ប្រទេសស្កុតឡែន ៖ លោក ក្រូហ្វតនែវិន បានប្រែក្លាយផ្ទៃដីប្រមាណជិត៣៣រ៉ៃ ដែលមានទីតាំងស្ថិតនៅចំណុចកណ្តាលនៃប្រទេសស្កុតឡែន ឱ្យក្លាយជាចម្ការផ្កាឈូករ័ត្នពណ៌លឿងរីកយ៉ាងស្រស់បំព្រង ប៉ុន្តែគ្មានអ្នកណាជឿថា នៅទីនេះមានចម្ការផ្កាឈូករ័ត្នដ៏ធំបែបនេះទេ ។ បច្ចុប្បន្ន លោក ក្រូហ្វតនែវិន ធ្វើការងារផ្នែកអាជីវកម្មបសុសត្វ ដែលបន្តតំណែងពីឪពុក-ម្តាយរបស់លោក ។

លោក ក្រូហ្វតនែវិន ក៏មិននឹកស្មានថា ផ្កាឈូករ័ត្នដែលលោកបានដាំលេងៗនៅជុំវិញកសិដ្ឋានកាលពី៣ឆ្នាំមុននោះក្លាយជាទីកន្លែងទេសចរណ៍មួយដ៏ល្បីល្បាញ ដែលបានទាក់ទាញភ្ញៀវទេសចរជាតិ និងអន្តរជាតិជាច្រើននាក់មកកម្សាន្តទេ ។ អាកាសធាតុត្រជាក់នៅប្រទេសស្កុតឡែន ស្ទើរតែមិនអំណោយផលដល់ការដាំដុះផ្កាឈូករ័ត្នទេ ។ ការដាំលើកដំបូងឃើញថា ផ្កាឈូករ័ត្នបានដុះលូតលាស់ និងរីកស្គុះស្គាយពេញដើម ដូច្នេះ លោក ក្រូហ្វតនែវិន ក៏បានពង្រីកផ្ទៃដីដាំបន្ថែមទៀតជាបន្តបន្ទាប់ រហូតដល់មានផ្ទៃដីជិតស្មើ៣៣រ៉ៃ និងមានផ្កាឈូករ័ត្នជាង២សែន៥ម៉ឺនដើម ។

ក្រៅពីនេះ លោក ក្រូហ្វតនែវិន ក៏បានបង្កើតទីកន្លែងដាំដុះឱ្យមានរូបរាងខុសៗគ្នាផងដែរ ។ ជាក់ស្តែង កាលពីឆ្នាំ២០២២ លោកបានដាំផ្កាឈូករ័ត្នមានរាងជាផែនទីប្រទេសស្កុតឡែនដ៏ធំមួយ ហើយនៅឆ្នាំ២០២៣ លោកបានដាំផ្កាឈូករ័ត្នឱ្យមានរូបរាងជាផ្លូវដើរខ្វាត់ខ្វែង ។ បើគេក្រឡេកមើលរូបភាពថតពីលើអាកាស វាបានក្លាយជាចម្ការផ្កាឈូករ័ត្នពណ៌លឿងដ៏ស្រស់ស្អាត និងទាក់ទាញភ្នែកយ៉ាងខ្លាំង ។

នៅពេលដើមផ្កាឈូករ័ត្នធំ គឺវានឹងមានកម្ពស់ប្រមាណ២ម៉ែត្រ ហើយលោក ក្រូហ្វតនែវិន តែងថតចម្ការផ្កាឈូករ័ត្នបង្ហោះក្នុងយូធូបជានិច្ច ដើម្បីទាក់ទាញអ្នកទស្សនាមកកម្សាន្តនៅចម្ការរបស់លោក ដែលលោកបានដាក់ឈ្មោះថា «GLOAGBURN» ។ លោកនិយាយថា មានភ្ញៀវទេសចរជាតិ និងអន្តរជាតិមកកម្សាន្តនៅចម្ការរបស់លោកជាហូរហែ មុនពេលវាជ្រុះស្វិតក្នុងរយៈពេល៤សប្តាហ៍ ។

