ប្រទេសវៀតណាម ៖ នៅពេលនិយាយពីកាហ្វេ ប្រាកដណាស់ថា យើងនឹងនឹកឃើញដល់ប្រទេសប្រេស៊ីល ឬកូឡុំប៊ី ហើយយើងមិនបានគិតដល់វៀតណាមទេ ។ ប៉ុន្តែវៀតណាមគឺជាប្រទេសនាំចេញកាហ្វេក្នុងលំដាប់ទី២ លើពិភពលោក ។ មុននឹងសួរថា ហេតុអ្វីវៀតណាមក្លាយជាប្រទេសនាំចេញកាហ្វេដ៏ច្រើនបែបនេះ ? យើងត្រូវត្រឡប់ទៅមើលចំណុចចាប់ផ្តើម ដែលកាហ្វេបានមកដល់ប្រទេសវៀតណាម ។

កាលពីឆ្នាំ១៨៥៧ ជនជាតិបារាំងបាននាំគ្រាប់កាហ្វេមកកាន់ប្រទេសវៀតណាម ហើយកាហ្វេអារ៉ាប៊ីកា គឺជាពូជកាហ្វេដំបូងគេដែលបានដាំដុះនៅប្រទេសនេះ ដោយសារវៀតណាមមានអាកាសធាតុក្តៅអំណោយផលដល់ដំណាំកាហ្វេ ទើបធ្វើឱ្យឧស្សាហកម្មនេះចាប់ផ្តើមរីកចម្រើននៅតំបន់អណ្ណាម ។ ក្រោយមក នៅឆ្នាំ១៩៥០ ប្រទេសវៀតណាមបានបង្កើតរោងចក្រកែច្នៃកាហ្វេលើកដំបូង ហើយពលរដ្ឋវៀតណាមគិតថា កាហ្វេជាដំណាំនៃក្តីសង្ឃឹម ព្រោះពួកគេអាចនាំចេញវាក្នុងតម្លៃខ្ពស់ រហូតដល់ពេលកើតសង្គ្រាមនៅវៀតណាម បានធ្វើឱ្យដំណាំកាហ្វេត្រូវផ្អាក ។

ក្រោយពីបញ្ចប់សង្គ្រាមវៀតណាមនៅឆ្នាំ១៩៧៥ រដ្ឋាភិបាលបានអនុវត្តប្រព័ន្ធសេដ្ឋកិច្ចបែបសង្គមនិយម ក្នុងនោះរដ្ឋាភិបាលកាន់ពាណិជ្ជកម្មផ្តាច់មុខ ប៉ុន្តែផ្នែកឯកជនខ្វះខាតការធ្វើពាណិជ្ជកម្មសេរី ។ ដូច្នេះ ការអនុវត្តប្រព័ន្ធសេដ្ឋកិច្ចនេះមិនអាចនាំប្រទេសវៀតណាមឱ្យអភិវឌ្ឍន៍ទៅមុខបានទេ ។

ទោះយ៉ាងណា នៅឆ្នាំ១៩៨៦ ប្រទេសវៀតណាមបានធ្វើកំណែទម្រង់សេដ្ឋកិច្ចថ្មីឆ្ពោះទៅរកប្រព័ន្ធមូលធននិយម ដោយចាប់ផ្តើមអនុវត្តគោលនយោបាយសេដ្ឋកិច្ច «Doi Moi» ។ ចាប់ពីពេលនោះមក សេដ្ឋកិច្ចវៀតណាមបានរីកចម្រើនបន្តិចម្តងៗ និងធ្វើឱ្យឧស្សាហកម្មកាហ្វេចាប់ផ្តើមរីកលូតលាស់ម្តងទៀត ។ វៀតណាមបានចុះហត្ថលេខាលើកិច្ចព្រមព្រៀងពាណិជ្ជកម្មជាមួយប្រទេសក្នុងតំបន់ និងក្រៅតំបន់ ដោយចាប់ពីឆ្នាំ១៩៩០ ដល់ឆ្នាំ១៩៩៩ ទិន្នផលផលិតកាហ្វេនៅវៀតណាមបានរីកចម្រើនជាបន្តបន្ទាប់ គឺចាប់ពីប្រមាណ២០% ទៅ៣០% ជារៀងរាល់ឆ្នាំ ។ ចុងក្រោយ វៀតណាមបានក្លាយជាប្រទេសនាំចេញកាហ្វេដ៏ច្រើនស្ថិតក្នុងលំដាប់ទី២ លើពិភពលោក និងនាំមុខប្រទេសកូឡុំប៊ី ។

