ក្នុងរយៈពេលប៉ុន្មានខែកន្លងមកនេះ ទីក្រុងប៉េកាំងបានទម្លាក់អត្រាការប្រាក់ បន្ធូរបន្ថយគោលនយោបាយលើវិស័យអចលនទ្រព្យ និងកាត់បន្ថយការគ្រប់គ្រងរបស់វិស័យឯកជន ដើម្បីស្តារកំណើនឡើងវិញ។ បន្ទាប់ពីមានកំណើនយ៉ាងឆាប់រហ័សជាច្រើនទសវត្សរ៍សេដ្ឋកិច្ចរបស់ប្រទេសចិនកំពុងប្រឈមនឹងឧបសគ្គមិនធ្លាប់មានពីមុនមក។
សេដ្ឋកិច្ច ១៨ ពាន់ពាន់លានដុល្លារនេះកំពុងធ្លាក់ចុះ។ អ្នកប្រើប្រាស់មានការស្ទាក់ស្ទើរក្នុងការចំណាយការនាំចេញធ្លាក់ចុះឯតម្លៃក៏ធ្លាក់ចុះ ហើយយុវជនជាង ២០% អត់ការងារធ្វើក្រុមហ៊ុនអចលនទ្រព្យឯកជនធំជាងគេរបស់ប្រទេសដែលមានគម្រោងចំនួន ៣,០០០កំពុងស្ថិតក្នុង គ្រោះថ្នាក់នៃការលុបចោល ។

ដើម្បីដោះស្រាយបញ្ហាដែលកំពុងប្រឈម ខាងក្រោមនេះជាវិធានការដែលចិនបានប្រកាសនាពេលថ្មីៗនេះ ដើម្បីស្តារសេដ្ឋកិច្ចឡើងវិញ៖

ទីផ្សារហិរញ្ញវត្ថុ
ប្រទេសចិនបានកាត់បន្ថយពន្ធផ្ទេរប្រាក់ចំនួន ៥០% លើប្រតិបត្តិការភាគហ៊ុន ដោយចាប់ផ្តើមពីថ្ងៃទី២៨ ខែសីហា ហើយនេះជាលើកទីមួយហើយដែលពួកគេបានកាត់បន្ថយពន្ធនេះចាប់តាំងពីឆ្នាំ២០០៨។ ការផ្លាស់ប្តូរនេះគឺមានបំណងពង្រឹងទីផ្សារភាគហ៊ុនក្នុងអំឡុងពេលលក់ចេញ។ អាជ្ញាធរមូលបត្ររបស់ប្រទេសចិនក៏បានសន្យាផងដែរក្នុងការកាត់បន្ថយល្បឿននៃការបោះផ្សាយលក់មូលបត្រ IPO និងកំណត់ទំហំនិងភាពញឹកញាប់នៃការចេញភាគហ៊ុនកាន់តែច្រើនរបស់ក្រុមហ៊ុនដែលមានលទ្ធផលអាជីវកម្មមិនល្អ។ នៅដើមខែសីហា អាជ្ញាធរក៏បានស្នើសុំមូលនិធិវិនិយោគមួយចំនួនកុំឱ្យលក់ភាគហ៊ុនសុទ្ធ។
ក្រៅពីនេះ ដើម្បីទប់ស្កាត់ការធ្លាក់ចុះនៃរូបិយប័ណ្ណក្នុងស្រុក ធនាគារកណ្តាលនៃប្រទេសចិន (PBOC) បានធ្វើសកម្មភាពយ៉ាងឆាប់រហ័សក្នុងរយៈពេលប៉ុន្មានសប្តាហ៍កន្លងមកនេះ។ ពួកគេកំណត់អត្រាយោងឡើងវិញជារៀងរាល់ថ្ងៃ ធនាគារពាណិជ្ជក៏កំពុងលក់យ៉ាងសកម្មនូវប្រាក់ដុល្លារអាម៉េរិកផងដែរ។ ចំណាត់ការនេះបានកើតឡើងបន្ទាប់ពីកិច្ចប្រជុំកាលពីខែកក្កដារបស់មន្ត្រីចិន។ នៅក្នុងនោះ មេដឹកនាំបានសន្យាថានឹង “ធ្វើឱ្យទីផ្សារមូលធនមានភាពរស់រវើក” និង “រក្សាតម្លៃប្រាក់យន់ឱ្យស្ថិតស្ថេរក្នុងកម្រិតមួយដែលមានតុល្យភាព”។