អ្នកមកលេងនៅចម្ការផ្កាឈូករ័ត្ន ពួកគេចូលចិត្តដើរនៅតាមផ្លូវខ្វាត់ខ្វែងនេះ ព្រមទាំងថតរូបជាមួយផ្កាឈូករ័ត្នផងដែរ ហើយបើពួកគេចង់ដើរពេញចម្ការទាំងអស់ គឺត្រូវចំណាយពេលចាប់ពីកន្លះម៉ោង ទៅ១ម៉ោង ។ រីឯកុមារវិញសប្បាយរីករាយនឹងការរត់នៅតាមផ្លូវតូចៗក្នុងចម្ការនេះ ដែលម្ចាស់ចម្ការបានរៀបចំឡើងយ៉ាងពិសេសសម្រាប់កុមារ ។ សម្រាប់តម្លៃចូលទស្សនាចម្ការផ្កាឈូករ័ត្ន «GLOAGBURN» របស់លោក ក្រូហ្វតនែវិន គឺមនុស្សចាស់ត្រូវចំណាយប្រាក់ចំនួប៥ផោនក្នុងម្នាក់ រីឯកុមារមានអាយុក្រោម១២ឆ្នាំ អាចចូលកម្សាន្តដោយមិនគិតថ្លៃ ៕ ប្រភព ៖ World Pulse

ប្រទេសប៉ាគីស្ថាន ៖ អាជ្ញាធរប្រទេសប៉ាគីស្ថានបានជួយរំដោះកូនសិស្ស៦នាក់ និងគ្រូបង្រៀន២នាក់ទៀតចេញពីកន្ត្រកខ្សែកាបដោយសុវត្ថិភាព ក្រោយពីពួកគេបានជាប់ក្នុងកន្ត្រកនេះនៅកណ្តាលជ្រលងភ្នំអស់រយៈពេល១៤ម៉ោង ។ នាយករដ្ឋមន្ត្រីប៉ាគីស្ថាន លោក Anwar ul Haq Kakar បានបង្ហោះសារមួយក្នុងបណ្តាញសង្គមបង្ហាញពីការត្រេកអរ ដែលអាជ្ញាធរអាចជួយសង្គ្រោះជីវិតមនុស្សទាំងអស់ ។

ហេតុការណ៍គួរឱ្យតក់ស្លុតនេះបានកើតឡើងកាលពីថ្ងៃទី២២ ខែសីហា ឆ្នាំ២០២៣ ក្រោយពីកូនសិស្សចំនួន៦នាក់មានអាយុចាប់ពី១០ឆ្នាំ ទៅ១៥ឆ្នាំ និងគ្រូបង្រៀន២នាក់ទៀតបានធ្វើដំណើរតាមកន្ត្រកខ្សែកាបទៅកាន់សាលារៀននៅលើភ្នំ ដែលស្ថិតនៅភាគឦសានប្រទេសប៉ាគីស្ថាន ។ ប៉ុន្តែកន្ត្រកខ្សែកាបមិនដំណើរការ និងឈប់ស្ងៀមមួយកន្លែង ដែលវាមានកម្ពស់ពីជ្រលងភ្នំប្រមាណ២៧៤ម៉ែត្រ ។

កងទ័ព និងអ្នកជំនាញបានជួយសង្គ្រោះគ្រូបង្រៀន និងកូនសិស្សដោយប្រើប្រាស់ឧទ្ធម្ភាគចក្រ ប៉ុន្តែមានឧបសគ្គដោយសារខ្យល់ខ្លាំងពេក ។ ក្នុងអំឡុងពេលជួយសង្គ្រោះនោះ មានកូនសិស្ស២នាក់ដួលសន្លប់ ខណៈកូនសិស្សខ្លះទៀតក្អួត និងមានជំងឺបេះដូង ។ រយៈពេលជាច្រើនម៉ោងក្រោយមក អាជ្ញាធរក៏អាចជួយសង្គ្រោះមនុស្សជាប់ក្នុងកន្ត្រកខ្សែកាបទាំងអស់ ។ លោក Sahib Khan បានក្លាយជាវីរបុរសក្នុងការជួយសង្គ្រោះលើកនេះ ដោយសារលោកធ្វើការនៅក្រុមហ៊ុនដែលមានជំនាញយកសា.កស.ពចេញពីទន្លេ និងជ្រលងភ្នំ ។ ដូច្នេះ លោកក៏បានស្ម័គ្រចិត្តជួយសង្គ្រោះអ្នកជាប់ក្នុងកន្ត្រកខ្សែកាប ។

