងការសាកល្បង និង អភិវឌ្ឍយន្តហោះយោធាគ្មានមនុស្សបើក ឬ ដ្រូនយោធាដ៏ឆ្លាតវៃ។ បច្ចេកវិទ្យាយោធាដ៏ទំនើបទាំងនេះ រួមមាន យន្តហោះគ្មានមនុស្សបើក ឬដ្រូន ទាក់ទងគ្នាជាមួយនឹងការធ្វើការរួមគ្នា ដោយស្វ័យប្រវត្ដិដ៏មានសក្តានុពល នៅក្នុងការធ្វើបដិវត្តន៍សង្គ្រាម និង ផ្តល់អត្ថប្រយោជន៍យ៉ាងសំខាន់ នៅលើសមរភូមិផងដែរ។

យន្ដហោះគ្មានមនុស្សបើកវៃឆ្លាត ឬ ដ្រូនឆ្លាតវៃ តំណាងឱ្យការរីកចម្រើនដ៏គួរឱ្យកត់សម្គាល់ នៅក្នុងបច្ចេកវិទ្យាយោធា ព្រោះវាមានភាពល្អប្រសើរជាងពឹងផ្អែកទៅលើដ្រូនធំៗតែមួយមុខ។ ដ្រូនវៃឆ្លាតតូចៗជាច្រើន អាចធ្វើការរួមគ្នា សម្រាប់ការសម្រេចបាននូវកិច្ចការដ៏ស្មុគស្មាញ។

ការប្រើប្រាស់ក្បួនដោះស្រាយ AI និង ពិធីការទំនាក់ទំនង នឹងធ្វើឲ្យយន្តហោះគ្មានមនុស្សបើកវៃឆ្លាតទាំងនេះ អាចសហការ និង សម្របខ្លួនទៅនឹងការផ្លាស់ប្តូរស្ថានភាព នៅក្នុងពេលវេលាជាក់ស្តែងបាន។ ដ្រូនឆ្លាតវៃទាំងនោះ បានផ្តល់អត្ថប្រយោជន៍សំខាន់ៗជាច្រើន លើប្រព័ន្ធដ្រូនយោធាធ្លាប់មានកន្លងមក។

យន្ដហោះគ្មានមនុស្សបើក ឬ ទូកគ្មានមនុស្សបើកវៃឆ្លាត ឬដ្រូន មានសមត្ថភាព នៅក្នុងការដាក់ពង្រាយយន្តហោះគ្មានមនុស្សបើកជាច្រើន នៅក្នុងពេលដំណាលគ្នា ហើយវាផ្តល់នូវឥទ្ធិពលទ្វេដងដល់កម្លាំងយោធាដ៏សំខាន់ នៅលើសមរភូមិ ហើយវាអាចចែករំលែកភារកិច្ចឡើងវិញ និង បន្តបេសកកម្ម ដោយមិនមានការរំខាន ហើយវាអាចសម្របខ្លួន និង កំណត់លើរចនាសម្ព័ន្ធរបស់ខ្លួនវាឡើងវិញយ៉ាងស្វាហាប់ ដើម្បីដោះស្រាយការផ្លាស់ប្តូរគោលដៅបេសកកម្ម ឬការគំរាមកំហែង។

បើតាមរយៈការប្រើប្រាស់ក្បួនដោះស្រាយ AI នោះ នឹងជួយឲ្យយន្តហោះគ្មានមនុស្សបើកវៃឆ្លាតនីមួយៗ អាចសម្រេចចិត្ត ដោយឯករាជ្យ ខណៈការសម្របសម្រួលជាមួយយន្តហោះគ្មានមនុស្សបើកផ្សេងៗទៀត ដោយអនុញ្ញាតឱ្យវាពង្រឹងនូវការយល់ដឹង អំពីស្ថានភាព និង សមត្ថភាព នៃការសម្រេចចិត្ត។

