ប្រទេសចិន ៖ ការចាប់ផ្តើមបង្ហូរទឹកលាយជាតិវិទ្យុសកម្មចេញពីរោងចក្រថាមពលនុយក្លេអ៊ែររបស់ជប៉ុន បានធ្វើឱ្យប្រទេសក្នុងតំបន់អាស៊ានព្រួយបារម្ភ ហើយមនុស្សមួយចំនួនមិនហ៊ានបរិភោគស៊ូស៊ី និងអាហារសមុទ្រនាំចូលពីជប៉ុនទេ ។ ចំណែកពលរដ្ឋចិនវិញនាំគ្នាទិញអំបិលស្តុកទុក ដោយសារបារម្ភនឹងការបង្ហូរទឹកកខ្វក់នេះធ្វើឱ្យប៉ះពាល់ដល់ការផលិតអំបិល ។

អាជ្ញាធរជប៉ុនបានបង្ហូរទឹកកខ្វក់ចេញពីរោងចក្រថាមពលនុយក្លេអ៊ែរ Fukushima ដែលមានលាយឡំជាមួយជាតិវិទ្យុសកម្មចូលក្នុងមហាសមុទ្រប៉ាស៊ីហ្វិកតាមការកំណត់ ។ គេសង្កេតឃើញថា មិនត្រឹមតែប្រទេសជិតខាងរបស់ជប៉ុនប៉ុណ្ណោះទេដែលបានតវ៉ា ប៉ុន្តែពលរដ្ឋជប៉ុនជាច្រើននាក់ក៏បាននាំគ្នាតវ៉ាប្រឆាំងនឹងការបង្ហូរទឹកកខ្វក់ចូលសមុទ្រដូចគ្នាដែរ ។ ប្រទេសជប៉ុនបានចាប់ផ្តើមគម្រោងបង្ហូរទឹកចេញពីរោងចក្រក្នុងបរិមាណជាង១,៣៤លានតោន ដែលទឹកទាំងនេះត្រូវបានគេរក្សាទុកនៅក្នុងអាងទឹកប្រមាណ១.០០០ ចូលទៅក្នុងសមុទ្រ ស្របពេលមានការជំទាស់ពីប្រទេសជាច្រើន បើទោះជាផ្នែកថាមពលបរមាណូអន្តរជាតិនឹងអនុម័តផែនការបង្ហូរទឹកក្តី ។

ប្រទេសចិនបានប្រកាសហាមនាំចូលអាហារសមុទ្រគ្រប់ប្រភេទពីជប៉ុន ហើយពលរដ្ឋចិនជាច្រើននាក់នាំគ្នាទិញអំបិលស្តុកទុក មុនពេលជប៉ុនបង្ហូរទឹកចេញពីរោងចក្រថាមពលនុយក្លេអ៊ែរ ដែលធ្វើឱ្យក្រុមហ៊ុនផលិតអំបិលបញ្ជាក់ថា អំបិលផលិតពីទឹកសមុទ្រនេះគ្មានលាយឡំជាតិវិទ្យុសកម្មទេ ។ ចំណែកអ្នកជំនាញបានបារម្ភពីផលប៉ះពាល់បរិស្ថាន ដោយសារការបង្ហូរទឹកកខ្វក់ ។

លោក Nubel Cisneros អ្នកឧតុនិយមវិទ្យា លើកឡើងថា ៖ «ខ្ញុំគិតថា នេះជាគ្រោះថ្នាក់របស់ពិភពលោក ដោយសារជប៉ុនបង្ហូរទឹកកខ្វក់ចេញពីរោងចក្រថាមពលនុយក្លេអ៊ែរ ហើយវាមិនត្រឹមតែប៉ះពាល់ដល់ប្រទេសជិតខាងរបស់ជប៉ុនប៉ុណ្ណោះទេ ប៉ុន្តែសារធាតុកខ្វក់នេះនឹងហូរទៅកាន់ប្រទេសផ្សេងទៀត ។ ដូច្នេះ វាគ្រោះថ្នាក់ខ្លាំងណាស់ ហើយវានឹងប៉ះពាល់ដល់សត្វរស់នៅក្នុងទឹក ចៀសមិនផុត» ។

ចំណែកនៅហុងកុងវិញ ពលរដ្ឋមួយចំនួនបានបង្ហាញការបារម្ភ ហើយពួកគេមិនហ៊ានបរិភោគអាហារសមុទ្រនាំចូលពីប្រទេសជប៉ុនទេ ។ នារីម្នាក់និយាយថា ៖ «ខ្ញុំមិនដឹងថា តើវាមានសុវត្ថិភាពដែរឬទេ បើខ្ញុំបរិភោគអាហារសមុទ្រជប៉ុន ។ ខ្ញុំមានកូន៣នាក់ ហើយវាកាន់តែគួរឱ្យបារម្ភខ្លាំងជាងនេះទៀត ព្រោះកូនៗរបស់ខ្ញុំចូលចិត្តញ៉ាំស៊ូស៊ី ។ ដូច្នេះ ខ្ញុំត្រូវតែប្រុងប្រយ័ត្នជាងមុន» ។