គេសង្កេតឃើញនៅបរិវេណកន្លែងកើតហេតុ មានក្រុមគ្រួសារ និងអ្នកស្រុកប្រមាណ៥០០នាក់បានមកឈរមើលភារកិច្ចជួយសង្គ្រោះរបស់ភ្នាក់ងារជំនាញដោយការបារម្ភ ។ ចំណែកពលរដ្ឋខ្លះទៀតបានសុំពរពីព្រះជាបន្តបន្ទាប់ រហូតដល់ភ្នាក់ងារសង្គ្រោះអាចជួយជីវិតមនុស្សចុងក្រោយដោយជោគជ័យ ៕ ប្រភព ៖ Nation World

បរទេស៖ នៅក្នុងឆមាសទីមួយនៃឆ្នាំនេះ ក្រុមហ៊ុន Emaar Properties ដែលជាក្រុមហ៊ុនអភិវឌ្ឍន៍អចលនទ្រព្យដ៏ធំបំផុតរបស់ទីក្រុងឌូបៃ បានឃើញជនជាតិចិនមានចំនួន ៨% ដែលបានទិញផ្ទះនៅទីក្រុងនេះ ខណៈពេលដែលឆ្នាំមុន សមាមាត្រនេះមានត្រឹមតែ ៤% ប៉ុណ្ណោះ។

យោងតាមក្រុមហ៊ុនហិរញ្ញវត្ថុ CI Capital បានឱ្យដឹងថា អតិថិជនចិនបានក្លាយជាកត្តាដ៏សំខាន់មួយក្នុងការជួយជំរុញអំណាចទិញនៅទីផ្សារអចលនទ្រព្យរបស់អេមីរ៉ាតអារ៉ាប់រួម ដែលវាជាតម្រូវការដ៏ខ្ពស់បំផុតក្នុងឆ្នាំនេះ។ អ្នកជំនាញ CI Capital លោក Sara Boutros បានប៉ាន់ប្រមាណថា ប្រាក់ចំណូលរបស់ក្រុមហ៊ុន Emaar អាចឈានដល់ ៩.៣ ពាន់លានដុល្លារ នៅឆ្នាំនេះ កើនឡើង ១០% បើធៀបនឹងឆ្នាំ ២០២២។

ទីផ្សារអចលនទ្រព្យឌូបៃកំពុងរីកចម្រើនយ៉ាងខ្លាំង បន្ទាប់ពីការធ្លាក់ចុះ ៧ ឆ្នាំជាប់ៗគ្នា ទីផ្សារនេះបានចាប់ផ្តើមងើបឡើងវិញពី Covid-១៩ ដោយសាររលកនៃអ្នកទិញបរទេស ដូចជា រុស្ស៊ី និងមហាសេដ្ឋីរូបិយប័ណ្ណឌីជីថល រង្វង់ហិរញ្ញវត្ថុអាស៊ី រហូតដល់អ្នកមានជនជាតិចិន។
កាលពីដើមខែនេះ ឈ្មួញកណ្តាលអចលនទ្រព្យដែលមានមូលដ្ឋាននៅទីក្រុងឌូបៃ Allsopp បាននិយាយថាការលក់ទៅឱ្យជនជាតិចិនបានកើនឡើង ១៣០% នៅក្នុងឆមាសទីមួយនៃឆ្នាំនេះ ក្នុងនោះប្រតិបត្តិការសាច់ប្រាក់មានរហូតដល់ ៧៨%។

នាយកប្រតិបត្តិក្រុមហ៊ុន Allsopp លោក Lewis Allsopp បាននិយាយថា “ប្រជាជនចិនតែងតែបង់ប្រាក់ជាសាច់ប្រាក់សម្រាប់ប្រតិបត្តិការអចលនទ្រព្យ” មូលហេតុគឺដោយសារអតិថិជនមួយក្រុមនេះមានដើមទុនគ្រប់គ្រាន់មុននឹងសម្រេចចិត្តទៅបណ្តាក់ទុននៅក្រៅប្រទេស ដូច្នេះពួកគេអាចទូទាត់ជាសាច់ប្រាក់ភ្លាមៗ ដើម្បីមានភាពងាយស្រួល។