បើទោះជាយ៉ាងណា រហូតមកដល់ពេលនេះ ប្រទេសចិន កំពុងតែក្លាយជាតួអង្គដ៏សំខាន់បំផុតមួយ នៅលើពិភពលោក នៅក្នុងការបង្កើតហ្វូងដ្រូនយោធាវៃឆ្លាត ប្រកួតប្រជែងជាមួយនឹងសហរដ្ឋអាមេរិក។ បច្ចុប្បន្ន កងទ័ពរំដោះប្រជាជនចិន បាននិងកំពុងតែសាកល្បងយ៉ាងសកម្ម និង កែលម្អបច្ចេកវិទ្យាប្រភេទនេះ នៅក្នុងសេណារីយ៉ូផ្សេងៗ ដើម្បីស្វែងរកកម្មវិធីប្រកបដោយសក្តានុពលរបស់ខ្លួន នៅលើសមរភូមិ។

ស្របគ្នានេះ គម្រោងដ៏គួរឱ្យកត់សម្គាល់មួយ គឺការប្រមាញ់សមុទ្រ (Sea Hunting) កំពុងតែក្លាយជាគំនិតផ្តួចផ្តើមរបស់ចិន នៅក្នុងគោលបំណងអភិវឌ្ឍយន្តហោះគ្មានមនុស្សបើក ឬ ដ្រូនឆ្លាតវៃ សម្រាប់ប្រតិបត្តិការកងទ័ពជើងទឹក។ គម្រោងរបស់ចិន កំពុងតែផ្តោតលើការដាក់ពង្រាយនាវាដ្រូនក្រោមទឹកស្វយ័ត អាចមានសមត្ថភាពតាមឃ្លាំមើល ការឈ្លបយកការណ៍ និង ប្រតិបត្តិការវាយលុក។

ស្របគ្នានេះដែរ សហរដ្ឋអាមេរិក ក៏កំពុងតែចូលរួមយ៉ាងសកម្ម ដើម្បីអភិវឌ្ឍ និង សាកល្បងដ្រូនឆ្លាតវៃ។ សកម្មភាពនេះ កំពុងតែក្លាយជាផ្នែកមួយ នៃកិច្ចខិតខំប្រឹងប្រែងរបស់រដ្ឋាភិបាលក្រុងវ៉ាស៊ីនតោន ដើម្បីរក្សានូវរក្សាឧត្តមភាពយោធា នៅលើពិភពលោក។ គំនិតផ្តួចផ្តើមដ៏គួរឱ្យកត់សម្គាល់មួយរបស់សហរដ្ឋអាមេរិក គឺ « Gremlins» ព្រោះវាវាជាកម្មវិធីរបស់ទីភ្នាក់ងារស្រាវជ្រាវកម្រិតខ្ពស់ការពារជាតិ (DARPA) ។ គម្រោង Gremlins (ហ្គ្រីមលីស៍)នេះ មានគោលបំណងអភិវឌ្ឍយន្តហោះគ្មានមនុស្សបើកតូចៗ អាចប្រើប្រាស់ឡើងវិញ អាចត្រូវបានដាក់ឱ្យដំណើរការ និង យកមកវិញពីយន្តហោះធំជាង នៅលើលំហអាកាស។ ដ្រូនឆ្លាវៃទាំងនេះ នឹងផ្តល់នូវប្រតិបត្តិការបន្ថែម និង ការតស៊ូ សម្រាប់បេសកកម្មផ្សេងៗទៀត។

លោកប្រធានាធិបតីសហរដ្ឋអាមេរិក និង កូរ៉េខាងត្បូង ហើយនាយករដ្ឋមន្រ្ដីជប៉ុន បានសាទរ ចំពោះយុគសម័យថ្មី នៃភាពជាដៃគូត្រីភាគី ដោយបានប្រកាស អំពីវិធានការជាបន្តបន្ទាប់ នៅក្នុងគោលបំណងជំរុញកិច្ចសហប្រតិបត្តិការ នៅក្នុងកិច្ចប្រជុំកំពូល ជាប្រវត្តិសាស្ត្រ នៅជិតរដ្ឋធានីក្រុងវ៉ាស៊ីនតោន។ នេះបើតាមសារព័ត៌មាន Al Jazeera បានចេញផ្សាយ កាលពីថ្ងៃសៅរ៍ ទី១៩ ខែសីហា ឆ្នាំ២០២៣។