ក្រៅពីនេះ ឧស្សាហកម្មកាហ្វេបានរួមចំណែកយ៉ាងសំខាន់ក្នុងការជំរុញសេដ្ឋកិច្ចជាតិ និងជួយបង្កើតការងារដល់ពលរដ្ឋ ក៏ដូចជាកាត់បន្ថយភាពក្រីក្រផងដែរ ។ នៅឆ្នាំ១៩៩៤ ពលរដ្ឋវៀតណាមស្ថិតក្នុងភាពក្រីក្រប្រមាណ៦០% ប៉ុន្តែបច្ចុប្បន្ន ភាពក្រីក្រនៅសល់ត្រឹមតែ១០% ប៉ុណ្ណោះ ។ កត្តាជោគជ័យរបស់កាហ្វេវៀតណាមមួយទៀតបន្ថែមលើកំណែទម្រង់សេដ្ឋកិច្ច គឺវៀតណាមបានជ្រើសរើសដាំកាហ្វេរ៉ូប៊ូស្តា ដែលមានបរិមាណជាតិកាហ្វេអ៊ីនពី១,៦% ដល់២,៧% ដោយមានពណ៌កាហ្វេខាប់ និងមានរសជាតិខ្លាំងជាងកាហ្វេអារ៉ាប៊ីកា ។ ដូច្នេះ កាហ្វេវៀតណាមអាចនាំចេញទៅកាន់ប្រទេសលោកខាងលិច និងបណ្តាប្រទេសផ្សេងទៀតយ៉ាងឆាប់រហ័ស ។

តាមទិន្នន័យរបស់សមាគមកាហ្វេវៀតណាមបង្ហាញថា កាហ្វេជាផលិតផល១ ក្នុងចំណោមផលិតផលកសិកម្មចំនួន៦ ដែលបានបង្កើតប្រាក់ចំណូលជាង៣ពាន់លានដុល្លារអាមេរិកក្នុង១ឆ្នាំ ហើយវៀតណាមបាននាំចេញកាហ្វេទៅប្រទេសជាង៨០ នៅលើពិភពលោក ក្នុងនោះអតិថិជនធំបំផុត គឺសហភាពអឺរ៉ុប, អាមេរិក, រុស្ស៊ី, ជប៉ុន និងអង់គ្លេស ។ ចំណែកអង្គការកាហ្វេអន្តរជាតិបង្ហាញថា វៀតណាមនៅតែកាន់តំណែងជាប្រទេសនាំចេញកាហ្វេច្រើនបំផុតក្នុងលំដាប់ទី២ លើពិភពលោក បើគិតចាប់ពីខែកុម្ភៈ ឆ្នាំ២០២១ ដល់ខែមករា ឆ្នាំ២០២២ ៕ ប្រភព ៖ AEC connect

ប្រទេសអារ៉ាប៊ីសាអូឌីត ៖ ប្រទេសអារ៉ាប៊ីសាអូឌីតបានប្រឈមនឹងបម្រែបម្រួលអាកាសធាតុ ដូចជា ខ្យល់ព្យុះ និងភ្លៀងធ្លាក់ខ្លាំងនៅទីក្រុងមេកា ខណៈពេលពលរដ្ឋកំពុងតែនាំគ្នាធ្វើបុណ្យ ។ លើសពីនេះ មានរន្ទះបាញ់ជាច្រើនលើកផងដែរ នៅក្បែរអគារដាក់តាំងរូបនាឡិកាដ៏ល្បីល្បាញក្នុងទីក្រុងនេះ ។

ទីក្រុងមេកា គឺជានគរស័ក្តិសិទ្ធិមួយរបស់សាសនាឥស្លាម បានប្រឈមនឹងខ្យល់ព្យុះយ៉ាងខ្លាំង និងភ្លៀងធ្លាក់ជាបន្តបន្ទាប់ ដែលធ្វើឱ្យវាលខ្សាច់នៅតំបន់ខ្លះក្លាយទៅជាសមុទ្រ ហើយសាលាជាច្រើនកន្លែងត្រូវបិទទ្វារភ្លាមៗ ។

អ្នកនាំពាក្យមជ្ឈមណ្ឌលឧតុនិយមជាតិ Hussein Al-Qahtani បានបង្ហោះក្នុងបណ្តាញសង្គម X ដែលជាឈ្មោះថ្មីរបស់ Twitter ថា ខ្យល់ព្យុះដែលកើតឡើងនេះ បណ្តាលឱ្យខ្យល់បក់ខ្លាំងក្នុងចម្ងាយជាង៨០គីឡូម៉ែត្រក្នុង១ម៉ោង ។ ចំណែកនៅតំបន់ខ្លះទៀត យានជំនិះទាំងអស់មិនអាចធ្វើដំណើរនៅតាមផ្លូវបានទេ ដោយសារមានទឹកជំនន់ ខណៈមនុស្សម្នាបានរត់គេចពីខ្យល់ព្យុះ ។