អចលនទ្រព្យ
នៅក្នុងកិច្ចប្រជុំខែកក្កដា មន្ត្រីចិនបានផ្តល់សញ្ញាដើម្បីបន្ធូរបន្ថយគោលនយោបាយលើទីផ្សារអចលនទ្រព្យ។ ទោះជាយ៉ាងណាក៏ដោយ អ្នកសង្កេតការណ៍ជឿថាគោលនយោបាយរឹងមាំមួយចំនួនដែលបានអនុវត្តក្នុងប៉ុន្មានឆ្នាំចុងក្រោយនេះ ដើម្បីទប់ស្កាត់ទីផ្សារអចលនទ្រព្យនឹងនៅតែរក្សាបានហើយលុបចោលការរឹតបន្តឹងលើការទិញផ្ទះ ក្រោយវិបត្តិអចលនទ្រព្យធ្វើទុក្ខខ្លាំង។
នៅក្នុងកិច្ចប្រជុំរដ្ឋាភិបាលមួយកាលពីចុងខែកក្កដា មន្ត្រីចិនបានជំរុញឱ្យទីក្រុងនានាបង្កើតវិធានការដើម្បី “លើកទឹកចិត្តឱ្យមានការអភិវឌ្ឍប្រកបដោយសុខភាពល្អនៃទីផ្សារអចលនទ្រព្យ” ស្របតាមតម្រូវការ។ ពួកគេក៏បានជំរុញឱ្យបង្កើនការស្រាវជ្រាវ និងការសាងសង់គំរូឧស្សាហកម្មថ្មី។
នៅថ្ងៃទី១០ ខែកក្កដា ទីក្រុងប៉េកាំងក៏បានពង្រីករយៈពេលសងត្រលប់សម្រាប់ក្រុមហ៊ុនអចលនទ្រព្យផងដែរ ដើម្បីធានាបាននូវការប្រគល់គម្រោងទាន់ពេលវេលា។ ធនាគារកណ្តាលនៃប្រទេសចិន( PBOC) ក៏បានជំរុញឱ្យធនាគារកាត់បន្ថយអត្រាការប្រាក់លើប្រាក់កម្ចីទិញផ្ទះដែលមានស្រាប់។

ទំនិញប្រើប្រាស់
កាលពីថ្ងៃទី១៨ ខែកក្កដា ទីភ្នាក់ងាររដ្ឋាភិបាលចិនបានគូសបញ្ជាក់អំពីផែនការជំរុញការប្រើប្រាស់ ចាប់ពីឧបករណ៍អគ្គិសនី រហូតដល់គ្រឿងសង្ហារឹម។ អាជ្ញាធរមូលដ្ឋានត្រូវបានលើកទឹកចិត្តឱ្យជួយអ្នកស្រុកជួសជុលផ្ទះរបស់ពួកគេ។ មនុស្សក៏នឹងត្រូវបានគាំទ្រជាមួយនឹងឥណទានដើម្បីទិញគ្រឿងសង្ហារឹមផងដែរ។ នៅថ្ងៃទី២៨ ខែកក្កដា ពួកគេបានបន្តដាក់ចេញនូវផែនការបង្កើនការផលិតទំនិញប្រើប្រាស់តូចៗ ដែលស្មើនឹង ២៥% នៃការនាំចេញរបស់ប្រទេសចិន។ គោលនយោបាយរួមមានការបង្កើនការលក់ផលិតផលបៃតង និងផលិតផលផ្ទះឆ្លាតវៃនៅតំបន់ជនបទ និងការពង្រីកផលិតផលប្រើប្រាស់ថាមពលថ្ម ដូចជារថយន្តអគ្គិសនីជាដើម។ អាជីវកម្មខ្នាតតូចក៏នឹងមានលទ្ធភាពទទួលបានដើមទុនកាន់តែប្រសើរផងដែរខណៈពិធីបុណ្យដែលមានចំណីអាហារជាច្រើននឹងត្រូវធ្វើឡើងផងដែរ។