ព្រឹត្ដិការណ៍ នៅឯ Camp David របស់ប្រធានាធិបតីអាមេរិក កាលពីថ្ងៃសុក្រ បានកត់សម្គាល់ជាកិច្ចប្រជុំផ្លូវការលើកដំបូង រវាងលោក ចូ បៃដិន (Joe Biden) ប្រធានាធិបតីសហរដ្ឋអាមេរិក និង សមាភាគីកូរ៉េខាងត្បូង លោក យូន ស៊ូក-យូល (Yoon Suk-yeol) ហើយនាយករដ្ឋមន្រ្ដីជប៉ុន លោក ហ៊្វូមីអូ គីស៊ីដា (Fumio Kishida)។ មេដឹកនាំទាំង៣ប្រទេសនេះ មានការព្រួយបារម្ភយ៉ាង ជុំវិញរដ្ឋាភិបាលក្រុងប៉េកាំង កំពុងតែទាមទារយ៉ាងខ្លាំង នៅក្នុងតំបន់អាស៊ី-ប៉ាស៊ីហ្វិក ក៏ដូចជា ការបាញ់សាកល្បងកាំជ្រួចរបស់កូរ៉េខាងជើង កាលពីពេលថ្មីៗកន្លងទៅនេះ។

មេដឹកនាំសហរដ្ឋអាមេរិក ជប៉ុន និង កូរ៉េខាងត្បូង បានបញ្ជាក់ នៅក្នុងសេចក្ដីថ្លែងការណ៍រួមគ្នាមួយ ដោយបានថ្កោលទោស ចំពោះ«អាកប្បកិរិយាដ៏គ្រោះថ្នាក់ និង គឃ្លើន»របស់រដ្ឋាភិបាលក្រុងប៉េកាំង នៅក្នុងសមុទ្រចិនខាងត្បូង និង កម្មវិធីនុយក្លេអ៊ែររបស់ក្រុងព្យុងយ៉ាង ថា «យើងមានសេចក្តីតាំងចិត្តនៅក្នុងការប្តេជ្ញាចិត្តរបស់យើង ដើម្បីរក្សាសន្តិសុខ នៅក្នុងតំបន់ ហើយពង្រឹងនូវការចូលរួមរបស់ឥណ្ឌូប៉ាស៊ីហ្វិក និង លើកកម្ពស់វិបុលភាពរួម»។

មេដឹកនាំប្រទេសមានសេដ្ឋកិច្ចជឿនលឿនទាំង៣នេះ បានប្រកាសអំពីគំនិតផ្តួចផ្តើម ដែលសហរដ្ឋអាមេរិក ជប៉ុន និង កូរ៉េខាងត្បូង បានអះអាង ថា នឹងធ្វើឱ្យទំនាក់ទំនងរបស់ពួកគេឲ្យកាន់តែមានភាពល្អប្រសើរឡើងបន្ថែមទៀត រួមទាំងសមយុទ្ធយោធាប្រចាំឆ្នាំ ហើយជំរុញយន្តការទំនាក់ទំនង រវាងប្រទេសទាំងបី និង ការបង្កើតប្រព័ន្ធព្រមានជាមុន អំពីខ្សែសង្វាក់ផ្គត់ផ្គង់។ ជាមួយនឹងការព្រួយបារម្ភ អំពីឥទ្ធិពលអស្ថិរភាព នៃការឈ្លានពានរបស់ចិន ទៅលើកោះតៃវ៉ាន់ ដែលគ្រប់គ្រងដោយខ្លួនឯងតាមបែបលទ្ធិប្រជាធិបតេយ្យ ស្របពេលក្រុងប៉េកាំង តែងតែអះអាង ថា ដែនកោះមួយនេះ ជាទឹកដីរបស់ចិន ក៏ដូចជា ការបង្កើននូវការបាញ់សាកល្បងកាំជ្រួច ពីកូរ៉េខាងជើង បានបង្កើនតម្រូវការ សម្រាប់កិច្ចសហប្រតិបត្តិការរបស់ប្រទេសទាំង៣នេះ៕