អាជ្ញាធររាយការណ៍ថា គ្មានគ្រោះថ្នាក់ ឬអ្នករងរបួសដោយសារគ្រោះមហន្តរាយធម្មជាតិលើកនេះទេ ចំណែកទឹកជំនន់ភ្លាមៗបានស្រកចុះខ្លះហើយនៅតំបន់មួយចំនួន ប៉ុន្តែស្ថានការណ៍នេះពុំទាន់ល្អប្រសើរនៅឡើយទេ ។ គ្រោះធម្មជាតិលើកនេះ គឺស្រដៀងគ្នានឹងខ្យល់ព្យុះកាលពីឆ្នាំ២០១៥ នៅប្រទេសអារ៉ាប៊ីសាអូឌីត ដែលធ្វើឱ្យពលរដ្ឋស្លា.ប់រហូតដល់ជាង១០០នាក់ និងរងរបួសរាប់រយនាក់ទៀត ។

ក្នុងអំឡុងពេលកើតខ្យល់ព្យុះ អាជ្ញាធរប្រចាំទីក្រុងមេកាបានប្រកាសឱ្យបិទសាលារៀនគ្រប់កន្លែង ចាប់ពីថ្ងៃទី២៣ ខែសីហា ឆ្នាំ២០២៣ ហើយឱ្យសាលារៀនទាំងនេះត្រូវបង្រៀនសិស្សតាមអនឡាញ ដើម្បីឱ្យគ្រប់គ្នាមានសុវត្ថិភាព ។ អ្នកឃើញហេតុការណ៍ជាច្រើននាក់ប្រាប់ថា ស្ថានការណ៍នៅបរិវេណ Masjid al-Haram គួរឱ្យខ្លាចបំផុត ហើយគ្រប់យ៉ាងបានកើតឡើងក្នុងរយៈពេលត្រឹមតែប៉ុន្មាននាទីប៉ុណ្ណោះ ។ វាជាខ្យល់ព្យុះដ៏អាក្រក់បំផុតតាមអ្វីដែលពួកគេចាំបាន ៕ ប្រភព ៖ Nation World

ប្រទេសឡាវ ៖ ការិយាល័យនាយករដ្ឋមន្ត្រីឡាវបានអនុម័តដំឡើងប្រាក់ឈ្នួលអប្បបរមាប្រចាំខែនៅប្រទេសឡាវ ចាប់ពីចំនួន១៣០ម៉ឺនគីប ទៅ១៦០ម៉ឺនគីប ដើម្បីឱ្យមានសមាមាត្រគ្នាជាមួយនឹងការចំណាយប្រចាំថ្ងៃក្នុងជីវភាពរស់នៅ ហើយការដំឡើងប្រាក់ឈ្នួលនេះ នឹងអនុវត្តចាប់ពីថ្ងៃទី១ ខែតុលា ឆ្នាំ២០២៣ តទៅ ។

បើទោះជាមានការដំឡើងថ្លៃប្រាក់ឈ្នួលអប្បបរមាសម្រាប់អ្នកធ្វើការផ្នែកឯកជនក្តី ប៉ុន្តែក្នុងកិច្ចប្រជុំគណៈរដ្ឋមន្ត្រីឡាវមិនបានលើកឡើងអំពីការដំឡើងប្រាក់ខែដល់មន្ត្រីរាជការទេ ខណៈបច្ចុប្បន្ន មន្ត្រីរាជការឡាវទទួលបានប្រាក់ខែប្រមាណ២០០ម៉ឺនគីបក្នុង១ខែ ។

នាយកគ្រប់គ្រងក្រុមហ៊ុនធនធានមនុស្ស 108Jobs ឈ្មោះ Keovisouk Dalasane បានលើកឡើងថា ការដំឡើងថ្លៃប្រាក់ឈ្នួលអប្បបរមាលើកនេះ គឺមិនគ្រប់គ្រាន់ទេសម្រាប់អ្នកធ្វើការទាំងអស់ ដោយសារអត្រាអតិផរណាកើនឡើង ហើយធ្វើឱ្យការចំណាយផ្សេងៗក្នុងជីវភាពប្រចាំថ្ងៃកើនឡើងខ្ពស់ ។ នាយកគ្រប់គ្រងក្រុមហ៊ុននេះលើកឡើងថា ៖ «ប្រាក់ឈ្នួលអប្បបរមានៅប្រទេសឡាវ គឺត្រូវតែដំឡើងយ៉ាងហោចណាស់ចាប់ពី២០០ម៉ឺនគីប ទៅ២២០ម៉ឺនគីប ដោយសារប្រទេសឡាវត្រូវពឹងផ្អែកលើការនាំចូលទំនិញពីក្រៅប្រទេស ដែលធ្វើឱ្យតម្លៃទំនិញប្រើប្រាស់ចាំបាច់កើនឡើង» ។

យោងតាមទិន្នន័យរបស់ក្រសួងការងារ និងសុខុមាលភាពសង្គមឡាវ កាលពីខែមេសា ឆ្នាំ២០២៣ បញ្ជាក់ថា នៅឆ្នាំ២០២៣ នេះ ពលករឡាវដែលមានជំនាញការងារបានធ្វើដំណើរចេញពីប្រទេសឡាវទៅធ្វើការនៅក្រៅប្រទេស ស្មើប្រមាណ ៣១.៣៩៤នាក់ ក្នុងនោះពួកគេទៅធ្វើការនៅប្រទេសថៃ ជាង៣០.២០០នាក់ ។ ចំណែកស្ថិតិប្រចាំឆ្នាំ២០២២ បង្ហាញថា មានពលករឡាវបានចាកចេញទៅធ្វើការនៅក្រៅប្រទេស ស្មើនឹង៥០០.៧១២នាក់ ៕ ប្រភព ៖ beartaiBRIEF