បច្ចេកវិទ្យា
និយតករអ៊ីនធឺណិតរបស់ប្រទេសចិនក្នុងខែសីហា នេះបានជួបជាមួយអ្នកដឹកនាំក្រុមហ៊ុនបរទេសរាប់សិបនាក់ ដើម្បីពិភាក្សាអំពីច្បាប់ស្តីពីឯកជនភាពទិន្នន័យថ្មីៗនេះនឹងធានាដល់ពហុជាតិសាសន៍ឡើងវិញអំពីប្រតិបត្តិការរបស់ពួកគេនៅក្នុងសេដ្ឋកិច្ចធំទីពីររបស់ពិភពលោក។ នៅចុងខែកក្កដា រដ្ឋាភិបាលចិនក៏បានប្រកាសអំពីការធ្វើឱ្យប្រសើរឡើងនូវលក្ខខណ្ឌប្រតិបត្តិការសម្រាប់សហគ្រាសឯកជនបន្ទាប់ពីរយៈពេលពីរឆ្នាំនៃការរឹតបន្តឹងការគ្រប់គ្រង។

អាជ្ញាធរបានសន្យាថានឹងប្រព្រឹត្តចំពោះសហគ្រាសឯកជនដូចជាសហគ្រាសរដ្ឋ ពិគ្រោះជាមួយអ្នកដឹកនាំអាជីវកម្មនៅពេលបង្កើតគោលនយោបាយថ្មី និងកាត់បន្ថយឧបសគ្គសម្រាប់ក្រុមហ៊ុនថ្មី។ អាជ្ញាធរចិនក៏បានបន្ធូរបន្ថយបទប្បញ្ញត្តិសម្រាប់សេវាកម្មដូចជា ChatGPT និងបានស្នើឱ្យធនាគារបង្កើនការគាំទ្រសម្រាប់ការទិញយកទាក់ទងនឹងបច្ចេកវិទ្យា៕

រថយន្ត
គណៈកម្មាធិការកំណែទម្រង់ និងអភិវឌ្ឍន៍របស់ប្រទេសចិន (NDRC) កាលពីថ្ងៃទី២១ ខែកក្កដា បានប្រកាសពីផែនការ ១០ ជំហានដើម្បីបង្កើនការទិញរថយន្ត ជាពិសេសអ្នកដែលប្រើប្រាស់បច្ចេកវិទ្យាថ្មី ខណៈពេលដែលកាត់បន្ថយតម្លៃគិតថ្លៃ និងការពន្យាពេលការផ្តាច់ពន្ធ។ កាលពីខែមុន ក្រសួងពាណិជ្ជកម្មចិនបានចាប់ផ្តើមយុទ្ធនាការរយៈពេលប្រាំមួយខែដើម្បីជំរុញការលក់រថយន្ត និងការពេញនិយមរថយន្តអគ្គិសនីនៅតាមតំបន់ជនបទ។

សហគ្រាសឯកជន
កាលពីដើមខែនេះ NDRC បាននិយាយថា ខ្លួននឹងលើកកម្ពស់យន្តការមួយដើម្បីចងក្រងឯកសារ និងកាត់បន្ថយសកម្មភាពមិនត្រឹមត្រូវរបស់ភ្នាក់ងាររដ្ឋប្រឆាំងនឹងសហគ្រាសឯកជន ដូចជាការទូទាត់យឺត ឬការរំលោភលើកិច្ចសន្យា។ ចំណាត់ការនេះគឺសំដៅកែលម្អបរិយាកាសធុរកិច្ចសម្រាប់សហគ្រាសឯកជន។ NDRC ក៏ប្តេជ្ញាក្នុងការបង្កើនការផ្តល់ប្រាក់កម្ចី និងពង្រីកគោលនយោបាយគាំទ្រដើមទុនផ្សេងទៀតសម្រាប់អាជីវកម្មខ្នាតតូច។ ពួកគេលើកទឹកចិត្តក្រុមហ៊ុនឱ្យវិនិយោគលើឧស្សាហកម្មសំខាន់ៗដូចជា ការដឹកជញ្ជូន ទឹក ថាមពលស្អាត ការផលិតទំនើប និងឧបករណ៍កសិកម្មទំនើប។ រដ្ឋាភិបាលក្នុងតំបន់បានដាក់បញ្ចូលគ្នានូវបញ្ជីគម្រោងជាង ២,៩០០ ដែលមានតម្លៃសរុប ៣.២ ពាន់ពាន់លានយន់ (ប្រមាណ៤៤៥ ពាន់លានដុល្លារ) ដែលអាជីវកម្មអាចវិនិយោគបាន៕