លោក Lewis បានព្យាករណ៍ថា ភ្ញៀវទេសចរចិននឹងប្រកួតប្រជែងជាមួយភ្ញៀវរុស្ស៊ីនៅក្នុងទីផ្សារអចលនទ្រព្យឌូបៃនៅចុងឆ្នាំនេះ ដោយពួកគេចូលចិត្តការអភិវឌ្ឍន៍ប្រណីតដែលមានម៉ាកយីហោ និងវីឡាទំនើប។ ដូចនេះ តម្រូវការវីឡា ផ្ទះល្វែង និងអាផាតមិនប្រណីតនឹងបន្តកើនឡើងក្នុងឆមាសទីពីរនៃឆ្នាំនេះ៕
ប្រភព៖vnexpress

ប្រទេសវៀតណាម ៖ នៅពេលនិយាយពីកាហ្វេ ប្រាកដណាស់ថា យើងនឹងនឹកឃើញដល់ប្រទេសប្រេស៊ីល ឬកូឡុំប៊ី ហើយយើងមិនបានគិតដល់វៀតណាមទេ ។ ប៉ុន្តែវៀតណាមគឺជាប្រទេសនាំចេញកាហ្វេក្នុងលំដាប់ទី២ លើពិភពលោក ។ មុននឹងសួរថា ហេតុអ្វីវៀតណាមក្លាយជាប្រទេសនាំចេញកាហ្វេដ៏ច្រើនបែបនេះ ? យើងត្រូវត្រឡប់ទៅមើលចំណុចចាប់ផ្តើម ដែលកាហ្វេបានមកដល់ប្រទេសវៀតណាម ។

កាលពីឆ្នាំ១៨៥៧ ជនជាតិបារាំងបាននាំគ្រាប់កាហ្វេមកកាន់ប្រទេសវៀតណាម ហើយកាហ្វេអារ៉ាប៊ីកា គឺជាពូជកាហ្វេដំបូងគេដែលបានដាំដុះនៅប្រទេសនេះ ដោយសារវៀតណាមមានអាកាសធាតុក្តៅអំណោយផលដល់ដំណាំកាហ្វេ ទើបធ្វើឱ្យឧស្សាហកម្មនេះចាប់ផ្តើមរីកចម្រើននៅតំបន់អណ្ណាម ។ ក្រោយមក នៅឆ្នាំ១៩៥០ ប្រទេសវៀតណាមបានបង្កើតរោងចក្រកែច្នៃកាហ្វេលើកដំបូង ហើយពលរដ្ឋវៀតណាមគិតថា កាហ្វេជាដំណាំនៃក្តីសង្ឃឹម ព្រោះពួកគេអាចនាំចេញវាក្នុងតម្លៃខ្ពស់ រហូតដល់ពេលកើតសង្គ្រាមនៅវៀតណាម បានធ្វើឱ្យដំណាំកាហ្វេត្រូវផ្អាក ។

ក្រោយពីបញ្ចប់សង្គ្រាមវៀតណាមនៅឆ្នាំ១៩៧៥ រដ្ឋាភិបាលបានអនុវត្តប្រព័ន្ធសេដ្ឋកិច្ចបែបសង្គមនិយម ក្នុងនោះរដ្ឋាភិបាលកាន់ពាណិជ្ជកម្មផ្តាច់មុខ ប៉ុន្តែផ្នែកឯកជនខ្វះខាតការធ្វើពាណិជ្ជកម្មសេរី ។ ដូច្នេះ ការអនុវត្តប្រព័ន្ធសេដ្ឋកិច្ចនេះមិនអាចនាំប្រទេសវៀតណាមឱ្យអភិវឌ្ឍន៍ទៅមុខបានទេ ។