រដ្ឋធានីមូស្គូ៖ ក្រោយការធ្លាក់យន្ដហោះ បានសម្លាប់ថៅកែទាហានស៊ីឈ្នួលដ៏មានឥទ្ធិពលបំផុតរបស់រុស្ស៊ី រួចមក បណ្ដាមេដឹកនាំលោកខាងលិចមួយចំនួន នៅតែដាក់ការសង័្សយយ៉ាងខ្លាំង ទៅលើឧបទ្ទវហេតុធ្លាក់យន្ដហោះនេះ ខណៈលោកប្រធានាធីបតីអ៊ុយក្រែន បានអះអាង ថា តុលាការនៅរុស្ស៊ី មានតែពូទីន។

សារព័ត៌មាន Channel News Asia បានចេញផ្សាយ កាលពីព្រឹក ថ្ងៃសុក្រ ទី២៥ ខែសីហា ថា លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានអះអាង ថា «រដ្ឋាភិបាលក្រុងកៀវ មិនមានអ្វីត្រូវនិយាយជាមួយនឹងការធ្លាក់យន្ដហោះនេះឡើយ។ ខ្ញុំគិត ថា មនុស្សគ្រប់គ្នា បានដឹងអស់រួចមកហើយ អ្វីដែលបានកើតឡើង នឹងពាក់ព័ន្ធដល់លោក ពូទីន ប្រធានាធិបតីរុស្ស៊ី»។

លោកប្រធានាធិបតី ហ្សេឡែនស្គី បានបន្ដ ថា «នៅលើលោកនេះ តុលាការធំបំផុត មានតែនៅទីក្រុងឡាអេ(Hague) តុលាការរបស់ព្រះជាម្ចាស់។ ប៉ុន្ដែប្រទេសរុស្ស៊ី បានផ្លាស់ប្ដូរតុលាការ គឺ ពូទីន»។

ស្របគ្នានេះ បណ្ដាមេដឹកនាំលោកខាងលិចមួយចំនួន បានដាក់ការសង័្សយជាច្រើន ចំពោះការធ្លាក់យន្ដហោះដឹកលោក យ៉ែវហ្គេនី ព្រីហ្គោហ្ស៊ីន ថៅកែក្រុមហ៊ុនទាហានស៊ីឈ្នួលរបស់រុស្ស៊ី Wagner ថា វាទំនងជាការធ្វើឃាត។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក បានបញ្ជាក់ ថា «មានរឿងរ៉ាវតិចតួចណាស់ នៅក្នុងប្រទេសរុស្ស៊ី ដែលពូទីន មិនចូលរួមពាក់ព័ន្ធ។ ប៉ុន្ដែគាត់មិនបានដឹង អំពីអ្វីដែលបានកើតឡើងនោះឡើយ»។

ជាមួយគ្នានេះ ប្រទេសបារាំង ក៏បានមើលឃើញការសង័្សយសមហេតុផល អំពីការធ្លាក់យន្ដហោះនេះដែរ ខណៈអាល្លឺម៉ង់ បាននិយាយ ថា ក្រុងប៊ែរឡាំង សង័្សយទៅលើទម្រង់ ធ្វើឃាត នៅក្នុងប្រទេសរុស្ស៊ី។

លោកស្រី អានណាឡេណា ប៊ែរប៊ុក (Annalena Baerbock) រដ្ឋមន្រ្ដីក្រសួងបរទេសអាល្លឺម៉ង់ បានបញ្ជាក់ ថា វាមានការសង័្សយ ត្រង់ថា អតីមនុស្សជំនិតបំផុត បានធ្វើឲ្យលោកប្រធានាធិបតី ពូទីន អាម៉ាស់ ហើយមិនយូរប៉ុន្មាន បែរជាមានយន្ដហោះ ធ្លាក់មកពីលើមេឃ ក្រោយពេលគាត់បានប៉ុនប៉ងបះបោរប្រដាប់អាវុធទ្រង់ទ្រាយធំមិនសម្រេច។

សូម្បីតែលោកស្រី ម៉ាហ្ការីតា ស៊ីម៉ុនយ៉ាន់ (Margarita Simonyan) និពន្ធនាយកសារព័ត៌មាន RT និង ជាឥស្សរជនគាំទ្រវិមានក្រឹមឡាំង ហើយជាសម្ពន្ធមិត្តរបស់លោកប្រធានាធិបតី ពូទីន ហាក់បីដូចជាលើកឡើង ថា វាអាចទំនងជាអំពើឃាតកម្ម។