គ្រប់សិល្បករទាំងអស់នៅក្នុងប្រទេសថៃ ដែលជាអ្នកបង្កើតស្នាដៃសិល្បៈដ៏មានតម្លៃ និងបង្ហាញសេចក្តីថ្លៃថ្នូររបស់ជាតិ ពួកគេត្រូវតែជាអ្នកអាជីពក្នុងវិស័យសិល្បៈទស្សនីយភាព សិល្បៈសម្តែង និងអក្សរសាស្ត្រ ហើយអ្នកដែលទទួលបានកិត្តិយសជាសិល្បករជាតិនឹងទទួលបានប្រាក់បៀវត្សរ៍ ប្រាក់បំណាច់ និងសុខុមាលភាពដូចខាងក្រោម៖

១.ទទួលបានប្រាក់បៀវត្សរ៍ប្រចាំខែចំនួន ២៥,០០០ បាត (ស្មើនឹង ៧១០ ដុល្លារ)។

២.ទទួលបានប្រាក់សុខុមាលភាពប្រចាំឆ្នាំ ១០០,០០០ បាត (ស្មើនឹង ២,៨៤៣ ដុល្លារ) សម្រាប់ថ្លៃព្យាបាលឯកជន ក៏ដូចជាអ្នកដែលមានសិទ្ធិទទួលបានថ្លៃព្យាបាលតាមព្រះរាជក្រឹត្យ និងប្រាក់សុខុមាលភាពសម្រាប់ការព្យាបាលជំងឺដោយឡែក។

៣.ជំនួយហិរញ្ញវត្ថុក្នុងករណីមានគ្រោះមហន្តរាយផ្សេងៗនឹងទទួលបាន ៥០,០០០ បាត (ស្មើ ១,៤២១ ដុល្លារ) សម្រាប់មនុស្សម្នាក់ក្នុងមួយករណី។

៤.នៅពេលសិល្បករមានជំងឺ ឬពិការភាពនឹងទទួលបានប្រាក់ឧបត្ថម្ភ ៣,០០០ បាត (ស្មើនឹង ៨៥ ដុល្លារ) ក្នុងម្នាក់ជារៀងរាល់ខែ។

៥.ទទួលបាន ២០,០០០ បាត (៥៦៨ ដុល្លារ) ក្នុងម្នាក់សម្រាប់សិល្បករណាដែលបានបាត់បង់ជីវិត។

៦.ធ្វើពិធីបុណ្យសពតាមប្រពៃណីនឹងទទួលប្រាក់ឧបត្ថម្ភចំនួន ៣,០០០បាត (ស្មើ ៨៥ ដុល្លារ) ក្នុងម្នាក់។

៧.ឧបត្ថម្ភធនសម្រាប់ថ្លៃបោះពុម្ពសៀវភៅនៅពេលស្លាប់ចំនួន ១៥០,០០០ បាតក្នុងមនុស្សម្នាក់ (ស្មើនឹង ៤,២៦៤ ដុលា្លរ)៕
ប្រភព៖sanook

ប្រទេសវៀតណាម ៖ សារព័ត៌មានវៀតណាមចុះផ្សាយថា ទីក្រុងហាណូយបានពិចារណាកែលម្អវិធីព្យាបាលអ្នកជំងឺក្នុងមន្ទីរពេទ្យឈានមុខនៅប្រទេសវៀតណាម ដើម្បីកាត់បន្ថយចំនួនអ្នកជំងឺនៅវៀតណាមធ្វើដំណើរទៅក្រៅប្រទេស និងទាក់ទាញអ្នកជំងឺបរទេសមកព្យាបាលនៅវៀតណាមឱ្យបានច្រើន ។

ក្រសួងសុខាភិបាលវៀតណាមបានធ្វើគម្រោងអភិវឌ្ឍន៍ការថែទាំសុខភាពដោយប្រើប្រាស់បច្ចេកវិទ្យាទំនើប ដើម្បីព្យាបាលអ្នកជំងឺនៅប្រទេសវៀតណាម ក៏ដូចជាទាក់ទាញអ្នកជំងឺពីបរទេស និងពលរដ្ឋវៀតណាមដែលរស់នៅក្រៅប្រទេសឱ្យធ្វើដំណើរមកវៀតណាមដើម្បីត្រួតពិនិត្យសុខភាព និងព្យាបាលជំងឺ ។ នេះបើយោងតាមការចុះផ្សាយរបស់សារព័ត៌មានវៀតណាម ។