ប្រទេសចិន ៖ ប្រទេសចិនបានបង្ហាញមនុស្សយន្តប្រភេទផ្សេងៗគ្នា ដែលមានលក្ខណៈដូចមនុស្សពិតៗក្នុងពិធីតាំងបង្ហាញមនុស្សយន្តពិភពលោក នៅទីក្រុងប៉េកាំង ។ បច្ចេកវិទ្យាថ្មីចុងក្រោយនេះ បានជួយធ្វើឱ្យមនុស្សយន្តទាំងឡាយអាចបង្ហាញទឹកមុខ និងកាយវិការដូចគ្នាជាមួយមនុស្សកាន់តែខ្លាំង ។

និស្សិតស្រីម្នាក់ឈ្មោះ លីវ មានអាយុ២២ឆ្នាំ ហើយនាងទើបបញ្ចប់ការសិក្សាបាននិយាយថា ៖ «ខ្ញុំភ្ញាក់ផ្អើលខ្លាំងណាស់ដែលបច្ចុប្បន្ននេះ មនុស្សយន្តអាចធ្វើចលនាផ្សេងៗតាមមនុស្សយើងបានគ្រប់បែបយ៉ាង ហើយសូម្បីតែការកម្រើកម្រាមដៃនីមួយៗ ក៏មនុស្សយន្តទាំងនេះអាចធ្វើបានដែរ» ។

វិស្វករផ្នែកស្រាវជ្រាវ និងអភិវឌ្ឍន៍របស់ក្រុមហ៊ុនមនុស្សយន្តហ៊ីវម៉ែនណយ EXRobots លើកឡើងថា ៖ «ការអភិវឌ្ឍបច្ចេកវិទ្យាលើកចុងក្រោយនេះ ធ្វើឱ្យចំណុចតភ្ជាប់របស់មនុស្សយន្តហ៊ីវម៉ែនណយអាចធ្វើចលនាបានតាមធម្មជាតិកាន់តែខ្លាំង រួមទាំងការធ្វើចលនាម្រាមដៃនីមួយៗផងដែរ» ។

ចំណែកលោក លី មានអាយុ២៨ឆ្នាំ ជាគ្រូពេទ្យ និយាយថា ៖ «ខ្ញុំគិតថា ពួកវាមើលទៅដូចមនុស្សយើងខ្លាំងណាស់ ទាំងគ្រាប់ភ្នែក, ចលនារាងកាយ និងដៃ ។ មនុស្សយន្តទាំងនេះកាន់តែដូចមនុស្សពិតប្រាកដ និងខុសពីមនុស្សយន្តមុនៗផងដែរ ។ នៅថ្ងៃអនាគត ខ្ញុំជឿថា ពួកគេនឹងចូលមកជំនួសមនុស្សបន្តិចម្តងៗសម្រាប់ការងារមួយចំនួនដែលគេត្រូវធ្វើដដែលៗ ។ ប៉ុន្តែបើយើងប្រើប្រាស់ប្រយោជន៍ពីវាយ៉ាងសមស្រប រឿងទាំងនេះនឹងជួយយើងអាចអភិវឌ្ឍន៍ការផលិតកាន់តែមានប្រសិទ្ធភាពយ៉ាងពិតប្រាកដ» ។