ដោយឡែក អាជ្ញាធរអាកាសចរណ៍រុស្ស៊ី បានចេញផ្សាយ ថា អ្នកដំណើរ ចំនួន១០នាក់ បានធ្វើដំណើរតាមយន្ដហោះឯកជន ប្រភេទ Embraer (អេមប្រាអើរ) ហើយបានធ្លាក់ កាលពីល្ងាច ថ្ងៃពុធ ទី២៣ ខែសីហា។ អ្នកដំណើរទាំងនោះ រួមទាំងលោក ព្រីហ្គោហ្ស៊ីន និង មនុស្សជំនិតរបស់គាត់ គឺលោក ឌីមីទ្រី អ៊ុតគីន (Dmitry Utkin) ក៏បានស្លាប់ទាំងអស់គ្នា។

លោក យ៉ែវហ្គេនី ព្រីហ្គោហ្ស៊ីន វ័យ៦២ឆ្នាំ បានដឹកនាំការបះបោរ ប្រឆាំងនឹងមេទ័ពកំពូលៗ នៅក្នុងក្រសួងការពារជាតិរុស្ស៊ី នៅចន្លោះពីថ្ងៃទី២៣-២៤ ខែមិថុនា ឆ្នាំ២០២៣។ រីឯលោកប្រធានាធិបតី ពូទីន បានចាត់ទុកសកម្មភាពបែបនេះ អាចនាំឱ្យប្រទេសរុស្ស៊ី ធ្លាក់ចូលទៅក្នុងសង្រ្គាមស៊ីវិល។ ស្របគ្នានោះ ក្រុមយុទ្ធជនរបស់ Wagner ថែមទាំងបានបាញ់ទម្លាក់ឧទ្ធម្ភាគចក្រវាយប្រហារជាច្រើនគ្រឿងរបស់កម្លាំងទាហានរុស្សី នៅក្នុងអំឡុងពេលការបះបោរនោះ ដោយបានសម្លាប់អ្នកបើកយន្តហោះ និង កងទ័ពជាច្រើននាក់។ ប៉ុន្ដែសកម្មភាពបះបោររបស់ទាហានស៊ីឈ្នួល បានបញ្ចប់ទៅវិញភ្លាម ក្រោមការសម្របសម្រួល ពីប្រធានាធិបតីបេឡារុស លោក អាឡិកសានដឺរ លូកាសែនកូ (Alexander Lukashenko) ដោយអនុញ្ញាតដល់ពួកគេ និរទេសខ្លួន ទៅកាន់ប្រទេសបេឡារុស៕

រដ្ឋធានីវ៉ាស៊ីនតោន៖ រហូតមកដល់ពេលនេះ លោក ដូណាល់ ត្រាំ (Donald Trump) បានក្លាយជាអតីតប្រធានាធិបតីលើកដំបូងរបស់សហរដ្ឋអាមេរិក ត្រូវប្រឈមមុខនឹងសំណុំរឿងព្រហ្មទណ្ឌជាច្រើនករណី ហើយគាត់បានយល់ព្រម ទៅកាន់ពន្ធនាគារហ៊្វូលថុន ខោនធី (Fulton County) ជាកន្លែងដែលគាត់នឹងត្រូវផ្ដិតមេដៃ និង មានលទ្ធភាពថតរូបគាត់បាន។

សារព័ត៌មាន BBC បានចេញផ្សាយ កាលពីព្រឹក ថ្ងៃសុក្រ ទី២៥ ខែសីហា ថា លោក ដូណាល់ ត្រាំ (Donald Trump) អតីតប្រធានាធិបតីសហរដ្ឋអាមេរិក បានយល់ព្រមទៅកាន់ពន្ធនាគារ Fulton County ស្ថិតក្នុងរដ្ឋចចា (Georgia) ហើយត្រូវបានចោទប្រកាន់ ពីបទព្យាយាមរំលោភលើការបោះឆ្នោតឆ្នាំ២០២០របស់គាត់ នៅក្នុងរដ្ឋនេះ។ លោក ត្រាំ ទំនងជានឹងត្រូវបានអាជ្ញាធរ ជំរុញឲ្យផ្ដិតមេដៃ ហើយថតរូបរបស់គាត់ រួចហើយទើបគាត់នឹងត្រឡប់មកវិញ ដើម្បីចូលទៅបំភ្លឺ នៅក្នុងតុលាការ។ រីឯការបង់ប្រាក់ធានានៅក្រៅឃុំរបស់គាត់ នឹងត្រូវកំណត់ រហូតដល់២០០ ០០០ដុល្លារ។

លោក ដូណាល់ ត្រាំ អតីតប្រធានាធិបតីសហរដ្ឋអាមេរិក បានច្រានចោលនូវការចោទប្រកាន់ ចំនួន១៣ករណី រួមទាំង ការវាយតប់ និង ការនិយាយមិនពិត។ គាត់បានអះអាង ថា ការចោទប្រកាន់ទាំងនេះ មានហេតុផលខាងនយោបាយ។