មន្ទីរពេទ្យបង្អែកចំនួន៥ រួមទាំងមន្ទីរពេទ្យនាំមុខគេនៅប្រទេសវៀតណាមបានទទួលសំណើឱ្យធ្វើការកែលម្អមន្ទីរពេទ្យ រួមមាន មន្ទីរពេទ្យ Bach Mai, មន្ទីរពេទ្យ Viet Duc, មន្ទីរពេទ្យ 108 Central Military នៅទីក្រុងហាណូយ, មន្ទីរពេទ្យ Cho Ray នៅទីក្រុងហូជីមិញ និងមន្ទីរពេទ្យ Hue Central នៅខេត្តធឿថៀនវ៉េ ។

ប្រធាននាយកដ្ឋានពេទ្យលើកឡើងថា ចំណុចល្អមួយនៃការថែទាំសុខភាពរបស់វៀតណាម គឺអ្នកជំងឺចំណាយប្រាក់តិចជាងគេ បើធៀបនឹងប្រទេសផ្សេងៗនៅតំបន់អាស៊ីអាគ្នេយ៍ ។ សេវាកម្មផ្នែកវេជ្ជសាស្ត្រនៅវៀតណាមដូចជា ការវះកាត់ដោយកាមេរ៉ា Endoscope, ការព្យាបាលជំងឺបេះដូង និងសរសៃឈាម, ការដាក់ធ្មេញប៉សឺឡែន គឺអ្នកជំងឺអាចចំណាយប្រាក់ព្យាបាលត្រឹមតែពាក់កណ្តាលប៉ុណ្ណោះ បើធៀបនឹងការចំណាយប្រាក់ព្យាបាលនៅប្រទេសផ្សេងៗ ។

របាយការណ៍បញ្ជាក់ថា កាលពីឆ្នាំ២០១៧ ពលរដ្ឋវៀតណាមបានចំណាយប្រាក់ជាច្រើនដើម្បីធ្វើដំណើរទៅព្យាបាលជំងឺនៅក្រៅប្រទេស ហើយភាគច្រើន ពួកគេធ្វើដំណើរទៅប្រទេសសិង្ហបុរី, ថៃ និងកូរ៉េខាងត្បូង ៕ ប្រភព ៖ mgronline

ប្រទេសចិន ៖ ប្រទេសចិនបានបើកភ្លើងខៀវសម្រាប់អ្នកដំណើរចូលប្រទេសរបស់ខ្លួន គឺមិនចាំបាច់ពិនិត្យជំងឺកូវីដទៀតទេ ហើយអនុវត្តចាប់ពីថ្ងៃទី៣០ ខែសីហា ឆ្នាំ២០២៣ តទៅ ។ ការប្រកាសលុបចោលការពិនិត្យជំងឺកូវីដនេះ គឺជាការបញ្ចប់វិធានការរឹតបន្តឹងការធ្វើដំណើរដែលចិនបានអនុវត្តអស់រយៈពេលជាង៣ឆ្នាំ ។

កាលពីថ្ងៃទី២៨ ខែសីហា ឆ្នាំ២០២៣ លោក Wang Wen Bin អ្នកនាំពាក្យក្រសួងការបរទេសថ្លែងថា ចិននឹងមិនបង្ខំឱ្យអ្នកដំណើរចូលប្រទេសចិនត្រូវបង្ហាញភស្តុតាងការពិនិត្យជំងឺកូវីដមានលទ្ធផលអវិជ្ជមានទៀតទេ ។ ចិននឹងចាប់ផ្តើមលុបចោលវិធានការពិនិត្យជំងឺកូវីដមុនចូលប្រទេស ចាប់ពីថ្ងៃទី៣០ ខែសីហា តទៅ ។ ចំណែកសារព័ត៌មាន AP ចុះផ្សាយថា ការលុបចោលវិធានការបង្ហាញលទ្ធផលពិនិត្យជំងឺកូវីដលើកនេះ គឺជាជំហានដ៏សំខាន់ដើម្បីបញ្ចប់វិធានការតឹងតែងពាក់ព័ន្ធនឹងជំងឺនេះ ដែលចិនបានអនុវត្តតាំងពីឆ្នាំ២០២០ ។