ចំណែកពលរដ្ឋជប៉ុនវិញក៏បានតវ៉ានឹងការបង្ហូរទឹកកខ្វក់ចេញពីរោងចក្រថាមពលនុយក្លេអ៊ែរដូចគ្នាដែរ ។ អ្នកស្រី យ៉ូស៊ិកុ ហ្វុរ៉ាខាវ៉ា ជាអ្នកតវ៉ានិយាយថា ៖ «វាគួរឱ្យសោកសៅដែលជប៉ុនចាប់ផ្តើមបង្ហូរទឹកកខ្វក់ ប៉ុន្តែយើងនឹងមិនបោះបង់ការព្យាយាមទេ ។ យើងត្រូវបញ្ឈប់គម្រោងនេះឱ្យបានឆាប់រហ័សបំផុត ដើម្បីកាត់បន្ថយបរិមាណទឹកដែលត្រូវបង្ហូរចូលក្នុងសមុទ្រ ហើយនេះជាហេតុផលថា ហេតុអ្វីខ្ញុំមកតវ៉ានៅពេលនេះ» ។

ប្រទេសជប៉ុនបញ្ជាក់ថា ការបង្ហូរទឹកចេញពីរោងចក្រថាមពលនុយក្លេអ៊ែរដែលបានច្រោះសម្អាតរួចហើយ គឺវាមានសុវត្ថិភាព ខណៈអាមេរិក និងតៃវ៉ាន់បានគាំទ្រជប៉ុន និងលើកឡើងថា ទឹកបង្ហូរចេញពីរោងចក្រនេះមានផលប៉ះពាល់តិចតួចណាស់ ៕ ប្រភព ៖ TNN World

ប្រទេសថៃ ៖ ក្រោយពីសភាតំណាងរាស្ត្របានបោះឆ្នោតជ្រើសរើសលោក Srettha Thavisin ជាបេក្ខជននាយករដ្ឋមន្ត្រីមកពីគណបក្សភឿថៃ ឱ្យកាន់តំណែងជានាយករដ្ឋមន្ត្រីទី៣០ របស់ប្រទេសថៃរួចមក ពលរដ្ឋថៃរស់នៅតាមខេត្តផ្សេងៗបានស្នើឱ្យនាយករដ្ឋមន្ត្រីថ្មីជួយដោះស្រាយបញ្ហាប្រេងឥន្ធនៈ និងជីកសិកម្មឡើងថ្លៃ ។ លើសពីនេះ ពួកគេបានអំពាវនាវឱ្យរដ្ឋាភិបាលជួយគិតគូររឿងតម្លៃស្រូវ និងជីវភាពរស់នៅផងដែរ ។

កាលពីថ្ងៃទី២២ ខែសីហា ឆ្នាំ២០២៣ កសិករជាច្រើននាក់រស់នៅខេត្តឆៃណាត បានអំពាវនាវទៅកាន់នាយករដ្ឋមន្ត្រីថ្មីដោះស្រាយបញ្ហាចម្បងៗចំនួន៣ចំណុច ដែលធ្វើឱ្យប៉ះពាល់ដល់មុខរបររបស់កសិករដោយផ្ទាល់ រួមមាន ៖

១-តម្លៃប្រេងឥន្ធនៈ ៖ ប្រេងឥន្ធនៈបានដើរតួនាទីយ៉ាងសំខាន់សម្រាប់កសិករ ព្រោះកសិករត្រូវការប្រេងម៉ាស៊ូត និងប្រេងសាំងដើម្បីដាក់ម៉ាស៊ីនបូមទឹកបញ្ចូលស្រែ ហើយពួកគេចង់ឱ្យរដ្ឋាភិបាលថ្មីជួយគិតគូររឿងនេះជាចម្បង ។ រដ្ឋាភិបាលថ្មីគួរតែលក់ប្រេងក្នុងតម្លៃពិសេសឱ្យកសិករដែលប្រកបរបរធ្វើស្រែចម្ការ ដោយរដ្ឋាភិបាលអាចគណនាតាមចំនួនផ្ទៃដីស្រែរបស់កសិករ ។

២-តម្លៃជីកសិកម្ម និងថ្នាំកម្ចា.ត់សត្វល្អិត ៖ បច្ចុប្បន្ន តម្លៃជីកសិកម្ម និងថ្នាំកម្ចា.ត់សត្វល្អិតនៅប្រទេសថៃ បានកើនឡើងជាបន្តបន្ទាប់ដោយគ្មានមូលហេតុ ។ ដូច្នេះ កសិករថៃបានសំណូមពរឱ្យនាយករដ្ឋមន្ត្រីទើបឡើងកាន់តំណែងជួយកំណត់តម្លៃជីកសិកម្ម និងថ្នាំកម្ចា.ត់សត្វល្អិតឱ្យបានច្បាស់លាស់ ដើម្បីកាត់បន្ថយការចំណាយដើមទុនរបស់កសិករ ។