អតីតមេធាវីរបស់លោក ត្រាំ គឺលោក រូឌី ហ្គូលានី (Rudy Giuliani) និង សហចុងចោទផ្សេងៗទៀត កាលពីថ្ងៃពុធ បានចុះចាញ់ នៅក្នុងករណីដូចគ្នានេះដែរ។ នេះជាសំណុំរឿងព្រហ្មទណ្ឌទី៤របស់លោក ដូណាល់ ត្រាំ ខណៈគាត់កំពុងតែរៀបចំការឈរឈ្មោះបោះឆ្នោតជាថ្មីរបស់ នៅក្នុងឆ្នាំ២០២៤។

រហូតមកដល់ពេលនេះ លោក ដូណាល់ ត្រាំ អតីតប្រធានាធិបតីសហរដ្ឋអាមេរិក មិនត្រឹមតែមានសំណុំរឿងចោទប្រកាន់ នៅក្នុងរដ្ឋ Georgia ប៉ុណ្ណោះទេ បច្ចុប្បន្ន គាត់ក៏កំពុងតែប្រឈមមុខនឹងការចោទប្រកាន់ពីបទល្មើសព្រហ្មទណ្ឌ និង រដ្ឋប្បវេណី ជាច្រើនករណីបន្ថែមទៀត។ ប៉ុន្ដែគាត់អាចនឹងត្រូវបង់ប្រាក់ធានា នៅក្រៅឃុំ ដោយកំណត់ រហូតដល់២០០ ០០០ដុល្លារអាមេរិក។

លោក ដូណាល់ ត្រាំ នឹងត្រឡប់ទៅកាន់ព្រលានយន្តហោះវិញ ហើយវិលត្រឡប់ទៅកាន់ផ្ទះមួយ នៅក្នុងចំណោមអចលនទ្រព្យរបស់គាត់ ស្ថិតក្នុងរដ្ឋ New Jersey (ញូជើរស៊ី) នាភាគឦសានរបស់សហរដ្ឋអាមេរិក។

លោកស្រី ហ្វានី វីលលី (Fani Willis) រដ្ឋអាជ្ញាស្រុក Fulton County បានដឹកនាំការស៊ើបអង្កេត រយៈពេលពីរឆ្នាំកន្លះ លើការប្រព្រឹត្ត ក្រោយការបោះឆ្នោតរបស់លោក ដូណាល់ ត្រាំ នៅក្នុងរដ្ឋ Georgia នៅមុនពេលដាក់ការចោទប្រកាន់ ចំនួន៤១ករណី ប្រឆាំងនឹងគាត់ និង ចោទប្រកាន់លើសហចុងចោទ ចំនួន១៨ករណីទៀត។

លោកស្រី វិលលីស បានក្លាយជារដ្ឋអាជ្ញាស្រីដំបូងគេ នៅក្នុងស្រុក Fulton County ហើយត្រូវបានក្រុមមេធាវីនៅរដ្ឋ Georgia ទទួលស្គាល់ ថា ជាព្រះរាជអាជ្ញា មានសមត្ថភាពខ្ពស់ នៅក្នុងការធានាដល់ការកាត់ក្ដី នៅក្នុងសំណុំរឿងឥស្សរជន និង មានភាពស្មុគស្មាញ៕

បរទេស៖ យោងតាម The Elec ដែលជាក្រុមហ៊ុនអេឡិចត្រូនិកកូរ៉េកំពុងធ្វើការស្រាវជ្រាវ និងអភិវឌ្ឍអេក្រង់គ្មានព្រំដែនទាំងស្រុង ដោយលុបបំបាត់នូវដែនកំណត់រវាងអេក្រង់ និងស៊ុម រួមផ្សំជាមួយនឹងប្រព័ន្ធកាមេរ៉ាលាក់នៅក្រោមអេក្រង់ជំនាន់ថ្មី។

ដូច្នេះហើយបច្ចុប្បន្ន Samsung បានធ្វើការស្រាវជ្រាវលើបច្ចេកវិទ្យា laminated ក៏ដូចជា edge brightness និងបានធ្វើឱ្យប្រសើរឡើងនូវបច្ចេកវិទ្យាកាមេរ៉ានៅក្រោមអេក្រង់ដើម្បីបង្កើនផ្ទៃបង្ហាញ។ ក្រុមហ៊ុនក៏ជឿជាក់ផងដែរថា ស្មាតហ្វូនដែលបំពាក់អេក្រង់គ្មានគែម នឹងក្លាយជាជំហានបន្ទាប់ក្នុងការរចនាស្មាតហ្វូនថ្មី។

ក្រុមហ៊ុន Samsung ក៏កំពុងស្រាវជ្រាវស្មាតហ្វូនដែលមានអេក្រង់រំកិល នឹងធ្វើឱ្យផលិតផលនេះស្តើងជាងមុន និងងាយស្រួលកាន់ ។ នាយកប្រតិបត្តិរបស់ក្រុមហ៊ុន Samsung លោក Jung Yong-Wook បាននិយាយថា ស្មាតហ្វូនដែលមានអេក្រង់ OLED និងត្រូវបានដាក់លក់នៅលើទីផ្សារក្នុងរយៈពេល ២-៣ ឆ្នាំខាងមុខ។