ប្រទេសចិនបានលុបចោលវិធានការកូវីដស្មើសូន្យកាលពីខែធ្នូ ឆ្នាំ២០២២ ក្រោយពីចិនអនុវត្តវិធានការនេះយ៉ាងតឹងតែងអស់រយៈពេលជាច្រើនឆ្នាំ ហើយពេលខ្លះ ចិនត្រូវបិទប្រទេសទាំងស្រុង និងដាក់ឱ្យអ្នកឆ្លងជំងឺកូវីដនៅដាច់ដោយឡែករយៈពេលយូរ ។ ហេតុនេះ អ្នកធ្វើដំណើរចូលប្រទេសចិនចាំបាច់ត្រូវនៅដាច់ដោយឡែកក្នុងសណ្ឋាគារជាច្រើនសប្តាហ៍តាមការកំណត់របស់រដ្ឋាភិបាល ។

ទោះយ៉ាងណា ប្រទេសចិននៅតែអនុវត្តវិធានការតឹងតែងមួយចំនួនដូចជា ការបង្ហាញលទ្ធផលពិនិត្យជំងឺកូវីដប្រភេទ Antigen ខណៈរបាយការណ៍បញ្ជាក់ថា គោលនយោបាយកូវីដស្មើសូន្យបានធ្វើឱ្យសេដ្ឋកិច្ចចិនធ្លាក់ចុះ ។ លើសពីនេះ វិធានការខាងលើបានធ្វើឱ្យអត្រាគ្មានការងារធ្វើកើនឡើង រួមទាំងមានការធ្វើបាតុកម្មផងដែរ ៕ ប្រភព ៖ Bangkok biznews

រដ្ឋធានីវ៉ាស៊ីនតោន៖ ស្របពេលស្ថានការណ៍ នៅក្នុងតំបន់ឥណ្ឌូ-ប៉ាស៊ីហ្វិក កំពុងតែឡើងកម្ដៅយ៉ាងខ្លាំង សហរដ្ឋអាមេរិក មានផែនការដាក់ពង្រាយនូវយន្ដហោះគ្មានមនុស្សបើក ឬ ដ្រូន មានចំនួនរាប់ពាន់គ្រឿង សម្រាប់ប្រឈមមុខជាមួយនឹងកងទ័ពរំដោះប្រជាជនចិន។

គេហទំព័ររបស់បណ្ដាញទូរទស្សន៍អារ៉ាប់អន្ដជាតិ Alarabiya News បានចេញផ្សាយ កាលពីព្រឹក ថ្ងៃអង្គារ ទី២៩ ខែសីហា ថា មន្រ្ដីជាន់ខ្ពស់មួយរូប នៃក្រសួងការពារជាតិសហរដ្ឋអាមេរិក បានបញ្ជាក់ កាលពីថ្ងៃចន្ទ (ទី២៨ ខែសីហា) ថា មន្ទីរបញ្ចកោណ មានផែនការដាក់ពង្រាយដ្រូន រាប់ពាន់គ្រឿង នៅក្នុងរយៈពេល២ឆ្នាំខាងមុខនេះ សម្រាប់ត្រៀមខ្លួនទប់ទល់ ប្រឆាំងនឹងកងទ័ពរបស់ចិន។

លោកស្រី ខាធ្លីន ហ៊ីកស៍ (Kathleen Hicks) អនុរដ្ឋមន្រ្ដី ក្រសួងការពារជាតិសហរដ្ឋអាមេរិក បានបញ្ជាក់ នៅក្នុងសន្និសីទបច្ចេកវិទ្យាយោធា នៅក្នុងរដ្ឋធានីវ៉ាស៊ីនតោន ថា «អាទិភាពដ៏ចម្បងរបស់រដ្ឋាភិបាលក្រុងប៉េកាំង ផ្ដោតលើកម្លាំង រួមមាន នាវាចម្បាំង មីស៊ីល និង ចំនួនកងទ័ព ព្រមទាំងសម្ភារសឹកដ៏ច្រើនបំផុតរបស់ពួកគេ។ យើងនឹងប្រឈមមុខជាមួយនឹងកងទ័ពរំដោះប្រជាជនចិន ដោយកម្លាំងយោធារបស់យើងផ្ទាល់។ ប៉ុន្តែយើងនឹងពិបាករៀបចំផែនការ ពិបាកវាយ និង ពិបាកយកឈ្នះ»។

