ប្រទេសនូវែលសេឡង់ ៖ ប្រទេសនូវែលសេឡង់ប្រកាសថា នឹងប្រើប្រាស់បច្ចេកវិទ្យា AI ដើម្បីគ្រប់គ្រងប្រភេទសត្វទាំងឡាយដែលរាតត្បាតសត្វផ្សេងទៀត ។ គេនឹងធ្វើការសាកល្បងប្រើប្រាស់បច្ចេកវិទ្យានេះនៅតំបន់ខ្លះក្នុងប្រទេសនូវែលសេឡង់ ដើម្បីការពារសត្វស្លាបមួយចំនួនដូចជា សត្វស្លាបប្រភេទ Kea និង Kaka ។

អន្ទាក់សម្លា.ប់សត្វដោយស្វ័យប្រវត្តិបង្កើតឡើងដោយ Critter Solutions ហើយវានឹងដំណើរការនៅពេលបច្ចេកវិទ្យា AI ទទួលស្គាល់ថា សត្វទាំងនេះស្ថិតនៅក្នុងចំណោមសត្វចូលចិត្តរាតត្បាតសត្វផ្សេងទៀត ។

លោកស្រី Helen Blackie ជាប្រធានគម្រោងនេះ និងមកពីក្រុមហ៊ុនប្រឹក្សា និងរៀបចំផែនការបរិស្ថាន Boffa Miskell បានពន្យល់អំពីបច្ចេកវិទ្យានេះថា មិនធ្លាប់មានបែបនេះពីមុនមកទេ ។ លោកស្រីលើកឡើងថា ៖ «វាជាអន្ទាក់ដំបូងគេដែលអាចគិតដោយខ្លួនឯងយ៉ាងមានប្រសិទ្ធភាព ហើយវាអាចសម្រេចចិត្តថា សត្វដែលវាចាប់បាននោះ គឺស្ថិតក្នុងប្រភេទសត្វគោលដៅដែរឬទេ» ។

លោកស្រី Helen Blackie បន្តទៀតថា ៖ «គន្លឹះនៃភាគជោគជ័យផ្នែកបច្ចេកទេសនេះ គឺការអភិវឌ្ឍអន្ទាក់ចាប់សត្វដែលអាចធ្វើការបានឆាប់រហ័ស បន្ទាប់ពីវាបានកំណត់អត្តសញ្ញាណក្នុងរយៈពេលត្រឹមតែ១វិនាទីប៉ុណ្ណោះ» ។

ចំណុចសំខាន់ អន្ទាក់សត្វនេះនឹងមិនបង្កឱ្យមានគ្រោះថ្នាក់ទៅលើប្រភេទសត្វដែលប្រទេសនូវែលសេឡង់ការពារនោះទេ ។ បច្ចេកវិទ្យា AI អាចកំណត់អត្តសញ្ញាណសត្វស្លាបក្នុងតំបន់ដែលហើរឆ្លងកាត់បាន ដូចជា សត្វស្លាប Kiwis និង Vegas ។ ក្រៅពីនេះ គេមិនចាំបាច់ប្រើប្រាស់ឧបករណ៍ជំនួយពីខាងក្រៅដើម្បីជួយឱ្យអន្ទាក់ចាប់សត្វដំណើរការទេ ហើយតាមការពិសោធន៍បង្ហាញថា អន្ទាក់ចាប់សត្វនេះអាចដំណើរការដោយខ្លួនឯងបានដូចជា អាចសម្លា.ប់សត្វកណ្តុរ និងសត្វមួយចំនួនទៀត ៕ ប្រភព ៖ NTD Thailand

ប្រទេសឡាវ ៖ ប្រទេសឡាវជិតទទួលបានប្រាក់កម្ចីប្រមាណ៥១លានដុល្លារអាមេរិក (ឬប្រមាណ១.៨០០លានបាត)ពីប្រទេសថៃ ដើម្បីអភិវឌ្ឍន៍ស្ថានីយរថភ្លើងខាំសាវ៉ាត (Vientiane Station Khamsavath) នៅទីក្រុងវៀងច័ន្ទ នៅជិតព្រំដែនឡាវ និងថៃ ដើម្បីលើកកម្ពស់ការធ្វើពាណិជ្ជកម្ម និងផ្នែកទេសចរណ៍ឆ្លងកាត់ព្រំដែនរវាងប្រទេសទាំងពីរ ។