ទោះជាយ៉ាងណាក៏ដោយ អេក្រង់ដែលគ្មានគែមមិនមែនជាកិច្ចការងាយស្រួលនោះទេសម្រាប់ Samsung។ ដូចនេះហើយ Samsung នឹងប្ដេជ្ញាចិត្តក្នុងការអភិវឌ្ឍន៍ទូរស័ព្ទដែលមិនមានគែម បង្កើនទំហំអេក្រង់ និងកែលម្អបទពិសោធន៍ពេលមើលវីដេអូ ឬលេងហ្គេម ដើម្បីតម្រូវចិត្តអតិថិជននូវអ្វីដែលថ្មីៗ៕
ប្រភព៖vnexpress

ប្រទេសថៃ ៖ កាលពីថ្ងៃទី២២ ខែសីហា ឆ្នាំ២០២៣ រដ្ឋសភាថៃបានបោះឆ្នោតជ្រើសរើសនាយករដ្ឋមន្ត្រីប្រទេសថៃ តាមមាត្រា២៧២ របស់រដ្ឋធម្មនុញ្ញប្រទេសថៃ ហើយគណបក្សភឿថៃបានស្នើឈ្មោះលោក Srettha Thavisin ធ្វើជាបេក្ខជននាយករដ្ឋមន្ត្រីតែម្នាក់គត់ ។ ក្រោយពីកិច្ចប្រជុំបានចំណាយពេលពិភាក្សាគ្នាជាង៧ម៉ោង លទ្ធផលការបោះឆ្នោតបង្ហាញថា លោក Srettha Thavisin បានទទួលសំឡេងគាំទ្រជាងពាក់កណ្តាល ឬច្រើនជាង៣៧៥ពិន្ទុ ។ ដូច្នេះ លោកទទួលបានជោគជ័យ និងក្លាយជានាយកដ្ឋមន្ត្រីថ្មីរបស់ប្រទេសថៃ ។

ពលរដ្ឋរស់នៅខេត្តបឹងកានបានបង្ហាញក្តីរីករាយចំពោះលោក Srettha Thavisin ទទួលបានជោគជ័យ និងត្រូវកាន់តំណែងជានាយករដ្ឋមន្ត្រីប្រទេសថៃ ។ អាជីវករលក់ឆ្នោតម្នាក់ក្នុងផ្សារខេត្តបឹងកានប្រាប់ថា លោកមានអារម្មណ៍សប្បាយចិត្ត ហើយលោកសង្ឃឹមថា រដ្ឋាភិបាលថ្មីនឹងជួយដោះស្រាយបញ្ហាជីវភាពរបស់ពលរដ្ឋឱ្យប្រសើរឡើង ជាពិសេស ផ្នែកកសិកម្ម ។

បុរសលក់ឆ្នោតរូបនេះបានស្នើឱ្យរដ្ឋាភិបាលថ្មីជួយធ្វើឱ្យតម្លៃជ័រកៅស៊ូឡើងថ្លៃជាងពេលបច្ចុប្បន្ន ព្រោះវាបានធ្លាក់ចុះអស់រយៈពេលយូរមកហើយ ។ រីឯការសហការគ្នារវាងគណបក្សភឿថៃជាមួយគណបក្សនយោបាយចាស់ៗនោះ លោកសង្ឃឹមថា គណបក្សទាំងអស់នឹងឈ្វេងយល់ពីគ្នាទៅវិញទៅមកដើម្បីធ្វើយ៉ាងណា ឱ្យប្រទេសថៃអភិវឌ្ឍន៍បន្តទៅមុខទៀត ។

ចំណែកអាជីវករលក់កម្រងផ្កាក្នុងផ្សារខេត្តបឹងកាននិយាយថា គាត់សប្បាយចិត្តដែលប្រទេសថៃទទួលបាននាយករដ្ឋមន្ត្រីថ្មី ដើម្បីអភិវឌ្ឍន៍ប្រទេសជាតិឱ្យរីកចម្រើន និងមិនឱ្យសេដ្ឋកិច្ចធ្លាក់ចុះ ។ ចំណែកការសហការគ្នារវាងគណបក្សភឿថៃជាមួយគណបក្សនយោបាយចាស់ៗ វាជារឿងរបស់គណបក្សនយោបាយ ។ បើគណបក្សនយោបាយប្រាប់ថា ការសហការគ្នានេះល្អ គាត់ក៏យល់ស្របដែរ ។ ចុងក្រោយ គាត់បានសំណូមពរឱ្យរដ្ឋាភិបាលថ្មីជួយដោះស្រាយបញ្ហាទាំងអស់ឱ្យល្អប្រសើរឡើង និងបង្កលក្ខណៈងាយស្រួលដល់ការប្រកបមុខរបររបស់ពលរដ្ឋផងដែរ ៕ ប្រភព ៖ matichon

