មីយ៉ាន់ម៉ាព្រ.មានទីម័រចំៗ មិនឲ្យរិះគ.ន់របបសឹករបស់ខ្លួននៅលើឆាកអន្តរជាតិ

មិនខ្វល់ថា​ជ្រកក្រោមទ្រនំអាស៊ានតែមួយ! មីយ៉ាន់ម៉ាចោ.ទប្រធានាធិបតីទីម័រខាងកើតថាបាននិយាយបំផ្លើសការពិត ​បង្ខូចកេរ្តិ៍ឈ្មោះខ្លួនរឿងសង្គ្រាមស៊ីវិល និងបានព្រ.មានចំៗឲ្យមេដឹកនាំទីម័របញ្ឈប់ជាបន្ទាន់នូវការលូកដៃចូលកិច្ចការផ្ទៃក្នុងរបស់ខ្លួន។ ស្ថានភាពនេះបានធ្វើឲ្យរបត់ការទូតអាស៊ានកើនឡើងកម្ដៅយ៉ាងក្ដៅគគុក ចំពេលសមាជិកសភាអាស៊ានដើម្បីសិទ្ធិមនុស្សប្រកាន់ជំហរស្របតាមទីម័រ ថ្កោលទោសរបបសឹកមីយ៉ាន់ម៉ា។  
 
យោងតាមសេចក្តីថ្លែងការណ៍នៅក្នុងកិច្ចប្រជុំកំពូលស្តីពីសន្តិសុខ Shangri-La Dialogue នៅប្រទេសសិង្ហបុរី និងវេទិកាពិភាក្សានៅទីក្រុងហ្សាកាតា លោកប្រធានាធិបតី José Ramos-Horta បានហៅវិបត្តិសង្គ្រាមស៊ីវិលនៅមីយ៉ាន់ម៉ាថាជា «ស្នាមប្រឡាក់ដ៏អាក្រក់លើភាពជោគជ័យរបស់អាស៊ាន»។ ក្រៅពីនេះ លោកបានទាមទារឱ្យមានការដោះលែងអ្នកទោសនយោបាយទាំងអស់ រួមទាំងលោកស្រី អ៊ុងសាន ស៊ូជី (Aung San Suu Kyi) ព្រមទាំងបានជំរុញឱ្យសហគមន៍អន្តរជាតិចាត់វិធានការណ៍ក្តៅប្រឆាំងនឹងមេដឹកនាំយោធាមីយ៉ាន់ម៉ា។

ឆ្លើយតបនឹងការរិះគ.ន់របស់ទីម័រ របបសឹកណៃពិដោមីយ៉ាន់ម៉ាបានចាត់ទុកថា ការថ្លែងការណ៍របស់មេដឹកនាំទីម័រខាងកើតថាជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិ និង «គោលការណ៍មិនជ្រៀតជ្រែកកិច្ចការផ្ទៃក្នុង» ដែលជាស្នូលនៃធម្មនុញ្ញអាស៊ាន។ ជាមួយគ្នានេះ ភាគីមីយ៉ាន់ម៉ាក៏បានអះអាងសង្កត់ធ្ងន់ដែរថា ស្ថានភាពនៅក្នុងប្រទេសរបស់ខ្លួនភាគច្រើនគឺមានសន្តិភាព និងស្ថិរភាពធម្មតា ផ្ទុយស្រឡះពីការបំផ្លើសរបស់អ្នកនយោបាយទីម័រខាងកើត ខណៈការវាយប្រហារយោធាគឺធ្វើឡើងត្រឹមតែតំបន់ព្រំដែនដើម្បីការពារខ្លួនពីក្រុមប្រដាប់អាវុធប៉ុណ្ណោះ។
 
ជម្លោះពាក្យសម្តីចុងក្រោយនេះ បានធ្វើឱ្យទំនាក់ទំនងរវាងប្រទេសទាំងពីរធ្លាក់ចុះដល់ចំណុចសូន្យ បន្ទាប់ពីមានភាពតានតឹងជាបន្តបន្ទាប់តាំងពីដើមឆ្នាំ ២០២៦ នេះមក។ កាលពីប៉ុន្មានខែមុន ទីម័រខាងកើតបានសម្រេចចិត្តតែងតាំងព្រះរាជអាជ្ញាដើម្បីបើកការស៊ើបអង្កេតលើឧក្រិដ្ឋកម្មសង្គ្រាមរបស់មេដឹកនាំយោធាមីយ៉ាន់ម៉ា ដែលទង្វើនេះបានបណ្តាលឱ្យរបបសឹកណៃពិដោខឹងសម្បារយ៉ាងខ្លាំង រហូតឈានដល់ការបណ្តេញអ្នកតំណាងការទូតជាន់ខ្ពស់របស់ទីម័រខាងកើតចេញពីប្រទេសមីយ៉ាន់ម៉ា។

អ្នកវិភាគមើលឃើញថា សកម្មភាពឌឺដង និងការដាក់សម្ពាធពីសំណាក់ទីម័រខាងកើត ដែលជាបេក្ខភាពសមាជិកអាស៊ានទី១១ អាចនឹងធ្វើឱ្យដំណើរការនៃការចូលជាសមាជិកពេញសិទ្ធិរបស់ប្រទេសនេះនៅក្នុងប្លុកអាស៊ានជួបប្រទះនូវភាពរអាក់រអួល ឬការរារាំងពីភាគីមីយ៉ាន់ម៉ា និងប្រទេសគាំទ្រមួយចំនួន៕