៣-តម្លៃស្រូវ ៖ កសិករបានសំណូមពរឱ្យនាយករដ្ឋមន្ត្រីថ្មីបង្កើតយន្តការ ឬគម្រោងផ្សេងៗដើម្បីធ្វើឱ្យស្រូវយ៉ាងហោចណាស់ មានតម្លៃខ្ពស់ជាង១ម៉ឺនបាតក្នុង១តោន ។ ការធ្វើឱ្យតម្លៃស្រូវឡើងថ្លៃ វាជួយឱ្យកសិករអាចរស់នៅដោយមានជីវភាពសមរម្យតាមអ្វីដែលពួកគេគួរទទួលបាន ព្រោះបើតម្លៃស្រូវធ្លាក់ចុះ នឹងធ្វើឱ្យស្ថានភាពរស់នៅរបស់កសិករធ្លាក់ក្នុងភាពក្រីក្រ ។ បើកសិករត្រូវប្រឈមនឹងភាពក្រីក្រកាន់តែយូរ ធ្វើឱ្យពួកគេបង្ខំចិត្តលក់ដីស្រែចម្ការដោះស្រាយសងបំណុល ហើយវានឹងក្លាយជាបញ្ហារបស់សង្គមដែលពិបាកដោះស្រាយ ។ ហេតុនេះ បើនាយករដ្ឋមន្ត្រីថ្មីអាចដោះស្រាយបញ្ហាទាំង៣ចំណុចនេះបាន គឺនឹងទទួលបានសំឡេងគាំទ្របន្ថែមទៀតពីពលរដ្ឋជាមិនខាន ៕ ប្រភព ៖ Matichon

ជប៉ុន៖ យោងតាមទីភ្នាក់ងាររុករកអវកាសជប៉ុនបាននិយាយថា ការបាញ់បង្ហោះនឹងធ្វើឡើងនៅថ្ងៃទី ២៨ ខែសីហា ឆ្នាំ២០២៣ នេះ។
បន្ទាប់ពីបរាជ័យនៅលើឋានព្រះច័ន្ទម្តងរួចហើយនៃអវកាស ispace កាលពីខែមេសា ប្រទេសជប៉ុននៅតែមិនអស់សង្ឃឹម ហើយក៏បានចាប់ផ្តើមបាញ់បង្ហោះយានអវកាសរបស់ខ្លួនជាថ្មីម្តងទៀតទៅឋានព្រះច័ន្ទនៅសប្តាហ៍ក្រោយ ដោយមានភាពជឿជាក់បំផុត។

ដូច្នេះហើយថ្មីៗនេះ ជប៉ុនបានគ្រោងទុក រ៉ុក្កែត H2-A (SLIM) ដែលជាយានចុះចតឆ្លាតវៃ នឹងរំពឹងថាទៅដល់ផ្ទៃព្រះច័ន្ទក្នុងរយៈពេល ៤-៦ ខែ។ SLIM គ្រោងនឹងបាញ់បង្ហោះទៅកាន់ទីអវកាសពី Tanegashima ភាគខាងត្បូងនៃប្រទេសជប៉ុន ជាមួយផ្កាយរណប X-Ray។ ទន្ទឹមនឹងនេះ X-Ray គឺជាផ្កាយរណបថតកាំរស្មី X ដែលត្រូវបានបង្កើតឡើងដោយទីភ្នាក់ងាររុករកអវកាសជប៉ុន (JAXA) អង្គការ NASA និងទីភ្នាក់ងារអវកាសអឺរ៉ុប (ESA) ដែលត្រូវបានរចនាឡើងដើម្បីសិក្សាពីដំណើរការវិវត្តនៃសកលលោក។

SLIM ត្រូវបានគេដាក់ឈ្មោះហៅក្រៅថា Moon Sniper ដោយប្រើមនុស្សយន្តខ្នាតតូចដែលមានទំហំប៉ុនបាតដៃ និងមានគោលបំណងស្វែងយល់ពីរបៀបដែលព្រះច័ន្ទបង្កើតដោយសិក្សាផ្នែកដែលលាតត្រដាងនៃអាវធំតាមច័ន្ទគតិ។ ក្រុមហ៊ុនអវកាស JAXA ក៏មានបំណងចុះចតវាក្នុងចម្ងាយ ១០០ ម៉ែត្រពីទីតាំងដែលបានកំណត់ ដែលវាតិចជាងចម្ងាយធម្មតាជាច្រើនគីឡូម៉ែត្រ។លោក Shinichiro Sakai ម្ចាស់គម្រោង SLIM បាននិយាយថា “ការបាញ់បង្ហោះយានអវកាសទៅឋានព្រះច័ន្ទនៅតែជាកិច្ចការដ៏លំបាកមួយ ប៉ុន្តែទោះជាយ៉ាងណាក៏ដើម្បីធ្វើវាបាន ពួកយើងនឹងប្រឹងប្រែងឱ្យអស់ពីសមត្ថភាព” ៕
ប្រភព៖vnexpress