ក្នុងការតាំងបង្ហាញមនុស្សយន្តពិភពលោកប្រចាំឆ្នាំ២០២៣ នេះ គេបានបង្ហាញមនុស្សយន្តជាច្រើនប្រភេទ ដូចជា ដៃមនុស្សយន្តដំឡើងរថយន្ត និងឆ្កែយន្ត ដែលរៀបចំឡើងចាប់ពីថ្ងៃទី១៦ ដល់ថ្ងៃទី២២ ខែសីហា នៅទីក្រុងប៉េកាំង ប្រទេសចិន ៕ ប្រភព ៖ TNN World

បរទេស៖ បេសកកម្មដំបូងរបស់រុស្ស៊ីក្នុងរយៈពេល ៤៧ ឆ្នាំបានបរាជ័យ នៅពេលដែល Luna ២៥ ហោះចេញពីការគ្រប់គ្រង ហើយធ្លាក់ចូលទៅក្នុងផ្ទៃព្រះច័ន្ទ។
យោងតាមទីភ្នាក់ងារអវកាសរុស្ស៊ី Roscosmos បានប្រកាសថា ខ្លួនបានបាត់បង់ការទាក់ទងជាមួយនឹង Luna ២៥ នៅម៉ោង ៦:៥៧ នាទីល្ងាច កាលថ្ងៃទី ១៩ ខែសីហា នៅពេលដែលយានអវកាសមានបញ្ហាពេលចូលដល់គន្លងគោចរមុនពេលចុះចត នេះបើតាមសារព័ត៌មាន Reuters ដែលបានរាយការណ៍។ បើតាមការរំពឹងទុក Luna ២៥ នឹងអាចចុះចតលើឋានព្រះច័ន្ទនៅថ្ងៃទី ២១ ខែសីហានេះ ប៉ុន្តែ Roscosmos បាននិយាយថា “យានអវកាសបានផ្លាស់ទីក្នុងគន្លងដែលមិនអាចទាយទុកជាមុនបាន ហើយក៏បានឈប់ដំណើរការដោយសារតែការប៉ះទង្គិចជាមួយផ្ទៃព្រះច័ន្ទ”។

Roscosmos បានបង្កើតគណៈកម្មាធិការផ្ទៃក្នុងពិសេសមួយ ដើម្បីស៊ើបអង្កេតមូលហេតុនៅពីក្រោយការបរាជ័យនៃ Luna ២៥ ដែលជាបេសកកម្មសម្គាល់ការវិលត្រឡប់របស់រុស្ស៊ីទៅកាន់ឋានព្រះច័ន្ទ។ Luna ២៥ គឺជាយានអវកាសដំបូងរបស់រុស្ស៊ី បន្ទាប់ពីរុស្សីបានផ្អាកបេសកម្មស្រាវជ្រាវអស់រយៈពេល ៤៧ឆ្នាំ។
បច្ចុប្បន្ន រុស្ស៊ីកំពុងប្រជែងនឹងឥណ្ឌា ក្នុងការបាញ់បង្ហោះយានអវកាសទៅប៉ូលខាងត្បូងនៃឋានព្រះច័ន្ទ ប៉ុន្តែទោះជាយ៉ាងណាក៏ដោយរុស្ស៊ីបានបរាជ័យក្នុងការបាញ់បង្ហោះយានអវកាសនៅលើឋានព្រះច័ន្ទបាត់ទៅហើយ។

អ្នកវិទ្យាសាស្ត្ររុស្ស៊ីបានត្អូញត្អែរម្តងហើយម្តងទៀតអំពីអសមត្ថភាពរបស់អ្នកគ្រប់គ្រងកម្មវិធីអវកាសជាមួយនឹងគម្រោងមិនប្រាកដប្រជាជាច្រើន។ ពួកគេបានបង្ហាញពីបញ្ហាប្រឈមមុខនឹងកម្មវិធីអវកាសរបស់រុស្ស៊ី ដោយនិយាយថា យានអវកាសនិកមិនអាចសូម្បីតែចាកចេញពីគន្លងផែនដី។ ដូច្នេះហើយ រុស្ស៊ីមិនមែនជាប្រទេសដំបូងគេដែលទទួលបានការស្រាវជ្រាវគំរូទឹកកកនៅក្នុងតំបន់ប៉ូលនោះទេ៕ ប្រភព៖vnexpress