បើនិយាយពីបច្ចេកវិទ្យា និងប្រទេសដែលទំនើបនឹងសុីវិល័យជាងគេនោះ គេតែងតែនឹងទៅឃើញប្រទេសជប៉ុនមុនគេ។ នៅក្នុងនោះទីក្រុងតូក្យូ ដែលមានរស់នៅច្រើនជាងគេបង្អស់នៅលើពិភពលោក បានជាប់ជាទីក្រុងដែលល្អ និងសុីវិល័យជាងគេលើលោក និងអាសុី។

ដោយឡែកនៅក្នងតំបន់អាស៊ានយើងវិញមានទីក្រុងទាំង៤ប៉ុណ្ណោះ ដែលជាប់ក្នុងបញ្ជីទីក្រុងល្អទាំង១០០នៅទ្វីបអាសុី ក្នុងនោះរួមមាន៖

• សិង្ហបុរី លេខ៩
• បាងកក លេង៣០
• ហ្សកាតា លេខ៨៩
• ហាណូយ លេខ៩៧

ចំពោះទីក្រុងភ្នំពេញរបស់ប្រទេសកម្ពុជា យើងវិញ ជាប់លេខ ១០៥ ផងដែរ៕

ប្រភព៖ The World Best Cities

បរទេស៖ ប្រទេសន័រវេសបានបើកកសិដ្ឋានខ្យល់បណ្តែតទឹកដ៏ធំបំផុតរបស់ពិភពលោកនៅសមុទ្រខាងជើងកាលពីថ្ងៃទី ២៣ ខែសីហា ដោយជួយបំប្លែងពីឥន្ធនៈហ្វូស៊ីលទៅជាថាមពលបៃតង។
កសិដ្ឋានខ្យល់បណ្តែត Hywind Tampen មានទួរប៊ីនចំនួន ១១ ដែលនីមួយៗអាចបង្កើតថាមពលបានរហូតដល់ ៨.៦ MW ដែលបំពេញតម្រូវការថាមពលប្រហែល ៣៥% នៃអណ្តូងប្រេង និងឧស្ម័នចំនួនប្រាំនៅក្បែរនោះ។ ដំណើរការសាងសង់ Hywind Tampen នៅជម្រៅ ២៦០ – ៣០០ ម៉ែត្រ ចំណាយថវិកាប្រមាណ ៦៩១ លានដុល្លារអាមេរិក។ គម្រោងនេះត្រូវបានគ្រប់គ្រងដោយក្រុមប្រេង និងឧស្ម័ន Equinor និង Petoro (ន័រវេស) OMV (អូទ្រីស) ក្រុមហ៊ុនបុត្រសម្ព័ន្ធ Var Energi របស់ Eni (អ៊ីតាលី) Wintershall DEA (អាល្លឺម៉ង់) និង Inpex (ជប៉ុន)។

កសិដ្ឋានដែលមានទីតាំងនៅចម្ងាយប្រហែល ១៤០ គីឡូម៉ែត្រពីឆ្នេរសមុទ្របានចាប់ផ្តើមផលិតកម្មកាលពីចុងឆ្នាំមុន ប៉ុន្តែត្រូវបានសម្ពោធជាផ្លូវការដោយព្រះអង្គម្ចាស់ Haakon និងនាយករដ្ឋមន្ត្រី Jonas Gahr Store នៅថ្ងៃទី ២៣ ខែសីហា ឆ្នាំ២០២៣នេះ។ទោះជាយ៉ាងណាក៏ដោយ ប្រទេសន័រវេសនិងអឺរ៉ុបសុទ្ធតែត្រូវការអគ្គិសនីបន្ថែមទៀត ដោយសារសង្រ្គាមនៅអ៊ុយក្រែនបានធ្វើឱ្យស្ថានការណ៍កាន់តែធ្ងន់ធ្ងរឡើង។ អគ្គិសនីត្រូវតែមកពីប្រភពដែលអាចកកើតឡើងវិញបាន ប្រសិនបើអឺរ៉ុបចង់សម្រេចបាននូវគោលដៅអាកាសធាតុរបស់ខ្លួន ។

Hywind Tampen ត្រូវបានគេរំពឹងថានឹងកាត់បន្ថយការបំភាយឧស្ម័ន CO2 ចំនួន ២០០,០០០ តោនក្នុងមួយឆ្នាំ ឬ ០.៤% នៃការបំភាយឧស្ម័ន CO2 សរុបរបស់ប្រទេសន័រវេសក្នុងឆ្នាំ ២០២៣។ ដូចនេះ ការបើកកសិដ្ឋានមានភាពវិជ្ជមាន អាចជួយកាត់បន្ថយការបំភាយឧស្ម័ន CO2 របស់ប្រទេស នឹងជួយបំប្លែងពីឥន្ធនៈហ្វូស៊ីលទៅជាថាមពលបៃតង៕
ប្រភព៖vnexpress