ទោះយ៉ាងណា នៅឆ្នាំ១៩៨៦ ប្រទេសវៀតណាមបានធ្វើកំណែទម្រង់សេដ្ឋកិច្ចថ្មីឆ្ពោះទៅរកប្រព័ន្ធមូលធននិយម ដោយចាប់ផ្តើមអនុវត្តគោលនយោបាយសេដ្ឋកិច្ច «Doi Moi» ។ ចាប់ពីពេលនោះមក សេដ្ឋកិច្ចវៀតណាមបានរីកចម្រើនបន្តិចម្តងៗ និងធ្វើឱ្យឧស្សាហកម្មកាហ្វេចាប់ផ្តើមរីកលូតលាស់ម្តងទៀត ។ វៀតណាមបានចុះហត្ថលេខាលើកិច្ចព្រមព្រៀងពាណិជ្ជកម្មជាមួយប្រទេសក្នុងតំបន់ និងក្រៅតំបន់ ដោយចាប់ពីឆ្នាំ១៩៩០ ដល់ឆ្នាំ១៩៩៩ ទិន្នផលផលិតកាហ្វេនៅវៀតណាមបានរីកចម្រើនជាបន្តបន្ទាប់ គឺចាប់ពីប្រមាណ២០% ទៅ៣០% ជារៀងរាល់ឆ្នាំ ។ ចុងក្រោយ វៀតណាមបានក្លាយជាប្រទេសនាំចេញកាហ្វេដ៏ច្រើនស្ថិតក្នុងលំដាប់ទី២ លើពិភពលោក និងនាំមុខប្រទេសកូឡុំប៊ី ។

ក្រៅពីនេះ ឧស្សាហកម្មកាហ្វេបានរួមចំណែកយ៉ាងសំខាន់ក្នុងការជំរុញសេដ្ឋកិច្ចជាតិ និងជួយបង្កើតការងារដល់ពលរដ្ឋ ក៏ដូចជាកាត់បន្ថយភាពក្រីក្រផងដែរ ។ នៅឆ្នាំ១៩៩៤ ពលរដ្ឋវៀតណាមស្ថិតក្នុងភាពក្រីក្រប្រមាណ៦០% ប៉ុន្តែបច្ចុប្បន្ន ភាពក្រីក្រនៅសល់ត្រឹមតែ១០% ប៉ុណ្ណោះ ។ កត្តាជោគជ័យរបស់កាហ្វេវៀតណាមមួយទៀតបន្ថែមលើកំណែទម្រង់សេដ្ឋកិច្ច គឺវៀតណាមបានជ្រើសរើសដាំកាហ្វេរ៉ូប៊ូស្តា ដែលមានបរិមាណជាតិកាហ្វេអ៊ីនពី១,៦% ដល់២,៧% ដោយមានពណ៌កាហ្វេខាប់ និងមានរសជាតិខ្លាំងជាងកាហ្វេអារ៉ាប៊ីកា ។ ដូច្នេះ កាហ្វេវៀតណាមអាចនាំចេញទៅកាន់ប្រទេសលោកខាងលិច និងបណ្តាប្រទេសផ្សេងទៀតយ៉ាងឆាប់រហ័ស ។

តាមទិន្នន័យរបស់សមាគមកាហ្វេវៀតណាមបង្ហាញថា កាហ្វេជាផលិតផល១ ក្នុងចំណោមផលិតផលកសិកម្មចំនួន៦ ដែលបានបង្កើតប្រាក់ចំណូលជាង៣ពាន់លានដុល្លារអាមេរិកក្នុង១ឆ្នាំ ហើយវៀតណាមបាននាំចេញកាហ្វេទៅប្រទេសជាង៨០ នៅលើពិភពលោក ក្នុងនោះអតិថិជនធំបំផុត គឺសហភាពអឺរ៉ុប, អាមេរិក, រុស្ស៊ី, ជប៉ុន និងអង់គ្លេស ។ ចំណែកអង្គការកាហ្វេអន្តរជាតិបង្ហាញថា វៀតណាមនៅតែកាន់តំណែងជាប្រទេសនាំចេញកាហ្វេច្រើនបំផុតក្នុងលំដាប់ទី២ លើពិភពលោក បើគិតចាប់ពីខែកុម្ភៈ ឆ្នាំ២០២១ ដល់ខែមករា ឆ្នាំ២០២២ ៕ ប្រភព ៖ AEC connect