លោក Phiramet Wuthitornnetirak នាយកភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចជាមួយប្រទេសជិតខាង លើកឡើងថា បច្ចុប្បន្ន ក្រុមការងាររបស់លោកមានគម្រោងសុំការអនុម័តពីគណៈរដ្ឋមន្ត្រី ដើម្បីផ្តល់ប្រាក់កម្ចីឱ្យប្រទេសឡាវប្រមាណ១.៨០០លានបាត ដើម្បីអភិវឌ្ឍន៍តំបន់ពាណិជ្ជកម្មស្ថានីយរថភ្លើងខាំសាវ៉ាត ។

ស្ថានីយរថភ្លើងខាំសាវ៉ាត គឺជាផ្នែកមួយរបស់គម្រោងរថភ្លើងប្រទេសឡាវ និងថៃ ដែលតភ្ជាប់ខេត្តណងខាយជាមួយទីក្រុងវៀងច័ន្ទ ។ ចំណែកការសាងសង់ដំណាក់កាលដំបូងដែលតភ្ជាប់រវាងស្ថានីយរថភ្លើងណងខាយ ជាមួយស្ថានីយ Thanaleng បានបញ្ចប់ហើយ និងស្ថិតក្រោមការត្រួតពិនិត្យដើម្បីធ្វើការដឹកជញ្ជូនទំនិញរវាងប្រទេសទាំងពីរ ។ គម្រោងផ្លូវរថភ្លើងនេះស្របតាមយុទ្ធសាស្ត្រការអភិវឌ្ឍផ្លូវដែកជាតិរបស់ឡាវ ព្រមទាំងជួយជំរុញការធ្វើពាណិជ្ជកម្ម និងវិស័យទេសចរណ៍ឆ្លងកាត់ព្រំដែនរវាងប្រទេសទាំងពីរ រួមទាំងខេត្តស្ថិតនៅភាគខាងត្បូងប្រទេសចិនផងដែរ ។

ក្រៅពីនេះ ក្នុងអំឡុងពេកកិច្ចប្រជុំរវាងមន្ត្រីទាំងពីរប្រទេសនាពេលកន្លងមក ប្រទេសឡាវបានស្នើសុំជំនួយពីប្រទេសថៃ ផ្នែកការហ្វឹកហាត់បុគ្គលិកបើករថភ្លើងផងដែរ ខណៈប្រទេសឡាវបានកំណត់ឱ្យបុគ្គលិកបើករថភ្លើងទាំងអស់ត្រូវតែជាជនជាតិឡាវ ។ ហេតុនេះ ផ្នែករថភ្លើងជាតិប្រទេសឡាវគ្រោងនឹងបញ្ជូនបុគ្គលិកចាប់ពី៥នាក់ ទៅ១០នាក់មកចូលរួមសិក្សារួមគ្នាជាមួយផ្នែករថភ្លើងជាតិប្រទេសថៃ ។

ទោះយ៉ាងណា ប្រសិនបើប្រាក់កម្ចីនេះទទួលបានការអនុម័ត នឹងធ្វើឱ្យជំនួយផ្នែកហិរញ្ញវត្ថុពីប្រទេសថៃផ្តល់ឱ្យឡាវ ស្មើនឹងប្រមាណ៧០% នៃថវិកាសរុបដែលភ្នាក់ងារសហប្រតិបត្តិការអភិវឌ្ឍន៍សេដ្ឋកិច្ចជាមួយប្រទេសជិតខាង បានស្នើផ្តល់ជំនួយដល់ប្រទេសឡាវ ៕ ប្រភព ៖ AEC connect

បរទេស៖ ក្រុមអ្នកស្រាវជ្រាវរបស់សហរដ្ឋអាមេរិក បានប្រទះឃើញ ច្រាំងថ្មចោទកម្ពស់ ៦៦ ម៉ែត្រនៅក្នុងតំបន់អាឡាស្កា និង ត្រូវបានគ្របដណ្តប់ដោយស្នាមជើងដាយណូស័រ រាប់សិបក្បាល ហាក់ដូចជាសត្វបុរាណប្រឆាំងនឹងទំនាញផែនដីដើម្បីដើរឆ្លងកាត់មុខថ្ម។