ប្រទេសនូវែលសេឡង់ ៖ ប្រទេសនូវែលសេឡង់ប្រកាសថា នឹងប្រើប្រាស់បច្ចេកវិទ្យា AI ដើម្បីគ្រប់គ្រងប្រភេទសត្វទាំងឡាយដែលរាតត្បាតសត្វផ្សេងទៀត ។ គេនឹងធ្វើការសាកល្បងប្រើប្រាស់បច្ចេកវិទ្យានេះនៅតំបន់ខ្លះក្នុងប្រទេសនូវែលសេឡង់ ដើម្បីការពារសត្វស្លាបមួយចំនួនដូចជា សត្វស្លាបប្រភេទ Kea និង Kaka ។

អន្ទាក់សម្លា.ប់សត្វដោយស្វ័យប្រវត្តិបង្កើតឡើងដោយ Critter Solutions ហើយវានឹងដំណើរការនៅពេលបច្ចេកវិទ្យា AI ទទួលស្គាល់ថា សត្វទាំងនេះស្ថិតនៅក្នុងចំណោមសត្វចូលចិត្តរាតត្បាតសត្វផ្សេងទៀត ។

លោកស្រី Helen Blackie ជាប្រធានគម្រោងនេះ និងមកពីក្រុមហ៊ុនប្រឹក្សា និងរៀបចំផែនការបរិស្ថាន Boffa Miskell បានពន្យល់អំពីបច្ចេកវិទ្យានេះថា មិនធ្លាប់មានបែបនេះពីមុនមកទេ ។ លោកស្រីលើកឡើងថា ៖ «វាជាអន្ទាក់ដំបូងគេដែលអាចគិតដោយខ្លួនឯងយ៉ាងមានប្រសិទ្ធភាព ហើយវាអាចសម្រេចចិត្តថា សត្វដែលវាចាប់បាននោះ គឺស្ថិតក្នុងប្រភេទសត្វគោលដៅដែរឬទេ» ។

លោកស្រី Helen Blackie បន្តទៀតថា ៖ «គន្លឹះនៃភាគជោគជ័យផ្នែកបច្ចេកទេសនេះ គឺការអភិវឌ្ឍអន្ទាក់ចាប់សត្វដែលអាចធ្វើការបានឆាប់រហ័ស បន្ទាប់ពីវាបានកំណត់អត្តសញ្ញាណក្នុងរយៈពេលត្រឹមតែ១វិនាទីប៉ុណ្ណោះ» ។

ចំណុចសំខាន់ អន្ទាក់សត្វនេះនឹងមិនបង្កឱ្យមានគ្រោះថ្នាក់ទៅលើប្រភេទសត្វដែលប្រទេសនូវែលសេឡង់ការពារនោះទេ ។ បច្ចេកវិទ្យា AI អាចកំណត់អត្តសញ្ញាណសត្វស្លាបក្នុងតំបន់ដែលហើរឆ្លងកាត់បាន ដូចជា សត្វស្លាប Kiwis និង Vegas ។ ក្រៅពីនេះ គេមិនចាំបាច់ប្រើប្រាស់ឧបករណ៍ជំនួយពីខាងក្រៅដើម្បីជួយឱ្យអន្ទាក់ចាប់សត្វដំណើរការទេ ហើយតាមការពិសោធន៍បង្ហាញថា អន្ទាក់ចាប់សត្វនេះអាចដំណើរការដោយខ្លួនឯងបានដូចជា អាចសម្លា.ប់សត្វកណ្តុរ និងសត្វមួយចំនួនទៀត ៕ ប្រភព ៖ NTD Thailand