ប្រទេសអារ៉ាប៊ីសាអូឌីត ៖ ប្រទេសអារ៉ាប៊ីសាអូឌីតបានប្រឈមនឹងបម្រែបម្រួលអាកាសធាតុ ដូចជា ខ្យល់ព្យុះ និងភ្លៀងធ្លាក់ខ្លាំងនៅទីក្រុងមេកា ខណៈពេលពលរដ្ឋកំពុងតែនាំគ្នាធ្វើបុណ្យ ។ លើសពីនេះ មានរន្ទះបាញ់ជាច្រើនលើកផងដែរ នៅក្បែរអគារដាក់តាំងរូបនាឡិកាដ៏ល្បីល្បាញក្នុងទីក្រុងនេះ ។

ទីក្រុងមេកា គឺជានគរស័ក្តិសិទ្ធិមួយរបស់សាសនាឥស្លាម បានប្រឈមនឹងខ្យល់ព្យុះយ៉ាងខ្លាំង និងភ្លៀងធ្លាក់ជាបន្តបន្ទាប់ ដែលធ្វើឱ្យវាលខ្សាច់នៅតំបន់ខ្លះក្លាយទៅជាសមុទ្រ ហើយសាលាជាច្រើនកន្លែងត្រូវបិទទ្វារភ្លាមៗ ។

អ្នកនាំពាក្យមជ្ឈមណ្ឌលឧតុនិយមជាតិ Hussein Al-Qahtani បានបង្ហោះក្នុងបណ្តាញសង្គម X ដែលជាឈ្មោះថ្មីរបស់ Twitter ថា ខ្យល់ព្យុះដែលកើតឡើងនេះ បណ្តាលឱ្យខ្យល់បក់ខ្លាំងក្នុងចម្ងាយជាង៨០គីឡូម៉ែត្រក្នុង១ម៉ោង ។ ចំណែកនៅតំបន់ខ្លះទៀត យានជំនិះទាំងអស់មិនអាចធ្វើដំណើរនៅតាមផ្លូវបានទេ ដោយសារមានទឹកជំនន់ ខណៈមនុស្សម្នាបានរត់គេចពីខ្យល់ព្យុះ ។

អាជ្ញាធររាយការណ៍ថា គ្មានគ្រោះថ្នាក់ ឬអ្នករងរបួសដោយសារគ្រោះមហន្តរាយធម្មជាតិលើកនេះទេ ចំណែកទឹកជំនន់ភ្លាមៗបានស្រកចុះខ្លះហើយនៅតំបន់មួយចំនួន ប៉ុន្តែស្ថានការណ៍នេះពុំទាន់ល្អប្រសើរនៅឡើយទេ ។ គ្រោះធម្មជាតិលើកនេះ គឺស្រដៀងគ្នានឹងខ្យល់ព្យុះកាលពីឆ្នាំ២០១៥ នៅប្រទេសអារ៉ាប៊ីសាអូឌីត ដែលធ្វើឱ្យពលរដ្ឋស្លា.ប់រហូតដល់ជាង១០០នាក់ និងរងរបួសរាប់រយនាក់ទៀត ។

ក្នុងអំឡុងពេលកើតខ្យល់ព្យុះ អាជ្ញាធរប្រចាំទីក្រុងមេកាបានប្រកាសឱ្យបិទសាលារៀនគ្រប់កន្លែង ចាប់ពីថ្ងៃទី២៣ ខែសីហា ឆ្នាំ២០២៣ ហើយឱ្យសាលារៀនទាំងនេះត្រូវបង្រៀនសិស្សតាមអនឡាញ ដើម្បីឱ្យគ្រប់គ្នាមានសុវត្ថិភាព ។ អ្នកឃើញហេតុការណ៍ជាច្រើននាក់ប្រាប់ថា ស្ថានការណ៍នៅបរិវេណ Masjid al-Haram គួរឱ្យខ្លាចបំផុត ហើយគ្រប់យ៉ាងបានកើតឡើងក្នុងរយៈពេលត្រឹមតែប៉ុន្មាននាទីប៉ុណ្ណោះ ។ វាជាខ្យល់ព្យុះដ៏អាក្រក់បំផុតតាមអ្វីដែលពួកគេចាំបាន ៕ ប្រភព ៖ Nation World