យោងតាមប្រភពព័ត៌មាន Live Science ដែលបានរាយការណ៍នៅថ្ងៃទី ២០ ខែសីហាថា ច្រាំងថ្មចោទនេះស្ថិតនៅក្នុងឧទ្យានជាតិ Denali ដែលមានកម្ពស់ ២០ ជាន់។ ប៉ុន្តែប្រហែល ៧០ លានឆ្នាំមុនច្រាំងថ្មចោទនេះគឺជាដីល្បាប់ភក់ដែលទំនងជាព័ទ្ធជុំវិញរន្ធទឹកនៅកណ្តាលវាលទំនាបធំមួយ។ វាជួយពន្យល់ពីភាពចម្រុះនៃដានជើងដាយណូស័រនៅលើមុខច្រាំងថ្មចោទ ដោយកាលនោះដាយណូស័រតែងតែវាយប្រហារទៅលើមនុស្ស រួមជាមួយសត្វផ្សេងៗទៀត។ អស់រយៈពេលជាយូរ បន្ទាប់ពីដាយណូស័របានផុតពូជ ដានជើងរបស់ពួកវាក៏បានបន្សល់ទុកក្នុងតំបន់នោះរហូតមកដល់ពេលបច្ចុប្បន្ន។

លោក Dustin Stewart អ្នកជំនាញខាងបុរាណវិទ្យានៅ Paleo Solutions បាននិយាយថា នៅពេលដែលច្រាំងថ្មចោទនោះប៉ះនឹងពន្លឺព្រះអាទិត្យនៅមុំខាងស្តាំ ស្នាមជើងដាយណូស័រនឹងអាចមើលឃើញកាន់តែច្បាស់។ ក្នុងការចុះពិនិត្យកាន់តែជិត ក្រុមការងារបានរកឃើញស្នាមជើងដែលមានលក្ខណៈលម្អិត និងស្រស់ស្អាត ដោយមានទម្រង់ម្រាមជើង និងអាចមើលឃើញយ៉ាងច្បាស់។ លើសពីនេះ ច្រាំងថ្មចោទក៏មានរុក្ខជាតិ លំអង សំបកខ្យង និងដានជើងសត្វស្លាបដែលកំពុងដើរផងដែរ។ ដូចនេះ អ្នកស្រាវជ្រាវសង្ឃឹមថាការរកឃើញនេះនឹងជួយពួកគេគូររូបភាពលម្អិតនៃប្រព័ន្ធអេកូកាលពី ៧០ លានឆ្នាំមុន៕ ប្រភព៖vnexpress

សុនខដ៏ល្បីល្បាញមួយរបស់ពិភពលោក នៅលើបណ្តាញសង្គម ឈ្មោះថា Cheems Balltze ដែលជាប្រភេទពូជ shiba បានស្លាប់បាត់ទៅហើយ នេះបើយោងទៅតាមម្ចាស់សុនខនេះផ្ទាល់។Cheems Balltze ដែលមានអាយុ១២ឆ្នាំ បានកើតជំងឺមហារីក និងបានស្លាប់នៅអំឡុងពេលវះកាត់។ ម្ចាស់សុនខនេះ បានបង្ហោះសារនៅលើបណ្តាញសង្គមថា៖” ដើមឡើយ យើងចង់រៀបចំការព្យាបាលដោយប្រើគីមី ឬការព្យាបាលផ្សេងទៀតសម្រាប់គាត់ បន្ទាប់ពីការវះកាត់នេះ ប៉ុន្តែឥឡូវនេះវាយឺតពេលហើយ។ សូមកុំសោកស្ដាយគាត់អី ក៏ប៉ុន្តែសូមចងចាំនូវសេចក្តីរីករាយដែល Balltze នាំមកលើពិភពលោក។ ឥឡូវនេះតួនាទីរបស់គាត់ ដែលបានជួយផ្តល់ស្នាមញញឹមដល់មនុស្សជុំវិញពិភពលោកបានមកដល់ទីបញ្ចប់ហើយ”។

សូមបញ្ជាក់ផងដែរថា សត្វសុនខនេះ បានល្បីល្បាញខ្លាំងនៅអំឡុងពេលជំងឺរាតត្បាតកូវីដ១៩ ដោយរូបភាពរបស់ Cheems Balltze ត្រូវបានអ្នកប្រើប្រាស់បណ្តាញសង្គមយកនាំគ្នាទៅធ្វើ meme ជាច្រើន៕

ប្រភព៖ daily mail 

យោងតាមសហស្ថាបនិកនៃក្រុមហ៊ុន Microsoft បានឱ្យដឹងថា ដើម្បីទទួលបានជោគជ័យក្នុងទីផ្សារការងារ មានមុខវិជ្ជាសំខាន់ៗចំនួន ៣ ដែលមនុស្សគ្រប់គ្នាត្រូវការយ៉ាងចាំបាច់ ដើម្បីជួយអភិវឌ្ឍសង្គម និងកែលម្អខ្លួនឯងនាពេលអនាគត។