លោកស្រី អនុរដ្ឋមន្រ្ដី ក្រសួងការពារជាតិសហរដ្ឋអាមេរិក បានសង្កត់ធ្ងន់ ថា «គោលដៅដ៏សំខាន់ អាចទទួលលទ្ធផល គឺការដាក់ពង្រាយដ្រូនរាប់ពាន់គ្រឿង នៅក្នុងតំបន់ជាច្រើន នៅក្នុងរយៈពេល ចន្លោះពី១៨ខែទៅ២៤ខែខាងមុខនេះ។

សហរដ្ឋអាមេរិក បានអះអាង ថា ប្រទេសចិន នឹងក្លាយជាបញ្ហាប្រឈមជាបន្តបន្ទាប់របស់រដ្ឋាភិបាលក្រុងវ៉ាស៊ីនតោន ហើយកំពុងតែស្វែងរកនូវការរារាំងជម្លោះ ជាមួយរដ្ឋាភិបាលក្រុងប៉េកាំង ជាពិសេស ជុំវិញបញ្ហាកោះតៃវ៉ាន់ គ្រប់គ្រង ដោយខ្លួនឯង តាមបែបលទ្ធិប្រជាធិបតេយ្យ។

រដ្ឋាភិបាលក្រុងប៉េកាំង តែងតែអះអាង អំពីដែនអធិបតេយ្យភាពរបស់ចិន នៅលើកោះតៃវ៉ាន់។ បន្ថែមពីលើនេះ ក្រុងប៉េកាំង តែងតែចិញ្ចឹមចិត្ត អស់រយៈពេលជាយូរមកហើយ ដើម្បីប្រើប្រាស់កម្លាំងយោធា នៅថ្ងៃណាមួយ សម្រាប់ការដណ្ដើមកាន់កាប់ដែនកោះមួយនេះ យកមកដាក់ឲ្យស្ថិតនៅក្រោមការត្រួតត្រារបស់ខ្លួនវិញ ប្រសិនបើចាំបាច់។

ដោយឡែក រដ្ឋាភិបាលក្រុងតៃប៉ិរបស់លោកស្រី សៃ អ៊ីង-វ៉ិន (Tsai Ing-wen) ប្រធានាធិបតីតៃវ៉ាន់ បានច្រានចោលនូវការអះអាងរបស់ក្រុងប៉េកាំង។ ក្រុងតៃប៉ិ បានអះអាង ថា មានតែប្រជាជនតៃវ៉ាន់ ប៉ុណ្ណោះ ទើបអាចសម្រេចជោគវាសនារបស់ខ្លួនបាន។

ជាមួយនឹងការដាក់សម្ពាធ កាន់តែកើនឡើងយ៉ាងខ្លាំង ទាំងនយោបាយ ការទូត សេដ្ឋកិច្ច និង យោធា មកពីប្រទេសចិន ប្រឆាំងនឹងកោះតៃវ៉ាន់ នោះ ក្រុងតៃប៉ិ បានបង្កើននូវការទិញគ្រឿងសព្វាវុធ និង បង្កើននូវការផលិតមីស៊ីលទំនើបៗ នៅក្នុងស្រុក សម្រាប់ពង្រឹងដល់សមត្ថភាពការពាររបស់កងទ័ពតៃវ៉ាន់ ត្រូវត្រៀមខ្លួនទុកជាមុន ដើម្បីទប់ទល់ ប្រឆាំងនឹងការលុកលុយណាមួយរបស់កងទ័ពរំដោះប្រជាជនចិន។

ជាមួយគ្នានេះដែរ លោក តារ៉ូ អាសូ (Taro Aso) អនុប្រធានគណបក្សប្រជាធិបតេយ្យសេរី ដែលកំពុងតែកាន់អំណាច នៅក្នុងប្រទេសជប៉ុន និង ធ្លាប់ធ្វើជានាយករដ្ឋមន្រ្ដីជប៉ុន ចន្លោះពីឆ្នាំ២០០៨ដល់ឆ្នាំ២០០៩ បានបញ្ជាក់ កាលពីដើមខែសីហា ថា បរិយាកាសសន្ដិសុខ កាន់តែតានតឹង នៅច្រកសមុទ្រតៃវ៉ាន់។ បញ្ហានេះ មានន័យ ថា ជប៉ុន សហរដ្ឋអាមេរិក និង បណ្ដាសម្ពន្ធមិត្ដផ្សេងៗទៀត ត្រូវតែបង្ហាញនូវការតាំងចិត្តយ៉ាងមុតមាំ ចូលការពារតៃវ៉ាន់ ប្រសិនបើដែនកោះមួយនេះ ត្រូវរងការវាយប្រហារ មកពីប្រទេសចិន។