ក្នុងនាមជាអ្នកជំនួញជនជាតិអាមេរិកម្នាក់ លោក Bill Gates បានការចាប់ផ្តើមអាជីវកម្មដំបូងរបស់ខ្លួន ដែលមានសមាជិកត្រឹមតែពីរនាក់ប៉ុណ្ណោះ រហូតប្រែក្លាយអាជីវកម្មនេះ ទៅជាក្រុមហ៊ុនដ៏ធំនិងល្បីល្បាញបំផុតនៅលើពិភពលោក ជាមួយបុគ្គលិករាប់ពាន់នាក់។

កាលពីពេលថ្មីៗកន្លងទៅនេះ មហាសេដ្ឋី Bill Gates បានអញ្ជើញចូលរួមក្នុងកម្មវិធីចែកសញ្ញាបត្រនៅសាកលវិទ្យាល័យ Northern Arizona ហើយលោកក៏បានលើកឡើងពីសារៈសំខាន់នៃការអប់រំ ដើម្បីអាចជោគជ័យក្នុងទីផ្សារការងារនាពេលអនាគត ដោយមានមុខវិជ្ជាស្នូលចំនួន ៣ ដែលគ្រប់គ្នាគួរតែធ្វើជាម្ចាស់ ដើម្បីក្លាយជាផលិតភាពក្នុងជីវិត និងជំរុញសមត្ថភាពច្នៃប្រឌិត។

ដូចនេះ មុខវិជ្ជាទីមួយដែលមហាសេដ្ឋី Bill Gates ស្នើឱ្យសិក្សាគឺវិទ្យាសាស្ត្រ សព្វថ្ងៃនេះ វិទ្យាសាស្រ្តបានក្លាយជាកម្លាំងផលិតភាពផ្ទាល់ ដោយតួនាទីរបស់វិទ្យាសាស្ត្រកំពុងកើនឡើង និងក្លាយជាកម្លាំងជំរុញផ្ទាល់នៃការអភិវឌ្ឍន៍សេដ្ឋកិច្ចសង្គម

រីឯ មុខវិជ្ជាទីពីរវិញ គឺវិស្វកម្ម និងបញ្ញាសិប្បនិម្មិត។ យោងតាមមហាសេដ្ឋីវ័យ ៦៧ ឆ្នាំរូបនេះ បាននិយាយថា មុខវិជ្ជានេះគឺមានបញ្ហាធំៗ និងស្មុគស្មាញជាច្រើនដែលត្រូវដោះស្រាយនាពេលអនាគត ហើយ AI នឹងធ្វើឱ្យជីវិតរបស់យើងកាន់តែមានផលិតភាព និងការអភិវឌ្ឍន៍។ មិនតែប៉ុណ្ណោះ ការច្នៃប្រឌិតមិនត្រឹមតែបង្កើនផលិតភាពនៅក្នុងការិយាល័យប៉ុណ្ណោះទេ ប៉ុន្តែថែមទាំងធ្វើឱ្យប្រសើរឡើងនូវផ្នែកផ្សេងៗទៀតនៃជីវិតផងដែរ។

ចំណែកមុខវិជ្ជាទីបីវិញគឺសេដ្ឋកិច្ច ព្រោះបច្ចុប្បន្នគោលបំណងសំខាន់នៃសេដ្ឋកិច្ចគឺដើម្បីជួយគ្រប់គ្រងសេដ្ឋកិច្ច រដ្ឋាភិបាល អាជីវកម្ម និងអ្នកបង្កើតគោលនយោបាយទទួលបានការយល់ដឹងស៊ីជម្រៅ និងទិដ្ឋភាពទូទៅនៃដំណើរការសេដ្ឋកិច្ចជាក់លាក់មួយ។

ដូចនេះ សហស្ថាបនិកក្រុមហ៊ុន Microsoft ជឿជាក់ថាមនុស្សគ្រប់រូបត្រូវការពេលវេលាដើម្បីអនុវត្ត និងអភិវឌ្ឍខ្លួនឯង។ ទោះជាយ៉ាងណាក៏ដោយ អ្នកដែលមានប្រវត្តិផ្នែកវិទ្យាសាស្ត្រ វិស្វកម្ម និងសេដ្ឋកិច្ច ភាគច្រើននឹងក្លាយជាអ្នកដែលមានអាទិភាពបំផុតសម្រាប់ការងារនាពេលអនាគត៕ ប្រភព៖cafef.com