លោក តារ៉ូ អាសូ អតីតនាយករដ្ឋមន្រ្ដីជប៉ុន បានសង្កត់ធ្ងន់ នៅក្នុងសុន្ទរកថាមួយ នៅទីក្រុងតៃប៉ិ នៅក្នុងអំឡុងដំណើរទស្សនកិច្ចរបស់គាត់នោះ ថា «អ្វីដែលសំខាន់បំផុត នាពេលនេះ ត្រូវតែធ្វើឱ្យប្រាកដ ថា សង្រ្គាមមិនអាចផ្ទុះឡើង នៅច្រកសមុទ្រតៃវ៉ាន់។ ខ្ញុំជឿ ថា ឥឡូវនេះ ជាពេលវេលាដែលប្រទេសជប៉ុន តៃវ៉ាន់ សហរដ្ឋអាមេរិក និង បណ្ដាប្រទេសផ្សេងៗទៀត មានគំនិតដូចគ្នា ត្រូវតែរៀបចំខ្លួនត្រៀមទុកជាមុន សម្រាប់ចាត់វិធានការ ទប់ស្កាត់ដ៏ខ្លាំងបំផុត ហើយជាការតាំងចិត្ត ដើម្បីប្រយុទ្ធ»។

លោកអនុប្រធានគណបក្សប្រជាធិបតេយ្យសេរី ដែលកំពុងតែកាន់អំណាច នៅក្នុងប្រទេសជប៉ុន បានបន្ថែម ថា ការបង្ហាញយ៉ាងច្បាស់នូវសុច្ឆន្ទៈ ការពារតៃវ៉ាន់ នឹងក្លាយជាទម្រង់រារាំង ដល់សង្គ្រាម នៅច្រកសមុទ្រតៃវ៉ាន់។ ថ្វីបើគាត់មិនបានបញ្ជាក់ អំពីប្រទេសចិន ជាអ្នកឈ្លានពានយ៉ាងណាក្ដី ប៉ុន្តែគាត់បាននិយាយ ថា វាមានសារៈសំខាន់ខ្លាំងណាស់ សម្រាប់ជប៉ុន នៅក្នុងនាមជាអ្នកជិតខាងរបស់តៃវ៉ាន់ និង ប្រទេសដទៃទៀត ត្រូវតែរក្សាសណ្តាប់ធ្នាប់អន្តរជាតិ ហើយក៏ជាការផ្ញើសារមួយ ទៅកាន់ប្រទេសចិន និង សហគមន៍អន្តរជាតិផ្សេងៗទៀតផងដែរ។

លោក តារ៉ូ អាសូ ក្លាយជាមន្ត្រីនយោបាយជាន់ខ្ពស់បំផុតរបស់ប្រទេសជប៉ុន បានទៅធ្វើទស្សនកិច្ច នៅលើកោះតៃវ៉ាន់ ចាប់តាំងពីឆ្នាំ១៩៧២មកស្ថានភាពតានតឹង នៅជុំវិញកោះតៃវ៉ាន់ បានរួមចំណែកដល់ការសម្រេចចិត្តរបស់ជប៉ុន ដែលជាសម្ពន្ធមិត្តដ៏ជិតស្និទ្ធរបស់អាមេរិក កំពុងតែបង្កើននូវការចំណាយ លើវិស័យការពារជាតិរបស់ខ្លួនបន្ថែមទៀត។ លោក តារ៉ូ អាសូ កាលពីនៅកាន់តំណែងជាឧបនាយករដ្ឋមន្រ្ដីជប៉ុន កាលពីអំឡុងឆ្នាំ២០២១ បានហៅការឈ្លានពានណាមួយ ពីប្រទេសចិន ក្លាយជាការគំរាមកំហែង មកលើការរស់រានមានជីវិតរបស់ជប៉ុន។ ដូច្នេះ ជប៉ុន និង សហរដ្ឋអាមេរិក នឹងរួមគ្នាការពារតៃវ៉ាន់ ប្រសិនបើមានឧបទ្ទវហេតុឈ្លានពានកើតឡើង៕